دعاء :
غبت عن الدوام ايام واتصالات بنات خالي ما بطلت يقنعوني ارجع واني استحيت من حجاية استاذ عمر وهم كلش ضجت من عرفت مجيد يعرفه والمعرفة مو سطحية واضح يعرفه او بينهم صداقة شلون حظ يا ربي حتى هنا يطلعون الناس اللي اشتغل عدهم معارف مجيد!!
بقت رواء تتصل وتحلف ما عدها علم بس تكول ابوها يعرفهم من زمان كلش والعلاقات بدت اصلا عن طريق عمو محمد اخو مجيد
بقت تحجي وياي وتقنع بيه وتكول استاذ عمر يريد يشوفج وضلت تقنع بيه وصدك رحت للشركة وتلكاني يضحك ويكول لو ادري هيج واصلة بينكم ما جنت اجيب طاري الج بس ذكرناه بطلتي ..ضل يحجون هو واخوه استاذ نبيل واني اخوه صارت عندي مواقف حلوة تجاهه واحترمه حيل عبالك ابويه عاد رجعت واستمريت بالشغل ايام وملتهية وناسية كل شي حتى كلامي ويه ابويه خلاني اعيد كل حساباتي من جديد واذا جنت اخاف بس على عافيته هسه صرت اخاف اضعاف من زعله ما عرفت كل يوم من هالايام يحفر بجانب الاخر بير ما اله قرار ....
رجعت للبيت وبيبي حازمة جنطها وشادة هسه ترجع ل...ابويه يحاجيها يصبر ماكو تبجي وتكوله خالك مو زين وكلكم تجذبون عليه وانت شكو مجلب بيه رجعني ...كوه سكتها وطمنها على جدو ساري وكلنا انقهرنا عليه مسوي عملية قلب ..بعد الكلام والاقناع طلبت كلنا نروح وياها وحلفته بكل ما يرفض وابويه ما اعترض وفرحنا الكل حتى الصغار مشتاقين لهناك بين هاللحظات وجه نظراته الي وكأنه يكول هذا اختباري الج يا دعاء ...دنكت وخايفة بكد الدنيا وشايله الهم للقاء وشنو ردة الفعل ولو هو لو عنده كلام ما ينتظرني اني ارزح جان اجا لهنا وبرد كلبه بس يجوز خلص هو هم مني ...امي كيفت تروح تشوف حوراء ومجهزة اشكال للنونو كلنا نتمنى تجي ويانا تولد ببيتنا يمنا بس منو يكول يقبلون وخاصة راشد نذل ما خلاها ابد تجينا من انتقلنا لهذا اليوم
اخذت اجازة العيد يومين بس وطلعنا من اربيل بعد الفجر اجرنا سيارة تكفينا كلنا جدتي فرحانة برجوعها بس من تتذكر اخوها تبجي ونسكتها
وصلنا مدخل منطقتنا واني كمشتني رجفة بكل جسمي بيوتها بانت ملامحها من بعيد كل واحد بينا اله غصة وقصة ابويه تنهد وكأن حمله بكد الدنيا جدتي فتحت الشباك وتشم الهوا وتكول افيش يا ريحة هلي اخواني يكمزون فرحانين وامي تباوع مبتسمة عالخضار اما اني كل هالمشاعر اختلطت وياهن هاج شوقي ولهفتي جذب البشر جذاب يكول انسى لو ابطل اليحب ما يتوب عن ذنبه....لو جان الي ذنب غأني اذنبت بالحب وآخ يا مجيد يا احلى ذنوبي ...
وصلنا تعدينا بابهم ااجبير اللي دومه مفتوح ووكفت سيارتنا بالضبط مقابيل بيته ...عيني تبوك نظرة عالباب وتخاف من ابويه ينتبه اصد بساع وهنا لمحته والدنيا غيرت احساس بالضعف ما مجربته وعدم قدرة للتحكم بالمشاعر ما عهدتها ..بين ما نزل الكل واني استجمعت قوتي نزلت الكل واكفين يستقبلونا من عمامي ...بدا السلام وتعرفون بهيج لحظات كوه تاخذون النفس من واحد لواحد من عمامي كملتهم انداريت اشوف وين صار شفت اخوانه متوجهين علينا بين ما هو فات لبيت اهله سلموا على بابا ولا كأنه اكو اي مشاكل صايرة وعمو محمد طار بي من وده يشيله عن الكاع
بقينا ببيت عمي والكل راح عالبيت الجبير وره الغدا يشوفونه لجدو ساري اصلا جدتي تروح وترجع بس ابويه للظهر يلا راح اله
بقينا ببيوت عمامي من بيت لبيت اول يوم ما حلونا بالليل نمنا ببيت عمي الصغير وباتوا يمنا مسرة وحوراء وقضيت اليوم احلى ما يكون صار كومة ما شايفتهن البطات اثنينهن كوه يتحركن ويكومن ويكعدن موتني ضحك
جدة باتت يم بيت جدو ساري ...صبح ثاني يوم كمت كبل الكل وطلعت لبيت اهلي اشوفه اتمشى واتفرج عالحدايق شكد مشتاقة يا الله ...وصلت مقابيل بيته بالضبط وكفت وصديت اباوع للبيت ياما راقبت وانقهرت وتذكرت الغيرة واخر موقف بذاكرتي من باسها كدامي ويدري بيه اشوفه ...متت ندم على تفكيري بي ومضيعة وقتي هاي الصور لازم ما انساها
فتت لبيتنا مترب ومتروك انقهرت اكثر واللي زاد قهرتي لكيت ابويه سابقني مكابل البيت وصافن واضح عليه للقهر لان هو شكد جان فرحان مم كمله وكعدنا بي لسه اتذكر ما اجا بالسهل كوم يلا عمر البيت زمن ورايه بكل بساطة طلع وتركه
شويه بقينا بي ورجع قفل بابه ..... غسلنا اني وياه مدخله والواجهة وكملنا ورجعنا نسولف عادي اللي يشوفنا يكول ولا مهتمين ...لكينا الكل كاعدين ومسوين ريوك وهم ماتمين وضحك وسوالف لحد ما صارت بالعشرة طلعوا ابويه واثنين من عمامي
مسرة وحوراء راحن لبيت عمه فرحه بقينا بس الصغار وعائلة عمي
كمت ويه زوجة عمي بالمطبخ اساعدها عيب ضالين يمهم رتبت الطبخ وعزلته وهي وامي ديجهزن للغدا ويسولفن ويضحكن ويحجن بعزيمة العيد ببيت جدو ساري يسووها باجر ما مخلين احد ما عازمينه ويذبحون ثيران اضاحي واحد لجدو وواحد لمجيد وواحد لجدة ام معد الله يرحمها ....سمعنا اصوات عمامي رجعوا بس هوسة وابويه عصبي ...طلعنا نشوف شكو ما نفهم بس اسم مجيد وابويه يفشر بعمري ما سامعته هيج يحجي وبهيج اسلوب ..
جابت اختي مي وشرب واني واكفة يم الباب اسمع شلون مفرفح يكول الهم ارفع عليه قضية بالمحكمة وعمامي ما يشجعوه
لحد ما تبين الموضوع هم اني فشلت وانسحبت صح مجيد طلكني شفوي بس الظاهر ما يرضى محكمة يطلك رغم لا مؤخر هواي ولا شي ولا اصلا مطالبيه باي حقوق بس هو معاند يصدق الطلاك بالمحكمة متعاركين وياه ببيت عمو معد بعيد عن جدو ساري لان اصلا مريض وسحب نفسه من اولها
كعدت بالمطبخ بينما الكل وكف يتفرج اسمع بابا يعيط على عمي الصغير يكوله انت مو كلت يطلك وكال خل يجون عمامي يكولون اله على كيفك وهو يعيط وعمي واكع بيها لان صديقه ..جاوبهم باللي حجاه ذاك كايل خل يجون والله كريم ابويه كام يكمز للسما ويوكع من العصبية يكول اله ديضحك عليه مجيد على تالي عمري خله حتى عمامي موقفم متشنج ويحجون مو راضين ...انهزمت ابجي طلعت من البيت للحدايق رحت لبيتنا بالطرمة كعدت ابجي ما اعرف شنو اللي اسويه وليش مجيد هيج ديسوي وياي دمر نفسيتي واعصابي وما يقبل يعوفني هسه شنو معنى هالتصرفات ما افتهم ليش ما يسهلها على نفسه وعليه ...
شلت راسي لكيت مسرة واكفة وتباوع عليه نظرة عطف تقربت صعدت الدرجات كوه ووصلتني حضنت راسي لصدرها وتمسح بضهري
-راح تضلين تبجين
-شيريد مني ابويه راح يموت واضل عمري كله بالملامة مسرة لخاطر الله احجوا وياه
-دعاء عفت عمامي داخلين انذار وعمو معد تخبل علينا وطرده هو بعمره ما مسويها ...طرده من بيته
-وتالي
-كلها ما راضية بس هو يكول ما اطلكها وميريد اصلا احد يتدخل وهسه راح لجدي ساري مدري شنو براسه
سكتتني بعد وقت ورجعنا لبيت عمي لكيت بابا مرتفع ضغطه وجايبين المضمد شادين مغذي هالنوب متت قهر
بقيت لحد المغرب حابسة نفسي ما الي عين اواجه احد كل هالمشاكل بسببي اني لو عايفة هالحب وطامته بداخل صدري ولا هالطلايب وعمتي فرح ما تنلام م تروح ترجع تحجي عليه وتلوم كله من ايدي
بالليل دز علينة جدو ساري ومسميني بالاسم يريد يشوفني ...كنت اظن ابويه يرفض بس وافق وكلنا رحنا لهناك باعتبار باجر راجعين لاربيل لا هاي اجازتنا خلصت
فتنا لبيت جدو ساري واحسن استقبال استقبلونا وبابا كعد يم خاله ولا كأن اكو مشكلة بين العائلتين وهاي صفة اقاربنا كلهم المشاكل فردية ما تتعمم ..بعد الكلام وجاب جدو السيرة وطمأن ابويه بأن كل اللي يريده يصير ورجع سألني الي كدام الكل اذا ببالي ارجع ما جاوبت ودنكت امه بصفي صار ساعتين تتوسلني بس احجي ويه مجيد واني ما اكدر بعد الموضوع تجاوز بيني وبينه وتدخلوا الاهل ..ابويه جاوبه يكول اله ماكو رجعة السواه بيها كافي لهنا وجدو يأيد ابد ما انطاه الحق لابنه يكول حقكم علينا ....خلص النقاش ورجعت الامور طبيعية سهرة ويه احباب خال وولده ولد اخته ملتمين وكلها تحجي وتضحك البيت متروس اوادم جان
البنات اجوي يجرون بيه مسرة وحوراء وبنات عمو محمد وعمو محمد نطلع بالحديقة هو ماكو والكل يدري جدو طارده من الظهر وطالع من البيت ولاحكيه راشد وعمار يخافون عليه بعده مريض
كمت وياهن وابويه من شافنا سال وين مسرة جاوبته عني والبنات سكت ما كال شي طلعنا ..بقينا نسولف تقريبا نص ساعه اللي مكنكة واللي تتصل بخطيبها وكل اثنين متكابلات بسالفة بنصهن وكلهن كاعدات ما اشوف الا مجيد مقابيلي من عت ايدي طفرت كبل وجع على خوف عيونه بيهن غضب يحرك اول وتالي خفت احس روحي انربطت بعد
...البنات كلهن طفرن يخلصوني منه
مسرة:عمو شبيك عوفها لا يسمعون احد يطلع
مجيد :باوعن كلجن والقرأن التحجي كلمة لاحد اذبحها ما يرف جفني اريد احجي ويه هاي لا راح اكلها ولا ميت عليها اني نص ساعه وترجع انجبن وكعدن وجن شي ما صار
سحبني بقوة ومشيت وياه ما انكر الخوف بس اريد اني هم احجي وياه واشوف التالي شنو راح يموت ابويه ...صرنا قبل ببيته بالحديقة من جهة اامخازن فكيت ايدي منه وعاندت امشي
-اوكف هنا حاجيني كافي محد راح يسمع ما اروح وياك هناك
مجيد:س....انت وحدة .....كمل كل تجاوزه كله واني بقبضة ايده عاصر ايدي حتى دم ما ضل يمشي بيها كمت الوب اريد اخلصها حسيتها راح تنكسر
-شتريد هسه مني عوف ايدي عوفني جايبني دتسمعني حجي من هذا ... ضربته بقبضتي الثانية لا اهتم اصلا هو اني وين اثر بي
-ما اطلك سامعتني ما اطلكج لو توكفين الدنيا كبالي ما اطلك ...جان مثل المخبل يهز بيه يريد يموتني يمكن
-لا تطلك اكو محكمة بيناتنا ...بعد ما كملت حجايتي لف قبضة ايده على ركبتي ورفعني عن الكاع خانكني ضهري للحايط ارافس اريد اخلص نفسي منه لا اكدر اعيط احس صوتي اختنك بعد ولا اكدر اوخرها لايده تكلبت عيوني وغوشت الدنيا نزلني بقيت اگح مختنگة وهو يطب على ضهري لما رد الي النفس ورجعت كعدت روحي
بقيت اعد واصف واني هم افشر مره يسد حلكي بايده ومره يجادلني هو يعتب واني ازيد
-...منين هاللسان مال ال.... كافي اسكتي راح اهطرج رفع ايده يهدد واني ازيد
-منين ؟؟منك منو العلمني ؟انت معلمي والله ما اسكت بعد لا عبالك دعاء قبل الفقيرة
-وين انت فقيرة اني الجحش الجنت اشوف هيج انت فقيرة؟ بنات الضايع والله حت للنبي تطلعنه عن دينه انتن
-احنا هسه الطلعنا مو زينات و
-انجبي ما كلت هيج اني
-لا كلت ...اريد اكمل سد حلكي ويهز بيه
-اسكتي يا بلاء .بلائي انت المفروض يسموج بلاء مو دعاء ...عضيته من جف ايده بكل قوتي خليته يكمز وكفخني يصيحلي المجلوبة هو من اكوم اعض ونام على راسي عضني من راسي حركته الشهيرة بالعركات...كمشت راسي وسكتت اخمه اخاف طلع دم ... كعدت وهو بصفي تعبنا اثنينا كام يعاتبني
-ما كلتي الجلب العفته وراي مريض اسأل اشوفه شبي ما بي لو سرطان صايبني ولا انت .. ولج شنو من بشر انت
سكتت وانقهرت من حجايته
-خل اولي ماكو فايدة شكو متكابلين ونضل نتعارك
-اي انهزمي اسهل ما عندج هاي
مشيت من صدك ما اريد اجادل بعد وعبالي صدك نسولف مثل العالم والناس ونوصل لحل
جانت على حافة الحديقة معلكين گنارات (خطاطيف) للاضاحي اللي ذبحوهن المغرب ما احس الا انرفعت وتعلكت بواحد منهن من هدومي وهو كعد عالكاع بعيد كامش عمليته ويباوع الي واني ارافس اريد اوكع روحي لا رجليه طاخه الكاع ولا ملابسي انشكت صارن اصليات خرب حظي
-تعال نزلني تره اعيط والله
ضحك مستهزأ باوع عليه ورجع نزل راسه يهز بي
-شبيك مو احجي وياك شنو تخليني هنا
-بس سدي حلكج يالكائنات
-نزلني واسكت خليني اروح
-دعاء ..كالها بترجي وسكت عيونه بعيوني .. واني هم سكتت واستسلمت دنكت واجا وكف لحيله كوه يجر النفس نزلني ...صرت حرفيا بحضنه غير يحلني اخذه الواهس يمسح بوجهي ويتمثله واني بطلت اقاومه وهو هم متأذي
-تره انت مطلكني حرام هيج تسوي
ابتسم وابتعد عاف بينا مسافة ورجع لوره مقابيلي اثنينا كوه ناخذ النفس متأذين
-هسه مرتاحة انت
-اي احسن
-ابوج معاند دعاء يكول هي ما تريدك صدك؟؟
-ابويه حقه بكل اللي يسويه
-ليش تستفزين اعصابي شتريدين كولي حتى نسد السالفة ونرجع جاوبيني عالاقل تريديني لو لا مو اني ماكل نعل وانت تجرين بضهرج مثل كل مره
-احجي ويه ابويه مجيد بعد من وصلتها لهنا تحلها انت
-بنت ال...ليش تخليني اتجاوز دا اكولج قافل ابوج قافل كل مره اكوله التريده شنو يكول طلك خ...طلاك ما اطلك اني
-انت طلكتني تره
-يعني بذاك الوقت لو بيدي مسدس ارميج وحق هو الله
-اي رحم الله والديك من تعترف واني ما اكدر اعيش وياك انت لا تعترف بغلط ولا تصحح موقف ولا تريدني اصلا بس عناد واثبات موقف ورأي
-لا تخربطين بالحجي
-حاولت تعتذر
جنت مريض وانت ما هان عليج كلمة تكولين
-اني احجي قبلها قبل عمليتك
اجتي بكلامتا مسرة فاحطة جلبت بايدي تجر بيه
امشي امشي
صاح بيها جفلها
-وين ماخذتها انت
-ابوها دز اختها تريدها
انخبصت وكمت ارجف واجيت امشي جلب بايدي
-احجي وياه وكولي ارجع باللتي هي احسن يا دعاء
-قنعه انت
عفته ومشيت وبقى كامش بطنه ويتلوى من الالم ضل بالي يمه حجيت ويه مسرة
-ارجعي لمجيد
-ليش
-عمليته !!
-حنين يالشيخ ! ديلا امشي هاي عود كلنا يتفاهمون صوتكم وصل سابع جار
بس عبرنا عالحديقة الثانية لكيت البنات كلهن متراصفات خاتلات يباوع علينا ...اجيت اعبر للبيت كمشتني
-وين رايحة
-غير لابويه
-تره جذب لا دز عليج ولا احد سال اصلا ملتهي جوة بسوالف العشيرة وامج سألت كلنا الها يم حوراء بس كلت اخلصج اخاف تحبلين بوقت حرج ضربتها على كتفها وانقهرت هي حامل وين بيها
-ووين حوراء
-اخذها راشد لا تفتن لاهلكم
-خوش عصابة
كلهن ضحكن وتكول الهم فوك ما نقذناها جا عمي هسه مكصبها للعزيمة مالت باجر
بقيت وياهن وصدك ابويه لحد نص الليل ملتهين جوة عدهم سوالف عالعشيرة ونقاشات ما تنتهي
. كنت اظن ثاني يوم نرد لاربيل وانشغلنا بعد مره بمجيد وسوالفه