ငါတို့ပြိုင်ဘက်လုပ်မယ်ဆိုတဲ့ သဘောတူညီချက်က ဘယ်မလဲ?(ဘာသာပြန်)

အခန်း-၃၂ သူစိမ်းအဖြစ် တွေ့ဆုံခြင်း။

သူသည် ခွန်အားကို အပြည့်အ၀အသုံးမချခဲ့သော်လည်း ထို ၇၀-၈၀% ကပင် သိုင်းလောကမှ ပညာရှင် အများစုကို အနိုင်ယူနိုင်ခဲ့လေသည်။ သို့သော် မျက်နှာနှင့်ဦးခေါင်းကို ဖုံးကွယ်ထားသော သူ့ရှေ့ရှိ ဇာတ်ပို့လေးသည် သူ၏တိုက်ခိုက်မှုကို အမှန်တကယ် တားဆီးနိုင်လေသည်။ သူ၏ကျွမ်းကျင်မှုမှာ သိသာထင်ရှားလှ၏။

အမြောက်စာဇာတ်ကောင်တွေက ဘယ်အချိန်က သူနဲ့ရင်ဆိုင်နိုင်တဲ့ ခွန်အားမျိုး ရှိသွားရတာလဲ?

ကျောက်စိမ်းအိမ်တော်မှာရှိနေတဲ့ နှစ်နှစ်တာ ကာလအတွင်း သူက အပျော်အပါးဘက်လိုက်စားမိခဲ့လို့ မူလသခင်ငယ်ရဲ့ ကျွမ်းကျင်မှုအဆင့်ကို မရောက်နိုင်သေးတာလား?

ထိုသို့တွေးရင်း စုယန်သည် သူ၏အတွင်းအားကို နောက်ထပ် ၁၀% တိုးမြှင့်လိုက်လေသည်။

သူသည် လက်ကောက်ဝတ်ကို အနည်းငယ်လှည့်ကာ 'နတ်ကြာပွင့်ဓားသိုင်း'၏ တတိယအတွဲဖြစ်သည့် 'သန့်စင်သော လှိုင်းဂယက်'ကို အသုံးပြုလိုက်ပြီး 'ပန်းပျံဝဲဓားသိုင်း'၏ ဒုတိယအတွဲဖြစ်သော 'မြက်ကြာရနံ့'သို့ တိုက်ရိုက် ပြောင်းလဲခဲ့သည်။ သူ၏ ပျော့ပြောင်းသောဓားသည် ကုဖေးတိ၏ လက်ကောက်ဝတ်၌ လှည့်ပတ်နေ‌၏။

ကုဖေးတိသည် 'စစ်မှန်သော သိမ်းငှက်ဓား'အစား 'ငန်းရိုင်း၏ အပြန်လမ်း'မှ 'ကျက်သရေရှိသော ငန်းတောင်ပံ' ကို အသုံးပြုလိုက်သည်။ သူသည် စုယန်၏ ရှေ့ပိုင်းတိုက်ခိုက်မှုကို ရှောင်ရှားနိုင်ခဲ့၏။ ထို့ကြောင့် စုယန်၏ သေစေနိုင်သော တိုက်ခိုက်မှုသည် နေရာလွတ်ကိုသာ ပေါ့ပေါ့ပါးပါး ထိမှန်သွားခဲ့သည်။

စုယန်သည် သူ၏နှုတ်ခမ်းထောင့်ကို ကွေးညွတ်လိုက်ပြီး 'မြတ်နိုးဖွယ် ပန်းပွင့်ခြေလှမ်း'ကို အသုံးပြုလိုက်သည်။ ထို့နောက် '‌နွေရာသီပင်လုံးကြိုင်ပန်းခက်ကြွေကျခြင်း'၊ 'အေးခဲ‌နေသော ဆောင်းရာသီဇီးပန်းပွင့်'နှင့် 'ကြက်သွေးနီရောင်မက်မွန်နွေဦး' တို့အားသုံး၍
အဆက်မပြတ် တိုက်ခိုက်ကာ တစ်ဖက်လူအား ခြေလှမ်းများစွာ နောက်ပြန်‌ဆုတ်သွားစေသည်။

'ပန်းပျံဝဲဓားသိုင်း'တွင် မက်မွန်၊ ကြာ၊ ပင်လုံးကြိုင်နှင့် ဇီးတို့၏ ရာသီ‌လေးခုဖြင့် ဖွဲ့စည်းထားပြီး 'ကျောက်စိမ်းပျိုနီ' 'ခရမ်းနု‌ရောင်ပန်းထုံး' နှင့် 'ပန်းအူတိုင်နီ' တို့နှင့် ဖြည့်စွက်ထားသည်။ ရွေ့လျားမှုများသည် ရိုးရှင်းသော်လည်း ပုံသေပုံစံမျိုးမရှိပေ။ ရှစ်ဇွင်း၏အမိန့်အရ စုယန်သည် ကျောက်စိမ်းအိမ်တော်၌ မျက်နှာချင်းဆိုင် ယှဉ်ပြိုင် တိုက်ခိုက်မှုများ စတင်သောအခါ ဤဓားသိုင်းကို မိစ္ဆာဂိုဏ်း၏ 'နတ်ကြာပွင့်ဓားသိုင်း' ထက်ပို၍ လေ့ကျင့်ထားပြီး သူအကြိုက်ဆုံးဓားသိုင်းလည်း ဖြစ်သည်။