بلاعنوان

البارت الاول

#بلاعنوان

البارت الاول

ل ورد العامري

من منا اختار اسمه

اونسبه

من منا اختار امه

او اباه

من منا اختار عائلته كنيته

من منا اختار

قدره… ..

دائما نسمع كلمه هيه حظ ونصيب

بس الاقوه من الحظ والنصيب

القدر……..

من ننخلق من ننولد اتكون اقدارنه مكتوبه ويانه

ومثل ميكولون المكتوب ع جبين

لازم تشوفه العين

بس ياترى ممكن لانسان التخلص

من امور مفروضه عليه

مقرره مختومه ملتصقه بيه

واذا هوه كدر يتخلص ياترى المحيطين

حواليه راح يتخلصون

حياتنه عباره عن سلاسل مترابطه

صعب الفصل بينها

واذا فصلت طرف راح تلكه نفسك متعلك بطرف الثاني

وكلا الطرفين نار

ف باي نار احترق

قصتنه اليوم بلاعنوان

بلاتسميه

بلااضافات

ولارتوش

قصه حقيقيه 100%اسطرها لكم كما
اتت لي

بطله القصه متابعه

واقترحت عليها كثير تسميات

لكن رفضت وحبت القارئ يحدد اسم قصتها

او يطلق ع حياتها تسميه

مثل مكلت قصتنه حقيقيه اسماء الابطال الي حتنذكر هيه اسماء مستعاره

ماعدى اسم البطله هوه حقيقي

الالقاب تذكر برموز والمناطق ايضا برموز للخصوصيه

اعتذر مقدما اذا انذكر اي شي بالقصه رغم التحفظ لكن ممكن تذكر بعض التفاصيل

متابعه ممتعه واتمنه ان القصه تنال اعجابكم

ورد العامري

صباح

صباح النور هااا رايحه للزياره

اي والله شعندج عيني كلتي غراض

-اي هاج هاي كم شغله اخذتله اخذيهن وياج وسلميلي عليه ع زياره لتجي اروحله

-ان شاءالله يوصل

-دروحي عيني روحي الله وياج

شارع وعالم تروح وتجي

واركب بسياره واباوع ع شارع من الجامه

اتهجه الكتابات الي عله لمحلات اوالقطع الي تدل ع اسماء لمناطق

سره نوكف بيه وكانه مهرجان عالم هواي زلم ونسوان واطفال

ساحه ندخلها ويطلع النه ابويه

اركضله مثل كل طفل

يدنج يبوسني ويمسد راسي

-هاعيني شلونك

-شلوني يعني ششوفين

-جبتلك غراض ويايه وهدوم وجكاير

-اهم شي كم فلس

-ياااا اي شسوي بيهن شو انته بسجن شلك بيهن

-ميخصج اطيهن احركهن اشمرهن اكيت بيهن انتي معليج

-ادري كل مااجيك اني مااخذ منك غير بس الاهانه

-بله حجي زايد تجيني متكلفه جايتني لوتفوتين يوم واحد وتنحبسين مثل حبستي جان شكلتي

-اي قابل اني الي سجنتك لومن ورايه انسجنت انسجنت من. سوالفك و دروبك  الي  تمشي بيها

-اهووووو تعاي بابا زينه

لج كبرانه هههههه صايره حلوه

-صرت صف ثاني اني

-هههههه زين زين

ديربالج ع بتج

-شعدي غيرها بس

-بس شنو

-بس لو اختك تعوفن..

-اختي تاج راسج لاتجيبين طاريها موكافي مكعدتج ابيتها

-ممكعدتني ابلاش وانت تعرف كلش زين مكعدتني بثمن لحمي

-سدي حلكج والله وصاير الج السان بت حميد الاعمى

-هسه حميد يمك حواليك. راح الرجال مات وخلص

-بعد لاتجين واذا معاجبج الوضع روحي لهلج ههههههه

كالعاده تسكت امي وره متجر حسره ودموع تصير بعيونها

خلصت الزياره وطلعنه مشينه مسافه ودموع امي تنزل ولازمه ايدي حيل وتجر بيه

اني زينه او زوزو  مثل ما يكولون

م 77
فتحت عيني ع دنيه مشاكل بين ابويه وامي

وكل يوم ضرب وصياح من لليل للصبح

ابويه عنده اخت وحده اكبر منه وهيه الي مربيته لان

ام ابويه متوفيه وهوه طفل عمره 8سنين

وعمتي جان عمرها 13سنه

جدي ابو ابويه اتزوج وعاشو ابويه وعمتي

عد زوجه ابوهم

بس ماعدهم اخوان منها

زوج عمتي يصير ابن خال مرت جدي ابو ابويه

من وعيت لدنيه كان جدي ميت ماشفته ولااعرفه بس زوجته موجوده

وعايشه ابيت عمتي ويانه احنه هم عايشين ابيت عمتي

جنه عايشين بمشتمل صغير بس شلنه واخذنه غيره وهم شلنه

جانو اهل البيوت. الي احنه مأجرين عدهم ايشيلونه

وين منكعد منطول فتره قصيره ونشيل  ماعرف شيصير بس ابويه يخاف ويشيل

بعد ما واحد من اصدقائه ايبلغه يايبلغ عمتي وسن

وتجي تكولنه ونلم غراضنه ونشيل

قبل ماينسجن ابويه كعدنه ابيت عمتي وسن  جان بيتها جبير وملك الها

كعدنه يمها وره فتره انسجن ابويه

ليش انسجن مادري كل الي اعرفه لازميه هوه واصدقائه

ابيت ناس وعمتي حاولت اطلعه مكدرت

جنت اسمع يكولولها البيت الي طافرين عليه

بيت واحد من الجماعه منكدر ندخل

وسن: يعني مابيها منا منا صارله 5شهور مذبوب بسجن

-والله مالها كل حل كتلج ع بيت منو طافرين بيت واحد من خواله هذا وطافرين عليه

وفوك هذا ضاربين ابن خاله

وسن: اي قابل مات شبيك ياعيني ددبرها

-اكولها ابن خاله وبيته شبيج مخبله انتي

هنه كم سنه يكضيهن ويطلع 

ام زينه: شنزلج صعدي فوك

زينه: اريد مي وجوعانه

ام زينه :صعدي اني اجيبلج

زينه: جان كاعد رجال وعمتي تحجي وياه ع موضوع ابويه

اول مرجعنه من الزياره مال ابويه نمت وكعدت جوعانه نزلت وشفتهم بس امي صيحت عليه وصعدتني

ام زينه: هاج كعدي اكلي بعد لاتنزلين ابد

زينه: اوووف كل يوم هسه مودنيه ليل حته هم تخليني بالغرفه هسه ..

ام زينه: زينه لااشلعين كلبي متنزلين اني شويه واصعد يمج لاتنزلين ماما سمعي كلام

زينه: نزلت امي واني اكلت وجبت جنطتي اشخبط بكيفي واكلب بالاوراق

اخاف انزل فات وقت وصعدت امي

ام زينه: ليش هيج مطشره غراضج تعاي جيبي كتبج تعاي ادرسج تعاي

زينه: ماما

ام زينه: ها

زينه: اريد انزل ضجت وحدي اريد انزل جوه

ام زينه: زينه نزله جوه ماالج كعدي وسكتي بمكانج

زينه: اوف اوف اريد اطلع العب ويه لجهال بشارع

ام زينه: ويامن تلعبين كل مره اطلعين وطبيت تبجين محد يلعب وياج

زينه: لالا يلعبون ويايه بس هاي امهم تجي تصيحهم وتعيط عليهم ويطبون جوه ميطلعون بعد

ام زينه: اي بعد لااطلعين

زينه: ماما حبابه خل انزل ليوم للعرس

ام زينه: زينه لاتشلعين كلبي لاتنزلين وعدج دروس ودوام كملي حته اعشيج من وكت وتنامين

زينه: ليش سمر تنزل لعد يمكم واني لا

ام زينه :وانتي شعليج بسمر سمر جبيره وامها تخليها تنزل شعليج انتي

زينه: موجبيره هواي هيه شويه جبيره

ام زينه: لج يمه سمر 15سنه عمرها جبيره معليج بيها ولاتحجين وياها ولاتندكين بيها ابد

زينه :يعني هسه اني عمري 8 وحصير 9يعني هيه اكبر مني 12345

هيه اكبر مني ب6سنين

ام زينه:ب7سنين

زينه: زين من اصير بكدها انزل يمكم

ام زينه: لالا لاتفكرين بهل شي ولاتحطين ابالج هل درب هاي عيونج سديهن اعميهن عن الي تشوفيه بهل بيت

زينه: ليش اضربني اني شمسويه

ام زينه: اوووووووف لج يمه لاتراددين ولاتعاندين لاتباوعين لا ع سمر ولاعليه ولاعله احد من هل بيت

ااااااااااااااخ يمه

زينه: امي كل ماكولها انزل للعرس متخليني وتضربني من الح وياها وتكعد تبجي

مااريد ماانزل لاتبجين اتوبه بعد مااسويها

ام زينه: يروح امج عمت عيني عليج يايمه

بس لاحوبه امي وابويه اضوكها بيج ييمه

اووووووف ييمه افيش يريحتج منو ايوصلني يمها

زينه: ماما لاتبجين همه جدو وبيبي مو بالسمه صعدو لاتبجين السمه حلوه وبيضه وجبيره

ام زينه: ااااااااااااه جيبي دفترج يمه جيبي

زينه: كعدت امي ادرسني وتكتبني ومثل كل يوم تعشيني وتكولي نامي وتضل يمي لحد ماانام

بس اني ماريد انام وهيه من ماانام تقفل عليه باب لغرفه

سويت روحي نايمه كل مره اسوي روحي نايم بس اشوفها تبدل واكمز اريد اروح وياها وهيه متقبل

بس هيه شكد حلوه تطلع كلش حلوه

ومن اسئلها ع لبسها تكولي رايحه للعرس بس متخليني انزل وياها تكول ميقبلون جهال

احنه مرات كل يوم عرس ابيت عمتي يسون ومرات لا مره بالاسبوع ومرات لا يسون بين يوم ويوم

بس حته لعروس مااشوفها بس شفت سمر ذاك اليوم جانت كلش حلوه طالعه

بس ملابسه هاي لبدله مال الاميرات البيضه مال العروس

بس هوه عرس ليش مااشوف العروس اني

امي تكول راحت لبيتهم زين ليش مانتضرت مثل سمر سمر موصارت عروس بس بعدها ابيتنه

مثلت اني نايمه

وكامت امي لبست ثوب حلو يلمع جان لونه احمر وبي نقط سود تلمع
مثل لخرزه ناعمه وطويله شويه بكل لثوب

فتحت شعرها ومشطته وحطت ع وجهه الوان شكد حلوه جانت اضمهن بالكنتور حته ماالعب بيهن

لان مره حطيت منهن وكتلتني وشالتهن

كلشي ماتقبل حته ماتقبل البس ثوبها ولاتقبل العب بغراضها

وكل مره تضربني وتبجي وتصيح محلوات لاتلبسيهن لاتلعبين

بس والله هنه حلوات واني احبهن

كل شويه اريد اكوم ومسيطره ع روحي

شكد حلوه طلعت امي رجعت غراضها وجتي عليه يمه

غمضت عيوني وكتمت نفسي حته مارمشت غطتني وباستني وطفت لضوه ونزلت

ايييييي صدكت اني نايمه هيييييي

بس ماكو صوت عرس بعدهم

ضليت كاعده انتضر بديت اغفي ونمت

كعدت الصبح ضايجه نمت واني مشايفه لعرس

كعدتني عمتي

وين ماما

ام سمر: هسه تجي كومي يمعوده خبصتني بمدرستج كومي لبسي يله حته ترحين

زينه: شوكت تجي

ام سمر: فدشويه

زينه: وين راحت

ام سمر: اووووو راحت تجيب شغله وترجع يله بدلي بله حجي كوه فاتحه عيوني

خبصتني مدرستها شتصيرين  عشتو

زينه: اصير دكتوره

ام سمر: ههههههههه دكتوره بت يونس وفاتن

لبسي عمه لبسي حقج مو الاب مهندس والام دكتوره اسم الله ههههه

زينه: لاعمه اصير مثلج انتي مودكتوره اصير مثلج اني

ام سمر: ههههه شلون مثلي ولج دكتوره طلعت ومادري بروحي

زينه: ااااي عمه شبيج انتي مودكتوره وعالجتي هاي لبنيه الي جتي ذيج لمره تذكرين

ام سمر :طيرتي النومه من عيني يبت فتينه ولج يابنيه

زينه: اووو عمه هاي لبنيه الي جتنه وجانت تبجي شبيج جابها هذا عمو ومره جبيره وياها

هاي الي طبت للمستشفى مالتج الي بالحديقه وبعدين طلعت

وانتي كلتيلي مريضه وضربتيها ابره

ام سمر: هههههههههه ذكرتيني وشذكرج بيها اويلي صارلها سنه يمكن ياذاك اليوم ولج

دكومي كومي هوه تاليتج شنو لعد

كومي هاج جنطتج وروحي يله

زينه :بدلت واخذت جنطتي ورحت

جانت عدنه مستشفى بالبيت احنه بالحديقه الي وره لبيت حديقه صغيره اكو و غرفه بيها جربايه وغراض هواي هواي

مرات اشوف بنات يطلعن منها بس مودائما مرات اشوفهم بس ذيج لبنيه جان يوم جمعه وجتي لضهر امي جانت تسبح فمسمعت منها صعدي صعدي شفتها بس من طلعت امي بسرعه صاحت فوك صعدي تؤ

عمتي مسوتلي لفه هسه شنو اكل

ارجع واخذ

حيل شيرجعني حيدك لجرس يله  افوت للمدرسه

احسن لاتضربني ست بدريه بالعوده

اصطفينه ودخلنه للصف واول درس خلص والثاني واني جوعانه بعدنه بنص لدرس الثاني

السلام عليكم

وعليكم السلام ها ام زينه ليوم جايتنه من لصبح شعدج

-هههه اي والله حبيبه ردت اسئل ع مستواها

-لاتخافين زينه شاطره وحبابه

-رحم الله والديج الحمدلله بس عليج النبي اي شي تسوي عاقبيها اي لاتقبليلها فدوه عاقبيها اذا حجت لوضحكت لوشسوي غلط بنيتج فدوه حسبيها

-ان شاءالله ام زينه زينه كومي ماما شوفي امج

زينه: طلعت جرتني ع صفحه اطتني جيس بي لفه وبوستني

ام زينه: عمت عيني يمه كتلج لجوع هاج هاي لفه وجبتلج جكليت هم

-عوذه

ست انغام ليش طالبه طالعه من صفها

-امها رادتها ست بدريه

ام زينه: اني ردتها عيوني ست بدريه  فوتي يمه فوتي لصفج عذريني عيوني فدوه لعينج
مسلم عليكم عيوني

زينه: راحت امي واني واكفه بباب الصف

-والله حبابه

-بس سمع….   طبي شعدج واكفه هنا

زينه: طبيت وكعدت بصف شكد اكره ست بدريه

رجعت ست انغام تقرينه واني جوعانه

بس دك الجرس طلعت اللفه واكلتها

بس بعدني جوعانه متريكت اليوم

اكلت الجكليت جانت الجكليته قويه ويابسه كوه تنعلس واذا انعلست لزكت بالسنون متطلع بعد

بس حلينه ركضت للبيت جوعانه

اول مافتت كلت ل امي جوعانه

جانو بيت عمتي كلهم هستوهم كاعدين

طه: هاج هاي لبيضه مالتي اكليها

ام زينه: لالايمه اكل هذا الاكل حيستوي

طه: خل تاكلها خاله شبيج اكلي زينه اني مجوعان

زينه: باوعت ع امي كالت اكلي
بديت اكل جوعانه

ام زينه: ليش مداومت اليوم انت

طه: باجر خاله اداوم

ام زينه: وشوكت تنجح هاي ثاني سنه بسادس

طه: شمدريني هنه لمعلمات شادات ويايه

ام زينه: هنه شادات وياك لوانت متقره ولك هذا بعد ميكدرون اينجحوك مابيها بعد امك تروح عل مدير وتودي هدايا حته تنجح

طه: اني اصلا مااحب لمدرسه

ام زينه: ولك ادرس احسلك

طه: ماريد ماحبها

ام سمر: ياااا شبي هذا ليش تعيط

طه: مااعيط بس مااداوم بعد ماحب لمدرسه اني

ام سمر: يمه اسم الله حبيبي طبها مرض لمدرسه والي يردوها بس لاتعصب يمه كم طه عندي اني

ام زينه: ياااا شلون تشجعيه ميداوم خل يدرس

طه: مااريد والله انهزم من لمدرسه واسويلكم مشاكل هاااا

ام سمر: ههههههه باعي شلون يحجي

ام زينه: ولج غلط لاضحكيله ع غلط

ام سمر: اوي معليج بي انتي يمه شعندي اني هوه هل ولد بعد 3بنات

يمه بعد طولي طولك صاير رجال ويهدد بالمشاكل ههههههه

طه: بعد مااروح للمدرسه

ام سمر: ماتروح حبيبي بكيفك

زينه: عمتي عدها هديل وسديل وسمر وطه

هديل بيتهم قريب علينه مرات تجي هيه وبنتها صغيره بعدها ممسجليها مدرسه

ومرات تجي وحدها وتعوف بتها يم رجلها

ومرات يجي بس رجلها وبتها اسمها طيبه

وسديل ويانه عايشه بالبيت بس النهار كله نايمه ومرات تطلع ووين يله تجي

امي تكول تروح لكرايبهم بس منو كرايبهم مادري

وعمو زوج عمتي هم موجود ويانه بالبيت

هوه هذا بيت عمتي واحنه كاعدين يمهم

كملت اكل وغسلتلي امي وبدلتلي وتمددت نعسانه وهيه نزلت تسوي الغده

طه: زينه

زينه: هاا

طه: راح اكولها ل امي تخلي امج تبطلج من لمدرسه

زينه: لالا اني ماريد ابطل

طه: ليش تحبين لمدرسه انتي

زينه: اي اي احبه اني والعب ويه لجهال هم بالمدرسه

طه: ليش متلعبين ويايه لعد

زينه: امي متقبل

طه; لامعليج بيها تعاي نلعب اني وياج

ام زينه: شعدك طه هنا

طه: اريد العب ويه زينه

ام زينه: لازينه تنام لازم هسه حته تكعد ع دروس من تكعد اصيحك والعبو

طه: اني هم اريد انام

ام زينه: اي روح نام

طه: لااريد انام هنا

ام زينه: تعال افرش…

طه: لا انام يم زينه

ام زينه: لالا ميصير تعال

طه: ليش ميصير

ام زينه: عيب ابني ميصير لازم كل واحد ينام بفراشه

طه: ليش عيب ذاك اليوم مو شفتج بغرفه امي نايمه و.

ام زينه: طه امك تريدك روح روح

طه: بس امي مصاحتني

ام زينه: هيه كلتلي اتريدك روح روح

زينه: دفعته امي وطلع

ام زينه: بعد لاتحجين وياه ولاتوصليله

وين اروح ياربي

فهمتي ولج

زينه: اي اي

ام زينه: يكولي شفتج اويلي يابه هل بيت شيشوفون بي هل اطفال ذوله

لاونوب انام يم زينه ربي وين اولي وين اطي وجهي

نامي ولج نامي

حسبي الله ونعم الوكيل عليك يايونس

حسبي الله ونعم الوكيل عليك