အခန်း(၅၈) သုတေသန အဖွဲ့အစည်း
"စိတ်မပူပါနဲ့ ပရော်ဖက်ဆာကြီး။ သူကတိ မဖျက်လောက်ပါဘူး။ သူ့ပုံစံက စကားမတည်တတ်တဲ့လူ မဟုတ်လောက်ဘူး"
"မသိပါဘူးကွာ။ ငါ့တို့ဆီက ပါရမီရှင်လေးကို သူများတွေ လုသွားမှာ ကြောက်နေတာ" ပရော်ဖက်ဆာက ဆို၏။ ဘာမဆို ကြိုတွေးထားတာ ပိုကောင်းပါသည်။
တခြား ဆေးဝါးသုတေသန အဖွဲ့အစည်းများကလည်း ဒီလိုပါရမီရှင်မျိုးကို သိမ်းသွင်းဖို့ ကြိုးစားချင်ကြမှာ သေချာသည်။
ထို့ကြောင့် သူတို့ဘက်က အရင်ဆုံး လှုပ်ရှားရမည်။ သူတို့ ဆက်သွယ်နိုင်ပါက စာချုပ်ကို အမြန်ဆုံး ချုပ်ဆိုချင်သည်။
ဒါက ဘေးအကင်းဆုံးနဲ့ စိတ်အချရဆုံး နည်းလမ်း ဖြစ်ပါသည်။
"ဟုတ်ကဲ့ပါ ကျွန်တော်နားလည်ပါတယ်။ ကျွန်တော်သူနဲ့ ဆက်ပြီး ဆက်သွယ် ထားလိုက်ပါ့မယ်" ချန်းယွီလည်း ထို ဒေါက်တာ F.S အကြောင်းကို အတော်လေး စိတ်ဝင်စားမိသည်။
SCI မှာ ဒေါက်တာ F.S တင်ထားသည့် သုတေသန စာတမ်းကို သူမြင်ပြီးပါပြီ။ တချို့အကြောင်းအရာများအတွက် အကြံဉာဏ်တောင်းချင်ပြီး ဆွေးနွေးချင်မိသည်။
တနင်္လာနေ့ နေ့လည်ခင်းတွင် ကျမ့်ယိလင်လေး နေ့လည်စာ စားပြီးနောက် ဆရာမကို ခွင့်တောင်းခဲ့သည်။ သူမ ဗိုက်နာနေသည်ဟု ဆရာမကို ပြောကာ ဆေးခန်းကို သွားခဲ့ပါသည်။
သို့သော်လည်း သူမ ဆေးခန်းမှာ အကြာကြီး မနေခဲ့ပါ။ ကျမ့်ယိလင်လေး ကျောင်းမှ လစ်ထွက်လာခဲ့ပါသည်။
သူမ ကျောင်းဂိတ်ပေါက်မှ ဘတ်စ်ကား စီးလာခဲ့၏။ လမ်းမှာလည်း ဘတ်စ်ကားတွေ ပြောင်းစီးခဲ့ရပါသည်။
ဟွေ့လင်သုတေသန အဖွဲ့အစည်းက ဟန်းယွမ်မြို့၏ လူနေပါးသော နေရာတစ်ခုတွင် တည်ရှိသည်။ ၇၁၆ လမ်းမကြီးရဲ့ ဂိတ်ဆုံးမှာ ရှိပါသည်။
ဂိတ် ၂ ဂိတ် ၃ ဂိတ်လောက် ကျန်သောအခါ ဘတ်စ်ကားပေါ်မှာ ခရီးသည် ၂ ယောက်သာ ရှိပါတော့သည်။ တစ်ယောက်က ကျမ့်ယိလင် ဖြစ်ပြီး နောက်တစ်ယောက်က သက်လတ်ပိုင်း အမျိုးသမီးတစ်ယောက် ဖြစ်သည်။
အမျိုးသမီးရဲ့ မျက်လုံးတွေက နီမြန်းနေပြီး ခေါင်းထဲ အတွေးတွေ များနေသည့်ပုံစံပင်။
ဂိတ်ဆုံးကို ရောက်တော့ ထိုအမျိုးသမီးနဲ့ ကျမ့်ယိလင်တို့ နှစ်ယောက်စလုံး ဘတ်စ်ကားပေါ်မှ ဆင်းလိုက်ကြ၏။
ဘတ်စ်ကားပေါ်က ဆင်းလိုက်တာနဲ့ ထို အမျိုးသမီးက အဖွဲ့အစည်း၏ ဝင်ပေါက်သို့ အမြန်ပြေးသွားခဲ့သည်။
ဂိတ်တံခါးကြီးက လုံခြုံရေးမြင့် အီလက်ထရောနစ် သတ္တုစပ်တံခါးဖြစ်သည်။ ထိုအမျိုးသမီးက ဂိတ်တံခါးကြီကို အကြာကြီး တွန့်ဆုတ်ကာ ရပ်ကြည့်နေခဲ့သည်။ သို့သော်လည်း သူမ တံခါးကို မဖွင့်နိုင်ပါ။
ထို့ကြောင့် အမျိုးသမီးက တံခါးကို ထုရိုက်ပြီး အကျယ်ကြီး အော်ဟစ်လေတော့သည်။
"ကျေးဇူးပြုပြီး! ကျွန်မ တောင်းပန်နေတာပါ! ကျွန်မယောက်ျားကို ကယ်နိုင်တဲ့ ဆေးဝါး ရှင်တို့ဆီမှာ ရှိတယ်လို့ ဆေးရုံကပြောလိုက်တယ်။ ကျေးဇူးပြုပြီး! ကျွန်မတောင်းပန်ပါတယ်။ ကျွန်မ ယောက်ျားရဲ့ အသက်ကို ကယ်ပေးပါ!"
ထိုအမျိုးသမီး၏ အော်သံက ပိုပိုပြီး ကျယ်လာပါသည်။ အော်ဟစ်ရင်းနဲ့ မျက်ရည်တွေက မျက်နှာပေါ် စီးကျလာသည်။
အမျိုးသမီးက ဆူညံလွန်းသဖြင့် လုံခြုံရေးအစောင့် ထွက်လာပြီး သူမကို တားလိုက်ရပါသည်။
"ကျေးဇူးပြုပြီး စိတ်အေးအေးထားပါဦး အစ်မရယ်။ မေးစရာရှိရင် ဒါမှမဟုတ် ကိစ္စ တစ်ခုခုရှိရင် ကျွန်တော်တို့ အဖွဲ့အစည်းရဲ့ ဝက်ဘ်ဆိုက်မှာ လျှောက်လွှာတင်လို့ရပါတယ်။ သက်ဆိုင်ရာ လူနာ အချက်အလက်တွေကို ဖြည့်ပြီးသွားရင် အဖွဲ့အစည်းက လျှောက်လွှာတွေကို စစ်ပေးပါလိမ့်မယ်။ အစ်မရဲ့ ယောက်ျားက လိုအပ်ချက်တွေနဲ့ ပြည့်မှီမယ်ဆိုရင် ကျွန်တော်တို့ အဖွဲ့အစည်းက ပြန်ဆက်သွယ်ပေးမှာပါ"
"ငါ့ကို လာမလိမ်နဲ့! ငါလျှောက်လွှာတင်ပြီးတာ ၁ လကျော်ကြာနေပြီ! ဘယ်သူမှ အဖြေ ပြန်မပေးဘူး! ငါ့ယောက်ျား သေတော့မယ်! နင်တို့က ငါ့ကို လာစောင့်ခိုင်းနေသေးတယ်! သူသေတဲ့အချိန်ထိ စောင့်ခိုင်းနေကြတာလား!"
"အစ်မ စိတ်အေးအေးထားပါဗျာ။ အစ်မရဲ့ ယောက်ျား အရွေးမခံရဘူးဆိုရင် အစ်မယောက်ျားရဲ့ ရောဂါဝေဒနာက လက်တွေ့ စမ်းသပ်ဆဲ အဆင့်မှာပဲရှိသေးတဲ့ ဆေးဝါးအသစ်နဲ့ သင့်တော်မှု မရှိလို့ ဖြစ်မှာပါ"
"နင်လိမ်နေတာ! သင့်တော်မှု မရှိဘူးဆိုတာ ဘာကို ပြောတာလဲ။ ငါတို့မှာ ပိုက်ဆံမရှိဘူးလို့ပဲ နင်တို့တွေးတာ! အဲ့တာကြောင့် ငါတို့ကို ဆေးဝါးမပေးတာ! နင်တို့က သူဌေးတွေကိုပဲ အဲ့ဒီဆေးတွေ အကုန်ပေးကြတာ!"
အမျိုးသမီးက လုံခြုံရေးအစောင့်ရဲ့ စကားကို လုံးဝ နားမထောင်ပေ။ သူတို့ ပိုက်ဆံ မတတ်နိုင်သဖြင့် အဖွဲ့အစည်းက သူတို့ကို ဆေးဝါးမပေးဘူးဟုသာ ခေါင်းမာမာ စွပ်စွဲနေခဲ့သည်။
လုံခြုံရေးအစောင့် စိတ်ပျက်လက်ပျက် ဖြစ်သွားရပါသည်။ "အစ်မ အဲ့လို မဟုတ်ပါဘူးဗျာ။ ခင်ဗျားယောက်ျားက လိုအပ်ချက်နဲ့ မကိုက်ညီဖို့ဆိုရင် မမှန်ကန်တဲ့ ဆေးတွေ ပေးလိုက်လို့မရဘူးလေ"
ရုတ်တရက်ကြီး ထိုအမျိုးသမီးကက မြေပေါ်မှာ လှဲချလိုက်ပါသည်။ "ငါဘယ်မှ မသွားဘူး။ ငါ့ကို ဆေးမပေးဘူးဆိုရင် နင်တို့ အဖွဲ့အစည်း ဂိတ်ပေါက်မှာပဲ သေလိုက်မယ်! နင်တို့ အဖွဲ့အစည်းက ဘယ်လိုအဖွဲ့အစည်းလဲ ဆိုတာကို လူတိုင်းမြင်အောင် လုပ်ပြမယ်! နင်တို့တွေက လူစိတ်မရှိဘဲ လူတွေကို သေအောင်လုပ်တဲ့ လူတွေ!"
လုံခြုံရေးအစောင့်လည်း ဘာမှ မလုပ်နိုင်တော့ပေ။ အမျိုးသမီးကို မြေပေါ်မှာ ဒီတိုင်းသာ ထားခဲ့နိုင်တော့သည်။
ဆေးဝါးသုတေသန အဖွဲ့အစည်းကို ဒီလိုလာလုပ်တဲ့ လူတွေ အများကြီးကို သူမြင်ဖူးပါသည်။ ထို့ကြောင့် သူ့အတွက်ကတော့ အသားပင် ကျနေလေပြီ။
ကျမ့်ယိလင်က အမျိုးသမီးဘေးက ပတ်ကာ တံခါးဆီကို လျှောက်သွားလိုက်ပါသည်။
လုံခြုံရေးအစောင့်က ရှေ့တိုးလာပြီး သူမကို တားလိုက်၏။ "ကောင်မလေး မင်းကျောင်းမှာ ရှိနေရမှာလေ။ မင်းအမေလိုမျိုး ပြဿနာတော့ လာမရှာပါနဲ့"
လုံခြုံရေးအစောင့်က ကျမ့်ယိလင်နဲ့ အမျိုးသမီးတို့ရဲ့ တော်စပ်မှုကို အထင်လွဲသွားပါသည်။
... ... ...