عزيز الروح

٦

يوم السبت صحيت الصباح بدري صليت..وطلعت المطبخ عملت الشاي ومعاه كيكة سريعة كدة..بعدها دخلت استحميت ولبست لي بجامة كدة ورقدت في السرير ..
بعد مسافة نزلت تحت لقيت امي وكلهم صحو ..قلت ليهم صباح الخير ردو علي بصباح النور..امي قالت لي انتي متين صحيتي وجهزتي الكيك وكدة .قلت ليها صحيت للصلاة وجيت نازلة  .
كبيت لي نفسي وقعدت لاحظت لي ريل عيونا كانت محمرة وملامحة متضايقة كدة بس م قدرت اسالا..امي قالت ليهم حتنزلو جامعات متين؟رامي قال ليها من يوم التلاتاء ..قالت ليه كويس،والله وريل الشهر الجاي المدارس حتفتح قالت ليها اي ي خالتو ..ماما قالت ليها متاكدة انك كويسة ؟ريل قالت ليها اي صداع بس وبلعت حبة ..
امي قالت ليها طيب ارتاحي وي ريان لو ابا يروح الصداع لحد بعدين اديها حبة تاني قلت ليها طيب ..
امي طلعت وبعدها كل واحد بقا ساكت ..م حبيت اقعد في نصهم اكتر احتمال عندهم كلام خاص بيهم ..خليتهم وطلعت غرفتي..اول م فتحت النت لقيت الرسايل تتطاقش من البنات في القروب..سماح قالت ليهم الويك اند دا كان كيف معاكم..ياسمين قالت ليها وبعلي اظبط ويك اند فيك ي دنيا،،مزن قالت ليهم دة الويك اند بحق وحقيقي الواحد يختم اسبوعو بخلق زي المارشميلو كدة نهى قالت ليهم اريتو كل ويك اند يكون كدة ظرافة وكياتة وحلاوة ياسمين قالت ليها ركزي ع الحلاوة دي يختي ..سماح قالت ليهم ريري الكلبة سافهانا بعد م لقت النعم دي..دخلت ليهم وقلت ليهم روقو ي شابات م سفهتكم والله بس م لقيت زمن رجعنا من بيت ناس جدي العصر كدة وبعدها اولاد عمي جونا للعشا ومن التعب نمت ع طول..بعد مسافة كلهم دخلو لي واستلموني احكي وبتاع..قلت ليهم اللمة كانت ظريفة والله..سماح قالت لي وريتك انا الجو حيكون ظابط وحيعجبك ..قلت ليها فعلا حصل كدة بس برضو لسه رسمية معاهم..سالوني من اخواني وكدة وقلت ليهم عاديين وم عندي تعامل معاهم..قعدو يقولو لي انو موضوع وقت وحنتعود ع بعض..قلت ليهم انا المحيرني انو محترمين مع امي جدا وانا باردين معاي هم مفروض يكرهو امي لانو هي م بتقربهم شي..مزن قالت لي دة دليل ع انهم كويسين وم بيكرهوك ولا حاجة اديهم زمن بس..نهى قالت لي فعلا كلام مزن صح وزي م قلتي انتي امك اولى بالكره دة فمعناها هم زاتهم قلبهم ابيض..
اتكلمت معاهم مسافة وطمنوني بكلامهم اساسا بحبهم جدا.قفلت البيانات ونزلت المطبخ لقيتهم مافي قلت احتمال طلعو غرفهم وبديت اجهز حاجات للفطور..

ــــــــــــــــــــــــــــــــــــــــــــــــــــــ
رامي:ريل حبيبتي في شنو ؟
راشد:احكي اذا م مرتاحة نكلم ابوي ونرجع السعودية
ريل:لا انت نسيت انو قال حينقل شغلو قريب وحيجي يستقر هنا
رامي;طيب انتي مالك؟
ريل:ممم بصراحة كدة لم شفت ريان مع امها اشتقت لماما شديد
رامي جراها عليهو وضماها:معليش،حبيبتي معليش ربنا يرحمها ويغفر ليها ادعي ليها دايما
جا راشد وحضنهم وكلهم بقو يبكو ..بعدها رامي قال ليهم اهدو خلاص وامسحو دموعكم ..م تخلو ريان تفتكر اننا ضعاف ومحتاجين لي زول يحن علينا
دخلو الحمام وغسلو وشهم وفضلو قاعدين مع ريل في غرفتها وبيونسو فيها ..قالت ليهم انا عايزة امشي لي ناس حبوبة تاني ..راشد قال ليها اي نمشي ع طول  ظريفين ياخ..ريل قالت ليه كلهم ظريفين مافي زول بايخ غير ريان تعاملا معاهم برضو رسمي جدا..رامي قال ليها هي كدة مع اي زول من ناحية ابوي ..راشد قال ليه وطبعا الكره الاكبر حيكون لينا صح؟قال ليه طبعا حيكون لينا ي ابني يعني م تفكر انها ممكن تحبنا في يوم..ريل قالت ليه مع انو كان  نفسي يكون عندي اخت وكدة بس واضح مافي نصيب .. راشد قال ليها ولا يهمك ابقا ليك اخت😂.. رامي ضربو في راسو من ورا وقال ليهو بطل ظرافة..فضلو يضحكو ويتونسو مع بعضهم بعدها نزلو كلهم من غرفة ريل
ــــــــــــــــــــــــــــــــــــــــــــــــــــــ
انا كنت رصيت الاكل ومترددة بين اناديهم ولا لا ..وقبل م اتحرك واطلع هم جو نازلين ..عاينت لريل وقلت ليها الصداع خف؟هزت راسا وقالت لي ايوة..م كترت الكلام وقلت ليهم الفطور جاهز قعدنا وكل واحد ساكت وبياكل بس ..لحد م تلفون رامي رن ومن خلال الكلام عرفت انو ابوي من غير م احس قمت وخليتهم ودخلت المطبخ وبقيت اعمل في عصير..وهم ال 3 سلمو عليه وقفلو..طلعت وختيت ليهم جك العصير والكبابي وشلت كبايتي واتحركت ع التلفزيون ..بعد خلصو من الاكل سمعت صوتهم وهم بلمو في الصفرة اتحركت عليهم وقلت ليهم انا موجودة مافي داعي بلمها انا ..ريل قالت لي بلمها معاك قلت ليها لا ارتاحي م محتاج..شلت الصحانة ولميتا في حوض الغسيل ..وراشد قال لريل ارح معاي غرفتي رامي قال ليه وانا م بيعزموني؟ضحك وقال ليه قلت احتمال طالع تقرا ليك واحد من كتبك وما فاضي لينا..قال ليه هسة اعتبرني فاضي يلا ارح.. كنت عاملة فيها م مركزة معاهم بس من جواي كان نفسي اعيش معاهم اللحظات دي
ــــــــــــــــــــــــــــــــــــــــــــــــــــــ
محمد كان متردد يضرب لسارة ولا لا صح انها هي سامحتو زمان وم شايلة فقلبها منو بس برضو بقت تتعامل معاه في حدود ..كان نفسو يرجع حياتو القديمة ويقدر يعيش بسعادة معاها وحتى مع اولادو الباقين في النهاية هو بحبهم كلهم..
اخر حاجة رفع التلفون واتصل ليها جاهو صوتها بعد مسافة
سارة:اهلين ي محمد
محمد:سارة ازيك
سارة:بخير والله انت كيفك
محمد: بخير وعافية والله حمد لله
سارة:الحمد لله
محمد:كنت عايز اسالك اذا في مشاكل بين ريان والاولاد وكدة
سارة:متين وصلو هم ي محمد لمن تحصل مشاكل
محمد:والله ي سارة م عارف قبيل اتصلت ليهم وكانو بفطرو ولم سالتهم منها قالو انها بعيدة فقلت يمكن م حابة وجودهم وكدة
سارة:احتمال تكون قامت قبلهم بس هي عادية جدا اي نعم مافي تعامل مباشر بينهم بس انا عارفة بتي كويس مهما كانت م بتحب الزول م بتقدر تجرحو بكلمة والدليل ع كدة بالرغم من انها م بتحب تقعد في البيت الكبير الا انها باتت فيه لم اصرو عليها علشان م تبين ليهم انها متضايقة
محمد:انا م قصدي انها ح تزعلهم وكدة بعدين زعلها هي زاتا بهمني هي بتي برضو
سارة:بتك بالاسم وبس ي محمد انت م بتعرف عنها حاجة
محمد:سارة الله يرضى عليك خلاص م تزيديها علي..كلهم عندي واحد وبريدهم كلهم وريان بالرغم من انها مجافياني وزي م قلتي علاقتي بيها سطحية الا انها حتفضل بتي البكر والمعاها لاول مرة ضقت احساس اني اكون اب..
سارة: طيب ي محمد مستعجلة انا واتصل ع اولادك واسالهم اذا متضايقين ولو،طلعت ريان اتعاملت معاهم باسلوب كعب يبقى انا طلعت م بعرف اربي
قبل يرد ليها قفلت الخط واتكات ع الكرسي ودموعا نزلو..بالرغم من انها اتجاوزت زمان وعفت ليهم كلهم الا انها هي برضو اتوجعت  صح بتحاول تعكس غير كدة لبتها وبتحاول تقوي علاقتا بابوها واهلو بس برضو هي اتخذلت في اكتر انسان حبتو..
احيانا بنسامح بس م بننسى بنتجاوز الوجع بس م بنتجاوز الناس الوجعونا ..
عند محمد بعد قفل منها خت ايدينو ع وشو ..كيف يقدر يخليها تصدقو انو كان خايف من انو هم يكونو زعلو ريان م العكس ..لانو الكلام القالوه قبل يسافرو انو م عندهم اخ كبير غير رامي واخت بت غير ريل كفيل بانو يوضح ليه انهم رافضين وجود ريان ..كان متضايق جدا وم عارف الحيحصل شنو غير انو لازم ينزل السودان ويحاول يكسب بتو واليحصل يحصل ..
ــــــــــــــــــــــــــــــــــــــــــــــــــــــ
مريم:نقدر نقول دي بداية جديدة صح ؟اول مرة تقعد معانا فترة طويلة كدة
عبد الماجد:باذن الله ي مريم حتكون كدة خليها للزمن بس وريان حتجي تقعد معانا زي م باقي الاولاد بيجو
مريم:العمر م معروف حنفضل ننتظر لمتين؟نفسي اشوفا هي وابوها بيتعاملو عادي واشوفا عادية معانا كلنا قبل اموت
سناء:هي ي امي الله يطول في عمرك باذن الله حتشوفيهم
اتلفتو كلهم ع صوت ضحكات الاولاد القاعدين ع مسافة منهم
عبد الماجد ابتسم وقال ليهم:حيجي يوم وتكون قاعدة فيه معاهم وبتضحك واخوانا برضو حيكونو معاها ..
ــــــــــــــــــــــــــــــــــــــــــــــــــــــ
دخلت غرفتي وقعدت ابكي..احساس الحرمان دا قاسي جدا..واقسى من احساس الفقد..ع الاقل لم تفقد زول تدريجيا بتتاقلم ع انو اختفى وانو مافي وحتفضل الذكرى الحلوة البينكم..
بس كونك تنحرم من حاجة وهي قدامك حاجة صعبة .. مثلا انا محرومة من ابوي وهو موجود محرومة من اني اجرب انو يكون عندي اخوان وهم موجودين💔..
بعد فترة مسحت دموعي ودخلت غسلت وشي ونزلت المشتل.. الدموع بتريح لازم نبكي لم نتضايق دي حاجة انا واثقة منها لانو لم نحبس احاسيسنا السلبية بتطلع بصور بشعة جدا..فم غلط اننا نبكي علشان نرتاح الغلط اننا نلازم البكا طول حياتنا هي فترة كدة بنعيش الضعف فيها وبنرجع اقوى من الاول ..
كالعادة سقيت الورد وقعدت في الكرسي منعت نفسي من اني افكر كتير وركبت سماعتي وشغلت سورة يوسف بصوت اسلام صبحي
في مقولة بتقول" الاغاني بتحكي مشكلتك بس القران بحلها"
فانا ع قدر م بسمع اغاني برضو بلجأ للقران دايما لانو فيه راحة كدة عجيبة
وانا بسمع في التلاوة من غير م احس نمت  اصلا كنت مرهقة جدا..

"تعلم ان تمضي بثبات ولو كان اهتزاز العالم كله بداخلك 💛🔥"

يتبـــــــع...