اقتباسات

قصتي

بلشت قصتي من كم سنة، من لما شفت بنت قاعدة وبتبكي😢 لإنها فشلت بدراستها، قعدت جنبها وقعدت احكيلها قصتي، قلتلها انا رسبت بصف عاشر

، ويومها اهلي ما خلوني اكمل مدرسة، وانحبطت واكتئبت كتير حسيت اني فاشلة ومش ممكن انجح نهائي بحياتي، البنت كانت منزلة راسها، رفعت راسها وقالتلي : عنجد وشو صار
قلتلها اول شي كنت زعلانة كثير، وخاصة انه بنات خالتي كلهم نجحوا وجابوا علامات عالية، وامي صارت تحكيلي يلا يا راسبة بنزوجك لاول واحد !
مسحت دمعتها وحكتلي نفس ما صار معي كملي ...
وبعد هالقصة اكتشفت اني موهوبة بالصوف ، بعمل شغلات حلوة ومميزة، واعرضها عالجارات وتعجبهم، صرت اتعلم اكتر واكتر على هالشغل، والناس تحب شغلي، وابيع .... لوقت صرت اشهر وحدة بشغل الصوف مش بمنطقتنا بكتير مناطق ، وهيني اليوم بعد 10 سنين عايشة احلى حياة .... واتأكدي الثقافة شو بتقرأي ، شو بتنتجي مو بس المدرسة مع انها مهمة ...
ضحكت البنت وحكتلي طيب في أمل انجح بشي، قلتلها اه في اكيد .... هاي انا قدامك وعدت صف توجيهي ونجحت ورح اسجل جامعة :)
ضحكت البنت وحضنتني .... وكملت انا طريقي ...

يومها حسيت بسعادة مش طبيبعية مقدرتش افسرها، ومشت الأيام ... التقيت بامرأة متزوجة بعيادة دكتور نسائي كانت بتعيط ومنهارة، قلتلها شو مالك؟
قالتلي : الدكتور حكالي ما في امل اجيب ولاد صرلي متزوجة 5 سنين ولليوم ما صار شي ...
قلتلها وانا كمان صرلي متزوجة 6 سنين وقبل 3 سنين حكالي الدكتور انه فش امل، اطلعت على بطني وحكتلي بس هيك حامل !
قلتلها اه .... لأنه ارادة ربنا اقوى من الدكاترة، وما حدا بعرف شو بصير معه، الحمد لله انا حملت وانتي يمكن تحملي لا تفقدي الأمل .. .كمان مرة حسيت اني عملت شي حلو ....

بعد ما ولدت ،كنت خايفة على بنتي مني، انا تربيت مع ام قاسية كتير؛ ما عمرها حسيتها حنونة علي ، وكانت دائما تتعامل معي بقساوة؛ خفت اعمل ببنتي هيك ، بس لقيتني حنونة معها كتير بخاف عليها من الهوا الطاير، بقصرش بأي شي بتحتاجه، ولما كبرت شوي، لقيت حالي قاعدة معها وبشجعها وبساندها لتصير اقوى و أحسن، انا فشلت بدراستي، ما رح اسمح لبنتي تفشل، دعمتها، كانوا كل صاحباتها يحسدوها علي وكيف معتبرتها متل صديقتي ....

وبعد كل هالشغلات الي صارت ، فتحت جمعية خاصة بالناس الي فاقدين شغلات كثيرة بحياتهم وبتوقعوا انهم مش رح ينجحوا ، صرت استقبل حالات كثيرة من المجتمع وكل حدا فيهم يحكي شو صار معه وكيف نجح ... كلنا كنا نشترك بشي واحد انه مين قال فاقد الشيء لا يعطيه ، لا بعطي بس بوجع اكبر ، لما ساعدت البنت الي رسبت انا كنت بتوجع من جوا لانه حاسة فيها وما حدا ساعدني ولو بكلمة، لما التقيت بالست الي فاقدة الأمل بالحمل، انا كنت حامل صح بس وضع الجنين خطر، وكنت تعبانة كتير، وبنتي انا امي كانت معي مش حنونة ... مع هيك حنونة معها كتير لاني بخاف يصير معها متلي وتحس بالنقص ...
بس بكل مرة كنت احس اني بكسب هالشي لي فقدته لما اساعد غيري صرت احس اني مبسوطة ومرتاحة ...

هي الكلمة الحلوة بتساعد غيرك، وبرجع بحكي ، الناس الي فاقدين شي بقدروا يستعيروا من حدا ثاني ويعطوا بكل حب ووجع ، وكل انسان فينا بفشل بمرحلة وبنجح بمرحلة لا تخلو عيونكم عالنقطة السودا وسط كل هالبياض الي حواليكم ...
#انا_مش_فاشل_المجتمع_بدو_يفشلني 💪