يوم الخميس الحيكون فيه خطوبة ريم ولؤي بالصباح كنا انا وامي بنشرب الشاي في الصالة قالت لي انا الليلة دوامي لحد الضهر وحاتحرك من هناك لبيت جدك اصلا الخطوبة هناك ..قلت ليها طيب ظابط انا حاجي مع البنات ..قالت لي وبعدين تعالي هنا سوسن قالت انك قلتي ليهم بعد الخطوبة حتمشي البورت مالك م كلمتيني ؟قلت ليها شنو ي حجوج ياخ م انا كل فترة وفترة بمشي ليهم مالك هسه قالت لي كنتي قاعدة تكلميني هسة مالك ؟قلت ليها وهسة برضو كنت حاكلمك لكن خالتو سبقتني وبعدين المرة دي م حتقعدي لوحدك او تمشي تقعدي مع ناس جدو وحبوبة اولاد راجلك حيكونو معاك قالت لي سخيفة خلاص انتي وبالمناسبة اخوانك من الخطوبة حيرجعو معانا..قلت ليها مم طيب ..امي طلعت وانا فضلت اشتغل في النموذج وقلت خلاص بم اني حامشي والاقي احمد وعلي اديهم النموذج بالمرة بدل ارسلو صور وكذا ..انتهيت من النموذج ودخلت غرفتي وبقيت بحضر في المسلسل من التلفون بحب الاتراك ولغتهم جدا ♡..الحلقة خلصت قريب وقت الفطور مشيت عملت لي اندومي وشلتو طلعت ع المشتل قعدت اكل كدة تلفوني بقا يرن لقيتا سماح قالت لي السيدة العاطلة بتعملي في شنو؟قلت ليها عاطلة في عينك ياخ والله هسة خلصت النموذج تبعي وحاليا في المشتل باكل اندومي قالت لي طيب مدام م عندك شي شيلي حاجاتك تبع الخطوبة وتعالي لي الصيدلية وبعد دوامي يخلص نتحرك نجهز في بيتنا ونمشي للبنات ..قلت ليها حلو م عندي مانع اصلا امي حتمشي،من المستشفى.. حوالي الساعة 12 كدة اتصلت لامي كلمتها ودخلت لبست لي بنطلون جينز مع طونك كاروهات كبدي واسود واسبورت اسود وختيت طرحة كبدي وشلت حاجاتي وطلعت
ركبت لي ركشة ووصلت اساسا الصيدلية تبعا م بعيدة شديد..دخلت لقيت سماح ماسكة تلفونا ومتكية في الكرسي وفي بت تانية معاها شغالة..سلمت عليهم وقلت ليها هسة العاطلة فينا منو ؟بقت تضحك قالت لي والله تعبت علشان كدة فضلت قاعدة وسماح قامت رجعت للشغل حوالي الساعة 2 رجعنا بيت ناس سماح سلمنا ع امها ودخلنا غرفة سماح وانجدعنا نمنا..سماح صحتني للغدا اتغدينا وبعدها اتصلنا للبنات قلنا ليهم اجهزو نصلي المغرب ونتحرك..بدينا نجهز وسماح برمت لي شعري من قدام المغرب اذن صلينا وعملنا شوية ميك اب وانا لبست فستاني الزيتي وطقمتو بطرحة وجزمة اوف وايت وسماح لبست فستان كبدي وطلعنا لباقي البنات..مزن قالت لي احييي الزيتي عامل شغل..نهى قالت لي قاااااشرة ي صحبتي والله..ياسمين قالت لي بت عم العرسان عاد قادر الله رهابة رهابة..بقيت اضحك قلت ليهم والله انتو كلكم قمرات قمرات ..وصلنا بيت ناس جدي ولقينا الاهل والجيران ملمومين في الحديقة الامامية سلمنا عليهم وبعد مسافة بدت مراسم الخطوبة والزغاريت ملت المكان..سقت البنات باركنا لي ريم ولؤي ريم قالت لي فرحت بجيتك جدا والله يبارك فيك وعقبالك ..ولؤي قال لي بت العم نورتي والله .والله يبارك فيك..بعدها لمحت اخواني وسقت البنات سلمنا عليهم وع اولاد اعمامي الباقين..ونحنا واقفين جات عمتي سناء وحضنتني قالت لي عقبالك ي السمحة..وسلمت ع صحباتي وبعدها اشرت لي ع جهة الرجال قالت لي جدك بيسال منك قلت ليها طيب ،،اتحركت ولم وصلت لقيتو معاهو اعمامي سلمو علي وباركت ليهم وبعدها رجعت للبنات مزن قالت لي اهل حلاووة ماكنتوش ياسمين قالت حنينين ياخ🙈نهى عاينت لي وقالت هسة ديل اهل يجافوهم؟والله لو مكانك اسكن هنا بقيت اضحك وهزيت ليهم راسي قلت ليهم انتو مجانين رسمي ،،سماح قالت ليهم بت جاحدة للنعمة بشكل غايتو اولاد اهلك وصحابهم ديل نفسيات..قلت ليهم كدة زحو مني ياخ ماشة اشرب موية..دخلت البيت جوة ودخلت المطبخ شربت لم جيت طالعة لقيت امي ونسوان اعمامي قاعدين في الصالة مع حبوبة ..امي قالت لي ريري تعالي اتحركت عليهم وقعدت خالتو نسرين زوجة عمي سعيد قالت لي ريان اشتقنا ليك والله اخبارك شنو ؟قلت ليها بخير والله امي قالت لي ي ريري حنبيت هنا مع ناس حبوبتك اصلا بكرة ماف دوام وكدة ..خالتو عبير دي زوجة عمي محمود قالت لي لينا زمن م قعدنا مع بعض وانتي خصوصا م حصل قعدتي معانا كتير م كان عندي طريقة ارفض فقلت ليهم تمام ماف مشكلة حبوبة مريم قالت لي الله يخليك ي بتي كويس انك رضيتي ..طلعت منهم وحكيت للبنات وكلهم كان رايهم انو فكرة حلوة ومنها احتك بعيلة ابوي اكتر ..جو لمى ولينا كانت شايلة بتها وبتها كيوتة كدة اتعلقت فيني قمت شلتها لينا قالت لي وجونة دي مشاغبة ياخ قلت ليها بالعكس ظريفة لمى قالت لي حبوبة قالت انكم حتبيتو قلت ليها اي بس طالعة مع البنات ..قالت لي كلنا طالعين شارع النيل اطلعو معانا ،،عاينت للبنات قالو م عندهم مشكلة..بعد المعازيم خفو وكدة كلنا اتحركنا ع شارع النيل ..اولاد اعمامي كان معاهم كذا واحد من اصحابهم واخواني برضو معانا..وصلنا واتلمينا في مقاعد قريبة لبعض ..سماح قالت لي اولادكم يفتحو النفس ..لكزتها وقلت ليها اجمدي ي بت ها ..قعدنا اتونسنا مسافة وجبنا ايسكريم ومشروبات ..اثناء الونسة كدة علي قال لي ريان خلصتي النموذج؟قلت ليه اي ومعاي كمان كنت حاديكم ليه قال لي م تفكري في كلام احمد وتنزلي معانا ..قلت ليه ان شاء الله والله بس الفترة الجاية ماشة البورت وكدة ..لمى قالت لي بختك ي زولة سوقيني معاك قلت ليها ع طول تمشي م عندك مشكلة..احمد قال لي خلاص امشي وتعالي ونتفق ..قلت ليهم باذن الله ..اخواني م اتكلمت معاهم ابدا لانو كلامهم كلو مع اولاد اعمامي وانا م ركزت معاهم ..مزن قرصتني وقالت لي انتي واخوانك شكلو العناد عندكم وراثة..قلت ليها اسكتي بالله..القعدة كانت ظريفة واتونسنا كلنا وغيرنا جو ..بعدها شلت النموذج من عربية سماح وودعتهم وركبت مع علي ولمى وهم طول الطريق يتونسو وانا مركزة في تلفوني..وصلنا البيت دخلنا غيرنا ورتبنا الحديقة والمقاعد وكذا وبعدها لمى قالت لي ارح ننوم طلعنا غرفة فيها سريرين ومن التعب نمنا..صحيت الصباح ع صوت لمى لقيت ريم نايمة جنبي..وقامت برضو ع صوت لمى قالت لي امس جيت متاخرة واترميت جنبك معليش لو ضايقتك وكدة ..قلت ليها ولا يهمك اصلا م حسيت والله ..لمى قالت ليها والاخرك دة لؤي صح؟ريم فنت فيها المخدة وقالت ليها اسكتي مني قعدت اضحك عليهم ودخلت الحمام بعد صلينا وكذا لبست لي عباية من ريم ونزلنا..قبل نصل المطبخ ريم قالت لي نحنا نص حاجاتنا هنا في بيت ناس جدو بنقعد فيه اكتر من بيتنا زاتو ضحكت وقلت ليها حلو ياخ لمى قالت لي مرة جيبي حاجاتك و تعالي اقعدي معانا..قلت ليها باذن الله وصلنا المطبخ جهزنا الشاي والكيك بعدها الباقين صحو ..ريل جاتنا في المطبخ وقالت لينا صباح الخير قلنا ليها صباح النور جهزت معانا الكبابي وكدة وطلعنا برة ..جدو من شافنا قال ي سلام ملمومين في الحرم باذن الله..ردينا عليه باميين..كبينا الشاي وقعدنا انا كنت قاعدة جنب امي قالت لي كيف كان اليوم؟قلت ليها كان ظابط همست لي وقالت لي شفتي كيف..ضحكت عليها قامت قالت لي خليك كدة دايما قريبة من اهلك ..قلت ليها سمح ..حبوبة مريم قالت لي ناس رامي حتمشو مع خالتك واختك الليلة صح؟رامي قال ليها اي وعاين لي ماما وقال ليها ي خالتي حنمشي متين؟قالت ليه العصر كدة..بعد م خلصنا الشاي لمينا الكبابي وجدو قال جيبو القهوة في الحوش الورا محل المظلة والزراعة داك..علي قال ليهو اصلا داك محل الكيف ارح ي جدو ..كلهم اتحركو بهناك وانا وريم ولمى دخلنا المطبخ وجات ريل لاحقانا ..لمى قالت ليها ريل ارتاحي انتي ي بت م عليك بالخدمة والحركات دي..قالت ليها صح اني فاشلة وكدة بس خلوني معاكم اتعلم ..ريم ضحكت وقالت ليها كلنا كنا فاشلين في البدايات حتتعلمي مع الايام حسيت انو ريل في لمحة حزن في عيونا قلت احتمال اتذكرت امها وكدة.. لمى قالت ليها وعلشان م تقولي انك قاعدة ساي ي ستي في الرف الفوق في فنكوش ومكسرات ختيها في الصحانة ..قالت ليها طيب حلو..قليت البن وريم سحنتو وختينا في النار بديت ارص الكبابي ريل قالت لي برصها م مشكلة قلت ليها طيب وقعدت لحد م البن طلع كبينا وطلعنا برة.مشينا ليهم في المظلة..حبوبة مريم قالت اول مرة نتلم كلنا كدة من زمن.. اخر مرة ريان دي كانت شافعة لم باتت عندنا..جدو قال ليها اي والله طولنا لكن م مشكلة الجايات اكتر ولا شنو ي ريان؟قلت ليهو اي ي جدو باذن الله..قعدنا شربنا القهوة واتونسنا ..وكالعادة انا قاعدة جنب امي وبضحك معاها كنت كل م ارفع راسي بحس انو ريل بتعاين لينا ولم اعاين ليها بتزح عيونا ..خلينا امي ونسوان اعمامي قاعدين مع حبوبة في الصالة واعمامي والشباب مع جدو في المظلة برة..ونحنا دخلنا المطبخ نجهز الفطور قالو العصيدة جاهزة وعايزين ملاح روب بدينا نجهز في ملاح الروب وريم قالت حتعمل سلطة جزر ..جهزنا الحاجات كلها وطلعنا قعدنا برة..حوالي الساعة 10 كدة امي ونسوان اعمامي قالو حيرصو الاكل هم ويعملو الشاي لانو نحنا تعبنا وكدة ..وفعلا جهزو الفطور ودينا للشباب صينية برة ونحنا قعدنا جوة..بعد خلصنا شربنا الشاي كلنا في المظلة واعمامي يشيلو ويتونسو معاي تقريبا دي اول مرة اخد وادي معاهم في الكلام من غير رسميات..بعدها الجلاليب جات تتطاقش للمكوة وكدة ..ريم قالت لي اكوي لي راشد ورامي قلت ليها وجيبي تبع جدو حاكويها برضو قالت لي وانا حاشيل بتاعت لؤي وابوي واحمد وانتي ي لمى اكوي لي عمي وعلي لمى قالت ليها دي شنو لخبطة الكيمان دي لؤي دة اخوي ي بت جيبي جلابيتو م مشكلة قالت ليها لمى والله بكفتك انا قعدت اضحك وشلت الجلاليب ومشيت غرفة حبوبة اكويهم هناك..لم دخلت هي كانت طالعة ابتسمت وقالت لي الله يفرحك ي بتي زي م فرحتينا بجيتك ابتسمت وقلت ليها الله يخليك ي حبوبة..هي طلعت وانا دخلت كويت الجلاليب ريم ادتني جلاليب اخواني علشان هي عارفة العلاقة بينا متوترة تقريبا عايزين يحسونا بنتعامل عادي زي اي اخوان..خلصت ومشيت للبنات لقيتهم خلصو برضو شلناهم واتحركنا ع الصالون ..جدو قال لينا بناتي الفالحات ربنا يحفظكم ابتسمت وختيت ليهم الجلاليب في الكنبة وقلت ليه بتاعتك انت ومعاها بتاعات رامي وراشد قال لي تسلمي ي بتي،،احمد قال لي ريم بقيتي تعرفي مكوتي كيف صح.؟م كل جمعة نقعد ننق في نفس الحتة لؤي قال ليهو هوي انت براك بتحبها مكسرة شديد ي زول عرس وجيب ليك وحدة تخدمك بدل تعذب مرتي انا..احمد قال ليه ي ود العم والله هي اختي قبل تخطبا ..فضلو يتناقرو كدة لحد م خليناهم و طلعنا ..كل وحدة دخلت استحمت وطلعنا قعدنا مع ناس حبوبة اتونسنا مسافة بعدها دخلنا جهزنا عصير لحد م ناس جدو رجعو وقعدنا شربنا سوا..علي قال لي امي ي خالتو والله احلى جمعة تمر علينا تعالو لينا طوالي..قالت ليهو باذن الله ي ولدي..خلصنا من موضوع الغدا وكدة .. بعدها الاولاد جو نازلين ومعاهم شنطهم..ركبنا جزء من شنطهم في عربية امي وركبنا كلنا معاها علي قال لينا عازم نفسي عندكم عشا وبجيب باقي الشنط معاي ️امي قالت ليه تنور والله ي ولدي احمد ولؤي برضو قالو حيجو معاهم ..اتحركنا ع البيت واول م وصلنا شلنا معاهم جزء من الحاجات وامي وصفت ليهم غرفهم هي اتحركت مع راشد ورامي وانا سقت معاي ريل لحد غرفتها ..بالليل كدة علي واحمد ولؤي جو اتعشو معانا وجابو باقي الحاجات ..وانا كالعادة اول م دخلت غرفتي بقيت بفكر في اليوم وانو بالجد اهلي طيبين شديد واول مرة احس بالانتماء والحنية معاهم ❤️..
"سيكون كل شئ بخير.عندما تتوقف عن التحليل وتضخيم الامور ..عندما تترك الامور تمر بكل هدوء دون ان تحمل نفسك عناء التفكير الزائد 📌❤️"
يتبــــع...
