شـيـاع الـمِسك

الحلقة الـ10

‏مابالُ عقلي لايفارق غائبًا
أَضحى فؤادي من رحيله خائبًا
⁦ ذكراهُ⁩ ملح والجروح مرارةً
ياليتَ قلبي عن ودادِه تائبًا

#شـيـاع الـمِسك
#هُـدى حُـسَـيّـن
••••••••••••••••••••••••••••••••

كنت كاعده ويا عُمر هو ابد ما تركني وحدي ومن يمشي
يدز احد بداله يوكف يمي ، الدُعاء ما نزل من لساني ولا
دقيقة ، كنت حيل خايفة على ابوية وانجبرت امثل إن
اني قوية بس علمود ما يرجعوني للبيت اذا شافوني
منهارة ، اتمسكت بأمل يكون أبوية بخير وما بي شي
لكن حالته كلش تعبت

انوب الوقت كان ليل وبس دكتور اشرف على حالته
ساعه يكول التهاب الاذُن ، ساعة يكول أعراض جلطة
خبلنا أخبال ، وهم التحاليل ماكو عود باچر الصبح يلا
تبدي الشعة والتحليل تشتغل ،

الي عرفته ما يصير يتقيئ لان مو زين على الدماغ لان
هو ابوية هواية تقيئ وحالته تسوء ، ما ارتكزو على
علته ابد وكل شوي بتشخيص ، الليل الي مر على
الوادم ضلينا احنا كلنا كاعدين سهرانين بالمستشفى
وهمنا ابونا شلون صار ،

كنت ميته من التعب لكن ما غفت عيني وارتاحيت كل
شوي ادز عُمر يشوفه ويجي ، ما صدكنا صار الصبح
علمود يسوله تحاليل من جديد ، علي طلع ابوية من
المستشفى بعد ما هدئت شوي حالته على مهدئات
كال اخذه لأخصائي زين رجعنا الدنيا الصبح
بسبعة ، دخلنا للبيت تلكتنا امي تبجي وتريد احد يكللها
على حالته

للاسف چنا كلنا حايرين مثلها ما نعرف شبي ابوية كانوا
منطي مُهدى ، لذلك كبل نام واحنا كعدنا ميتين من
التعب ،  كتلهم

مِسك: احجزو من هسه دكتور زين البارحة خبلونا تخبل

علي بتنهيدة: خابرت صديقي وكالي على دكتور زين
كتله احجزلي وحجزنا ب3 الظهر

مِسك: ماشي ، يوم هم خابرتوه مريم

تحسرت وكالت

أمُي: لا والله يمه التهينا بوكعة ابوج لا انه خابرت ولا
هي اتصلت

هزيت راسي وغمضت عيوني احسها راح تطلع من
الوجع كالي علي

علي: كومي مِسك كومي نامي ارتاحي

أمُي: اي يمه البارحة ما كعدتي كومي نامي

مِسك; تمام اذا صار شي كعدوني

ملك; ماشي ما تأكلين

هزيت راسي بـ لا لان نفسي مسدوده مع إني ما اكلت
شي ابد بس ما احس نفسي جوعانة ، كمت بس بدلت
ملابسي ونمت من التعب لا اتحركت ولا فكرت كبل
نمت ،

كعدت الساعة وحدة ونص مع إني ما شبعت نوم الا
اني كبل طفرت ركضت طلعت لصالة شفت ابوية كاعد تنهدت كنت خايفه لا يصير شي واني نايمة