تسريع احداث
-
٤ ونص العصر ... كلهم كانوا بالقاعة يجهزون لأخر مرة لأن معد بقى شي ع المغرب والمعازيم بيجون
الهنوف رجعت للبيت مع السواق بدون محد يدري ... فتحت عبايتها ورفعت فستانها وقامت تركض لدور الثاني
شهقت من دخلت وليان باقي نايمة وهي اهم وحده اليوم
الهنوف صرخت : لياننن !
فتحت الستاير وقفلت المكيف تبيها تقوم وفعلاً قامت ودخلت الحمام
الهنوف طلعت الفستان من الكبت كان بكيسه واضح انها حتى ما طلعته وجربته ... علقته وجهزت لها الباقي
نادتها لين خرجت من الحمام ووجهها احمر بملامحها الباهته ... انهارت بكي بحضنها تشاهق : الهنوف ت-تكفين خليهم يكنسلون والله ماني مستعده و من امس ما عرفت انام
الهنوف بإنفعال : اسكتي انا اللي مفروض ابكي قد عرفت وحس قلبي ان فيه شي غلط ، اي عروس تنسى ان اليوم عرسها ؟ بالله لو الحين ما عاندت عماتي ورجعت كان حضرتك باقي نايمه !
مسحت انفها ومسكت يدها تترجاها : خلاص ما ابغى اتزوج والله مقدر اتحمل انا ما توقعت اصلاً ان هاليوم بيجي وصدق بيسوونها !!
الهنوف هدت اعصابها وحضنتها : يعمري انتِ بسم الله عليك ، الحين هدي وصلي ع النبي طبيعي اي وحده بمحلك بتخاف بس بتستانسين بعدين وتنسين كل شي روحي ارتاحي بعدين مَناف ما يخرع بتحبينه وبيحبك ويعوضك عن كل شي ان شاء الله والحين قومي قدنا عصر الكوافيرة يدوب نلحق عليها وفوق كذا كلنا قدنا جاهزين وانتِ باقي حتى ما حطيتي ميكب ولا سويتي شعرك .
خلصت كلامها ورمت عبايتها عليها ما عطتها مجال تقاطعها
-
رحاب
دخلت القاعة منبهرة من جمالها بدت ترتب الطاولات و توزع الكراسي بالتساوي ع حسب عدد اللي بيحضرون
ارياف ما نزلت جوالها من كثر ما صورت : بيض الله وجهك يا اخوي عرف يختار لنا شي كويس
رحاب : وييع ارياف وش هالروج غيريه يفشل
مدت لها لسانها بتقهرها ... فساتينهم كانت كتالي انفال فستان قصير ناعم لونه بيج بريش ابيض من فوق ، جمانة اختارت لون رمادي وبرضوا قصير بس من تحت دانتيل شفاف ومفتوح من عند جوانبها
رحاب اخذت لون احمر ومنتفخ من عند اكتافها معطيها طابع ملكي انييق
ارياف لبست هالمرة لون بنفسجي فاتح لنص ساقها ومنفوش كالعادة ، والهنوف اخذت وردي ماسك على جسمها ويسحب وراها
جمانة دخلت غرفة العروس وجلست مكانها تسولف بالجوال وترد تبريكات صديقاتها ووقفت على شهقه انفال
مسكت خصرها تتلمسه : جمانة ذا وشو ؟ وين ضربتي ؟
تعذرت لها وقفلت الجوال تناظر بالمراية
انفال : يبنت تكلمي لا تخرعيني
جمانة بحقد : طلال جعل يده الكسر دفني وطحت باللهي جيبي شي اغطيها فيه
مدت يدها : جعله باللي مانيب قايله المشكلة ان فستانك مفتوح من الجنب اشوا اني انتبهت له .. لفي بس بحط لك كريم
وضحى دخلت : يبنات احد شاف الهنوف ولا ليان مالهم حس ولا شفناهم من اليوم
انفال بصدمة : لا والله يا عمة هنوف مو كانت معكم من شوي
وضحى هزت يدها بتوتر : مدري مدري وفايزة ندق عليها ما ترد
جمانة بكرهه : ييووهه الا تجيبون طاريها وتنكدون خل تولي بس هذا وهو حتى عرس ولدها ماهي حاضرته والمعازيم بدوا يجون انا اقول احسن روحوا استقبلوهم من يبي يحضر يحضر واللي ما يبي ينقلع والله فاضين حنا ندورهم
وضحى طبطبت على فمها : قصري حسش لحد يسمعش وإن شفتوا سُلطان خلوه يكلمني
انفال كتمت ضحكتها وهمست لجمانة : الحين تلقينه عند قسم الحريم مع طلال يقزون
ضحكوا مع بعض لين الهنوف دقت على جمانة تبغاها تمسك الكوافيرة وشرحت لها وضع
جمانة : شخباري ! قد راحت .. لا اشوا هذا هي طالعه مع الباب بمسكها استعجلوا
-
متعب مسك مسبحته : وشو ذا اللي بيدك
سعود : يا جد هذا قطو يزيد مخليه عندي
جلس بتعب : اقول ارمه وانا جدك ما يجيب الا الامراض
ضمها لصدرة يناظر بدهشه : يا قسوة قلبك ابك حنا بنربيها عندنا اذتكم بشي؟ نقصكم شي ؟
مَناف قرصة مع يده وهمس له : اسكت لا بارك الله فيك لعد ترادده بعدين انقلع ودها الغرفة ولا شف لها صرفة بتسلم على الرجاجيل وهي بيدك ؟
سعود : انكتم هالقطو اغلى منك شف شحلاته عاد حتى اليوم ملبسينه شوف ثوبه ما اصغره !
متعب ضربة بعصاته : الله يهب لك عقل قل امين !!
يزيد بدأ يستقبل الحضور و سُلطان وقف معه واعمامه كلهم معهم ولو انهم كلهم اهل الا انهم تقسموا ... طلال مسك سَعد وعطاه شنط كثيرة فوق بعض اغلبها كانت هدايا ، طلب منه يحطها بالغرف عشان لا راحوا مَناف ياخذها معه
سَعد رص ع اسنانه وابتسم يخفي عصبيته : طلال انقلع عن وجهي مانيب فاضيلك شايف كيف كل شي على راسي كأنه عرسي روح ودها بنفسك
طلال : عمك سليمان مشغلني قهوجي عندهم لا تعصبني !
سَعد ضرب كتفه ع الخفيف : وانا الفيصل بكبره ناشب لي بدال ولده ، الله معاك...
تركه يكمل استقبال ويلتقي بأصحابة
-
ليان نزلت من السيارة تركض وعلى ظهرها ساحبه فستانها الابيض الطويل والهنوف وراها شايله الكعب بيدها تلحقها بنص الشارع قدام الناس كلهم عرفوا انها العروس
الهنوف انهارت ضحك : وقفي يقطع ابليسك خشي الفستان ابك العربان عرفونا
ليان : خل يولون الحين من وين ندخل اخلصي علي قدنا مغرب
الهنوف سحبتها قدام الضيوف اللي بدوا يدخلون ودخلتها من ورا قعدوا يدقون الباب ومحد فتح
ليان غطت وجهها : يويلي ويلاه وش جابنا عند الرجاجيل
الهنوف : تغطي تغطي بس اعد لثلاثة واركضي مرة ثانية بسرعة عشان محد يلاحظ جمانة عند الباب اللي قدام تقول مفتوح
سوت اللي قالت عليه وركضوا قدام الرجال بس بعيد شوي عنهم ولا بعد واضحين وضوح الشمس بحكم ما فيه سيارات تغطي عليهم
يزيد غص بقهوته وكلهم لفوا ع صراخ سُلطان : مَناف ابك الحق على عروستك انحاشت !!
سعود قام يضحك ويصفق : يوه والاكشن كفو والله بنت العم تسويها الحين فستانها قد توصخ
سليمان ضربه على ظهره : سود الله وجهك انقلع الحقها بدال ما تعزز
سعود بإنفعال : يبه ماهيب حرمتي ولا اختي خل ضيوف الشرف يلحقونها ... خلص كلامه ولف على يزيد اللي كاتم ضحكته ومغطي بيده على ملامح وجهه ومَناف اللي حتى كلمة وحدة مو عارف يقولها
طلال صب الفنجال السابع لجده ونزل الدلة يتحجج انه بيلحقهم يشوف وش السالفة وبالفعل لحقهم
الهنوف قامت تصارخ والناس يطالعون
ليان بخوف : يلعنك والصوت وشفيك
الهنوف : اركضي لا يوقفك حد ولا تطالعين ورا
استغربت وما سمعتها ولفت وراها وكان طلال يركض معهم اقشعر جسمها من الخوف وما الومها واحد متلثم ورافع ثوبه لفوق وعينه فيهم ويجري اسرع منهم كيف ما تخاف ؟ اصلاً بالغصب ميزته ، انهارت منه وبنص ركضها شيلتها انفكت وهي اصلاً ما كانت لابسه نقاب بس رمت الشيله ع وجهها وهذا اللي خلاها تنفك
قامت تغطي شعرها الطويل ونفسها بالفستان بس كانت واضحة للكل بالأخص مَناف
-
انفال صكت الباب وراها وطلعت تستقبل المعازيم تبادلت نظرات مع فايزة ... توها جت بجلابية زرقاء فخمة بس مكياجها كان خفيف و مو مرتب وتسريحة شعرها برضوا ما كانت تمام ، طنشتها ووقفت بجمب امها
صالحة : انفال يمّة شيكي على الطاولات اخاف فيه شي ناقص
انفال ابتسمت : لا ابد يالغالية رحاب و ارياف قاموا بكل شي لو فيه شي ناقص كان علموني لأن انا المسؤولة عن الضيافة و التوزيعات
رحاب وقفت بجمبها وبدت تسلم
انفال دقتها : جابك ربي
رحاب : وشفيه ؟
انفال همست لها : ذي خالتي ام جواهر وبنت اختها نورة اللي قلت لك يبون يخطبونهم حق سُلطان وسعود
ردت عليها بإستغراب : ما اذكر
انفال عفست وجهها : الا يغبية سولفت لك عنهم بالصالة يوم كانوا بيخطبون لطلال
رحاب مسكت راسها : وانا شكو ؟
سلمت على قريبتها لين مشت : قطيعة رازة بناتها بكل عرس عشان ينخطبون ما ذكرتني الا بمراموه و نهى
رحاب دقتها : اص هذا هي جت انكتمي شوي
جت سلمت على رحاب بعدين انفال وبناتها كانوا وراها : مشاء الله تبارك الله الله يحفظكم وش هالزين بنات حَمد والفيصل ولا ؟
رحاب ضحكت : اي نعم يا خالة واليوم عرس حبيبتنا بنت الجابر الله يرحمة
مسكت بعكازها : الله يرحمة ، هذي بنتي جواهر و بنت اختي نورة وان شاء الله لنا نصيب من عندكم قريب
انفال ضحكت ومسكت نفسها يوم ناظروا فيها : حشى خالتي السموحة بس من تبون ؟
قربت منها : سُلطان و سعود انشهد انهم رجال و زهراء ما وقفت مدح فيهم
انفال انكتمت وهي تحبس شهقتها وضحكتها من شافت البنات وراها مستحين ويتدلعون ولا وعت الا على قرصة رحاب
ابتسمت لها ومسكت يدها : يارب الله يقوله يا خالة عاد بناتكم شحلاتهم
انفال رفعت حواجبها : بس للأسف مافيه نصيب
جواهر انفعلت : وش قصدك يعني انفالوه ؟
انفال فتحت يدينها وبدت تقلدهم وهم يتدلعون : انفالوه الحين هاه ؟ والله حبيبتي اللي اقصدة انهم محجوزين سعود لأختي وحبيبتي الهنوف و الثاني محجوز لهالجميلة الواقفة بجمبي !
رحاب وسعت عيونها وكل اللي بالاستقبال سكتوا يسمعون لهم
نورة رفعت شنطتها وتخطتهم وصوت كعبها يسبقها يبين عصبيتها
انفال كملت على نفس دلعها ومسكت اطراف شعرها تلفها : بس ان كانكم تبون حد فما لكم إلا سعد موجود ولله الحمد محد يبيه فخليناه لكم ويزيد بعد خذوه بدال سُلطان تراه ارجل منه بوااجد !
رحاب تعذرت منهم وسحبت انفال من يدها لزاوية ...
لا استبيح القراءة بدون وضع النجمة...
-
نزلت لكم بارتين اليوم استمتعوا 💞'