🍷🥂خــادمـة الـقاسـي🥂🍷
✦وكأن عيناك في الحسن آية تتلى على قوم كفروا فاهتدوا...!
#جانب_عفوي....!
أريناس: عافاك ماتلعبش بقلبي الهم اللي فيه كافيه وبزاف عليه...!!
على جملتها رمقها بملامح باردة كبرودة فصل ديسمبر....شافت سكوتو و برودو وسكينتو وخفْت بخطواتها بعدما مدات ليه صوالحو ورجعات دخلات للدار..
تبعليها العين حتى غبرات من قدامو ودور فراسو كلامها وكلامو وحس بقلبو تزييرر عليه...بصح لي فيها يكفيها....من صغرها وهي فالهم ماعندهاش فين تزيد.
تمات داخلة بهيئتها المميزة عن الجميع...هيئة بيضا تبعث الطمأنينة لوجه الناس لي بيها دايرين...ببيجامة بيضا من ثوب رطب حتى للرجلين...اللون واتا بشرتها الحليبية ....محزمة على نصها الفواطة وجارة فرجلها البانطوفة.
خفات برجليها بزربة للكوزينة لقات الحليب فاض وخرج عقلو والدنيا حالتها ولاات...جمعات داكشي وخرجات فطرات معاهم... من بعد ما سالاو فطورهم وخرجو مجموعين هي دارت الغدا وكملات الشقااا وجلسات فالصالون كاتففررج حتى دخلات عليها ليلى دايرة الكاسك على راسها وكاتشطح وتحنقزز قدامها متلفة خيوط دماغها والفريخ طاير ليها.
اريناس غي كاتشوف فيها مصدومة بضهشرة وليلى كاتنققز وتغني مع الأغنية لي فكاسك وذنيها السدادر والفوطويات كاع ركشاتهم وأريناس تابعاها كاتقاد فيهم .
" ويلي اختي نتي في عار الله...سلمي وطلبي التسليم اش واقع؟".
ليلى(كاتغوت ماسامعاش صوتها): خلييي عليك داكشي حياتك كلهااا شقااا وشغال الدار واش مكاتعياااايششش؟؟؟ ....اجي نشطحوووو اجيييي.
شداتها من يديها وبدات دور بيها وأريناس كاتغوت بالخلعة كاتقول دابا تطلقها وتجي على راسها يتدفق ليها المخ ...
ليلى: حبك سسفاااح....مجررم وماسك بسلااح....ايوااا.. يالله يالله يالله....ارقصي ارقصي....هههههه.
فاللخر طلقاتها وتلاحت على الفوطوي كاتسترجع أنفاسهااا....شافت فيها كي كاتصاوب شالها على راسها وهي كاتضحك .
ليلى: غانتغداو غير انا وياك فالدار ياك؟...شنو بانليك تطفي على داكشي لي كايطيب ونطلبو الغدا من برا؟؟.
أريناس: وعلاش اختي مالنا ناقصنا الخير...درت واحد الطويجين شهوة منو تاكلي عليه صباع رجلي..ءءاا ايديك زعما...اش حبسك للماكلة دبرا اصلا مكاتكونش نقية.
ليلى: اش كاتفهمي نتي...راه البنة فالعفن.
هزات تيليفونها من فوق الطبلة وصونات لبيدزيريا معروفة فالمدينة طالبة السوشي وجوج بيتزا كفتة وعواصر بالخف ورجعات الكاسك لوذنيها تكمل رديحها...اريناس بقات كاتشوف فيها ....فيها جانب طفولي مرح كايكشف على عفويتها وصبيانيتها البريئة....تبسمات بلا هواها وناضت طفات البوطة تخلي الطاجين تاللعشا حسن....غي شوية دالوقت وجا الليفرور جايب السخرة.
خرجات عندو ليلى خلصاتو ورجعات دخلات فرحانة وكاتنقزززز هازا فيديها الماكلة ...!
#بريستيج....!
بواحد الحماس فشكل كاتدندن وتفتح فالعلب وتحط فالماكلة على الطبلة...أريناس كاتعاونها جابت الكيسان والطباسل...وبداو معاونات بجوج وكايهضرو.
ليلى: فراسك فمصر ماعنديش صحابات...عندي غي صحاب..؟!
أريناس(كاتخوي العصير): وعلاش..؟!
ليلى:مكانتفاهمش مع البنات بزاف....لي تعرفت عليها كاتبغي تبان عليا ههه...ماعرفتش واش الديفو فيهم ولا فيا..!!
أريناس: فيها خير...تخلقتي بوحدك وغاتموتي وتتدفني بوحدك...مكاين لاش تربي الكبدة على شي حد.
ليلى عجبها كلام اريناس...جلسو ونطقات وهي كاتدفع ليها البيتزا قدامها.
ليلى: كاتعجبك بيتزا بالكفتة ياك؟!.
اريناس فهمات بلي هاد الخبيزات المعمرات من الفوق سميتهم بيتزا هزات راسها بأه وسكتات كاتشوف فليلى جرات لعندها قيسفة السوشي.
رمشات بعويناتها لعدة مرات وقرنات حواجبها وسطهم ناطقة ببسؤال بريئ.
أريناس:شنو هادا؟!.
ليلى تبسمات لعفويتها ببشاشة وجاوباتها بنفس لطافتها.
" هادا السوشي...دوقي تشوفي".
اريناس سكتات خايفة تنطق سوشي...وتنطقها شي حاجة اخرى ثاني وتشفي ليلى فيها كيما كانت دير فاش كيسر ديما هاينها بسباب غبائها.....متبعاها العين تاهزات عويدات السوشي كاتاكل بيهم بخفة الحركة وكاتبنن سادا عينيهااا باين عليها كايعجبهااا .
هزات دوك العواد كايزلقو ليها من صبعانها وبدات كاتحاول تاكل بيهم ..مرضات وتدعقااات مامولفاش بهادشي وعمرها شافتو اصلااا وتمنات كون ماشافتوش وماعرفاتوش... شوية شافت ليلى سادة عينيها كاتبنن بمداق السوشي وهي تهز بيديهااا ولاحت الدغمة ففمهااا وغي كاتشوف فيها ليلى كادير العويدات ففكها زعما راه كانت كاتاكل بيهم.
ليلى(تبسمات ليها): كي جاك؟!. انا مامرتاحاش غاناكل بيدي.
اريناس(خرجات عينيها وشهقات حاطة كفها على فمها): ويلي لااااا....خاصك تحافظي على البليزيييير ديالك حيت نتي بنت .
ليلى فاللول بالصدمة تكوانسات كاتشوف فيها...فالتالي فاقت من صدمتها وباستفهام حركات راسها.
ليلى: بغيتي تقولي البريستيج ياك؟!.
#تهديد...!
اريناس من الحرج سدات عينيها وحنات راسها مكمشة ملامحها بمركَة من الموقف لي تحطاا فيه مع ليلى...وليلى تبسمات لعفويتها وقالت.
"هاد كيسر كايكودك لطريق الإنحراف كايعلمك غير الكلمات اللي مش صالحة هههه".
ضحكات اريناس بحشمة وبإحراج فالوقت ذاتو وكملو الماكلة فالجماعة واخا هي ماكلاتش السوشي ماعجبهاش المذاق حيت مامتعوداش على ماكلة الزنقة بزاف أصلا..!
▪مساءا▪
بينما كانو كلهم مجمعين برااا فجو من الضحك والنشاااط وابتسامتهم مامفارقة محياهم والخضورية فجنابهم مزينة جلستهم ومريحة خواطرهم.... على كويس دالقهوة شادين الوقت بالحديث لي يدي حديث ويجيب الثاني حتى حلاة القعدة وحلاو المواضيع...دخل بسياارتو الفاخرة السودا بسوادها اللي يشبه سواد قلبو للفيلااا ووقبل مايفراني جرها فمكانها منوض العجاج وراه ...دخولو رهيب لفث انتابههم كلهم وهوما كايتلفثو لعندو يشوفو شكون هادا لي داخل بعجاجتو.....وهي فالباب الدخلاني غادا ليهم بقرعة دالما للجردة لمحاتو فالسيارة قبل ماينزل وبلا ماتفكر رجعات كاتجري دخلات للكوزينة خطواتها كايتسابقو مع الريح مخلية ليلى وكيسر يقرنو حواجبهم بين عيونهم باستفهام وهوما جالسين فالصالون ...عارفة الى شافها غايهضر معاها عاود تاني وغاتكحلها مع كيسر.
كيسر هز عينيه للنافذة العريضة جنبووو وببرود ميل راسو كايشوف حيدر ومعاه شخص آخر غاديين عند نجمة وقادر و سليمان وثرية فالجردة لي غير شافوه تبسمو ليه بفرحة مرحبين بيه ....جبد كارو من جيبو شعلو بهدوء وعللا صوتو مخاطب اريناس بنبرة عالية وهادية فنفس الوقت.
" تخرجي تموتي
#صفة....!
ليلى اكتفات بالسكات كاتخربق فتيليفونهااا وتتبسم مع تصاميمها المنشورة على حسابها فالأنسطغران غير هي وراسها...وحيدر وصاحبو مدة وهوما مع العائلة مجمعين على برا فالتالي ناضو داخلين للفيلا بجوج بيهم يعني جايين يشوفو كيسر...!
كي كايدخل حيدر ااول وحدة كاتجي عينو عليها هي ليلى..
طلعها ونزلها من راسها لرجليهاا بعيونو كايسكانيها وهو كايقرب بخطواتو ليها...هاز فيديه بوكي دالورد ومضيق عويناته فيها مصغر الشوفة.. مدقق فأدق تفاصيلها الأنيقة وهي مقتاعدة الفوطوي برجل على رجل كايلمعو بالبيوضية مع كسيوة فايتة الركبة فضفاضة وثوبها كاليتي رقيق ومريح ....شعرها الشكلاطي على كتيفاتها مسندل مسررح بقصرو مواتيهاا ومكياجها الخفيف مخلي ملامحها بارزين وابتسامتها الباهثة على شنيفاتها مطلعة حنيكاتها اللي بالبرد موردييين ... مقبولة وعندها حقها فالزين وبهاد الشوفات لي كايدير فيها حيدر ، كايقارن بينها وبين أريناس وكايشوف شكون هادي لي غاتتزوج بكيسر
كيسر وهو كايشوفو جاي فجيهتهم ومعاه شخص خر وفيدو الورد نتر من الكارو ونطق بنبرة شبه خافثة وهادئة.
" هادا الوحيد لي ماتحتاجيش تمثلي قدامو دور الخطيبة المثالية....كوني صريحة وطبيعية".
ليلى: حيت هو أقرب صديق ليك؟.
كيسر( حرك راسو بلا بشويييية): لا...حيت هو أقرب عدو ليا...!!
ليلى: امم...يعني فهاد المشهد ماشي أنا لي غانمثل...هادا دورو هو لي غايمثل فيه دور الصديق المثالي....ياك؟!
كيسر:كاتعجبني خفة ذكائك اابنت ثرية.
تبسم بجنب شفايفو وحيت وللا متفتح معاها وكايتيق فيها وكايأمن ليها ...بلا مايشوف فيها بدا كايعاود ليها بنفس النبرة والأسلوب وهوما بجوج كايشوفو فحيدر لي جاي عندهم.
كيسر:.هادا هاز فقلبو خنشة ديال الحقد...وكايقلب على طريقة ينتاقم بيها...وديك الطريقة هي أريناس...!!
#صد....!
هزات راسها بشوية وهي كاتفهم باللي هادا لي جاي ولي كلشي كايشوفو أقرب صديق لكيسر....هو فالحقيقة أقرب عدوو ليه...وفهمات باللي عينو فأريناس...سواءً من دافع الإعجاب أو من دافع الإنتقام...وكيسر كايغير منو عليها ....وهادشي علاش قال لليلى ماتمثليش قدامو هو بالضبط باللي انا وياك مفاهمين...بمعنى" ماتعطيهش فرصة يفرح ويقول غانتزوجو وأريناس غاتبقا ليه... خليه يبقا خايف من المشاعر لي بيني وبين أريناس ومايشوفش أمل فراقنا "
حيدر اول حاجة لاحظها فليلى ملي قرب حداها هي عملية التجميل لي دايرة لوجهها ولا كايبان طويل ووفمها الكبيير ....وقف قدامهم وحول عينو عند كيسر لي جالس جنبها داير يد فالجيب واليد الثانية بين صبعانها شاعل الكَاررو مرة مرة ينتر منو ويبخخ بخاخو مازجو بالهوا وعيونو على باب الكوزينة كايتسنا أريناس تطل ولا تخرج باش ينوض يخرج ليها عينيها من بلاصتهم...!
حيدر: تبارك الله ماشاء الله....مواتييين وعاطيين للعين....مخلوقين لبعضكم مافيهاش حس التخرشيش بجوج بيكم خايبين ههههه.
كيسر شاف فيه ورجع شاف قدامو فباب الكوزينة متجاهلو وليلى هزات حاجب وحطات الثاني كاترمقو بنظرة كريهة ماحاملاهش وماكايدخلش ليها للخاطر...عكس حيدر لي مبتاسم وراشقة ليه من أعماق القلب ديال قلبو ..
شاف فالدري لي معاه وقال.
"عمران...هادا كيسر صاحبي وخويا...وهادي مراتو المستقبلية...كي جاتك؟".
عمران( تبسم هاز راسو بتحية وبحشمة قال): زوينة ماشاء الله...!
حيدر(خنزر فيه): الله يمسخك االكداب قول اامين ...علاش كاتكدب شكون هددك؟!...دابا هادي زوينة وجهها طول من المعلم ديالك ؟! بلاصتك حدا البرمة للكافر بوك...!!
قهقه عمران بلطافة وحيدر رجع قال.
"هه ختي ليلى ماديريهاش مني قلة الصواب...غير ضحكي باسل شوية".
ليلى( تبسمات ليه بتصنع):هانيا تكبر ودير عقلك...!
هز حاجب وحط الثاني كي لقاها جاوباتو بهدوء ورواء وفاش متتبرهشاتش معاه وردات على قمعتو خلاتو يحس براسو فعلا برهوش...أما كيسر خلاص فاش ماهضرش راه هاديك هي اكبر قمعة تلقاها.
رجع حنحن منسي الموضوع.
حيدر: انا حيدر...صاحب كيسر.
ليلى: متشرفين...انا ليلى.
هز راسو بالإيجاب وهز عينو كايدورهم فجنابو الفوق وفالقنات وعمران جلس .
ليلى(عرفاتو كايقلب على اريناس): لمن هاد الورد اخوياا؟!.
كيسر شاف فالورد لي فيديه ورجع شاف فيه مستنيه ينطق..
حيدر: ءء..لل ..لأريناس..واش مكايناش؟.
كيسر وقف وتقدم لعندو مقرب ليه ....غفلو وحيد ليه الورد من بين يديه ولاحو لليلى لي قبطات بيه.
كيسر:مكايعجبهاش الورد...حيت هي وردة والخوت فالحرفة عديان...!
يتبع🍂