الأمنية

الجزء الثاني

الجزء الثاني

خلاها و مشا شمات ريحة الماكلة لي تتعجبها لي كريب.. بقات تتمشى بشوية حتى وصلات للصالون لي ماكبير مصغير متوسط الحجم و مرتب مزياان.. كان راجل جالس و واحد لبنت تتحط الفطور.. الطبلة فيها صينية ديال أتاي و صينية ديال القهوة و طبسيل ديال لي كريب.. و طبسيل ديال بانكيك بالفواكه الحمراء.. كل مرة البنت تتخرج و تتحيب معاها شي حاجة تحطها فوق الطبلة.. يلاه راجعة و هي تبان ليها واقفة و تتشوف بحال المصدومة..

سناء: سيري لبسي راك معطلة أ هبة!!
دعاء مفهمات والو: أنا مسميتيش

حلات عينيها بالجهد فاش عينيها جات فلمرايا لي فالحيط.. هاد الوجه فايتة شايفاه لكن معقلاتش فين بدات تترعد عقلها مقادرش يستوعب شنو وقع ولا كيفاش متتشوفش انعكاسها فالمرايا بل انعكاس بنت خرى بقا عقلها تيلعب و حسات بجسمها تقيل او نقولو الجسد لي هي دخيلة فيه تقال و هي تسخف.. جاو عندها تيجريو تيفيقو فيها

سناء: هبة!! فيقي.. مالها؟؟

رشيد هزها من الأرض و حطها فوق السداري

رشيد بتوثر: سيري جيبي لما
سناء بخوف: ها هو!! هاك

رشو عليها لما و سناء جابت لكولونيا داروها ليها فيديها و عطاوها تشمها باش تفيق.. وليد خرج من طواليط غير دخل للصالة شافهم مجمعين على دعاء لي هما تيشوفوها هبة..

وليد مصدوم: مالها؟
رشيد بعتاب: يكما خاصمتي عليها؟
وليد: علاش غنديرها؟ مفهمت والو يلاه شفتها عادي قبل مندخل لطواليط!!

دعاء بدات تتحل عينيها بشوية حاسة بالدوخة متملكاها.. غير شافتهم نفس الأشخاص لي شافتهم قبل متسخف هنا تأكدات بلي هادا ماشي حلم بل حقيقة لي مستحيل تتقبلها.. دفعاتهم بجهد

دعاء(لي فجسد ديال هبة) بالغوات: متقربوووووش ليا ااا  بعدووو مني شكوووون نتوما؟؟ شنو باغين مني بعدو!!

دفعاتهم بكل قوتها بقاو تيشوفو فيها مفاهمين والو خصوصا باها لي تصدم فيها عمرها غوتات فالدار او حتى دفعات شي حد فيهم

وليد بحدة: واش شي حد دار ليك شي حاجة؟ دوي؟؟ شكون قاسك ولا قال ليك كلمة وحدة؟ غير قولي ليا شكون؟؟
رشيد بحدة: وليد سكت!!
وليد بعصبية: راها ختي لي قرب ليها مغاديش نسكت ليه! هي عمرها كانت هكا!! شكون هادا ولا هادي لي مرضوك و رجعوك هاكا غير قولي ليا!!

دعاء خلعها وليد بنبرة صوتو لي باين معصب بزااف.. و هي تسكت منطقات بتاشي حرف من غير ناضت و تاجهات للمرايا تتشوف راسها و عينيها تيهبطو بالدموع

دعاء بحزن: هادي ماشي أنا!! ماشي أنا
رشيد بخوف: هبة!! متخلعيتيش عليك مالك أ بنتي

دعاء خنزرات فيه و هي ترجع للبيت و سدات لباب تلاحت فوق الناموسية و تتبكي و تتشهق.. خلاتهم كلهم مفاهمين والو علاش تصرفات هكاك.. شنو واقع معاها تاشي حد مفهم شي حاجة..

رشيد: صافي خليوها على خاطرها
سناء: واش مغاديش تمشي لمدرستها
وليد خنزر فيها: شوفي غير حالتها كيدايرة بقات ليها غير لمدرسة!!
رشيد: دوزو تفطرو انا غنهضر معاها غير حتى ترتاح شوية
وليد: واخا

جلسو تياكلو فهدوء

نرجعو عند هبة(لي فجسد دعاء)

مقادها فرحة و مبتاسمة خرجات من لبيت من بعد مقررات تفطر مع العائلة ماشي بوحدها فالبيت..  اي واحد شافتو فالخدم تتسلم عليه.. و لقات وحدة هازة لبلاطو غادة بيه باش تحطو فالطبلة مشات لعندها تتجري و خداتو من عندها حطاتو فوق الطابلة مبتاسمة جرات الكرسي و جلسات و بقات تتسنى.. كل مرة تدور جاها فشكل فين الناس لخرين واش غادي تاكل بحدها؟؟ بانت ليها واحد الخادمة و هي تسولها

هبة: عفاك! فين كلشي؟؟ واش غنفطر بوحدي؟
الخادمة باستغراب: و لكن راك ديما تتفطري بوحديتك!!
هبة: كيفاش بوحدي فين ماما فين بابا
الخادمة: سي حسن مسافر هادي تلاث ايام على قبل الخدمة و لالة جميلة ففرانسا حيت هادا هو اسبوع ديال موضة تماك..

هبة معرفات متقول بدات تتاكل و جاها فشكل تاكل بوحدها شافت فالخدامة و دارت ليها اشارة باش تجلس

الخادمة: واش بغيتيني نجلس؟
هبة: مبغيتش ناكل بوحدي عفاك جلسي و ونسيني..

#يتبع