رِفان : في بداية رواية " سعادة ڪاذبة شفنا العُنف والإساءة للأخت من خوها ، شن رأيك في هالموضوع ؟ ، يعني الراجل يلي يهين في المرأة ومش مقدرها ولا واثق فيهل سواء اخت او زوجة ؟
رتال : لو اتلاحظي في بداية هدرزنتا قتلك نبي نكتب بشخصيه مجهوله بيش ناخذ راحتي اكتر وانكون متفتحه في جميع المواضيع لان لو من اول قلت من نا كنت ح نلقي نقد حاد كيف تكتبي هكي انتي هكي شوهتي صورتنا ولو اتلاحظي ماكانتش انقول من اي مدينه وكان الفانز املاحظ لهتجي من كتابتي
ومن المواضيع اللي كنت نبي ناخذ راحتي في هو العنف والاساءة للاخت او الزوجه لان راه في واقعنا هكي مستحيل جميع اللي في بيت هادين وعاطفين متفاهمين لالا ضروري تلقي الواعر العصبي اللي حاصل في روحه اللي متفاهم الواعي الهادي ونا تكتب الواقع بس نا لو اتلاحظي درت وعرات الاخ عادل في الروايه كانت ردت فعل من موضوع صارلهم في الماضي ودرت الاخ الاكبر علي سلبي ودرت الاخ الاصغر خالد المتفاهم الحنون يعني درت خليط شخصيات في بيت واحد لان هذا الواقع نحن خوت متربين في بيت واحد وتحت ايدين اب وام واحد وتلقي كل حد وطبعه
وبالنسبه للزوج كنت مطره كذلك انخلي الأزواج في الروايه منوعين كيف الخوت لان مافيش مراه ايدرجح بها زوجها وهذه قناعتي ان في كل حوش مشكله ونقص بس قي مشاكل الواحد يرفع يده منه خلاص وفي المشاكل يمشن مع الايام والسنين وايصير تصليح في الحياه يعني ماتجيش تزوجي وتقعدي تبي زوجك ١٠٠٪
لالا كوني مقتعنه ان الكمال لله وحده لا شريك له وان نحن البشر فينا عيوب بس في عيوب تغلبها الميزات وفي عيوب الميزات هن اللي تغلبهن ونحن طول مانحن عيشين انجربو وانكافحو وخاصة المراه اللي اتكون ام ضروري في تنزلات اتقدمهن علشان اطفالها ماتكونش انانيه في حياتها وحريتها اتشوف راحة اطفال قبل وين وكذلك كلام هذا للاب انواجه.
رِفان : كيف قدرتي تقسمي وقتك بين الكتابة وحياتك العادية ؟
رتال : هو صعب الانسان ايوفق وفي نفس الوقت ادير كم حاجه
في وقت الكتابه امتعي كانت الدراسه متوقفه وماكانش عندي عمل وكانت مازالت ماقعدت ام وكنت في وقتها في مدينه جديده بالنسبه ليا مازالت مااختلطت بناس واحد وكانت علاقتي محدوده يعني وقتها كان عندي وقت للكتابه وكنت امقسمه وقتي ان نكتب في القيلة ومابعد المغرب بس كانت رافضه نكتب طول اليوم لان الصبح كنت امخليته للحوشي ما بين تنظيف وطبخ ووقت القيلوله كنت امخليته اني انوتي صورة للحلقه وانجمع الاحداث لعند العصر وبعد العصر انوقف خلاص لعند المغرب نبدا وهكي نين انكملها وانراجع ونزلها بس كنت انزل متاخر لان في فواصل اكيده ايصيرلي
بس توا ماعنديش وقت بكل الحق قعدت من حاحه ل حاجه
كان الفاصل الاول النزوح وبعدها الدراسه وهكي من حاجه ل حاجه والحمدلله .
رِفان : اكثر بطلة قريبة من شخصية سارة ؟
رتال : فافي في رواية ليبيانا وامل في رواية سعاده كاذبه
ممكن انقول هذين شخصيتين فيهن من شخصيتي ❤️
رِفان : اكثر قصة من رواية " سعادة كاذبة " كنتِ تكتبي فيها بـڪل حُب وأستمتاع ، و برضوا قصة ڪنتِ تكتبي فيها بوجع ؟
رتال : 22
اكتر استمتعت في كتابتها قصة امل وخالد ورجاء وطارق
والقصة اللي كنت نكتب فيها بوجع فعلا اية ومراد كنت نبكي واجد وقت الكتابه .
رِفان : شن هي الرسالة كنتِ تحبي توصليها للقارئ من خلال رواياتك ؟
رتال : عرم رسائل الحق مثلا اول شيء ماتحكمش علي ناس من كلام ناس بدون ماتعاشرهم لان كانت ذاكره ان صيتهن مش حلو بسبب الماضي اللي صار بس لما عاشورهن واعرفو الحقيقه ماحد كرهن وصبو معهن
تاني رساله
ماتحكمش علي انسان من تجربته الاوله لما تكون فاشله مش معناتها هو فاشل مرات التجربه الاول اتخليك اتكون انسان احسن بواجد
وان الحياة تجارب واختبارات يعني طول مانحن عايشين انكونو مستعدين نتفحو صفحه جديده في حياتنا علي خاطر اعيالنا و ناسنا واحبابنا وانحاولو نقبلو حياتنا بمرها قبل حلوها وان في كل ناس له عيب وان الكمال لله وحده لا شريك له
وانك تدعي ديمه اتكون مظلوم مش ظالم لان الظلم واعر وايعاود عليك ❤️.
رِفان : عطيني أسم بطل تعبتي في تكوين شخصيته ؟
رتال : مراد .
رِفان : بطل من ابطال رواياتك تتمني لو انه موجود في حياتك ؟
رتال : خالد في سعادة كاذبه لان كان لاعب دور الابن مع الام والاخ مع الاخت فعلا والزوج مع الزوجه ❤️
رِفان : ثنائي من ابطال رواياتك قريبين من قلبك ؟
رتال : رجاء وطارق ❤️❤️.
رِفان : ليش سيبت سارة الكتابة الليبية ؟ رغم ان عندها مُتابعين وناس يحبوها واجد ..
رتال : ظروف الحياة اولا
بعدين شفت نجاح صاح وفي قبول
بس شفت اخري سرقه وغش شفت تعبي ناس واخذته فقالت مره تانيه لو نبي نكتب انكون دايره كتاب .
رِفان : النقد سواء الإيجابي او السلبي هل يأثر في سارة ؟
رتال : اكيد ايأثر اصلا النجاح اللي صارلي نصه من النقد لو كان سلبي انحاول انصلح الخطا اللي فيه ولو كان ايجابي انحاول نستمر فيه ومع فكرة التحسين المستمر .
رِفان : لو جاء يوم وأُتحيت لك فرصة ان رواية ليك تتمثل كَ مسلسل او فيلم ، اي رواية يا ترى حَ تقترحي ؟
رتال : فيلم رواية ليبيانا
ومسلسل سعاده كاذبه ❤️.
رِفان : هل حَ نشوفوا سارة كَ كاتبة ليبية في عالم الروايات مرة ثانيه ؟
رتال : ان شاء الله يارب بس ح ايكون في قانوني اشوية في الكتابه الجايه .
رِفان : ڪاتبة سواء ليبية او عالمية تحبيها ؟
رتال : انحب نقراء واجد الحق وعندي كم اسم بس مانقدرش نذكر لاني خايفه ننسي حد ويزعل لان في صداقة بينا ❤️.
رِفان : شخصية من رواية غير رواياتك قصته/ا مأثره فيك لتوا ؟
رتال : مافيش الحق نا نظامي نتعلق بالرواية وشخصياتها فترة معينه وبعدها خلاص ..
رِفان : رواية غير رواياتك تحبيها ؟
رتال : واجد الحق اساسا انا مانكملش قرأة رواية الا ونا حبيتها ❤️
رِفان : سؤال كان خاطرك ان نسأله لكِ؟
رتال : ههههههههه مافيش ماشاءالله أسئلتك شامله الحق ❤️😂
رِفان : ڪلمة لِ جمهورك او أي شي حابة تقوليه ، المساحة ليك ♥️.
رتال : شكرا وبارك الله فيكم وجزاكم الله خير
نا لو نجحت انكون نجحت بيكم ومنكم وشكرا لان اسمي عندكم لتوا الحق ارتبكت توا لان الكلام موجه لكم مع اني كنت صريحه معكم يوم من الايام سامحوني لو يوم خيبت ظنكم والله الظروف اقوى مني مهما نحكي مانوفيش في حقكم وان شاء الله انكون ضيفه خفيفه عليكم ❤️❤️❤️
وبهكي ختمنا اخر حلقه من برنامج #رِفان_مع_كاتبة 🤍
