الغرام المستحيل

part 24

جر ليلى من ذراعها وبدا كيشطح معها اما هي غير شافت سيفتو تخلعات ودفعاتو بنطرة وقلبها كيضرب بالخلعة شدات في مريم وقالت ليها : مريم صافي يله خلينا نمشيو

لاخر خنزر وعاود شد ليها في إيديها وزير عليها حتى تقصحت وخسرات وجهها بألم وسمعات صوتو ثقيل بشراب قال : معندك فين تمشي احبي وغتكملي معايا سهرة (بدا كيحرك فيها بزز منها وكيقول) كملي شطيحك اتوتة راك مامحركاش من هنا

مريم تكمشات في ليلى مبقات گاع خرجات وجهها ولا شافت فيهم وكتدوي بالحس في أذن ليلى : ناري مشينا فيها اصگعة اش جا ما يخرجنا من هنا

ليلى كثر منها ميتة بالخلعة ومخلية داك شمكار كيميل فيها كي بغا وكطلب الله في سرها يفكها من هاد الوحلة وعمرها مزال تبع طريق مريم ... ليلى جمعات قوتها وعودات دفعاتو وقالت بصوت مرتفع : بعععععد مني واش مكتفهمش

: لا مكنفهمش احووباي كملي شطيح ولا مايعجبك حال معايا

مريم كتغبن : الله ياربي الله اش هاد الوحلة لي طحنا فيها

دارت ليلى خنزرات فيها وقالت بالحس : صافي هادشي لي بغيتي هاتفوااج يله فوجي ليا مع راسك

وفي نفس الاثناء كان واحد دري زوين بزااف ومفورمي تما گالس مع صحابو في طرف وكان حاضي ليلى مليي دخلات وعينيه متبعينها حتى بان ليه هذاك خينا قرب لجيهتها وبدا كيتحرش بيها ... محملش الوضع وناض متوجه لعندهم ودوا بصوت قاصح وحاد : زيزوار حيد بعد من لبنت بلا ماتشري شري

زيزوار مخنزر : شنااااهواا .. تشا بربي ماتململ من حدايا ولا طيح شي روح

من تحت سنانو : قلت ليك بعد من لبنت بلا مانقربلو هاد العرس ويولي گنازة

زيزوار : مالك أولد مليكة شتك بحاال وليتي تدخل في  شي حوايج بعااد عليك ( هز جنوي وبدا كيشالي بيه ) تشا بربي ليوووما نفسك

حيد ولد مليكة جاكيطة ديالو وعينيه كيطلقو شرر في زيزوار : بين ليا أولد لق*بة بقات في لهدرة

ناضو صحاب ولد مليكة وصحاب زيزوار دايرين گورارة عليهم ومگجگين واخدين حتى هما وضعية القتال باش يهجمو على بعضياتهم ... وگاع ناس ديال الحفلة مجوقين وراهم كيتسناو في هاد المجزرة تبدا وكاين حتى لي هاز تيليفون كيصور باش يلقا مايلوح ويشهر في مواقع التواصل الاجتماعي ... اما ليلى ومريم بداو كيترعدوا بالخوف وجههم ولا صفر وكيبكيو وعاد طلعاات معاهم شاهدة وندموا على هاد خفة رجل وقلة العقل لي دارتها ليهم وزادت كملات القضية عندهم ملي تشابكو رجال مع بعضياتهم وجناوا بداو غي كتشايروا ودمايات والهيلالة وسبان لملة والكلام الخايب من سمطة لتحت وزيد صوت لغوات ديال لحضور لي كيهربو مخافة لايصيبهم شي مكروه ... شي ناس تما شافو لوضعية زادت تكفسك وماغيبعدو حتى طيح شي روح قرروا يتاصلو بالشرطة ويعلمهم  تجنبا لأي حادثة لي غتأدي موت لأحد الطرفين