#رِفان_مع_كاتب ✍🏻🤍.
ڪاتبنا اليوم "قيس الفيتوري " ، يُعتبر من اول الكُتاب الليبين الشباب ، تميز بـ اسلوبه و سرده المُتسلسل 🤍 ، رغم انه موقف كِتابة روايات من فتره ، بس مازال محافظ ؏ اسمه 🤍.
رِفان : شنو استاذ قيس نتوكلوا ؏ الله ونبدوا ؟
قيس : تمام توكلنا على الله
رِفان : معروف في الوسط بأسم قيس الفيتوري ، هو هو اسمك الحقيقي ؟
قيس : لا قيس أسم مستعار وحركي للروايات وللكتابة وأخترت الاسم عشان انحبه
رِفان : كم مواليدك ؟
قيس : 29_9_1996
رِفان : مؤهل قيس العلمي ؟
قيس : بكالوريوس هندسة نفطية
رِفان : تشتغل حاليًا او لا ؟
قيس : نشتغل لكن مش بشهادتي للاسف
رِفان : شن اكثر شي يدير فيه قيس وقت الفراغ ؟
قيس : نقرأ أو نرسم أو نكتب
رِفان : اكثر شي يضايق في قيس ؟
قيس : السلبية والأحباط والتشائم
رِفان : حالة قيس الاجتماعية ؟
قيس : اعزب .
رِفان : مقولة او حكمه تحبها ومعتبرها اساس ماشي بيه في حياتك ؟
قيس : مافيش ولا شي .
رِفان : من اكثر شخص مقرب لـ قيس ؟
قيس : حاليا مافيش شخص مقرب نهائي
كانت ليا صديقة مقربة وأفترقنا
رِفان : الشباب معروفين بتشجيع للكورة انت شجيع ولا ما تابعش فيها ؟
ولو تشجع فيها فَ اي فريق ؟ ..
قيس : لا مانتبعش في الكورة واجد لكن أنحب في الكورة الليبية أنحب نادي النصر 💚
رِفان : وهكِ نكونوا كملنا فقرة الاسئلة الشخصية ، حَ نجوا ل فقرة قيس الفيتوري كَ كاتب تمام ؟
قيس : تمام .
رِفان : كيف بدأ قيس في الكتابة ؟ او شنو الشي اللي خلاك تكتب رغم ان في مجتمعنا الشباب مايدوروش في الحاجات هذين واجد ؟
قيس : الجواب حيكون طويل شوية
أنا أنحب نقرأ وأنحب الروايات وقريت روايات ليبية واجد وكنت نتابع في صفحات الروايات وكانن صفحات بنات وكاتبات كلهن يعني مافيش كتاب شباب سبب بدايتي في الكتابة كنت أنحب بنت وأتجوزت كتبت القصة ووقتها كنت مش فاتح صفحة ولا كنت كاتب ولا شي بعد كتبت القصة متاعنا وماشاركتهش الا بعد سنة ونص تقريبا من مسيرتي في الكتابة حسيت إني عندي القدرة ع الكتابة وإن نقدر نكتب رواية وبدون تردد فتحت حساب بأسم قيس الفيتوري وفتحت صفحة بأسم روايات شاب ليبي وبديت في كتابة رواية .
رِفان : الصفحة بتاع رواياتك مزالت موجودة ؟
قيس : لا للاسف
الحساب الأول الي فتحته أصكر
وبعد فترة اصكرت الصفحة
وموضوع مانحبش نحكي فيه بتفاصيل نعرف من صكر الحساب ومن صكر الصفحة وممكن حيجي يوم ونحكي التفاصيل وشن السبب الي خلا الشخص هذا يصكرهن ليا .
رِفان : تذكر اول يوم كتبت فيه اول رواية ، كيف كان شعورك وقتها ؟
وكيف كان شعورك بعد لقيت الناس حبوها وفي ردود فعل حلوة عليها ؟
قيس : نذكر وقتها إن كنت خايف الناس ماتقبلش الرواية وماتقبلش إن شاب وكاتب ونتعرض للنقد وبطل الرواية كان شاب أسمه قيس
أكيد بعد نجحت الرواية وحصلت تفاعل تفأجات بيه وفرحت ان في وقت قصير صار تفاعل كبير ع الرواية وع الصفحة وحسيت ان ناجح ونقدر ننجح اكثر وفرحت ان صار العكس والناس حبو الرواية عشان كاتبها شاب وبطلها شاب وكان وقتها المتابعين كلهم بنات من بين 500 تعليق نلقى 5 او 6 شباب بس مهتمين ويستنو في الحلقة الاخرة
رِفان : من كان اول حد يعرف انك تكتب في روايات؟
قيس : مافيش حد والى الأن مافيش حد في الواقع يعرف إني كنت نكتب او يعرف حساب قيس
رِفان : من اكثر شخص دعم قيس في الكتابه ويدعم فيه في حياته العاديه؟
قيس : بالنسبة للكتابة مافيش حد دعمني دعمت نفسي بنفسي لان قتلك ان مافيش حد يعرف اني نكتب الفانز والمتابعين كانو هما الدعم
واما في حياتي العادية أمي ❤.
رِفان : اصعب شي كان يواجهك في الكتابه ؟
قيس : بجد مش مذكر ان في شي صعب واجهني
رِفان : اكثر روايه خدت هلبا طاقه و وقت من قيس؟
قيس : هيا الرواية الاولى
شاب أرهقته الحياة
رِفان : من وين تستوحي في رواياتك من الحقيقه او من وحي الخيال؟
قيس : رواياتي كانت خيالية مع شوية من الواقع
يعني في مواقف من الواقع وشوية احداث من الواقع .
رِفان : رواية ليك كتبتها من قلبك وعشت فيها ؟
قيس : اول رواية
عشت في تفاصيلها واهتميت بيهن واجد .
رِفان : كيف ڪنت قادر تقسم وقتك بين حياتك العادية والكتابه ؟
قيس : ماكنتش مقسم وقتي ولا مخصص وقت للكتابة
كنت نكتب كل حلقة في يومها
نبدأ من الصبح كل مانحصل وقت فراغ نكتب شوية من الحلقة لين يجي اخر اليوم نلقاها كاملة الحلقة .
رِفان : هل حَ نشوفوا قيس الفيتوري كَ كاتب ليبي في عالم الروايات مرة ثانيه ؟
قيس : ان شاءالله حتشوفوني
حنرد وحتكون الردة قوية قريبا بأذن الله .
رِفان : قيس الفيتوري هل رواياته مزالن متوفرات ؏ منصات التواصل الاجتماعي ؟
قيس : لا مش موجودات زي ماقتلك الحساب والصفحة تصكرن
وانا نفسي ماعنديش الروايات
بس كانو في ناس ينقلو فيهن ع صفحات أخرى وع الواتباد في كم رواية نقالينهن موجودات لحد توا
رِفان : اكثر رسالة ڪنت تحب توصلها من خلال رواياتك ؟
قيس : الاقارب عمرهم ماكانو عقارب حتى لو في اختلافات
الحب مهما كان قوي النصيب يكون اقوى منه
خوك مهما عاديته حيقعد هوا سندك والكتف الي تنسند عليه
ان تضحك علي بنت بأسم الحب تأكد انك حتردلك في حد غالي عليك
المطلقة عمرها ماكانت عار
رِفان : سؤال كان خاطرك ان نسأله لك ؟ 🤍
قيس : ليش أخترت إني نفتح الحساب بأسم مستعار وبحساب غير حسابي الحقيقي
رِفان : اعتبرني سألته ممكن تجاوب ..
قيس : حنجاوب عليه
صعب اني نكتب او انزل رواية بأسمي الحقيقي
الرواية طبعا حتكون خيالية ياما حيكونو عمامي مش كويسين او خوالي مش كويسين او اصحابي او اي حد يعني
او مثلا في الرواية نحكي ع اختي
لو نزلت رواية زي هك بحسابي الاصلي الناس حيفكرو اني نكتب في قصتي الحقيقيه وهنا حنقعد في مشاكل ف الافضل ان يكون الاسم مستعار والحساب مستعار وناخد حريتي في الكتابه .
رِفان : كلمه لِ جمهورك يلي يراجوا فيك ، او اي شي حاب تقوله ، المساحة ليك ..
قيس : ممكن في الوقت الحالي مش حيكون عندي جمهور وقليل الي حيعرفوني واكيد نسيوني اصلا
اول شي نشكركم ونشكر صفحتكم انكم مزلتو مذكريني وقلتو فيا كلمة طيبة
رغم بعدي ع الروايات
بالنسبة للجمهور انحب نقوللهم
استنوني قريب حنردلكم ردة قوية لعالم الروايات وبدون فواصل ولا توقف 🤍💪
#قيس
رِفان : الجمهور في إنتظارك قيس ، وانتَ شكرًا انك وافقت ادير معانا لقاء واسفين تعبناك معانا وخدينا من وقتك واجد بارك الله فيك 🤍
قيس : ان شاءالله حنكون عند حسن ظنهم
العفو وبالعكس انا الي تشرفت بيكم وبلقائكم وان نكون ضيف في صفحتكم 💙 .
و بـ هكِ نكونوا كملنا لِقاء مع الكاتب #قيس_الفيتوري ، استنونا في حلقة جديده مع ڪاتبة جديده قريبًا بعون الله 🙏🏻🤍.
#رِفان_مع_كاتب
