#بلاعنوان
البارت الثامن والستون
ل ورد العامري
-وين ادم
زينه: ماكو ادم اكو بس احمد الله يحفظه ل ابوه ول امه ويخليهم فوك راسه
من كلت امه كأني لكلمه غصب تطلع
هوه دخن جكاره ويباوع علينه
ام زينه: مفتهمت ولج ابنج وين عفتو يم ابوخليل وين جوه فدوه لعينه
زينه: وين كايمه
ام زينه: انزل اجيبه ليش مصعدتوه وياكم
زينه: ماما ماكو طفل كعدي
ام زينه: يااا شنو سالفتكم ناس تباوع ع ناس
مؤيد: اني استئذن
ام زينه: وين رايح يمه
مؤيد: اخذو راحتكم بعدين ام
ام زينه: شو اكعد فهموني وجوهكم ماتتفسر شبيكم
الطفل وين سميتوه احمد مو كلت ادم ههههه
زينه: يمه احمد ابن مؤيد
ام زينه: لعد ابن لجيران ولج شبيج هههه اكعد يمه اكعد والله ممصدكه شفتكم
زينه: ابنه من بنت عمه كامت اتكعده لان واكف يريد يروح
من كلت بنت عمه اندارت عليه ورجعت عينها ع مؤيد
ام زينه: هااا هاااا اي الله يحفضه اكعد يمه وين رايحين خل اشبع منكم شوف ممصدكه روحي
زينه: صوتها اتغير رجعت كعدت
ام زينه: ااحم اايي الله يخليه يمه
وادم وين
زينه: ماكو ادم راح
ام زينه: شلون راح ولج شبي لطفل مو ذاك اليوم خابرت مؤيد كال زين بخير
زينه: ماما مكملت حملي وكع
لطمت ع صدرها
ام زينه: صدك تحجين يااا موكلت صار عدنه ولد وسميناه ادم
مؤيد: محبيت اشغل بالج واعرف وضعج شنو
ام زينه: عمت عيني عليج يايمه
شكد ووكع سوده عليه
زينه: خمس شهور يعني ايام وادخل بسادس
ام زينه: ياااا وشلون وكع ولج جبير شوكعه
شبيكم موبس لساناتكم مليانه حجي
شو احس كلوبكم تكركع تكركع بيها لسوالف
مؤيد: اخذو راحتكم
ام زينه: اكعد يمه فهموني،سالفتكم شنو ناس تباوع لناس
شصاير بينكم
مؤيد: زينه تحجيلج
اني
ام زينه: مؤيد يمه قبلها هم كعدنه هل كعده وكتلي سمعي منها كتلك اسمع منك
اكعد،يمه اسمع منك
مؤيد: عمه اخذو راحتكم زينه تحجيلج
ام زينه: والي تحجيه زينه ماعندك علم بي لو تعرف الي راح تحجي شنو
مؤيد: لااعرف
ام زينه: خلص يمه اكعد اسمع منكم ثنينكم شصاير بينكم فهموني
زينه: اريد اغسل وجهي وين
ام زينه: اي تعالي ذاك لحمام روحي
زينه: طلعتني من باب الهول ممر مستطيل اشرتلي ذاك لحمام ورجعت كعدت
اني مجرد اريد انهزم ماعرف شكول ومنين ابدي
واكفه بالممر احاول اهدء
ام زينه: شنو لقصه مؤيد شبيك انت ومرتك شصاير بينكم
احجي يمه اسمع منك اني ان عدها غلط وياك اكسرلك راسها وليدي
مؤيد: والله،ماعرف شحجي
ام زينه: علمود زواجك من بنت عمك بينكم مشاكل
مؤيد: هم الها طرف بمشاكلنه
ام زينه: ياساتر يمه وكعتي كلبي
زينه: سمعتها تحجي وياه رحت غسلت ورجعت كعدت
ام زينه: اي احجو شصاير
زينه: ماكو شي خل اشبع منج شوف هسه
ام زينه: زوينه الي بين عيونج ينقري قرايه شبيج يمه
هااا ليش يمه ليش هل دموع حبيبه ولكم شصاير كلبي اشتعل نار
شصاير بينكم مؤيد احجي يمه
مؤيد: ماكو شي انحلت ان شاءالله عدت
ام زينه: هوه شنو الي عده يمه
زينه: ماما ابني مات ابطني. من كالت شبيج يمه شمرت روحي بحضنها وبجيت
ليش حضن الام يختلف ليش لبجي بحضنها كأن يغسل كلبك
كان هذا لمكان تريد،تفضفض بيه،كل الي بيك تحجي،من غير تردد ادور ع راحه بيه
مكدرت اسكت كلتلها ابني مات
ام زينه: عمره هيج يمه الله انطاه والله اخذه وربج يرزقج بعشره غيره بعدكم صغار ولعمر كدامكم
نصيبه من هل دنيه هيج مايكمل ويعي…
زينه: لامونصيبه جان باقيله اربع شهور ويجي بس قتلوه موتوه ابطني
ام زينه: شلون كتلوه يعني
ولج احجي
زينه: عبير ماعرف شحطت ووكع
ام زينه: ياعبير ولج
زينه: ع عمتي
ام زينه: عمه لعماها وشوصل عبير الج يولي احجي
مؤيد شجاب عبير عليكم شنو وكعته فهموني
مؤيد: جتي للبيت واضاهر حاطه شي لزينه بالعصير ماعرف بلبن المهم لطفل مات بيومها بطننها
ام زينه: وشجابها لبيتكم شوصلها
زينه: اندلت هيه
ام زينه: شنو اندلت هيه زينه
مؤيد: موو اووووف زينه راحت ل اهلي
يعني راحت كلتلهم اني زوجته والى اخره
ام زينه: ايييي
مؤيد: اخويه محمود عرفها تدرين جانو يدرون مهزومه وياج
من شافها جاب عبير
ام زينه: وانت ليش ادخلها لبيتك مؤيد اصلا
مؤيد: مره واكفه ابابي تبجي وجيت بس اريد اشوفها واخويه واخويه عيب اطرد مره من بابي لوجانت كاتله ابويه
وكتلها لزينه طرديها انتي لان اني من احجي عيب اطرد مره ابيتي
اني شمدريني هيج حتسوي لازم زينه تنتبه ان متاخذ شي من ايدها
زينه: اني شمعرفني هيج نيتها
ام زينه: لا لازم تعرفين تعرفيها اعوذ بالله منك يلساني
ادري ليش تاخذين شي منها رجلج انكول حقه عيب يطردها وهيه ابابه انتي شلون تستقبليها
زينه: هيه جتي تبجي وماضل الي غيرج فااني
ام زينه: انتي غبيه صدكتي ادري وليش سوت كل هذا بت الكلب حسبي الله ونعم الوكيل عليها ليش سوت هيج
شبيكم ناس تباوع ع ناس
زينه: معرفت شحجي او الاصح شوفته متوتر وخجلان قهرتني
مؤيد: لان امي اااااا امي احم ااا امي اطتها حته هيج تسوي
ام زينه: شسوي يعني يمه صخام بوجهج فاتن
اطتها فلوس يعني
زينه: اي
ام زينه: حته حته اطرحج عبير
زينه: اي
ام زينه: يمه عمت عيني يايمه وراح الطفل فطيس وليش كل هذا
وشلون طرحتج شطتج
زينه: مادري طلعت تحطلي شي بالعصيرولبن
ام زينه: وانتي شلون اتشربين شي من ايدها من شوكت نزلت حنيتها عليج
وكامت تسويلج بيدها وتطيج
زينه: اني شمدريني شبيج
ام زينه: لاتدرين تدرين بيها وبسوالفها شلون اتأمنين وادخليها بيتج
زينه: هوه مؤيد سمحلها تفوت
مؤيد: غير لخاطرج اني وكتلج طرديها
زينه: هسه لغلط رجع عليه وامك هم اني
مؤيد: اي انتي لوكاعده وساكته ابيتج
ومرايحتلهم جان هسه ابنه بين ايدينه
زينه: اي صحيح اني لغلطانه جان لازم اولده حته ياخذوه مني اسهل موينتضرون
مؤيد: منو ياخذه منج شومتعرفين تحجين انتي لج موطلعتج من نص بيت اهلي وعفتهم كلهم ووكفت بوجه ابويه وردت اخذج واهج
منو يكدر ياخذه منج لوموجود
زينه: لاميحتاج اخذوه مني قبل ماينولد
بس يله مومهم صار عندك غيره
مؤيد:انتي ليش متعرفين غير بس اشيليني ذنب
زينه: انت الي تشيليني ذنب انوب لان رحتيلهم
مؤيد: اني مغلطان لومرايحه منو يعرف بيج منو يوصللنه
لج جان صبرت ع قليل تفوتيلهم ابنج بيدج ولاتكوليلي ياخذوه وماعرف شنو
حامل ومقبلت احد يحجي موع ايدج
زينه: من هذا سمعوك
مؤيد: انتي ماعندج غيري مرد المضالم
زينه: من رحت انت تعرف سبب روحتي شنو
مؤيد:شنو هاا شنو هاي امج كاعده
كتلج بنت عمي بااسمي مكذبت ولابعدين عرفتي وكتلج زواجي منج محد يعرف بي صح لواني غلطان
ام زينه: لاصحيح بس انتي ليش رحتيلهم
زينه: ليش رحتلهم يعني غير جان يريد يزوج العفو طبعا هوه اصلا ازوج بعد
مؤيد: اي ورحتي تمنعين الزواج عود وتالي طيحتي حضنه
زينه: اني كله اني
مؤيد: لج مره اعترفي وقدري لكدامج شسوه الج
زينه: محد كلك ساعدني اطلع لاتحملني منيه
مؤيد: هذا الي بعقلج بس لج عفت الدنيه كلها لجلج اني
بعت الدنيه كلها علمودج وانتي تكوليلي محد كلك اطلعني من لسجن
ام زينه: ياسجن ولكم
زينه: مجبرتك كتلك روح لمرتك وابنك
مؤيد: انتي شنو بابا ليش الي يحبج ويتفداج
تركبين ع ضهره
ام زينه: بسسسس جاين تتعاركون يمي ثنينكم غلطانين
الغلط الاكبر من رحتي لهله شوداج شعبالج ياخذوج بالاحضان من رحتيلهم
بت منو انتي
وانت غلطك طببت الذيب لبيتك
وانتي غبيه امنتي الها
ثنينكم عدكم غلط وبالاخير سوده عليه لطفل راح فطيس
وانتو ناس تريد تاكل ناس
الله اطاه والله اخذه حرام اضلون تنكون
وحوبه الطفل بركبه عمتج وامك لاتزعل مني
مهما كان طفل شذنبه
زينه: ذنبه اني امه موبنت عمه
مؤيد: انتي سكتي احسن
ام زينه: سكتي انتي بت عمه غريبه عليج متدرين بيهاجنتي
زينه: هوه كله اني الغلط انت ماعليك غلط
اني هم كتلك طلكني وتعطف عليه ادزلج مصرف
ام زينه: طلاكيش
مؤيد: مخبل مشفت كدامي كلتج كعدي ابيتج بس شلون تنفذين انتي لا لازم ترحين لعبير بنفس الليله
ام زينه: رحتي لعبير
زينه: لا غلطت لازم ابقه كاعد انتضر منك تذل اكثر
مؤيد: لج منو ذالج انتي هااا انتي حته مااطيتيني فرصه ارتاح رحتي تركضين لعمتج وجيتج لبابج اكولج رجعي شسويتي
زينه: جيتني لبابي تكولي هذا مكانج تحنين رخيصه
مؤيد: ضلللي ضللللي عيد بي عييييدي
بس لاتفكرين ليش حجيت هيج صح اني غلطان جان لازم اصفكلج من اعرف عايفه بيتج
وداكه درب وحدج شطوله لاوفوكاها يطلعلي طه افندي
ام زينه: انتو شتحجون دخت
زينه: موكتلك بكل شي اني غلطانه
مؤيد: غلطانه ونص من طلعتي من بيتج غلطانه شخسرتي هاا شخسرتي لومنتضره يومين بس يومين اهدء اشوف دربي افكر الي سويته شنو
لاشلون اصبرين لازم ادكين ع راس مؤيد وحده وره الخ ادكين ع راسي ولاتفكرين تطين عذر ابد وفوك هذا كله
مكفاج درب عبير لا انوب درب ام هناء
زينه: ام هناء 10شهور واكفتلي من جنت عايفني انت ومتعرف عني شي
ام زينه: اهم هناء
مؤيد: لان جنت ادري وعايفج ولج موشفتي اول معرفت انتي بسجن ركضت بيدي وسنوني وطلعتج
زينه: جان عف.
ام زينه: اللله واكبر ع روسكم ثنينكم ولكم صوتي راح سكتووو
ناس ترد ع ناس
شنو سجن شنو ام هناء لج فهموني
جاين تتعاركون يمي جنتو مفطومين معارك
فهموني عاد وتعاركو
مواحاجيج شنو سجن
زينه: شنو شنو سجن اني جنت بسجن
ام زينه: عزه لعزاج ياسجن ولج
زينه: الاصلاحيه سجن الاحداث
ام زينه: وليش ولج يمه كلبي حينفجر ولج احجي
زينه: ضربت عمتي سجين ببطنها
ام زينه: يبووو شنوو
زينه: وضربت طه بجتفه بس مشتكه عليه خطيه
مؤيد: سوه فضل خطيه مشكته عليه انتي ع يوم اخليج اتفلين سنون
زينه: موقصدي الله ياخذه هوه وامه بس هيه كلمه شمدريني متعلمه اكول خطيه
مؤيد: متعلمه بس ويايه تنسين
ام زينه: وتالي شنو هنا اذكرتو تتمالخون
هسه خل افتهم وتمالخو
زينه: شتفتهمين انسجنت ومؤيد طلعني
ام زينه: عزه بعيني جنتي بسجن واخابرك تكولي بخير مؤيد
مؤيد: شكولج لعد اكولج رهمولها وحده من التهم الي عليج وانسجنت حته تجين وتلزمين
ام زينه: وطبني طوب الزم عساني بكبور عمت عيني يايمه عمت عيني ياحبيبه والله كلبي حاس بيج شي كم مره كتلك كلبي يوجعني مؤيد اوووف يمه
مؤيد: عدت عمه طلعت وهياتها كدامج عارفه بس تعاركني الي
زينه: اني
مؤيد: لا اني
ام زينه: راح اهج بس بس شبيكم
عمت عيني عليج بس ولج ليش ضربتي طه وضربتيها
زينه:هوه غير عرفت انها الها ايد بقتل ابني
وام زينه: وطه هم اجه لبيتج
مؤيد: لاهيه راحت لبيت عبير وهناك عرفت
ام زينه: رحتي لبيت عبير
مؤيد: اي راحت لان متحملت مؤيد كلها كعدي ابيتج وادزلج مصرفج والي تحتاجيه صعبه
بس موصعبه راحت من…… .. لبغداد وراحت لبيت عبير
ام زينه: رحتي لبيت عبير زينه ولج زوينه رحتي لبيتها
زينه: هسه ليش اتلطمين رحت وخلص
ام زينه: عزه لعزاج ولج شوداج يمصخمه بيت عبير
زينه: اووو يايمه رحت وهذا هوه
مؤيد: راحت وهذا هوه قابل شصار هيه بس انسجنت سنه وكم شهر بتهمه باطله وراد طه النذل
ام زينه: ليش سكتت شراد طه
مؤيد: اكوم اولي احسن
ام زينه: اكعد بمكانك ولكم جايين تموتوني انتو شراد طه ولج
زينه: مومهم شراد لمهم حطيت لمكص بنص ايده ومخليته يلمس شعره من راسي
ام زينه: يبووو يبووووو
زينه: احنه نحجي وهيه بينه تحجي وتلطم وتتلفت
مؤيد: اوووف ابن الكلب لوبس لازمه بس وين ايولي
زينه: انت كلت ابن كلب اخذ جزاته وانتهه
مؤيد: لا جزاته امدده ع قبله اووووف لوبس الكاه ماريد شي
ام زينه: يمه كلبي راح يوكف دخيلكم
زينه: ماماااا
… ..يتبع 😁