[Unicode]
Rosie Dale က သူမ၏ ပါးစောင်ကို လျှာနှင့်ထိုးကာ သကြားလုံးကို တခြားနေရာသို့ ပြောင်းငုံလိုက်သည်။ သူမ၏ ပိတုန်းရောင် မျက်လုံးနက်နက်တို့က ယန့်ဆွေကျီးကို နှစ်ကြိမ်မျှ မျက်တောင်ခတ်ကြည့်လိုက်ပြီး တိုးတိုးလေး မေးလာခဲ့၏။
"ဘာလုပ်နေတာလဲ?"
ယန့်ဆွေကျီး၏ ပြန်ဖြေသံက သူမထက်ပင် များစွာတိုးလျနေလျက်။
"ငါ့မျက်နှာ နာနေလို့"
Rosie Dale က မျက်လုံးများ ကွေးတက်သွားသည်အထိ ရွှင်မြူးစွာ အော်ဟစ် ရယ်မောလိုက်လေသည်။
ယန့်ဆွေကျီး : "........." မင်းကတော့လေ တကယ့်ကို နတ်မိမယ်လေးပါပဲ....
နတ်မိမယ်လေး Rosie Dale ၏ မြူးထူးထူးရယ်သံက တစ်ယောက်သောသူ၏ အာရုံကို ဆွဲဆောင်သွားခဲ့တော့၏။
ယန့်ဆွေကျီးက သူ့မျက်နှာတစ်ခြမ်းကိုကွယ်ရင်း ကြမ်းပြင်မှ မျက်နှာကျက်အထိ မြင့်မားလှသော ပြတင်းပေါက်ကြီးကို တိတ်တဆိတ် ငေးကြည့်နေစဉ်မှာပဲ ကုရန့်၏အသံက သူ့ဘေးကနေ ထွက်ပေါ်လာခဲ့သည်။
"မင်းမျက်နှာကို ကွယ်လိုက်တာနဲ့ ငါက မမြင်တော့ဘူးလို့ ထင်နေတာလား?"
မင်းသိလို့လား... ဘယ်ပြောနိုင်မလဲ?
ယန့်ဆွေကျီး၏ မျက်နှာထက်၌ အမူအရာမျိုးစုံ လှစ်ကနဲ လှစ်ကနဲ ပြောင်းလဲလို့သွားလျက်။ နောက်ဆုံးမှာတော့ သူက ခပ်ဖွဖွသာ ချောင်းဟန့်ရင်း လက်ကို အောက်ချလိုက်တော့၏။
Rosie က ဘယ်သူမှ မတောင်းဆိုရပါဘဲ သူမဘာသာ အတွင်းဘက်ကို နေရာရွှေ့ထိုင်လိုက်ပြီး ဆိုဖာ၏ နေရာ တစ်ဝက်ကျော်ကို အလွတ်ထားပေးလိုက်သည်။ သည်ကလေးမလေးက သူစိမ်းများကို ကြောက်တတ်သော်လည်း ဟိုစဉ်တစ်ချိန်က ချောကလက်လေးတစ်တုံးနှင့် နီးနီးကပ်ကပ် အတူနေခဲ့ရသော ရက်အနည်းငယ်ကြောင့် သူမဟာ သူတို့နှစ်ယောက်ကိုတော့ ရင်းနှီးကျွမ်းဝင်နေပြီး သူငယ်ချင်းများအဖြစ်ပင် မှတ်ယူထားသေး၏။
"ကျေးဇူးတင်ပါတယ်"
ရှေ့နေကုက ကလေးမလေးအပေါ် အလွန်တရာ ယဉ်ကျေးနေလျက်။
ESTÁS LEYENDO
ပထမတန်းရှေ့နေ〖မြန်မာဘာသာပြန်〗
Ciencia FicciónOriginal Novel - Yi Ji Lushi / 一级律师 English Title - The Lawyer / First-Class Lawyer Author - Mu Su Li / 木苏里 Status in COO - 215 Chapters (Complete) CP - ကုရန့် x ယန့်ဆွေကျီး Original Novel link - http://www.jjwxc.net/onebook.php?novelid=2674286 Engl...