اسكريبتات وقصص قصيرة

❤

كنت دايما بحب علي الساعة ٣ كده اقف في الشباك واشم شوية هوا وادخل اذاكر تاني ..
المهم كل مابفتح الشباك بلاقي ست واقفة بتصلي فاقول ربنا يحميها ويباركلها وادخل
- اجي انزل علي صلاة الفجر كده بلاقيها لسه واقفة بتصلي ..
- ‏عادي جايز تكون بتصلي الفجر ارجع من الصلاة لسه بتصلي ..
- ‏اطلع البيت واذاكر لحد ٦ او ٦ ونص كده واجي انام ساعتين فبقفل الشباك ابص الاقيها لسه واقفة بتصلي ...
- ‏حد متخيل معايا انها ٣ ساعات ونص في نفس المكان بتصلي وبتفضل واقفة !
- ‏يوميا على الحال ده
- ‏استغربت جدا وقلت هسألها انهاردة ..
- ‏المهم روحتلها البيت خبطت والحوار كان كالآتي
- ‏:السلام عليكم يا حجة
- ‏وعليكم السلام يابني
- ‏انا جيران حضرتك هنا وكنت عايز اسأل حضرتك عن حاجة بس اسف جدا لو ضايقت حضرتك بيها بس مبكونش قاصد والله
- ‏قالتلي : خير يابني اتفضل
- ‏انا بشوف حضرتك كل يوم من ٢ ونص او ٣ لحد الساعة ٦ ونص او اكتر بتصلي وتدعي !
- ‏فكنت عايز اعرف ده من شدة حب حضرتك للصلاة ولا في سبب تاني
- ‏ضحكت ضحكة العواجيز دي وقالتلي طيب اتفضل ادخل الاول مينفعش نسيب جيرانا واقفين علي الباب
- ‏جت ست كده بتساعدها عملتلي شاي المهم الست بدأت تحكي
- ‏هو مين فينا مبيحبش يصلي بس كل الحكاية كلها اني حبيت واحد وانا صغيرة واتعلقت بيه وكنا لسه صغيرين المهم
- ‏هو كان يقولي دايما انا عايزك تكوني حلالي ومش عايز اغضب ربنا فبعد ٥ سنين هاجي اتقدملك
- ‏بس في الفترة دي كل واحد يصلي قيام الليل وميدعيش غير اننا نكون لبعض فوافقت
- ‏والصلاة كانت بتحسسني ان الوقت هيعدي بسرعة وربنا هيكتبلنا نكون لبعض
- ‏عدت ال٥ سنين واتقدملي واتجوزنا وفضلنا نصلي كل يوم مع بعض علشان صلاة قيام الليل كانت اكبر سبب في اننا نكون لبعض ..
- ‏عشت معاه ٤٣ سنة من اجمل سنين حياتي .. ربنا كاتبلي من ٦ سنين اكمل عمري لوحدي ففضلت بصلي كانه موجود بس بصلي عدد الركعات مرتين مرة ليا ومرة ليه وبدعي في كل صلاة انه يكون في الجنة ومستنيني
- ‏انا عنيا شبه دمعت ...
- ‏وفضلت تضحك ضحك العواجيز ده لما شافت الدموع في عيني
- ‏وقالتلي عايز تعرف ايه تاني فقلتلها لا خلاص كده همشي انا علشان الحق اروح اذاكر ...
- ‏قالتلي متنساش بقي تسلم عليا كل يوم مش معقولة جيران ومنفتكرش بعض .. ضحكت وقلتلها حاضر ومشيت ....
- ‏هو في حب كده ؟؟
- ‏جوزها مش موجود ولا حد هيحاسبها لو مصلتش زي مكانت بتصلي معاه خصوصا سنها ده كبيير علشان تقف ٣ ساعات ونص ...
- ‏من شدة حبها ليه بتدعيله وتنسي تدعي لنفسها
- ‏اختاروا اللى يفتكركم طول العمر و يبقى مخلص ليكم مش اى حد‏..💙
- ‏منقوله...