#بلاعنوان
البارت الواحد ولثمانون
ل وردالعامري
محمد: لمي اوراقكم ويصير خير
ام سالم: اي خيه لمي غريضاتكم وربج كريم
زينه: فتت للغرفه اتصفن ع شنو جيت شنو الي اشيله
هوه روحي شايلها وياه شبقه هنا ينشال وينخاف عليه
ام سالم: بعدج خيه
زينه: والله ياخيتي ماعرف شنو اخذ
ام سالم: خيه اهم شي ذهبج وين
زينه: ذهبي بهذا الكومدي. جان بالغرفه كومدي بابين وبي قفل مؤيد مخلي للاوراق وللفلوس ذهبي بي
طلعت لمفتاح فتحته
اخر مره راد اوراق مااجه اخذهن
ام سالم: استغفر الله طلعي ذهبج خيه
زينه: طلعت صندوك هنا ذهبي
ام سالم: ماشاءالله خيه الله يزيد ويبارك
زينه: ياريته رايح وباقي الي جابه
ام سالم: شيلي خيه هذا وكته متعرفين شيصير وياج
ام زينه: هااا يمه
زينه: شيلي هذا لصندوك ماما
ولو زحمه عليج شيلي غراض للولد
مالي روح لكلشي
ام زينه: اني الم يمه اني المهن
ام سالم: لاتشيلون هواي حته لاتصير جنط هواي بلكن الله يسهلها وماتسافرون وترجعين لبيتج
بس شيلي لمهمات ذهبج اوراقج
زينه: ماما بدربج صيحيلي محمد فدوه
ع كعدتي عيوني ادور بالغرفه
مثل طير مذبوح حالتي مذبوحه ركبتي ودمي يجري بس بعدني
اتقاوه ويه مصابي
دك لباب محمد وواكف ناطي ضهره للغرفه لان لباب مفتوح
فوت خويه
ام سالم بالغرفه وامي وهوه ناطي ضهره للباب ويستحي يدخل
بكلبي ترددت كلمه محمود صدك اخوكم
محمد: امريني خيتي
زينه; لايؤمر عليك ضالم خويه
واكف كاتف ايده وره ضهره
خويه ذني كل الاوراق الي عندي اوراق مؤيد الي اعرفها اوراق شغل شوفهن انت
اخاف تحتاجون شي منهن
محمد; اطيني خيتي هاي اوراق الكراج ولعقود
وذني سند لبيت هذا اي هذا
وذني اوراق السيارات الي بااسمه
وهذاسند البيت الي كاعده بي كوثر
وهاي اوراق كاع هم بااسمه
والباقي ذني اوراق حسابات وجرد
خيتي كل ورقه هنااا تشيليها وياج
اضميهه زين لاتوكع بيد احد الف تزوير ايسون عليها
ذني كلهن تشيليهن ويه اوراقكم
زينه: اي ماشي وهاي فلوس هم
محمد: ذني لفلوس هم شيليهن
زينه: خويه بله شي طلعت ماكله حق احمد ونور
محمد: خيتي شيليهن وياج سمعي مني شيليهن ويه غراضج
زينه: ماشي
محمد: خيتي عمار ادري طلعله جنسيه مؤيد بس جواز عن
زينه: عنده جوازكلهم الولد عدهم جوازات عمت عيني يمكن جان يعرف الي راح يصيرلي
محمد: خيتي انتي شيليهن بس شغله لسفر اني ممقتنع بيها ان شاءالله الكه حل
زينه: خويه محمد اني من بعد الله ماعندي احد غيرك
تعرف بحالي زين مكطوعه من شجره
مؤيد هوه اساسي جان وهوه سندي
واليوم مؤيد غايب
ياخويه مضل الي غيرك من بعد الله
ياخويه دخيل الله ودخيلك طلعنه اني وولدي
كافي ضكت طعم المر بخسارتي لمؤيد
ماريد اخسر ولدي ماضل الي شي من ريحته بس ولدي
محمد: خيتي شعرف اني هناك وادزج بغربه
زينه: ياخويه ماكو غربه اني غريبه هنااا
لاتزعل مني البارحه حسيت اني غريبه بنصكم
ام زينه: يمه محمد سوريا اني عشت بيهااهلها ناس بسيطه
واني اعرف كم وحده هناك هم باجر عكبه كل شي يصيرعدنه احد يعرفنه ونعرفه
محمد: الله كريم اخذي غراضج واوراقج والي بي خير يقدمه ومثل ماكتلج خيتي
كصكوصه ورق لمؤيد لاتخلين كلها شيليها
زينه: اي ان شاءالله اول شي بديت بي شلت اوراق مؤيد
وحضرت جناسينه ولجوازات
امي اخذت جنطه صغيره للولد كل واحد منهم تراكسودين
رايحين لبيت ام سالم هسه الهدوم سهله شوكت مااريد اسافر اجي المهن
بس الذهب والاوراق كلشي يصير يطب احد
يفتش بالغراض للامان شلتهن
فتحت لكنتور اشيل هدوم الي صارن بوجهي هدومه
طلعت تراكسود مالته حطيته بجنطه
ام سالم: يااا شلج بي
زينه: اريده خلي شلت هدوم الي فتحت كنتور هدومه لمعلكه اخذت الالبومات مال الصور بالقاطع الفوك مضموم
طلعت دشداشه اله شلت اله غراض مثل ماشلت النه
خابرت ام خليل كالت الولد كعدو. ويبجون عليج
دزيت امي يمهم
كلبي واجعني ممرتاحه بس مضطره اطلع من بيتي
طلعت وصلت للباب ورجعت
محمد: ها خيتي
زينه: نسيت شغله
طبيت ركض للغرفه ع عطر مؤيد
رشيت منه ع ايدي وحطيته بجنطتي
بالمجر ساعاته وسبحه شلتهن كلهن تردد ع بالي اخاف يسئلني عليهن
غمضت عيوني بقوه وينه ويسئلني عليهن
افتريت بالبيت كله سددت البوب
عيوني تفتر بالبيت جنت اشوفه بنضره مفارك
طلعت وعيني ع بيت
بيتي هذا عطر مؤيد،بي
صورته وذكرياتنه كلها بي
هيج اطلع منه مثل الهارب المهزوم بخوف اطلع من بيتي
طلعت واكفين بطرمه محمد،وابو خليل
محمد: هاخيتي كملتي
زينه: اي
محمد: ام ادم روحتج لبيت ام سالم غلط
زينه: اي،صح ابقه ببيتي احسن
محمد: لاخيتي اسمعيني
المره تريد،تساعد بس متعرفين منو يجيها ع غفله يشوفج انتي وجهالج
وبعدين جهالها بالمدرسه وكل جهالنه وياهم
تطلع كلمه من طفل احنه اريد نبعد هل ايام بين ماتصفه الامور
البارحه بليل ابويه متخربط وماخذي للمستشفى
هسه هم مانكدر نحجي شي
كم يوم نتحملهن والله كريم
زينه: يعني ابقه ابيتي هسه
محمد: لاخيتي راح اخذج لبيت ابوخليل موهذا الثاني
زينه: الثاني
ابوخليل: اي خيتي احسن هنا عرفو اني واكف وياكم موبعيد،يطبون لبيتي
بس بيتي لثاني محد يندله هناك احسن
زينه: حاسه روحي مسويه جريمه واتهزم منهم
محمد: تفرج خيتي بس اريد،الاوضاع تهدء
زينه: ان شاءالله ان شاءالله
صعدت بسياره فهم محمد ام سالم جان ردها حقكم بس وين ترحون
محمد،كلها انزلها لبغداد اكو احد،من اهل امها. هناك
طلعنه كدامنه ابو خليل يسوق
عيني ع بيتي شفارك بعد فاركت مؤيد
وفاركتك شمكتوب الي بعد
عطر مؤيد باايدي شهكته
اريد،داخلي يرتاح من لعراك البيه
تذكرت اخر مره حضنته بيها
نزلن دموعي اووووف يكلبي والله جنت حاسه
ياريتني ممخليتك تطلع ياريت
وصلنه لبيت ابوخليل وتلكتنه زوجته الثانيه ام يوسف
محمد نزل الغراض وراح
الولد التهو يلعبون
وامي وام يوسف يسولفن
واني عقلي يشتغل شلون اصرف وشسوي
ادم: ماما
زينه: هاا ماما
ادم: شوكت نرجع لبيتنه
زينه: صدك شوكت ارجع لبيتي صفنت بوجهه وتردد هل سؤال بداخلي
ام زينه: فديومين بيبي ونرجع روح العب حبيبي
ادم: بس اني ضجت كومي نرجع لبيتنه
زينه: اي ارجع لبيتي ليش اعوف بيتي اني احجي بداخلي وامي ترد ع ادم
ام زينه: حبيبي تعال،يمي بيتنه عطلت لكهرباء بي مثل ذاك اليوم
ادم: انشغل مولد
ام زينه: لامو حته لمولد عطلت بس يسويها عمك محمدنرجع
زينه: راح يلعب اباوع عليهم ع دمي انطيكم الهم
ام زينه: زيون لاتضلين تتصفنين يمه جهال
ميخالف اتحملي
ام يوسف: مااضيق اذا متفرج
زينه: اووووووووف ضاقت عليه هواي
وينه ويحلها
ام زينه: حتعمين يولي كافي لخاطر هل،جهال منو الهم
ام يوسف: من رخصتكم عيني
زينه: كامت ام يوسف عدها طفل صغير كامت ترضعه وتنيمه
شسوي هسه اني جان هوه كلشي يحل ماشلت هم لشي اختنك واطب،بااصعب ضرف
يجي يطلعني من كل شي هسه شسوي
اني شعرف شلون اتصرف
ام زينه: حبيبه يمه احسن قرار تاخذين ولدج
ونسافر هناك بعيدين عن عينهم وعن ايدهم
ذوله موهمهم لولدهمهم الي عند الولد
وهمهم ذلتج يذلوج اكو ثار بينج وبين ام مؤيد
هيه متكول ابني نفر مني ع الي سويته
لا تكول هيه كطعت قلب ابني عني
تريد تحرك كلبج عليهم
وكوثر تريدهم هم المال وهم اذيتج
ومحمود طمعان بمالهم وبيج
شله ذيابه وتحدو يمه متكدرين تسوين شي
واكولج شغله يمه حته محمد اني خايفه منه
زينه: محمد هوه ويانه
ام زينه: اهله يمه اهله متعرفين الي يحطوه براسه شنو
صلاح موجان واكف وياج شلون فروه وخلوه لصالحهم
استعجلي بسفرنه يمه
مادام محمد بعده ويانه بس نوصل هناك
زينه: محمد،مثل مؤيد ميغدر
ام زينه; صح بس امه امه براسه بنتي
ولد عمه كلها تحزمت عليج وعله ولدج
همه الف وانتي واحد
المن ينقاد هم يجوز من كثر الضغط يمل
يكولك كل ذوله غلط وهيه صح
لحذر يمه يقيك الضرر
زينه: يعني،شسوي هسه
ام زينه: نسافر لحي عليه يطلعنه نطلع بسياراتهم أمن النه
لان هذا شغل ولد عمه وشغلهم اخاف نطلع ويه غريب واحد يشوفنه بهل درب الاحسن وياه انكون
بس نوصل لسوريا الها الف حلال
زينه: شلون يعني
ام زينه: يمه تاخذيلج شقه تلمين ولدج بيها
ولااحد يندلنه ولااحد يعرف عنه شي
زينه: قصدج محمد مااخلي يندلني
ام زينه: لامحمد ولاغيره يمه خلي ابوخليل يعرف مكانه حته يصير هوه همزه وصل تسمعين اخبارهم منه
كلشي يصير يسون شي يندلونه
محمد يحجي خلي ابوخليل
موصل الج من طرفهم
زينه: بس محمد ميسويها
ام زينه: اني مكلت يسوي شي اني كلت حذر حذريمه
زينه: هسه الاجارات هناك شلون اخر فتره صارت
ام زينه: اجار ميفيدج يمه متعرفين كعدتنه شكد حضل هناك
وعندج اربع ولد يعني حته اذا لكيتي شغله هم شسوين توكليهم تلبسيهم
لوادفعين ايجار
زينه: شسوي لعد
ام زينه: شوفي يمه ذني العندي
زينه: شسوين
ام زينه: سمعيني ذني العندي حطيهن ع ذهبج وبيعي
زينه: بيدها بتوت ومحابس ثنين نزعتهن وحطتهن بحضني
شيليهن يمه
ام زينه: اعرف الذهب عزيز ع كل مره واعرف هوه عمت عيني ينكل جان
بس يمه هذا مثل مازينه الج جان هوه خزينه
بيعي يمه سوي فلوس عسه وعل نحصلنه شقه نشتريها
تخلصين من الايجار تبقه اللكمه سهله. تدبر
زينه: انعل ابو الذهب بس ابعد ولدي
شيلي ذني مالاتج
ام زينه: ابد والله ازعل مو وقت مالتج ومالتي وقت ذوله الاطفال ننهزم بيهم لايصيرون
جوه ايدهم مصكعه
زينه: الليل كله منمت كلام امي صح
الصبح اجه محمد يشوفنه
خويه شسويت ع شغله السفر
محمد: ياخيتي وليش هل سفر لبارحه طبو مالكو احد هوسو شويه وراحو
كم يوم وكل واحد يكعد بمكانه
زينه: خويه نخيتك دخيل الله ودخيلك خلينه نطلع وياك اني ادري عندك سفره بعد 4ايام
محمد: وين اعوفج خيتي بنص لغربه
زينه: ماكو غربه خويه احسبني طالعه سياحه ذوله هم لمساكين اختنكو وادم كل شويه وكال وين ابويه ضجت اريد اطلع اريد اروح للكراج
وانت تكول هل فتره نبعد شويه
اطلع حته لوكم يوم انت تشوف شغلتك عائلتك ترتاح من همنه
فتره
محمد: ماكو هم ان شاءالله خيتي
زينه: خويه لخاطر مؤيد خليني اسافر تهدء لاوضاع ونرجع
محمد: الله كريم
زينه: راح ومبين ممقتنع بسفر
اجه ابوخليل طلبت احجي وياه
ابوخليل: امريني خيتي
زينه: والله ياخويه داخله ع الله وعليك
ابوخليل: ركبتي ترخص الكم كولي خيتي
زينه: اريد اسافر قنع محمد
ابوخليل: لاحول ولاقوه الابالله خيتي هذا بيتج واني اخوج
زينه: خويه عامر بااهله بس السفر الي احسن
موبعيد واحد منهم يندل هذا البيت وهم يجون
ابوخليل: يعني مكدرت تسكت عود وصيتها متكولج
زينه: المن وصيت خويه
ابوخليل: ام خليل كلتلها لاتحجين ل ام ادم بس وين تكدر تنام وحجايه ابطنها
زينه: ليش شصاير خويه صار شي لبارحه اليوم
ابوخليل: هااا لاماصار شي
زينه: عليك الله بداعه اولادك شصاير شنو الي وصيت ام خليل متكوله الي
ابوخليل: ماكو شي اني عبالي خابرتج ام خليل
زينه: خويه احلفك بكتاب الله كولي شصار
ابوخليل: استغفر الله وصيتها متحجي تالي اني راح احجي
والله ياخيتي البارحه من دخلو لبيتج ومالكو احد بيه
محمود النذل هد عليه يكولي ابيتك انت ضامهم
واله نفوت نفتش بيتك
طبت ام احمد وام مؤيد ونسوان وياهم
طبو للبيت يدورون عليكم
زينه: يعني سفري صح ومو بعيد هسه يطبون علينه
ابوخليل: لاهذا لبيت ميندلوه
زينه: بس موصعب يندلوه
خويه طالبتك طلب سهلي شغله السفر
ابو خليل: ان شاءالله خير
زينه: ضليت الوب موبعيد يندلون بيته
بليل اجه محمد
محمد: خيتي صبري ميكدرون ايسون شي
زينه: طابين ع بيت الرجال بنص الليالي شيسون بعد
محمد: تنحل تنحل لحضه
الووو
هاااا
صدددك تحجي
هسه جاي جاي
زينه: خيررر
محمد: هاا ماكو شي ماكوشي
زينه: طلع يركض محمد شنو ماكو شي شصار
طالع تركض انخطف لونك
محمد: الولد الولد متعاركين
زينه: صعد سيارته وراح لاحول ولاقوه الابالله
لصبح مر ابوخليل
كال هم بليل جوي وصارت عركه خابرت ع محمد وتالي وصيحو وعيطو وراحو
زينه: انت البارحه خابرت عليه
ابوخليل: اي والله لان طبو للبيت وصياحهم
خابرت عليه لوتشوفيهم هدو عليه وينهم
زينه: اييي
ابوخليل: كلهم مادري حالي حالكم افتر ادور عليهم
محمود يكوله وين تروح اني اجيبها اني اعرف وين انهزمت
زينه: حسبي الله ونعم الوكيل ومحمد وين هسه
ابوخليل: شفته بالكراج هسه ايمرلكم بس يغفل عنهم
زينه: ان شاءالله راح ابوخليل ولليل مااجه محمد وصار منع لتجوال هوه مابين
وجه الفجر سمعت صوت لباب انفتحت
خفت منو جاي فتحت لبرده شفت ابوخليل طب بس مصخم سواد بهدومه وبوجهه
ياساتر يارب لبست عباتي وسمعت صوت زوجته
طلعت صار بوجهي
خير خويه
ابوخليل: ااااا ماكوشي
زينه: شنو هل دخان الاسود
ابوخليل: هاا لادهن هذا لسياره عطلت
زينه: بس جنه دخان
ابوخليل: لالاخيتي
زينه: راح للحمام يركض والله جنه دخان
لاقابل ليش يكذب لرجال بس دخا.. اووو ماعندي هم بعد دخان لو دهن
وره اذان الفجر
اندكت باب لغرفه كمت ام يوسف
ام يوسف: خيتي حماج اجه يريدج
زينه:اي اي طلعت اركض كاعدين هوه وابوخليل بس وجه محمد مايتفسر
خير خويه
محمد: صباح لخير
زينه: صباح النور صاير شي شو وجهك
محمد: لالاماكو شي خيتي هاي اوراق تخص مؤيد يعني طلعناها ع انه مفقود اخاف يوكفونه ع ولد بالحدود
زينه: يعني نسافر وياك ان شاءالله
محمد: اي خيتي الفجر ان شاءالله نطلع
زينه: اي بس اروح للبيت اخ…
محمد: لالايابيت خيتي لاترحين
ابوخليل: ااا اخاف احد منهم يشوفج
زينه: بس اجيب هدوم لولد
محمد: خيتي لهدوم سهله مناك ناخذ الهم وحته طلعتكم خفيفه مومال جنط وهوسه
زينه: ماشي بس اريد اطلع اذا تكدر للسوك
محمد: شعندج خيتي
زينه: اريد ابيع ذهبي
محمد: لالاشتحتاجين اني يمج
زينه: خويه اني ادري انت متقصربس اريد اسوي فلوس جوه ايدي
محمد: خيتي شكد تردين اجيبلج
زينه: ذهب اشيله انوكل بيه حمل فوك لحمل اسوي فلوس واضمها
كوه قنعته كال الضهر امرلج
صارت ب8دكيت ع ام خليل
اوصيها تجيبلي كم شغله من البيت
الووو
-هلاخيه شلونج
زينه: شبي صوتج ليش هيج
-من لصياح ع هل جهال
زينه: الله يساعدج حبيبه ام خليل بلكن تفوتين للبيت تشيليلي كم شغله وادزيها بيد ابوخليل
-هااا اي بس اني ببيت حماتي خيتي
زينه: هاااا عبالي بالبيت
-هاا لا والله بلكن يرجعني ابوخليل تدللين
زينه: تسلمين حبيبه
-نويتو ع فجر
زينه: بحيل الله
-ان شاءالله اجي اشوفج قبل مترحون
زينه: ان شاءالله
الضهر اجه محمد اخذت الذهب
ورحنه ركض ركض ع اول صايغ من غير حته منفاصل
جابن23مليون و830 الف
ماعده الي لابسته لابسه زنجيل اسم مؤيد وتراجي بااذني ومحبس وحلقه
وذهب امي مبعته ضميته رجعني للبيت
حضرت اوراقنه وجنطه صغيره الي شايليها بس عدلتهن
سبحت الولد
المغرب اجه محمد
محمد: خيتي ذني جوه ايدج
زينه: ابد والله مااخذ
محمد: سمعيني ام ادم طالعه بدرب ومتعرفين لضروف فلوس ذهبج امانه الله متلعبين بيهن
ذني 3ملايين تخليهن جوه ايدج تتصرفين منهن
زينه: محمد اني فلوس مؤيد الي كتلي شيليهن عندي7ملايين شايله ماعده فلوس الذهب
محمد: ولو كان خيتي وفلوس مؤيد هم خليهن للضروره ان شاءالله مااخليج تحتاجين الهن
زينه: مااخذهن محمد مرتك ع وجه ولاده
محمد: خير الله موجود اذا تحسبيني صدك اخوج تاخذيهن
زينه: والله
محمد: شكتلج اذا اني اخوج تمدين ايدج وتاخذيهن
زينه: والله ماعرف شكولك
محمد: لاتكولين شي خيتي لفلوس شيليهن زين وحاولي سويهن حزام وشديهن
اني عندي شداد مسوي بي جيوب وسحابات راح اجيبه الج
بس كصي حته ينشد لان بي عرض تدرين بعد اخوج كرشي،ههههه
زينه: هههه اريدك سالم
راح محمد وللمغرب اجه هوه ومرته
محمد: خيتي هذا الي كتلج عليه شوفي هاي كلها جيوب سفطيهن وشدي شداد ع بطنج
هذا طريق وشويه صاير صعب هل ايام
زينه: اي اي ان شاءالله
محمد: وذني خيتي دزهن الج ابويه
زينه: شسوي بيهن دخيلكم
محمد: خيتي الوالد يسلم عليج
ويكول عذريني حيلي خاني ومرضي هدني
وانت جان الي يحجوه صح اوغلط
اني بسنه من السنين كلت لمؤيد ناخذ ابنها
ومؤيد جفه (ابتعد-افترق) عني
وخلاني بحسره شوفته بذنب مو ذنبي
بس حسبني وياهم لان كلت ناخذ ابنج
هل مره مااغلط نفس الغلطه
لان
زينه: محمد عيونه دمعن مسح دموعه
محمد: يكولج لان اخاف من الي ماشفته هنا اشوفه هناك
ويكولي اخذتو ولدي من امهم
زينه: اختنك محمد ويبجي واني كتمت حسي وبجيت
محمد: يخاف لايجافي مؤيد بذيج الدنيه
زينه: الله لايكولها عمرهم طويل ثنينهم الله يرده سالم غانم
محمد: ذني خيتي من الوالد يكولج اعذريه من لتقصير
زينه: محمد شسوي بيهن ياخويه
محمد: جوه ايدج خيتي ذني خمس ملايين اني حولتهن مثل ذنيج ورق (دولار)
افضل بشيلتهن موهوسه
زينه: سلملي عليه واشكرليها واتعذرلي منه اذا بيوم غلطت وياه بشي خلي يعذرني
محمد: غاليه ام ادم وحده من بناته اني واخت النه ومرت غالي
زينه: كاعد محمد وطبت ام خليل حضنتني وتبجي صوتها رايح
ام خليل: صدك راح افاركج
زينه: ماكو افراك ان شاءالله ادعيلي يرجع مؤيد وارجع لبيتي
ام خليل: عمت عيني عليج يختي وعله بيتج اويلي يمه
ابوخليل: كومي شوفي جهالج كومي لاتونين
زينه: حاسه اكو شي من لبارحه شصاير
مرت محمد بجت ومحمد دار وجهه ابوخليل دنج وام خليل تبجي ولازمه ايدي
شصاير كولولي
محمد شصاير
لاااااا مااااجه خبر موزززين ع مؤييييد. دخيللكم
محمد: لالا والله ماوصل اي شي عن مؤيد
زينه: شبيكم لعد
ليش ناس تباوع ع ناس سمعتو شي مووو
وينه لاتحجيها اذا لبالي ماريد اسمعها
ابوخليل: خيتي وداعت جهالي مسمعنه لازين ولاموزين ولانعرف شي عن ابوادم
زينه: شبيكم لعد ليش ناس تباوع ع ناس وبعيونكم حجي
احجولي شصاير ام خليل شكوو
محمد خويه شصاير بداعه عزيز كلبك
هااا ليش حطيت ايدك ع عيونك
شصاير فهموني
محمد: خيتي كلشي يهون وكلشي يتصلح وكلشي فدوه بس انتو سالمين
زينه: اي شصاير
محمد: الغالي غاب ومانعرف عنه شي
بعد كلشي فدوه ماينبجي عليه ال اغله منه راح
زينه: شنو راح يعني اكو شي ع مؤيد
محمد: بالله العضيم ماعرف شي عن مؤيد
وراح قصدي مامنه خبر بعد
زينه: اي كمل احجي شكوو شصاير
محمد: خيتي العوض بله البيت
زينه: البيت البيت شبي ادور راسي بينهم
شبي البيت
ابوخليل:حسبي الله ونعم الوكيل
زينه: شبي لبيت خويه ابوخليل
محمد: احترك خيتي
زينه: ضربت ع صدري بقوه ايدي احترك شحركه شلون احترك
ابوخليل: الي كاتبه ربج هذا فدوه كلشي يتعوض بس راعيه يرد
زينه: حركوه مو احترك مووو حرركو البيت محمد مووو
اااااااااااااه ووووويننننك مؤيييييدددد
ولك حته بيتك حركوه شمنتضر حته ترد
ااااااااخ يابه ولك يتمتني
يتمتني مايتمت ولدك انت
الي يتمتني بغيبتك
احترك بيتك ولك الحك
ماضل الي حيل وينك تعال شدلي حيلي
ولك مو رجلي الي انت
ابويه انت وين رحت وخليتني ياابويييه
يحزام ضهري لوتدري بغيبتك
شطلعت ذيابه اليه
محمد: كافي خيتي العوض با الله
زينه: شلون حركوه منو حركه ديوانيته ديوانيه مؤيد خوما بيها شي
جهزها قطعه قطعه والي يكول حلوه
يغورني بيتج كله هيج بس لديوانيه
اني سويتها
اروح اشوفه
محمد: خيتي دخيل الله كعدي
زينه: اروح اشوف بيتي ولكم فدوه بس اشوفه اهم شي غراضه وديوانيته لباقي فدوه
محمد: كعدي خيتي
زينه: وديني محمد دخيلك بس اشوفه ماريد شي بس اشوفه يخوي
…… .يتبع