شـيـاع الـمِسك

حلقة إضافية

"يغازلها .. بلون السحر
‏يرسم وجهها الأجملْ
‏ويغمرها بعطر الضوء
‏يسكرها .. ألم تثملْ
‏ألم تلمح بأحداقي
‏منارات لها ترحلْ
‏تلاحقها .. تلاطفها
‏وتسألني .. ألا تخجلْ
‏بربك كيف اسمعها
‏وماذا يا ترى أفعلْ
‏أأرحل في محبتها
‏وأترك عقلها يسألْ
‏محال .. كيف أتركه
‏وفي شفتي له مشعل."

‏
#شـيـاع الـمِسك
#هُـدى حُـسَـيّـن
••••••••••••••••••••••••••••••••

جواباً لبنوتة كالتلي الاحداث مُبهمة ليش ما
ذكرت حدث ولادة مِسك وعرس علي ، وهذه الحلقة
اتمنى تعجبكم ، من مشاهد سابقة ومشاهد حالية
استمتعوه .

طول شهور الحمل كانت اكو لهفة بداخلي أمل خوف
مشاعر متخابطة عبث بقلبي ، لهفة ردت اشوف بنتي
واحظي بيها ، أمل بإن ابني عائلة ناجحة قوية متماسكة ، خوف من الالم من المجهول الي ينتظرني
كنت دائماً افكر شنو اسوي شنو الي منتظرني وشلون
الولادة راح تكون

طول هاية الشهور كنت من رابطة الناس الي تبحث
وتهتم شنو الي تسوي الام بهاي المرحلة ، اهتميت
كلش بحملي وشفته هذا الصح ، اذكر مريم كضتها
تنساه ومالها خلك وروحها بخشمها ، صح اني واجهت التنسا اول تلث اشهر لكن عدت ذيج المرحلة
ومو يكولن الجنين يشعر بأمه لذلك كنت احرص
اكون زينة وما اعصب هواي ،

خاصة اذكر بذيج الفترة اشتدت معاملة اسينات الحادة وياي ، ومن تجي إنجيل تتطبك وياها واثنيهن يضلن يشمرن كلام لاذع ، وكنت تجنباً للمشاكل كنت اكوم واتجاهلهن وهنه يتخبلن يحيرن
شلون يسون مشكلة وياي ، اني مو صالحة ومثالية
وواو ، لا اني هم عندي زلات وهم عندي لسان ومرات
طك حوصلتي واتعارك واسم عمة تصيح علينا كلنا
بس خل نشوف عمي دخل للبيت كلها تسكت نخاف
منه! وهكذا مرت ايام حملي..

علاقتي بشياع كانت متوترة وشد اعصاب ، طبيعي
لأن اكو احد يشاركة وياي شخص بحياته رسماً وهذا
الشي كنت نادمة علي اتزوج متزوج كلش غلط مو
يعني نادمة بزواجي من شياع لا بلعكس شياع ما
مقصرة عليه بشي يحبني ويهتم بيه ويحترمني لكن
هذا الي يسوي الي يسوي الها ، واجبه يكون عادل
بيناتنا وهو يحاول يسوي هيج !

بهاي الفترة من اتألم مرات ما الاكه يمي افقد اعصابي بعدين أذكر إنجيل مرت بهل شي وكانت
ساكتة شحال اني؟ ، فأدركت بوقتها شنو اسوي ترده
الي الحياة حلو أو مر ، ووقتها عرفت ما كان لازم اوافق عن شياع فقط لكونة متزوج وما لازم اعيش
زوجته شعور يحزن حتى ما ترده الي لحياة !

بسبب هذا الشي كنت اتألم واحاول قدر الامكان ما
اسوي مشكلة اني جبتها لنفسي اني اعرف من البداية الي منتظرني اجي هسة واحجي؟ مو منطق
لذلك كنت ضاغطة على نفسي ما احجي شي ابد لكن
مو كل الاوقات اعترف كنت افقد السيطرة وبس
اشوفه يجي وياها تشب نار غيرتي وتخليني اتعارك
وكدامها مرات ، وارجع بعدين اتندم لكوني تعاركت
ويا كدام احد