تحزمت بحزام راشي

الجزء 3

عبد الهادي رجع لدار حتى طلع النهار .. راجع عاقد حجبانو ما حامل حد ..  غير يخرج من دار نورة يتبدل ليه المود .. ويخسر ليه كون يلقا كاع مايرجع..

مع دخلة لقا زهور جالسة حاطة اليد على الخد ! معاجبها حال جلس حداها  كايدور عينيه فالدار...

عبد الهادي: مي لاباااس

زهور: فاين هو الباااس .. فين كنتي سير هضر مع ديك المراة عندك .. راه تعكسات مابغات كاع تنزل دير شغل الدار ..
الميت كنحزنو عليه ثلثيام ونوضووو ..!

عبد الهادي: نتي لي بغيتيها هضري معاها .. انا راه كمارتها مابقيت نحملها تجي فكمارتي  كرهتهااا...

زهور: (كاتجذب براسها) هاويلي وباغييين يحمقونييي .. هاويلي وباغيين يطيحوني فالركنة هاويليييي وماصبتها حتى من جهة (خنزرت فيه)  وجمع مراتك براااكة من الحماااق وبعد من الخانزاات !

عبد الهادي: (تنهد بطول) ديما نفس الهضرة نبقاو نعاودو فيها عيييت انا...

ناض مخليها من موراه .. طلع للبيت حيد حوايجو .. وبدل عليه خرجات خيرة من الحمام كايطلع فيها وينزل ولاح عليها دوك الحوايج...

عبد الهادي: صبني هادو وهودي ديري شي شغال مع مي .. ونتي سكنتي فهاد البيييت...

خنزرت فيه بواحد الشوفة قاصحة .. تحنات هزات دوك الحواج حطاتهم  فالسلة ودورت عليه وجهها .. غير مكاتزيد تستفز فيه مزال ب بينوارها .. هزات فوطة كتنشف شعرها اللي ريحة الشمبوان  فايحة منو .. رجليها البويض كايلمعو .. حط عيونه عليها ..شكلها هكدااك خلاه باغيها فهاديك اللحظة .. و نفورها منه غير مكايخليه يبغي يشد الضد معاها  ..

تقدم لعندها دورها ليه شادها من درعانها  وهي كاتتنتر منو...

خيرة: طلق مني طلق ماتقيييسش فيا ..

عوج عنقو حكمها بيديه مقربهالو .. كاتعصبو بهاد الضد اللي ولا فيها...

عبد الهادي: انا رااجلك ونتي مراتيييي  .. بزز منك تعطيني شنو بغييييت.. بزز منك ...

خيرة: (كادفع فيه بقوة)  مرتك غير بالسمية .. اما انا الشووفة مابقيتش نحملها فيك .. لحميييي كانكرهو فاااش كاتقيس فيا ..

عبد الهادي: (تبسم باستفزاز) وغانزيد نكرهك فيييه.. ونكرهك فراسك شفتي عيشتك غانحررها  اخيرة اطلبي المووت معاياا مشا لي كان يكالي عليييك ..

خيرة: (حسات بالعافية شعلات فيها غير تجبدت سيرة باها لكن حلفات مطيح دموعها ) حكرتيني بزاااف .. ولكن اليوووم مغانبقاااش نسسكت لييييك  نقتلك اعبد الهاديي قلبي مااات مابقيييتش نحن هانا فين قتلها ليك...

عبد الهادي: (شدها من فكها مزير عليها وقربها لعندو) عاديري واجباتك  الزوجية بزز عليك .. مامزوجش بيك باش نحطك ديكوور (باستحقار) عندك يقوليك بالك مشتاق ليييك .. انا براسي عايفك ولكن داكشي لي غاتهربي منو غاتلقايه باش نكرهك فعيييشتك وفراسك...

النفور الكره الحقد الاشمئزاز .. كلها احاسيس جامعاهم فقلبها من جهته .. كرهها فجنس الرجال ! وندمت على الساعة اللي تزجت بيه .. كون مابنتها .. كون قتلاته وتهنات .. يبرد قلبها  على الاقل على ما دوز عليها .. كلشي فيه كايستفزها صوته  حركاته .. كلامه حتى يديه اللي كايتحطو على لحمها .. كون تلقى تقطعهم  ليه ..
هو كان متعود يشوفها ديك الزوحة المنصاغة لأوامره .. حانية الراس مكتعاندش معاه . واللي قالها ليها ديرها .. لكن فاش تبدلات وبينت على حدتها .. وكسرات داك  الجذار اللي كان بينها وبين التمرد ..  قدرات تهز  فيه الراس وتعاند  كلامه وماتمشيش على حكامه..

مرضاهاش لنفسه تخرج عن سيطرته .. حس بحال اللي برجولته تقاست .. ودابا باغي يثبت ليها بتصرفاته انها متقدرش عليه .. وغاتبقى ديما تحت الرحمّة ديالو .. وتحت ظله ولي قالها هي لي غاتكون .. والوقت لي يبغيها غاتخضع ليه..

حط يدو على البينوار بغا يزولو ليها وهي تتشاد معاه...

خيرة:: (بانفعال) هي لي ماتكووونش ليك داكشي لي بغيتيه مغادبش تاخدووو بعد منيي...

عبد الهادي: (محقد عينيه فيها) ماشي لخاطرك .. مراتيي وناخد لي بغيت مكاينش لي يمنعنيي..

خيرة: (كادفع فيه وتغوت) وبعد منيي ... خاااااالتي زهوور

جرها ودفعها بيدو على السرير .. مشى الباب سورتو ورجع ليها لقاها ناضت .. رجع شد فيها لاحها من جديد وجا فوقها وهي كاتغوت من تحتو..

عبد الهادي: ورصاااي الكلبة اتفيقي البنت ماتغوتييييش...

خيرة: (كاتفركل بيدها) والله وقستي فيااا حتى نقتلك بعد مني مكنحملكش كررهتك..

ياقوت كاتبكي .. وزهور جات كاتجري والدق فالباب  وتغوت غادي يخرج ليها العقل...

زهور: طلق منهاا المسخوووط غادي تقتلهاا دير عقلك اعبد الهادي .. اويلي باغين طيحولي روح هنا...

حكمها من عنقها مغدد عليها وهي عيات دفعو وهو والو معصباه ومجنناه...

عبد الهادي: مراتيييي  وندير فيها لي بغييييت (تبت عيونه فعيونها) شنو دابا  اخيرة غوتي فكي راسك..

خيرة: (بلعت ريقها) كاتستقوى عليا حيت انا غير ولييية اشماااتة

عبد الهادي: (ضحك باستفزاز) بردي على راااسك زغتي لياااا وطلعتي فوق راسيي  وليتي نتي الراجل .. تخرجي فعينيك وتشدي ضد....

خيرة: (كاتهز باغية تفك راسها منو) وبزااف عليك الرجلة طلق مني البنت كاتبكي طلق ..

زهور: (كادق فالباب ) و عبد الهادي ها سخط ها الرضى اوليدي الى دير عقلك...

عبد الهادي: مي سيري فحالك بيناتناا  .. خليني نوريها فعاايل شمايت خليني نوري لمها ضسارة الله ينعل جد ديال والدييييك ابنت لحراااام ...

رجع لداك الينوار باغي يحيدو ليها وهي والو .. كاضرب برجليها ويديها فينما تحط يدو كااتغوت وتهز .. محاملاااهش عايفاه لواحد الدرجة غير الى شمات ريحته كتكرهه .. بدات تقلب بيدها على شي حاجة تفك بيها راسها منو .. طاحت يدها  على  الفايوز هزاتو وهي ضربو بيه لراس بقوة .. حتى حس براسو تزعزع .. طلق منها شاد على راسو مبعد وهي ناضت كاتجري لعند البنت هزاتها شعرها مشعكك كاترجف وتنهج .. وتسكت فالياقوت وهو جلس  محقد عينبه فيها دايخ...

خيرة: (بكره) والله ماتبقى فييييك الحمااار انا نوريييك (كاتغوت معصبة فافدة اعصابها) ماتبقاااش فيك والله ماتبقا فييييك خرجتي عليا وحكرتني بزااااف...

شافها هازة اللبت وغير كاتغوت .. ناض فتح الباب لقا زهور واقفة داز فيها وخرج وهي جرات لعند خيرة كاتشوف معاها واش ضربها تاني..

زهور: مالكم شكاين عاوتانييي لاش ضاربتووو...

خيرة: (كاترجف)  غانوريييه غير بلاتيييي..

شد عليه فبيت بوحدو و هي ضربات ساروت لبيتها هي وبنتها .. حالفة ما تزيييد معاه دقيقة مزال تتسنى غير الصباااح يطلع .. وتهز بنتها وتخرررج مبقاتش قادرة تتحمل وجهو .. ولات خايفة عاى راسها مرضها نفسيا شي نهار يفوت فيها شي دقة .. الليل كله وهي فايقة تحسب الدقايق و الساعات .. باغية الصباح يطلع وربي كبير ..

فاقت ليها ياقوت فالليل تتبكي .. ناضت الكوزينة تقاد ليها البيبرن .. وهي راجعة تتسمع صووت فشكل .. ضيقت عينيها باغية تعرف الصوووت منين جاي ... بقات تابعة الصوت حتى وصلات للبيت اللي ناعس فيه عبد الهاددي .. حطت ودنها على الباب تتسمع فيه تيهضرررر....!

عبد الهادي: توحشتك انوارتي ، مكرهت كون كنتي حدااايا دابا .. ندييير فيك كثررر من هاااادشي لي درتي فياااا دابااا .. ما كرهت نهززز راسي ونجي عندك دابا .. (سكت كيتنهد و كيدير اصوات فشكل) زيدي مزاااال على ما بيااا و حييييدي هدااك السليب .. باغي نشوفو !

خيرة حطت يدها على فمها .. عايفة .. طلع ليها القلب .. فهاذ اللحظة من كلامه .. عرفات باللي كيهضر ابيل فيديو مع شي وحدة ..!
ما وجعهاش قلبها على خيانته بقد ما وجعها على راسها ..! حيت عرفااات شخص بحااالووو .. ما يسوى ما يصلاااح .. فعايله كرهوها فراسها .. حست براسها مسخة غير حيت قاس فيها .. ما بقااتش قادرة تسمعلو .. داكشي اللي سمعات و بغاات تزولو من راسها .. رجعات لبيتها سادة عليها بالساروت .. كتنهج كتنفس بالجهد .. عطات لبنتها الحليب وهي كتغلي وتفكررر شنوو دير فالصباااح...!

تكات شوية جنب ياقوت .. حتى سمعت صوت الباب فاقت قافزة فبلاصتها .. ناضت فتحت الباب .. لقاته فوجههاا نزلات عينيها ما حاملاش تشووف سيفتو .. عطاتو بالظهررر ورجعات لبنتها  .. وهو داك التجاهل ديالها غير ما كيزيد يعصبو ويفقصووو من جهتها .. دخل تيهز حوايجو و يخبط .. و يخنز فيها .. وهي ما مسوقالوش ..

عبد الهادي: وجدتيلي الفطووور ؟

خيرة: (ضحكت جنب) اه وجدتوو راه لتحت (طلعات ونزلات فيه باشمئزاز) واقيلة راك مزال غااالط...

عبد الهادي: دابا وجدتيه ولا موجدتيهش ؟

خيرة: ما وجدتوش .. وما غانوجدوش .. وما عمري مزال نوجدوو ..

عبد الهادي: علاااش هادشي كاااامل (كيغوت) علااااش اخيييرة كنااا مزيانين حتى عواجيتييييي...

خيرة: (ببرود) ما عواجيتش ! بالعكس انا عاد درت عقلي وتقاااديت....

عبد الهادي: علاش من قبل كنتي ديري كلشي و فرحااااانة .. كنتي ديريلي كلشي قبل ما نهضررر...

خيرة: فرحانة ههه ؟  كلشي حسيتو من نهار تزوجتك .. قهرة ، الحكرة .. العذاب .. الموووت حسيت بيها .. ولكن حتااال الفرحة عمري حسيتها وانا معااااك ! كنت ندير ليك كلشي بلا ما نهضر .. كنت نهز ليك الهم الى تقلقتي .. كنت نمرض لمرضك .. ونتقهر لقهرررك .. ونتا عمرك قلتيلي حتى مااالك ابنت ناس .. ولا شنو خاصك ولا اش مقلقك .. كنت كندير دوري كزوجة معاااك .. واخا عمري حسيت بيك زوج ولا داير دورك معايا .. كنت كنتعامل معاكم على حسب داكشي اللي تربيت وكبرت فيه .. حسبتكم عائلتي ثانية وعاملتكم على هداك الاساس .. ولكن نتوما حاسبيني غير خديدمة عندكم .. ولا جفاف تمسحو فيه يديكم ورجليييكم .. هادشي عمري نعاودووو غلطت غلطة و مستحيييل نعاودها اولد ناس .. ما عندي ما ندير بهاد الزواج اللي ما جاني منو رباح .. غير المرض و الغبينة .. لا عيشة عايشة مزيان ولا راجل نحط عليه راسي فاش نحتاجوو .. اللهم ديال راسي ولا نبقى محزمة بحزام راشي... !

عبد الهادي: (بلع ريقه دوخه كلامها ما بقى عارف ما يقووول .. ما بقى عنده لا ما يقدم ولا ما يوخر !) انا حزام راشي ؟؟

خيرة: راجل لي ما يوقفش معايا فمحايني حزام راشي ..لي يخونيي حزام راشي .. ولي ما يهمو فرحانة ولا مقلقة حزام راشي .. لي ما يعاملنيش مزيان حزام راشي... راااجل اللي عمرني فرحت معاااه حزااام راشي... ونتا فتتي الرشاوة اعبد الهادي نتا راااك حزاااام مقطع .. حيت تقطعتي بيا قبل ما نحزم بيييييك....

من بعد ما خرجات اللي فقلبها .. خلاها وخرج .. حتى هي مكانتش تتسنى الندم فعينيه .. كانت باغية تخوي قلبهاا !

جبدات فاليز عمرات فيها حواجيها .. لبسات حواييجها و   لبسات ياقوت هزاتها .. وهزات شانطتها وخرجات من البيت .. قررت النهار ماتزيدش معاه .. الله يجعلها تبات فالزنقة ما تبقى  معاه تحت سقف واحد .. كرهاته ومابقاتش مستحملة العيشة معاه..

نزلات لتحت لقات زهور لي غير شافتها تصدمت...

زهور: فين غادية ؟؟ وشهادشي؟

خيرة: (ببرود) خالتي زهوور لهنا وحبس .. ولدك  انا وياه بيناتنا المحكمة  سالينا الله يعاونو ..

زهور: (بلعت ريقها) الله يهديك اخيرة .. كاع الناس كدابز واش نتي فينما تنوضي تهزي حوايجك وتزيدييي..

خيرة: هاد المرة غانمشي ومنوليييش  .. مابقات عيشة مع ولدك  تجمعنا خووت نتفارقو خوووت...

زهور: اوا الى باغا تمشي حتى يجي راجلك .. من هاد لباب ما تخرجي تايجي راجلك ومنك ليه...

مشات زهور تجري دورات ساروت زولاتو .. و دورات تيليفون لعبد الهادي يجي ... خيرة كانت واقفة بهدوء .. حيت ما كانتش خايفة منو ..

حتى جا شاعل من الباب  .. شافها هازة حواحيها وياقوت فيدها عقد حجبانو معصب وزفر مكره ...

عبد الهادي: فين غادية نتي؟؟

خيرة: (بحدة) غانمشي بحالي .. باغية طلاقييي .. نهار واحد منزيدوش معاك والله نقتل راسي..

حك فدقنه كايضحك بالهداوة حتى  عصبها...

خيرة: الضحك راه فيك  ما جايب خبر ! خلينا نطلقووو بلا صداع .. ماباغية منك والو عطيني براتي والله يعاونك...

زهور: (خنزرا فيه) وشكاتقول هادي اعبد الهادي شمن طلااااق..

عبد الهادي: (ببرود) عتبي ديك الباب  وشوفي شنو يطرا فيك

خيرة: مخايفاش منك

جات خارجة وهو ينقز تبعها .. شدها من دراعها باغي يحيد ليها ياقوت .. وهي كاتبكي وتغوت..

خيرة: طلق ليا من بنتي طلق والله مانخليها ليييك (كاتجابد معاه) وبعد منيييي اشمااااتة ..

حيدها ليها بزز منها والبنت كاتبكي عطاها لزهور داتها وخيرة  غادي تجهل باغية تاخد بنتها .. رجع لعندها شدها من شعرها مغدد...

عبد الهادي: باغية تخرجي وتديلي البنت .. بحال لي انا مكااااينش دوييي الكلبةة.

خيرة: (كاضرب بيدها يطلق منها سعرات) عطيوني بنتيي نمشي فحااالي .. شنو مزال باغيين مني .. وطلق منيب وقولها تررجع ليا بنتي...

ضراتو فراسو .. وهو يصقلها بقوة مجنن عليها .. وزاد ليها الصقلة الثانية حتى طاحت لارض كتنفس بالجهد .. تحنا لعندها شدها من فكها مزير عليها...

عبد الهادي: هاديك بنتيييي انا ومتحلمييش نخليها ليك .. سحابلك دخول الحمام بحال خروجووو .. غانعيشك الويييل اخيرة قلبتي عليااا ولقيتينييي...

جرها من ذراعها .. منوضها غادي بيها وهي كتسعر وتغوت حتى تبح صوتها .. دخلها البيت وهي كتجررر غادي تحماق . ولكن كان قوى منها حكمها بيدو ودخلها لاحها فااسرير و جبد سمطة من سرواله  كايلويها فيدو وهي طايحة على سرير كتنهج...

عبد الهادي: اللي بحالك خاصهم العصا باش يتقادو....

ارائكن ..

لوا السمطة فيدو مزيااان .. و بدا يقرب عندها بشوية .. وهي غطات وجهها بيديها...

خيرة: شوووف والله و تتت....

عبد الهادي: (قاطعها بالغوات) سكتيييي هضرررتي بزااااف ..الصباح كتحلي وتشدددي عليا .. دايرة ليا فيها منعرف شكوووون .. ميكت وقلت نخليييك دابا ديري عقلك .. ودااابا نجي نلقاااك جامعة حوايجك و غادية .. فيييين غادة ؟؟ (كيغوووت) هضررررري فيييين كنتي غادية ..

هز يدو ونزل عليها بديك السمطة حتى غوتات بحر الدقة .. جات تهرررب وهو يشدلها شعرها وزدحهاا على السرير .. خشاا ليها وجهها وسط الوساااادة .. و بقى تيضربها بهاديك السمطة .. وهي تتهز وتتحط وتغوت تحت الوسادة .. قاطع فيها النفس حتى تخنقات ..

عبد الهادي: هادي باش تتعلمي تهزي صووووتك علياا .. (تيضررب عينيه معميين) وهادي باش تعلمييي ترفضيني فاش نبغيييييك .. (نتفها من شعرها حتى انّت بخفوت عكس قبل كانت قوتتها سالات ) وهااااادي باش تتعلمي طيحي بكلامي وما تسمعيهش ودييييري عكسووو... (زادها وحدة وخرى) وهاددي باش تعلمي تجبدي طلاق نتييي .. انا لي نقوليك امتى نطلقك .. وامتى نخليييك ..

رخف عليها و رما السمطة من يدوو .. كينهج وجهو حمر .. عينيه حومر و الشوميز سرداات فوقو بالعرق .. سد عينيه وخدا نفس عميق رجع فيه قوته .. وشاف لجهتها كانت مزال فنفس وضعيتها !  متحركاااتش من مكانها .. لا حركة ولا صوت ..! الشي اللي خلا الخوف يسيطررر عليه .. ضيق عينيه وقاااال...

عبد الهادي: نووضي براااكة من تبوحيط ديااالك .. ماغااتبقااايش فيا غير تهناااي عمرك تبقاي فيا ..  اخيرررررة .. غتعاود نفس الحااااجة الى مشديتيش معاااايا الطررريق.....  (شافها متحركاتش) خيييييرة .. (قرب عندها تيحرك فيهااا ) خي رة !

دورها بيدوو لقى وجهها عااامرر بالدموع كتنفس بصعوووبة .. و صدرها كيتهززز ويتحط .. حاسة بلحمهااا كيحرقها حتى باش دور مقدراااتش ..

عبد الهادي: (قرب عند وجهها) ولا فيك تبووووحيط....

جمعااات لعابها وصيفطاتولو لووووجه .. حتى دور راسوو مزييير على سنانوو. مسح وجهو ورجع شاف فيهااا..

عبد الهادي: يا ديري عقلك .. ياا كل نهار تاكليها بحال هكا . حتى ديرييه بالسيف علييييك !

خيرة: (بصوت منغنغ ومنكسر)  الى بقات فيك اجييي عند هاد الوجه و دفل الككككلب .. اعيييفة رجااااال .. الفساااييدي لكاافر بالله !

عبد الهادي: ( ضحك جنب ) شنو فيدك ديري ؟ تا داك باك لي كنتي تتعناي بيه عطا وجهو لتراب وخلاك .. ما عندك ما تصوري.. وما فيدك ما ديري .. نتي واخا معرفت شنو يوقع .. كتبقاي غيييير خيرة !

مشى خارج تيضحك مسورت عليها الباب....

الألم، الضعف ،الحكرة، وقلة الحيلة .. مصطلحات لخصت داكشي كامل اللي حست بيه  وهي تحت عنفه وقسوة قلبه ..!
جلدها بدون رحمة ..  السمطة كانت كتنزل على لحمها بحال شي عافية .. غوتات تحت هاديك الوسادة و تشوات حتى تبح صوتها والقلب اللي يحن فيها  ميت ..!

كانه كان يضرب فشي جماد ! كان حاس براسو كيرضي غروره وهو كيشوفها ضعيفة قدامه ومحكورة .. بدون قوة مقادراش دافع على راسها .. بحال اللي تخلقات للتعذيب كأنها معندهاش احاسيس وقلب..!

دموعها كتيسيلو في صمت .. فهاد اللحظة عاد حست باليتم الحقيقي ! وعرفات قيمة الاب ديالها لي كان مكالي عليها الدق حاميها وسندها ..طاحو دموعها بغزارة .. احساس العجز انفجر فداخلها !   والألم النفسي وجسدي  كاينهشو روحها بحال الفريسة فاش تطيح فيد السبع !
تعرضت لأسوأ  مايمكن تعيشو الانثى فعز قوتها و ضعفها !

الضرب العنف المعاملة الخايبة .. الخيانة والحكرة والظلم ..! قتلو اي حاجة زوينة فيها .. خلاوها تفقد احتارمها لنفسها وتشوف راسها بحال شي حشرة بدون قيمة .. ضعيفة ومدلولة لا حول لا ولا قوة لها ..!
ذنبها انها تاقت فإنسان نهار شافت وجهه للمرة الاولى فيوم خطبتهم !
رسمت معاه احلامها .. تاقت فيه وشافت فيه الرجل اللي غايكون ليها الاخ والاب والزوج والسند .. حنى كيصفعها بقوة مفيقها من احلامها وآمالها الوهمية .. وراها قداش هو انسان قاسي .. وبدون رحمة ! واكثر واحد كان ظالم فحقها .. احلامها الورية ولات كحلة .. وحياتها الهادئة من نهار دخل ليها ولات ظلام ...

ناضت من السرير بصعوبة كتعثر  ضرابي كايحرقوها نصلات حوايجهها ودارت كريم يطفاو جروحها .. وتطفى معاهم حرقة قلبها ..

لبسات عليها بملامح ذابلة وهي متوحع كل ما قاس توب البيجامة لحمها ..  توجهات لباب بغات تفتحو لقاتو مسورت .. بدات دور فالبواني فاقدة اعصابها...

خيرة: فتحولي علياا  البااااب .. خالتي زهووووور فتحييلي و ديريني بحال بنتك  ..  (كتبكي وترغب) ياك عندك بنااتك واش تبغي ليييهم هاد الحالة (كاضرب وتغوت) واش تبغي تشوفيهم محكورين .. ومظلوميييين حتى انا عندي ماماا متبغيييش تشوف حااالتي هكا ..  ياك نتي ام وحسي بياا علاش قلبكم حجرررة علاش كاديرو فيااا هاكا شنو درت لييييكم ! (كتنهج وتبكي) بغيت غيربنتيييي عطيوهالي ..  عبد الهادي خليني نخررج عند بنتيي متسشدش .. عليا

كايسمعو فغواتها وهوما التحت .. زهورة شادة البنت لي ماتبكي فيدها وعبد الهادي غادي جاي.

عبد الهادي: كون ما الحبس كون قتلتها وتهنييييت منهاا...

زهور: علاش ضربتيها غادي غير تشد معاك الضد  دابا .. واخا تستاهل تفرعنات ومابقات تسمع هضرة حد...

عبد الهادي: خاصني نهرس ليها داك الراااس باش تهد  مرضاتني فراسيي مابقيت عارف شنو ندير معاها..

زهور: سمعني متخليهاااش طلق غير بغات تخللعك الطلاق مكاينش عندي !

عيات وتهدات بالغوات .. رجليها  فشلو وصوتها تبح .. يديها طابو بالخبيط فالباب .. طلباتهم يجيبوو ليها غير بنتها اللي تتسمع فغواتها اللي قطع قلبها ..

جلسات فالارض وهي مستسلمة .. مقهورة و متمنية الموت .. ما بقا عندها لا جهد ولا قووة باش تواجه هادشي كااامل .. عايفة من الدنيا كاملة ..

عبد الهادي: لبنت ما غاتسكتش راه مولفاها .. ولكن ما طلعيهاش ليها .. خاص بنتي تنساها وداكساع نصيفطها بلا بيها .. ياش نعلمها تفرعييين...

زهور: الله ياربي لبنت غاتعدبني محال تسكت ليا ...

عبد الهادي: تبكي حتى تعيا وتسكت .. انا خارح لخدمتي والكلبة خليها تماك ما تفتحيش عليها الباب !

زهور: صااافي...

خرج لخدمتو بدم بارد .. كيتمشى فالزنقة مرتاح القلب و البال .. و المسكينة المغلوبة فمكانها تخمم فحالها ما حيلتها فهمها ولحمها اللي كيحرقها .. ما حيلتها فبنتها الصغيرة .. اللي فرقوها عليها .. وهي مزال ما كملت حتى 6 شهووور مقادة ..!

زهور بقات شادة ياقوت اللي مرة تبكي مرة تسكت وتنعس .. كانت تتبكي باغية امها وريحتها .. ما فتحاتش على خيرة ولا حنت فيها .. و دارتها بحال وحدة فبناتها ..! قلبها قاسح بحال ولدها ..

حتى جا هو فالعشية .. سول عليها  فتحت ليها .. هز ليها الماكلة و طلع فتح ليها .. كانت ساهية سمعت الباب هزت راسها على امل انها تشوووف بنتها .. لكن خاب ظنها فاش شافت اكثر وجه كرهاتو كثر من الدنيا....
دخل بملامح باردة وحط ليها البلاطو ..

عبد الهادي: كولي لا كنتي جيعانة...

خيرة: (ضرباتو حتى تقلب وهي تتشوف فيه بعينين حمرين ..! ) جيب ليا بنتي ..

عبد الهادي: هاديك البنت نسايها !

خيرة: (ضحكت بصوت عالي ودموعها تيسيلو) واقيلة راك مريض فمخك .. ننسا راسي وما ننساش بنتي لي تعدبت عليها وشفت عليها لويل معاك ..

عبد الهادي: لا غاتنسايها (قرب تيشوف فيها) بردوو عليك جنابك شوية ؟ تكالميتي .. مزال تتفكررري فالطلاق... ؟

خيرة: الله ياخذ فيك الحق .. الله ياخد ليا حقي منك وتتعدب كيفما عدبتينييي وتمرض كيف مرضتيتي ..

عبد الهادي: (ضحك بصوت عالي) شكون غادي يعدبني ويمرضني نتي !

خيرة: دنوبي و قهررري عدابي ومرضي .. لي غادي يبقاو واحلين فعنقك تال نهار نتلاقاو عند الله ...

عبد الهادي: تأثرتي بالافلام .. واش الله مسالي ليك ! تكمشي شي شوية حسن ليك ...

خيرة: خليني نمشي فحالي علاش حابسني ؟

عبد الهادي: على زينك حابسك ونتي بحال الخرااا ..  ولا فورمتك لي بحااال سفووود  .. ولا لسانك لي كيقطر لقطران .. علاش غانحبسك من غير حاجة وحدة حيت انا بغييييت ..

ثلاث ايام مرت .. كيف بعضها ..  سادين عليها فداك البيت .. غير  زهور اللي تجيب ليها متاكل .. عبد هادي مرة بايت فالدار و يومين لا .. حتى من الياقوت حرموها منها .. مكاتشوفهاش ليلها بحال نهارها مالقات كيدير تهرب منهم .. و تهز من بنتها ومتشوفش وراها..!

طول هاد الايام كان عبد الهادي مخدم . تيليفونها كيهضر فالواتساب مساجات مع احلام وعائلتها .. باش مايلاحظوش غيابها ولكن احلام مكانت مرتاحة وحسات بشي حاجة كاينة .. داكشي علاش هزات راسها  ومشات عند عائلتها تسولهم وتهني بالها...

نزلات من طموببلتها قدام الدار دقات وفتحات ليها امال الباب سلمات عليها ورحببات بيها وجلسو فالصالون من بعد مقادات ليها اتاي...

احلام: كيف بقيتو نتوما بعداا؟

آمال: (تنهدت بحزن) من نهاار مات المرحوم .. وحنا  بحال داك الحنش اللي مقطعلو الراس ..! خوتو باغين حقهم فالورت .. قلنا ليهم تسناو تدوز غير الربعين .. ونشوفو شنو نديرو والو اختي تغلبنااا وحتى راجل مكاين عند راسنا...

احلام: يكون خير اخالتي ماااتفقصيش راسك وتهلكيي صحتك...

آمال: داكشي لي كاين ابنتي نتي لابااس بعدا..

احلام: لاباااس عليا جيت غير نسول على خيرة هادي ايام كنهضر معاها فالواتساب معجبنيش كلامها .. وفين ما نصوني ليها تقولي مخلانيش عبد الهادي نهضر ..  مارتاحيييتش مانكدبش علييك  موالفة ديما نهضرو انا وياها ابيل ..

آمال: حتا حنى كاتهضر معانا ولكن غير فواتساب بحالك وماديت ماجبت ابنتي مع روييينة قلت مكاين والو وكيما قلتي هي عزيز عليها تصوني وتسول  شنو يكون زعما خلعتني...؟

احلام:بحالي بحالك خفت غير راجلها يكون داير ليها شي حاجة ولا كيهددها ..صاحبتي وكنعرفها ماشي هضرتها هاديك...

آمال: (تشوش بالها) نووضي دابا نمشيو نشوفوها تقبط عليا قلبيي خاص نشوفها قدامي باش نرتاح

احلام: داكشي لي بغيت نقوليك نمشي نشوفوها...

ناضت آمال لبسات جلابتها وخرجات هي واحلام ركبو فالطموبيل غادين نيشان لعند خيرة .. يعرفو شنو كاين يشوفوها على الاقل باش ميبقاوش مشوشين..

زهور فالدار تطيب الغدا كل مرة طل على ياقوت .. سمعت الدقان فالباب مشات فتحات وهي تلقاهم قدامها .. بلعت ريقها والرعدة طلعات معاها خيرة سادين عليها وهوما باينين جايين يشوفوها .. معرفات مادير استقبلاتهم بابتسامة صفرة جلسو واحلام كاتشوف هي وأمال علاش خيرة مخرجاتش لعندهم ..

آمال: لاباس الالة زهور؟؟

زهور: لاباس اختي آمال نتوما كيف عاملين كيبقى الخاطر..

آمال: مصبرين راسنااا هادي هي الدنيا...

احلام: فين هي خيرة ؟؟ واش مكايناش شفتها مخرجاتش لعندنا؟

زهور بقات تدور فراسها .. معرفات ما تقووول ! و احلام شافت ف امااال .. تدور فراسها عرفت باللي شي حاجة كاينة ..

امال: لبنت راه سولاتك ازهور .. فاين راها خيرررة ؟؟ واش فبيتها ولا خارجة ؟؟

يلاه بغات تجاوبهم وتقولهم شي كدبة .. لكن البكا ديال ياقوت سكتها  ناضت من حداهم مشات جابتها تتسكت فيها ..

امال: اوا ملي ياقوت هنا معاك خيرة غاتكون غير فبيتها ولا فالسطح ؟؟

احلام: كلمهالنا اخالتي نشوفوها ونمشيو فحالنا..

زهور: (بلعت ريقها) شوية وتجي راه فالسطحح ..

احلام: اوا معليش نتسناوها حتى .. وكااان تجي...

زهور: اوا ندير ليكم كاس اتاي...

ناضت من حداهم وجهها مخطوف منو الدم .. جبدات تيليفون تتصوني لعبد لهادي مرة لولى و الثانية عاد جاوب...

عبد الهادي: آش كاين مي لاش مصونية راني مع ناس ...

زهور: اويلي على غدايدي على مع ناس .. دابا وتكون عندي فدار .. شهاد المصيبة لصقتي فيا و غبرتي ما حيلتي فبنتك ولا مها .. ولا عائلتها لي جاو دابا يسولو فيها... 

عبد الهادي: نعاااام ؟؟ شكووون  لي جا ؟

زهور: مها وصاحبتها...

عبد الهادي: هاديك صاحبتها هي سباب محايني معاها .. غاطلعي عندها وتقوليها تنزل عندهم وما تهضررر ما تتكلم .. و لا قالت شي حاجة نقتلها !

زهور: عنداك تهضضر و نتفضحو .. شوهتنا شوهة اعبد الهادي !

عبد الهادي: كووون كنت فكازا كون جيت انا دابا مكاينش تماااك .. عندي شي خدمة...

زهور: قول راك دايع مع الخانزة ...

عبد الهادي: مييي باراكة من هاد زمر ديالك وديري ليقلت ليك يلاه الله يعاون...

زهور: تبدلتي عليا وليتي تغووت عليا و تقولي كلام عمرك قلتيه .. الله يخلف اولد كرشي...

قطعت عليه طلعت عند خيرة فتحات عليها الباب .. لقاتها متكية سمعت الباب تفتح وما هضرت ما هزت راسها ...

قربت حداها زهور... تتهضر بشوية وتحلف...

زهور: نوضي غسلي و بدلي عليك .. غاتنزلي لتحت ما تهضري ما تتكلمي ! كاينة مك وديك صاحبتك  لتحت .. عرفتي عبد الهادي قال ليك الى درتي شي فعلة ما تلومي غير راسك....

خيرة بعلت ريقها وناضت من بلاصتها .. كتنفس بالجهد الافكار تخلطو فراسها ... لبست عليها كسوة واسعة بالاكمام مغطية اثر الضرب .. لكن اثر الحزن والظلم والقهرة كاين باين فوجهها .. حاولت ما تبين والو حتى تفكر شنو دير...
خرجات وهي تزير زهور على دراعها حتى وجعاتها....

زهور: عرفتي الى قلتي شي حاجة غاتشوفي كثر من هادشي اخيرة....

حركت راسها بالايجاب  . ونزلت لعندهم....

خيرة نزلت وشافت فبنتها بلهفة .. عينيها ما شافو لا امها ولا امال .. شافو غير بنتها مشات تجري بلا وعي خداتها من يدين احلااام وحضناتها بقوة حتى قربت تخنقها جابتها قدامها كتبوووس فيها وتشم فريحتهاا وتعاود .. شوقها لبنتها اللي اربع ايام وهي بعييييدة عليها .. وعلى حضنها .. كانت حاسة بروحها خارجة من جسدها وهي بعيدة على بنتها....

احلام وامال بقاو تيشوفو فيها مستغربين .. و الشكوك  ولاو يقين فراسهم .. زهور تتبلع غير فريقها الدنيااا دارت بيها...

زهور: (بضحكة صفرة) اويلي اخيرة تتبوسي فالبنت بحال عمرك شفتيها .. سلمي على ماماك و صاحبتك .. 

خيرة بلعت ريقها وقربت عندهم عنقت امها و من بعد احلام .. هوما كانو تيشوفو فيها مستغربين من حالتها صفرة وتحت عيونها زرق .. فمها ابيض .. وكتبان بالسيف واقفة....

زهور: من لي جات من موت المرحوم .. وهي فداك البيت ما تبغي تخرج ولا درج ولا تشوف حد .. حتى لبنت سمحت فيها ليا غير انا لي شاداها مسيكينة .. 

امال: (شافت فخيرة) اويلي اخيرة ! مالكي على حالتك باك الله يرحمو سالا عمرو مسكين ...

احلام: صافي اخالتي امال خليها عليك راه باها مسكينة... (شافت فخيرة) خيرة يلاه معايا لبيتك نهضرووو ..

زهور: لا لا هضرو غير هنا حدااانا .. هي بحرا خرجات لينا من داك لبيت .. مسيكينة بقات فيا متخرج ما درج حتى لماكلة ما كتاكلش .. عبد الهادي ما خلا كيف دار معاها .. عيا فيها نخرج نديك لداركم .. نسافرو وهي والو قاتلك باغية تبقى غير فالدار...

خيرة عيات صابرة ولكن خرجات ليها ضحكة عالية .. بقات تضحك ضحك هستيري لدرجة خلعاتهم بداك الضحك .. وناضت قاصدة زهور .. كانو عينيها معمييين وطافين ما بقات تشوف والو قدامها .. كاع عذاب السنين ولا ليها قووة ...

خيرة: سكتييييي (هزت يدها وصقلاااتها) سكتيييي الكدابة المنافقة الغدااااارة .. سكتي المجريمة لي واخدالي بنتي حارماني منها وشادة عليا فالبييييييت .. سكتي ما تسمعينيش كلامك مزاااال ..

امال شدت على فمها واحلام بلعت ريقها  .. كانت متوقعة صاحبتها يكون طاري فيها هاكا وكثر...

خيرة: نووووضي (جرت زهور معاها كتغوت) نوووضي معايا جربي داكشي لي عيشني ولدددددك.  نوضي...

امال:(بصدمة) خييييرة شنو كديييييري...

خيرة: سكتي اماما سكتييي خليني نوريها شنو عشت فهاد ليااام .. خليها تعرف بلي دنيا قصيرررررة...

احلام: (كاتحاول تبعدها عليها)خيرة بعدي منها و يلاه نمشيو من هناااا ...

خيرة:(بعصبية) شديلي بنتي ا احلام وخليني مني ليها...

زهور: طلقييي مني شكاديري هاي هاي تفرعنتي وليتي ضربينييي .. واخا دابا تبقى فيك.. (كتغوت وتفك منها وخيرة ولاو فيها عشرة) طلقييييي مني خييير ليييييك ..

خيرة:(لاحتها من يدها ) بغيت نضربك جيتيني مراة كبيرة بغيت نبزق عليك وحشمت .. بغيت نسبك وما عرفت باش .. ولي نقوليك هو لي فيك يكفييييك .. (بصوت مبحوح وتلاشي) والله ياخد فيك الحق .. وراني ما مسامحاك لا دنيا ولا آخرة ...

شافت فأمال وأحلام

خيرة: يلاه نمشيو من هنا .. (كانت غاطيح شدت فيها امال بخوف) من بعد ونعاود ليكم....

هزات شانطتها وصاكها بقاو مجموعين من هداك نهار وخرجو من تمااا خلاو زهور غاتموت  بالفقصة والاعصاب...

رجعو لدار مجموعين حطت ياقوت من بعد ما نعسات .. ورجعات عندهم كاتعاود ليهم  ليهم .. كلشي كيفاش ضربها وسد عليها وحرمةوها من بنتها.. وهوما كايسمعو ليها  مصدومين آمال كبدتها تحرقات على داكشي اللي سمعت .. واحلام  باغية تاكل راسها بالفقصة...

آمال: هادشي كاامل داروه فيه ابنتييي وحنا ما حايبين خبار !! الله ياخد فيهم الحق ياربييي الله يعطيهم العدااب .. كون يحساب لينا قاطعين يدهم من رحمة لهاد درجة منخليكش ترجعي  معاه .. باك الله يرحمو لي كان هاز همك..

احلام: (بعصبية) هادشي كامل واقع ؟ كون قلتيهالي كون شديت شارفة ريشتها .. نوضي خاصك ضرووري ديكلاري بيه ميفلتش منهاا .. شنو حاسب فراسو السيبة فالبلاد ولا شنو الله يعطيه الشلل فاليدين...

خيرة: داكشي فاش كنفكر مغاديش نسكت ليه هاد المرة .. والله ماتبقى فيه على مدزز علياا كنت صابرة على بنتي ولكن صبر تسالااا .. فين ما بغاني نوصل معاه...

آماال: انا بغيت ليهم العذااب فهاد النهاار .. الله ياخد فيهم الحق .. نوضي تهزيي دابا  عند البوليس...

خيرة خلات بنتها مع آمال ومشات هي واحلام .. عند طبيبة دارت Certificat هي الاولى .. من تماك ولاو لكوميسارية .. كان واحد تما من معارف احلام  .. هو اللي عاونهم من لي دخلو حتى خرجو .. وراهم حتى اسم جمعية ...

احلام: واقيلة عرفت جمعية لي قال لينا سيد... بعيدة شوية ولكن نمشيو...

خيرة: زعما يديرو معانا شي حاجة ؟ خلينا فصباح ونمشيو... خاصني رجع عند ياقوت...

احلام: واخا فصبح ونصبحو عليهم.. الله ياربي شداك ترجعيلو اخيرة .. سيد عرا ليك على وراقيه شنو بقاليك مزال...

خيرة: ما رجعتش حبا فيه رجعني غير  بابا الله يرحمو مسكين كان معدب بسباب مشاكلي... (تنهدت) كون غير كان معايا اليوووم...

احلام: انا معاك اخيرة متهزي هم لوالو...

جاوبتها بابتسامة .. و ركبو فالطموبيل راجعين للدار...

خيرة:  خفت نكون غير كانخوي الما فالرملة .. ما يتشدش شماتة .. !

احلام: كوني هانية سيد لي وقف معانا قبيلة راني كنعرفو .. يكون خير مالكي متشائمة...  دابا نتي خاصك تدفعي الطلاااق...

خيرة: هادي حااجة مافيهاش  الشك اختي .. من غدا بغيت نطلق منو كرهتو وكرهت عيشتي وحياتي وانا معاه .. كرهت الزواج والرجال وما يجي منو ...

احلام: ان شاء الله كلشي غادي يتقاد .. دابا طلقي ووتفكي منو وهادشي غادي يبقا غير تعاويد .. ومتعرفي تلقاي بشي ولد الناااس ينسيك فمحاينك ..

خيرة: (تنهدت)  كضحكي علياا  وزايدون شكون لي غادي يقبل بيا وانا بالبنت الله يهدييك ..

احلام: علاش مالكي كاتحمقييي والف واحد يتمناااك .. راه كاينين ولاد الناس غير نتي طحتي فداك  شماتة الله يلكيها ليه كحلة زحلة...

خيرة:  انا  كافياني بنتييي مابغيت راجل نعيشو انا وياها ونقد بيها شي حاجة وخرى ممعمرااش ليا الراس...

احلام: عارفة تجربتك مع زوااج كانت فاشلة وصعيبة ولكن متشديش على راسك مزال صغيرة ...

خيرة: حاليا كنفكر غير فياقوت .. وكيفاش نعاود نوقف على رجلي .. كنحس براسي مريضة آ احلام نفسيا و جسديا .. و واقفة على قبلها .. ما باغية نتقل على حد كلها لاهي فهمو...

احلام: يكون خير اختي ما تهزيش فخاطرك بزاف .. رتاحي بعدا و يكون خيررر....

ركنات احلام الطموبيل ونزلو داخلين للدار لقاو امال فالباب كتسناهم وتسولهم شنو دارو....

بعد يومين
خارج من الكوميسارية معصب .. و  عاقد غوباشتو  ومعصب دازت عليه هاد اليوماين وغير مزاد حقد وتكره منها حلفها فيها  مايدوزهاش ليها...

ركب شقفتو  وقصد دار نورة .. ،جبد سوارت فتح الباب ودخل لقاها كاتفرح غير شفاتو وقفات بخوف مصطنع...

نورة: (عنقاته تطبطب على ظهرو) عبد الهادي فين غبرتي عليااا شحال تخلعت عليك !

عبد الهادي: (معصب) كنت  فالكوميسارية بنت الق*بة ديكلارات بيا .. كون ماعطيت الفلووس و وقف معايا واحد صاحب لواليد كون باقي تمااك بربي  ماتبقى فيها...

نورة: (حطات يدها على كتفه) ضسرات بزاااف هاد المراة عندك !

عبد الهادي: بزاف كاااع .. ولكن غير بلاتي الويل غادي تشوفو معايا .. خلينا منها جيت باش نديييك .. بما ان بلاصتك خوات معندك ماتبقاي ديري هنا صافي تكاتبنااا  نديك الدار...

نورة: (فرحات فداخلها لكن مبينهاتش ) وشنو غادي تقول مك .. الى وقفتي قدامها وقلتي ليها خبار بحال هادا ماشي بعيد طيح لييك...

عبد الهادي:  تعصب شوية وتنسااا  سيري جمعي حوايجك و يلاه !

ضحكت بخبث .. وطارت لبيتها كاتجمع وقلبها كايشطح بقات عليه فهادوك الايام لي سافر معاها فيها حتى عقد عليها .. ودابا هاهي غادي تمشي لدارو ومقررة تولي هي مولات الدار  والرأي وشوار ...

جمعات كاع داكشي اللي عندها خلات شي حاجة قليلة .. هزات شانطة ديالها  وخرجات لعندو خداها من عندها ومشا قدامها .. رجعات لبسات جلابتها اللي شرات فالدهاز  ..  وطلقات الشعر كحلات العينين وخرجات لعندو .. سدات الباب ومشاو....

نزلت هبطات نورة كضحك والفرحة فعينيها .. دخلوو للدارر تيقلبوو عليها..

عبد الهادي: مي فينك انا جييت

خرجات عندو من الكوزينة كتبوس وتعنق فرحانة اللي شافتو...

زهور: على سلامتك اوليدي ..على سلامتك ..  كانت بغات ترزيني فيك وتغصبك فشباابك...

عبد الهادي: كوني هانية امي .. مززال نوريها لعب معايا كيداير...

يلاه بغات تجاوبو شافت نورة موراه داخلة كاضحك وتشوف لعندها... قندشات والدم سخن فيها دم سنانها هي نورة...

زهور: (خنزرات فعبد الهادي) شكاادير عندي هاد الخااانزة ؟؟

نورة: حشومة عليك آ خالتييي !  تستقبتي عروووستك جدييييدة هاكا....

زهور: (طاح ليها اليد مع الراجل) اويلييييي شنو كاتقولي؟؟؟

عبد الهادي: راني تزوجتهااا آ مي...

زهور: اويلي اعبد لهاااادي اشنو كتقووووول؟؟ واش كضحك علياااا ولا شنوووو .. (كضرب فجنابها مفقوصة) انا شنووو قلت ليك على هاد لفعة لكرطيطة شنو ؟ ياك قلت ليك منبغيهاش تزطم فداااااري ... (شافت فنورة باغية تنقز عليها وشدها عبد الهادي) هضررري الفعة هضررري شنو درتيلو كتى تلويتي عليييه ...اشمن فقييييه مشيتيلوووو .. حتى ولا يهتهت بيييك وتابعك ليل نهار....

عبد الهادي: مييي واش تسطيتي ولا مالكي سيدة بغيتها وبغاتني تزوجتهاااا .. شنو لي ضرك نتييي فهادشي...

زهور: غير انا ولا هي فهاد دااااار كتسمع ... دخل هي لداااري نخررررج انا...

غبد الهادي: دونك نمشي اناويااااها ! وعندااااك تلوميني وتقولي ولدي مشى وخلاني ... ذنبك على راسك اميييي...

زهور: (طاحت فالارض تبكي وتنوح) الله ياربي كبرت و ركبت وراريت .. باش فتالي يجييي يفضل سلكووووطة عليا ويتزوجها بلا خباااري....

عبد الهادي: ما مفضل وحدة على وحدة نتي مي على راسي وعيني ونورة مرتي .. ما نقدرش نفرط فيها .. باراكة غير الفقصة ديال لكلبة لي مشات متزيدينيش حتى نتي امي الله يهديك (باس راسها وهي كتبكي) نوضي نديك لبيتك نوضي...

نوضها وغمز نورة اللي هزتلو براسها .. ومشات جلسات تدور راسها فالدار آخر همها زهور و هضرتها .. رجع عندها هز شانطات وقاليها تبعو طلعو الفوق .. وهي تقوليه...

نورة: عبدوو عنداااك تم عندااك تدخلني لبيت مراتك ..

عبد الهادي: كوني هانبة هداك لبيت غانشعل فدين مو العافية .. باش ما نبقاش نشم ريحتها فنيفي....

مشاو لبيت اخررر كان واسع ومهوي كان مخلينووو غير لضياااف .. نورة دورت راسها فيه عجبها بدات تبلاني كيفاس ديكوريه....

نورة: مك درتها بحال مي ما ديتش عليها غانصبر عليها على قبلك .. غير هو راك عارف صبري قليييل وكنشرب دوا ديال لعااااصاب...

عبد الهادي: غير ميكي عليها انا نهضر معاها ما دورش جهتك .. مع لوقت غادة تولف وتنسااا... نتي غير تهلاي فيها ...

نورة: على راسي وعيني الحبيب ديالي .. خالتي زهور راه بحال مي لي معندي .. نديرها فوق شفيراتي .. 

عبد الهادي: هادشي علاش تنحمااااق على مك ..

قرب لعندها تيبوس فيها مجنن وهي دفعو تضحك ..

نورة: سير تخدم على راسك وخليني انا نقاد البيت .. و نوجدو شي سهرة الليلة .. غير انا وياك الحبيييب....

عبد الهادي: واش لي عندو نتي مزال تبان ليه شي خدمة ولا خروج من داااار انوارتيييي..

نورة: واااا سيرررر باش توحشنيييي ونتوحشك ..

عبد الهادي: ها هو غادي...

غير خرج هو نزلات هي عند زهور لقاتها طايحة ففراشها كترعد...

نورة: خالتي كيف راكي ياكما مريضة ؟ اااه مسكينة كتبكي على عروستك لولى لي مشات ولا على عروستك جديدة لي جات ؟

زهور: لقيتي ما عندي صحة دابا .. حتى نسالي ليك ويكون لكلام ابنت الزنقة..

نورة: وهاد بنت الزنقة غاتعاود ليك ترابي .. وتوريك وجهك فالمرايا... صبري عليا نسالي ليك... و نوريك نهار وقفتي فطريقي وزوجتي ولدك بوحدة غيري...

خرجات وخلاتها كتحرق فبلاصتها مريضة ومهدودة باغية تنوض ليها وما لقات جهد....

خيرة فبيتها كتلبس ياقوت حوايجها .. وتفكر ساهية شحال من مطرقة فراسها ، كتبان ليها الطريق مزال طويلة والعداب عاد غايبان .. ولكن  مواعدة راسها تقوي نفسها وتهز الراس وتحارب اي حاجة تجي فطريقها .. مهمها كانت صعيبة الحياة ماشي ساهلة وخاص الانسان يقصح راسو ويصبر .. حتى حاجة مكتجي ساهلة والى بغات توفر لراسها حياة هانية مع  بنتها خاص تحارب بكل معندها .. واخا نفسيتها مهزوزة  كاتداوي راسها براسها و ياقوتتها كافية باش تخليها توقف على رجليها...

دخلات عندها أمال  جلست حداها كاتنهد...

امال: هي المسخووط خررح منها 

خيرة: غير سكتي رانييي مفقووصة مقضييت والو تعصبت ولد الحراام خرج رااسو منهاااا ..

أمال: عرفتي اخيرة ابنتي كون طلقيني نمشي نشتف عليه براسي ناخد حققك..

خيرة: الله يهديك اماما واش تقدي عليه .. هاداك راه الحيلة لي تنفع معاااه انا باغية امتا نطللق باش نحس براسي حرة .. نرتاح من همو عييت...

امال: يكون خير ا ابنتي بلا متفقصي راسك

خيرة: المهم غانوض نشري ليكوش  لياقوت تسالا..

امال: تسناااي

جبدات بزطامها خدات منو الفلوس وعطاتهم ليها...

امال: هاكي خودي ديباني بهادوو

خيرة: (خدات من عندها الفلوس وهي حشامة) الله يقوي عليك لخير .. نردهم ليك فساعة الخير...

رمات عليعا الزيف  ومشات الحانوت تلاقات  لواحد الحارة حبساتها  كطلع فيها وتنزال...

الجارة: خيرة رااك هنااا؟؟ ياكما غضباانة عاود (غمزت ليها ) سمعت واقفة على  طلاق نتمنى متكونش بصح ..

تنهدت خيرة حتى بغات تميك عليها وهي ترجع .. علاش غادي تحشم تقولها مدام هي مقتانعة  ومرتاحة فقرارها  ..غادي تقولها عادي اه مطلقة ومن بعد شنو لي غادي يخليها تحشم ! تحشم الى بقات تحت ظل راجل معيشها العداب وتصبر للذل والقهرة والعيشة الحارة غير باش متسماش مطلقة هي كتعتابر راسها قوية دابا لي خدات قرار بحال هذا ...

خيرة: (بهدوء) ااه غانطلللق الخباار صحييبة رتاحيتي؟

الجارة: اويلي اصحيبتي طلقي بالبنت وشكون يديها فيك ؟؟ لا لا خاصك تفكري راك تندمييي شكون هادي لي تبغي طلق اختي طلاق مايبغيه حد راه  كلشي عايش المشاكل صبريي ...

خيرة: هادي حياتي وانا عارفة راسي شنو يصلاح ليا بلا ماتهزي ليا الهم نتييي...

الجارة: وراك جارتي ونصحك بحال ختييي هادشي لي كاديري فيه ماهواش انا نقوليك...

خيرة: مزروووبة خليني ندووز عفاك

زولاتها من الطريق خلاتها غير كاتشوف .. معندهاش الكانة لي تسمع هضرتها ... عطات لمول الحانوت الفلوس عطاها شنو خاصها وضحك ليها. 

- مرحبا بيك اخيرة نورتي الخومة .. الى خصاتك شي حاجة اجي المحل  ديالك....

خدات من عندو السخرة وخرجات معصبة ..  فين عمرو هضر معاها ولا ضحك ليها  .. طلع ليها الدم وندمات اللي عتبات الباب....

خيرة: محااال مزال نخرررج اماما .. عيت ما حيلتي فالرجال ولا العيالات .. واش بنات ما كيدخلش فسوق راسهم ..

آمال: مالك شنو شكون لي هضر معاك نخرج لبوه ..

خيرة: غير واحد خيتي تلاقيتها كتهضررر معايا بواحد الطريقة .. وهي ماشي سوقها اصلااا... مبقيتش نخرج انا گاع...

صفاء: (خرجات من الكوزينة هازة تفاحة ودايرة يدها فالجيب ديال سغفيت) اوا اختي خاصك ديري غشا على عينك وما تسوقي لحد .. ماشي تتخباي فوسط دار .. ونتي ماشي دراسك .. تابعاك بنت خاصها مصروفها وقرايتها وزيد و زيييد .. فكررري للقدااام شوية ..

خيرة: (تنهدت) هادشي راني عارفاه آ صفاء .. كنتسنا نطلق باش نشوف شنو نديررر... ما غانبقاش مربعة يدي .. وانا بنتي عارفة راسي غانقد بيها...

صفاء: حتى انا ما قلت ليك والو .. غير نصحتك حيت لهضرة فيك فيك .. فاش كتسناي باش دفعي داك طلاق (قربت جلسات حداها) فنظري ديري طلاق الشقاق .. تهناي من زمررر ... واخا ما غتشدي والو المهم تطلقي بالزربة و النفقة ديال بنتك توصلك...

خيرة: ما باغية منو والو .. غير تيساع خايفاه يشد معايا الضد .. و يصدق مباغيش يطلق...

صفاء: اوا على هاد لحساب غادفعي شكاية لوكيل الملك .. يمشي يتربى .. حيت ديكلاريتي بيه فالكوميساريا مايديرو معاه والو .. خاصك ضروري محامي..

خيرة: واش اصفاء ختي انا عندي فلوس محامي الله يهديك...

آمال: متهزززي همو انا نخلصو ليك .. غاتفكي من داك لكلب...

صفاء: صافي انا نشوف ليكم واحد المحامي راه معررووف مزيااان..

خيرة: الله لا يخطيكم علياا...

امال: سمعت شي حد كيدق شوفي شكون اصفاء...

ناضت صفاء فتحات الباب .. لقات عمها عبد الله فوجهها .. تنهدت وردت عليه السلام .. خواتلو الباب ودخل قال السلام وجلس ..

عبد الله: ما جيت ندابز ولا نغوت ..

امال: واش جابك اسي عبد الله...

صفاء: (واقفة مربعة يديها) تانا اعمي راه مقادرة على صداع الراس .. لي جاكم فحقكم خودوه بالشرع والقانون .. واخا راكم متستاهلوش ..هداك ورت ديالي انا وخواتاتي....

عبد الله: واقيلة لا بغيتي تخالفي شرع الله ..

صفاء: ونتا الله كتعرفو غير فالورث مالك معرفتيه .. فصلة الرحم مع خوك فالحيااااة....

امال: صفاااء سكتي .. براكة من لهضررررة لخاوية خليهم يديرو لي بغااو .. حنا وليات بيناتهم .. خليهم يديرو فينا ما بغاااو...

عبد الله: (ضحك بفقصة وقال بسخرية ) حنا خوتو نتحرموو من الورث و البراااني يجي من اللور يدي الضربة صحيحة...

صفاء: مفهمتش شكون هاد البراني لي دااا ضربة صحيحة....

عبد الله: (شاف فخيرة بنظرة قاصحة حتى نزلت راسها) ختك .. اللي هي ربيبتو .. مشيت سولت فالمحافظة .. لقيتو كاتب ليها المحل اللي فالسووق بيع وشراااا....

صفاء سخانة طلعات معاها .. بحال اللّي صرفقها حلات عينيها على وسعهم كتشوف فعمها وتبلع فريقها تزاد معاها زايد...

صفاء: كيفاش كتب المحل لخيرة ؟؟

عبد الله: ايييه الالة مالكم زعما معارفييينش .. فضل علييكم البرانييييي وقاليك خويا حقانيي...

خيرة كانت غير كتشوف .. مزال مامتيقاش شنو كاتسمع  مانواتش يكتب ليها المحل .. عارفة راسها عزيزة عليه ولكن هاد االتصرف منه عنا ليها بزاف ..
الدموع تجمعو فعينيها تفكراتو وقلبها نغزها .. كون لقاتو غير قدامها تشكرو بصح مكانتش من لحمه ولكن عاملها معاملة بنتو .. فكر فيها وهو حي وحتى وهو ميت...

آمال عجبها الحال  اللي الحاج عتبر خيرة بجال بنتو وخلا ليها حتى حقها حيث كان عارف ما غاديش تورث فيه .. وغاضيييع بدات ترحم عليه وتدعي معاه...

امال: سير اعبد الفتااح الله يوسع عليك ضيقة القبووور الله يرحمك فهاد النهااار ياريي...

خيرة: امييين الله يرحموو

امال: (وجهات كلامها لعبد الله) خيرة عمر الحاج حسبها براانية .. طول حياتو وهو معتابرها بنتو عمرو فرق بيننا وبين االبناات  حاسبها بنتوو وكثر كان يحن فيها وديما معاها .. خوك مظاالمش خوك فكرر فيها حيث حاسبها بنتو ما بغاهاش ضيع...

صفاء: (بغل وحقد) ياك امي وانا لي  بنتو من لحمو ودمووو علاش مخلاش ليا المحل مسبق عليا خيرة لي غير مربيهاا...

خيرة محملاتش كلام صفاء تزيرات ومعجبهاش الحال.. تسمع هضرة بحال هادي من عندها .. وهي اللي عمرها حسبت راسها غريبة عليهم...

هبد الله: اواا زيدك باش تقولي الحااج مظاالمش نقول انا ماشي مشكييل اوا وبناتو؟؟

صفاء: (بعصبية) لا لا شي حاجة كاينة غايكون داكشي مزووور با انا لي يبغيني نشد عليه المحل خيرة شنو عرفها  بشي تجارة ولا بيع وشرا ؟؟  حياتها كلها وهي بحال الخدااامة كتعرف غير تشقا وتربي واش هي لي تجيري المحل شنو كتخربقو ؟؟؟

امال: (قاطعاتها) صفااء حشووومة باك كون  معرفهاااش  قادة ميخليش ليها المحل.. تسيرو ولا متسيروش هي راه خلا ليها رزقها مناش تعيش هي وبنتها...

خيرة: صفاء علاش كاتقولي هاكا آ ختي؟

صفاء: ( دارت لعندها كتغوووت وتهز فيديييها ولا وحظة وخرى مبقاوش عرفوها) ما رانيش ختك و با عمرو كان باك .. باش تورتييي فيه .. ياك غير دارر فيك خير وربااااك معانا.. قلنا ماشي مشكل يتيمة و درويشة نديرو فيهااا خييير ..  ولكن باش تزاحمي معانا فحقنا لاااا.. اش لحقنا لهادشي كااااامل؟؟؟

عبد الله: الحاصوول حلو صداعكم انا مشيت تنعاود نولي.... (خرج وخلاهم مدابزين)

خيرة: (حبست دموعها بالسيف عينيها حمارو وشافت فصفاء) الله يخلف عليك اختي .. وانا لي كنت حاسبة راسي وحدة منكم .. و قلبكم عليا وقلبي عليكم .. الله يكثر خيرك ! وليت ماشي ختك ...

آمال: (شدات فقلبها لي كينغزها) خيرة سيري عند بنتك .. سيري عند بنتك الهضرة ماشي دروووك معاها...

صفاء: لاا دابا تكووون لهضرة .. ولا نتي ديما تجي من جهة بنتك ؟ ..  (دموعها نااازلين) حتى نتي بحال بابا كتفضليها عليااااا...

امال: فين عمرنا انا ولا  باكم فرقنا بيناتكم .. وبااااك بعداااا  ياك كنتو عندوو كاملييين فكفة وحدة .. (حركت راسها بالنفي والنفس مقطوعة فيها) واقيلة انا لي معرفتش نربي .. باش تقولي لختك هضرة بحال هادي قداااامي !!

صفاء: (كتبكي وتغوووت) واش قلت انا ياك قلت غييير الحق .. ديما كتهتمو بيها غير هي ودايرين بالكم معاها .. بابا كان يهضر غير بسميتها .. خيرة خيرة .. فين خيرة .. عطيو لخيرة .. مال خيرررررة ... بحال هي لي بنتو ماشي انا .. حتى وهو ميييت كيفكررر فيها .. علاش زعما كاتب ليها هي وحنا خلانا ندابزو مع خووووتو....

امال: نتي واقيلة تفليبيتيييي .. كون ما حشمت راك وليتي مراة و فايتاني فطول حتى نجبد معاك بصقلة توكضك من هااااد لهباااال لي كديرررررري... وراك قارية وفاهمة زعما ما عارفاش بلي باك عارف بينو وبين الله مستحيل يكتب شي حاجة .. يبغي الورث يتقسم كيف جاب شررررع...

صفاء: يكتب لخييييرة حلاااال صفااااء حراااام ؟؟

امال: خيرة مبغاهاااااش ضيع .. بغا يضمن ليها حتى هي مسكينة مستقبلها ..مبغاهاش تمشي فالرحلين وهي عندها بنية .. كان عارف راسوما مدايمش ليها لا هو ولا اناااا .. شوف غير نتي لي ختك وشنو خرجتي فيها .. شنووو خليتي لبراااااني..

صفاء: وما بان ليه غييير لمحل ؟ مالو ما كتب ليها داك لبيت و كوزينة لي ورث من بااااه .. ولا شي خدااام ديال لاررررض .. بااان ليييه غير داك المحل لي فالقيصارية الكبيررررة يكتبو لالة خيييييرة علاش جاااااتها اماما...

امال: باغا تعرفي علاش جاتها (نزلات عليها بصقلة) هااااا علاش جاتها (شداتها من شعرها كتدي وتجيب فيها وهي كتغوووت وخييرة عياااات تجررر فيها وهي لصقت على صفاااء ) هاااااا علااش جااااتها ابنت الحراااام باغية تقتلني ولا طرطقي فيا المرارة ولا شنووو .. ياك داك المحل منهار مات بوك وانا كنقولك شنو نديرو فيه كنتي تقولي ليا نبيعوه ونديرو مشروووع اخوور .. دابا عاااااد بان ليك حتى عرفتيه مشى لختك....

خيرة: (جراتها عليها) صااافي اماما صااااافي (كتبكي) صافييي الله يحفظك بعدي منهااااا .. واش هي دريا صغيييرة كضربي فيها هكاااا...

امال طلقت منها وجلست فالارض  لايحة زيفها كتبكي وضرب جنابها فقصاااتها وغدادتها خلات مرارتها بطرطق...