البارت ٢٣
#ليته يعلم ( أحببته منذ الصغر)
صادق:روووحيي انكلعييي مايقزززززر بييج شييي كلشي سويته موبعييينج ولاقدرتي كلامميي بجهنم وين ماتولين ولي مالي دخلللل بعددد
كال هيج وراح
كمت افور من كال هيج تخبلت صرت احوس بالغرفه
سامعه هالكلام من الكل وجرعته الا من صادق ماتقبلته ابد
رجعت دكيت على علي
رنا:هااا وين وصلت
علي :رنا شبيج بعدني بأول الطريق ترى الجو مطر مايكدر يسوق سريع السايق
سديته وكمت افتر وادردم
جده:يولي اركدي شجاج وين تروحين هسع بهالضلام والجو ثلج ومطر لخاطري خلي يجي النهار وتطلع شمس عود روحي
رنا: لاااا ابدددد مابات اليوم هناا
بقيت انتظره لحد ماخليت رأسي ع الجنطه وغفيت
اخذتني النومه شويه.
كعدت على دكت الموبايل
رنا:الو
علي:اطلعي اني يم الباب
باوعت الساعه ٤
كمت لفيت شالي وشلت الجنط تااطلع
كعدت جده وكامت على حيلها وتبجي
جده فطوم:بنتيي والله موراهمه تروحين بهيج وكت
رنا:اصلا مفروض من زمان اروح
طلعت وشلت الجنط وياي وصلت الطارمه ووجده تبجي ورايا
هو جان بالاستقبال حتى ماطلع منه
وصلت الباب جان الجو بارد ثلج لان بشهر الواحد احنه والمطرر قوي بشكل وكهرب طافيه
فتحت الباب تااطلع اجه علي اخذ الجنط وخلاهن بالسيارة
جده فطوم:اخخخ يارنا نكزتيني ورفعتي ضغطي عليش عنيتي اخوج بهالليل .مسكتني من جتفي
جده فطوم:ماتروحين والله ماتروحين
اباوع عليها تبجي وشحالها
رحت حضنتها وكمت ابجي وياها
رنا:عفيه جده لاتزعلين وتضوجين بس هاي هيه اني مكاني موهنا بعد
طلعت وصعدت بالسيارة.مشت السياره والدنيا ضلمه والشوارع فارغه واني اباوع ع البيت جده واكفه يم الباب وتبجي.باوعت للبيت واكول
هذا البيت الي كبرت بي عشت بي الحب والكره والراحه والتعب والعطاء والحرمان والسند والخذلان كل انواع المشاعر الحلوة والمره ضكتها بهذا البيت..ابتعدت السياره وراحت بغير فرع
المطر مابطل ابد وماسحات السياره ماوكفت حتى توخر المطر..
علي:شصار وياج احجيلي
ماحجيتله التفاصيل بس كتله
رنا:نفس الصار وياك تقريبا
هز رأسه وكال:جنت اعرف كاعد تعانين وياهم وجنت مقرر اجي هنا واجر بيت جنت اجمع فلوس.بس يلا هاي هيه ماترجعين بعد ابد
رنا:ان شاء الله
علي:جبتي مستمسكاتج وكتبج
رنا:اي جبتهم ....وين راح نروح هس
علي:هس نروح على بيت خالو محمود ولو هذوله هم كواويد بس نبات ومن باجر بنهار ادور بيت نأجرو
رنا:يبوووو على خالو ماريد اروح يم احد اصلا.هما لو بيهم خير جان ع الاقل جو سألو سلمو من فاتحت عمي سالم اجو سلمو وراها ماشفنا وجوهم
علي: بس يطلع النهار كبل اشوف بيت ونروح نسكن بي لعد وين نروح هس بنص الليل
ضجت كلش من كال نروح على بيت خالو محمود
علي دك على ابن خالي محمود وكاله احنه بطريق جايين يمكم
كل الطريق افكر بالصار وياي وكلام صادق أبالي من كال متعذب بيج أكثر من عذابج بيه.اكول شيقصد يعني مقهور عليه لو شنوو.ارجع اكول عذابي بي هو حبي اله .يعني هو يقصد حبو إليه . ارجع اكول لاوين يحبني ماحسيت بهالشي وياه صح يهتم بيه ومامقصر ابد بس ماكو موقف يثبتلي انو فعلا يحبني.لعد جان ماتزوج اصلا
وصلنا بيتهم .نزلنا دكينا الباب
فتح الباب ابن خالو محمود وسلم علينا وكال فوتو جوة
اخذت الجنط وفتت جوة .
جنت كلش خجلانه من جيتنا بتالي الليل وشايله الجنط وياي
فتنا جوة تلكتنا مرت خالو محمود.جانت تباوع علينا يمكنها هس كاعده من النوم ومستغربه من شوفتنا بهالوكت
سلمت عليها وكالت فوتو جوة
طبينا اثنينا بغرفه وكعدنا سويه وجنه مثلجين اني وعلي
بعد شوي جابت صوبه النه. تحمينا عليها
كعدت مقابيلنه وكال:اشعجب جاييبن بهالوكت
علي:والله صارت ضروف وجينا يمكم أن شاء الله باجر اطلع ادور بيت ايجار
مرت خالي:انتي موجنتي بيت عمج كاعده
رنا:ايي.بس قررنا ناجر بيت ونكعد بي
مرت خالي:اهاااا
علي:خالي شلونه
مرت خالي:والله الحمدلله زين....راح اجيبلكم فراش حتى ترتاحون
راحت جابت فراش الي وال علي وطلعت
تمدددنا بالفراش.وصوت الرعيد قوي حيل جان
رنا:اكلك علي
علي:كولي
رنا:انت شكد عندك فلوس
علي:جمعت مبلغ يعني تقريبا يكفينا نجيب شغلات اساسيه للبيت
رنا:هاا ماشي
علي:خما عندج دوام باجر
رنا:لاباجر عطله
علي:زين..يلا نامي وارتاحي
بقيت اتكلب بالفراش لان المكان غريب عليه
لحد الساعة ٦ تاغفيت.وكله نومتي احلام وكوابيس بالصار بالبيت
كعدت الصبح بالبدايه ماستوعبت اني وين بعدين تذكرت كبل كلبي وجعني
باوعت على فراش علي بعده نايم
بقيت شويه بفراشي بعدين كعد علي.
اجه خالي وسلم علينه وتفاجى بجيتنه يمهم بعدين اجت مرت خالي وشايله صينيه ريوك وياها
بيها بيض وجبن وجاي . كعدنا نتريك
علي:بس اخلص ريوك اخذ عماد (ابن خالي)وياي ونروح ندور على بيت
رنا:بيا منطقه راح تدور
علي:والله اريد منطقه بعيده كون مو يم لاتمام ولاخوال
رنا:اي احسن
كام علاوي راح يدور بيت
واني بقيت بالغرفه .جنت ادعي الله يسهل اله ويلكي بيت
اجت بنت خالي سميه سلمت عليه
وكعدنا شوي نحجي
سميه:اكلج رنا سؤال يعني
رنا:كولي
سميه:يعني انتي جنتي أبيت عمج صارلج عمر مويم ويومين
واخوج باربيل يعني هيج فجأة بتالي الليل طلعتي من البيت موغريبه شوي خما صارت مشكله لو طردوج
رنا:لالا بالعكس هما حيل زينين عليه بس علاوي جان يكلي بس اجي كبل نروح وندور على بيت
سميه:وليش ماانتظرتو للنهار.يعني جان نمتو هناك وبعدين دورتو على بيت .شوفي اني موقصدي ليش جيتو وتفهمين غلط.لابس يعني اكول خما صار شي
انحرجت من سؤالها واحتاريت شنو اجاوب
رنا: مو علاوي مايعجبو يضل أبيت عمي
حسيته ماحيل اقتنعت بكلامي
سميه:يلا ان شاء الله اخوج يلكي بيت
رنا:ان شاء الله
بقيت بالغرفه واريد بس علي يدك عليه ويبشرني
لان احس نفسي مخنوكه يمهم ونوب باجر عندي دوام
اووف شهاالحاله
بيت العم سالم) الساعه ١٠ صباحا
كاعدين يتريكون جده ورحاب وولاء وباقي البنات وعلاوي
جده فطوم:ارتاحن هس راحت رنا
رحاب:شنووو صدك راحت
ولاء: ياربي الف الحمدلله.هاي حوبتي
علاوي: شوكت راحت
جده:اجه اخوها بنص الليل اخذها وراحو.جان انجلطت من القهرر
علاوي: لاحول ولا قوة الا بالله.والله عيب الصار بنص الليل يروحون من عدنا
ولاء:اي عيب ماكو هاي حوبتي
جده فطوم:ياحوبه ولج ياحوبه .خبلتي رجلج كل الليل متعصب وشحالو من وراج
ولاء:عساس اني شلون جان وضعي.موخلص عليه هيان ايدي مكدر احركها زين
جده فطوم:من سوالفج وحسسج العالي انتي لوساكته مايمد ايده عليج.صادق ابني واعرفه زين مايضرب مره اله لما لسانها يطول وتغلط وتصبح
ولاء:ماصيحت وغلطت لحالي لو ما سالفه بنت عمو الحقيبه
جده فطوم:انتي رحاب علمتج ع الحس العالي اثنينجن صايرات موخوش
رحاب:هههه واني شكو لازم هي جاهل بعدين هاي هيه احنه مانسكت ع الحك
سرى:بس ترى السويتي ياولاء موحلو يعني حتى لو البنت غلطت وسوت هيج عيب تفضحينها
ولاء:والله مااسسكت اني من تطب لغرفتي بغيابي ووتاخذ عطر رجلي افضحه واقشمرها
بيت الخال محمود)صارت الساعه ١٢ جان يدك عليه علي
رنا:الووو..ها علاوي بشرر
علي:لكيت لكيت
رنا:صدك
علي:ايي ....اني جاي هس وافهمج
انتظرته يجي
بعد شوي اجه
رنا:هااا
علي: والله بالكوة لكيت بيت بس موكلش مرتب يعني يعوزه
رنا: ميخالف يمعود المهم نروح من هنا.زين شوكت نروح اله
علي:اني هس انطيت الرجال فلوس ايجار مال شهر
وكتله راح نجي مباشره نكعد بي...بس لازم نروح انضفه ونشتري الشغلات اللي نحتاجها
رنا:شكد صار ايجاره
علي :تعاملت وياه وسواه ب٢٥٠
رنا: يعني غالي لو زين
علي:والله هو البيت مايستاهل هاالكد.بس المنطقه كلها اسعارها غاليه
رنا:ماشي.شوكت نروح نشتغل بي
علي:باجر
رنا:ليش مو اليوم
علي:الرجال كال عنده غراض بي يريد يطلعهن
رنا:اووف لعد باجر ماراح اداوم اله نكمل شغل البيت عود اداوم
بقينا يم بيت خالي واني بس اريد يخلص اليوم ويجي الصبح حتى اروح أشوف البيت ونستقر بي .صرت بس اريد يكون عدنا مكان خاص بينا وناخذ راحتنه بي بدون مااحد يسمعنا حجي أو يزعجنا
اجه اللليل وجابولنا عشه.كعدنا نتعشه بالغرفه بس اني وعلي .حسيت علي ديفكر ويدردم ويه روحه
رنا:شبيك تحجي ويه نفسك
علي:كاعد اجيك الوضع
رنا:ياوضع
علي:لازم نشتري طباخ وقنينه غاز وصوبه وغساله وبراد حتى لوصغير وفراش للبيت والنوم هم مواعين اكل ومسواك
رنا:والفلوس يكفن
علي:يكفن بس ماكدر اضيف بعد شغلات يعني دوب هذني لان هم اريد ادفع اشتراكج ولاتنسين الايجار كل شهر.فلازم ارتب وضعي لبين ماالكي شغل هنا
رنا:الله كريم
صارت الساعه ١١ تمددنا بفراشنا واثنينه نريد بس يجي الصبح حتى نروح نكمل شغلنا بالبيت
اجه الصبح.واسمع علاوي يكعد بيه
علي:رنا رنا اكعدي تانروح يلا الرجال خابرني يكول تعالو
كعدت ع السريع وحضرت الجنط ولبست هدومي والشال
تانطلع من البيت
خالي محمود ومرته:جان تغديتو عليش مستعجلين
علي:مشكورين بس لازم نروح نكمل شغلنا
طلعنا ومسكنا تكسي. وصلنا اللبيت
نزلت من السيارة طبيت جوة اني وعلاوي
البيت بي حوش شوي جبير وشجر تين ورقها واكع من البرد
طبينا جوا البيت تعبان كلشش مابي لاكاشي ولاسيراميك يعني صبه عاديه .اول ما احد يطب للمطبخ .المطبخ جبيير وبارد ثلج وشباكو مكسور ...ولي جوة اكو هول وغرفتين وصحيات بصفحه حمام تواليت.هم زين الحمام بي كيزر
رنا:يرادله صبغ
علي:قابل بس صبغ هواي يرادله.بس هس مانكدر كلشي نسوي بي خلي.هس اهمشي نشطفه ونضفه ونروح نجيب النواقص.
رنا:اكو مي وصونده
علي:اي اكو بره ماطور وصونده.الرجال كال راح اخليهن حتى تشطفونه.بس لازم اجيب ماسحه
رنا:وتايت هم جيب وصابون
علي:ماشي هس أرجع من المحل الكريب اجيب
راح واجه جايب الكتله عليهن
شغلنا المتطور وفوتنا الصونده للبيت وكمننا نشطف بي
كومه وسخ طلعنا.
نوب ثلجنا معد نكدر رجلينا وادينا حمررر
خلصنا شطف وكال خلي نروح هس نجيب الغراض
رحت اني وياه بتكسي.نزلنا يم محل جبير ييع غراض مستعمله بس زينه.لان الجديدات كلش غاليات
اخذنا طباخ مستعمل بس نضيف ووياه براد صغيروغساله وفرشتين وفراش نوم وأخذنا قنينه غاز وصوبه كازيه وكهربائيه مواعين الاكل وخبز وصمون ومسواك هم يعني جبنا الاحتياجات اليوميه والأساسية.
اجر كيه مال حمل وخلينا الغراض بالكيه
وطلعنا بتكسي والكيه لحكتنا حتى يندلون البيت
المهم نزلنا الاغراض والسايق عاون علاوي بتنزيلهن خلينا كلشي بمكانه وفرشنا الغرف بس لان أخذنا فرشتين
بهاي الاثناء الدنيا مغرب صارت
حسينا نفسنا جعنه كلش
شغلنا الطباخ وسويت بطاطا كلي وبيدنجان وسلطه وويااه صمون
كعدنا ناكل بالغرفه والصوبه الكهربائية مشتغله همزين الكهرب جانت موجوده
صح تعب وصح بهدله وصح هلاك بس نفسيا مرتاحه كلش جنت
باوعت هدومنا بالجنط بعدهن
علي:عود اجيب سلات الهم .ان شاء الله علما الكي شغل عود اشتري مكتبه
رنا: ميخالف شوي شوي.المهم اجرنا بيت وصلنا
علي:اي الحمد لله
رنا: صدك اكلك لازم تدبرلي اشتراك جديدمن هاي المنطقة .
علي:ماشي باجر اشوفلج
كملنا عشه وغسلت المواعين وخيلتهن بسله
تأخر الوكت واني ماعرف شسوي يعني ماكو اي شي التهي بي حتى موبايلي مابي انترنت حتى التهي
تاخر الوكت فرشت الفراش الجبناه وتمددت كلت بلكي انام احسن
نمت وكعدت الصبح الكهرب طافيه والبيت ثلج
رحت تاااشغل الصوره مالكت كاز
رنا:اوف ياربي شون هيج
رحت على علاوي كعدته
رنا:اكلك نسينا كاز ماجبنه ترى البيت ثلج
علي:من اكعد اجيب خليني شوي نايم
عفته ورحت سويت جاي .المطبخ قطعه ثلج والمشكله الباب ماله صاير ع جهه اليمين ع الحوش
جنت اباوع من الباب للحوش الجو ضباب وشجر التين عباره عن أغصان فقط
اجه ابالي صادق والأحداث الي صارت( بالليله المرعبه)هيج جنت اسميها بداخلي .اقصد اخر ليله بالبيت
رجعت الأحداث بعقلي بكل تفاصيلها لمن صارت المشكله وحجي ولاء وكلام صادق من كال متعذب بيج اللي محتاره بي لي هس..ومن كالي روحي انكلعي مايقزر بيج شي
كلهن رجعن بدماغي 💔
شميت ريحه الجاي.رحت طفيته .بعدين رجعت كعدت علاوي كتله كوم جيب كاز متت برد
خطيه كام جاب كاز وشغلت الصوبه وكعدت اني وياه نتريك سويه
اباوع على حالنا واكول هذا اليتيم يضل متبهدل وماله احد.ماكو مثل الاهل ابد
العصر دكت عليه جده وصابرين يسألن ويسلمن
حجيت وياهن شويه وسديته
بالليل اجه علي وكال:اتفقت ويه اشتراك من باجر راح يجي ياخذج
رنا:اي عفيه
ثاني يوم رحت للدوام واخذت محاضراتي من صديقاتي مال اليومين الراحن.كملت دوامي ورجعت للبيت.من ارجع الكي البيت ثلج كححييط اله اشغل صوبه كازيه تاشوي ادفى .روتيني اليومي اروح للدوام وارجع اشتغل الي اشتغله وادرس بعدين انام
مر يومين وجنت زينه يعني .وحتى من اتذكر صادق أو شي جنت موكلش مهتمه.يعني وجهي جان متين بالبدايه
بعدين شوي شوي بديت أحن 💔
صادفت بيوم جنت مداومه كلت خلي اشتري رصيد حتى إشترك انترنت على مود شوي التهي بي
باوعت الجنطه بيها ٤ آلاف
رحت اخذت رصيد بيهن واشتركت انترنت يومي رجعت للبيت كملت شغلي واجه وكت النوم فرشت ليه ولعلاوي
تمددت بفراشي وفتحت بيانات
كمت اكلب بالجهاز وطبيت للفيس باوعت لكيته نشط(صادق)
كلبي كام يدك ع السريع..
اكيد ماراح اراسله بس بنفس الوقت عبالك اريد احجي وياه
نزلت ستوري ...
كل شوي اطب تريد أشوف شافه لولا
باوعت لكيته شايفه بس مارد ع الستوري ولا اي شي
كلش انقهرت جان اكوم احذفه والغي طلب الصداقه
نمت مقهورة كلششش💔
ثاني يوم رحت للدوام ورجعت كل الطريق ذكرياته بعقلي
حنيت جثييير اله. مر شهرر وصادق لادك عليه ولاسال ولا اي شي
لحد يوم جنت راجعه من الدوام.ردت اسوي غده مالكيت بس طماطه حمستها واكلت.باليل نمت وجان احلم
بالحلم جنت أبيت عمي و هو وياي جنه نحجي ونسولف ونضحك
كعدت بنص الليل كلبي قامتني حيل.واكيد انتو تعرفون هالشعور من واحد يحلم
كعدت متلوعه بي كلش.كمت ابجي واحس كلبي نارر حتى مخليه ايدي على كلبي ابجي جوة الفراشش بصوت ناصي حتى علاوي مايسمعني.لا إراديا دكيت علي
دك اول دكه جان اسده
رجع دك عليه ..رديت بدون مااحجي
صادق:الو
ماحجيت اي شي بس جنت ابجي بحركه واشهك ...يتتتتبع
اكيد بعضكم راح يلومني على حبي.بس هاي اللي صار وياي ومشاعري جانت اقوى مني بهواي....يتبببع