قصص عراقية حقيقية بقلم ابو بغداد سائق التكسي

ابو مريم وابو هبة

كبال بيتنا جانت اكو ساحة فارغة ..  الساحة جبيرة كلش .. فد يوم جتي كرابات نظفتها و سوتها ملعب مال طوبة … بس هالحجي قديم …
الملعب ما مسيج .. بدون سياج .. اني من النوع الي ما احب العلاقات .. يعني حتى اصدقاء مجان عندي .. و ماعرف ليش اصلا هيج اني .. جنت احب اباع على كلشي من بعيد .. حتى الساحة من كملت و كامو يجون يلعبون بيها فرق شعبية .. جنت من بعيد اباوع عليهم و ما فد يوم رحت تقربت وكفت وي الجمهور .. و حتى مرات من يجون ناس هواي و ماكدر اشوف اللعبة من بعيد لأن اللواعيب ميبينون من كثرة الناس الواكفة .. جنت اصعد فوك بالسطح اكمل اللعبة .. مجنت اشجع احد .. ولا جنت اعرف هالفريق مال منطقتنا لو مال غير منطقة .. بس جان يعجبني اباوع عاللعبة .. ماعرف يمكن عندي خوف من الناس من صغري .. ماعرف يجوز جنت مريض بشي اسمه عزلة …
عالعموم .. جانت كعدتي دائما برى .. حايط بيتنا الي مقابيل الساحة جان مقابيلة شوية حشيش .. هالحشيش جنت اكعد عليه .. اطلع كتبي و اكعد اقرا هناك .. يفوتون شباب من المنطقة يسلمون ارد السلام بس اصلا ماعرف ولا واحد بيهم .. بس حافظهم بالشكل ..و اسامي ماعرف اي اسامي .. امي وابوية الله يرحمهم و يرحم والديكم .. جانو يكولون اطلع طب صادق شبيك جامد هيج .. جنت اكلهم اي ماشي بس ما اطبق كلامهم .. ما احب الاختلاط هواي … حتى بالدراسة جنت اروح وحدي و ارجع وحدي .. و كل هالشي الي انبنت بي شخصيتي جان من ورى امي و ابوية بصراحة .. جانو يخافون عليا كلش من جنت صغير .. و يخافون اطلع برى العب .. كل السوالف مال الالعاب جايبيها داير مدايري … و بس اريد شي الكاه كبالي .. يمكن هالشي خلاني اخاف اختلط هواي وي الناس .. مجنت اعرف حتى افتح مواضيع … و مواضيعي ممله .. هالشي جنت اشوفه بعيون ولد خالاتي و ولد عمامي .. الي بعمري يعني .. جانو من يجون يمنا خطار و اني اكعد وياهم اسولف اشوف بعيونهم ملل .. وفوك كلشي اني حساس ازيد من اللازم .. مرات حتى من احب اكون سبورت واتشاقى احس اني ثكيل عالمعدة .. بالمناسبة هواي سمعت هالجملة بحياتي بقصد و بدون قصد جانو يحجوها … حتى مرات بالكلية من جنت اكعد بنص ثنين اصدقاء يحجون كلمات ممفهومة و يضحكون واني بنصهم اظل صافن اريد افتهم شنو قصدهم مجنت افتهم ..
يعني مرات واحد بيهم يحجي وي صديقة يكله ترى جان الجاي حامض مو .. صديقة يكله كلششششش .. اني ادري قصدهم عليا .. و هذا الشي جان صدك يقهرني .. بس شسوي هاي اني هيج … من تخرجت توظفت بمكان ..
و هالمكان بي موظفات هواي و موظفين هواي .. جنت مهتم بس بشغلي وحتى علاقات بداخل الدائرة ماعندي .. الراتب و الحوافز و شكو فلوس اخذها جانت الي وحدي … لان امي و ابوية ممحتاجين شي .. جنت اجمع الفلوس لان كلشي عندي ممحتاج شي ابد .. اخذت سيارة اروح وارجع بيها للدوام … كلشي جان عندي بس شي واحد نقص .. الاصدقاء .. من اكول ماعندي اصدقاء هالشي من صدك ماعندي اصدقاء … حتى طلعتي من اطلع اروح لمكان كله لوحدي .. جنت اريد اسوي علاقات بس و اتمنى مرات يصيرون عندي اصدقاء بس اكو شي جواي يكلي لا … عالعموم .. بالدوام فد يوم اجانه واحد نقل بعمري … الولد من الاخير قصه .. و هو شكله كلش حلو و البنات بالدائرة كلهم يحجون وياه .. جنت اراقبه من جوى لجوى .. خصوصا هو وياي بنفس المكان و يبعد عني خمس امتار (يعني مكتبه) .. الولد جان يتشاقى وياي مرات و مو بس وياي وي كل الي بالدوام ..بنات و ولد يحبوه بالدوام .. محبوب كلش .. قبل ميداوم جان قليل الضحك بالدائرة .. ورى ما اجه نقل هههه الكل يضحك .. الولد اسمه علاء … فد يوم طلعت من الدوام و لكيته واكف برى .. طبعا اني طلعت متأخر .. اشرلي وكفت .. كالي الخط راح و يضحك … كلتله شنو تاخرت عليهم .. كال اي والله صارت سالفة و تاخرت و هسه راح ارجع كوسترات .. كلتله وين بيتكم ؟
كال بفلان منطقة طبعا مو كلش بعيدة عن بيتنا .. كلتله اصعد اني اوصلك .. صعد وياي و الطريق كله شقى و ضحك .. كام يحجيلي سوالف ماعرف منين يجيبها وكلها ضحك بضحك .. وصلنا يم بيتهم و بيني و بين نفسي جنت اتمنى الطريق يطول بعد حتى ابقى اسمع منه .. و كالي انزل اشرب جاي .. كلتله لا والله ماكدر بس بداخلي اكول بلكي يجلب بيا .. وهو الولد صدك جلب بيا و طفيت السيارة و نزلت .. و هنا جانت الصدمة .. الولد هذا الي يضحك و ميخلي احد ضايج بالدوام و بالدائرة و بنات و ولد كلهم يحبوه و يضحكون وياه طلعت حياته تبجي الصخر .. ابوه متوفي و امه مقعده و عنده اخت وحدة صغيرة هي الي تداري امه بالبيت … بيتهم ايجار و صغير كلش و مابي غراض هواي لان امه فوك ما مقعدة المسكينة تحتاج غسيل كليات كل فترة … و هو هم عالراتب مال وظيفة عايش و هم يشتغل بقاعة مال بليارد بليل … تخبلت من عرفت وضعه و جنت اني اول واحد اعرف وضعه هذا بالدوام .. فوك كلشي و فوك كل هالظيم هو يضحك و يزرع الضحكة و الابتسامة بوجوه الكل .. رجعت للبيت ورى مكعدت يمه ساعة تقريبا حجيت لابوية و امي هالسالفة ..ابوية وامي انقهرو كلش و كالو ساعدة بطريقة غير مباشرة لان الي مثل هذا مراح يقبل مساعدة بأي طريقة … بدت علاقتي بي تصير قوية لدرجة اروحله يوميا للقاعة مال بليارد الي يشتغل بيها .. نكعد ساعتين وهو شغلته عالحساب يعني عالميز كاعد .. القاعة جانت بشارع فلسطين .. وهو بيتهم بجميلة … اني بيتنا جان بالمشتل … و طبعا من خلال علاقتي بي  صرنا ميانه و حجالي كلشي .. يكلي بالكلية حبيت وحدة و جنا متفقين نتزوج ورى التخرج .. بس هي بنص الطريق عافتني لان اجاها واحد جاهز ميحتاج تنتظره يكون نفسه و ميحتاج تساعد امه الي راح تعيش وياها اكيد .. حسبتها حساب مضبوط .. و طبعا اختارت الزين بالنسبة الها بس المصيبة رغم هالشي اني ما كرهتها و بعدني احبها … و هسه ممفكر بالزواج و لا اكو وكت مثل مدتشوف للعلاقات .. الصبح وظيفة و بليل شغل … علاء غيرني جذريا …. حتى كصة شعري تغيرت و لبسي تغير و اللبس الرسمي صار بنطرون كابوي و تيشرتات .. جنت اتخبل من شي اسمه ترانشوز لو حذاء رياضي (مكرم القارئ) بس كمت ما البس غيره … كمت العب بليارد .. حبيت الحياة  و كمت افتح مواضيع وي الكل … و كمت اشتاق لكلمة حامض لو وغف هههههه لا جذب .. بس صدك نسيت شخصيتي القديمة …
لان كلت بيني و بين نفسي اذا هالولد رغم كل الي بي و رغم وضع والدته و وضعه المادي و رغم علاقته بالحب الوحيدة الي منتهت بزواج هيج يضحك و يشتاقى و عايش الدنيا بكل تفاصيلها .. مرتاح و يضحك .. اني لعد شبيا الي كلشي متوفرلي و حامض … خلي اعيش هي الحياة مرة وحدة نعيشها و خلص … و راحت ايام وجتي ايام و اني وعلاء سوى سوى … ام علاء توفت و اخته تزوجت و اني هم والدي توفى وبقت بس والدتي .. و طبعا بعد وفاة والدي جانت عدنا قطعة كاع مكانها كلش زين ببغداد و مساحتها ٣٠٠ متر .. بعتها و فتحت قاعة مال بليارد بس ببغداد جديدة … لان جنت اشوف بعيني الشغل عالقاعات مال بليارد بعلاقتي وي علاء … و علاء لزم القاعة اكيد لان اخوية واكثر من اخوية .. و بنفس القاعة سويت اراكيل و مكان مال اتاري و الامور مشت و صارت فوك الفوك … اني وعلاء جنا اخوان … اخوان و اكثر هم .. ماكو شي منسوي سوى او مناخذ رأي واحد الثاني … اني امي تعبت اخر فترة .. و قررت اتزوج و تزوجت الحمدلله  بس للأسف ورى زواجي بسنتين والدتي توفت (الله يرحمها و يرحم والديكم) .. و علاء هم تزوج لان وحدة بالبيت … شغلنا تطور خصوصا الوظيفة مالتنا صار راتبها قوي .. بس القاعة وكف شغلها .. صفينا القاعة و قررنا نشتغل بقطع الغيار مال سيارات … و كمنا نروح يوميا لدولة … قبل فترة مو بعيدة .. قررنا نسافر اني وعلاء سفرة لتركيا بس سياحة مو شغل .. و اخذنا عوائلنا ويانه و طبعا الجهال اني صار عندي بنية و وعلاء هم عنده بنية … تمشينا بسوك و كعدنا بكافتريا .. و مرتي و مرة علاء راحو يتسوكون ملابس و اخذو الجهال وياهم واني وياه كاعدين سوى .. صفنت اني و كلتله علاء تدري اني احبك ههههه كالي واني هم احبك .. كالي تدري انته لو مموجود بحياتي جان ماعرف شنو وضعي هسه .. اني كلتله حتى اني والله العظيم مجان اعرف هسه وضعي شنو .. كلتله والله قصتنا اني وياك قصة .. يعني الله عرفني عليك حتى اطلع من عزلتي لك اني جنت اباع اللعبات مال طوبة من فوك السطح هههه كالي اهوووووو هم راح يرجعني لأيام الساحة و الحشيش و الحايط كافيييييي مو هالموال حفظته تريد اعيدلكياه راح اغمض عيوني و حط ايده على عيونه (علساس حافظه عالغيب) و كام يحجي ههههه اني كمت جان احضنه و ابوسه  من راسه هو هم حضني و باسني من راسي واني عيوني دمعت و هو هم عيونه دمعت .. وكال الحمدلله الله رزقني بيك اخ .. كال تصدك جنت من ظيمي اضحك و احاول اضحك كل الداير مدايري … جنت ماعرف شلون اعيش اليوم … مديون .. مهموم … خايف على امي … خايف على اختي اذا يصير بيا شي … لا عندي عم بي خير .. لا عندي خال .. اصدقاء هواي عندي بس اخجل اطلب مساعدتهم .. جنت من الصبح لليل واكف على رجلي .. بس الله من جابك تغيرت هواي امور .. انت اخوية ابو هبه … كلتله انته هم اخويه ابو مريم … و هسه عايشين اخوه .. و شغلنه بخير … بس صدك لو ممتعرف على علاء جان شلون ؟؟؟
عالعموم الحياة احلى بهواي من ان نعيشها و احنا خايفين من الناس .. الحياة بسيطة و حلوة بس اهم شي .. نختار الناس الي نكمل بيهم يومنا وحياتنا .. الخوة و الصداقة حلوة .. والاهم الاخ او على لغة هالايام (الضلع) ..
(ابو مريم و ابو هبه)
انتهى
اخوكم ابو بغداد سايق التكسي
#ابوـبغداد