مسرة:
بعد تعب وايام انتظار وانشلعت گلوبنا يلا اجا وقت الفرح ...طول الزفة ايدي بايده ونضحك مو مصدكين عبالك مهزومين من اهلنا مو زفة وصدك صارت وتزوجنا ..اول ايام العرس جذب شي يضاهي فرحتها لو ممكن تتكرر يمكن لان تزوجنا بعد معاناة وتواسيل وبهذلة...
دخلنا بيتنا وتفرقوا الناس بالزفة وضرغام كفى ووفى ذب لحم بزفتنا كلنا نضحك على حركاته وركصه طول الحفلة حتى زهراء تتفشل من تصرفاته تكول يمكن تخبل .....زوجة خالي ابو دعاء اجتي ويايه لبيتي ورغم خطية شكد وراها مسؤولية وضيو بعده مو كلش اموره تمام امنته عند زوجة خالي الصغير وحضروا عرسي بس لان امي ماكو وهي دائما جانت بديلة الها بهيج مواقف وصدك سدت بغياب امي وبيبي اجوي وياي هي وجدة ام مجيد ...كعدنا بالصالة شويه وطلعوا الكل بعد تمنياتهم النا حياة سعيدة وباركولنا وانسحبوا...
زياد بهالوقت وياهم طلع بره استحى يطلعهم ويكعد يمي راح يوصلهم للباب ...بقيت اني وحدي كاعدة وامه يمي بكرسيها مبتسمة وزوجة عارف مروة تشتغل بالبيت هي وعبير يرتبون النا العشى وشغلات بالبيت كملنها سريع ..
دخل هو وضرغام بعد وقت زافه مره لخ وزهراء وياهم تضحك وتصفك وزياد يعاركه يكوله كافي ما صدكت وذاك يهلهل بوجهه ..ويبارك الي واني مستحية
طلعوا كلهم وراها وهالمره لكيت نفسي وياه وحدنا ...وصار وقت الجد اني مستحية منه حيل وعندي خليط مشاعر نفسي ما حددتها دمعت عيوني والتفتت عنه اريد ابجي يا ربي ما اكدر بعد هو ما لح عليه مثل جاهل من يوكع واهله يخافون ينطوه اهتمام اخاف بعد ما يسكت مدري شلون جان شكلي بوقتها بس هو بعدين شبعني تصنيف هو جان مسيطر واني ضايعة بكل معاني الضياع ...تقرب يمي هادئ زياد حيل حتى خطواته ساكتة ...وصل يمي حط ايده على ضهري وطلب مني بهدوء تام
- نروح للغرفة ؟
هزيت راسي ومشيت كدامه والتفت كل شويه اله وارجع امشي اني وبدلتي وتعبانة حيل واحس خطواتي تثكل مدري قلق مدري خوف مدري اشكال مشاعر جانت والبجية صدك حاصرتني ما اكدر ابجيها هسه
بعد توه وصلنا الغرفة امي اتصلت...ما كدرت الا ارد اني اصلا كل خنكتي ليش ما اجت للزفة وياي بس من اتصلت عرفت هي ما تكدر تشوف هيج لحظات اسولف وياها ودموعي تنزل كوه اكول الكلمة وهي تحجي وتوصي بيه على نفسي
حجيت وياها شويه كعدت بصفحة وطول اتصالنا... زياد كاعد مقابيلي ويضحك من يسمع سوالفها كلهن الجو هدوء والصوت مسموع وهي تسولف بتفاصيل استحي يسمعها ...
سديته منها وبين ما بجيت شوط اول اتصلت شويه هالمره هم متذكرة شغلات توصيني بيهن ...كملنا سديته بجيت شوط ثاني بين ما غيرنا ملابسنا وتعشينا هي كومه اتصلت
زياد:وينه عمج معد عنها اليوم
مسرة :عوفها زياد وعفيه لا تضوج خلينا براحتنا
-ما معترض هههه بس اكو فد شغله نستها امج
ش
-شنو
-كومي هناك احجيلج الباقي
جرني ...شاورني باذني واخذني من ايديه بلحظتها يضحك لغرفتنا متوجهين
-زياد خل نشرب جاي بعد عفيه
-بعدين خل نتفاهم اول نوبة هي وكت جاي بربج ...يمشي واني اتعثر بثوبي وراه السيت الابيض طويل ويثول مدري ليش هلكد صارفين بي قماش واني اصريت اشتري هالموديل لان مستور
شالني بالاخير للسرير ونزلني بهدوء يكول انسي كل شي سمعتيه اني اعيشج ليلة ما تنسي للعمر اريد اعيش تفاصيلها ..سكتت واعصر بثوبي وهو يحاجيني بغزل محبين ويحجيلي اللي ناوي عليه بلا ما يخوفني لو ينفرني
مر وقت قليل بين نصائح وبين واقع لكيت نفسي زوجته ...حضنته اضم روحي عن عيونه بحضنه حاطه راسي بصدره وابجي مو خوف ولا الم بيها شي من ااخجل على ما اكدر اكول ندم لا تأنيب ضمير الاكثر .. مشاعري ما كدرت احددها بيومها بس كانت حيل متضارية
يريد يشوفني جلبت بي بكل قوتي
-شو بس اشوفج هاي شبيج عمري ..يبعد بشعري يحاول يوصل لوجهي ما كدر
زين متأذية انت؟؟
مسرة شوو باعيني ..شلت راسي كوه وابتسمت
يولي شبيج هبطتيني ادري ما بيج شي عليش البجي
-ما بيه ما اعرف زياد ابد لا تعوفني ابد عفيه
-وين اعوفج عمري صدكت اني ومحصلج منو يعوفج مخبل قابل
-تمنيت لو بابا عايش لو عندي اخوان او اخوات يفرحون الي صدك حتى ماما عافتني لان عفتها من وراك!!
ضحك ومسد راسي
-لا عايفتج ولا عفتيها مسرة وبعد ما اريد اسمع هاي من وراك منج ...هي هاي سنة الحياة انت هم باجر تصيرين ام وتخافين على بنتج حقها امج مليون مره كلت الج حقها لو بنتي اتصرف اكثر من هيج ....هسه اني بالنسبة الها عدو يمكن هههه ..يلا كون نغير نظرتها بعدين ..
كام لحيله وجرني يوكفني بهداوة وتطمن على وضعي زين ..سبحت وتمددت بعد ما سكتت روحي بحضنه هذا كله ما افترقنا ولا شويه..اتصلت ماما وكومه سولفنا وياها حتى كاميرا فتحنا جانت راضية من ناحيتي ومرتاحه بس مدري تحجي على عمو معد الظاهر بينهم مشكلة بوقتها جان ...بقينا كاعدين لحدود الفجر ونمنا وكعدنا متأخرين واجونا اهلي امي وعمو معد وبيبي وحتى ام راشد جايه وياهم امي مو مرتاحه بس مو تجاهي هي عدها شي ما كدرت تسولف الي والظاهر عمي معد زعلان عليهالان حجيهم اغلبه بسامير ...
راحوا واني التهيت بزياد صح اتصل واسأل بس اكيد مو مثل من كنت بنصهم بس عرفتها هسه ببيت عمي ومرتاحه وسعيدة وتكررت زياراتهم النا سويه وبكل مره امي تشع اكثر اصلا حسيتها ارتاحت من تزوجت حمل وانزاح منها وبدت تهتم بشكلها وبعمي وتسالني كل شويه عن شغلة واني اضحك لو مكياج لو شغلات من هاي ما تعودت اشوف امي تهتم بيهن ابد اصلا ما عدها هي هالاشياء من تجي يمي نطلع اني وياها وعمو يذبنا بسوك لو مول وتشتري اشكال وعمي مكيف والله حتى عبالك وجوههم اختلف لونها وصارو حلوين اثنينهم هي ترتب بي وعمي ولكاها تدور اهتمام متخبل عليها كل مره اسألها عن ضرايرها بديت اخاف عليها عكس المعقول اني اوصيها على نفسها وهي تحجي بكل ثقة مسيطرة بزود عمي وحكمه
زواجنا اني وزياد مستقر حيل بيتنا وحدنا مملكة صغيرة على كدنا ما عندي اي مشاكل رجعت اداوم حطلي خط ومصرفي منه ما يقبل اصرف من راتبي ابد ..عايشة براحه امه مره تنحط بالگلب ما تغث ابد وكاضية الوقت مبتسمة ساكته مروة طبعها حبابة وهم هادئة وبناتها مؤدبات حيل كل البيت عليها وحتى طبخنا يجي للبيت بيوم دوامنا تجيبه بايدها خبز حار وكل شي تقسمه عالبيتين وابن زياد اصلا يمها شكد ردته يجي يمي ما قبل ...لحد هنا واني عايشة وياهم براحه عدا شويه عبير ومشاكلها ويه عمو مجيد مرات تجي عليه ما اتدخل ابد لان اني ما مفتهمة الصار ولا مستوعبته عمي خطب اثنين سويه !!!
اجتني بليلة كان زياد خفارة وهي كل مره تجي يمي لحد ما انام يلا تروح لا استغرب واخاف هو زياد يوصيهن عليه بليلتها جانت معصبة واكو شي بينها وبين عمي مجيد ما فهمته
عبير:مسرة اريدج تحجين ويه دعاء تخلي مجيد يعوفها مجيد خطبني اول هي شكو رجعت هسه دتخرب بيناتنا مجيد من يوم خطبها تغير عليه... وتريده يفسخ خطوبتنا مو من حقها
-عفيه عبير لا تدخلوني بينكم انت عرفتي عمي زين ورضيتي بي وصلت الج فكرة كاملة اني من قبل وما جنت ادري هو راح يرجع على دعاء وهي تره مو راضية بس جدو هالمره جبرهم هي واهلها يوافقون دعاء لا حول ولا قوة واذا تريدين اساليه هو عن السبب اللي خلاه يكدر يجبرهم اذا راد هو يحجيلج بس اللي اعرفه او هو يدعي يكول جدي اللي جبرهم يوافقون وهو ما اله دخل بس اكولج طاير طيور بدعاء
-وجدج ليش هيج سوى مو اجوي لهنا وخطبو ما كالو بوقتها عدهم هيج نية وحتى من صارت اني ما اعترضت لان مجيد فهمني هي من زمان مسمايه اله ويريدها
-عجيب والله من تحجيها عفيه عبير اعذريني عالسؤال يس شجابرج توافقين هالحال
-بصراحة تردين الصدك ..متعافية العافت عمج اشو بس قيافته بعشر زلم واني مو اول واحد يجي يخطب بس عمج يختلف
-هذا منو مجيد التحجين عليه تره شحاله عمي عيونه حمر نكولين يشتغل بورشة حدادة.. شعره خفيف ..اسمر طوخ وكلجن ورد كاتلات نفسجن عليه والله لو ما عمي انزل بعد بس عمي عصبت منهن من صدك
ضحكت وضربتني
-ولج يختلف انت
-بيش يختلف الله عليج اخذيني على كد عقلي واشرحي الي مدا اعقل تصرفاتكم لا انت ولا هو ولا ذيج اللي كاعدة عالاعراف لا بجنة ولا بنار
-مسرة انت نظرتج وغيرج من اابنات للزواج مو مثل ما اني اشوفه ...بعمري هذا واللي مر من حياتي اكيد ما راح اضيع فرصة مثلها
-بس الزواج مو بس حالة مادية ومستوى اجتماعي
-ههههه منو كال بس المادة والمستوى عددي وشوفي شنو ناقص عمج ما يعيش اللي تاخذه سعيدة بصراحه اني ضحكت من كال اتزوج جنت متأكدة يتزوج بس مو بهااسرعة
-زين احجيلج بعد عنه بلكت ترجعين عن قرارج تفكرين زين ما دام بعدج
-لا تتعبين اعرف هو منو وشنو زين ما يحتاج تحجين اذا تحبين كلامج اللي تريدين تكوليه الي روحي لدعاء كوليه
-كومه حجيت وياها قبل وهسه وهي هم تعرفه زين
-وراضية؟؟؟
-مجبورة
-اني راضية هههه
سكتت عنها شسويلها ادري هي جبيرة عمر وهاي يجوز اخر فرصها ...افتهمت اسبابها مو منها مروة كعدنا وحظنا وهم فتحنا الموضوع كالت هي حابته لان ما متزوج اول زواجه هذا وهي ما تحصل بعد هيج شكل زواج وكل اليجوها صاروا مستعملين على اساس عمي بعده بگريزه لو ما هو حتى شغلاه خلصانات تلكيه شعليه بينهم بعد اني بكل زواج لعمي اوكف خوش وكفة واحاول اخربه بكل شكل بس ما تصير ابد ولا تخرب هو بعدين يخربها شكو متعبة نفسي بعد ....
اتصلت بدعاء شكم مره اسال عن حالها وحالها ما يسرني تبجي كل ما تجي سيرة الزواج تضل تحجي على عمي مجيد ماكو بينهم اي شي حلو تحجيه علاقتهم تأزمت حيل وبالمقابل يجي لعبير واشكال صوغات وكعدات وطلعات مطاعم وونسات واني صرت احترك من يمي ذيج المهضومة انسلت وانعلت ومن يجي تدري بي وتحلفني يمكم هو واني اكولها ما اجا اجذب وارجع وره اخاف عليها صديقتي وحبيبتي واختي هاي مو بيدي اذا انحاز لجانبها ....
تلكيته بيوم الخميس هو من يجي لعيالي يمر الي اول وياخذ عبير ويطلعون ...
مسرة:عمو مو من حقي اتدخل بس اللي اعرفه عنك لا بخيل مشاعر ولا جيب ودا اشوفك لعبير كل وقتك واهتمامك بلا زحمة ناسي عندك ثانية ؟؟
اندار وفتح عيونه
-هي كالت الج
-لا والله ما تحجي بس تدري اني اقرب شخص الها واعرف كل شي
-افهم هي تريد هيج؟؟؟
-شتريد
-شيفهمج لو يجي الحر ما تفهمين انت وحدة زما...ل
-هسه ليش تتجاوز غير تحجي واضح
-تريد تطلع وياي كالت الج
-هي وين تحجي هي شضال بيها غسلت شكو محبة الك يا عمي
-خليها مو الا تحب
-زين لعد ليش ما تعوفها اذا هيج مو هامتك بعد
-ما الج دخل ...شعل جكارته ويدخن بس واضح استفزه الكلام عمي وحافظته تقربت يمه ادور مجيد اللي اعرفه
-عمو فدوة ليش تعذبها دعاء مسلولة سل من العذاب كل ما حجينا بجت واشتكت منك هاي تالي جزاتها الحبتك من صغرها
-تستاهل كولي الها تستاهل اللي يصير بيها وهي تعرف زين ليش مستاهلة
هسه روحي استعجلي حماتج نولي
-الله يسامحك يا عمي عاللي دتسويه بيهن
باوع الي بطرف عينه وجهه انگلب وصد عني ما يسمعني اصلا يدري بيه ادفع النسوان عن دربه دفع ويدري زين شجنت احجي لدعاء قبل اصلا بالاول هو جان يكول احجيلها بعدين كام يمنعني اخرب بينهم !!!
بعدها بفترة التهيت بدوامي وامتحانات جانت تأخرت عنها بالزواج والمسؤولية الجديدة بحياتي رحت لاهلي شكم مره وبطلت امي ببيت جدي واني اكره اكابل نسوان عمي وعداواتهن بس اتطمن على ماما وارجع لبيت خالي ابو دعاء يم البنات وامي تلحكني يمهم وتفاجأنا كلنا بحملها اني بوقتها انقهرت حيل ما اعرف هل هي غيرة لو شنو بس ضجت وانهديت بيها من مكيفة وتبشرني بحملها
-ماما شنو هالحجي؟؟صغار انت وعمو
استغربت هي ردة فعلي
-ليش حرام ؟؟اني عمري زين بعده وعمج قبل ومكيف اكثر مني بالحمل
-ماما انت مريضة وينج وين الحمل والخلفة انت كوة مدبرة روحج
فهمت قصدي غلط وانقهرت وبيبي كاعدة عضت الي شفة هي وزوجة خالي هم انتبهت لحجايتي رحت يمها كعدت وبست كتفها مدنكة وانقهرت مني
-ماما مو قصدي والله ..بس السكر والابر الانسولين والوكعات شلون هيج تستهينين بنفسج وعلى مود شنو ومنو ؟؟
جاوبتني بعد سكوت طول
-اني اريد اصلا اني توسلت بعمج وكوه لما قنعته واراجع دكتورة كل اسبوعين وكومه بيهن سكر وحبلن وجابن واذا قصدج على حالتي القديمة اصلا اني زينة وكلكم تشوفوني زينة صرت من سنين لو شايفتني مخبلة ما انفع ام ؟؟؟
كالتها وبجت واني تخبلت كمت لحيلي وشمرت روحي عليها حضنتها ابوس بايدها وراسها امي مرت ايام عليها اصعب من الصعب ما شفتها مرتاحة ....سبقتني بيبي تسكت بيها وتدفعني مو راضيات عن حجايتي ...باركت الها حملها وبوستها وتكولها دتغار منج عبن سبقتيها وحبلتي غيرت الموضوع كله وخلت امي تبسم بعد ما شفت حزنها كله بلحظات ...جرتني حوراء وطلعتني بره بيت خالي واهلنا كلهم يخافزن على امي وينقهرون اذا صابها ضيم خوالي يتخبلون هسه اذا صار الها شي بعد غلط موقفهم قديم .....
رجعت لبيتي مقهورة ما كدرت ما اسولف لزياد حجيت اله كل شي وابجي عليها شكد فرحانة بحملها واني خربت كل فرحتها بكلمة انهاريت بوقتها وهو يهدي بيه
-مسرة غلطتي ميخالف بس تره امج باجر اذا مو هسه تلكيها نست اصلا وتدري بيج مو قصدج
-اني شلون هيج حجيت وياها
-هي شنو جانت حالتها ولو يجوز تكولين ما احجي واسرار وبراحتج
-لا عادي ماكو شي استحي منه هاي امي ما استعر من اكولها عانت مشكلة نفسية بسبب ضغط وغلط معاملتهم ... بفترة تاهت ما تعرف احد اني كامت ما تعرفني ...ايام وترجع طبيعتها تتخيل مواقف واشياء ماكو لو اصلا تنكر اشياء هي عاشتها تنسى هي متزوجة اصلا تصفن وتحجي اشياء ماكو واليوم كل ظنها اني اذكرها بهالحاله ..بس صار سنوات من طابت واستقرت والطبيب كال صدمة وخوف سببت الها نوع من مرض نفسي امي بافضل حالاتها تكون غاية بالسعادة والنشاط وتجيها ايام تدخل اكتئاب شديد وحاروا الاطباء بتشخيصها ما بين فصام الشخصية واضطراب ثنائي القطب وهاي امراض نفسية معروفة واكيد اكو اضطرابات نفسية غيرها وكعت ضحية اهل وزوج وبعدها اطباء مو فاهمين دورهم صح.. وضيف الهن الادوية لهيج امراض اصلا تخبل اكثر مما تعالج في بعض الحالات بس هي صارت زينة وتجاوزنا هالامر كله مدري ليش تحسست يمكن ولو هاي اكيده رجعت عاشت بذاك البيت وهسه ضرايرها ما مقصرات بتذكيرها ...خايفة عليها اني منهم واللوم كله على عمي معد
-هم عمج معد !!شعليه الرجال يمعودة عوفيه بحاله توه شاف وجه حلو
-ليش يكعدها الا وياهن
-مو تكولين يكمل بيتها
-اي صح بس غير يستعجل هسه النوب كايل الها لحد ما تولد يلا تتحول اله
-الله كريم خلص انطو مجال للرجال... عمج يحبها والله واضح هوايه يحبها من كلامج عنهم ومن معرفتي البسيطة اشوفه شلون يعاملها ويحاجيها ويباوع الها عمج غركان بحب امج وحقه والله خل اتغزل بعمتي كدامج كاشان عمي مو ام عندج وجابتلي الگمر صار حصتي ابوسها عمتي على هالخلفة
بعدين خل يخلفون بلكت يلتهون عن مرتي هي ورجلها تره لسه احس روحي بحصار ما شبعان
-يااا انت شكو
-والله شوفي كد وقت واحنا نسولف بيهم ناسين مواضيع اهم
ضحكت من كام يتقرب ويعزم بيه
-دعوفج من كل شي يولي عمج وامج سابقينا صدك جذب اني غيران تره واريد هسه تحبلين
-ههه زياد صدك يصير عندي اخ بهالعمر
-اي شكو بيها
-ومن تزعلني يهد عليك
-عاد هاي لا تتأمليها ما مسموح تزعلين اصلا واذا زعلتج اني احاسب روحي واعاقبها همين دتعاي يا روحي
اخذني لحضنه اضحك وانتهت ليلتنا بهدوء كعدت الصبح زياد ماكو وهي عطلة ..مشيت بالبيت ادورله ماكو لبست روب ومديت راسي بالطارمة هم ماكو ...رجعت سبحت وصليت وانتظره نتريك ما اجه ...مشيت لبيت عمي فتت من الباب ..زياد متربع ويمه مروة والجهال يتريگون وهي تصب اله الجاي ويضحكون ..ما ادري شصار بعقلي ..هي لمحتني كالت من يمها
-هلا عمري صباح الخير تعاي تفضلي ويانا على اولها
عيوني تباوع الهم ما كدرت ابين اي شي ...جاوبتها بهدوء مطلق
-صباح الخير ..سلمت بصعوبة وردوا كلهم ...كملت كلام لا بالعافية مسويه الريوك وانتظرت زياد ما اجا واجيت اشوفه ...لمحته بطرف عيني ملتهي يوكل بابنه شال راسه وصاحني
-ولج تعاي شلون مسوين ريوك ملوكي وخبز حار تعاي يفوتج
باوعت للسفرة لو اكل الجنة ما راح اشتهيه احس نار وصارت بمعدتي وهو ياكل ولا مهتم مدري ليش ما كنت منتبهة الهم هيج اشو اليوم حيل اهتميت
درت روحي ورجعت لبيتي ...كعدت وحدي شويه ولحكني
زياد:هاي عمري ليش ما اكلتي ويانا
جاوبته غير عن افكاري المتلاطمة مثل امواج بشاطئ
-ما مشتهية
-خو ما مريضة عمري
-لا
-شبيج وجهج مطفي نعسانة بعدج
-ليش اكلت هناك
غابت ابتسامته وصفن بوجهي
-صدك تحجين امي واهلي وين متريك قابل
-اني مو سويت ريوك
-وينه اكله جيبي كعد جاد بكلامه ويكول بلا مشاكل لا تسوين سالفة
عفته ما ردت اكبرالسالفة بس كمت انتبه للموضوع مروة تسوي فلان شي ومروة تخبز ومروة تطبخ هالطبخة طيبة من هالسيناريو نسجت بخيالي كامل الامر بدا الشك يحفر بروحي والغيرة تنهشني ..زوجة اخوه واهتمامه بيهم ابنه عدها وكل ما تصيح يركض هناك كمت اموت بمكاني عروس بدت هالمأساة والمرض لا بيه اواجهه واطلع غلطانة واخلي فكرة بباله ولا بيه اغلس اكثر واني اشوفها ..حلوة مروة صح اكبر مني بس هي ارملة ما مهتمة بروحها لو تهتم؟؟؟؟
بدت مشاكلنا البسيطة يوم جواريبه بس تك يوم الاكل مو عاجبه ويوم ناسية اكوي فلان قميص لو حاركته لو ما منظفة فلان شغلة لو ما لحكت عالجاي واحترك لو عندي امتحان ما مسويه اكل من الاصل...يوميه مسويه شي ما يعجب ضغط نفسي واروح بالمقابل الكي البيت يلمع والاكل عالنار منصى والبيت ريحته فواحه ومتهوي وزياد يم امه متغدي لو نايم ومتغطي بهولهم وابنه بحضنه لو يلعب بالجهال ويقري بالبنات ...شغلات بسيطة يمكن تسخفوها بس احسبوها بحالتي وحياتي كمت احترك ساعة وره ساعه وشغف العلاقة بدا يقل وانزاح الستار عن وجه ااحياة الخادعة المزينة بكم كبير من الزيف !!!
انختمت السعادة من اتصلوا بيه امي بالمستشفى طارحه الطفل وداخله غيبوبة ....رحت هناك وشكو ضيم ذبيته بعمي معد !!
مسرة:فتت من الباب مذعورة ادور اهلنا وين بيا ردهة وزياد وياي ...وصلت عمو معد كاعد مفرع راسه ما لابس عكال حاط ايده على راسه خوالي يمه وبيبي وكل اهلنا ..صرت بنصهم ابجي واسال
-شبيها امي شبيها فرحه ...امي شييها گمزت بحرگة
غبطني عمو مجيد من بينهم وحضني يبجي وبيبي تبجي وعمو معد شال راسه صحت بوجهه
كله منك انت كله منك تدري بيها مريضة تعرفها وضعها مو مال حمل تصغر بروحك عيب عليك استحي رجال الشيب ترس راسك ...سد حلكي عمو مجيد دفعت ايده
-شبيها امي احجو العصر جنت وياها مثل الورد طبيبتها كالت ما عليها شي ...شسوولها اذا صار عليها شي محد يخلصكم والله مني محد يخلصكم
جرني زياد يكعدني واني مفرفحة من ايد لأيد واحجي على عمي مراهق متصابي ما خليت عليه ...ابد ولا رد وارجع اكوله شكو مكعدها ويه مجرمات وانت تعرفهن يسدون حلكي واحجي راشد يريد يرد عليه جره عمار وعمو ميثاق طلعوه ...
كعدت مثل المتزوهرة لا يخلون احد يفوت عليها ولا هي اللي تفيق ونتطمن ...ايام وايام وامي راقدة لا حس ولا نفس واني مكابلة الردهة وكاعده زياد كدر يفوتني الها مرات ولا مره تجاوبت ويانا مربطة عالاجهزة عمي معد بجهة واني بجهة ابد ولا حن گلبي عليه شكد حاولوا يصالحونا ما كدرت اتقبل فكرة هو السبب مره جديدة بهدمها
فاقت والكل استبشر والصدمة ما تعرف احد بس بيبي ومن تتذكر الواقع تكوم تصرخ لما ينغني عليها ششايفة شنو مسويات بيها ما افتهمنا كل العرفناه عن حالها وحدها بالبيت كلهم بالعرس جايين لاگيها فايضة بدمها بغرفتها من وحدها
افوت يمها اكعد ساعات ما تعرفني واذا عرفتني كامت تعيط وتشكي وتبجي راس ودم ومذبوح محد يفهم منها شي يرجعون يضربوها ابر حتى تهدئ رحت لطبيبها لعيادته كال لازم تعرضت لحدث خوفها حيل وانتكست شنو الحل ؟؟حلها محد يعرف اركض ببغداد مثل الخبلة وياي تحاليلها وكل تقاريرها قديمة وجديدة ماكو جواب شافي انطوا وقت شكد وقت وهي ما نكدر حنى نطلعها للبيت امي تخبلت ...
اخر طبيب نزلت للكاع كعدت ابجي مثل الجهال ..بكتع العيادة كعدت يائسة الا من رحمة الله يشوف حالها بعد ...كومني زياد كوه ولمها الاوراق تطشرت مني
رجعت لبيتنا ااقديم وياها مثل الطفلة محاوطاتها اني وجدتي لا تكدر تواجه بشر ولا تعرف احد ما قهرني الا الشماتة ..تشمتوا بمرضها ...عفت الاول والتالي وكلت اكابلها واكعد...معد صار اسم يدعو للرعب اصلا محد لازم يجيب طاريه مو عاد تشوفه واذا عاندنا وفات عليها الخطوة اللي تقدمناها وياها نرجع عشر امثالها ....كاعدة يمها بغرفتها ساكتين اني وياها انام يمها وكل وقتي الها مرات تعرفني ومرات تشمر غير مكان واعبر واسكت بقهر......
صدت الي بعد صفنة طويلة
-عبالكم مخبلة؟؟معد شيكول فرحه تخبلت ؟؟
استغربت درجة وعيها باوعت الها بجت ودنكت رحت يمها
-ماما ما يهم همه شيكولون ..انت امي اني محتاجة الج اني اريدج
-انت مو ردتي هذا الارمل ورحتي عفتيني انت هم ما همج غير نفسج
-لا مو هيج
-اي عبالكم مخبلة اكولكم شفته بعيني
-شنو شفتي
-راس
-شنو راس
-راس بشر بي دم وشعر ملفوف
كامت ترجف كمشت ايدها
-ماكو ماما ..غرفتج ما بيها شي
-شوفي حتى انت عبالج اني مخبلة ؟؟..اي اني مخبلة!! ....درات ضهرها وتغطت اريد احاجيها ابوس اتوسل ابد ما تصد
غفت وعفتها طلعت اروح للحمام لكيت عمي بالصاله شفته دنكت تعديته ما سلمت عليه
رجعت شايله كلاص شربت وكيكة الها وكف بدربي
-خل اشوفها
-عمو ارحمها عاد
-شمسويلها ولج انت شبيج تخبلتي عليه .. شسويت الها اني
-منو السبب اذا مو انت خشنت كلامي وياه وحجيت بنتر ...منو الجبرها على عمر كامل ومنو اللي حبسها اول مره وثاني مره منو الجان يضربها ؟؟تبري نفسك
-امج مريضة من زمان
فتحت عيوني بقهر اباوعله وعتبي عليه شكبره
-اي مريضة خلف الله عليك ما قصرت وياها داويتها !!
-انت ما تكدرين تمعنعيني تره عنها شنو بكيفج هسه اطردج لبيت رجلج انت ما الج شي بعد هنا انت وهي مرتي اطب اطلع بكيفي ومن باجر تنحول لبيتها
انزاحيت عن دربه ومديت ايدي ناطيته العصير والكيك
-فوت الها ؟؟يلا فوت زوجها انت داريها !!
باوع لايدي وباوع بوجهي وصد عني ما يكدر يفوت هي ما تطيق تشوفه اصلا
مناك اجتي جدة تحجي
-اثنينكم ما تفوتون الها بالكم لا بارك الله بيكم مره مريضة بيش طالبيها من الصباحيات لهسه كل ما تلاگيتوا تعاركتوا
بين كلامنا انفتح باب الغرفة هي واكفة وتباوع لعمي ما كدرت اعرف نظراتها ابد
فرحة:اريد اسبح عركانة
جدتي جاوبتها بفرح
-يمه صلوات عالنبي بركاتك شيخ الفلاني جاب الدوا مفعول
هسه يمه اجلفج جلفة عيد وعافية تعاي
جرتها للحمام وعمي معد يمشي وياهن يريد كل عقله يفوت وجدة طبكت الباب بوجهه ....صار الها يومين بيبي تجيب اعشاب ومي مقري وتشربها وتمسح بجسمها وترقيها ناسين صار النا شهرين بادوية اكتئاب واشكال مصايب عود فادتها الخزعبلات هاي ؟؟؟
طلعت امي ترجف من الجوع والضعف ...وكلتها وجبة دسمة حيل ومشطت شعرها وتسولف ابد ولا سكتن واني وعمي بس نتفرج ساكتين الوقت تعدى نص النهار واحنا ننتظر الفاصل الثاني بيومها ما صار شي بس تقيأت من كثرة دسومة الاكل والتجأت لنومة طويلة من المغرب هذاك اليوم لحد ظهر لليوم الثاني ...
يتبع ....
اي اخطاء املائية غلسوا عليها عود