" لم يكن شخصي المفضل فحسب..كان أمانُ روحي وسكينةُ قلبي..كان كل اشيائي الجميلة🌻💛"
ع لسان مزن:
من دون الأيام كنت مشغولة شديد فادي اتصل لي وقال ها ي السمحة ينفع الاقيك متين؟..قلت ليه فادي والله مشغولة وم عندي طريقة اطلع بيها الليلة..قال لي م مشكلة ركزي فشغلك طيب بتصل ليك بعدين..قلت ليه تمام وحنشتاق من هسة..قال لي كتير كتير يلا ي دكتورة ع شغلك.. قفلت منه وفضلت باقي اليوم كله شغالة وم فضيت علشان اتصل ليه حتى..م صدقت اخر اليوم جا وبي وشي اتحركت ع البيت ..لقيت أمي في الصالة وكانت بتتكلم مع خالتي في موضوع الخطوبة الفاضل ليها يومين..شاورت ليها بيدي و طلعت غرفتي..
كنت حانوم ع طول بس لفت انتباهي بوكس اسود رهيب ع التوليت وجنبو كيس..اتحركت ع التواليت ورفعت البوكس كان مغلف بطريقة رهيبة لدرجة م هان علي افتحو..ختيتو ع جنب وفتحت الكيس كان فيه شكلاتات وورود ،، وورقة ملونة فتحت الورقة وكان مكتوب فيها "يليق بك الاستثناء دوما..ويليق بك من الحب ما لا يليق بسواك♡"..
قعدت اتبسم وانا م فاهمة فادي عمل كدة متين..امي جات داخلة علي وهي مبسوطة قالت لي فادي يتعلا م يتدلا ي يمة..جا قبيل وجاب معاه الحاجات دي وطلع ..م قلت ليك حيسعدك ويبسطك ي بتي..ابتسمت وقلت ليها فعلا انا مبسوطة منو جدا..بعد م امي طلعت قبلت ع البوكس وفتحتو ..كان فيه حاجات ميك اب درعههه جدا❤️ ..
شلت تلفوني و اتصلت بفادي ..قال لي روح الروح..قلت ليه ي قلبي جد كدة فرحتني بس ليه تعبت نفسك وانت اساسا م فاضي ومشغول..قال لي اول حاجة مبسوط لانك فرحتي..وبعدين انا لو م فضيت ليك حافضى لمنو بطلي هبل..عارف انك حتكوني جاية من الشغل متنشنة ومودك ضارب فقلت احسنو ليك ي ستهم..قلت ليه وحقيقي يعني حسنتو جدا ..محظوظة بيك شديد انا..قال لي ي ستي والله انا المحظوظ لكن عموما دة المطلوب انك تكوني فرحانة علشان انا تلقائيا بفرح💕..
ــــــــــــــــــــــــــــــــــــــــــــــــــــــــــــ
ع لسان ياسمين:
كنت في الكافتريا مع حسام ..كان باين عليه الارهاق والتعب ..قلت ليه باين انك نفذت وعدك وم اخدت حاجة امس علشان كدة تعبان صح؟..ابتسم وقال لي زي م وعدتك ي ستي م اتناولت حاجة امس اساسا بعد قفلت منك حاولت انوم ع طول..قلت ليه وقدرت تنوم؟!..قال لي يعني تعبت شوية لحد م نمت المهم م تشغلي بالك..قلت ليه بطل تعاملني برسمية زيادة وخلينا نخش في المهم..ع حسب م قريت عن موضوع التخلص من الادمان دة لازم تقابل طبيب مختص علشان مرحلة سحب السموم دي..وفي غيرها مراحل تانية علشان تتعافى تماما ف شنو دي البداية لسه خليك قوي انا واثقة انك حتقدر ..قال لي اي ناوي حاقابل دكتور بس اول حاجة لازم اخد اجازة من الشغل لاني حقيقي م قادر اركز ي ياسمين..قلت ليه معاك حق لازم ترتاح لكن اوعاك تفكر تقرب للحاجات دي تاني..قال لي ي ستي م تخافي م حاقرب وعد..قلت ليه وحتقابل الدكتور متين؟!..قال لي بفتش في الموضوع دة ولم القى دكتور مناسب حاديك خبر..قلت ليه طيب تمام..
اخر الدوام حسام كان متأزم اكتر من الاول وفعلا شال اجازة..طلعت معاه لحد م وصلنا العربية..قلت ليه حسام م اعتقد انك حتقدر تسوق بالصورة دي..قال لي لالا حاقدر عموما كدة خلي بالك من نفسك حافقدك شديد ع فكرة ..قلت ليهو ليه بتتكلم وكانك بتودع فيني؟ابتسم وقال لي ي زولة قاصد علشان م حنتلاقى في الدوام وكدة تاني..قلت ليه م حنتلاقى في الدوام بس حنتلاقى بره عادي ولم تبقى ع موضوع الدكتور حاكون معاك..قال لي باذن الله يلا م اطول عليك وزي م قلت ليك خلي بالك من نفسك وبالجد شكرا ع وجودك اللطيف..قلت ليه حسام والله م متطمنة ليك انا..قال لي بتموتي في النكد ي شيخة يلا يلا سلام..ركب عربيتو وشاور لي بيدو ..ابتسمت ورفعت ليه يدي واتحركت ..
ــــــــــــــــــــــــــــــــــــــــــــــــــــــــــــ
