#رِفان_مع_كاتبة ✍🏻🤍.
ڪاتبتنا اليوم ، ڪاتبة ڪيوت بـڪل ، ومعروفه في عالم الروايات بـ رواياتها العائليه والقصص الحلوه يلي تطرح فيهن 🤍 ، وتُعتبر هي من الكاتبات الليبيات يلي كتبن رواية بـ اللغة العربية الفُصحى ونجحت فيها جدًا 🤍
رِفان : هي نبدو كوكا ♥️
كوكا : بسم الله 🤍
رِفان : كوكا صالح اول ما قررتي تدخلي عالم الروايات فكرتي تغيري اسمك او تحطي اسم شهرة بعيد عن اسمك الحقيقي ؟♥️
كوكا : لا ابدا خشيت بصفحتي الشخية واسمي هو دلع الاسمي الحقيقي فقط 🤍
رِفان : مواليدك وحالتك الاجتماعيه؟♥️
كوكا : مواليد 95 الحالة الاجتماعية متزوجة 🤍
رِفان : كوكا انسانه اجتماعيه او انطوائيه؟♥️
كوكا : لا اجتماعية 🤍
رِفان : اقرب شخص لكوكا؟ ♥️
كوكا : اختي 🤍
رِفان : مؤهلك العلمي او تخصصك الدراسي وهل عندك الرغبة في تكميل مسيرتك التعليمية او مكتفية بلي انتي عليه ؟♥️
كوكا : مؤهلي العلمي بكالوريوس علم حيوان
انفكر نبي انكمل دراسات عليا باذن الله بس يكبر وليدي اشوي 🤍
رِفان :دوله خاطرك تزوريها؟♥️
كوكا : كوريا السعودية تركيا 🤍
رِفان : اكثر شي يضايق كوكا ؟♥️
كوكا : ان نتفق مع حد علي شيئ وايخالف الاتفاق بكل الحركة هذي نضايق منها 🤍
رِفان : كوكا انسانه عندها سهل التسامح او صعب ؟♥️
كوكا : لا سهل عادي مجرد ماايمر الموقف وصاحبه ايجي يعتذر انسامح وننسى 🤍
رِفان : مقولة او حكمه تحبيها ومعتبرتيها اساس ماشيه بيه في حياتك ؟♥️
كوكا : على نياتكم ترزقون ♥️
وهكِ نكونوا كملنا قسم الاسئلة الشخصية ❤️
رِفان : اول رواية قريتيها في عالم الروايات ؟♥️
كوكا : ياريتني للكاتبة ام رزونة
وكان فيه رواية قبلها بس معش نذكر اسمها ولا الكاتبة الحق بس كانت حلوة بكل 🤍
رِفان : اول رواية ليك شن كانت ؟ ، ومن كان الداعم ليك فيها ؟♥️
كوكا : الحب اكبر من كل شيئ
الداعم ليا كانت اختي وعزو اللي هو زوجي توا 🤍
رِفان : شن كانت ردة فعلك على نجاح اول رواية ليك ؟
وهل توقعتي توصلي للنجاح يلي انتِ فيه اليوم ؟ ♥️
كوكا : ردت فعلي كنت متفاجئة وفرحانة
كتبت صح وماكنت متوقعة ان يعجب الناس وايكون عندي تعليقات ايجابية هكي🤍
رِفان : اقرب رواية من رواياتك لقلبك ؟♥️
كوكا : منحرف وأحببته 🤍
رِفان : لو انتِ تكوني بطلة وحده من رواياتك من تبي تكوني ؟♥️
كوكا : ممكن سندس عشان حبي السراج ، لان كبدت فيه ونا نمتب في الرواية امثر شخصية حبيتها 🤍
رِفان : لو في يوم اتيحت ليك فرصة ان وحده من رواياتك تتمثل كَ مسلسل او فيلم ، يا ترى اي رواية حَ تقترحي❤️؟
كوكا : الجوكر 💔
رِفان : اكثر رواية تعبتي فيها وخدت منك وقت في الكتابة وتجميع الاحداث ؟♥️
كوكا : ابيلا روحي ، بسبب الظروف وهكي لعند توا ماقدرت انكملها🤍
رِفان : بالنسبة ل كوكا ايهم اهم التفاعل وعدد المتابعات يلي تتحصل عليها او انه الرسائل يلي في ڪل حلقة من رواياتك توصل للقارئ ؟♥️
كوكا : ايهمني بالأكثر ان الرسائل اللي في رواياتي يوصلن
ونا دائما انقوللهن حنكتب لو حتى وحدة بس تقرالي
وحتى ان عمري ماقلت بنوقف رواية عشان تفاعل وهكي 🤍
رِفان : اكثر رسالة تحاولي توصليها للقراء من خلال رواياتك ؟♥️
كوكا : مافيش حاجة معينة
كل رواية تحمل رسالة شكل 🤍
رِفان : حلم كوكا كَ كاتبة ؟♥️
كوكا : حلمي اني نعرف الاسس مزبوط واندير كتاب برواية حلوة وبالفصحى 🤍
رِفان : حلووو ، ربي يقدرك واديري احلى كتاب ♥️
رِفان : كيف قدرتي تقسمي وقتك بين حياتك العادية والكتابة ؟♥️
كوكا : من قبل مانزوج كان اسهل كنت نكتب اوقات اللي ماعنديش قراية يعني في العطل بين السمسترات
بس بعد مااجوزت صعبة اشوية لزيادة المسؤولية
وتوا صعبت بكل حسيت وقتي ويومي كله امعبى سهر في الليل وفي النهار انكمله مع فيوزي حوسه الحوش موضوع
وهذا السبب اللي معش خلاني انكمل رواية ابيلا روحي 🤍
رِفان : عمرك ندمتي على رواية كتبتيها ؟ او حسيتي انك غلطتي فيها ومتمنيه تغيري فيها ؟♥️
كوكا : لا عمري ماندمت الحق ، لان كل رواية انتعلم منها اكثر للرواية اللي بعدها وانطور من نفسي اكثر 🤍
رِفان : هل فكرت كوكا صالح في يوم بالأعتزال ؟♥️
كوكا : ابدا عمري مافكرت فيه 🤍
رِفان : هل في تعليق لأحد الفانز حبيتيه وأثر فيك وحفظتيه عندك ؟♥️
كوكا :اغلبية التعليقات الايجابية من الفانز امسكرنتهن ومحتفظة بيهن 🤍
رِفان : كيف كانت تجربتك في الكتابة بالفصحى ❤️
وهل حَ تعاوديها ؟
كوكا : من احلى التجارب بجد 🤍
اكيدة انفكر انعاودها مش حتكون الآخيرة ❤️
رِفان : رواية من غير رواياتك مأثره فيك وتحبيها ❤️
كوكا : رواية المستشفى ، وبالفصحى رواية ارض زيكولا 🤍
رِفان : كاتبة ليبية او عالمية تحبي رواياتها ❤️
كوكا : كاتبة ليبية انحب أسلوب الكاتبة آية اتهبل طريقة سردها ننسجم امعاها😍
والكاتبة ام رزونة انحبها بكل وانحب كتابتها ، اما كتاب مش ليبين انحب اسلوب الكاتب عمرو عبد الحميد وافكاره حلوة وغير مألوفة
رِفان : كلمه او اي شي حابه تقوليه لِ جمهورك ، المساحة ليك ، وطمنيهم بالمره ؏ آبيلا روحي ❤️
كوكا : اكيدة انحب نشكرهن كلهن وانحبهن كلهن ونبيهن ايسامحني ويلتمسلي العذر وباذن الله بعد العيد حنكملها لان حاليا نكتب في الحلقات عشان لما بنزل انزلهه ورا بعضهن
وربي ايقدرني وننستر امعاهن ❤️
رِفان : شكرًا كوكا تعبناك معانا واسفين لو خدينا واجد من وقتك واستمتعت جدًا بالكلام معاك انسانه راقيه بكل ربي يحفظك وشكرًا مرة تانيه انك وافقتي وان شاء الله نشوفوك كاتبه عالميه قد الدنيا يارب ♥️
كوكا : نجك ليا تسلميلي حبيبتي ونا استمتعت بالكلام امعاك .
و بِـ هكِ نكونوا كملنا لِقاءنا مع الكاتبة الحلوه #كوكا_صالح نتمنولها ڪل التوفيق في مسيرتها 🤍🙏🏻
استنونا في حلقة جديدة مع كاتبة جديدة قريبًا بعون الله 🤍
#رِفان_مع_كاتبة 🤍✍🏻
