_هتفضل حابس نفسك كتير ف الأوضه ولا اي!
_إمشي ي حنان.. سبينى لوحدى
_بس انا مش هسيبك
_وانا قولت أمشى، كفايه وجع بقا
_كل حاجه بتتنسى مع مرور الوقت، يمكن انا اكتر واحده حاسه بتعبك، حاول بس تقنع قلبك وعقلك تنساها... أخرج وقابل ناس جديده.. زور أماكن تانيه غير الأماكن اللى كنت بتروحها معاها.. انزل شغلك تانى ليه بتضيع نفسك بالشكل ده!!
_(بصوت عالى) لانه انا اساسا ضايع من غيرها
اتوجعت اووى... مش فاهمه وجع قلبي ده عليه وع انى شيفاه بالحاله دى، ولا علشان شيفاه بيتعذب بسبب واحده تانيه، اللى هو المفروض كنت انا اللى اكون ف قلبه، محدش يتسحق حبه ده غيري انا وبس... ،مفيش حد ف الدنيا هيحبه قد الحب اللى ف قلبي ناحيته...
_(اتنهدت) اي رايك نروح السينما انهارده!
_مش قادر حرفيا، متتعبيش نفسك معايا
_بس انت تاعبنى بحالتك دى
_(أبتسم) انا تمام والله، يالا روحى علشان عندك كليه بدرى
_ماشي، لو احتاجت حاجه ناديلى هطلعلك م البلكونه
_حاضر
انا وفرحات جيران، معرفتش معنى الحب غير بيه، انا جيت الدنيا دى مشوفتش راجل غيره، هو مش بس جارى، هو صاحبى وابويا وكل حاجه ف دنيتى ماعدا انه يكون حبيبي...
_جارى ي جارى ي حته سكره
_انتى جيتى؟
_لا لسه مجتش
_عملتى اي ف الميدتيرم؟
_كالعاده يعنى صييييييفر
_ي مشرفانى
_عامل اي دلوقتى؟
_بطلى بقا اسئله غبيه انا كويس وخلاص بطلنا اللى يعطلنا
_ايوه كده ي شبح السنين
_مالك ي حنان ي تنين!!
_يعنى هتبدأ تنزل الشغل؟
_أيوه
_فرحتنى جدا، انا متأكده انك هتنساها
_هى متستاهلش انه افتكرها ولو لثوانى، اللى مقدرتش تستنانى وتتحمل ظروفى يبقا متستاهلش انه افتكرها
_ربنا يطبطب على قلبك ويسعدك دايما
_انتى اجدع بنت انا شوفتها، وخلى بالك مش هجوزك لأى حد كده والسلام، جوزك انا اللى هختارهولك
_لا انا مش هتجوز
_ليه بقا هتعنسي جنبنا ولا اي؟!
_هتكون مبسوط اما اكون بعيده عنك وواحد يتحكم فيا واكيد هيمنعنى م انى اكلمك زى دلوقتى
_بس احنا زى ال
_زى الأخوات، تمام انا ماشيه ربنا معاك
"ما الذنب الذى ارتكبته لكى اعاقب بالوقوع ف حب رجل لا يشعر بي؟!!!"
كانت أول جمله اكتبها ف دفتر يومياتى، فكره انك مش قادر تتكلم وتصرخ، تعبر عن كل الحزن اللى ف قلبك، بضطر أخبيه ف شويه ورق، بدأت اكتب عن كل الوجع اللى حاسه بيه...
_انتى ازاى قادره تتحملى كل ده؟ ازاى قادره تقفى جنبه وتهونى عليه وانتى عارفه انه ف واحده تانيه!
_مش هتفهمى ي رضوى
_فهمينى ي ست حنان
_انا مقدرش اشوفه بيتعذب واقف اتفرج عليه م بعيد، مش مهم اتوجع مش مهم اتعب أهم حاجه انه يكون مبسوط ومرتاح، مش عاوزه حاجه تانيه
_انتى اتجننتى
_انا تعبت، انا كل يوم بموت وانا قريبه منه وهو بيكلمنى عنها، بموت لما بسمعه يقول اسمها، حاولت كتير ابعد وف كل مره بلاقينى واقفه قصاده، احلامى كلها اتبنت معاه، رغم انى عارفه انه مش ليا بس قلبي متعلق بيه استحاله اكون لغيره، ف كل مره بقرر فيها اصارحه بمشاعرى برجع تانى بخاف اخسره، ازاى مش قادر يحس برعشه ايدى لما بسلم عليه، ولا لهفه عيونى ف كل مره بشوف فيها عيونه، ازاى!!
_(أخدتنى ف حضنها) خلاص علشان خاطرى، هتنسيه صدقينى بس مينفعش تفضلى قريبه منه، انتى لازم ترتبطى بحد ووقتها اكيد هتنسيه
_استحاله، مينفعش أظلم حد معايا
_ طايب خلاص فكك م كل ده، اي رايك ف رحله اسكندريه الدفعه عملاها، تعالى نغير جو
_ياريت، بس هشوف البيت هيقولو اي، وفرحات
_يادى فرحات حتى الرحله هتاخدى رأيه فيها!!
_ما انتى عارفه لازم كل حاجه يعرفها
روحت البيت، أخدت الدفتر وبدأت اكتب كل حاجه نفسي اقولهاله، كل حاجه بتحصل معايا وبتمنى احكيهاله بدأت اكتبها، احساسي لما تكون عيونى شيفاه، شكله وهو متعصب، عروق ايده، شعره الاسود، قميصه الاسود...
_ازيك ي طنط، فرحات فين؟
_تعالى ي حنان، ده كل شويه بيسالنى البت دى اتاخرت كده ليه وبيرن عليكى موبايلك مقفول
_ايوه كان فصل شحن
_ااه لو بس تسمعوا كلامى، من وانتو صغيرين وانا بقول انتو هتكونو لبعض، مش عارفه اي حكايه الصحوبيه اللى طالعين فيها دى
اكتفيت بإنى ارسم بس الابتسامه ع وشى، عيونى اتملت بالدموع، اخدت نفس عميق، ودخلت لقيته بيرسم...
_بتعمل اي؟
_برسم، وبعدين استنى عندك
_ف اي!
قرب خطواته ليه، كان وقتها لابس القميص الاسود، عيونى طلعت قلوب واختفت الدموع مجرد بس اما بشوفه، كنت بضحك شبه الهبله..
_انتِ اي اللى أخرك كده؟ وفونك مقفول ليه؟
_هاااا
_هاا اي؟ بسألك كنتى فين؟
مشيت من قدامه، سحبت الكرسى وقعدت اشوفه راسم اي..
_انا هنا اهه، وبعدين استنى بقا اشوفك بترسم اي؟
_هنا اي وزفت اي بقولك اتاخرتى ليه؟ واستنى متشوفيش حاجه
_متاخرتش ولا حاجه، كل الحكايه انه الفون فصل شحن
_بعد كده تاخدى بالك وتشحنيه ع طول
_حاضر، اشوف بقا بترسم اي؟
_ (مسح بايده ع شعره كأنه اتوتر) امممم، بلاش
_ااه تمام، خاصه؟!
_لا مش كده انتى عارفه مفيش حاجه خاصه وهخبيها عنك
_واضح، ع العموم كنت جايه اقولك ع حاجه
_ف اى؟
_طالعه رحله اسكندريه بعد يومين، كنت جايه اعرفك يعنى لتقول معرفتكش او حاجه
_طالعه؟!!! يعنى مقرره
_أيوه
_تمام وجايه تاخدى رأيي ف اي مادام انتى مقرره!!
_ما هو ي.. يعنى علشان تكون عارف
_مش عاوز اعرف
_يعنى انا مش مهمه عندك، مش مهم تعرف انا فين ومع مين؟
_لأ
مشيت وانا بعيط، ده الصح ي حنان، ده الصح والمفروض يحصل، مينفعش تتعلقى اكتر من كده، مينفعش تشاركيه كل حاجه، ف الوقت اللى انتِ داخله تقوليله عن رحلتك هو مشغول بيرسم انسانه تانيه، مشغول ف تفاصيلها وانتى بتضحكى زى الهبله علشان لابس القميص الاسود ي متخلفه...
_مش طالعه ي ستى
_حنان انتى متخلفه بعد ما حجزنا تقولى مش طالعه وعلشان اي يعنى علشان اتخانقتو!
_مكلمنيش من وقتها ي رضوى
_ي ستى احسن، متلغيش شخصيتك كده، حكمى عقلك وألغى قلبك ده نهائى
_عندك حق، انا هروح وبعدين هو اللى غلطان، ازاى مكلمنيش، علشان انا مش مهمه عنده اصلا
_أصلا
_أصلا اي يعنى انا مش مهمه عنده!
_مهمه ي حبيبتى، انتى ست البنات اصلا
_أصلا، لا انا مش مهمه ولا شاغله باله اساسا
وقفت ف البلكونه اراقبه من بعيد، لقيته لسه بيرسم، كنت عاوزه امسك الطوبه وارميها ف وشه تجيب أجله،لا بعد الشر عليه، خلاص قررت انه هروح الرحله ومش هعبره...
_حنان مشت؟
_ايوه م الفجر
_قالتلك هتيجى امتى؟
_بكره بليل
_وانتِ ازاى تخليها تروح ي طنط
_قول بقا انتو متخانقين بسبب كده، وبعدين امتحاناتها قربت خليها تغير جو
_انا داخل اخد كتاب من اوضتها
_ربنا يهديكم
كنت مبسوطه بس مش اوى، البحر والسما وكل حاجه بتفكرنى بيه، كل ما بروح مكان جديد كنت اتمنى يكون معايا فيه، قعدت ع البحر وغمضت عيونى..
"أشعر بأنفاسك ترتطم بوجهى، صوتك وهو يخبرنى بأنك تحبنى، لا أعلم هل كل ذلك حقيقه أم هو اللاشعور يسيطر على عقلى، أعيش دائما ف مخيلتى، أرسم حياه بينى وبينك ف الخيال، فهل عساى أن أبدلها لحقيقه!"
_آنسه حنان
_نعم ي دكتور
_مش عارف اقولك اي بصراحه بس
_بس اي؟
_ممكن رقم والدك لو تسمحى يعنى اجيب أهلى ونتعرف عليكم
_ايييه؟!!
_قولت حاجه غلط!
_لا أبداً
فجأه ولقيت رضوى اتدخلت، واديته رقم بابا، كنت مصدومه واول حاجه بتيجى ع بالى هو، هو اللى مسيطر ع كل تفكيري...
رجعت بيتنا، ولا مره رن يطمن عليا، يسالنى هتيجى ازاى؟ ومين معاكى؟.... ، بس ده عنيد واهم حاجه كرامته إنما أنا أولع عادى ...
دخلت اوضتى، وحشنى أووى، وحشنى اكلمه، واحكيله كل حاجه حصلت معايا، وعن كل مكان زورته وتخيلته معايا فيه، وطبعا مش هقدر احكيله عن كل ده، ف الحاجه الوحيده اللى هلجألها هو دفتر يومياتى...
قربت ع مكتبى، لقيت رسمه، انصدمت حرفيا، كنت شبه الطفله اللى بتتنطط من فرحتها بلعبتها الجديده، اللى فرحنى اكتر انه راسمنى انا، يعنى كان بيرسمنى انا مش هى الغلسه دى..
_ماما
_اي ي حنان
_كان ف دفتر ع المكتب انا كنت سيباه قبل ما اروح الرحله هو فين؟
_معرفش ي بنتى انا ملعبتش ف حاجه
_اومال راح فين يعنى ده مهم جدا
_اااه، يمكن فرحات اخده، كان بيقول انه جاى ياخد كتاب من عندك
_اييييييييييييه!!!
_ف اي ؟
_لا مش معقول!
_هو اي اللى مش معقول
_مفيش ي ماما، هو فرحات اخده من امتى؟
_م الصبح
_ي نهاااااااااااارى يعنى من ٦ ساعات
_ما تفهمينى ف اي؟
_مفيش، أنا هدخل انام لو حد جه انا مش هنا خالص
ي نهار مش فايت اعمل اي دلوقتى، احدف نفسي م البلكونه واموت كافره ابقي خسرت دنيا وآخره كده لا مش هينفع، اكيد قرأ كل حاجه، دقات قلبي اول ما بشوفه، سرحانى ف كل تفاصيله وملامحه، قميصه الاسود اللى بحبه، كل كلمه اكيد قرأها، اكيد دلوقتى مش عارف هيواجهنى ازاى، هيتعامل معايا عادى ولا هيبعد...
عقلى مبطلش تفكير نهائى، فضلت عايشه ف رعب خايفه ييجى ويقولى انه مينفعش نفضل كده علشان متعلقش بيه وهو ده اللى لازم يحصل من زمان،اعيط.. هعيط مفيش حل قدامى...
_الحقييينى ي رضوى
_ف اي ي يخربيتك
بدأت احكيلها عن كل اللى حصل، والرعب اللى عايشه فيه ومش عارفه اعمل اي...
_والله ده اللى لازم يحصل من زمان علشان انا زهقت م الموضوع ده
_بس انا مرعوبه
_بصى ي حنان مينفعش تفضلى متعلقه كده ف النص، لازم تشوفى حياتك، بعدين المعيد ده بيقول انه هيكلم باباكى وهياخد منه ميعاد وانا شايفه انه كويس جدا واكيد باباكى مش هيعترض عليه ابدا
_بس انا مقدرش اتجوز غير فرحات، انا حتى كتبت كده ف الدفتر اكيد هيقرأه
_وممكن يكون مقرأوش لسه
_اتتى متخلفه بقولك مش لاقياه وهو اللى دخل الأوضه علشان يسيبلى الرسمه ف اكيد شاف الدفتر وفتحه
_بت بقولك اي اقفلى انا عاوزه انام جايين م الرحله مهدودين ودى لسه بتفكر ف فرحات!!
_ما انتى بيست تفاح اساسا انا مش عارفه انام ودى مرتاحه عادى
_غووووووووورى
قفلت معاها المكالمه، وفجأه لقيته بيرن، قلبي وقع ف الارض حرفيا وايدى بتترعش مقدرتش ارد عليه، اقفل الموبايل نهائى ولا اعمله بلوك! ، فضلت امشي ف الأوضه رايحه جايه افكر ارد ولا لا، حياتى بتنتهى، خلاص انا خسرته وراح من ايدى..
فتحت الخط بس مقدرتش انطق بحرف...
_انتى ي زفته، كنتِ مشغوله بتكلمى مين؟
_انا مش زفته، وبعدين اكلم اللى اكلمه
_حنان تتعدلى احسن ما اجى اعدلك
_هتعمل اي يعنى؟
_هلبس القميص الاسود
قفلت التليفون، قفلته خالص ع اساس انه ده الحل الوحيد اللى اقدر اهرب منه، قرأ الدفتر خلاص وعرف كل حاجه وانا شكلى بقا زفت قدامه، فجأه ولقيت الطوب اللى بيتحدف م البلكونه.... طلعت ولقيته واقف قصادى...
_قفلتى ليه؟
_الفون فصل وهنام علشان تعبانه
_مكملتش كلامى لسه علشان تقفلى التليفون، افتحيه بدل ما اجى افتح دماغك ده
كنت بكلمه وانا وشى ف الارض، لأول مره اتكسف بالشكل ده وحاسه انى عملت مصيبه، ما انا فعلا عملت مصيبه...
_ساكته ليه، لسانك الطويل راح فين؟ولا شاطره بس تروحى رحلات من غير ما تستأذنى
_ما انا قولتلك
_آآآآآآه عرفتينى بعد ما قررتى صح!
عيطت مش فاهمه ليه، بس انا كنت خايفه جداا، خايفه م انى اخسره وخصوصا انه مفتحش موضوع الدفتر نهائى وف نفس الوقت صعب اطلب منه الدفتر...
_تصبح ع خير انا داخله انام
_استنى..... متزعليش منى بس انا كنت بعمل كل ده علشانك، عودتينى انك تستأذنى منى ف كل حاجه، ف متجيش تعاتبينى وتزعلى!
_ماشى
_قوليلى بقا عملتى اي ف الرحله؟
_كانت ناقصه وجودك
_وايه تانى؟
_بس
_ف اي؟ ف حاجه مزعلاكى
اي المتخلف ده، هو مش حاسس انه اخد كل ذكرياتى واسرارى كلها بقت بين ايديه، ازاى قادر يتعامل طبيعى كده ولا كأن شيئ حصل،بس لا مش هفضل أعذب ف نفسي كتير....
_لا مش زعلانه خالص، ده انا حتى المعيد بتاعى طلب ايدى والمفروض جاى يتقدم يعنى انا مبسوطه ومبسوطه اوى كمان
_(ضحك بصوت عالى) طايب ادخلى نامى
مشيت وانا موجوعه جدا، هو ميستاهلش انه ازعل عليه لو لثانيه، ف وقت انا المفروض كنت بهون عليه فراقها، محتجاله يهون عليا الوجع اللى بيسببهولى..
كنت محتاجه اكتب واشتكيله منه ومن كل حاجه تعبانى، وقتها بس قررت انه أوافق ع العريس، كنت بحاول اضايقه واعرفه انه انا مش ليه او بالاصح اعرف قلبي وعقلى انه صعب نكون سوا..
_انا موافقه ع فكره وقولتله ييجى بكره
_بجد ي حنان قولتلك ي بنتى ده الحل الوحيد واكيد هتنسيه، انتى عارفه فرحات ده علشان هو ع طول قصادك اتولدتى لقيتى بن الجيران، كويس وراجل وبتشاركيه كل حاجه.. إنما أما تبعدى هتنسى وهتحبيه صدقينى
كلم بابا وجهزت وانا عيونى كلها دموع، كنت بتمنى قلبي بيبقا مخضوض م الفرحه مش م الحزن زى ما انا حاسه دلوقتى،فستانى ورعشه ايدى وخوفى وانا داخله اقعد معاه، كنت بتمناها معاه هو مش مع حد تانى....
"كنت ألتقط انفاسى خَمس وعشرون مره عندما أشعر بوجودك، أنظر لفستانى وحجابى ي تُرى سوف أجذب انتباهك؟! ولكن دقات قلبي تُسرع بالبوح عما أردت قوله.. ولكنك لم تهتم!!"
_مبسوط جدااا انك وافقتى ع فكره، اوعدك انى هسعدك وهحافط عليكى
_......
_ف حاجه؟!
_لا ابدا
ف نفس الوقت اللى انا فيه حزينه ومش لاقيه كلام اقولهوله من كم الحزن اللى مسيطر ع قلبي، كان الباب بيخبط، كنت حاسه انه هو، تقريبا سمع انه انا قاعده مع حد غيره ف جاى يباركلكى ويقف معايا ف يوم زى ده، بس انا قررت انه اقطع علاقتى بيه لابد....
" كُلما سمعت مصدر صوت ألتفت إليه، فهو المقصود دائما"
_حنان فين ي طنط
_تعالى جوه
_استنى متقفليش الباب بابا وماما جايين ورايا
_ليه؟
_اممممم... جاى أخد نصى التانى اللى هنا بس انا عاملها مفاجأه واكيد انتى لو عرفتى هتفضحينا م الصبح
_انا مش فاهمه حاجه؟
_مش مهم انا عرفت بنتك طالعه لمين الوقتى
سمعت صوته بره، قلبي اتنفض، كنت بحاول اسيطر ع كل جزء ف جسمى انه يفضل ثابت، حاولت ارسم الابتسامه ع وشى واضحك بصوت عالى وانا بكلم العريس، مش عاوزه أبان ضعيفه قدامه، لقيته داخل والابتسامه مرسومه ع ملامحه ومعاه بوكس كبير....
_انتَ مين؟ وقاعد معاها هنا بتعمل اي يالا!
_انتَ اللى مين وازاى تدخل كده؟ مين ده ي حنان؟
وقفت وانا عيونى ف عيون فرحات، معرفتش القوه دى جبتها منين...
_ده محمد المعيد اللى قولتلك عليه
_ايييه؟ كنتِ بتتكلمى بجد؟
_ايوه
_وانتِ وافقتِ؟
_طبعا
سابنى ومشي، بس ملامحه كانت حزينه جداا وباين عليه الصدمه، بس ده اكيد علشان معرفتوش كل حاجه قبلها، علشان انا غبيه لازم كنت اقوله كل حاجه، مزعلش علشان انا هسيبه وابعد عنه...
مقدرتش أنام من غير ما اكلمه او أخد رأيه كالعاده، كنت بفكر اروح واطلب الدفتر وأنهى علاقتى بيه، أو كنت واخده الدفتر ده بحجه انى اشوفه واكلمه حتى لو كانت المره الاخيره....
_ممكن ادخل؟
_لأ
_(دخلت) بس انا عاوزه اتكلم معاك
_وانا مش عاوز اكلمك
_حتى لو كانت المره الاخيره؟
قرب ليا وبص لعيونى، متكلمناش كانت عيونا بتحكى كل حاجه، حسيت انه بيحبنى او يمكن قلبي بيحب يحس الحاجه اللى بيتمناها...
_بتعمل كده ليه؟
_اللى هو اي!
_بتبعد
_وانتِ بتبعدى
_انتَ سبب البُعد
_بتحبيه؟
_لسه
_بس عندك القدره انك تحبيه
_ممكن ليه لأ
_ربنا يوفقك
_وانتَ كمان، قراءه فاتحتى الاسبوع الجاى لازم تكون موجود
_ طبعا
_هتوحشنى
قرب خطواته وعيونه مليانه دموع، كان هيحاول يحضنى بس بعد، وافتكر انه حرام مينفعش، ضغط ع ايده...
_حتى حضن الفراق متحرم علينا، احنا ليه مكناش اخوات؟
_هو احنا مش اخوات او زى الأخوات!
_احنا صحاب
_سلام ي صاحبي
"أشعر كأن روحى تختنق، يخرج نفسي وكأنه النفس الاخير، فهو كالأكسجين الذى يسكن رئتاى فهو الآن يخرج ولم يعد مجدداً وتنتهى معه حياتى.."
_ها قوليلى بقا هتلبسي اي؟
_مش عارفه
_اممممم الفستان ده هيكون تحفه عليكى
_لا عاوزه الفستان الاسود فرحات بيحب اللون ده
_حنان مينفعش، لازم تمحى فرحات ده نهائي مادام انتى قررتى تكملى حياتك مع شخص تانى مينفعش تفكرى فيه
_مش قادره ي رضوى، حاسه انى بموت، روحى بتنسحب منى، مش حاسه انه هقدر احب واتعامل مع حد غيره
_هتقدرى صدقينى، اللى يخليكى تقررى البعد هتبعدى وانا جنبك مش هسيبك ابدا
لبست الفستان الاسود، وطلعت قعدت جنبه، مكنتش عاوزه اكمل، صوت جوايا بيقولى ارفضى مش هتقدرى، انتى مش مستعده انك تدخلى تجربه وانتى هلكانه بالشكل ده مش ده الحل، كنت بفكر كتير اوى لغايه ما سمعت صوتهم بيقول يالا نقرأ الفاتحه...
_بسم الله الرحمن الرحيم
_استنوووو انتو بتعملو اي!
سمعت صوته وكأن قلبي بيضحك، كنت حاسه انى غريقه ولقيت طوق النجاه اللى اتعلق بيه ويرجعنى للحياه تانى...
_(وقف محمد قصاده ورد عليه) بنقرأ فاتحنا
مسك فرحات ايدى وكلهم قاعدين، مخضوضين م اللى بيحصل
_ فاتحه مين يالا؟!! فاتحنا اتقرأت من واحنا ف اللفه
_ف اي، مينفعش اللى بتعمله ده
_تعالى معايا، عن اذنك ي عمى
سحبنى من ايدى، كنت بحاول اسحبها من ايده بس قلبي كان متعلق بيه لدرجه انى بسحبها مش بقوه يعنى علشان ميصدقش ويسيبها فعلا.... لغايه ما دخلنا أوضته ..
_اي اللى انت عملته ده؟
_عملت اللى المفروض يتعمل.. انتِ عبيطه مفكرانى هسيبك لحد غيرى
_ايييه؟
_خدى افتحيه
_ده اي؟
_شايفه اي يعنى
_بوكس، هديه!!
_افتحى وشوفيه
بدأت افتحه وقرب ليا كنت بحاول اعرف اي جوه البوكس لكن وقفنى صوته بيهمس لى وبيقولى....
_أعشق نبره صوته وهو ينادينى بأسمى، اعشقها لدرجه أننى اتحدث مع نفسي بطريقته حتى أشعر بوجوده بجانبي، رعشه يداى وهى تلامس يديه، رغم قسوته إلا أنه أحن رجل رأته عيناى ف أنا لم أرى سواه، لم اريد سواه، فهو روحى فكيف للأنسان ان يحيا بلا روح؟!!
قلبي وقف، وهو بيقرأ كل حاجه كتبتها، حسيت بخوف وكسوف انا عمرى ما كنت مكسوفه بالشكل ده، كأنه أخد جبل م التلج واتحشرت فيه، فتحت البوكس ولقيت الدفتر بتاعى، وكان ف دفتر تانى و رسومات كتير ليا، ايدي بتترعش، تقريبا حس برعشه ايدى و مسكها....
_كيف للانسان ان يحيا بلا روحه؟! ليه ي حنان!
_ليه اي ؟
_ليه معرفتيش! بعد السنين دى كلها ازاى كنتِ متحمله!
_كنت خايفه اخسرك
_يمكن وقتها كنت اكسبك
_................
_انا كنت مغفل وأعمى عن كل نظره ف عيونك
_كنت غبي، تعبتنى كتير اووى
_انا اسف
_ أسفك مش مقبول لازم أعذبك شويه
_ع اساس انك متعبتنيش من اول مره وقفتى جنبي لغايه ما وقفت ع رجلى وبدأت أنساها، حسيت انه انت الوحيده اللى تنفعيلى يمكن وقتها مكنتش متأكد وكنت خايف اخسرك، لغايه ما وقع ف ايدى الدفتر
*فلاش باك
_تمام انا هدخل اخد كتاب م الأوضه
_ماشي يابنى ربنا يهديكم
____________________________________________
_وقتها دخلت علشان اسيبلك صورتك بعد ما رسمتها، كنت ناوى افرحك بعد ما زعلتك قبل ما تروحى الرحله، لغايه ما عينى وقعت ع دفترك، اخدته وقرات اول سطرين....
"تعبت ف كل مره بيحكيلى عنها، روحى بتروح ف كل مره يقفل معايا ويقولى كنت بكلمها، مش عارفه هفضل لامتى بالوجع ده كله ف قلبي، ياريتنى ما عرفته، ياريتنى اتولدت اخته بجد زى ما هو بيقول..."
_قلبى ع قد ما كان موجوع ع كل حرف انتى بتكتبيه ع قد ما كنت طاير فرحه بكل الحب اللى ف قلبك
_ ده اي؟
_ده دفترى انا، فيه كل الإجابات عن كل الاسئله اللى بتسأليها لنفسك، عاوزك تكمليه بذكريات كلها حلوه، ذكريات تنسيكى الوجع اللى عشتيه
_(ابتسمت) حاضر
_بحبك
كنت أود أن أبكى بين ضلعيه، ولكنى بكيت ويدى بين أحضان كفوف يديه، لأول مره أبكى فرحاً وليس وجعاً هذه المره، أدركت حقا ان بعد تلك المعاناه تأتى السعاده، فهو سعادتى وموطنى التى طالما أردت أن اسكنه ..
_أحببتك منذ السطر الأول💙
#حنان_محمد