انفال
لفت على جمانة وهي تضرب قزاز المطل بقهر بعد ما دخلت : شدعوة كل هالعصبية ترا اوبر وكريم على الذمة والسواق رقمه باقي عندي
ضربت وجهها بكفوفه تعبر عن قهرها : الكلب يبي يمشي كلمته علينا والله لا اوريه ما باقي الا نشحذهم عشان يودونا وما قرر يطلعه الا يوم قدنا ننزل بنقضي لرمضان
انفال مسكت جبينها من تذكرت : يويلي عاد حتى الخدامة جدتي بتطلعها تقول البيت مليان حريم ماله داعي صرفيه رواتب على الفاضي !
رحاب طلعت من غرفتها على اصواتهم وهم يصيحون بقهر لفت على غرفه ارياف لها اسبوع من سمح سليمان انها تطلع ومع ذلك ما قد عدت عتبة بابها بنادر يشوفونها حتى
نزلت تحت ولقت الهنوف تسوي كيك بعد ما طلبتها تجيب اغراضه وتوها الحين تجمع مكوناته كامله وبدت تسوية
حطت الزبدة بعد ما ذوبتها : رحاب ولا عليك امر شغلي الفرن
شغلته واخذت له من لوح الشوكلاته تذوقه : ترا جبته لك على عماي مدري اذا هو من النوع اللي يذوب ويقعد سايل او يتجمد بسرعة
الهنوف اشرت لها بيدها تطلع برا المطبخ : بس بس لا توتريني ونزلي اللوح لا تاكلينه كله يدوب يكفي بعد ما لقيتي تجيبين الا دارك شوكلت ؟ ما تدرين ان السكر خلص !
رحاب هدتها ونزلته : اعوذ بالله اكلتيني بقشوري فيه سكر بودرة بالدرج هناك مشي حالك فيه لين ننزل السوق ونقضي
عقدت حواجبها : تقضون وش ؟ ترا بنروح الشرقية
حطت يدها على خصرها وناظرت بإستفهام : شلون يعني ؟
الهنوف مسحت الدقيق من خدها وضحكت : بنكمل اجازتنا هناك كم اسبوع وراجعين والعيد يمكن هناك بعد نعييد المهم انه علمي جمانة اذا بتشتري تشتري مقاضي تكفي اول اسبوع من رمضان وبعدها بنشل عفشنا ونهج
غسلت يدينها وطلعت من المطبخ تجهز لهم جلسة مناسبة عشان بيطلعون للممشى اللي بجمب بيتهم
-
يزيد
للحين يعيد الشريط بعد تسجيل كميرته بس مو واضح ابداً الشخص ، انقهر وهو يشوف نفسه طالع من غرفه مَناف بعد دقيقتين بالضبط من نزول الشخص ، غمض عيونه يحاول يربط الاحداث ببعض وتذكر عمته لما تكلمت مع شخص تحت الدرج وهو نازل سمع نهاية الاسم وعقد حواجبة : و-وريف ... ريف
طق قزاز سيارته والتفت له كان سعود : ارياف ! ، مو ذي بنت عمي سليمان اخت سعود ؟!
فتح بابة ونزل ... مسك سعود مع اكتافه : وجع وجع فك كل ذا عشان لمست قزاز سيارتك اللي مقدسها والله لو اني راكبها ولا كاب عليها قهوتي وش بتسوي ؟!
فكه يحاول يرقع للموضوع : شبغيت ؟
سعود عدل ثوبة : الواحد راجع من دوامه واخلاقه قافله وانا من زود الكرم جايب لك معي موكا لكن ما تستاهله !
طالع فيه بقهر و مد الكوب لسُلطان بدال يزيد اللي كان جالس
سُلطان كان ضايع بالمرة واستلم الكوب بفهاوة تحت نظراتهم الغريبه له
-
سَعد
التعب انهكه ونام بمكتبه ولا استفاق الا على صوت سكرتيره يستأذنه عشان يرجع لبيته ، مدد يدينه و أشر له يروح ... فتح جواله يقرأ الرسايل من القروبات وجمانة كانت مرسلة له قائمة طويلة من الطلبات
يده حطت على الشاشة وبدأ يطبع الحروف : على اساس اني موديك ؟
جمانة يكتب...
جمانة : اهو فيه غيرك يعني ؟ ، ربي ما حدني الا عليك بغيتك عون صرت فرعون تجهز بعد العشاء بتودينا
عقد حواجبة بإستغراب ظن انه بيوديها لوحدها لين كتبت "بتودينا" ما رد عليها وقفل جواله وقـام من مكتبة يتفقد حولينه بس حتى مكتب سُلطان فاضي ... ما كلف نفسه يصحيه معه و رجع لحاله
استوقفته وحدة بنهاية عقدها الاربعين ومع ذلك تجاهلها وحاول يتجاوزها بس ما تركت له فرصة وتمسكت فيه
انظار الموظفين تجمعت حوليه خصوصاً انه مديرهم
رص على اسنانه يكتم عصبيته : وبعدين يعني ؟
طلعت ورقه من كُمها وحطتها بيده : سالفة انك تمشي مرور الكرام وتجحدني هذي قوية بس انتبهه على نفسك عشان ما احرق قلبك على اللي تعزهم .
ربتت على كتفه ومشت مخليته وراها يشق الورقة اللي عطتها اياه بعصبية وبشكل فوضوي
-
مَناف
دخل شقته وكانت مفتوحة على غير العادة مو مفروض تسوي حركاتها وتقفل الباب مرتين وتمنعه يدخل وتخليه ينتظر لين ترضى وبعدين تدخله ! والحين شصار ؟
كرهها كثر ماتذكر كلامها ما خلى مكان بالرياض ماراح له عشان يشغل باله عنها
جاه فضول يفتح غرفتها لعلها نست سهواً تقفلها نفس ما سوت مع باب الشقة
سريرها كان فوضوي بشكل لا يحتمل ... شاف اكياس المطاعم واكلها اللي متكدس فوق بعض ، كح بكتمه وفتح الشباك بأقوى ما عنده يهوي الغرفة ، غرفته الجميلة اللي تحولت لمزبله ما كان لازم يعطيها اياها حمد ربه انه ما عطاها غرفة مكتبه اللي ينام فيها حالياً ، سحب المفتاح من غرفتها وحطه بجيبه عشان معد تقفلها
طلع من عندها وقابلها عند الباب وهي توها داخله ، كانت مغطيه وجهها بالجلال ودخلت غرفتها بسرعة ، حط الاغراض اللي جابها وناداها من المطبخ
شمر اكمامة حالف بيسحبها غصباً عنها بس ابتسم من شافها مغطيه شعرها ووجهها بكمامة بعد ما فكت الجلال
حطت يدها على خصرها وسندت نفسها : ترا عندي اسم وبعدين جب مفتاح غرفتي !
بدأ يوزع الاغراض ويطلعها من اكياسها : لا تنسين انها شقتي من قبل لا تِظلمينها علي
ضحكت بإستهزاء : والله شقتك الكئيبة ذي ما نورت الا بوجودي بعدين ترا ما يأجرون هنا الا عوايل ولا بتقنعني انك طول هالفترة ساكن هنا لوحـ...
وقف شغله وطالع فيها : شفيك سكتتي ؟ اوب لا يكون دريتي اني متزوج غيرك !
ظلمت ملامح وجهها وناظرت بصدمة وهزت راسها تنفي الوضع وانها مو متقبلته
قرب منها وحط يدينه حواليها بيحاصرها : خلي منك فايدة وسوي لي شي اكله ويكون بعلمك شغل الخفايف ذا توست وجبن ما ابغاه وزبايلك اللي بالغرفة نظفيها من اليوم ورايح بدخل اتفقدها وإن ناديتك تسمعين وتجين غصباً عنك وسالفة الدلع اللي كان عند جدي انسيه نهائي
بعد عنها وقبل لا يروح نطق : و إن عاد شفتك كل شوي عند جيراننا حشيت رجولك ولا عاد تطلعين الا وتعطيني خبر او حتى اسمحلك انا !
جلس بالصالة تحديداً على الكنب المقابل للمطبخ متعمد يراقبها من هناك
رفعت البلوفر عن يدينها وبدت تتفقد الاغراض اللي جابها تسوي له اي شي منها
طلعت الطحين والزيت والمكونات الباقية بتسوي بيتزا ... اشتهتها فجأة وبدت تتفنن فيها رغم ان طبخها هو الاسوء حرفياً من باقي البنات بس انفال اللي كانت احسنهم بالطبخ علمتها كم حاجة لو تسويها بيطلع اكلها لذيذ جداً
خبزتها بالفرن وراحت لغرفتها تحت نظراته وبدت ترتبها بقهر
من جهزت قطعتها لقطع وحطتها بصحن له ونطقت بهمس : جعلة سم هاري ببطنك قل امين
سمعها وهي تدعي عليه ومع ذلك اكل منها ... حب يسوي نفسه متفهم ومد لها قطعة عشان تاكلها
ناظرت فيه بكرهه ورفضت بس معدتها خانتها وطلعت اصوات تعبر عن جوعها ، ربت بيده على الكنب بسخرية منه لها عشان تجلس بجمبه وما حس الا والصحن ينقلب فوق راسه بما فيه ...
-
ارياف
ختمت كل الافلام والمسلسلات من الملل ... تنهدت بتعب من خلصت الحلقة الاخيرة وفتحت كمبيوترها تتصفحه ، جهزت نفسها عشان بتطلع تغير جو بالممشى مع الباقين وصدت برعب من شافته يقفل الباب عليهم بغرفتها
غطت وجهها وجلست على السرير تحاول تميزة سعود هيئته مو كذا ولا هو ابوها حسبت انه سَعد وملخبط بالغرف ويبي اخته بس نبرة صوته وبحّة الغضب خلتها ترجف بدون ما تحس وتلعثمت ماهي قادرة تلملم حروفها اللي تبعثرت .
لا استبيح القراءة بدون وضع النجمة ...