The Crossfire | Revised | Sample

i | 37 | the s c o r n e d

❝ THE SCORNED ❞
───── ⋆⋅🌹⋅⋆ ─────

───── ⋆⋅Chayanne⋅⋆ ─────

|| Friday. . .

The past few days did feel very, very long all because me and such man naa talk.

At first, mi did think him just need some time fi cool off. So, me neva contact him until Wednesday evening. Unfortunately, him deevn did badda with replying to mi text nor calls dem. So, mi figure him did need more time until. . .

Mi see him yesterday. We mek eye contact and all, from opposite sides a the road like seh we did ina some form a movie. Usually, him wuda come to me or me go to him. But dat neva happen yesterday evening, no. Instead, Favio gi mi one dutty piece a look weh surely cuda send me more than six feet under if looks could kill.

Always having the most drastic effects pon me even ova the smallest a things, the bad mood weh him cause drag on into today.

I hate being on bad terms with Favio.

Then again. . . mi also hate being in his presence when he's mad. He's always blinded by anger and nuh seem fi can control wa him seh or do. I plan on telling him about the robbery, but him naa give me a chance to simply talk to me.

Now if me fi start behave like how him behave, him ago cuss me seh mi dis and mi dat. Mi a start fi nuh care ino, honestly.

Still, mi go to Yolanda fi likkle advice. If mi go to Chezzy fi advice, she ago hate Favio and me cya badda wid her sheggry right now. I already know that I want to tell him what happened so we can move on from dis but me nuh know how fi tell him now after keeping my mouth shut for so long.

"So all because a dat, him naa talk to yu?" Yolanda seh, quite surprised.

Mi nod mi head. "Yea. And him a ignore all a mi text and call dem."

"Girl, at this point just fuck pon him," she insist.

Me stare pon ar like shi dunce. Fuck pon? Pon who? Afta me ano eedyat fi ramp round wid my three points so.

"Yu forget seh the man a gunman?" mi ask Yolanda.

"Oh, shit," she seh. "Well, girl, me honestly nuh know wa fi seh. . ."

I sigh and look away to Chezzy who come tek a seat at the table.

"Hi, Chezzy," mi greet her.

"Wahm?" she greet me and Yolanda.

"Deh ya a plan wi wedding," Yolanda tell Chezzy.

Chezzy laugh. "Eeh? Chichi a the flower girl?"

Yolanda shake her head. "No, our babies."

"Yago breed me?"

Yolanda roll her eyes and look weh. "Me hate role play wid straight gyal," she mutter under her breath.

───── ⋆⋅🌹⋅⋆ ─────

I miss Favio so much.

So much to the point weh mi decide seh mago force him fi siddung and actually listen to me.

I realize that waiting fi him steam off nuh look like it ago happen anytime soon. Me cya tek the malice anymore.

Now walking to his house after school, mi see him and Trav pose up like double six ina waa heated conversation. During this, Favio look ova Trav shoulder and notice me. Him eye dem narrow pon me. Him look upset fi see me. Trav look round and notice me too, instantly wearing a face a shock. Him turn back to Favio and seh sum to him. Favio kiss him teeth and go ina him yaad.