ကြမ္မာ ခုနစ်လီ

အခန်း (၄၄)/ ခ

Burmese Translation of Seven Unfortunate Lifetimes, All Thanks to a Single Moment of Impulse by Jiu Lu Fei Xiang.

Translator - No_Coz

အခန်း (၄၄)/ ခ
__________

သူ ငါ့ခေါင်းကို ပွတ်လိုက်တယ်။ သူ့မျက်နှာထားက ကြင်နာနေပြီး မတတ်သာတော့ဟန်လည်း ပါတယ်။ သူ့မျက်နှာပေါ်မှာ ဒီလိုမျက်နှာထားမျိုးတွေ့ရတာ ဒါ ပထမဆုံးရယ်။ ငါ့ရင်ထဲ နှလုံးထဲ လစ်ဟာသွားတော့တာပဲ။ သူ ဘာလုပ်ချင်သလဲဆိုတာ ငါ သိလာသလိုလိုပဲ။ သူ့ကို မျက်လုံးအဝိုင်းသားနဲ့ပဲ ကြည့်နေခဲ့မိတယ်။ သူ့ကို ဆွဲထားလိုက်ချင်တယ်။ ငါ လက်လှမ်းလိုက်ချင်တယ်။ ဒါပေမဲ့ လက်ဖျားထိပ်ကလေးတွေတောင် လှုပ်လို့ မရခဲ့ဘူး။

သူ ငါ့ခေါင်းကနေ လက်ကိုဖယ်သွားပြီး လှည့်ထွက်သွားတော့တယ်။ သူ ရှေ့ဆက်လျှောက်သွားတယ်။ သူ့ခြေလှမ်းတွေကတော့ အခိုင်အမာ တည်ငြိမ်မြဲမြံလျက်ပဲ။ သူ ခြေတစ်လှမ်းလှမ်းပြီးတိုင်း ကြာပန်းတွေပွင့်လာတယ်။ သူ့အနောက်မှာ ချန်ရစ်ခဲ့တဲ့ ကြာပန်းတွေက အစွမ်းကုန်ပွင့်လို့ပေါ့။ သူ့ခန္ဓာက မကောင်းဆိုးဝါးအမှောင်ဓာတ်သက်ကို ခွင်းလို့သွားတယ်။ လင်းလွန်းလို့ ငါ မျက်စိကျိန်းပြီး ဘာမှ မမြင်ရတော့ဘူး။

အဲဒီအချိန်တုန်းက မားမားမတ်မတ် သူ့ကျောပြင်ဟာ တစ်လောကလုံးကို ထမ်းတင်ပေးထားမဲ့ သူရဲကောင်းတစ်ယောက်လို ဖြစ်နေခဲ့တယ်။

မကောင်းဆိုးဝါး အငွေ့အသက်တွေနဲ့ နတ်တန်ခိုးတွေ တိုက်ဆိုင်မိရာကနေ လေပွေလှိုင်းတွေ ထွက်ပေါ်လာပြီး ငါ့နံဘေးကို ပွတ်တိုက်လာတယ်။ ချူခုန်း ရွှေရောင်အလင်းတန်းသဖွယ် အသွင်ပြောင်းသွားပြီး ကျင်လျန်ကို ထိပ်တိုက် ဝင်တိုးလေတယ်။ ရုပ်ပျက်ဆင်းပျက်ဖြစ်နေပြီဖြစ်တဲ့ ကျင်လျန်ကို ကြပ်ကြပ်တင်းတင်း ချုပ်နှောင်ထားလိုက်တယ်။ ကျင်လျန့်ခန္ဓာကိုယ်ပေါ်မှာရှိနေတဲ့ မကောင်းဆိုးဝါး ဓာတ်သက်တွေ တဖြည်းဖြည်းနဲ့ သန့်စင်ပြောင်းလဲလာတော့လေတယ်။

ချူခုန်းက ကျင်လျန်ရဲ့ ပြိုင်ဘက်မဟုတ်ဘူး။ သူ့ဝိညာဉ်အစွမ်းကိုပါ ယူသုံးရတော့မယ်ဆိုတာ ငါ နားလည်လိုက်တယ်။ ဝိညာဉ်စွမ်းအား မကုန်ခမ်းခင်မှာ သူ ကြိုးစားမှ ဖြစ်မယ်။ ဒါပေမဲ့... သူ သေသွားခဲ့မယ်ဆိုရင် တမလွန်ကို သွားနိုင်တော့မှာ မဟုတ်ဘူး။ သူ နောက်တစ်ဘဝ ဝင်စားနိုင်တော့မှာ မဟုတ်ဘူး။ သူ အမြဲထာဝရ ပျောက်ကွယ်သွားတော့လိမ့်မယ်။