تكمله البارت الاخير٨٣
ليته يعلم ( أحببته منذ الصغر)
سدت الموبايل صابرين وكامت تركض بالحديقة
صابرين:وافقووو وافقوووو..
رنا:صدك والله
فراس ضحكته مدري لي وين وصلت...فد حسيت اكو فرح چبير بداخله خطيه
سرى: الحمد لله ياربي ....
اجت نور
صابرين:بالقران البشاره ليه يافراس اموتك اذا مانطيتني شي
فراس:ههههه انطيج شتردين انطيج
صابرين:اريد سياره مرسيدس
فراس:خل اني اخذ مارسيدس اول شي
صابرين:ماعليه البشاره الي
فراس:عود اني اجيبلج شيي
بقينا متونسين هواي وننتظرهم يرجعون
اجو وطبو جوة
جان صادق وعمي ابراهيم وعدنان وعلاوي كلهم يضحكون
عدنان:هااا فروووس مبروووك
فراس بس ضاحك وخجلان بنفس الوكت
علاوي:لك شوووفه شووووفه
صادق:هههههه
جده: الحمد لله ياربي...والله خوش ناس انطو وماشلعو كلبنا
صابرين:كل عقلكم صادق يروح وماينطونه.. اكيد سحرهم سحر بسوالفه وقنعهم.....
عدنان:اي والله سحرهم
علاوي:عمي راد يلوصها لوماتلاحگنا بالوضع
عدنان:هههههههه
صابرين:زين صدك حديتو المهر
صادق:اي
علاوي:بس المشكله طلبو مهر غالي هواي
فراس:شگد
صابرين:ليش شگد طلبو
علاوي: ١٥ مليون
صفنه كلنا
رنا:شدعوة هاي عود جيران
فراس:ابيع السياره عادي
صادق:خطيه لاتنصبون علي شوي نوب يبيع البيت
علاوي:هههههههه لالا طلبو ٣ بس
صابرين:اشووووه خبلتونا
رنا:اي والله كلت شدعوة
جده:لاخطيه خوش ناس انطونا مره وقدورنا وماطلبو هواي
كعدنا كلنا بالحديقه..وسرى جابت جاي للكل
نور طبت جوة
سرى:شوكت يمسكون العقد
صادق:كلنالهم هاليومين..نودي المهر ونمسكلهم عقد
صابرين:من هس ترا اني اروح وكت العقد
رنا:اني هم
جده:اي كلنا نروح
صادق وعلاوي موعاجبهم كلامنا..يهزون بأيديهم
اني طبيت جوة خابرت على مها
مها:الو
رنا:مبروك
مهاوي تستاهلين
مها:الله يبارك بيج حبيبتي.. اكلج اني لي هس مامصدكه بس اضحك
رنا:هههه حقج والله احس بيج
مها:فراس شنو وضعه احجيلي
رنا:لج فراس اكثر منج فرحان خطيه جان ينتظر وايده على كلبه..لمن خابرت جده وكالت وافقو ضحكته ملت الدنيا
مها:هههه ياعمري
رنا:ان شاء الله بعد باجر راح يجون يسلمونكم المهر وتمسكون عقد ملا
مها:اي خوش...اريد بس نمسك العقد حتى احجي وياه براحتي
رنا:ان شاء الله.. ولج اني هم ممصدكه انتي راح تجين هنا ابيت عمي..لي هس مامستوعبه هالشي
مها:ههههه على اساس مستوعبه...عود جان يطير عقلي منكم ..هما گدرولنا احنه شعلينا
رنا:هههههه ايييه اييييه...يلا اني اروح هس اروح اسمع الاخبار واشوف شنو يكولون
مها: ماشي بأي
سديته ورجعت للحديقه
صادق جان يباوعلي ورافع حاجبه
صادق:هااا كبل رحتي تخابرين
رنا:ههه ايي
صابرين:شتكول مها
رنا:مثل وضع ابنكم هي هم فرحانه
جده:خوش بنيه وحلوة
بقينا كاعدين ونحجي بنفس الموضوع
تاخر الوكت شوي
صادق:يلا رنا...سراب صيحي حسن ونور
جده:بعد وكت
صابرين:لاكافي ..واحد يصفي راسه ينام من وكت يرتاح
صابرين: لعد وصلوني بطريقكم
صادق:يلا كومن
طبيت جوة لبست الستره واخذت الجنطه..طلعت صعدت بالسيارة
بعدين اجت صابرين والبنات وحسن
وصلنا صابرين بعدين رحنا لبيتنا
طبيت جوة لغرفتي .غيرت ملابسي وتمددت
صرت احس بالطفل ينبض ويضرب
اباوع على بطني تتحرك
رنا:هههه شبيك يمعود
بعد ربع ساعة اجه
صادق:ها يضيمي
رنا: ماشفته شون يتحرك
صادق:منو
رنا:ابنك
صفن وباوع على بطني
رنا:توقف هس...قبل شوي بس يتحرك
تمدد يمي
رنا: أتوقعه يجي باهت وحركه
صادق: لا يجي عاقل
رنا:مادري هيج أتوقع..كلش متحمسه اشوفه
صادق:....ههه تشوفينه تشوفينه
رنا:بس اني خايفه من الولاده...سرى وصابرين خوفني منها
صادق: كولي يالله يمعوده
رنا:يمكن اسوي عمليه احسن موو شتكول
صادق: لا.طبيعي أحسن..
رنا: اهممم...
صادق:لاتفكرين من هس وتخافين..الله يسهل ان شاء الله
رنا:ان شاء الله
نمنا..وثاني يوم كعدت الصبح
طبيت للمطبخ سويت ريوك ..وخليته عالطاوله
من الجو يصير زين اخلي الاكل بالمطبخ عالطاوله..بس وكت البرد لا جوة ناكل
حضرت الريوك .. ردت اكعد صادق بس ماصخيت
كعدت اتريك بوحدي وصافنه
صادق:صباحو ياحلو
باوعت علي
رنا: صباحووو
صادق: نشيطه كاعده كببي
رنا:اي انشط منك ..تعال تريك
صادق: اغسل واجي
حضرتله كوب چاي واجه كعد
صادق:شفت رؤيه
رنا: خير يارب
صادق:بالرؤيه جنت والده الطفل ..يعني عمره تقريبا يطلع سنه هيج
رنا:اي
صادق: جنت اصيح بي بس مااجه لمن صحته بإسم قصي اجه
رنا:اها
صادق:اي جنت صحته بإسم قصي..ان شاء الله اسمي قصي
رنا:......يعني هيج تفسيرها
صادق:اي مدام صحته بهالاسم واجه عليه.فراح اسمي قصي
رنا:ان شاء الله
اني اثق برؤيه صادق ماكدر ارفض أو اعانده
عبر الوكت وبالليل حضرت غده لباجر لان عندي دوام..مرات احضر مرات اكول لسراب تسوي شي سريع الهم ومرات حسب يعني..فاني سويت كبه تمن بالليل كلت لسراب من ترجعين من الدوام شغلي الگلايه وگلي انتي ونور.. الصبح رحنا للدوام اني وصادق.. ورجعنا سويه...طلعت من الكبه وكليتها النه.اكلنا وسويتله جاي بعدين رحنا للغرفه نمنا
واني نايمه
صادق:رنا رنا يلا كعدي
رنا:ها شتريد
صادق:لج دوب تلحكين كومي يلا
رنا:عليشش خليني نايمه
صادق:بكيفج لاتجين ضلي هنا
وخرت الغطى
رنا:ليش وين تاتروح
صادق:شبيج غير اليوم نروح نسلم المهر ونمسك عقد لفراس وصديقتج
اني جنت ناسيه اله ذكرني
كمت على حيلي
رنا:صدددك
صادق:لازم نسيتي
رنا:اي والله ولاابالي..ليش الساعه شكد شوكت نروح
صادق: الساعه ٦ ..وره صلاة العشه نروح ..مابقى هواي
رنا:خل اكوم اسوي عشه خفايف
كمت عالسريع طبيت سبحت. اول شي..بعدين طلعت خليت القوري عالنار وصيت سراب تطلع الالبان والصمون
رحت مشطت شعري..ورجعت للمطبخ
حضرنا العشه عالطاوله..
رنا: صيحي اخوتج
اجت نور وحسن ... رحت صحت صادق
صادق:اني ماريد..بس كملو لاتتاخرون
رنا:ماشي
رجعت للمطبخ اتعشه وياهم
رنا: سراب وره العشه مباشره روحي تحضري وحضري حسن
حتى نروح
سراب:ماشي
حسن:يسسس..ضوجه اريد اروح لاجدادي
رنا:اي هس نروح
كملنا. شلت المواعين عالسريع غسلتهم
ورحت للغرفة..صادق جان متحضر ومتممد عالتخت ومخلي رأسه بالجهاز..
خليت مكياج.. بعدين طلعت فستان اللي قبل اسبوع هيج اخذته البسه بدوام مرات..مال حوامل حيل حلو
لبسته ولفيت الشال..باوعت بالمرايا
رنا:اكلك صادق
صادق:ها يروحي
رنا:شوف بطني شون صايره شكد جبيرة مو
صادق:اي حلووة صايرة بطه....كملتي
رنا:اي بس شويه
لبست الاكسسوارات والساعه وطلعت حذائي لبسته
ورحت لغرفه البنات.. باوعت سراب متحضره وحسن هم
نور مولابسه ولامتحضره ..كاعده بصفحه عالتخت
استغربت شوي..
اجه صادق
صادق:هاا شضل
باوع على نور
صادق:شو انتي مومتحضره
نور:بابا مالي خلك اروح
صادق:شو كومي يلا..ماتبقين وحدج هنا يلا امشي
كامت بس مبينه موعاجبها
احنه طلعنا للطارمه..جنه ننتظرها باوعت على موبايلي ٣مكالمات من مها..مارجعت خابرتها عفتها
دك الموبايل على صادق
صادق:هلا فراس... هس جايين
سده وزج على نور
صادق:يلااااااا
نور:اجيت اجيت
رحنا صعدنا بالسيارة وهي اجت
طلعنا وصلنا بيت عمامي .. جانت سياره عمي ابراهيم موجوده ..
نزلنا جوة.. صابرين وسرى كلهن متحضرات وفراس وعلاوي ..الكشخه مالتهم فول .. وجده لابسه الصايه البيها لمعه .وفراس جايب وياه بقلاوة وببسي وجكليت
فراس:شوكت يجي الشيخ
صادق:هو كال اني اجي..يعرف البيت يندله
ابراهيم:يلا خل نمشي
طلعو عمي وصادق والولد واحنه وراهم
صابرين:اتمختاري ياحلوة يازينه
رنا:ههههه
صابرين:اريد اشوف (حكيمه )شمخليه مكياج...تقصد على مها
سرى:هههههههه
علاوي:هيي صوتجن
سرى:دخلونا نضخك عاد
سراب:ههه
وصلنا بيتهم..هما سلمو عالزلم وطبو للربعه
واحنه طبينا جوة..اجت ام مها سلمنا عليها..حان سلامها حار ومبتسمه كلش
هم اجت بنتهم الجبيره والاصغر
سلمنا عليهم وكعدنا بالصاله مالتهم
ام مها:ياهلا بيكم ياهلا بأم صادق كل الهلا
جده:والمهلي
اجت اختها قدمت مي النا
شاورتني سرى
سرى:وين مها
رنا: مادري.هس.اسال اختها
سألت اختها الصغيرة بصوت واطي
رنا:وين مها
اختها الصغيرة:جوة بالغرفه
رنا: امشي اخذيني عليها
رحت وياها للغرفة
جانت تلف الشال
رنا:هلووو
مها:هههه هلوووات
سملت عليها
رنا يووولي ويينج
مها:لج سكتي صارت بيه دگه ناقصه..خليت مكياج كامل واجت اختي الغشيمه تاتجرلي ايلاينر لاصتها لوص وراحت
اله غلست كامل ورجعت من جديد اخلي مكياج
رنا:ووووي هس وكتها الا ايلاينر يعني
مها:اي والله .
رنا:اصلا طالعه تخبلين..يلا امشي ينتظرنج
مها:اي اي..بس خلي اكعد شويه
رنا:شتكعدين يلا امشي
مها: تمام
طلعت وياها للصاله
سلمت على جده وسرى
تاتسلم على صابرين..خطيه تبلهثت وداست على رجل صابرين
صابرين:ااااه
باوعنا عليها
مها:وووي مادري بييج والله
ام مها:شجاج يابنتي
جده:خطيه تخربطت عادي ماعليها شي
صابرين:عادي عادي
وجه صابرين أحمر
اريد اضحك بس مووكتها..سرى وسراب نفس الشي ماسكات ضحكتهن بالكوة
كعدت مها وكعدت يمها
مها:اي عفيه لاتعوفيني
رنا:ههه ماعوفج
كعدنا نسولف كلنا .وسالفه جرت سالفه
جده:هس اهمشي يمسكون العقد..حتى ياخذون راحتهم ويكدر يشوفها وتشوفه
ام مها: اي صحيح لازم
بعد شوي اجت اختها الجبيره وكالت :يكولون اجه الشيخ
اباوع على مها تعصر ايد بايد وتوترها مبين من بعيد
رنا:شبيج مهاوي
مها:مابيه شي ...اريد تفض
رنا:تفض تفض..تونسي هاي لحظات حلوة كلش ومميزه
مها:اي اي
بعد شوي اجه اخو مها
اخوها:مها تعالي
رنا:يلا يلا روحي
راحت مها..
واحنه بقينا ننتظر على نار
بعد شوي اجت وابتسامتها ماليه البيت كله
صابرين:كللللووووويششش
جده:مبروووك مبرووووك
كمت بوستها
رنا:يعمري الف مبروك تستاهلين
صابرين ذبت جكليت فوكهم..
نوب صار كله براس ام مها
سرى:كافيج صابرين
مها احسها بغير عالم..متونسه ومتخربطه وماتعرف شسوي
احسها تايهه
مها:امشي رنا ويايي
كمت وياها.. رحنا للمطبخ
جانن خواتها يحضرن تقديمات وگهوة بالصياني
رنا:تعاي احجيلي عن شعورج
مها:فرحه جبيره كلش كلش..
رنا:من طبيتي جوة شفتي فراس
مها:لا ماطبيت جوة كلش..وكفت يم الباب..ماشفت كل احد جنت مدنكه راسي واصلا خجلانه كلش نوب ابوي واخوتي كلهم موجودين...ووولج خجلت كلش..وفرحانه هم هواي هواي
رنا:ههههه صرتي جنتنا
مها:يعني هس اني صرت مرته مو
رنا:اييي مرته
مها:شبساع يربي..قبل فتره شلون جان وضعنا
رنا:اي والله بسرعه.. المهم تمت على خير
مها: الحمد لله
رنا: اكلج مانخليله ملح شي بهارات بالفنجان ماله
مها:هههه لا خطيه..واصلا ماعرف بعد يافنجان راح يشرب
رنا: باوعي خل نخلي بواحد من الفناجين ونكول لاخوج يدير الفنجان اله اويخلي يمه
اخت مها:اي اي خوش فكره...بلكي هو يشربه
مها:هههه بكيفجن
اختها طلعت الملح...اني اخذته منها وخليته بالفنجان
رنا:انطيتي شكو ابهاارت عدكم
طلعت اختها البهارات وكمت اخلي
مها:لاخطيه لاتخلين هواي
رنا:انتي مالج علاقه خليت وكملت..وحضرنا الصياني
اجه اخوها أخذهم..واخته وصته
مها:ولج خطيه ليش هيج سويتي..من هس راح اكله هاي سوالف رنا مواني
رنا:اي عادي اذا تردين اني اكله المهم يشرب الفنجان
هم صبن النا ورحنا كملنا كعدتنا بالصالة
وكلت لصابرين ولسرى انو خلينا ملح وبهارات بالفنجان
صابرين:اي يولن اي خربن طعم حلكه..
سرى:ههههه
بعد سوالف ونقاشات تأخر الوكت ..دك صادق عليه
صادق:يلا مشينا
رنا:ماشي..
سديته..
رنا:يلا جده صادق يكول تانروح
كمنا وطلعنا..وكفو شوي بالطارمه بعدينا طلعنا
هستو طلعنا من بيتهم
سراب:شفتني شون مها داست على رجل صابرين
رنا:هههههههه والله فلاتام بيها
صابرين:اييي ولجن لي هس رجلي توجعني
سرى:ههههههههه شكد ماقلدتي عالناس
صابرين:وجع لاتتمضحكن
طبينا للبيت...جده باست فراس وباركلته واحنه هم كلنه باركناله.. كعدنا بالحديقة..
صابرين:خوش كهوة مو
باوعت على فراس وكتله
رنا:ها فراس خوش گهوة مو
فراس سكت وصفن عليه
كمت اعد بأصابعي واحجي
رنا:خليتلك ملح وفلفل اسود..ماكو شي ماخليته بفنجانك
صادق باوع عليه باستهزاء
صادق:هاي انتي اللي مخليه...يحضي اني شربته ..
الكل كامت تضحك
رنا:صددددك تحجييي؟؟
صادق:ايييي صدك احجيييي
ضحكت ضحكه عبالك صار سنين ماضاحكه
صادق ضحك على ضحكتي
صادق:يووولي فضحتيييناااا اشششش
علاوي:انيي كول شبي صادق ماكملهاااا بس شرب شويه
اريد اسكت اني وسرى بعد مانگدر
رنا:ياااايمااااا متتت
سرى:هههههههههه
صادق:مكيفه زاد تخلي لرجلها...ماكفاج البهارات اللي اكلتها بالشقه لاحگتيني هنا
رنا:هههههههههه ياربي
صابرين:فرااسوووك شوف رجلي شوف..خطيبتك داست عليها اله ورمتهاا
فراس:كفووو ماتلام بيج
سراب:هههههههه
صابرين:ياقادي البخت هيج تنطي بيه
فراس:هاي شكد ماحجيتي عليها
صابرين:لالا هي عميه وماتندل دربها
فراس: فديتها
صابرين انحمست
صابرين:ديلا عاد من هس تفدي.بيها( ام مذاويل)
سرى:شنو يعني ام مذاويل
صابرين: مصطلح مايعرفه بس جماعتي
سرى:هههههه
فراس:اني اترخص من عدكم اروح احجي ويه الحب
جده: روح وليدي روح
صابرين: ماشاءالله من هسس...زين صدك تسوي خطوبه مو
جده:اي نسوي ليش مانسوي
فراس:ان شاء الله..
رنا:من هس لعد تسوونها قبل لااجيب
جده:اي نسويها نهايه الشهر
الطلعه هاي كلها نور جانت ويانا بس ماحجت شي ولاسولفت أو حتى تفاعلت..
تاخر الوكت ورجعنا للبيت
غيرت ملابسي وتمددت بمكاني
اجه صادق تمدد يمي
صادق: تعالي
رنا: وين
صادق: بحضني يعني وين
رنا:مايكفينياحضنك..اني وابني ماكيفينا
صادق:يكفي يكفي تعالي
تقربت أكثر يمه
خله ايده على بطني
صادق:اوف شكد أحبكم
رنا:احنه هم نحبك
صادق:انداري حتى احضنج من وره.. ماريد اخنگه
انداريت وحضني من وره
وبقى يسولف وياي
صادق: أكلج
رنا:كول
صادق: إني لوماماخذج شجان وضعي هس
رنا:جان اخذت غير وحده وهم متونس وياها
صادق:منو كال...لا ماضن ابد اكون متونس ومرتاح مثل ما وياج
رنا: وجان اني اخذت غيرك
صادق:قز القرت اي والله...جان ضليت اللوم بروحي طول عمري
رنا:ههه
صادق: المفروض من اول مااجيتي عالدنيا اخذج
رنا:هواي حبيتك إني هواي وعانيت هواي .
صادق:على كد ماعانيتي على كد مااخليج ترتاحين ان شاء الله
رنا: ماعندي شك بهالشي
بقينا نحجي لحد ما تعبنا ونعسنا ونمنا
في بيت العم سالم)
مكالمه فراس ومها
فراس:الو
مها:الو
فراس: شونج
مها:بخير انت شونك
فراس:زين لان سمعت صوتج
مها:......
فراس:شو سكتي
مها:لا هيج
فراس: شنو شعورج اليوم بعد مامسكنا عقد
مها:حلو ويخبل
فراس:فديت اليخبل بصوتج
مها:ههه
فراس: احبج هواي مها
مها:واني هم
فراس: وانتي هم شنو
مها:احبك هواي
فراس : فديتج....اليوم من احلى ايام حياتي
مها: اني هم والله
جان اتصال حيل حلو بين فراس ومها
راح اسرع الأحداث شوي
نهايه الشهر فراس سوى خطوبه اله... هادئه وبسيطه بس احنه وهما
بهاي الفتره رحت للسوك ويه سرى اجهز للطفل..اخذت شكو شي أحتاجه لان اني هاي اول طفل اليه فما عندي اي شي
فعلى خبرت سرى اخذت كلشي ..وخليت الشغلات اللي احتاجهم بوكت الولاده بجنطه بصفحه
صابرين وجده كالن الي ولصادق بس يصير موعد ولادتي ياخذهن ويايه
فإني جنت مرتبه وضعي
مر الوكت وصار موعد ولادتي
إني اخذت إجازة من الدوام بعد ماطبيت بشهري باسبوع لان جنت حيل تعبانه وماكدر اروح واجي .وجنت اتوقع بأي لحظه اولد
كعدت الدنيا صبح ..جان الوضع طبيعي.. صادق بادوام وسراب وحسن بالمدرسه..بس نور موجوده
صارت الساعه ١٠ ونص حسيت بوجع وليات قويه
اله كعدت عالكرسي..لااكدر اكوم ولااكدر اتحرك . بقيت هيج شوي
بعدهاا راحت الليات وكدرت اكوم . رحت تمددت بغرفتي
كل شوي تجيني ليه قويه..كمت اعيط
اجت نور على صوتي
نور شبيج
رنا:عفيه خابري ابوج خل يجي
نور:وين موبايلج
رنا:بالجرار
راحت اخذت الموبايل ودكت على صادق
نور:الو اكلك بابا......... مادري يمكن....
يريد يحجي وياج
اخذت الموبايل منها
رنا:الو
صادق:شبيج
رنا:كلش متوجعه يمكن راح اولد
صادق:هس جاي جاي
جنت متمددة عالتخت كل شوي اتوجع يروح الوجع
بقيت على هاي الحاله .. اجت سراب وحسن من المدرسه
بعد شوي هو اجه
صادق:هااا وضعج
رنا: اكو وجع قوي كل شوي يروح ويرجع
صادق:خل اخذج هس
رنا:بس خابر جده خل تجي وياي
صادق:هس امر عليها
اريد اغير ملابسي ماكدرت اله هو عاوني
كتله يجيب الجنطه اللي مخليه بيها الشغلات اللي احتاجهم
طلعت وياه بس بالكوة جنت امشي
صعدت من وره..بطريق وضعي هدء شوي
صادق خابر على جده وصابرين كال الهن تحضرن راح اجي اخذجن..
وصلنا بيت عمامي..كبل صعدت جده ويايا
جده:هاا رنا شونج هس
رنا:هس شوي احسن
جده: صادق مر على صابرين ترا تنتظرنا
صابرين:هس
رحنا لبيت صابرين
دك هورن حتى تطلع..بس ماطلعت بسرعه
اتصل عليها
صادق :ادددري وييينج انتيي.....يلاااا بسرعه اني يم الباب
اجت صابرين تركض.صعدت من كدام
لي هس وضعي زين..بنص الطريق
صار وجع فضيع..حسيت نفسي تحنطت بعد ماكدر حتى اعيط..بس جنت احجي بالكوة
رنا: جده...بعد ماكدر
جده:شبيج بنتي
رنا:عفيه جده بعد ماتحمل الوجع 💔
صادق خطيه جان كلش متوتر وقلق.حتى كام يسوق سريع.
جده:على كيفك هس نصل مابقى شي
وصلنا المشفى الأهلى..جانت طبيبه هنا اراجعها دايما
فتحت الباب صابرين حتى انزل
بقيت بمكاني مثل فاقده ماكدرت انزل بسرعه
راد صادق ينزلني..ماقبلت عيطت علي
بمدي محد يلمسني او شي
رنا:صبرو صبرو اني انزل
صابرين:يارنا شتنزلين انتي.
رنا:مالج علاقه هس اني انزل
كلما يحاولون ينزلوني اعيط عليهم ومااقبل
كتلهم صبروا عليه شوي اني انزل
عبالك راح يروح الوجع اذا صبرو عليه..هيج جنت اضن
شفت الوجع مابي مجال يروح
قويت نفسي ومسكت ايد جده وصادق ونزلوني
بعدها ماذكر حيل التفاصيل
بس اذكر طبيت لغرفه اجت طبيبه فحصتني وكالت
الطبيبه:عندج توسع قوي هس تولدين
اخذولي فحوصات وسسولي طبله
واجت قابله تولدني..جده وصابرين ويايا جانن
جنت اذكر الله بهاي الاثناء بس الله جان بين عيوني
الوجع شكد ماقوي مابيه حيل انو اعيط أو شي لا..بس جنت أعن وأون..واكيد اللي ولدن ولاده طبيعيه يعرفن هاي المعاناة
من بعد هالوجع الفضيع ولدت والحمد لله .بعدها حسيت جسمي ارتخى تماما ونمت .
جده اخذت الطفل..غلسنه ونضفنا ولبسنا ملابس..اني جنت نايمه مادري بتفاصيل ..
ماطولت هواي وكعدتني صابرين
لمن كعدت حسيت على نفسي اني وين
صابرين:رنا كعدي بالبيت تنامين
رنا:هاااا..ايي
فطنت للطفل
رنا:وينه وينه خلي اشوفه
صابرين:يووم جيبي تريد تشوفه
جابته جده خلته يمي
باوعت علي... دمعت عيوني من الفرحه❤️
شعور ابد ابد ماينوصف..كلش كلش حلو
جان ابيض واحمراني بنفس الوكت .مغمض عيونه
لمست اديه ناعمات هواي
رغم انو هس ولد بس عنده شعر..ولونه اسود
جده:اللهم صلي عالنبي يارب تبارك بي وتجعله ذريا صالحه لصادق
صابرين:امين يارب
كام يبجي
صابرين:رضعي رنا
رنا:هسس ؟
صابرين:اي هس
رنا:خاف موزين
صابرين:ههه شون موزين رضعي يلا
رضعته شوي وسكت بعدين وخر
رنا:صدك وين صادق
صابرين:خابرته قبل شوي كتله ولدت الحمدلله
رنا:اي وينه خل يجي يشوفه
صابرين:موهس..من تتحولين للغرفه الخ يجي يشوفه
دك موبايل جده
جده:والله خبصتني سرى كل شوي تدك
المهم بعد ما كمت بالكوة وغلست تحولت للغرفه الخ
والطفل يم جده جان
اباوع على جده اشوفها كلش كلش فرحانه بالطفل وتغنيله من هس وهو مايسمع ولايعرف شي بعده
صابرين :الوو ها صادق وينك ...اي تحولنا تعال...هس طالعتلك
طلعت صابرين..بعدين اجو اثنينهم
صادق جان حيل حيل متلهف يشوفني ويشوف الطفل
وابتسامته بعيونه واضحه
حتى اني من شفته رغم وضعي ومابيه اي حيل ابتمست إله
اول شي سواه قيل لايشوف ابنه
باسني من راسي
صادق: الحمد لله على سلامتج يروحي
رنا:يسلمك حياتي
جده: تعال شوفه
راح يمه
جان يباوع علي ومبتسم من كل كلبه بدون مايحجي
بعدين إذن بأذنه اليمين....وكمل الاقامه باذنه اليسار
صابرين:حلو ماشاء الله ربي يحفظه الكم
صادق:عوزه مايطلع حلو..امه وابوه حلوين شيريد بعد
رنا: جده شوكت نرجع
صابرين:هس تجي الطبيبه ونشوف شتكول اذا كالت نرجع عادي هس نرجع
رنا:روحي شوفيها
صابرين:خلي اخذ الطبله مالتج واروح عليها
صادق:لاخلي تجي بنفسها
راحت صابرين بعد شوي اجت هي والطبيبه
جيكت وضعي..من ناحيه الضغط والتنفس وهم وضع الطفل
الطبيبه: بس يخلص المغذي تكدرين تطلعين عادي
والعلاج كتبته الج بالورقه أخذي من تطلعون
مبروك البيبي يتربي بعزكم ان شاء الله
صادق:مشكوره
طلعت الدكتوره.وجنت انتظر يخلص المغذي حتى ارجع للبيت اكمل نومتي
بهذا الوكت الدينا عصريات
دك موبايل صادق
صادق:هلا علاوي.....هس بس شوي ونرجع.....لبيتي نروح...اي امي وصابرين يجن ويانا ....ماشي روحو
جده:كول لسرى خلي تجيب العلاج مالي وهدوم اللي هم
صادق:اكلك كول لسرى علاج امي وملابس الها...لان راح تبقى يمنا ...ماشي هلا
خلص المغذي وطلعنا للبيتنا
جنت بعدني موتمام احس نفسي بيه دوخه ووجع
وصلنا البيت جان فراس وعلاوي وسرى موجودين يمنا
تلكونا لمن وصلنا ...سلمو وباركو هم
رحت لغرفتي..لكيت سرى فارشه فراش الي بالكاع
رنا: صابرين..بس طلعيلي هدوم اريد اسبح اول شي
صادق:لعد لبين ماتطلعين صابرين سويلها شي تاكله
طبيت للحمام وكلت لسرى تطب وياي
باوعت بعد دم هواي موجود
سبحت على كيفي وسرى عاونتني
خلصت وخليت فوطه وطلعت
تمددت بفراشي...واني نضيفه..باوعت للطفل
ابد مانسى هاي اللحظه وهذا الشعور حسيت براحه كلش جبيره..صادق كاعد مقابيلي
وجده يم الطفل ..وحسن يمها يباوع للطفل ومبتسم
وسرى وسراب بالغرفه هم
اجت صابرين شايله صينيه اكل بيها مشاوي
جنت جوعانه شوي..اكلت بس مو هواي
مسحت اديه بكلنس مرطب..
كام يبجي..
جده:رضعي ترا جوعان لان مارضع وكت جنتي بالمشفى
رضعته شوي وشبع ..
فجاة نمت.. بدون وعي
اخذتني نومه حيل حلوة
بعدين كعدت على صوته يبجي
فتحت عيني
رنا:شكد الساعه
صابرين: ٩ ونص
رنا:صدك
صابرين:اي.. صدرج بي حليب
رنا:اي بي
صابرين:احسه ماكاعد يشبع رضعي زين
طلعت صدري ورضعته...هالمره طول لحد ماشبع
جنت اباوع علي مفتح عيونه..
رنا:شوفي شكد حلو
صابرين:اي يخبل ماشاءالله
رنا:يشبه منو
صابرين:احس بعده مامبين مايشبه احد
مسحت على راسه..شعره مثل الحرير كلش ناعم
رنا:اكلج صابرين..ههه لاتضحكين علي يعني هس هذا اللي مو
صابرين:اي طبعا ابنج هذا
رنا: صادق وينه
سرى:ويه الولد
صابرين: صادق كل شوي يجي يشوفه وانتي نايمه...كل شوي يباوع علي
رنا:ههه.
سرى:اي رنا شلونه وجع الولاده
رنا:الله يساعد كلمن تجيب...يايما ماكو هيج وجع ابد
سرى:اي والله يهد الحيل
رنا: خليها سكته... الحمد لله على كل حال
صابرين:صدك شو نور ماكو
سراب:دتغسل مواعين
صابرين:شافت أخوها لولا
سراب:اي لمن جانت نايمه رنا اجت باوعت شوي وراحت
صابرين: اها...ماشفتها اني
رنا:جده وين
سرى:وياهم..كالو من تكعد كوليلنا.
بعد شوي اجت جدة
جده:رنا تعدلي تايطبون الولد.
تعدلت ولفيت الشال
اجو كلهم وصادق وياهم
فراس:وينه وينه نريد نشوفه زين
صابرين:هيانا تعالو شوفو
جانو يباوعون علي بتركيز
علاوي:يبووه يبووه من هس الحواجب معقودات وجه ابوك
صادق:ههههه
فراس: المهم لايدرس شريعه ويخبصنه
جده:عاد اذا طلع وجه ابو..جا شرايحلنا
صابرين:اي والله
سراب:شوفه بابا شون ادينه بيض ووجهه احمر
جده:اي ابوج جان هيج هو وصغير ..ماكو بحلاته
فراس:اهووو عاااد تاتكول حلووو
سراب:ههههه
علاوي: ..صدك شراح تسمونه
صادق:قصي
علاوي:حلو ...شفطنك علي
صادق:شفت رؤيه والله
علاوي: مالك علاقه بيهم اطلع على عمك
فراس:من زينك حتى يطلع عليك..
علاوي: على اساس انت شلونك ديلا يلا
صادق:هذول عمامك المخابيل
الطفل جان يباوع ويرمش على كيفه كأنما مصدوم منهم
جنت اباوع عليهم كلهم
الكل جانو فرحانين بي ويحجون ويسولفون وياه من كل عقلهم ..نور ماجانت موجوده..
بعد شوي
صادق:تعاااي نوور
باوعت جانت واكفه قريب عالباب وتباوع
نور:ها بابا
صاد:تعالي
طبت جوة
صادق: تعاي شوفي اخوج
باوعت علي شوي
نور:حلوو
بقو حوالي لحد ماتاخر الوكت
علاوي:يلا سرى تحضري حتى نروح
صادق:عليش تروحون ابقو هنا
فراس:لا والله نروح.. مايصير البيت فارغ
سرى:باجر نجي عادي
طلعو وصادق طلع وياهم بعدين رجع
صادق:وين الابره هس وكتها لازم تضربيها ...طلعيها صابرين
طلعتها.. وصادق حللها
وضربني اياها بالكانولا
صادق:شون تحسين نفسج هس
رنا:زينه الحمدلله
صادق:جوعانه ؟
صفنت شوي
رنا:اي يمكن
صادق: ماتكولين لعد..خما اله اسألج
اندار على صابرين
صادق:كومي يصابرين سويلها شي تاكله
صابرين:هس احميلها الطاوة لان مااكلت منها بس قليل
بقى كاعد يمي ويحجي وياي ..جنا نباوع اثنينا لقصي وهو نايم
صادق:هذا مبينه يحب النوم مثلج
رنا:فديته
طلعت جده من الغرفه..مابقى احد
كام سد الباب ورجع كعد يمي
جنت اباوع علي بدون ماحجي .بس مبتسمه
باسني من حلگي عالسريع قبل لااحد يطب
صادق:شگد طيب هذا الحلگ
رنا:ههه
صادق: احبج هواي
رنا:واني هم احبك هواي
انفتح الباب.. صابرين جابت الاكل . وجده اجت وياها
جنت اكل . وصابرين وصادق يباوعون لقصي
صابرين:يربي شحسنه وشحلوة ..اريده يكبر بعد حتى تبين ملامحه
خلصت اكل وكمت غسلت وفركت اسناني سمعته يبجي
رجعت عالسريع للغرفة
رنا:ها شبي
صابرين:يجوز جاع
صادق:عرف بيج اكلتي..كال هس صار خوش حليب خلي اشفطهن
رنا:ههههه
رجعت لمكاني ورضعته... حيل حلو الشعور وهو يرضع مني
كمت احس انو هالشخص الصغير من لحمي ودمي واخيرا الله حققلي هالشي
صادق: صابرين افرشي لامي هنا.. وانتي هم نامي هنا..
رنا:وانت وين تنام
صادق:انام بالغرفه
صابرين فرشت فراش لجده يمي بالغرفه
وهي نامت عالتخت..خابرت محسن وصته على جهالها
كالت باجر اجيبهم هنا
طفه الضوه صادق وطلع من الغرفه
قصي جان بالحضن ماله يمي وجده هم يمه
نمنا..وبنص الليل كعدت على صوته يبجي
تعدلت واخذته من الحضن وخليته بحضني وكمت ارضعه خلص رضاعه
ماسكت بقى يبجي .كعدت جده على صوته
رنا: جده شوفي ليش يبجي
جده:رضعتي
رنا:اي بس شو بقى يبجي
جده:عادي هس يسكت...
تأخر وهو يبجي...اني هم كمت ابجي
كعدت صابرين وشغلت الضوه
رنا:جددده عفيه ليشش يبجي
جده:هاي شبيج يمعوده وإذا يبجي
رنا:خاف بي شييي
جده:مابي شي
انفتح الباب واجه صادق
صادق:شبي
باوع عليه
صادق:وانتي شبيج
رنا:شو مايسكت
صابرين اخذته مني ورجعته للحضن..وره شوي سكت ونام
صادق:وانتي عليش تبجين شبيج
جده: كامت تبجي على بچاه
صادق:صدك تحجين..
صابرين:ترا طفل عادي يبجي واذا
رنا:ماريده يبجي خطيه
صادق:ههه والله يالله ...يلا ارجعو نامو
طفه الضوه واجه تمدد ورايا وحضني
صادق:يلا نامي
رنا:اي هس
صادق:كافيج تباوعين علي..نايم بسابع نومه
رنا:ماسمعته شون يبجي خطيه
صادق:بلي سمعته لعد شون كعدت واجيت هنا ..يلا نامي
نمت وهم الفجر كعد بس من رضعته سكت
جنت مگضيتها هيج وياه..واتخبل ولايبجي لازم كبل ارضعه حتى مايبجي
الصبح كعدت على صوت سراب وحسن
فتحت عيني صادق ماموجود يمي
قصي جان مفتح عيونه شويه
رنا:وين ابوج
سراب: موجود
كعدت جده وصابرين
صابرين:يولو شعدكم فوك روسنا من الصبح.. ماكافي هذا ماخلانا انام كل شوي كاعد
سراب:هههه نريد نشوفه
جده:مالج علاقه انتي خلي يشوفون اخوهم
طب صادق للغرفة
صادق:هاا ماكعد الأفندي
سراب:بلي كاعد
حسن:مايقبل يفتح عيونه كامل
صادق:شو وخرو عنه خل اشوفه
صابرين:خبلتو الطفل كل شوي وجه جديد فوكه
صادق:ها وليدي شونك
قرب راسه منه
صادق: اهاا.يكول اني زين بس لوما هاي صوتها مزعج......تقصد مني....اهاااا يكول عمتي
سراب وحسن:هههههه
صادق:والله حقك...زاعجتنه كلنا بقت علييك.....شنو شنو اطردها ...لالا خطيه عاد موهيج هالله هالله بعمتك
صابرين:اييي ماااااشاااءالله من هس تخربه عليه
رنا:ههههه
صادق:كومي سويلنا ريوك كومي
صابرين:ماكوم اذا ماتخلي ابنك يعتذر مني
صادق:هههه
صابرين:يلا اشوف
صادق:اكلك وليدي اعتذر منها.......بس هالمره لخاطر امك حتى تتريك....اي .....يكول اعتذر منج ياعمتي
صابرين:اي هس خوش
جنا نضحك على سوالفهم
كامت صابرين وسوت ريوك النا
عبر الوكت وكل تفاصيل الوكت جانت على قصي
شعوري بي مخليني احس نفسي مالكه الدنيا من كبر فرحتي بي
العصر اجه فراس ومها وام مها يسلمون عليه
ماخليناهم يروحون..بقو عالعشه... وره العشه اجو بيت عمي إبراهيم كلهم..
يوم بعد يوم اللاحظ ملامح قصي صارت اكثر شبه لصادق
وكلهم جانو شايفين هالشي
قصي قطعه من روحي..هو فعلاً قطعه من روحي..لام صادق هو روحي كلها.....يتتبع
لهنا وينتهي الجزء الثاني... انتظروني للجزء الثالث.ومثل ماكتلكم احداثه مستمره.. فتره واكتبه ابقو متابعين للحسابات...واهم شي لا تنسون الأحداث