اقتباسات

هديل قاسم

يعني ليش انا اكثر بنت منحوسة بالعالم!
ولا اشي زابط معي ، حتى العريس اللي تقدملي وعجبني، راح وما رجع!
عنجد حياتي مش طبيعية، نفسي من انا وصغيرة يزبط معي اشي، بتذكر من انا وبالمدرسة، أيام ما كانوا يوزعوا علينا شناتي ودفاتر، لما يوصلوا عندي يعطوني شنتة لونها بخزي وما يكون فيها دفتر 🙂!
بعرفش هيك من الله، الحياة مش ماشية معي، حتى لما صرت توجيهي، كنت بدي ادرس طب، بس سيدي اتوفى وكنت أحبه كثير،  وما عرفت ادرس وقضيتها عياط وجبت بال ٨٠ ودخلت صحافة مع اني ما بحبها😑
عمستوى الأعراس، لما اروح عليهم ، بكون كلي لهفة وشوق لأكل الجاتوه، بكون مقنصة على اللي بتوزع  من بعيد؛ واستنى  بتوصل للطاولة الي جنبي، والي قدامي؛ والكرسي الي جنبي وعلى حظي بتختفي!
وبخلص للعرس وانا مش ماكلة جاتوه!
ما خليت لا المقعد الامامي ولا اهل العريس ولا اهل العروس ولا بالنص ، حتى بتذكر بعرس قعدت جنب العروس فوق ! وما طلعلي جاتوه !
حكتلكم ما عندي حظ، كل شي معي بالدنيا بمشي بللعكس ، بكون عارفه قبل ما يصير انه فش اشي رح يزبط ...

لعند ما صار معي شغلة غيرتلي حياتي!
كنت يومها مروحة من الجامعة وشوب الدنيا ورمضان ومش شايفة شي قدامي وكان اخر فصل الي بعد ٥ سنين وانا احمل مواد واعيد من قلة حظي!
ركبت بالباص، وركبت جنبي ست كبيرة بالعمر، كنت حاسستها مهمومة، بس انا اللي فيي مكفيني مش رح اسألها شو مالها ، فجأة اجاها تلفون، اول ما سمعت الخبر حكت : يما وكلي امرك لربنا لعله خير...
كنت سامعة بنتها بتعيط وبتصرخ ....
حكتلها رح يتغير كل شي للأحسن صدقيني ....
وسكرت مع بنتها وصارت تستغفر ربنا، وتحكي هالبنت دائما متشائمة ...
فأنا هون طلعوا سنين البؤس بحياتي، حسيت اللحظة المثالية لأشكي همي ...
قلتلها اللي ما عنده حظ لا يتعب ولا يشقى شكلها بنتك مثلي منحوسة!
هون استغفرت المرى وحكتلي، انتي ليش بتركبي بالباص ..
حكتلها لأوصل للدار...
طيب عندك ثقة بالشوفير انه رح يوصلك الدار ...
قلتلها اه ... لانه عارف الطريق ...
سكتت شوي وقالتلي، لو تحسني الظن برب العالمين، رح توصلي للشي الي بدك يا، ما بتعرفي قوله" انا عند ظن عبد بي"
انا هون صفنت ، بعرف من زمان، بس ولا مرة فكرت فيها !
اجا تلفون من بنتها، حكتلها امها قلتلك احسني الظن بالله، شايفة كيف انحلت!
وسكرت التلفون، واطلعت فيي ونزلت ...
بس وصلت الدار ، فتت عغرفتي، صرت اتأمل اكثر  " انا عند ظن عبدي بي"
واقيسها عكثير شغلات بحياتي ...
مشروعي التخرج كان بدو وقت كثير ليخلص، حكيت لا اكيد رح اخلصه واجيب علامه منيحة، ودعيت ربنا، صرت اشتغل علي طول الوقت، وفعلا جبت A بالمشروع والكل انبسط، حياتي اللي كنت مفكرتها مش زابطة، صار عندي قوة داخلية رهيبة انه كل شي رح احسن الظن بالله واشتغل كثير علي ليزبط!
بعد ٥ سنين، حصلت على أفضل مقالة صحافية بالوطن العربي، سافرت على دبي يومها، وكرموني بحفل كبير، وانا هناك، قابلت زوجي احمد؛ اللي دعمني بكل خطوة بحياتي بعدها، صحيح في اوقات فشلت فيها،  بس كل مرة كنت احط هدف لأوصله❤ ... وان ما وصلتله حسن الظن بالله كان يخليني ارجع احاول كمان مرة!

لا تحكي ما عندي حظ.، احسن الظن بالله ورح يعطيك قوة رهيبة لتحارب مشان احلامك وحياتك، وبس تفهمها منيح كل شي رح يتغير❤

#هديل_قاسم

..............:
هو القدر اللي فرقنا💔
هاي الكلمة ما قدرت احكيها لما شفت الشب اللي كنت أحبه من سنين!
التقيت في صدفة، وكان قاعد بمطعم مع مرته وولاده، واانا كنت مع زوجي وولادي كمان، ما بعرف شو هالصدفة اللي صارت لنجتمع بعد هالسنين، كنت مفكرة اني نسيته؛ ومستحيل قلبي ينبض لإله مرة ثانية، حاولت اتجاهله، ما اطلع علي،لحتى ما تفضحني نظراتي، وهو كمان نفس الشي كان يحاول يطلع من تحت لتحت ....
بهاللقاء من بعيد تذكرت سنين قضيتهم بعمري وانا احبه ، كيف كنا شباب وقتها، وكانت الحياة عنا بسيطة ، بنحب بعض بجنون ورح ناخد بعض!
بتذكر مواقف كثير بيني وبينه كأنهم امبارح، كيف كان يخاف علي، يسندني، يحسسني اني بنت صغيرة، وكيف كانت ضحكتي تطلع من قلبي، صاحباتي لما كنت بعرفه كانوا يحكولي في لمعة بعيونك لما تشوفي، كان معبي حياتي علي، وما في داعي افكر بشي ثاني غيره!
كنا كثير محترمين بعض، وعلاقتنا حلوة ، كان الضي الوحيد الي بينا هو احساس الحب ، وبنحترم بعض كثير ...
مشينا عالطريق الصح من اولها، وحب يتقدملي، بس ابوي رفضه بدون اي سبب مقنع،  بس لإنه وضعه مش كثير منيح
ووقتها بلشت علاقتنا الحلوة تنهدم شوي شوي قدامنا بدون سبب ....
صارت حياتنا كلها مشاكل وعتاب، صرت بس ابعد شوي عنه يبعتلي اني استستلمت لكلام ابوي وبطلت بدي يا، وانا صرت احس انه ما بدو يكمل معي ....
كانت اصعب فترة بحياتي، ما اعرف انام بالليل، عايشة عالقهوة والبندول، مستلمني وجع راس  مش طبيعي ، وأشعر انه قلبي بششششد وبوجع ....
كنت مش قادرة افهم شو بصير ، وكل مرة ادعي بصلاتي يكون من نصيبي يبعد عني اكثر ...
ضلينا هيك سنتين!
بعدها بدون ولا كلمة انتهت قصتنا، بدون لا نودع بعض حتى، تقدملي شب منيح ووضعه منيح وعجب ابوي وانا استسلمت ووافقت، وهو كمان خطب بنت بنفس الفترة، ومن وقتها كل واحد فينا راح لحياته !

بتذكر اول خطبتي كنت كل ما اقعد مع خطيبي ابكي، اشوف وجهه، اتخيله انه هو معي، وخطيبي كان مش قادر يفهمني، وحتى لما تزوجنا، حسيت بغصة وانه كل هالحب انتهى ، بعرفش شو كان احساس الشب اللي حبيته وقتها ....
بس اليوم فجر كل المشاعر فيي، عييونه كانت بتلومني، وعيوني كانت بتلوموا ....
كان نفسي احكيله ليش انتهى هالحب بدون سبب، لما اجا بدو يروح مشى من عندي، دمعته كانت بعينه، حسيت وقتها بوجع كبير ...
وجع الحب اللي انتهى بسبب القدر! لا انا ولا هو كنا السبب، استأذنت من زوجي ودخلت الحمام أبكي...
مثل كأني بنت صغيرة ، كانت معي بنتي، مسكتني وحكتلي ماما شو في ....
حطيت ايدي عقلبها وقلتلها اوعك توجعي هالقلب بالحب !
بنتي صفنت، شو ماما؟ انا بحبك .....
وقتها حضنتها وحمدت الله على انه زوجي حدا متفهم كثير وعايشة معه ومش مقصر علي شي، صحيح في غصة حسيتها ، بس اكيد ربنا اختار الي ولإلو االأفضل...
يمكن لو ضلينا انا ويا مع بعض، ما كنا بهالسعادة اليوم 💔

أصعب شي الحب  اللي بينتهي بسبب الظروف، الحب اللي بكون طاهر وبريئ كثير، لا البنت غلطت ولا الشب غلط، هي غلطتهم االوحيدة حبو بعض بالوقت والمكان الغلط ..

حافظوا على قلوبكم

#هديل_قاسم
...............................

تزوجنا عن حب سنين بس
بسبب شغلي بدو يطلقني !
تزوجت من ٦ سنين ، كان زواجنا ببدايته حلو كثير ومتفاهمين على كثير شغلات ومن ضمنهم الشغل، قدمت لوظيفة ونقبلت فيها، لإنه بزهق بالبيت، بس زوجي كان وضعه منيح وانا بس بشتغل لحتى اشعر بالاستقلالية ....
بس كل شي اختلف بعد ما ولدت أول ولد، وقتها طلعت من الشغل واهتميت بابني لما صار عمره ٣ شهور رجعت على شغل ثاني ... ووقتها بلشت المعاناة !
حياتي صارت اصحى الصبح ارتب البيت وازبط اغراض ابني لاخدو عالحضانة، والبس واطلع اوصل ابني عالحضانة وبعدها اروح على شغلي، اضل هناك للساعة ٧ لأنه ضغط شغل، وارجع الاقي زوجي مروح قبلي وقاعد بستناني، وكل يوم نفس القصة يحكيلي
يا حبيبتي والله اشتقت اروح اشوفك بالبيت ، ابني والله متعود على مربية الحضانة اكثر منك!
وانا طبعا اجي بالصوت العالي واحكيله اه طبعا بدك تخليني اضل بالبيت خدامة ....
طبعا انا حياتي كانت عبارة عن جحيم، لإنه مش ملحقة على شي وبنفس الوقت حاسة اني مقصرة بابني، بس ما بدي اصفي ربة منزل وبس !
لما كبر ابني وصار عمره ٣ سنين، كان يومها عيد ميلاده، كان مفروض نعمله حفلة صغيرة، بس بسبب شغلي اللي تأخرت في ما قدرت اعمل شي، زوجي عصب علي وقلي مليون مرة قلتلك اتركي الشغل...
انا وقتها عندت وحكتله مستحيلللل، قلي اذا طالق !ما قدرت افهم انانيته وقتها، حسيت بغصة كبيرة، انه انا بحارب مشان اشتغل وادير بالي على ابني، وهو بكل انانية طلقني ....
رحت لعند دار اهلي، كانوا خواتي مجتمعين وبلشت كل وحدة فيهم تعبي راسي على زوجي...
وانا بلشت اقتنع انه ما ارجعله نهائي بعد الطلقة الاولى، بهالفترة عطلت عن شغلي كم يوم، حسيت بشي غريب
الراحة الي ما حسيت فيها من قبل ...
حتى ابني اول ما يصحى يكون مجهز حاله للحضانة، يشوفني نايمة جنبه يحضني ويرجع ينام!
بهالفترة كان يضل يسألني عن المربية، وانا كنت استغرب ليش هالقد.متعلق فيها ....
صرت احس اني بني ادمة طبيعية، بطلت حياتي كلها ركض بركض ، وصرت اهتم بابني اكثر ..
بس انا كنت معندة وما بدي ارجع عند زوجي لحتى ما يفكرني استستلمت ورح اقعدله بالبيت ...
صار يحاول يتفاهم معي ويحكيلي ارجعي على وظيفة حكومية بتروحي على بيتك عال٢ عالاقلية،  ويقنعني انه  هو اشتاق نعيش حياة طبيعية، بس كل اللي حوالي كانوا يحكولي لا تتنازلي ،  قعدنا ٣ شهور على هالحال، وهو كمان بهالفترة بطل يبعتلي، حسيت بمسؤولية كبيرة بين الشغل وابني ؛ لانه اتعلق فيي وصار لما اروح عالشغل يعيط لاني بتركه عند امه ، بعد ٣ شهور، اتصل وقلي عازمك عالعشا، وافقت، كان كتير منيح وعامل جو حلو، حكالي انا مش ضد تشتغلي بس بدي تعيشي حياتك لانه احنا مش بحاجة لفلوس، ابننا بحاجة لاهتمام بهالعمر، حكى معي بطريقة لطيفة كثير؛  وانا اصلا كنت مقتنعة بفكرة اترك شغلي لانه دوامه لل٧ ومتعب كثيؤ وحسيت بالفترة الي عطلت فيها بحب البيت، ورجعنا سوا وحياتنا صارت احلى  ، واختفت المشاكل؛ ولما كبر ابني رجعت عشغل منيح ودوامه منيح .....

لما تاخدي قرار انك تتزوجي، لازم تحطي ببالك انه في مسؤولية عليكي؛ اذا زوجك وضعه المادي منيح، وعندك ولد صغير بحاجة لرعاية ، وحسيتي انه الشغل محملك شي فوق طاقتك وعاملك مشاكل مع زوجك، مو غلط تتركي وتدوري عشي احسن ، عمرها الامومة ما كانتت شي غلط، او انك مش ناجحة، نجامك هو تبني عيلتك صح وتكوني مع ابنك  ،،، واكيد ما تتخلي عن حلمك وفيكي تنجحي بأي شي بس كل شي بالتفاهم 😍

وللزلمة انت كمان المفروض تتفهم انها هي بتزهق بالبيت، وانها بحاجة لكلمة حلوة منها لتقنعها  لانه هاي حياة رح تعيشوها سوا

#هديل_قاسم