GENAHSYDE. -A Jamaican Love Story.

ZIDANE!

Tired and waah sleep ...frass yuh fuck. Been a try keep mi self busy from morning. Mek sure everyting govern fi Candice birthday. Cah believe she a fully big woman feel like yesterday mi a carry har pan mi back  ...teach har fi ride ...a play fada role. Always feel di need fi protect har and feel dat a mi forever duty.

Feel just di same fi Kens nuh waah a hair pan har head move outta place. Been a try talk to har but nutting. Know mi fuck up, but just waah explain tings to har. Feel like she shoulda know mi wouldn't fuck wid har dem way deh. But nah fight har pan har feeling still.

Miss har yuh fuck nutting nuh feel right. Mi keep a play back wi Ochi trip inna mi head. Why tings cah always stay suh?

Nuh waah eat ...sleep ...fucking nutting. Did fi guh Portland today guh look pan a beach front property wid Lans. Wah mi been a try get fi di longest. Put it off till Monday need fi, pick up Kens first tomorrow sort tings out deh suh.

Talk bout Lans man say him a guh fi Mel, cause she and Kens di promise fi past through. Mi wish kens di deh yah, but a just suh it guh still. Tell him fi handle him business just know mi need all guns out tonight. Waah Candice ting guh smooth.

"Rome neva build inna one day enuh mommy."

Mi see mommy inna di Kitchen a pack sum liquor and juice inna di deep freeze.

"Wah yuh cum a frighten mi fah?"

"Cah suh jumpy enuh Maureen haffi ready fi pop off anytime enuh." Mi joke.

"Yuh good enuh. Wah mi have yuh fah." She smile.

"Damn right ...know yuh fully govern." Mi kiss har pan har forehead.

"Yuh good? Cah just a wuk suh enuh."

Wen Tony step down and gimme mi Don role. Mi mada nuh talk to him fi bout two week. But ova time she see di pree say if Tony left View suh di place just ago tun up side down. And all a him hard work woulda be in vein. She neva like Tony inna it ...mi mek it worse. But di card dem did already done shuffle, just mi now fi play di game. And play mi cards dem right to.

"Yuh worry to much mi good."

"Haffi worry bout yuh waah mi old lady round fi di long run. Sipping wine pan a exotic island." Wi laugh.

"Yuh arite enuh. And mi nah guh nuh wah fi now. Yuh eat?"

Just waah mi parents deh bout fi di long all. Travel di world ...live sum life. Tony doctor say him cah pass out di kidney stones dem. Say him nuh really need nuh second opinion suh him nuh bother link Kens doctor. Nuh think a di best move, but cause him nuh wah guh unda di knife him run wid it. Still a try convince him, but a nuh di easiest head fi crack.

"Mi good man. Ago hole a fresh and touch pan di front."

"Yuh talk to Kendra? Candice say she nah talk to yuh ...dats why yuh a bark afta everybody suh."

Always show Candice certain vibes afta mi say mi nah tell har nutting. But mi know she and Kens message nuh waah she feel like mi a lie to har.

"Mi nah bark afta nuh body wah nuh deserve it. And a just a misunderstanding tomorrow mi sort it out weh she fahwud."

"A sum ting fi do wid di one Trinika? Sunny tell mi wah happen outta front yesterday."

Mi laugh to mi self and mi know she know why.

"Yuh know how news travel fast yah suh. But mi ago tell yuh one time and mi nah tell yuh again. If yuh lose har yuh will neva find anyting betta. Protect wah uno have at all cost. People who nuh have nutting fi lose wi help yuh lose fi yuh."