انفال
مررهه زعلت الليلة محد كلمها ولا اعطاها وجهه ولا كأنها موجودة حتى ... هزأتها امها صالحة من شافتها واقفه وتكلمت بحده تأمرها تاخذ الاغراض وتطلعها عشان الهنوف اختها بتلبس عبايتها وبتمشي
لبست نقابها وجرت اقرب شنطه كانت بجمب الباب واخذتها ... ما تنكر خنقتها وغصتها اللي توسطت بحلقها قبل صدرها من شافتهم كلهم سكتوا على طلعتها ، طلال تنحنح ومشى ماخذ يزيد معه وسعود دخل داخل يشوف عروسته ... رفعت راسها تناظر لأبوها وعيونه تلمع ، ما درت هو غضب ولا حن قلبه عليها بس يخفي قسوته وراها وجاها الجواب من سمعت نبرته ، طلعت الباقي و على دخلتها ناداها بصراخ : انفال ! ، تعالي بسرعة .
قربت منه وسحب سَعد قبالها : هذاني الوحيد اللي هنا لا تلفون وتدورون اخلصوا علي وتحاكوا .
سَعد رفع راسه بثقه : قلت اللي عندي وانت و الوالد سمعتوني و عاد القرار لكم ولبنتكم ان كانكم تبوني استـ...
صرخت بقهر و من قوه صراخها ابعد عنها بسرعه يمسك اذانيه ويغطيها من الآلم
تكلمت ببحّه : سلامات يا يبه تراه يكذب يككذبب ولا عشان ما عندك عيال تسمع كلامه وتخلي بنتك اللي منك وفيك ! يكفي المره الاولى سحبني وجرجرني قدام الكل ورماني بالصاله وقدام عيونكم مد يده علي والكل يتفرج من جدي لييييين اختي الهنوف كلكم شفتوه وحتى للحين باقي تشكون فيني !
حَمد احتدت ملامحه ونطق : ما تقولين لي وين كنتي رايحه ولا عشان كان فيه ضيوف قلتي فرصه ومحد بيدري!
سكتت ما تقدر تعلمه هي اصلاً الطلعة بكبرها غلط وندمت بالمره تمنت لو خلت ارياف تروح بدالها ولا يصير مثل اللي صار قبل
مسكت دموعها وشهقت بغيض : شباقي ماخليتوا الناس تقوله بعدين وش كلامه انه بيستر علي شقصده ؟ ...
سحبها مع عضيدها ولصقها بالجدار من لمح الهنوف بتطلع : الليله عرس اختك ولاني مخربه عشان سواتك الشينه ولا بأحد حادني غير عمانك وجدك ولا كان دفنتك تحت رجولي ، إلا تجيبين لي العار وتنزلين براسي ، هذا هي اخر مره بقولها لك احمدي ربك ان فيه حد بيلفك ويستر عليك وبتاخذينه غصباً عنك رضيتي ولا لا !!
دفها حَمد بعيد عنه وراح للهنوف يبارك لها بشخصية مغايرة تماماً ، شهقت بقوه وابعدت عنهم قبل لا تشوفها اختها ... نقابها ابتل بدموعها وانهارت على طرف الجدار ... مكياجها احتاس ولا عاد قدرت تلملم شتات نفسها
"على قولت عمي احمدي ربك فيه من بيلفك ويستر عليك " ، قالها لها ومشى من قدامها ... لعنت نفسها على كل مره انذلت منه و حاولت ترجعه وبأخر كبرياء كان معها نطقت : مهما كان اللي بياخذني على الاقل ماني بماخذتك يالمريض !
ضحك بخفه ولا رد عليها اكتفى يمد اكتافه ويمشي بثقه ، ركبت سيارتهم بهدووء معد همها لو نسيت شي وراها
-
مَناف
نزلها وقلبه يدق بشكل ما كان متوقعه ... خايف بس بنفس الوقت سعيد جداً ، بس غلبه امرها يوم رفضت انه يشوفها ... انقهر منها وعاملها ببرود طفيف رغم انها كانت متشبثه فيه وطايرة من الفرح انه بيصير من نصيبها عقب ما نوى يطَلق ليان بس ينتظرها ترجع ويعطيها الاوراق ، مرام جد تضايقت من حركاته بأي طريقة يبي يشوفها تحججت لين يتزوجها ويشوفها و لما اخذها برضوا ما احتكت فيه عشان ما يكرر طلبه ووعدته يشوفها قريب ...
جاه الاتصال الخامس لليوم من يزيد اذا كان بيجي ياخذها او لا و اسألة طويلة تستفسر عن مكانه حرفياً هو و طلال تعبوا وهم يغطون عليه ، اجابه بالرفض و لا بيكلف نفسه يجي بالنهاية تعمد اليوم يكون مع مرام عشان الكل مشغول عنه ولا بيشكون بشي ، فز وابعد سيارته بسرعه من شاف سُلطان وراه مستغرب ليه موقف عند بيت الحَسن
دخل سيارته ونزل بإرتباك واضح ، قرب سُلطان منه بنيه يسلم عليه والثاني ابعد عنه بنفور
سحبه مع كتفه وتلعثم بخفه : تعال الواحد ما...م-ما يسلم ؟
دفه بسريع مستغرب من قربه سُلطان وقح بطبعه : شفيك ؟ توك تعرف السلام ولا اول ما حتى تناظر وش هالاخلاق اللي نزلت عليك !
سُلطان حك انفه وقاله بفضول يبي يتأكد : مَ-مَناف هو غيرت عطرك ولا كيف ؟
بلع ريقه بتوتر وتوسعت عيونه وبدا يتلعثم : الاهل اي اهلي خذيتهم معي ليه عطرهم فيني ؟
سُلطان استغرب منه ومشى من عنده اكيد عطر اخته ولا زوجته ورد عليه : الله وعلم عاد ما شفتك لا تاخذهم او توديهم والريحة قوية مرة كأنه تو احد عطرك فيها او مسكك .
كمل طريقة داخل مخلي مَناف يتخبط وراه ويعطر سيارته بعطرة الخاص ويلعنها بداخله .
-
الهنوف
ودعت الكل الا اختها ما شافتها و لا عطاها احد فرصة تدورها ، على طول سحبها سعود مع يدها وركبها معه
ابتسمت مجامله لأهلها لين حركوا ولفت عليه بغضب : خير مريض انت ؟ انفال اختي ما ودعتها !
سكت وهو يسمع لها وبدون شعور سند راسه على المقود وضحك : ااهه يارب يابختي هالليله ما ظنتي فيه اسعد مني !!
وقف على جنب يتأملها وكلها خوف منه
بللت شفايفها بتوتر ونطقت : ترا قسماً بالله ان افتح الباب و اهج بشارع !
قعد على نفس وضعيته وقفل البيبان وبتحدي : وريني شعندك ؟
ربع ساعة مرت وهي تجادله ولا فيه فايدة ما زال مستمتع بعتابها له وبنهاية استسلمت من مسك يدها وكمل طريقة
بهدوء وبخاطرها ودها تختفي من حيائها .
-
رحاب
وقفت تنتظر ليان بالحمامات تأخرت مررهه وقلقت عليها
دقت الباب تبي تتطمن : بنت فيك شي ؟ اخذك معي و اقول لأبوي يمر المستشفى لا تخوفيني عليك كذا تكفين افتحي
ردت عليها ببحّه : ر-رحاب رجولي معد اقدر اوقف عليها !
بكت بقوة والثانية انجنت وفتحته بتشوف ... وجهها محمر وجسمها هلكان بشكل مبالغ فيه وضعف ماله مُبرر
ما تنكر قد ايش خافت ونادت ارياف بما انها كانت اقرب وحده ولابسه عبايتها بتمشي
دخلت عليهم بصدمة : يمه شفيها !!
ابعدتهم بضعف : ما ابغى احد نادوا لي مَناف وبس ما ابي غيرة !
رحاب لبست عبايتها بشكل فوضوي وشلتها من الارض وارياف ساعدتها وغطتها وراحت تشوف من يقدر يشلها معهم
طلعت تركض ودخلت ع الرجال مو مهتمه لو نقدوها على عبايتها المفتوحه او لا ونطقت بكرهه : وين مَناف !
دورت عيونها عليهم متجاهله صراخهم و ابوها اللي ينتفض من الغضب ولا شافته معهم وش كانت متوقعه منه ؟ ، حست بيزيد وراها وسحبته معها لين ابعدها عنه وشرحت له : ادخل ما فيه احد بس لا تناظر
عصب مِنهم واحتدت ملامحه من شافها طايحه وشلها تحت مقاومتها وعنادها
ركبها معه واخذها للمستشفى غصب ... اما هي بتموت خنقه لها فترة من شافت مَناف و بدون سبب تعلقت فيه تبغاه بأي طريقة كانت حتى لو تشوفه من بعيد راضيه
مسك معصمها بقوة وسحبها وراه و رماها بأقرب غرفة كانت موجودة بدون لا ياخذ موعد حتى ، قطع نقاش الممرضه اللي كانت تصارخ عليهم بحكم انه كان فيه مريض قبلهم راح يدخل وبسببهم صارت لخبطه
جلسها بالقوة قدام الدكتورة و امرها تفحصها وبعد محاولات استسلمت بإنصياع وبدون اي سابق انذار حل صمت مفجع وعميق من سمعت الدكتورة تسأل
" حامل ؟ ، اذا حامل مبـ... " سكتتها وهي تبكي مصدومه و يزيد ما كان اقل صدمه منها ... بلع ريقه ونطق يبارك لها يحسبها تبكي من فرحتها لين صدمته بكلامها و حاله اللاوعي اللي دخلت فيها
-
لا احلل ولا استبيح القراءة بدون وضع النجمة ...
اصبروا علي هالفترة ادري وعدتكم انزل دفعات لكن حالياً عندي اختبارات و من اخلصها اتفضى لكم❤️❤️.