# طوبى "شارع القهوة" #جمان_فريد #الجزء_السادس_والعشرين"الطيب مايقعدش" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ في مطحن عيت شنيبه.. كان المهدي واقف ع واحد من الشباب العاملين عنده يطحن فالقهوة... وهو واقف حس فجأة بضيقة ماعرفش سببها.. كان يبي يطلع شويه ياخد نفس.. قال للعامل:كويس هكي.. ومشي طلع من حداه.. برت المطحن كله... وقف قدامه وهو ياخد في نفس بطريقه غير ملحوظه.. شويه سمع.... "اااه ياربي اااه ااه..ياربي..ياربي" كان ينقال ببكي قوي.. والصوت يعرفه كويس.... صوتها...سلطانة قلبه..سدرة المنتهى...! ☘في نفس اللحظه.. قدام باب حوش الدكتور إياد.. إياد بإبتسامه:راهم ماشاء الله شارع كامل خالتي :ومالو ياحبيبي..ومالو..وبعدين انت مفكر خالتك قليله رح تشوف شو رح أعمل.. اياد بضحكه:تمام المهم نبيها صفرة تحل العين المغمضه.. :ماعليك والله لخليون يتركوا الكسكسي والبازين... ضحك اياد وقال:تمام طالع ماتبي شي؟ :لا حبيبي كل شي موجود الحمد لله تيسر انت.. إياد:سلام ..وفتح الباب وطلع.. وخالته ردت السلام وسكرت وراه الباب.. هو كان ماشي يعزم الجيران..ويردلهم كلهم شويه من جمايلهم عليه هو وولده.. بالذات في العيد مافيش حوش مابعتلهمش حاجه... واكثر من يتفقد فيهم ويبعت حوش الواعر اللي حب يبدا بيهم هما الاولين في العزومه.. وين قرب يوصل فيهم.. سمع نفس الشي اللي سمعه المهدي قعد واقف في مكانه.. عقد حواجبه وبدت ع وجهه ملامح القلق.. "علاش هو علاش علاش الباهي مايقعدش ياناس قولولي" شبح جهة حوش شنيبه.. لقي المهدي واقف يسمع.. شبحله المهدي بقلق...وهو نفس الشي.. بعدين شبح للباب ومشي دق عليه.. المهدي طول قص الطريق ومشي غادي.. فهاللحظه فتح يوسف الباب ودموعه في عيونه. بانت ع المهدي سدرة مقعمزة ع ركابه هي وبوها اللي كانت في حضنه وهي تبكي بالعبرة.. واختفت لما سكر يوسف الباب.. إياد بقلق:شن صاير يايوسف؟! رشف يوسف وقال:الفاندي راجل اختي دار حادث وتوفى.. انصدموا المهدي واياد.. والمهدي حس بوجع كبير في قلبه.. فهاللحظه المهدي مافكر في شي غيرها هي.. لأنه شاهد ع اللي صار معاها في حياتها.. وكمية الألم اللي عاشاته..والحزن اللي مرت بيه.. وطير الموت اللي ديما يحوم حواليها.. مش حيقدر ينكر انها كانت سعيده مع غريمه.. كانت تضحك هلبه معاه..كانت تبان مرتاحه معاه هلبه.. صح كان يموت غيره..ويضايق لأبعد الحدود.. ويتمنى لو انه يختفي بش يرتاح.. لكن فهاللحظه لما حصر تفكيره فيها وفي مشاعره.. ندم ان تمنى شي زي هدا... ☘داخل.... بعدت سدرة عن بوها وسكتت فجأة.. بعدين خدت نفس وقالت:كيف يعني توا..معاش في الفاندي!! ايهاب خلاص طلع من حياتي..ومن الدنيا كلها...!؟ لالالا ياربي مش مصدقه والله مامصدقه..حطت ايديها ع خدودها وقالت..حي عليا..حي ياربي كيف بندير.. لطفي بوجع؛سدرة يابنتي إنا لله وإنا إليه راجعون. ناضت وقفت وهي تقول:ياربي راني مازلت ماصبرت ع فراق امي ياربي..مازال ياربي...طلعت منها آهة وجع تفتت القلوب وين تسمعها وقالت بنبرة وجع اكثر إيلاما...الصبر ياربي.. الصبر...ياربي.. صوتها زاد علي وولى مسموع في كل الشارع.. جوا يجروا من حوش عبد المطلب.. عمتها وخواتها ومرت عمها وبنت عمها وجدها اللي كان يحاول يسرع وهو يمشي بعكوزه. مطيرة بفجعه:خيرك يابنتي شن صاير.. سدرة ببكي وعياط؛مات..ايهاب مات ياعمتي مات.. كلهم انصدموا بقوة.. سدرة وهي تنوح:مات الراجل اللي نحساب ربي عوضني بيه مات..مات اللي عمري ماريت منه حاجه غلط..اللي عمره ماوجعني بكلمه..اللي كان يحترم فيا ويقدر فيا وحاطني في عيونه وفوق راسه..مات الباهي مات... بوها ماتحملش قال:دخلوها داخل.. مطيرة وصفيه وهما يبكوا.. خدوها وخشوا بيها للحوش.. والكل خش معاهم.. وهي مازال تبكي وتقول.. ياناس كنت مانرتاح كان معاه...الراحه عرفتها معاه هو..وين نخاف نكلمه هو نطمن..وين نحير نكلمه هو يريحني..وين نبكي نكلمه هو ينسيني حزني... نحساب ربي عوضني بيه..لكن كيف ماعطاهولي خداه مني.. اللهم لااعتراض اللهم لااعتراض...الصبر ياربي الصبر.. اعطيني الصبر ياربي... ••وبرا•• كان صوتها واصل للناس.. سمعاته فايزة..طلعت من حوشها ببناتها ومشتلهم.. الرجاله اللي كانوا واقفين ع لطفي وين شافوها جايه تباعدوا.. فايزة بخوف:شن في ياعمي لطفي.. لطفي بألم؛الفاندي توفى.. فايزة شهقت بصدمه..وطول دفت الباب وخشت وبناتها معاها.. ولطفي سكر الباب.. فهاللحظه المهدي لف ومشي للحوش.. دموعه كانوا حيغلبوه...بس هو مسحهم بإبهامه قبل لينزلوا... وصل في الحوش وخشله... ☘وفايزة خشت عليهم وهي تقول.. فايزة بصدمه:سدرة.. سدرة لما شافتها ناضتلها وضمتها وهي تقول ببكي:راح الفاندي يافايزة ولحق احمد الباهيين مايقعدوش فهالدنيا المعفنه ياوخيتي. فايزة ضمتها بقوة وقعدت تبكي.. والزوز قعدوا يبكوا بطريقه اثرث في قلوب اللي بحداهم.. كانوا يبكوا معاهم.. بس اكثر من كان يبكي اللي وجعتها اختها ع الآخر.. تحسابها بتفرح وتتهنى..لكنها رجعت انجرحت جرح بليغ من جديد... ☘☘☘☘☘ خش للحوش.. لقي عائشه مقعمزة في دار الولاد تقري فيهم.. وحاطه سدرة في الجراي في الدار اللي فيها التلفزيون وحاطتلها قناة اطفال ومعليه الصوت بش تلهيها.. خش عليها المهدي وقال:عايشه.. شبحوله هي والصغار.. عائشه شافت شكل وجهه خافت:نعم! المهدي:صاحبتك بنت الواعر راجلها توفى.. عائشه بصدمه:لاإله الاالله! محمد:عمي الفاندي توفى؟ هز بوه راسه ايجابا ومشي طلع من حداهم.. ناضت عائشه وراه وهي مفجوعه وتقول:لاإله الاالله.. ومشت خشت لدارها.. خدت جلابيتها وشاربتها ولبستهم.. وطول مش طلعت من الشقه.. والمهدي وقتها كان في الدار التانيه موطي صوت التلفزيون.. وواخد بنته سدره في حضنه ويرقد فيها..وهو يفكر في حاله اللي تسمت عليها... ☘تعبى حوش الواعر بالجيران... ونسرين سمعت هي وجت بسرعه... وكان حال سدرة بالويل.. بس كانت تردد في جمله وحده... "الصبر يارب الصبر"... وعائشه حداها تقوي فيها وذكر فيها بالآيات والأحاديث... ☘لعند ماليل الليل... كانت سدرة تبي تمشي لحوش اهله.. عائشه:سدرة توا خشت العده خلاص.. خديجه:عدة شني والراجل مادخلش بيها!؟ عائشه:عدة الارمله سواء الراجل دخل بيها او لاوحده.. مغليه:اول مرة نسمعوا بيه الكلام هدا.. عائشه:هادي فتاوي لكبار العلماء ياعمتى..والرسول نفسه قال الكلام هدا.. نجمه:اني سامعه انها تخش العده بس 4شهور و5ايام.. عائشه:عده كامله ياعمتي نجمه..لبعض الامور خلوها تكون عده كامله.. مطيرة؛باهي تقدر تمشي توا ولالا.. عائشه:هادي اسألوا فيها مشايخ اني مانقدرش نقول فيها شي... •••ومشي لطفي بجويده وسأله.. وجويده كان يعرف الحكم بس لأنه مش فقيه اتصل بمشايخ كبار قالوله يجوز تمشي... ☘ولبست عائشه سدرة لبس الحداد.. وفايزة واقفه تشبحلها وهي تتفكر في روحها وتبكي.. اما سدرة فكانت واقفه وساكته ودموعها ينزلوا.. زي الجثه اللي من غير روح.. وطوبى واقفه في الباب وتشوفلها وقلبها يتقطع. ومركزة بنظرها ع لبس الحداد كله.. الجلابيه الغامقه الشاربه الكبيره الغامقه..القفازات السود.. الشخاشير السود الغامقات..واخيرا الخمار... كل تفصيل كان مؤلم..كان يخلي القلب يتوجع ويحش بوحشة رهيبه.. وحشة الموت..وفقد اقرب واحب الناس ع القلب. وان كان في منهم مانلبسوش عليهم لبس حداد..بس قلوبنا تتوشح بالسواد عليهم ممكن لأخر العمر.. ☘ومن قدام حوش الواعر طلعوا سدرة لسيارة بوها ماكانش معاها من النساوين غير مرت عمها اوامها صفيه وعمتها مطيرة.. شافها المهدي بثوب الحداد زاد قلبه وجعه اكثر واكثر.. سدرة في نظرة مايليقش بيها الا ثوب الفرح... تمناها لو لبست الابيض وهي مع غيره وفرحانه.. ولالبست الاسود وقلبها ونفسها مكسورين.. ركبوها االسيارة وركبوا معاها وتحرك بيها بوها طول... ☘☘☘☘☘☘ وصلت لحوش اهل ايهاب الفاندي.. صوت النواح والعياط قالب الدنيا.. سدرة وين سمعتهم حطت يدها قلبها.. وبوها قعد يحوقل..."لاحول ولاقوة الابالله" نزلوا من السيارة.. وخشوا داخل وبوها مشي لخيمه الرجاله وكانوا يوسف والحاج الواعر سابقينه داخل.. 🥀وين خشت سدرة رفعت خمارها وشافتها امه.. جتها تجري وقالت:ايهاب راح يابنيتي راح قبل لنفرحوا بيكم راح..قبل لنشوفه عريس وليدي.. وضمتها وسدرة قعدت ضم فيها وهي تبكي بعبرتها.. تمنت لو ماعطلتش بالزواج...وندمت هلبه لأنها شرطت عليه طول بيه.. وزادت في بكاها اكثر واكثر... وبعدين جوها خواته حتى هما وعماته وخالاته . اللي كلهم حضنوا سدرة وبكوا معاها لين قطعوا قلوب كل الناس الحاضرة... قعدت سدرة غادي لقبل الفجر بشويه.. بعدين روحوا بيها بوها واللي معاها.... ☘☘☘☘☘☘ تاني يوم.. كان يوم الدفن..بعد صلاة الظهر.. الجو كان بارد هلبه...والسمي مليانه غيوم.. لحف اياد رقبته بالشال وقال:صح مانعرفاش بس في النهايه كان نسيب جارنا وغير هكي المشي في جنازة المسلم فيه اجر يامهند.. مهند:كان هكي راجيني نجيب البالطوا من داخل.. حط اياد ايديه في جيوب بالطوه اللي لونه بيج وقال:خف روحك.. لحظات وجي مهند وهو لابس بالطوه.. بعدين لبس سبيدروه وطلع مع بوه من الحوش... ☘☘☘☘☘ "هيا ياولاد" طلعوا الجالي وعمر ونضال.. الجالي وهو يلبس في طاقيه صوف ع راسه:هيا بوي.. مشي محمد وولاده وراه... شويه لاقو المهدي طلع من الباب اللي يرفع لشقته وهو يلبس في قفازات جلد.. شبحوله بتعجب وبوه قال:طالع؟ المهدي وهو يدخل في اصابع ايديه في بعض بش يدخل القفازات فيهم كويس قال:معاكم للجنازة.. وفتح الباب واشر لبوه يطلع هو الاول.. مشي محمد طلع..وهو طلع بعده ولحقوهم باقي الولاد... ☘☘☘☘☘ مارفعوش ثابوت الفاندي لأهله بش يشوفوه.. لأنه من جراء الحادث وحده من ايديه ووحده انقطعوا لفوها وحطوها معاه في الثابوت.. حيكون منظر قاسي جدا عليهم لو شافوه.. وحبوا خوته كذلك انه يكون في عيون امه وخواته بنفس الصورة اللي عرفوه بيها بش وين يتفكروه مايكونش الألم مضاعف... ☘☘☘☘☘ وغادي.. جنازة الفاندي كانت مهيبه.. زحمتها اكبر من زحمة جنازة أحمد.. فيها ناس جايين من كل حدب وصوب فيك ياليبيا.. حتى صديقه اللي بوه كيف توفى وكان ماشي يعزيه فيه ومات في الطريق.. سيب عزي بوه وجي يحضر جنازته وكان يبكي عليه هلبه لأنه حس بالذنب برغم انه مالاش ذنب.. كان المهدي يشوف في هلبه ناس من الحاضرين رجالة مصنعين زي مانقولوا بس كانوا يبكوا عليه زي خوته.. كان باين جدا ان الفاندي جدع وصاحب صاحبه ومحبوب.. اذا كان مع الناس هكي مالا مع سدرة كيف كان!؟ حتى لو حباته سدرة برغم انه صعب جداجدا جدا عليه تقبل هالشي...بس ماتنلامش..لأنه كان خير منه بهلبه..عوضها عنه هو..والبكي اللي بكاته معاه كله تحول لفرح مع الفاندي.. 🥀وسدرة اللي كانت راقدة في دارها هي وخواتها سرحانه تشوف في الفراغ بعيونها اللي دموعهم سيل.. كان تتفكر في كل ذكرياتها مع الفاندي.. الراجل هدا كانت حاجه حلوة خش لحياتها وغيرها.. كان مسكن لكل اوجاعها..وكان سبب في كل ضحكه ارتسمت ع وجهها بعد سنين احزان.. بس للأسف انختم وجود في حياتها بذكرى مؤلمه وحزن كبير... سدرة صح لهاللحظه ماحبتش الفاندي الحب اللي بين الراجل والمراة... بس كانت تعزه هلبه...تعودت عليه هلبه..ترتاح معاه هلبه.. وكانت حاسه انها بعد زواج حيطلع من قلبها الشخص اللي متملكه بقوة وحياخد هو مكانه.. بس الله ماأرادش.. والباين ان قلب سدرة حيقعد ملك ولد الجيران اللي كان اول ماعرفت معاه الحب وماقدرتش تحب غيره.... ☘☘☘☘☘ اندفن الفاندي..وانحط التراب عليه... وراح لحياة تانيه غير هالحياة... بس في من مش مفكر في غير هالحياة الدنيا.. وعيونه تصول وتجول بين الناس الموجودين.. بعيونه شاف وبودانه سمع هالمرة.. وكان نفس الشعور يتحرك بداخله..شعور ابليس اللي حسه من اول ماخلق الله آدم عليه السلام بإيديه.. كان يبي يعرف في شن خير منه احمد وايهاب بس يكون ليهم كل هالحب وهالاحترام من الناس!؟ يسمع في شكرانية الناس للفاندي.. وفي داخله رغبة تكون هالشكرانيه ليه هو ويسمعها من الناس وهو حي مش بعد مايموت تنقال عنه.. شن بيدير بيها!؟ هدا الجالي...اللي كان مايحبش يشوف حد احسن منه حتى في عمل الخير... ☘☘☘☘☘☘ "حي ع مرت خوك حي وجعتني من توا" طاهر:علاش!؟ نجاة وهي تلبس في كبوطها الفرو:تو خلاص سدرة ولت بروحها وبيرجع خوك لسريبه الاول.. طاهر وهو يفكر:تتوقعي هكي!؟ نجاة:من غير شك..هدا اللي بيصير اصلا.. وطلعت بوتها من المدخل ولبساته ودخلت فيه السروال وقالت:هيا هيا.. تنهد طاهر وقال:هيا.. مشي فتح باب الشقه.. طلعت هي الاولى وهو طلع بعدها... كان رافعها تحضر فرق السو في حوش الواعر لانهم كانوا دايرين عزي برواحهم حتى هما.. حطها طاهر ومشي لحوش اهل الفاندي بش يعزي.. مشت مع مغليه وحمواتها لحوش الواعر.. خشوا للحوش.. وسلموا ع الموجودات..بعدين قعمزت مع حمواتها.. مغليه ونسرين ناضوا يعولوا بينما هي وخديجه قعدوا مقعمزات .. كانت نجاة دور ع سدرة بعيونها شافت عواطف مقعمزة جنبها نجاح..حست انهم مش من اهل الحوش وكان شكل عواطف عادي..يعني ظنها هي واختها يومها مش في محله.. ~~~~~~~~ فردوس:طوبى هاك طلعي الصفره شفت نساوين خاشات توا. طوبى:حاضر.. خدت الصفره من اختها ومشت طلعت للصاله.. وين قعدت دور ع وجوه جت توا.. عيونها جو ع خديجه ومالاحظتش اللي جنبها.. جتها وقالت:تفضلي ابله خديجه.. خديجه خدت منها وقالت:تسلمي.. جت بتمشي طوبى.. خديجه:طوبى مرت خوي..واشرت بعيونها.. شبحت طوبى لنجاة لقتها تشوفلها بإبتسامه.. رجع شعور الخوف نفسه انتاب طوبى وقلبها انقبض بقوة.. مدتلها وقالت:اسفه ماشفتكش.. نجاه:ولايهمك..وخدت منها.. وطوبى طول مشت وقلبها يدق من الخوف. وكأنها شافت جنيه مش انسانه... لحظات وطلعت سدرة للناس.. كانت تبان اقوى..وحتى بكي مش باكيه بس عيونها حمر ومنفخات.. ناضولها وقعدوا يسلموا عليها. هني نجاة عرفت ان هادي سدرة.. قعدت مركزة معاها كويس كويس... وتفصل فيها تفصيل.. لين وصلت فيها.. خديجه:هادي مرت خوي طاهر.. هزت سدرة راسها.. ونجاه سلمت عليها بالخد وقالت:عظم الله اجرك.. سدرة بصوت مبحوح:اجرنا واجرك.. بعدين طلقتها وسلمت ع خديجه.. قعمزت نجاة وهي تفصل فيها بعدين خدت فنجان قهوتها ورجعت تشرب فيه وهي تشوفلها.. ☘☘☘☘☘☘☘ الساعه 11:00ليلا.. في صالة حوش شنيبه.. مقعمزات مغليه وبناتها وكناينها.. مغليه:شن فيها باتوا هني واطلعوا من هني للعمل.. نجاة وهي مبتسمه بإحراج مصطنع:خلاص مادام انتي هكي تبي نقعدوا.. خديجه في نفسها"ماصدقت" بعدين قالت:لاحظتوا الدكتور اياد كيف ماسيبهمش بكل.. مغليه:من سنين عينه ع سدرة ويبيها.. خديجه؛وتوا انفتحتله الطريق.. نسرين بضيق:مش وقته الكلام هدا بكل ياخديجه.. خديجه:ماحد يموت ع حد حبيبتي.. نجاة:صدقتي توا الطريق اتفتحت لإياد وغيرها واكيد هي مازال تبي تعيش حياتها.. شبحوا نسرين وخديجه لعائشه اللي كانت تشوف لنجاة بحده لأنها حستها تلقح.. ونجاة ماتشوفلهاش ع اساس تتكلم بحسن نيه وماتعرف شي.. مغليه ارتبكت شويه وقالت؛ربي يعوضها خير... سكتوا شويه.. بعدين نجاة قالت بتساؤل فيه تصنع حسن النيه؛عمتي معليشي بنسألك.. قعدوا يشبحولها ومغليه قالت:على شني؟ نجاة:واني في العزي سمعت دوة هكي وبعد طلعنا حتى هو شفت حاجه زي اللي تأكد الدوة هادي؟ خديجة:دوة شني؟ نجاة:حقه في حاجه بين سلفي الجالي وفايزة المزينه؟ عائشه شبحوا لبعض وبدت ترقالهم رسمي من نجاه.. مغليه عقدت حواجبها وقالت؛وانتي شن شفتي بش تأكدتي من هالكلام؟! نجاة:وحني طالعين اني وخديجه..شفت للجالي واقف عليها ومعاهم وحده من بناتها..وحتى مرة لما درتيلي اللمه في من شافها واقفه عليه في الجنان.. الشك ركب خديجه ومغليه.. اما نسرين قالت؛كلام فاضي ومافيش منه بكل..الجالي لفايزة زي خوها الصغير.. مغليه:والجالي قلب طيب وحنين مع الصغار هلبه وبنات فايزة يتامى مصخفينه هدا كل مافي الموضوع.. نجاة:ايه تمام بس سامحوني يقولوا اللي يخاف يسلم..والجالي ينخاف عليه مازال صغير وينضحك عليه بسهوله وهي ارمله وعندها بنات وماعندهاش راجل يعني مادا بيها تحصل راجل حنين ع بناتها. عائشه:ربي قال اجتنبوا كثيرا من الظن ان بعض الظن اثم يانجاة..وناضت وهي تقول..تصبحوا على خير.. ومشت طلعت من حداهم وهي معصبه.. نسرين:نجاة اشبحيلي.. شبحتلها نجاة... نسرين؛حبيبتي انتي جايه جديده هني وماتعرفي حد..لو كنت مكانك او سنه زواج نشد لساني وماندخل في حد ولانعطي رايي في حد لين نعرف كويس وبعدين نتكلم..نصيحه ماتتسرعيش بش ماتسخريش تمام حبيبتي.. نجاة من داخل كانت تسب وتلعن في نسرين..بس تصنعت ابتسامه وقالت..مزبوط وعندك حق..شبحت لمغليه وقالت..سامحيني عمتي تكلمت بحسن نيه مش قصدي شي كان الخير.. مغليه؛معليشي بنتي معليشي..البنادم يتعلم من غلطه.. نجاة بإبتسامه ود مزيفه؛عندك حق عمتي.. وناضت وهي تقول..الساعه بتولي 12لازم نرقد..تصبحوا ع خير.. مغليه بس اللي ردت؛قدامك كل خير بنتي. ومشت نجاة طلعت من الصاله.. دارت روحها بتمشي للصاله بس قعدت واقفه جنب الحيط.. وتتسمع عليهم... خديجه:ماخابتش نظرتي فيها والله.. نسرين:حرقتلي عصابي التافهه قريب ضربتها.. مغليه:بالشويه عليكم المراة تتصرف بحسن نيه وتحاول تخش العيله وتولي منا وفينا مسكينه يتيمه وحتى ام راجلها مراة جافه ومش باهيه بش تمشي عليها وتجي تبي العيله مسكينه.. ارتسمت ع وجه نجاة ابتسامة خبث.. سكتوا الزوز وماعلقوش ع كلام امهم.. مغليه؛وبعدين فكونا من بوكم مايبيش في طاهر ولامرته دقة الشوكه مولي حساس هلبه من جيهته وماراضي فيه شي.. ضحكت نجاح ضحكة خبث بدون صوت وغضت ع شاربها.. خديجه:غير ردي بالك تسمع الدوة هادي تتفرعن بعدين.. نجاة بهمس:سمعتها ياعنقروفه سمعتها.. شبحت القدام شافت مرش باب الحوش اللي مايبين شي من برا ولامن داخل ظلم.. خافت لفت ومشت بسرعه للجناح فتحت الباب وخشتله.. فهالوقت الجالي فتح باب الحوش وخش.. سمع هدرزة امه وخواته.. سكر الباب ومشالهم طول.. ☘نجاة في االجناح قعدت تحول في كبوطها وهي تقول بهمس وتعجب؛مكياج فايزة طلعك احل من مكياجك في العرس..فايزة طلعاتك حلوة..تي تو نوريكم انتم وفايزة.. خشت للطاهر لقاته راقد بالنوم.. حولت وشاحها ومشت علقاته هو والبالطو ع الشماعه... ☘وفي الصاله.. مغليه؛اسمع جاي نسألك سؤال ونحلفك براسي تجاوب بالحق وماتكذبش.. الجالي ؛نحلف بالله يام مش براسك مايجوزش..والله نقولك الحق مش داير شي نخاف منه.. مغليه:فايزة في بينك وبينها حاجه!؟ ضحك الجالي بسخريه بعدين قال:لاحول ولاقوة الا بالله.. خديجه:مرت خوك حتى هي شكت والحق حتى اني شفتك واقف ع فايزة وبنتها.. الجالي:هاك قلتيها بنتها تلاقيت اني وياهم وقفت البنيه هدرزت عليها ولعبتها وعطيتها فلوس وين الغلط..وبعدين من هي مرت خوي هادي اللي شكت!؟ نسرين؛نجاة.. الجالي بتهكم:ياعيني شكلها هادي المرحله التانيه من خطة طاهر افندي.. مغليه؛خطة شني!؟ الجالي:يام من الاخير طاهر هدا مانزلش من هني واشر ع رقبته.. ويشهد الله اني نتعامل معاه بالسيف عليا لأنه خوي وع خاطر بوي وخلاص..لكن نقوللكم البنادم هدا مش ساهل بكل قاعد يخطط يحولنا واحد واحد من طريق بش ياخد كل شي.. نسرين بإنزعاج:شن التفكير هدا يالجالي غلط تفكيرك كله غلط.. الجالي:تمام غلط لكن كلامي تو تجوله وتفكروا اليوم هدا وتقعميزة هادي.. وناض ومشي طلع من حداهم وهو في قمة الغضب والنقمه ع طاهر...بعد مازرع الشك في قلوب خديجه ومغليه اتجاهه.. ☘☘☘☘☘☘☘ "خيرك" عائشه وهي تحط سدرة في سريرها:خيرني!؟ المهدي؛حاسك مش مزبوطه زي اللي طايرتلك.. عائشه تنهدت وقعمزت ع السرير وقالت:كان نحكيلك بتقولي دوة نساوين. المهدي:احكي احكي..نسمع فيك.. عائشه:استغفر الله العظيم..مرت خوك هادي ماحبيتهاش وماقدرتش نقبلها الحق ومانبيش يكون في بيني وبينها أي احتكاك.. شبحلها المهدي شويه بعدين قال:اللي يريحك ديريه.. عائشه تنهدت براحه وقال؛ريحتني..تصبح ع خير المهدي؛وانتي من اهله.. رقدت عائشه وعطاته بالظهر.. وهو قعد مقعمز..وتفكيره راح لحوش الواعر...لبنتهم اللي شاغله باله وقلبه عمره كله... ☘وهي كانت راقدة ع رجل اختها الصغيرة...طالقه شعرها.. واختها تحرك فيها بأصابعها وتسمع فيها شن تحكي.. سدرة وهي تشوف للخلفيه متاع تليفونها تحكي وهي مبتسمه ودموعها تنزل:كان وين يشوف صورة الخلفيه يقولي شن جو ياماجده..ولا لو نتصل بيه يرد عليا ويقول اوو ماجده.. طوبى ودموعها في عيونها:شن قصده بيها؟ رشفت سدرة وقالت:العراق ع ايام صدام الله يرحمه كانوا يقولوا للمراة ماجده والماجده.. طوبى:اها.. سدرة حطت ع رقمه وقعدت تشبح لإسمه وقالت:يعني خلاص معاش بيجني اتصال بالاسم هدا خلاص!؟ دموع طوبى نزلوا.. سدرة غمضت عيونها وقالت؛مش قادرة نستوعب مش قادر نصدق..كيف راح مني هكي..في عز فرحتي بيه راح هكي.. طوبى بحزن:ياريتكم تزوجتوا ياسدرة يارب..بس كله مني اني..اني الهم اللي ديما واقف في طريقك.. سدرة شدت يدها بقوة وقالت؛معاش تقولي هكي..ربي كاتبله يموت فهاليوم لو كنت متزوجاته كان وضعي توا اصعب مليون مرة..مرات نجيب منه صغار ويقعدوا يتامى...ربك في المكتوب يلطف يابنتي..باست يدها من داخل وقالت..عمرك ماكنت هم لأختك بكل..انتي ديما دواي وبلسم جروحي..لولاك من بعد ربي راني انجنيت ياطوبى.. طوبى طبست ع راسها وباستها بعدين حطت خدها عليه..وقعدت تمسح ع ذراعها.. وسدرة تبوس في يدها وتحضن فيها... 🥀وشويه ورقدت طوبى..ورقد كل من في الحوش... وقعدت هي بس سهرانه.. مقعمزة بروحها في الكوجينه اللي كانت مظلمه الا من الضي الخافت.. وتسمع في صوت المطر اللي برا تصب.. وتشوف في رسائلها هي والفاندي..تقرا فيهم.. ومرة تضحك ومرة تبكي.. لعند ماوصلت في اخر رساله.. (حي عليك يجيك يوم ومعاش تحبني) (مستحيل فالقلب محفور غلاك) قعدت تبكي بصمت وقلبها موجوع.. بعدين بدت تكتب.. (هوبا) (وينك) (السدرة تبكي وخاطرها انكسر ياهوبا من مازال من الناس بيجبر كسري من بعدك! رد عليا) حطت يدها ع فمها وقعدت تبكي وهي تكتم في بكاها.. بعدين خدت نفس ورجعت تكتب.. (عارفه مش حترد خلاص..عارفه..اااه الله يرحمك الله يسامحك عمري ماريت منك عيب..ولافي مرة جرحتني كان مرة وحده بس..بموتك..الله يرحمك) وحطت التليفون ع الطاوله وحطت ايديها ع وجهها وقعدت تبكي .. فجأة رن تليفونها.. شبحتله لقاته.. "الفاندي يتصل بك" ردت بسرعه وهي تقول.. "هوبا!" "سدرة" قعدت تبكي لما ماسمعتش اسمها بأسلوبه المميز وصوته الخشن اللي فيه بحه... "السدرة" "سدرة معاي اني اقبال" سدرة بنبرة باكيه؛عرفتك.. "ياااه ياسدرة قطعتي قلبي ياوخيتي تليفونه جابوه واني خديته شوفي وخيي ماسلمش لكن تليفونه سلم الله ع المكتوب " سدرة قعدت تبكي.. "كنت نتفرج ع صوره ونبكي لين جوني رسايلك قلبي تفترش تفريش..محرها ناره ياوخيتي محرها نار..الناس اللي تقوللنا سلامة روسكم البركه في اللي قاعدين يحسابوا في حد يعوض مكان حد خوتي تريس يبكوا عليه زي الصغار من لما مات للهاللحظه..كان بونا وخونا وكل شي في حياتنا الله يرحمك ياوخيي والله يصبرنا ويصبرك ياسدرة" سدرة؛ااه الصبر غير وينه ومن يجي بس يااقبال.. "ومن سمعك ياوخيتي" سدرة؛اااه ربي الله يرحمه الله يسامحك كله على بعضه باهي..كلامه اسلوبه فعايله وقلبه..ربي يجعل مكانه الفردوس الاعلى يارب العالمين" "آمين يارب آمين" وقعدوا يهدرزوا ع ايهاب هدرزة ماخلتش من الدموع..وسكروا الزوز وهما يبكوا بالعبره.. وطوبى اللي فاقت فجأة ومالقتش اختها ناضت وقعدت دور عليها لين لقتها. قعدت واقفه في الباب تسمع في الكلام كله وهي تبكي بصمت..ماقدرتش تمشي لاختها خلتها براحتها تبيها تعيش شويه من حزنها بروحها وبراحتها... 🍀🍀🍀🍀🍀🍀🍀 وتمر الايام ورا بعضها لين يعدي شهر.. سدرة استجمعت نفسها وتحاول ترجع زي ماكانت.. قاعده في الحوش تراجي في عدتها امتى تنقضى.. واحبابها حواليها وكل حد يحاول يخفف عنها بطريقته.. وقعد المهدي ياخد في اخبارها من نسرين اللي وجعها خوها وهو يسأل عنها كانت تبي طمن قلبه بس.. فهالوقت.. الدخيله اللي خشت ع عيلة جديد كانت باديه في تنفيذ مخططاتها.. ☘في جناحها في حوش شنيبه... نجاة؛انت توا حظوظك مع المهدي ولت ضعيفه مادام سدرة المنتهى ولت فاضيه... صابرين؛هالعزوز الشارفه شن تجي جنبي قوليلي.. نجاة:عندك حق ماشفتيهاش..جميله وجذابه هلبه اني شفتها وهي في عزي راجلها مالا في حالتها العاديه كيف تكون! وبكل ماتعطيهاش عمرها نسرين وخديجه وباقي صاحباتها يبانوا عزايز قدامها.. صابرين:تبي تقهريني شكلك! نجاة؛مش هكي ياغبيه اني نبيك تغيري الموجه.. صابرين:على مني ان شاء الله! نجاة؛ع الجالي.. صابرين بعدم تقبل:لالالا اني عاجبني المهدي مايجيش جنبه الجالي حاجه.. نجاه:بالعكس الجالي جذاب اكثر وصغير يناسبك وغالي هلبه ع امه بوه عنده بروحه عرفت انه يفضل فيه ع المهدي.. صابرين مش متقبله كلام اختها.. نجاة:فكري في الموضوع ياهبله..امشي بعقلك ياحمارة.. وقعدت درس عليها لين قربت تقنعها.. وشويه وناضت صابرين بتروح.. طلعت وسلمت ع مغليه.. بعدين مشوا الزوز طلعوا من الحوش.. ع خشة المهدي.. وين شافاته صابرين نست كلام اختها كله.. ابتسمت من قلبها.. نجاة:كيف حالك مهدي.. المهدي وقف وقال:اهلا كيف حالك انتي.. صابرين:مهدي.. المهدي شبحلها ركز فيها وقال:اهلا اهلا اهلا سالمين كيف حالك.. نجاة شبحت لاختها بإيتسامه متعكرة.. صابرين بإيتسامه خافته:صابرين.. المهدي بضحكه:اها اسف سامحيني العتب ع الذاكرة...العمر ليه دور.. نجاة؛لاماشاء الله عليك في عز شبابك.. المهدي:لامعاش في شباب خلاص حتى السنون بدوا يطيحوا.. عائشه كانت واقفه في الروشن تشبحلهم بحده.. صابرين بضحكه؛ديما بصايري انت.. المهدي ابتسم وقال؛ربي يحفظك بنتي..هي نستأذن.. ومشي من حداهم.. صابرين وهي مصدومه؛بنتي! نجاة بهمس:شن دايرة انتي !؟ صابرين وجهها تغير وهي تقول:شي.. نجاة؛لا درتي.. صابرين قعدت ساكته.. نجاة:مانكش طالعه من هني قبل نعرف.. صابرين بلعت ريقها وقالت؛مرة لما جيتك تلاقيت معاه وهدرزنا عادي..مشي اني طلبت رقمه وهو قالي علاش شن بديري بيه..قتلك كان احتجت شي نكلمك..قالي قولي لطاهر وهو يقولي.. نجاه ضربتها ع ذراعها وقالت:هبله وعبيطه وطايشه.. شويه انفتح الباب وخشت خديجه وهي تقول:تلقاه في المربوعه اكيد.. سكتت لما شافت نجاة واختها.. ومحي الدين كيف جي بيتكلم وين جو عيون في عيون صابرين..انصدم.. وهي انصدمت اكثر منه.. خديجه؛برا للمربوعه محي.. محي حول عيونه عن صابرين وقال:تمام تمام.. ومشي طول للمربوعه.. وخديجه جتهم وقالت؛ماشاء الله عليكم عيلة اجتماعيه تخشوا في الناس طول.. رفعت صابرين حاجبها وهي مبتسمه قالت؛مانحكيلك.. نجاة؛كيف حالك خديجه.. خديجه؛في خيار خيري..امي قالت طيبتي الغدي وطلعت بنته زي العسل خل نشوفوا عشاك..هي سقدي اختك وخشي طيبي.. ومشت خشت داخل وهي تمشي بكبر.. وصابرين تشوفلها بحقد وقالت؛شن مصبرك عليكم نبي نفهم.. نجاة بمكر؛اخر الصبر حلوة حبي..هي بسرعه بري قدامي. مشت صابرين ووراها نجاه.. وين جت بتطلع يخش الجالي.. نجاة؛كيف حالك جالي.. فات من قدامهم ولاكأنه شاف حد.. صابرين بصدمه؛هدا خيره!؟ نجاة حرقتها حركته قالت؛بالسلامه توا.. صابرين؛لو منك نشد شقتي ومعاش نجيهم.. نجاه؛بالسلامه توا..طلعت اختها وهي طايرتلها.. ونجاة سكرت الباب وخشت للحوش وهي تحسن.. بس لازم تظاهر انها عاديه..وتقعد تتمسكن لين تتمكن.. ☘☘☘☘☘ وفي يوم تاني.. طلعت اميمه من الحوش بتمشي للجامعه.. في نفس الوقت اللي طلع فيه عمر.. حست بيه بس كعادتها تجاهل تام.. وركبت سيارتها.. شغلتها وتحركت طول وهو لاحقها بعيونه وابتسامه حب ع وجهه بعدين مشي لسيارته وهو يقول في نفسه.. "والله غير واخد ع روحي عهد كان هذا ماخليتك بكل" تنهد وركب سيارته وتحرك طول... ~~~~~~~ في مكان تاني.. في وحده من المحاكم في طرابلس.. خشت هي والمحامي متاعها... كان رجل كبير وطيب..لكن في مهنته داهيه.. :ماتخافيش بنتي بإذن الله اليوم يوصلك حقك وماتعدليش عليهم شن ماقالوا.. فايزة هزت راسها وخشت هي وياه قاعة المحكمه.. شافت سلافها..خافت بس مابينتش هالخوف.. وهما كانوا يشبحولها بنظرات وعيد وتهديد.. دارت روحها قويه ومش مهتمه.. المحامي:معاش تشبحيلهم .. غيرت طول عيونها عنهم وقالت:بإذن الله بعد ناخد حقي وحق بناتي منهم اتعابك يوصلوك.. ابتسم وقال:اتعابي وصلوني من زمان رحمة الله عليه ايهاب مخلص كل شي.. دمعوا عيون فايزة ودعت من قلبها وقالت:يارب نزلها عليها رحمات وهو في قبره يارب.. المحامي:ان شاء الله يوصل عمك لطفي ع الوقت.. فايزة؛بإذن الله..عمره ماخلف وعد ولاموعد... فجأة نادوهم .. خدت نفس عميق..والمحامي مشي وهي معاه.. فايزة حضرت هالجلسه بش تحكي للقاضي كيف طلبوا منها تطلع من الشقه قبل لتم عدتها بش يقسموا الورث..لأنهم نكروا وقالوا هي اللي تنازلت عن كل شي وطلعت من الشقه ومشت لحوش تاني خير منها... وجابوا لطفي شاهد ع كذب ادعائهم ومعاهم مايثبت ان الحوش اللي قاعده فيه مش ملكها.. بعد مرافعة المحامين..طلب القاضي حضور الشاهد.. وفايزة ع اعصابها.. خش لطفي بسرعه..ووقف في مكانه.. سأله القاضي كم سؤال وجاوب عنهم.. وبعدين ذكر ان الحوش اللي قاعده فيه فايزة ملك بنته مش ليها.. وسلم المحامي للقاضي مايثبت من اوراق رسميه ان الحوش لسدرة المنتهي لطفي الواعر.... وانها عطتها الحوش لانها معاش لقت وين تقعد.. خلاص...الحكم ولى واضح وجي لصالح فايزة... ☘قضايا زي هادي تقعد سنين طويله في المحاكم.. بس لما طيح المراة في محامي او محاميه شاطرة وتكون عندها اثباتات قويه واهم شي ان الله بمعيته ديما ساند صاحب الحق القضيه ماتاخدش اكثر من شهور..☘ بعد مانطق القاضي بالحكم.. فايزة ودموعها ينزلوا:يارب لك الحمد يارب..مش عارفه كيف نحمدك ونشكرك.. "بري اصرفيهم توا ع صاحبك ولد شنيبه.. المحامي:ماتعدليش عليهم.. لطفي بإزدراء:خزي ع هكي عيله وع هكي ربايه.. وفايزة وهي ماشيه بسرعه حاسه روحها مخنوقه وبتبكي بس شدت روحها.. "ان شاء الله تصرفيهم دوا ع بناويتك" الدعوة قسمت قلبها نصين نزلوا دموعها وهي تقول:حسبي الله ونعم الوكيل.. المحامي:شن هالبشر هادم.. "تو ربي يفضخك يامتاع الجالي" التفت لطفي وقال بتهديد:قسما بالله كان ماخليتوا المراة في حالها ندخل حسين ولد خوي ف الحكايه وانتم عارفين حسين كويس شن يقدر يدير هما انطفوا من الخوف.. كله ولاضباط اللواء المعزز..هادم مايقدر عليهم حد.. هز لطفي راسه وهو يشوفلهم بتهديد بعدين مشي.. ☘☘☘☘☘ "كمشة سفاتله خزي عليهم وعلى من رباهم" فايزة وهي تبكي:اللي قاهرني انهم عمام بناتي معقوله عمامهم يديروا فيهم هكي معقوله.. سدرة عطتها طاسة ميه وقالت:هاك اشربي .. خدت فايزة الميه.. مطيرة:بناتك عندهم غيرهم 20 عم وعمه شارع القهوة كلهم ماليهم..والعيله الحقيرة من كثر ماهما منبوذين مالقوش قدامهم غير انهم يهجوا.. سدرة؛هجة اللي هجوا يارب. مطيرة زبطتها تقصد مختار.. فايزة:هي هادي المهم ربي فكني منهم خل نعيش براحتي اني وبنياتي.. ع جية لطفي من الروشن بدون يبان منه عليهم :سدرة بنتي عيلة الفاندي جو.. سدرة عيونها طول تعبوا بالدموع.. مطيرة:هيا هي..ومشت طول طلعتلهم. فايزة ناضت وقالت:هيا سدرة.. خدت سدرة نفس عميق وزفرت بعدين مشت طلعت وفايزة غسلت وجهها وبعدين لحقتهم.. ☘لما شافوا سدرة امه وخواته قعدوا يحضنوا فيها ويبكوا بالعبرة.. وكأنه مات اليوم... هدتهم مطيرة بالسيف ودخلتهم للصاله.. اما الولاد فكانوا في المربوعه مع لطفي.... •••لطفي:شنو هدا.. :حق بنتك ياعمي لطفي..وهدا مؤخرها والورث قسمناه توا ع خاطرها بش تاخد حقها.. لطفي بحزن:الله يرحمه ويغفرله والله ماتعوضه حاجه كان راجل مايتقدرش بمال الدنيا .. خوته قعدوا ساكتين والحزن بادي ع ملامحهم.. ☘☘☘☘☘☘ تبرة وهي شاده يد سدرة وتبكي وهي تقول:نبيك تقعدي معناها كيف قبل كيف تالي حتى كان جاك نصيبك يابنتي بالله ماتقطعينا حتى بالتليفون واصلينا.. سعاد:حبيناك من حب خوي رحمة الله عليه فيك..وحبيناك اكثر بعد عرفناك ومانبوش نخسروك سدرة.. اقبال:مش انتي بس عيلتك كلها.. سدرة وهي تبكي:قداش تمنيت نعيش بيناتكم بس الله غالب..وحطت يدها ع عيونها وقعدت تبكي.. وهما يبكوا معاها.. ومطيرة متأثرة هلبه وحال بنت خوها مقطع قلبها.. اما فايزة فكانت تشوف لأهل الفاندي وتقارن فيهم بأهل احمد..تحسرت ع احمد الباهي اللي وسط عيلة زي عيلته..لاهنوه حي ولاميت... ☘☘☘☘☘☘ الاول من شهر النوار 2010... الساعه 1:30بعد الظهر .. في احدي المنتزهات... •••"يوسف كيف تبيني نراجي عام كامل نسيت ان اهلي بيسافروا سوريا شهر مايو؟!" يوسف؛مش ناسي بس مانقدرش ندير عرس واختي متكدره.. خطيبته:حتى بعد العده لا!؟ يوسف؛العده اربعه شهور وعشرة ايام مش حتنسى راجلها في اربعه شهور وعشرة ايام..سدرة هادي توأمي واهم حد عندي في الدنيا بعد امي عرسي كان ماقامتاش هي مانبيش نديره! خطيبته وهي مصدومه:وتفرط فيا عادي يايوسف!. يوسف بضيق:انتم بتسافروا عام مش مهاجرين واني وياك كانا قعدناحيين في الدنيا ماعندنا وين نهربوا من بعض.. هي شدت دموعها بقوة وقالت:معناها ع النصيب.. هو قعد يشوفلها وهو ساكت.. هي هزت راسها بعدين حولت الخاتم من يدها ومدتهوله وقالت:خلاص ع النصيب.. هو شبح للخاتم هلبه بعدين شبحلها بنظرة قصيرة..ولف ومشي وخلاها.. وهي بعد مشي شدت الخاتم في يدها ودموعها تنزل.. بعدين رجعت لبساته وقعمزت ع واحد من الكراسي وهي تشوف بعيونها للمكان اللي يمشي منه..ودموعها زي السيل.. ☘☘☘☘☘ "ماشاء الله ماشاء الله ماشاء الله" مغليه:امتى عرفتوا.. طاهر بإبتسامه:هادي جيتنا من العياده اصرت نجوك نبشروك الاول بوي.. محمد بإبتسامه؛تستاهلي عليها احلى هديه.. ابتسمت نجاة وقالت؛فرحتك احلى هديه عمي.. محمد ضحك وقال:ربي يحفظك بنتي.. مغليه:هي تعالي خشي بنتي.. طاهر:لاخالتي مستعجلين.. مغليه:باهي اقعدوا اشربوا حتى فنجان قهوة.. محمد:والله ماكم طالعين من هني من غير عشي.. ابتسمت نجاة وهي تشوف لطاهر.. طاهر بإبتسامه:خلاص الحاج حلف ماعندي ندير...خشي يانجاه.. ضحكوا نجاة ومغليه.. محمد بإبتسامه:اني طالع مشوار ربع ساعه وجاي..ماتبي شي.. مغليه:سلامتك.. مشي محمد طلع.. وطاهر قال:ماقاعد حد من الولاد.. مغليه:الجالي وعمر فوق.. طاهر:تمام..ومشي ركب الدروج.. ومغليه خدت نجاة وخشت بيها للصاله... ☘وصل طاهر فوق.. مشي لدار عمر دق الباب وفتحها مالقي حد.. سكرها ومشي لدار الجالي وكيف جي بيدق الباب.. "هاه شوفه كيف قريب كل هني وقاعد يتمسح لأمك ويجري ع رضا بوك اللي كان مش طايقه" عمر:انت فاهمه غلط يالجالي.. الجالي بإنفعال:توا اني طلعت فاهمه غلط مش هادي كانت نظرتك ليه انه كفيلي وانتهازي ويدور في مصلحته بس! عمر:كانت بس بعد عرفته عن قرب تغيرت..طاهر يبي عيله وعزوة بس..لايبي فلوس ولااملاك اخر همه.. الجالي:هدا يمشي ع السذج بس..اني اللي نفهم النوعيه هادي ونعرفها كويس..طاهر راسم هو ومرته ع كبير وغدوة تجيه كلامي.. عمر قعد ساكت وهو يفكر في كلامه.. اما طاهر اللي انجرح هلبه من كلام خوه لف ومشي نزل لوطا.. خش عليهم الصاله.. طاهر:نجاة نوضي.. استغربت.. ومغليه قالت:خيرك اللطف؟ طاهر:امي مريضه..هي نوضي نجاه.. ناضت نجاه وهي تقول:حاضر. وهو طلع طول بدون مايعطي مغليه فرصه تسأله عن شي.. نجاه وهي تلف في وشاحها ع راسها:تصبحي ع خير عمتي. مغليه وهي مستغربه؛قدامك كل خير.. ومشت طلعت من حداها.. ☘برا.. ركبت نجاة السيارة وقالت:خيرها أمك؟ طاهر بحده:مافيها شي.. نجاة بعدم فهم:كيف!؟. طاهر:اسمعي نجاة حسك طول الطريق مانبيش نسمعه تمام.. هي خافت منه اول مرة تشوفه هكي.. هزت راسها وقالت:تمام تمام.. وهو طول تحرك بسيارته وهو يحرق في العجل...
#الطيب_مايقعدش #طوبى
فتوى عدة المراة المتوفى عنها زوجها قبل الدخول بيها... قال ابن قدامة في المغني (11/223): أجمع أهل العلم على أن عدة الحرة المسلمة غير ذات الحمل من وفاة زوجها أربعة أشهر وعشر، مدخولاً بها أو غير مدخول بها، سواء كانت كبيرة بالغة أو صغيرة لم تبلغ، وذلك لقوله تعالى: (وَالَّذِينَ يُتَوَفَّوْنَ مِنْكُمْ وَيَذَرُونَ أَزْوَاجاً يَتَرَبَّصْنَ بِأَنْفُسِهِنَّ أَرْبَعَةَ أَشْهُرٍ وَعَشْرا) [البقرة:234]. وقال النبي صلى الله عليه وسلم: "لا يحل لامرأة تؤمن بالله واليوم الآخر أن تحد على ميت فوق ثلاث، إلا على زوج أربعة أشهر وعشراً" متفق عليه. انتهى. فالمرأة بمجرد العقد عليها تعتبر زوجة، فتدخل في عموم الآية والحديث، فيلزم لها الصداق كاملاً، والإرث، وتعتد عدة وفاة. والله أعلم. "اجمع اهل العلم معناها المذاهب الاربعه" حكم المالكيه في المرأة المتوفى عنها زوجها قبل الدخول بيها تعتد ام لا؟ الجواب ان كان عقد الزواج صحيحا لاخلاف في صحته بين العلماء فمات الزوج قبل الدخول..فإن الزوجه تجب عليها العده اربعة اشهر وعشرا بإجماع العلماء..وفي مقابل هذا لها نصيبها من الصداق ومن الميراث كاملا.. "المصدر كتاب الشرح الكبير للشيخ الدردير"
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
