صرلي فترة بشك بتصرفات زوجي، حاسسته انه بخوني، الزلمة فجأة صار يهتم فيي، ويتغزل، وأمي حكتلي لما الزلمة يبلش يتغزل بمرته كتير يعني بخونها ..
انا بلش الفار يلعب بعبي، كل يوم يلبس طقم جديد ، وعطر يوصل لآخر الحارة ريحته، واناقة والسيارة يغسلها كل يوم ...
بس انا صعب اروح واتهمه انه بخوني بدون دليل قاطع فبلش كونان الي جواتي يشتغل، اخلي يروح عالحمام وأمسك تلفونه وأبلش افتش، طبعا ما كان شي يفتح غير شاشة القفل وكان في حرف w وقلب حب ، انا اسمي سارة وهو علي مين w هاي ... لازم الاقيها !
افوت على فيسبوك تبعه، واشوف الايكات مين بتبلش بحرف w ... يوم ويومين وثلاث وما لقيت حدا بهالحرف ، لوقت سمعته بحكي تلفون، اه يا بيبي بعجبني شعرك الأحمر، وكيرلي بكون كثير حلو ... انا يومها ولعت معي بدي افوت انتفه وانتف بيبته ...
بس اطلعت على شكلي بالمراي ولقيت شعري مش ممشط لونه اصفر باهت ومقصف، قلت طيب ما اروح انا عالصالون واصبغه احمر واقلع عيونه ، فعلا على طول قلتله بيبي هيك بمسخرة انا رايحة مشوار ...
دخلت الصالون وقلتلها بدي احمر كيرلي، وطلعت شبه هيفاء وهبي، اول ما فتت البيت سمعته بصفر وبحكي واوو شو حلوة مرتي ..
وانا احكي بعقلي اه طبعا ما هيك شبه بيبتك ...
وضل هيك اسبوع هيك يهتم فيني ويدلعني ويحكيلي شو هالحلاوة، لسمعته كمان مرة بحكي، يا بيبي بحب اهتمامك بحالك، ما في لا كرش ولا زوائد ، مثل الباربي، قعدت اتذكر اول ما عرفته؛ انا كنت باربي فعلا بس بعد اول ولادة طلعلي كرش وصرت ناصحة كتير، وأركنت اني تزوجت وخلص بطلت اهتم بحالي، بس قررت ارجع باربي، واهتم بأكلي، واعمل دايت، وهو كان بشجعني ويعمل دايت معي وهالشي لي خلاني استغرب، وبعد 3 شهور فعلا رجعت لوزني الطبيعي، واول شي اشترالي فستان كان نفسي البسه بس من النصاحة ما قدرت اجيبه وهو عارف هالشي ... انبسطت بس كمان لسا كرهانته لانه بخوني ...
اخر مرة سمعته بحكي عللتلفون، احلى شي انه ريحتك دايما عطر ، ولا طبيخ ولا ريحة ولاد صغار، انا وقتها خلص ولعت معي، رحت فتت عنده عالغرفة من ورا شوي شوي، ومسكت التلفون..
هو ضل ساكت ومكانه ، وما عملش اي ردة فعل، انا بلشت يا حيوانة يا خرابة البيوت، واسب عليها، بس ما في صوت ، شكلها قطعت المكالمة، اطلعت لقيت الجهاز عشاشة القفل وما في اي مكالمة، قلتله افتحلي الجهاز بعصبية ، فتحه بكل هدوء اخر مكالمة من 3 ساعات بيني وبينه! ما في مكالمة جديدة....
قلي ماشي رح اعترفلك ...
انا فعلا كنت اكلم بنت غيرك، بس هالبنت هي مرتي الي حبيتها اول مرة الي كانت بتهتم بحالها وفيي، حسيت انه بعد الزواج انشغلتي بالولد وفيي ونسيتي حالك، وانا بعرف انه الغيرة بتخلي الوحدة ترجع تهتم بحالها، وعملت حالي بحكي مع بنت غيرك لاخليكي ترجعي متل ما حبيتك مو مشاني بس ... مشانك انتي ...
قلتله ولله كيد الرجال أعظم ... هالخطة ما بتخطرعلى بال ابليس
بعد هداك اليوم، تغيرت شغلات كتيرة بحياتي، وبلشت اهتم بكل التفاصيل وما اركن انه انا تزوجت وخلص، لا الزلام بدهم اهتمام دائم وهو كمان صار يساعدني بشغل البيت ، وكان مبسوط كتير فيي ، وهو شايفني بهتم في وبالولد وبحالي ...
صحيح في زلام عيونهم فارغة، بس انتِ الاساس بهالقصة ، هو لو شو ما شاف بالاخر رح يرجعلك، بس انتِ لا تهملي بحالك وضلك احلى وحدة بعيونه، هي شوية اهتمام بحالك وفي ... وحياتكم بتصير احلى
...............................................................
اليوم عملت حادث سيارة !
باللحظة الي كانت قبل الحادث؛ بس شفت السيارة رح تصطدم بالسيارة الثانية ، صار شريط حياتي يمر قدامي، الغريب بالموضوع انه ما تذكرت الشغلات الحلوة، اول شي تذكرته ختيار كبير بالعمر ، كان يومها بدو يقطع الطريق وكل شوي تيجي سيارة ويرجع لورا، وانا بدل ما اساعده قطعت الطريق لحالي، صرت احكي لو يرجع الزمن اساعده.....
بعدها شفت ست كبيرة بالعمر، كانت تحاول تطلع عالدرج الكهربائي ، وشكلها اول مرة بتطلع علي، فكانت رح تتفركش وتوقع، كانوا في بنات قبالها صاروا يضحكوا بأعلى صوت، وهي ما عرفت شو تعمل، كان لازم طلعت وساعدتها !
خطرت عبالي صاحبتي، الي انا وياها تحاربنا عشغلة تافهة وكيف الأيام بعدتنا عن بعض، تذكرتها لما كانت توقف جنبي، لما ما كان حدا غيرها يسندني بمشاكلي، كيف كانت توقف بوجه الكل ، وانا عشان مشكلة صغيرة نسيت كل الشغلات المنيحة وبطلت احكي معها ! حتى هي ما حاولت تحكي معي ....
اتذكرت امي ، وهي تطلب مني اجلي الجليات، وانا كنت معصبة، حكتلها اووف كل شي علي انا، ما بدي اجلي، وكيف عصبت مني وزعلت، يا الله ما بدي اموت قبل ما اصالح امي !
السيارة اصطدمت بسيارة ثانية، راسي صدم بالزجاج، حسيت الدنيا غبشت صارت الذكريات تمشي اسرع، انا اليوم ما صليت الفجر، سحبتها نومة للعشرة، كمان امبارح نسيت اصلي المغرب !
انا ظلمت البنت هديك، حكيت عنها كلام ما صار، انا سبيت على هديك البنت الي زعلتني !
انا صرخت بوجه ابوي، انا ضربت اختي، انا امبارح سمعت اغنية ونشرتها، الكل سمعها ، صار عندي سيئات جارية، ما قرات سورة الكهف الجمعة؛ انا رحت على عرس مختلط !
انا دفعت 200 شيقل لاحضر حفلة لفنان، وكانت الحفلة مختلطة وكلها مياعة....
عتمت للدنيا، كنت بس احكي بدي ارجع لحظة لأصلح كل اخطائي ، اعطيني يا ربي ساعة وحدة ، ارجع فيها عالدنيا واصلح كل شي عملته ....
صحيت لقيت حالي بالمستشفى، اول حدا شفته كان امي، قلتلها سامحيني!
امي كانت تعيط يا حبيبتي المهم تقومي بالسلامة !
يما جيبلي مصحف ....
استغربت امي، يما اتصليلي عصاحبتي، يابا انا اسفة انا زعلتك، يما انا كتير عملت شغلات غلط..
امي كانت تطلع علي وصافنة، انه انا شو بهلوس شو بخبض، بعد فترة صرت منيحة وطلعت من المستشفى، بهالفترة الي كنت فيها بالمستشفى اجت صاحبتي زارتني، قلتلها لسا زعلانة قالتلي لا ولك
متت خوف عليكي لو صرلك شي كان انا متت!
حكتلها جد ... قالتلي اه ...
كل الناس الي كنت افكرهم بكرهوني وحاقدين علي اجو زاروني واتمنولي السلامة؛بعدها صرت اصلي كل صلاة بموعدها احاول قدر الامكان ما اعمل اي شي بغضب ربنا ، صرت انتبه للناس الي بحاجة للمساعدة، واساعدهم، بطلت اطلق احكامي عالناس بدون ما اعرف فعليا شو عاملين!
يا الله ما اصعب اللحظة الي بنشوف فيها الموت؟ ما اصعب الشغلات لي بتخطر ببالنا ، قديش ناس ظلمناهم، قديش ناس محاربينهم عشغلات فاضية، كم مرة حكينا اوف لاهالينا لانهم ما قبلوا نعمل لي بدنا يا، كم مرة قصرنا بحق ربنا وبحق حالنا عشان هالدنيا ..... وبلحظة بنتهي كل شي !
بنلاقي حالنا بحفرة، وما شي بفيدنا، ولا حتى الناس الي ضلينا حاقدين عليهم وزعلانين منهم ، ولا فلوسنا الي قضينا طول عمرنا نجمع فيهم ...
يا ريت لو كل حدا فينا يوقف شوي قدام مرايته، ويسأل حاله كم مرة غلط بحياته؟ ويحاول يرجع عن هالغلط قبل ما يفوت الآوان ....
لكل حدا زعلني او زعلته انا مسامحتك وبتمنى تسامحوني ❤
..............................................................
كنت قاعدة مع راما ، فبتسألني شو اخبار مرام ، تذكرت انه صرلنا مدة مش حاكيين،مع انها اعز صديقة عقلبي وغايبة وما بعرف عنها شي، حكتلها علمي علمك ...
لما وصلت البيت، مسكت جوالي بدي ارنلها، اسألها عن حالها ، بس تراجعت ...
انا قبل فترة فتت عالمستشفى وعملت عملية زايدة؛ من يومها ما حكينا، مع انه كنا قبل كل يوم نحكي مع بعض، صرت ارجع بمسجات الفيسبوك، بكل مرة انا كاينة ابعتلها ، انا كاينة اسأل عليها، وهي بس كم مرة باعتلي نحكي، وعالاغلب بدها شي !
صرت اراجع حالي وتصرفاتي؟
انا دائما كنت معها منيحة، واحكيلها انها متل اختي، اتضايق لما تتضايق؛ بس هي لا ما كانت تعاملني هيك ...
انا اسراري كلهن معها ... هي ولا بتحكيلي اشي ...بحجة معندهاش اسرار ...
حتى احيانا بتضايقني بتصرفاتها، حكيت ولله مش رح ارن عليها الا لما ترن ...
ومشت الأيام، وقتها انتبهت لراما، هي دائما بتبعتلي ، وبتحكيلي كل شي ، ويوم للمستشفى ضلت جنبي، وزارتني 3 مرات، وانا علاقتي فيها مش متل مرام، بس مع هيك بكل اوقاتي الصعبة كانت معي ....
فعليا... صديقتي الحقيقة هي راما، لأنها ما بتستنى مني ابعتلها لتحكي، بتستفقدني، ما بتعاملني مصلحة وبس، وانا متل الهبلة طول هالوقت كاينة معتبرة مرام صاحبة حقيقية !
الأغرب انه بس شافتني مع راما صحبة كثير، بعتتلي بتعاتب ، اه صاروا ناس تانيين ماخدين مكاني لهيك ما بتسألي ...
قلتلها .. بسأل عن لي بسأل علي .. يا صاحبتي .
في ظروف بتبعد الناس صح، بس راجعوا علاقاتكم منيح، شوفوا مين دائما بسأل عن الثاني، شو الحدود لي عاملها الطرف الاخر... رح تلاقوا ناس بحبوكم اكتر من لي مفكرينهم صحابكم .. صديقك الحقيقي معك بكل وقت ولو غاب عنك .. بتبعتله تطمن علي
..............................................................
- الله لا يبليكو بالإنسان البارد ! ⛄
الي بتفاعلش مع أي اشي ، ملامح وجهو دايماً مرخرخة ! ما عندو تعبير ، ولا عندو مواضيع ، ولا عندو ردود ! مش درامي أبداً !
بالزبط زي زوجي ! 🌚
انغريت فيه بس اجا طلبني ، قلت الزلمة هادي ! مش شغل يناقش و يتنح ! يعني بمشي البيت ع كيفي !
بس لا طلعت غلطانة ، الزلمة مكلح ! طافية معو ! الخلايا العصبية عندو متسطحة ع بطنها ! 💫
الكنباية الي دايماً بكون منسدح عليها قبال التلفزيون ، جربت يوم أزيحها و أنقل مكانها و هو بالشغل ،
زحت كل الكنابيات و غيرت الديكور و ضهري صار مثلث من التعب ، آخر اشي بس روح قعد ع نفس الكنباي بدون ما يسأل شو صار بالبيت !
جبتلو سيرة جارنا الي اندعس ولا اهتم ! فتحتلو سيرة الانتخابات ولا اتفاعل ! 🔇
قلت لا بدي اشي أقوى ، رحت عالصالون و سلمتهم حالي ، قلتلها طلعيني من هون شكل تاني ، بدي اوقف عالمراي ما اعرفش حالي ! ازا احتجتي تنشري اشي تخلعي اشي تزيحي اشي تجزي اشي تقطعي تحرقي ، عادي خدي راحتك !
و فعلاً ، اخدو سبع ساعات و همة يعملولي تبديل أساسات ، طلعت من الصالون بحكي لغة تانية ! و بستعمل ايدي الشمال بدل اليمين ! 👻
لما فتت عليه عالبيت و هو منسدح ع ذات الكنبائة !
وقفت قبالو و قصعت ، ع أساس ينذهل ! ينبرع ! يتفاجئ ! يعمل أي اشي !
بس عالفاضي ، لسا مركز بالتلفزيون ، أنا بلشت عندي اعراض الجلطة ، طفيت التلفزيون و قلتلو حبيبي ركز معي بس لمرة ! فش اشي متغير ؟ مش حاسس اشي ؟ طب شكلي حلو ؟ شعري ؟ الميك أب ؟ الفستان ؟ شاركني رأيك ؟ غازلني ؟ جاملني ؟ سب علي ؟ طلقني ؟ أطعجلي إجري ؟ إكبس ع منخاري ؟ اقتلع عيني ؟ ارمي علي قشر تفاح ! عرقلني ! علق أواعيك علي ! اعمل اي اشي أبوس ايدك ! حسسني انك زوجي ! 💔
هو لف وجهو علي ، و صفن صفن صفن ! صفنة طويلة ! كإنو اول مرة بشوفني !
أنا قعدت استنا الغزل العذري الي رح يطلع معو ، القصيدة الي رح يلقيها ، بيت الشعر الي رح يشمطني ياه ، ! 😍
آخر اشي ، حكالي دينيكي موقعهم زابط ، بس كإنهم كبرانات شوي ؟
😳😳😳😳😳
- الحق علي ، أنا حردبة و ناصحة بعرفش أنطم .
#غازلني_شكراً
#مذكرات_بنت_منكوسة
..............................................
- اليوم أنا و حبيبي تركنا بعد حب خمس سنين 💔
طقعلي لإنو مش مرتاح معي و لإنو أعطاني ميت فرصة مشان اتغير بس أنا ما كنت أتغير ! و انا بنت عشوائية و فوضجية و مو هادية زي باقي البنات و بفهمش بالإيتيكيت ، و هو بكره عفويتي ! و بطل يتحملني و صعب يوخد خطوة جدية معي و يخطبني ! و مستحيل إمه ترضاني !
حكالي كل هاد الحكي بعد ما عزمني و حكالي إنو في موضوع مهم ، ما بعرف ليه ضليت لآخر لحظة ماسكة حالي و باكل البطيخ بالشوكة و السكين ، و بحاول أحبس دمعتي و ببتسملو !
روحت عالبيت و كنت طول الطريق أتف ع حالي ، إنو كيف خليت واحد مصرمج و تافه و شبه سلك الشاحن يحملني بحالو جميلة طول هالخمس سنين ! صرت أتف و أسب ع حالي و أخبط راسي بقزاز الشباك حتى شوفير التكسي انتبه و خاف مني ، :/
وصلت عالبيت ، غيرت و مسحت المكياج و ضليت أفرك الآيلاينر الي تعلمت أرسمو مشانو ! لحد ما عيني زاحت خمسة سانتي عن مكانها الأصلي ! طلعت عالبرندة ، لميت الغسيلات و انا بسب ع حالي ، اجت اختي ولعت الأرجيلة ، و إمي دخلت عالبرندة حاملة بطيخة و سدر و سكينة ، و فرشو و قعدو ، أنا بس شفت البطيخة فتت جوا عالسريع شلحت زنوبة اخوي عالباب و ركضت ع غرفتي و أنا بسب عاللحظة الي حبيت فيها ، و طلت بلوزتي المبقعة هايبكس و مقصوصين كمامها و طالع منهم شراشيب ، و لبستها ، و جمعت كل شعري و ربطتو فوق راسي زي كيس الزبالة الأسود ، و لبست بنطلون أبوي الي هو بلبسه تحت الدشداشة بصلاة الجمعة مشان آخد راحتي ، و رجعت ، تربعت عالأرض و عبطت البطيخة و أخدت سلفي معها أنا و أختي ع سنابشات و أنا حاولة عيوني ، و كتبت عالصورة " طز فيك و فحبي ليك " 💃 ، بعدين صرت أطبل عالبطيخة ، و أختي قامت تجيب بربيش الأرجيلة من المطبخ و رجعت و هي بترقص ، أنا قمت و صرت أخلع بخصري عالبطيء و أتخيلو تحت رجلي و أدعس من قلبي ! بعدين إمي مسكت البطيخة و شقحتها ، و قبل ما إمي تخلص تقطيع مديت ايدي و بلشت ، مسكت قطعة البطيخ ، و مديت راسي لقدام ، و جهزت وضعية الفرم ، و بلشت أجرش الأحمر و اليابس ، البطيخ فات بمناخيري و عيوني ، مية البطيخ كانت تنقط من كواعي ، و تنزل ع ركبي ، و من ركبي عالأرض ، كنت آكل و أشرشر و مش سائلة بإشي ، المشهد كان عبارة عن أدنى درجات الأنوثة ، مع هيك كنت مبسوطة و مرتاحة داخلياً و متصارحة مع نفسي و كإني اليوم صحيت ع حالي بعد غيبوبة دامت خمس سنين كنت فيهم زي الهبلة و لاغية شخصيتي مشان بني آدم مو مقدرني !
و بس فتت أنام ، فتحت تلفوني ، مسحت رقمو و تفيت ع صورو صورة صورة و مسحتهم ، و بست حالي عالمراي ، و نمت بإطمئنان . ❤
#من_ذلك_الحقير_ليطلب_التغيير
#مذكرات_بنت_منكوسة