الأمنية

الجزء الثالث و العشرون

الجزء الثالث و العشرون

المخلوق: كاينين سبعة ديال الشروط جوج بالزمان، جوج بالمكان، واحد بصاحب الأمنية، واحد بالأمنية و الشرط الأخير خاص بيا

"الشرطان ديال الزمان هما

الشرط الأول: الليل فين تتحقق الأمنية
الشرط الثاني: الا حققت أمنية الأمنية الثانية خاصها تكون مخالفة للأولى.. متتحققش نفس الأمنية جوج مرات كاين واحد الفاصل زمني بيناتهم لي هو وقت تحقق الأمنية المخالفة

الشرطان ديال المكان هما

الشرط الأول: صاحب الأمنية خاصو يكون داخل لمحيطي باش نحقق ليه الأمنية
الشرط الثاني: الأمنية خاصها متفوتش الكرة الأرضية

الشرط الخاص بصاحب الأمنية: خاص الأمنية تكون باغيها نيت من قبلك

الشرط الخاص بالمخلوق: خاص المخلوق لي هو أنا نكون باغي و قاد و الأهم هو نكون موجود باش نحقق الأمنية

وأخيرا الشرط الخاص بالأمنية: ممنوع تتمنى تلاثة ديال الحوايج حيت عمرني نحققهم و هما: الحب ديال شخص، قتل شخص او احياء شخص ميت حيت هادو ماشي من اختصاصاتي"

المخلوق كمل هضرتو: هادو هما الشروط باش تحقق الأمنية

غير كمل هضرتو تخشى داخل النهر مخلي وراه الما لي تيترش عليهم.. هبة كانت شادة فدراع هشام مخلوعة تترعد حيت شكلو مرعب.. و هشام غير تيشوف بعدم تصديق بلي هادشي يلاه وقع دابا..

صبح الصباح تيعلن على أحداث جديدة

هاد ليوم غيدوز على حساب الخطة لي راسمين بليل غيمشيو لتماك.. من بعد مدوز لعيد ميلاد لينا حيت على مقالت ليهم خاصها تكون هي و هبة حاضرين باش هبة مثيرش الشكوك و حتى دعاء بغات تحضر لعيد ميلاد صاحبتها..

كانو فالمدرسة بجوج دعاء غير بانت ليها هبة جالسة فقاعة ديال الرياضة اتاجهات ليها و هضرات..

دعاء: هاكي!

هبة تتشوف فواحد العلبة مغلفة بتعجب

هبة بعدم تصديق: شنو شارية ليا كادو؟
دعاء بطنز: بقيتي ليا غير نتي!!
هبة تنهدات: و شنو هادشي؟
دعاء: هادا كادو ديال لينا صاحبتي ديال الطفولة خاص نتي تعطيها ليها.. مبغيت تاشي حد يعرف شنو وقع ليا!! و من غدا غادي تكمل حياتي من نهار وقفات..

هبة حركات راسها بآه

دعاء: خاصك متخليها تحل تاشي كادو قبل متشوف ديالي!! هكا تنديرو أنا و ياها.. و حاجة خرى خاصك تكوني فرحانة و نتي تتعطيها الكادو حيت أصلا مكاينش بحالو.. وخا طير و تنزل مستحيل تلقا بحالو!!
هبة بتاسمات: سعداتها بيك!!

دعاء مجاوباتش بقات غير تتشوف فهبة و طلعها و تهبطها عاد هضرات

دعاء: كاينة واحد الخادمة فالدار سميتها نزهة سوليها على الفستان الأسطوري هو لي تلبسي.. حيت دعاء خاصها تلفت الأنظار.. و كاينة واحد النمرة مقيدة فتيليفون باسم حكيمة.. عيطي عليها راها ميكاب أرتيست.. خاص دعاء هي لي تكون نجمة الليلة!
هبة باستغراب: نحمة الليلة فعيد ميلاد صاحبتك؟
دعاء بهدوء: اه!

مشات و خلاتها

هبة مدخلاتش فالعشية باش تستعد للعيد ميلاد.. غير دخلات بانت ليها واحد الخدامة و هي تسولها

هبة: شنو سميتك؟
الخادمة: سميتي خديجة! واش محتاجة شي حاجة؟

هبة حاولات تقلد دعاء لي ديما تتخنزر و هضرات

هبة: فين نزهة؟
خديجة: بغيتيها فشي حاجة؟

هبة معرفات متقول خصوصا الاسم ديال الفستان جاها مضحك.. و خديجة بحالا تقرصات ملي مجاوباتهاش هبة واخا مدارتهاش عن قصد.. مشات و عيطات ليها و جات.. نزهة كانت مرا فالأربعينات..

نزهة بابتسامة بشوشة: لالة دعاء زينة البنات شنو بغيتيني؟
هبة مبتاسمة: الفستان الأسطوري

#بتبع