رِفان مع كاتبة.✍

رِفان مع الياقوت

رِفان : اكتر شخصية تعبتي في تكوينها ؟
الياقوت: اكتر شخصية تعبت في تكوينها مش بطلة وانما بطل ، شخصية جبار معقدة جداً نذكر لما نكتب في محادثاته نقعد فترة طويلة نوازي في كلماته بدقة 👌🏻
رِفان : ليش شخصية جبار في نضرك معقده جدآ ؟
الياقوت : نقولو لأنه شخصية حقيقية وخايفة نقصر في وصفة ونقلل من هيبة شخصيته الجبارة زي اسمة كيف ماحكولي عليها ، واللي اربكني وعقدني انه صعب عليا وصفه علي انه ظالم او مظلوم 🥀
رِفان : فعلا كلنا تأترنا بقصته ومعرفناش نلوموه او لا 💔
ربي يرحمه ويغفرله ♥️ .

رِفان : الياقوت قبل صرحت انه قصه آيات حقيقيه هل فيه قصص تانيه في رواياتك حقيقيه؟
الياقوت : قصة آسامة ، معتز ( عزو ) ، مريم ، بُـتول ، منذر ، مصعب ، جبار ، عمر وهنيدة ، نسرين ومؤيد ، بحرالدين 💔

رِفان : شن اللي خلاك تكتبي ع الحرب هل لان الواقع اللي عايشين فيه او لانه حدث معين خلاك تكتبي؟
الياقوت : لانه هدا واقعنا وهدا اللي المفروض يشغل حيز كبير من محتوانا 🥀

رِفان : اكتر جزء في سلسلة عشق في بلاد حروبها لا تنتهي قريبة ليك ؟
الياقوت : الخامس (شهيد الواجب ) 🥀
رِفان : شن اكتر جزء تشوفي تفاعلت معاه الناس؟ 💜
الياقوت : الاول ، والتالت 🌻💛
رِفان : كل من قري سلسلة عشق في بلاد حروبها لا تنتهي نوجع وبكي هلبا وانتِ تكتبي كيف كانت حالتك ؟
الياقوت : احياناً كنت معاش نقدر نكتب لأيام بسبب ثأتري في الجزئين الاولين ، في جزء جبار من كتر مانبكي وخشيت في حالة اكتأب قعدت اسبوعين ماعاش نقدر نكتب من غير طبعاً تهزيب ماما هههه ، اما الجزء الخامس فعلياً ركبتني حالا نفسيه نضحك ونبكي في نفس الوقت ، وشعور بايخ جداً جداً مريت بيه في الجزء الخامس لانه عاودت كتابته مرتين وعانيت من نوبات اكتأبي مرتين 🥀💔

رِفان : يأتر فيك النقد والكلام السلبي ولا تعتبري فيه حافز ؟
الياقوت : واثقه في نفسي هلبا بس مانضحكش عليكم يأثر فيا هلباااااا ومانقدرش نتخطاه بسهولة 🤞🏻

رِفان : جت فترة حذفتي جميع رواياتك ممكن نعرف السبب ؟
الياقوت : شيء مرعب جداً صارلي خلاني نعيد حساباتي ومانتهاونش في اي غلط نديره اتجاه نفسي او اي شي
ممكن يجيبلي ذنوب ، فـ مسحت كل رواياتي ومن ضمنهم سلسلة عشق في بلاد حروبها لا تنتهي وحذفت المشاهد الجريئة منها ( البوس ) 🎈💛
رِفان : ربي يحفظك 🤍🤍.

رِفان : اول رواية قريتيها في حياتك ؟
الياقوت : أحبيني باللغة العربية الفصحة لجمانة علي 🌻
رِفان : من الداعم لياقوته في عالم الكتابه 💜
الياقوت : مافيش الحق داعمة نفسي بنفسي 💛

رِفان : رواية من رواياتك ترشحيها تكون مسلسل او فيلم؟
الياقوت : سلسلة عشق في بلاد حروبها لا تنتهي 💛🌻

رِفان : كيف تقدري تقسمي وقتك بين الكتابة وبين حياتك العادية؟
الياقوت : مش قادرة نقسم الحق فـ لهذا كل ماانزل روايه نتأخر في التنزيل ☹️🥀

رِفان : اكتر جزئية في الكتابة تحسيها ممتعة ومتعبش فيك ؟
الياقوت : بنسبة للمتعة فـ كل مانكتب في اي جزئية او حدت نحس بـ المتعة بس ممكن في التعب والتفكير والمجهود ، ممكن حماس بداية اي رواية يلغي اي تعب عكس كتابة النهاية بدات لو كانت حزينة 🎈💛

رِفان : هل فكرت الياقوت تكتب رواية بالفصحى ؟
الياقوت : كتبت بالفعل رواية بالفصحة ونزلت منها بارت وحذفته وقعده مترددة انه نرجع انزلها مش عارفه علاش🎈

رِفان : شن حلم الياقوت ككاتبة؟
الياقوت : علي ادراج الوسطه من الوصول للاحلام خلوني نوصل ونقولكم ادعولي بس 🤲🏻 💛
رِفان : وين تشوفي في الياقوت في سنين القادمة ؟
الياقوت : في مكان احسن وافضل بأذن الله واصلة لكل احلامي 🤲🏻

رِفان : رواية ليك حسيتيها انظلمت من قلة التفاعل؟
الياقوت : عشق في بلاد حروبها لا تنتهي الجزء الخامس 🥀
رِفان : اول مابديتي تكتبي توقعتي النجاح يلي واصلتيله اليوم ؟
الياقوت : تقدري تقولي تمنيت والحمدالله نلت 🍃🌻.

رِفان ؛ سلسلة عشق في بلاد حروبها لا تنتهي كان من انجح الروايات ولاقت حب كبير من اغلب الجمهور بس في اخر جزء من السلسة كتر النقد بشكل كبير برايك شن السبب وشن ردك على الموضوع ؟
الياقوت : ممكن بسبب عنوانه اللي يوضح انه نهاية السلسلة وظنو انه حـ يكون ملم لكل الشخصيات وحـ يقفل كل القصص ، وممكن انا غلطت لما اعلنت انه اخر جزء وبعدين سحبت كلامي بسبب ظهور قصص لا تليق الا انها تكون ظمن السلسلة ، مش عارفه بضبظ ⁉️

رِفان : فيه رواية جديدة قريبا ؟
الياقوت : بأذن الله 💛

رِفان : اكتر رسالة تحاولي توصليها للقراء ؟
الياقوت : هلبا رسائل ، منهم نهاية الثأر البأس كارثه ، رابطة الاخوة قوية مهما كان فيه مشاكل مابينهم ، الام نور كان رحل عنا انعمينا ، ماتخليش ظلم الناس ليك يحولك لظالم زيهم يخسرك دنيتك واخرتك وهلبااا نتمني انها وصلت بالطريقة الصحيحة 🌻💛

رِفان : انجح كاتبه من وجهة نظرك ، والافضل بالنسبه للجمهور؟
الياقوت : من وجهة نظري نادرا احمد كلمة مبدعة اقل مايقال عنها ، بس حالياً لنشوف فيها واخدة ضجة كبيرة جمان الفريد بس قعدة ماحالفنيش الحظ وقريتلها واكيد حـ نقرالها قريب حداً 💛💛
رِفان : ليش تشوفي في نادره احمد افضل كاتبه ؟
الياقوت : مانقدرش نقول افضل كاتبة بس نقدر نقول انها الوحيدة لقريتلها بكترة من بين الكاتبات الليبيات تقريباً كل رواياتها قاريتهم، ورواياتها ولا غلطة سوا السرد او الحبكة او الاحدات اكتر من رائعة 💛🌻

رِفان : لو حابة تقولي كلمة لجمهورك المساحة ليك
الياقوت : شكراً لدعمكم اللي بدونة انا ولا شي وانتم فعلياً القمر لمضوي حياتي الكتابية 😅🤭🍃
رِفان : شكرا ريونه تعبناك معانا واسفين لو خدينا هلبا من وقتك واستمتعت جدا بالكلام معاك وشكرا مرة تانيه انك وافقتي وان شاء الله نشوفوك كاتبه عالميه♥️
الياقوت : شكراً صفحة ريفان وشكراً لكل القمر الاذمن لفيها وتشرفت بالمقابلة معاكم هلبا 💛🌻

و بِـ هكِ نكونوا ڪلمنا اللقاء مع الكاتبة #الياقوت 🤍.
استنونا في حلقة جديدة من ‎#رِفان_مع_كاتبة ، ومع ڪاتبة جديدة قريبًا بعون الله 🙏🏻🤍.

#رِفان_مع_كاتبة ✍🏻🤍