كاتبتنا اليوم سهيلة السويحلي من الكاتبات يلي خشوا على الروايات بالفصحى وابدعوا وكنت متشوقه جدا اني ندير معاها اللقاء وكانت عندي شوية رهبه للامانه🙊 لانها كاتبه مميزة بالنسبه ليا ونحبها هلباااا واستمتعت جداا بالهدرزة معاها🤍🤍🌼.
رفان: نبدوا على بركة الله
سهيلة:تمام
رفان نبدوا بأسئلة تعرف عنك بشكل شخصي.
سهيلة:تفضلي❤
رفان: اسم سهيلة اسمك الحقيقي؟
سهيلة :نعم اسمي الحقيقي.
رفان : اول مابديتي تكتبي هل فكرتي تكتبي بأسم مستعار غير اسمك؟
سهيلة: لا ما عمريش فكرت في الشيء هذا بالعكس كنت نعمل على إظهار اسمي زي ما هو.
رفان: جميل يعني ماكنتيش خايفة من ردة فعل الناس وتخفيتي تحت اسم مستعار.
سهيلة: لالا .
لأن عائلتي كانت تدعم في الحق ولتوا مازالوا يدعموا فما كنتش شايفة الشيء عقبة.
رفان: مواليدك والمؤهل الدراسي؟
سهيلة: 1994.
خريجة قسم اللغة العربية كلية الآداب جامعة مصراتة.
رفان: تشتغلي حاليا او لا؟
سهيلة: والله عندي أكثر من شغلة بس الي ثابتة عليها إني فاتحة مشروع مع عائلتي في صناعة المأكولات.
رفان: شن اكثر شي تحبي اديره وقت فراغك؟
سهيلة: نقرا كتب أو نكتب أو نفتح نت أو نشتغل أي صناعات يدوية.
رفان: اكثر شي يزعل سهيلة؟
سهيلة: الاستهتار بجهدي.
رفان: واكثر شي يفرحك؟
سهيلة: إنجاز أبسط شيء يسعدني حتى لو كان توضيب سريري أول ما ننوض 😂.
رفان: انسانه قنوعه معناها اقل الاشياء تبسطك
سهيلة: بالضبط
حرفيا حتى كلمة حلوة تبسطني وتغير جوي
مهتمة بالتفاصيل واجد.
رفان: الحالة الاجتماعية؟
سهيلة: مخطوبة.
رفان: ماشاءالله ربي يتمملك على خير❤.
سهيلة: الله يسلمك❤.
رفان: مقولة او حكمة تحبيها ومعتبرتيها اساس توجهي بيه حياتك؟
سهيلة: مقولة لعمر المختار
إن الضربات التي لا تقصم ظهرك تقويك.
رفان: من اكثر شخص مقرب ليك حاليا؟
سهيلة: عائلتي وخطيبي .
رفان: ربي يحفظهم ، ❤ دولة خاطرك تزوريها؟
سهيلة: حاليا خاطري نزور مصر .
عشان أنا شخص نعشق الأدب الحديث ونحب نجيب محفوظ والعقاد فنبي نشوف المكان الي طلعوا منه.
رفان: ان شاءالله تزوريها في اقرب وقت ❤.
رِفان : اصعب فترة في حياة سهيلة؟
سهيلة: فترة 2012 إلى 2016
كانت أسوأ فترة
فقدت فيها كل شيء متعلقة به
بس الحمدلله مرت وانولدت من الأزمات شخصية جديدة خلتني نتعامل مع الحياة بنظرة أكثر حكمة وإيجابية ورضا.
رفان: الحمدلله عثرات وانوضوا منها اقوى.
سهيلة: الحمد لله.
رفان: انخشوا على الاسئلة اللي تخصك ككاتبة.
سهيلة: تمام.
رفان: كيف بدت سهيلة في الكتابة؟ من وين دخلتي لعالم الكتابة شن الشي اللي خلاك تكتبي؟
سهيلة: من صغري كنت نحب حصة التعبير ونحب نكتب على كل موضوع يختاروه لنا
بعدها في الثورة قعدت نكتب في جرائد وكنت نتعامل مع قائدة في الكشافة تنشرلي وشاركت في كتابة أغنية راب
بعدها فتحت النت وقعدت نكتب وننشر خواطر
لين طلعت ضجة السيناريوات فحبيت الموضوع وبديت نكتب لين الحمدلله توا قريبا حننشر أول روايتين لي بالفصحى
طبعا مشاركة في كتب من قبل وكتابة مسرحيات وقريبا بنشارك في كتابة مسلسل
يعني الحمدلله طورت من نفسي.
رفان: ماشاءالله يعني كانت هواية ونميتيها.
سهيلة: اي الحمدلله .
رفان: تتفكري اول مرة كتبتي والناس تفاعلت مع كتابتك شن كان شعورك وقتها؟
سهيلة: كنت فرحانة جديات بالتعليقات حتى السلبي منها فرحني وقتها.
رفان: من كان اول شخص يعرف انك تكتبي؟
سهيلة: عائلتي.
رفان: من اكثر شخص دعمك اول مابديتي مشوراك سوا صديق او حد ع النت مثلا من كان الداعم والمشجع ليك؟
سهيلة: بالنسبة للبدايات أغلب الي نعرفهم دعموني وخاصة عائلتي وخطيبي
ووقت وضعت الأساسات الحقيقية لموهبتي كانوا كثر الي دعموني منهم معاذ الحمري الكاتب المعروف الحق دعمني واجد وعملت معه كمدققة لغوية وكاتبة في دار النشر متاعه كان له دعم كبير الحق.
رفان: اكثر شي صعب يواجهك في الكتابة؟
سهيلة: كثرة التأويلات وكل واحد ينظر أن فكرته هو الصح
بالإضافة إلى الفزلكة على حساب الكاتب
رفان: اكثر رواية تعبتي فيها وخدت منك وقت وجهد واستفذت طاقتك ؟
سهيلة: وذوي القربى
لأن أحداثها تلخبط واجد
فتعبتني واستنزفتني ذهنيا بشكل مش طبيعي.
رفان: انا اللي قريت بس استفذتني الرواية هذه كل مانقرا جزء نقول عبقرية اللي رتبت هالافكار بجد برافو عليك👏🏻 نهنيك عليها🤍..
رِفان :من وين تستوحي في رواياتك من واقعنا او معتمدة على خيالك؟
سهيلة: في البداية كنت ناخذ فيهن من الواقع ممكن في أول 3 سيناريوات بس بعدها قعدت نعتمد على الخيال.
رفان: لو خيروك رواية منشورة ليك تبدا مسلسل او فيلم اي رواية تختاري؟
سهيلة: انتشال🥺❤
رفان: انحسها لو تصير مسلسل ح ادير ضجة كبيرة❤.
سهيلة: ياريت🥺❤.
رفان: ان شاء الله شي يوم نشوفوها تعرض ك مسلسل على التلفزيون يارب ♥️.
كيف تقدري تقسمي وقتك بين الكتابة وحياتك العادية هل مخصصتيلها حيز كبير من وقتك او على حسب الفضوة؟
سهيلة: حسب الإلهام .
الكتابة لو ما كانتش إلهام حتكون تصنع والشيء هذا ما نحبذش
لازم يكون في إلهام والله مرات وأنا نغسل في الماعين تخطر علي فكرة نسيب الي في يدي ونمشي نكتبها 😂.
رفان:حلو ♥️ انا عكس الناس مانحبش الكاتب الملتزم بالمواعيد وينزل بالساعه انحس كأنه يعطي في دواء في وقته 😂 كل ماعطل معناها عصر مخه وكتب شي جميل😍.
سهيلة: أنا عندي سيناريو لتوا ما كملتش 😂😂 بسبب اختفاء الإلهام.
رفان: مافقدتش الامل منك قاعده نستنى في وأد العصر 😍
سهيلة: يا رب نقدر نرد ونكمله.
رفان: لو رجع بيك الزمن لاول فكرة كتبتيها ونشرتيها هل حترجعي تكتبي وتنزلي؟
سهيلة: لا 🤦♀️😂.
رفان: ليش؟😂
سهيلة: بعقليتي توا نقوللك لا
بس بعقلية وقتها كنت نظن إني أفضل كاتبة في العالم🤦♀️😂.
رفان: انت فعلا من افضل الكاتبات في العالم بالنسبة ليا ❤️ ماتقللي من حجم نفسك وموهبتك ❤️.
سهيلة: شرف ليا❤❤ هو مش تقليل من حجم نفسي بالعكس هو التفكير بواقعية لأني حابة نوصل للمستوى هذا.
رفان: عمرك وصلتي لمرحلة انا خلاص بنوقف كتابة و بنمسح كل رواياتي ؟
سهيلة: وصلت إني بنوقف بس عمري ما فكرت نمسح شي
لأني تعبت عليهن.
رفان: رد فعل اللي حولك على نجاح رواياتك هل قابلتي ناس حاولت تحبطك وتخليك توقفي كتابة؟
سهيلة: واجد
قابلت ناس حاربتني ونسفتني لدرجة سكرت صفحتي فترة وبعدها رديت أقوى وبأفكار أخرى.
رفان: بالنسبة ليك الاحسن ان تحصلي تفاعل قوي على كل رواية من رواياتك او ان الرسالة اللي حابة توصليها من خلال رواياتك توصل؟
سهيلة: ....
استنوا التكمله🤍🌼.
#رِفان.
