اقتباسات

نصاحة

قبل سنتين تقدملي واحد عمره 40 سنة، طبعا انا ما وافقت؛ بس لهلئ كلمة خالتي عالقة بذاني، ولك ما انتي وزنك 100 مين رح ياخدك!
انا وقتها نجرحت كثير، وحكتلها مش ضروري اتزوج، كانوا بنات خالتي جمال وطول ونحاف ، وانا دائما الي الناس بطلعوا علي اني بقرة ! او دب قطبي لما امر من جنبهم .... بنت خالتي الي قدي ما كانت ملحقة طلبات، وكل ما تيجي خالتي تقعد تحكي ولله رنا اجاها اليوم دكتور وبس شافتها امه طار عقلها بجسمها الحلو وطولها وعيونها، تقعد امي تطلع علي بحسرة، وبس تروح خالتي تحكيلي بدكيش تضعفي، ولك انتي على هالوضع ولا واحد رح يقبل فيكي !
انا افوت على غرفتي واصير اعيط، خاصة انه النصاحة الي عندي مش بايدي؛ هي نصاحة مرضية، وحاولت اعمل رجيم كثير، وبتذكر مرة شفت منتج عالفيسبوك انه بنحف كل يوم كيلو، رحت حوشت مصروفي لشهر وشتريته من كثر ما هو غالي، وصرت كل يوم اشرب حبة، ضعفت علي شوي، بس صار عندي مضاعفات اكثر؛ ومرضت وارتميت بالمستشفى اسبوعين!
بعدها خلص يئست انه ممكن انحف، وجسمي بطل يتجاوب مع رجيم ولا اشي ..
الناس كانوا ما برحموني، يوم عرس بنت خالتي ، طلبت رقصة مع صاحباتها؛ طلعت ارقص؛ بس وقفت علللوج كل الناس صارو يضحكو، ويحكو يحبيبي بتخمس بنص القاعة اكلناها!
حتى صاحبتها الي جنبي حكتلي مش تتعرقلي وتفعصيني!
انا وقتها نزلت عن المنصة وصرت اعيط عجنب، اجت قعدت جنبي وحدة كبيرة بالعمر وحكتلي بكفي حلاوة روحك انسيكي منهم ، انا بعرفك من انتي وصغيرة!
بعد فترة قدمت لوظيفة، بالبداية رفضوني لاني ناصحة !
بخيت بوجه المدير وحكتله بدكم عارضة ازياء ولا موظفة!
زورني وحكالي ما عنا شاغر !
روحت عالبيت وحلفت اني ما رح اكل شي، وصمت عن الاكل يومين ومرضت !
بيوم بعتلي واحد هالفيسبوك، قلي انا معجب بشخصيتك كثير؛ وبعرفك من الجامعة، انا حسيته بتمسخر ما رديت علي !
ثاني يوم شفته بالشارع صدفة؛ اطلع في وحكالي، انا جدمعجب بروحك كثير، انا عرفت بنات قد شعر راسك، بس ما شفت بطيبتك وحنيتك؛ كنت اراقبك كيف بتساعدي الناس بالجامعة، وكيف بتضحكيهم!
انا خجلت وروحت عالبيت ما عرفت شو احكي معه، هالشب كان دكتور بالجامعة وكثثير محبوب ووضعه المادي كثير منيح، وفوق هيك هو محترم وحلو يعني نص بنات الجامعة بتمنو!
صرنا نحكي يوم ورا يوم عالفيسبوك لحد ما حكالي انه بحبني، انا يومها قلتله الي بحب بنت بطلبها بس انا ...
حكالي شو انتي؟
قلتله اهلك ما رح يوافقو يزوجوك وحدة بنصاحتي؟
ضحك وحكالي ليش بلاقوا احلى منك ومن روحك اهم شي انا مبسوط معك وبالفعل بعد اسبوع تقدملي ، طبعا لما تقدملي كل العيلة نصدمو، بنات خالتي يسمعني حكي شكلها ساحرته، وحتى بعد ما عملنا خطبة، كانوا بالصالة كلهم يتهامسوا بس انا ما اهتميت، لاني لقيت الشخص الي بتحلم في اي بنت ..
الي بحبها عشان روحها وبس، والي بوقف معها بكل ظروفها ، بعد الخطبة كانوا ناس يحكولو يا زلمة تراجع! هاي ساحرتك ..
يحكيلهم اه سحرتني بروحها الحلوة ضحكتها البريئة وقلبها الابيض ......
طبعا بعد ما خطبت صار يساعدني لحتى انحف ، سجلنا انا ويا بالجيم، ورحنا عند دكتورة تغذية لحتى اخفف من وزني، ودائما بحكيلي ما بدي تنحفي مشاني!
انا بحبك هيك ... انحفي اذا انتي بدك وبس مشانك ..
وتزوجنا وحاليا عنا بنتين، انا ما نحفت كتير بس وزني مقبول حاليا؛ عايشين مع بعض ومبسوطين ... بس لليوم نظرات الناس مش خالصة منها ! وكثير ايام بنام وانا ابكي بس اتذكر الفيديو الي انتشر ومسخرة الناس عالنصاحة ... وكأنه لازم البنت تكون باربي وبس
وكيف البنات كانوا يعلقوا عالبنت الناصحة ، وكانه هي ممنوع لا تحب ولا تتزوج واحد منيح !
وطبعا انا بحس اني محظوظة لانه تزوجني واحد مش عشان شكلي الي ممكن يخرب لما نتزوج، ولا عشان جسمي الي اذا نصحت رح اتغير علي ويطلع عغيري، تزوجني واحد مآمن انه الزواج حب وامان واستقرار بين روحين واخدني عشان اخلاقي ..الي ما رح يتغيروا مع الايام ..