مين نسيت ان المعاد ٥ وكانت مفكره انه ٧ ناو 🙈 🙊
اسفه للصبح بجد .. انا في دماغي ان المعاد ٧ 💔
يلا اسيبكم مع الحلقه 🙈
قضاء ونصيب ♥️
الجزء الثاني من " أحببناها مـريـمـيـه" ♥️
بقلمـ : دنـيا آلـ شملول ♥️
حلقة خاصه ♥️
تجلس امام شرفتها تتابع شروق الشمس وتستمع لزقزقة العصافير .. تشعر بالسعاده كلما عادت للوطن .. لا تود العوده للكويت من جديد .. رغم كونها لم تتعدي الخمسة عشر عامًا .. لكنها تمتلك عقل فتاة فاقت العشرين .. وهذا الشئ تخشي منه رقيه كثيرًا .. فتاتها تتحدث كفتاة بالغه راشده .. وربما يتسبب هذا في مشاكل مستقبليه لها هي في غني تام عنها ..
دلف اليها بابتسامه متمتمًا : صباح الخير حبيبة بابا .
قفزت ديالا الي احضانه متمتمه : صباح الجمال علي عيونك يا ميزو .
ضحك بقوه وهو يبعثر خصلاتها متمتمًا : يابنتي انا ابوكي .. احترمي فرق السن علي الأقل .
رقيه من خلفه : فرق سن اي يا معاذ !
معاذ وهو يضم ابنته لصدره : ماما لو سمحتي انا وديدي احرار مع بعض .
رقيه بتنهيده : اديك قلتها .. انتوا احرار .. المهم .. يلا الفطار جاهز .
خرج ثلاثتهم لتناول طعامهم بهدوء قطعته رقيه بابتسامه : الجماعه هيرجعوا من اسكندريه النهارده .. هتخلص امته عشان نروحلهم ؟
معاذ : هكون علي اتصال مع مروان .. اصلا وحشتني شهد اوي .. واول ما يقولي انهم وصلوا .. هكلمك عشان تجهزوا وآجي اخدكم ونروحلهم .
رقيه : تمام .
ديالا بضجر : كلهم كبار ومفيش حد في سني اروح اقعد معاه .. ولا عندي friends اقدر اقضي معاهم الـ Misure time ( وقت الفراغ ) بتاعي .. بابي ارجوك مش عايزه ارجع الكويت تاني .. خلينا هنا .. عايزه اكوِّن Friends و اعمل Relations ( علاقات ) كتير .. Please Dad .
رقيه : ديالا حبيبتي .. ممكن تتكلمي عربي طول ما احنا هنا .. لو سمحتي .
ديالا وهي ترفع كتفيها بهدوء : مبعرفش يا مامي .. هي كلمات بترشق في النص كده .. اعمل اي انا !
معاذ بضحكه : بترشق ؟!!.. بتتكلمي انجلش والمفروض انك كيوت بقا علي كده وبتقولي بترشق !.. يا بنتي فرقي .. في فرق بين انك تكوني كيوت كده لذيذه بترشق الانجليزي في كلامها وبين انك تتشبحني .
رقيه من بين اسنانها : اي اللي بتقوله ده يا معاذ !!
معاذ بابتسامه : مش بفهمها يا روحي ؟
رقيه : تفهمها اي ؟؟.. اذا كنت انت نفسك رشقت كلمة ترشقي وانت بتنصحها عشان متقولهاش .
معاذ بضحكه : اذا كنتي انتي ذات نفسك رشقتي الكلمه وانتي بتفهميني اني مينفعش اقولها .
ضحكت ديالا بقوه وهي تتابع حديثهما ..
رقيه : اسكت يا معاذ الله يسامحك .
ضحك معاذ هو الآخر متمتمًا بإبتسامه : حبيبة بابي خليكي علي طبيعتك .. بس رجاءًا نميز بين الصح والغلط .. ونختار الوقت اللي نتكلم فيه .. ونراعي فرق السن بينا وبين الاشخاص اللي هنتكلم معاها .
ديالا بابتسامه : Oh , sure .
تنهدت رقيه بفقدان أمل .. وتدعو الله فقط ان تستطيع ابنتها التعايش هنا بعد قرار معاذ ليلة أمس بتصفية أعماله بالخارج والعوده لتشب ابنته بين عائلتها ويكون بجانب أخته وأبنائها .
🖊️سبحان الله 🖊️ الحمد لله 🖊️ لا اله الا الله 🖊️ الله اكبر 🖊️
برضو هتفضل علي إصرارك ده يا عم محمود ؟
كان هذا سؤال جود الذي يستعد لمغادرة الإسكندريه ..
الحج محمود بابتسامه وهو يربت علي ذراعيه : يابني محدش بيرتاح بعيد عن مكانه وبيئته .. انا هنا مرتاح وكفايه دخلتك عليا بعيلتك .. دي بالدنيا .
جود بابتسامه وهو يحتضنه : امانه اي حاجه تحتاجها كلمني .. اسيبك في أمان الله ورعايته .
الحج محمود بابتسامه : ربنا ييسر طريقك يابني .
استقل جود سيارته وبجانبه والدة مريم .. وفي الخلف يقبع وليد الذي يقرأ في كتاب " قهوه مانو " .. وبجانبه مريم وخاله سفيان .
جود بهدوء : يلا .. دعاء السفر .. بسم الله الرحمن الرحيم ، الله أكبر ، الله أكبر ، سبحان الذي سخرلنا هذا وما كنا له مقرنين وإنا إلى ربنا لمنقلبون .
اللهم إنا نسألك في سفرنا هذا البر والتقوى ، ومن العمل ما ترضى ، اللهم هون علينا سفرنا هذا وطوي عنا بعده ،اللهم أنت الصاحب في السفر ، والخليفة في الأهل ،اللهم اني أعوذ بك من وعثاء السفر ، وكآبة المنظر وسوء المنقلب في المال والاهل .. ايبون ، تائبون ، عابدون ، لربنا حامدون .
الفاتحه لله .
وبالفعل رددوا معه الدعاء والفاتحه ليتمتم جود وهو يتحرك بالسياره : توكلنا علي الحي الذي لا يموت .
في سيارة مروان ..
تجلس شهد بجانبه وفي الخلف تجلس ملك بجانبها مالك الذي يشاغبها كل فنية وأخري ..
شهد بابتسامه : معاذ وحشني اوي .. فرحانه خالص انه رجع بالسلامه .
مروان بهدوء : ربنا يهديه ويستقر هنا بقا بدل التنطيط بره .
مالك : في حد يسيب الكويت برضو يا بابا !
مروان : اه يابني ويسيب الدنيا كلها كمان لو هتكون وسط أهلك وناسك وعيلتك .. المفروض نتريث في قرارات حياتنا يا مالك .. يعني قرار زي قرار خالك بإنه يستقر بشغله وبيته في الكويت ده مش في محله ابدا .. والسبب هو انه في بلد غريب .. يوم ما هيتعب ربنا يبعد عنه السوء يارب .. هنكون فين احنا وفين هو عما نقدر نروحله .. بنته هتكبر في مجتمع مش بتاعها... ولو حب يرجع بيها .. هتعاني من الاختلاف بين هنا وهناك .. ثم ان ديالا متمسكه بهنا جدا ومراته كمان .. مش عارف هو ليه مخلي دماغه راميه شمال كده ومثبتها .. الغربه وحشه يابني .. مفيش اجمل من العيله والعزوه .
شهد : اهو نتكلم معاه تاني وتحاول تقنعه بالله عليك يا مروان .
مروان بهدوء : ربنا يعمل الصالح ان شاء الله .
في سيارة اسلام ..
تجلس اروي بجانب زوجها .. في حين تجلس اريج في الخلف وبجانبها سبأ التي أصرت كل من ملك واريج علي حضورها معهم .. وقد وافقت سالي بعد حديث مقنع طويل من مريم كي تتحرك سبأ قليلًا لتتعافي وتغير أجواء المنزل والدراسه .. ولتقوي العلاقه قليلا بينها وبين الفتيات .
اسلام بهدود : مش محتاجين حاجه يا جماعه اجيبهالكم ؟
نفي الجميع ليقود اسلام علي صوت اروي وهي تتلو القرآن بصوتها العذب الذي يعشق سماعه اثناء قيادته .. لقد سجل لها علي هاتفه ويستمع الي تلاوتها وهو يقود ذاهبًا او عائدًا من العمل ... وقد أخذ تلك الفكرة من جود الذي ركب معه ذات مره وقام بتوصيل هاتفه ببلوتوث السياره ليصدح صوت مريم وهي تنشد .. وحينما سأله إسلام عن سبب ذلك ... أخبره انه يحب سماع انشادها .. ففعل مثله .
وصل الجميع كلٌ لمنزله وقد أخذ الجميع قسطًا من الراحه ..
ليستيقظ جود عند آذان الظهر علي صوت هاتفه الذي أعلن عن اتصال من مروان .
جود بهدوء : السلام عليكم ورحمة الله وبركاته .
مروان : وعليكم السلام ورحمة الله وبركاته .. جود صلي الضهر يلا .. وظبط حالك علي غدا عندي .. معاذ جاي بعياله .. وهكلم انا اسلام وسفيان .. تمام ؟
جود : تمام ان شاء الله .
اغلق جود ليجد مريم قد استيقظت .. قبل جبينها بابتسامه متمتمًا : حبيبتي .. هنتغدي مع مروان النهارده ان شاء الله .
اماءت مريم بابتسامه قبل ان تتحرك لتحضر له حمامًا .
🖊️سبحان الله 🖊️ الحمد لله 🖊️ لا اله الا الله 🖊️ الله اكبر 🖊️
دلفت للمطبخ لتساعد شهد في إعداد الغداء حالما يصل الباقون .. في حين جلس جود مع مروان ومالك ووليد في شرفة الصاله الواسعه قليلًا يحتسون الشاي مع الحديث عن المسابقه الخاصه بالسباحه والتي سيتم انعقادها بعد يومين ..
مروان بهدوء : وليد برأيك الأشخاص اللي اختارهم المدرب كفء لخوض سباق زي ده ؟
وليد وهو يرفع كتفيه : صدقني ياعمي هما وباقي المتدربين اللي استثناهم كمان كفء .
مروان : ربنا ييسر بقا وتعدي علي خير .. انا متفاءل .. وان شاء الله كل حاجه هتبقي تمام .
جود : انت قلقان من اي طيب يا مروان ؟
مروان بتنهيده : ده اول سباق هيتم بين فريق من النادي بتاعنا وفريق نادي ** .. وده نادي معروف ومشهور اوي كمان بمدربينه ومتدربيه .
جود : لن يصيبنا الا ما كُتب لنا .. طالما عملت اللي عليك اتوكل .. متشلش هم حاجه .
صدح صوت الباب ليتحرك وليد وفتح الباب ليطل سفيان من خلفه بابتسامه : ازيك يا شق ؟
وليد : وحشتني ياخالو الشويه دول .
صفعه سفيان علي مؤخرة رأسه مازحًا : اديني جيت ..
أخفض صوته متمتمًا : طابخين اي هنا ؟
وليد بضحكه : والله مش عارف بس شامم ريحة شوربه .
سفيان بجانب عينه : ريحة شوربه ؟!.. اوعي كده انت متنفعش مسرب أخبار ابدا .
دلف سفيان ملقيًا السلام وجلس بجانب مالك وهو يتمتم بحماس : اي يا شبح .. جاهز ولا اي ظروفك ؟
مالك بتساؤل : جاهز لـ اي بالظبط ؟
سفيان : في مباراه هتتم يوم الجمعه عشان يختاروا افضل اللعيبه للتصعيد .
مالك : بتتكلم جد ؟؟.. محدش قالي .
سفيان : اوبااا .. يبقي انا سربت المعلومات بدري .. خلاص كإنكوا مسمعتوش ماشي ؟
مروان وهو يلقي الوساده بوجهه : علي اساس اني مدير هفأ مثلًا !!.. انت بتسرب المعلومات ليه يا ببغاء انت !.. كنا هنعلن عن الموضوع بعد مسابقة السباحه .
سفيان : سوري يا كبير .
مروان : بعد اي بقا .
مالك : طب معلش بس افهم وبعدين اتخانقوا .. اي الحوار ؟
سفيان : تعالي وديني اوضتك وهنتفاهم جوا .. اصلا عايزك في حوار كده .
مالك : امممم .. ماشي تمام .. بعد اذنكوا .
جود : اتلم المتعوس علي خايب الرجا .
سفيان بضحكه : شالله يخلهملك ياجوز اختي .
ضحك الجميع ليدلفان للغرفه .. ومن ثم القي سفيان بنفسه الي الفراش : اقفل بقا الاوضه دي عشان اخدلي تعسيله .
مالك : نعم !
سفيان بضحكه : بهزر بهزر .. المهم بقولك .. فضيلي نفسك كل يوم ساعه ونص بعد العشا .
مالك : ليه ؟
سفيان : جايلك في الكلام اهو .. هنطلع انا وانت علي النادي .. وهنتدرب سله سوا .
مالك : ما انا مش فاهم برضو ليه ؟
سفيان : انت غبي يابني ؟.. عشان تدخل في المباراه .. عايزك تبقي ضمن المتصعدين للجوله الجايه .. انا عارف انك قدها .. وعايز افتخر بيك اكتر بصراحه .. يعني هتعملي واجهه ومنظر قدام صحابي .
مالك بجانب عينه : ولو اني مش مقتنع بس ماشي موافق .
سفيان بتنهيده : بصراحه في حاجه كمان عايز اكلمك فيها .
مالك وهو يرمش عدة مرات : في اي ؟
سفيان : الموضوع خاص وشخصي .. بس رأيك هيفرق معايا اكيد .. يعني مش عارف بس حسيت انك هتفهمني ممكن .. او مش عارف بصراحه .
مالك : اي المقدمه دي كلها !!.. اي الموضوع ؟
سفيان بتنهيده وهو يشير الي قلبه متمتمًا : وقع .
مالك بعدم فهم : مين ده ؟
سفيان وهو يزفر بحنق : هو اي اللي مين يا بني ادم .. قلبي يا عم انت .. قلبي وقع .
مالك : وقع ازاي يعني ؟.. حد خضَّك ؟
دفعه سفيان من وجهه وقف مستعدا للخروج وهو يتمتم بضجر : والله انت بني ادم رزل وفصيل والعيب عليا انا عشان قاعد اتكلم معاك .
جذبه مالك من يده وهو يتمتم ضاحكًا : والله خلاص خلاص .. اقعد وبراحه فهمني .. وقع ازاي .. ومين وقعته .. ها ؟
سفيان : سيبك من مين وازاي .. وقولي اعمل اي .
مالك : اممم .. هو بصراحه اللي اعرفه يعني ان نهاية الطريق دي واحده بس .. ومعروفه يعني .. وانا مستغرب سؤالك ده .. الفيلسوف والعقل الكبير سفيان بيسألني انا يعمل اي عشان قلبه وقع لواحده .
سفيان بتنهيده : لما القلب بيتحرك يا مالك بيصبح العقل طفل قصاده .. بتبقي محتاج للي يوجهك ساعتها ويقولك الصح من الغلط .. الحب زي ما بيقوي بيضعف .. بل انه ممكن يضعف اكتر من انه يقوي كمان .
مالك : طب وانت بتفكر في اي ؟.. او يعني هي ظروفها اي ؟.. واي اللي يمنع انك تلبي نداء قلبك ؟
سفيان بتنهيده : فرق السن مثلا .. وهي صغيره .. و .. ومش عارف بصراحه .
مالك بتفكير : اممم .. اكبر منها بقد اي مثلا ؟
سفيان بتفكير : انا اكبر منها بـ .. اا .. هو انت عندك كام سنه اصلا ؟
مالك بتلقائيه : عشرين وداخل علي واحد وعشرين .
سفيان بهدوء : انا اكبر منها بست سبع سنين كده .
مالك بتلقائيه : اي ياعم الأوڨر ده !!.. دول ست سبع سنين .. ده حتي عمي جود اكبر من طنط مريم بتمن سنين .. عادي يعني .
سفيان بابتسامه : يعني بجد عادي ؟.. مش كتير ؟.. اهلها مش ممكن يرفضوا ؟
مالك : ياعم مين يقدر يرفض واحد بأخلاقك وبمهاراتك دي ؟.. انت بتهزر اكيد .
سفيان بتنهيده : طمنتني ربنا يطمن قلبك والله .
مالك رافعًا إحدي حاجبيه : طمنتك !.. انت بتتكلم جد ؟
سفيان : بعدين بعدين .. قوم شوفلنا الاكل مخلصش ليه .. انا واقع ع الاخر .
تحرك كلاهما من الغرفه .. ودلف مالك ليسألهم الي متي سيتأخرون .. بينما دلف سفيان حيث الرجال ..
🖊️سبحان الله 🖊️ الحمد لله 🖊️ لا اله الا الله 🖊️ الله اكبر 🖊️
تجلس فوق فراشها وتشاهد احد البرامج الدينيه التي أوصتها مريم لمشاهدتها .. حينما أتاها اتصال من أريج ..
سبأ : السلام عليكم .. اي لحقت وحشتك !
اريج : وعليكم السلام ياختي .. قومي يا ماما .. قومي البسي وانا وبابا وماما هنعدي عليكي عشان نتغدي عند ملك النهارده .
سبأ : انتوا مزهقتوش مني يابنتي ؟
اريج : انجزي يا سبأ .. وبعدين مش لوحدك .. انتي وماما ها .
سبأ : اشمعنا يعني .. في اي ؟
اريج : قوليلها بس ان عمو معاذ جه من السفر واننا هنتجمع في بيت عمو مروان .
سبأ : طيب ماشي .
اريج : ماما بتقول انها هتتصل بمامتك .
سبأ : افضل برضو .. يلا انا هقوم البس .
انهت المكالمه وتحركت تستعد من اجل الذهاب ..
طرقات علي الباب دلفت بعدها سالي بابتسامه : سبأ حبيبتي .. اتصلت بيا شهد وعزمتنا علي الغدا .. هتقدري تروحي ؟
سبأ : طبعا .. علي طول هجهز اهو .
سالي بابتسامه : تمام .. مامة أريج كمان كلمتني وقالت انهم هيعدوا علينا .
اماءت سبأ لتتحرك سالي من الغرفه بهدوء .. تعلم كم تعلقت سبأ بعائلة جود .. وتدعو من اعماقها ان تتحسن حالتها وتصبح اكثر تفاعلا مع المحيط حولها بفضلهم .. وتكون أفضل منها في كل شئ ...
🖊️سبحان الله 🖊️ الحمد لله 🖊️ لا اله الا الله 🖊️ الله اكبر 🖊️
بعد السلام والترحاب الشديد بمعاذ وأسرته وكذلك سالي وابنتها ..
جلس الجميع حول مائدة الطعام .. الرجال في غرفة الضيوف والحريم في الصاله ..
دار أكثر من حوار بين الرجال عن الاعمال .. ودارت احاديث كثيره بين النساء عن المنزل ومسئولياته ..
كانت الأجواء عائلية للغايه .. بسيطه .. مرحه .. مبهجه ..
كانت ديالا وبرغم كونها اجتماعيه وتُجيد التحدث الا انها كانت تجلس بينهم تستمع فقط .. تري طريقة هذه وهذه .. تستمع لما تقول تلك وهاته .. مشاعر البهجه تسيطر عليها ... والراحة بقربهم تجعل ابتسامتها واسعه ...
ملك وهي تمسك بذراعها فجأه : بت يا ديالا .
انتفضت ديالا وهي تنظر لها بأعين واسعه ومن ثم تنفست بعمق وهي تتمتم : انتي بجد بني آدمه Reckless ( متهوره ) .
ملك : هي دي شتيمه ؟!!.. بتشتميني يابنت خاااالي !!
ديالا بصدمه : Oh, No .. I didn't do that ( اوو لا .. انا معملتش كده ) .
ملك وهي تقترب منها ببطء : بتشتميني تاااني !!!
ديالا : ملك انا مشتمتكيش انا قلت متهوره .. متهوره مش شتيمه .
تنهدت ملك باصطناع وهي تتمتم : اه اذا كان كده ماشي .
ضحك الجميع عليها لتتمتم اريج بابتسامه : علي فكره يا دوللي .. ملك في تربيه انجليزي .. يعني فهماكي وبتستعبط .. انشفي كده عشان ملك مجنونه ها .
ديالا وهي تنظر لها بحذر : Oh, you malicious girl ( اوه .. انتي بت خبيثه ) .
نظرت تجاهها ملك بجانب عينها وهي تتمتم : انا مش خبيثه ها .
ابتسمت ديالا باتساع وهي تتمتم : لا بجد براڨو .. ياااي .. الحمد لله مش هواجه صعوبه في التعامل هنا زي ما مامي بتقول .
سبأ : لا علي فكره ان كانت ملك تعرف انجلش فلو سمحتي غيرها مبيفهمش .. فخليكي كيوت بس بالعقل .
ملك بملل : انا مليت .
اريج بسخريه : انا الهبله اللي شفتك بيت .
نظر الجميع تجاهها لتتمتم بابتسامه : لا لا متفهمونيش غلط .. دي قصيده لشاعره اسمها اميره البيلي .. بتقول فيها " انا مليت .. انا الهبله اللي شفتك بيت .. وقلت ابويا وحبيبي .. ياسيدي كفايه والله دا انا اتخميت " .
ملك : بس افصلي افصلي .
صدح صوت جود من الخارج لتخرج له مريم بابتسامه : ها حبيبي .
جود : يدوب نروح ؟!
اماءت مريم .. وبدأ الجميع في الذهاب علي وعد بالإلتقاء في نهاية الأسبوع بمنزل جود .
🖊️سبحان الله 🖊️ الحمد لله 🖊️ لا اله الا الله 🖊️ الله اكبر 🖊️
انه يوم المسابقه الخاص بوليد .. كان مالك يجلس بالنادي منذ الصباح الباكر وبصحبته سفيان ..
حضر وليد وبصحبته مراد الذي تعجب مالك من وجوده .. الم يخبره وليد ان مراد لن يعود قبل الدراسه ؟!
مراد : السلام عليكم ورحمة الله وبركاته .
رد الثنائي السلام ومن ثم تصافح الجميع .. ليتمتم مالك بتساؤل : رجعتوا ؟
مراد بابتسامه : لا .. انا طلبت انزل بدري عشان احضر مسابقة وليد .. وكمان الدراسه خلاص اهي اسبوع او اقل .
اماء مالك بتفهم ليتمتم سفيان : ها يا ليدو باشا .. هتشرفنا ولا اي ظروفك .
وليد بتنهيده : علي الله بقا .. ربنا يسهل .
مراد وهو يربت علي كتفه : انت قدها يا صاحبي .. ربنا هيوفقك ان شاء الله .. اتوكل علي الله .
اماء وليد بابتسامه ليتحرك الجميع حيث ستُقام المسابقه ..
كانت الأجواء مليئه بالشغف والحماس .. وليد والمتسابقين في غرف التبديل ..
بينما يجلس جود ومروان واسلام ومعاذ وبجانبهم مالك ومراد وسفيان ..
الجميع في حالة ترقب .. وبداخلهم دعاء صامت .. ولأول مره يجد مالك نفسه لا اراديًا يتمني من كل قلبه الفوز لوليد .. ربما كان مخطئًا من البدايه .. هو يعلم هذا .. لكنه كان بحاجه لضربة تجعله يتيقظ .. وقد أتت الضربه منه وإليه ..
ها هو فريق وليد .. وها هو الفريق المسابق ..
بدأت المسابقه .. وازداد التحدي والإصرار علي الفوز .. كانت جولات اقتطاع المسبح ذهابًا وإيابًا بمثابة هدف واضح يسعي الجميع للوصول اليه ..
بقبت المسابقه لبعض الوقت حتي تم الإعلان عن انتهائها ..
عاد وليد مرتديًا ثيابه .. وجلس معهم شاعرًا بالتوتر .. اعلان النتائج سيكون خلال نصف ساعه .. هل سيفوز ؟.. سيتصعد ؟؟.. انه حلمه .. يتمني من كل قلبه ان يحققه .. لكنه سيكون راضٍ كل الرضا لو لم يصل لمبتغاه .. ربما خيرًا له يأتيه في وقت آخر ..
مر الوقت عصيب في انتظار النتائج .. وها هو وقت الإعلان ..
تحدث المدير العام بروتينيه مقدمًا نفسه ومقدمًا المدربين لكلا الفريقين .. وكذلك قدم المتدربين ..
كان كل شئ روتيني جدًا حتي اتت لحظه الإعلان ..
المركز الأول : وليد جود السيوفي .
عمت الضجه المكان بسبب صراخ سفيان ومالك ومراد .. والتمعت عينا وليد بدموع الفرحه وعيناه تجاه والده الذي ينظر له بابتسامه مرتعشه وعينان تساقطت منهما الدموع ليلتقطها مروان سريعًا قبل ان ينتشله لأحضانه ويستشعر ارتجافه فيضحك بخفه مربتًا علي ظهره بهدوء متمتمًا بحب : الحمد لله .. ابنك طول عمره بيرفع الراس .. ربنا يباركلك فيه ويباركلنا كلنا فيه .
قدم المدرب الميداليه الخاصه بالمركز الأول لوليد الذي أخذها باحترام وتقدير بعدما صافح الجميع ..
ليتم الإعلان عن اصحاب المركز الثاني والثالث ..
بعد الكثير من التهاني تحرك وليد تجاه جود الذي استقبله بين احضانه بحب الدنيا واخذ يربت علي ظهره بحب ظاهر وهو يتمتم بفخر : انا فخور بيك فوق ما تتصور .
وليد : ربنا يرضي عليك يابابا ويجعلني سبب سعدك وهناك ديما .
اقترب مروان محتضنًا اياه بقوه وهو يتمتم بسعاده : انت فخر لينا كلنا .. وعقبال الفوز في التصعيد .
ابتسم وليد ليقترب سفيان بحب متمتمًا : هما قالوا كل حاجه .. فهات حضن عشان غيري يلحق .
ضحك الجميع ليحتضنه سفيان بهدوء قبل ان يفعل مراد المثل وهو يتمتم : طول عمرك جدع وطيب وابن حلال .. تستاهلها يارفيق دربي .. ربنا يجعلك في المقدمه ديما يارب .
اقترب مالك وهو يفرك يديه معًا ليجذبه وليد دون تردد وهو يتمتم : ان شاء الله هقولك سر الفوز قبل مباراتك .. وهستني بفارغ الصبر انك تفوز بأمر الله عشان نشرف العيله بزياده .
مالك بابتسامه وهو يربت علي ظهره : اكيد .. اكيد .
عاد الجميع للمنزل وبدأوا بالاحتفال بنجاح وليد ..
🖊️سبحان الله 🖊️ الحمد لله 🖊️ لا اله الا الله 🖊️ الله اكبر 🖊️
كان يجلس فوق الأرجوحه بالحديقه وبجانبه سفيان الذي يحرك قدمه فتتحرك الأرجوحه .. ينظران للسماء بصمت تام .. قطعه صوت يعلم سفيان صاحبته جيدًا .. أنزل عينيه بهدوء ينظر لتزمرها وهي تعقد يديها امام صدرها متمتمه بسخط : ده مكان البنات .
مالك بجانب عينه : ملقتش اسامي بنات عليه .
ملك : مااالك بقا .. يلا اقعدوا مع الرجاله .. احنا عايزين مرجوحتنا .
مالك : احنا جينا الاول .
سبأ من خلف ملك : اي هو ده .. هو شغل اللي يسبق يلبق ده ولا اي !
مالك رافعًا احدي حاجبيه : اه هو كده .. يلا البنات ليهم غرف يقعدوا فيها .
ملك : احم .. كابتن سفيان لو سمحت ممكن تسيبولنا المرجوحه ؟
سفيان بابتسامه واسعه .. فهذه اول مره يستمع لاسمه بنبرتها الطفوليه : اكيد طبعا .. النساء اولا علي اي حال .
مالك : اي هو ده .. احنا جينا الاول .
سفيان : يابني بطل بواخه .
مالك : مش قايم .
سفيان : هتقوم .
مالك : مليش دعوه .
ملك بمكر : خلاص خلاص .. احنا هنقعد جوه .
كانت سبأ ستتحدث معترضه ولكن سحبتها ملك بصمت للداخل .. ليضم مالك عينيه في شك .. ملك لن تذهب بهذه السهوله .
سفيان : عجبك كده يعني ؟
مالك : امممم .. ملك مش هتمشي بسهوله كده .
سفيان : قصدك اي ؟
مالك : اممم .. سيبك .
لم يمر سوي بعض الوقت فقط ليجفلهما صوت وليد الذي يتحدث بلهفه : بسرعه بسرعه تعالوا .
القي كلماته وعاد ركضًا للداخل .. ليركض مالك وسفيان خلفه في قلق ..
وحينما دلفا لم يجدا شيئًا مريبًا كما ظنا .. كل شئ طبيعي .. الرجال يتحدثون ووليد يجلس بين مروان وجود كأنه يختبئ او ما شابه ..
سفيان : هو في اي ؟
مالك بغيظ : ملك .
عاد مالك ادراجه للحديقه ولحق به سفيان ليجدان الفتيات الاربع يصفقن بانتصار ..
مالك بغيظ : ده اللي هو اي يعني .
ملك : البادي أظلم .
سفيان بضحكه : يلا يا مالك هما قاعدين بقا .
مالك وهو يدحجهم بنظرة غيظ : هييجي اليوم اللي نتحاسب فيه .. الحساب يجمع .
ضحكن قبل ان يغادر هو وسفيان المكان .
ديالا : اه يا اروبه .. انتي فعلا malicious girl ( بت خبيثه ) .
ضحكن جميعًا قبل ان يبدأن في النظر للنجوم مع استماعهم لأريج وهي تلقي بعض القصائد علي مسامعهم ..
🖊️سبحان الله 🖊️ الحمد لله 🖊️ لا اله الا الله 🖊️ الله اكبر 🖊️
ستوووووووب ..
ان شاء الله ان شاء الله ان شاء الله هيكون فيه نص حلقه عشان مسابقة لوكااا ... بس مش بكره بقا 🙈 واحتمال كبير تكون بعد بكره ان شاء الله ❤️
فوتكوا بعافيه ♥️ 😘 😘 😘