الطريق كلو انا سرحانة وسماح بتقول لي ريري م مستاهل دة كلو خليك هادية..اول م وصلنا بيت ناس جدي سماح قبلت علي قالت لي اول حاجة انتي ماشة تلاقي اخوانك يعني م ناس اغراب بطلي التوتر دة ..تاني حاجة افردي وشك دا واضحكي م من اولها تكشري للناس كدة في وشهم ..قلت ليها طيب خلينا ننزل ي سماح وسريع سريع نطلع قالت لي غايتو ي ريري انتي مخلوقة عجيبة ارح ارح انزلي.. نزلت ودخلنا ومن جوة سامعين اصوات الناس بتتكلم ..اول م دخلنا كدة لمى قالت ليهم هدي ليها ريان زاتا جات..كلهم اتلفتو علي وانا كنت متوترة بس شوية كدة قويت نفسي..سلمنا ع ناس جدو وحبوبة وعمتي واعمامي ونسوانهم وامي كانت معاهم قلت ليهم حمد لله ع سلامتهم ..حبوبة قالت لي نورتو ي بناتي امشو مع لمى الصالة التانية اخوانك واولاد اعمامك كلهم هناك..لمى ساقتنا اول م وصلنا شفتهم ال 3 قاعدين وكلهم بتونسو وبضحكو..للحظة حسيت قلبي بطعني وحسيت كاني م وحدة منهم💔..لمى قالت ليهم سبرايز ريان وصلت ..كلهم سلمو علي وقالو لي حمد لله ع سلامة اخوانك..اول م وصلتهم سلمو علي ببرود وانا كذلك سلمت عليهم بنفس الاسلوب قلت ليهم حمد لله ع السلامة رامي هز لي راسو وريل ابتسمت لي بالغصب كدة راشد قال لي الله يسلمك ببرود..تقريبا الكل لاحظ البرود البينا فغيرو الموضوع ولمى وريم قامو ضيفونا وكذا..سماح قالت لي بهمس كدة م تاخدي انطباع سئ من اول مرة الجايات اكتر ..رفعت ليها حاجبي وقلت ليها م اظن ..حمرت لي ورجعت تتونس مع الباقين وانا كنت مرة مرة بشارك معاهم..احمد قال لسماح م تقنعي صحبتك دي تنزل معانا الشركة بالمرة ع الاقل الواحد يتعرف ع بت عمو زي الناس..سماح قالت ليهو اصلها كدة البت دي انطوائية بزيادة..قال ليها والله م بنشوفا الا في الامور الطارئة زولة جافية خلاص..كنت باكل في طرف شفايفي باسناني وعادة بعمل الحركة دي لم اتوتر قلت ليهو م القصد بس انا كدة فري ومرتاحة جدا..قال لي ي زولة انتي قولي خير بس والمواعيد دي بنخليك ع راحتك ..قلت ليهو ان شا الله والله نشوف..استمرت الونسة والاولاد كانو مشاركين معاهم وواضح انو علاقتهم ببعضهم حلوة..لؤي قال ليهم بتقرو شنو انتو؟رامي قال ليهو انا It فاضل لي سنة واتخرج ..وراشد قال ليهم شالوني صيدلة في السودان وقبل ريل م تتكلم قال ليهم ريل دي ممتحنة شهادة ..ريل حمرت ليه وقالت ليهو عندي لسان انا🙂..كلهم قعدو يضحكو عليها ..علي قال لريل طيب انتي عايزة تقري شنو؟قالت ليه والله حاشيل علمي احياء ونفسي اقرا طب اسنان ..لينا قالت ليها حلو شديد اسرتكم متنوعة ريري مهندسة ورامي قاري It وراشد صيدلي وانتي تجي تبقي ليهم دكتورة ..رفعت راسي لقيتهم كلهم بعاينو لي ابتسمت ليهم وسكتت ..علي قال ليها اي ماشا الله كل التخصصات عندنا..اتونسو مسافة كدة بعدها قلت لي سماح ارح خلينا نطلع..وقفنا ع حيلنا كلهم بقو يقولو لينا بدري ياخ..قلت ليهم معليش عندنا صحبتنا الليلة عيد ميلادا ومضطرين نمشي وسماح تعاين لي ساي..
ريم قالت لي اوعي تنسي الخطوبة ي ريان علشان بالجد حازعل منك وانتي ي سماح تعالي معاها عليك الله حتكون الخميس الجاي..قلت ليها حنجي ان شا الله..عاينت لاخواني والباقين من بعيد وقلت ليهم يلا سلام..اول م طلعنا الصالة الفيها ناس امي عمتي قالت لي ي بتي متين جيتو لمن ماشين..وامي تشيل تعاين لي..لمى قالت ليها عيد ميلاد صحبتهم علشان كدة..قالت لي خلاص لو كدة لكن تعالي لينا تاني ،،قلت ليها باذن الله..جدي قال لي
م تنقطعي ي بت الغالي ..قلت ليهو حاضر ي جدي ..اول م طلعنا سماح قالت لي بتكذبي ليه ؟ياتو عيد ميلاد دة؟قلت ليها زهجت من القعدة بس حسيت وكاني غريبة عنهم..قالت لي انتي هبلة ليس الا خلينا نمشي لينا اي محل ظريف كدة ونتفاهم..ركبت معاها وصلنا محل عصاير وايسكريم كدة نزلنا سماح طلبت ايسكريم وجاتني راجعة..قالت لي اهلك حلوين وظريفين بس المساخة حقتك انتي..قلت ليها سماح انتي م مريتي بظروفي علشان كدة م حتحسي بالانا حاساه..قالت لي انتي ليه تخلي الحاجات الحصلت زمان تاثر ع المستقبل؟لمة الاهل زيها ماف ي ريان وخصوصا اهلك ديل بريدوك شديد..قلت ليها م عارفة حاسة اني بعيدة منهم وم بنتمي ليهم انا م اتعودت عليهم من زمان ي سماح واحسن نتجاوز الموضوع دة قالت لي خلاص روقي نتجاوزهم ساي ي زولتي..اتصورنا مع بعض كتير وختيناهم استوري بعد شوية مزن اتصلت لي قالت لي ي خاينات ..قلت ليها حبيبي ياخ مشتاقين قالت لي اسكتي ي وسخة وريني انتو وين انا والبنات حنجيكم ..وريتا وقلت ليها اسرعو منتظرنكم..سماح قالت لي يلا حننبسط بالمرة ..بعد مسافة هجمو علينا ويشتمو ساي..ياسمين قالت لاقين بيوتكم قراب لبعض وبقيتو تعملو خيانات ..نهى قالت ليها بقو كلبات ياخ مزن قالت ليهم لو م انا 24 ساعة حارسة الاستوريهات وبكشف ليها م كان عرفنا حاجة️..قعدنا نضحك سماح قالت ليهم طبعا اخوان ريري جو وكذا ..قعدو يحكو معاي في موضوع انو انا جافية بزيادة وكدة ..قلت ليهم خطوبة ريم ولؤي يوم الخميس ارح تعالو معاي ومنها نعمل ليكم ويك اند ظابط كدة 🌚..نهى قالت لي انتي حتشردي من الخطوبة سريع شكلك ،،قلت ليها ايوة يبيب م عندي احتكاك بيهم وم بقدر اقعد لفترة طويلة بكون متوترة ع طول..سماح قالت ليهم يشهد الله انا اتونست مع اهلها اكتر منها بت عوقة خلاص..قعدو يضحكو وقالو لي معلش حتتعودي ي زولة ،،اتفقت معاهم انو نتلاقى يوم الخطوبة وبعدها نطلع سوا..مزن ساقت ياسمين ونهى وطلعت وانا سماح وصلتني وفاتت..المغرب كان اذن لم وصلت البيت..اول م دخلت كدة لقيت امي قاعدة في الصالة..رفعت راسا عاينت لي قالت لي كمان بتكذبي ياتو عيد ميلاد دة؟مشيت جنبها وبستها في خدها قلت ليها سرو الله يخليك م فيني حيل للمواضيع دي..قالت لي خلينا نصلي ونتفاهم بعدين ..ضحكت وقلت ليها مصرة ع المحاضرات يعني؟قالت لي اي ماف مفر والله صلي وتعالي قلت ليها من نن عيوني ي البي بقت تضحك وقالت لي مجنونة دي..دخلت غيرت وصليت ودخلت المطبخ اظبط لي قهوة..امي جات طالعة لقتني بعمل فيها قالت لي حتموتي بالقهوة دي يوم..قلت ليها مصدعة ومافي حاجة بتروح لي الصداع غيرا 🖤..شلتها وطلعت لي امي في الصالة قالت لي لقيتي اخوانك كيف؟قلت ليها غير السلام العادي دة م كترت معاهم في الكلام..قالت لي لو قعدتي كنتي اتكلمتي ..قلت ليها امي طريقة سلامهم كانت بايخة وانتي عارفة اني م بحب اقعد في محل فيه ناس م طايقاني..قالت لي ريان ي بتي في اي علاقة في الدنيا دي لازم يكون في طرف لين ع التاني م ممكن انتي تقسي وهم يقسو الحيلين ع التاني منو؟انتو م جربتو تقعدو مع بعض وتتفاهمو ماخدين فكرة انو الاخوان الما اشقاء ديل بكونو جافين ع بعض ولا واحد منكم عايز يبين للتاني خلاف الفي بالو حتفضلو كدة لمتين؟ي بتي الدنيا دي م مضمونة ونحنا م دايمين فيها حنستفيد شنو لم نشيل فقلبنا من الناس ها؟قلت ليها ي امي كلامك كلو صح وانا اساسا م شايلة فقلبي منهم وحبابهم مش الف لا طن عديل لكن هم بتباردو معاي ليه؟هم الاخدو مني ابوي ي امي هم الاتمتعو بقربو وكبرو وهو جنبهم وانا الكنت بشوفو في السنة مرة م تتوقعي مني اني حانسا دة كلو بين يوم وليلة ي امي ..جات قعدت جنبي وضمتني عليها قالت لي عارفة ي بتي عارفة انك خاتة دة كلو فقلبك بس الله يرضى عليك حاولي اكسبي اخوانك هم زاتهم فقدو امهم قريب..قلت ليها ان شا الله ي امي ..قالت لي خلاص م تزعلي نفسك ي بتي بس اهلك ديل م تخسريهم طيب؟قلت ليها حاضر ي امي ان شا الله قالت لي اها الخطوبة حتمشي صح؟قلت ليها والفستان زاتو جاهز تصدقي؟قالت لي كذابة قلت ليها والله سماح اصرت علي قالت لي كتر خير سماح ي يمة ..اتكلمت مع امي مسافة ودخلت غرفتي كالعادة يعني شريط،اليوم مر قدامي وانا م عارفة هم مالهم م طايقني؟مع انو انا المفروض اكن الكره دة اتجاههم اصلا انا المظلومة الوحيدة 💔
ــــــــــــــــــــــــــــــــــــــــــــــــــــــ
قاعدين كلهم في مظلة بيت جدهم الخلفية وبتكلمو
لينا:الاولاد طلعو غرفهم ولا شنو؟
ريم;اي نامو والله بكونو تعبانين
لؤي:ي شباب انتو لاحظتو انو سلامهم مع ريان كان بارد كدة وكل واحد منهم م طايق التاني؟
علي:اي لاحظت بس ريان اصلا كدة باردة معانا كلنا واخوانا برضو واضح انو علاقتا بيهم م كويسة
لمى:هي علاقتا مع عمي محمد زاتا م كويسة
احمد:والله ي شباب م عارف بس ريان م بنقدر نلوما ع تصرفاتا يعني هي كبرت وابوها م معاها
ريم:اي ي احمد م قلنا شي وانا م لايماها ابدا بس نحنا م عندنا علاقة بالحصل ليه مجافيانا برضو والله انا بريدا بالرغم من انها م محتكة بينا
لينا:هي طيبة والله بس شوية متحفظة من ناحيتنا لانها من صغيرة كانت في البورت مع اهل امها ولم جو استقرو هنا هي كانت شبه فهمت الحاصل وم كانت بتجينا كتير
لؤي:فعلا هي اتظلمت بس بعد كدة مفروض تنسى الفات وتفتح صفحة جديدة وهم كاخوان مفروض علاقتهم تكون احسن من كدة
عبد الماجد:الله يهدي النفوس ي اولادي
اتلفتو ع صوت جدهم الابتسم وجا قعد في نصهم
كلهم ردو:امييييييين
عبد الماجد:والله ي اولادي ريان دي ياهو نفس طبع ابوها الزول التشيل فقلبها منو م بتقدر تتعامل معاه باريحية تاني وابوها برضو كان كدة..اي انتو فعلا م عندكم دخل بالحصل زمان بس ريان عاملة حاجز بين ابوها وبين اي حاجة بتخصو ،،واصلا حيجي يوم باذن الله وتتصافو فيه كلكم
علي:باذن الله ي جدي
ــــــــــــــــــــــــــــــــــــــــــــــــــــــ
كالعادة امي بتصحي فيني بعد محاولات المنبه الفاشلة في انها تصحيني..بس المرة دي م قمت ليها كنت بقول ليها هممم ي امي خليني والله مصدعة ..قالت لي صليتي الصبح انتي؟قلت ليها صليتو حاضر وحاتك ونمت قالت لي طيب حكاية الصداع دي معناها من السهر تبعك دة حاخلي ليك بندول اكسترا في المطبخ متى م صحيتي اشربي الشاي وابلعي منو قلت ليها طيب ورجعت نمت ..صحيت حوالي الساعة 10 كدة اتسوكت ودخلت المطبخ شربت الشاي وبلعت الحبوب وقعدت اتفرج في التلفزيون ع مسلسل حب للايجار ممكن اعيدو مية مرة علشان اضحك في لؤي 😂😭..وانا راقدة في الكنبة ومندمجة كدة تلفوني رن كسلت امشي اجيبو رن تاني اتحركت ع الغرفة ولقيت الاتصال من الشركة رديت وكان في نموذج قالو بعتو لي تفاصيلو ع الواتساب ومفروض اسلمو خلال اسبوع اصلا تصميم بتاع مدينة سياحية صغيرة م كبيرة شديد والموضوع م حيحتاج وقت كتير.."اصلا انا عندي شريحتين وحدة هي بتاعت الشغل والشركة هي عندها الرقم م بفتح الواتس البي الرقم دة الا تجيني مكالمة من الشركة انو في نماذج وكذا اما التانية هي شريحتي الشخصية الاهلي م عندهم رقما وحتى ابوي م عندو .." قفلت من الشركة وقعدت اتزهج انا اصلا مزاجي م رايق لي الشغل وكدة تاني قلت ي ريان بطلي قلة ادب اصلا انتي الشركة زاتها م قاعدة تمشيها علشان كدة اتلمي طلعت واصلت باقي الحلقة وبعدها فطرت واتحركت ع غرفتي وبديت في النموذج بعاين للتفاصيل وبرسم لحد م جاني اتصال من خالتي سوسن قلت ليها خالتي السمحة،،قالتي ريري الكعبة شنو ي بت مختفية كدة قلت ليها والله كان نفسي اقول ليك الشغل بس انتي عارفة الزيت كلو. قالت لي اسكتي ي نصابة شغلك النص كم دة..قلت ليها هيي ي سوسو م تشنفيني والله هسة بعمل لي في تصميم قالت لي حاشاك من التشنيف انتي ياخ..قلت ليها حبوبة اسيا كيف قالت لي كويسة والله ومشتاقة ليك هي زاتا ادتني ليها سلمت عليها قالت لي اها ي بتي جاية متين؟قلت ليها عندي اشغال في يدي اخلصا واحضر خطوبة ولاد عمي وتاني الخرطوم دي ثانية م بقعد فيها..قالت لي منتظرنك ..خالتي قالت لي ي بت سارة حكت لي انو اخوانك ديل جو وكدة اها احوالك كيف معاهم؟قلت ليها والله ي خالتو عادي جدا م في شي قالت لي غايتو ي بتي م تبدي بالشينة لكن اليغلط عليك اوعي تسكتي ليهو امك طيبة شوية لكن انتي خليك عادلة م تبقي كعبة لكن البتكاعب معاك وقفيه عند حدو..قلت ليها وهو كذلك ي سوسو ياخ ضحكت وقالت لي سلمي ع امك يلا في رعاية الله..قفلت منها ورجعت اواصل في النموذج بتاعي
"ستبتسم الحياة ذات يوم لن نمضي هكذا في طرقاتها عبثا🌻💛.."
يتبـــع...
