رِفان _مع_كاتبة✍🏻🤍
حلقتنا الختاميه مع كاتبه كانت روايتها الاولى من انجح الروايات الليبيه وبالنسبه ليا كانت رقم واحد في وقتها ولتوا واخده هلبا صدى
روايه تعلمنا منها هلبا وتعلقنا بيها هلبا وبكينا على عيشه كلنا اي صح روايه سعاده كاذبه🤍 وحتى في روايه الحب الاعمى الكاتبه تكلمت عليها او بالاصح دخلتها ضمن الروايه في حدث من الاحداث🤍 وهذا يدل على تأثر الكل بيها مش قراء بس🤍
تواصلنا مع الكاتبه من شهر رمضان بس عندها عذر صحي هو يلي خلانا نتاخروا لليوم وكانت كم مرة تتعب خلال الهدرزة كان حوار ممتع جدا واسلوبها خياال الله واحد عليها 🤍
واحنا نتاسفوا لو تعبناها معانا 🥺وادعولها تنوض على خير هي والبيبي🤍
وربي يرزق كل مشتاق🤲🏻🤍
بدينا اللقاء وتوكلنا على الله🤍
رِفان : ڪلنا عارفينك بأسم رتال رتولي هل هو اسمك الحقيقي ؟
رتال : لا اسمي مش رتال رتولي هذا اسم مستعار كنت دايرته علشان كنت في قروبات الجامعه وماكانتش حابه انكون واضحه درت اسم مستعار
اسمي هو ساره السيفي.
رِفان : كم مواليد رتال او خلي نقولوا سارة🤍؟
رتال : 10-3-1993 يوم عيد المعلم.
رِفان :بطول عمرك🤍.
رِفان : سارة من أي مدينة ؟
رتال : نا من مواليد مدينة المرج وحاليا من سكان بنغازي.
رِفان : مؤهلك العلمي ؟
رتال : خريجة جامعه بكالوريوس إدارة اعمال.
رِفان :حالة سارة الاجتماعية ؟
رتال : متزوجه.
رِفان :اكثر شي يفرح في سارة؟
رتال : الحق ابسط حاجه اتفرح فيا ممكن الابتسامه اتفرحني او مكالمة عاديه جدا اتفرحني واهم فرحه عندي رضاء ربي و وماما وبابا وزوجي عليا.
رِفان :اكثر شي يزعل في سارة ؟
رتال : نا زعاله راه بس نظامي مانشيلش الحق ونسامح لكن ماترجيش مني ننسي لان ح انكون حريصه اكتر في معاملتي معاك بعد الزعله.
رِفان : مقولة او جملة تحبيها وماشيه بيها آساس في حياتك ؟
رتال : الحق فكرت في السؤال واجد القيت عندي عرم مقولات الحق بس ماشيه في حياتي اني انكون مسالمه وبيت اسرار ل اكتر ناس ليا واني انكون كتاب ينكتب فيه وماينقرش يعني سرك في بير واطمني من ناحيتي واي قرار ليا في حياتي انقول اول شيء انقوله هل ربي راضي عليه او لا يعني نا خوافه الحق من ناحية الرضاء ربي وهلي وزوجي عليا يعني اندير حاجه ونا مش مقتنعه بها بكل بس علشان خاطرهم مستعده انديرها عادي .
رِفان :شن اكثر شي تحبي اديريه في وقت فراغك؟
رتال : والله كل فتره الحق وعندي شي يعني زمان انحب المطبخ واجد ونقعد انجرب حاجات جديده او مشاهدة مسلسل او قراءة روايه بس توا ماعنديش وقت فراغ واجد والحمدلله .
رِفان : اقرب شخص ليك ؟
رتال : ماما نا ل ماما مش بنت بس نا صديقتها واختها وانحب ديمه اكتساب ثقتها.
رِفان : مدينة خاطرك تزوريها ؟
رتال : نا انحب انسافر ونكتشف الحق بس خاطري انزور خارج ليبيا دبي وداخل ليبيا المنطقه الغربيه بصفه عامه خاطري نبرم فيها كلها.
