مسرة :
فات يوم والثاني والثالث واني احسب يرجع يحاجيني ومر الاسبوع وهو ماكو بديت اشتاق لمحادثاتنا وارجع كل شويه اقلب بيها واقرا وارجع اسدها بديت الوم بروحي على انقيادي وره مشاعر سخيفة او هيج ظنيت ....
قررت خلص ما احجي وياه واكتفي بدراستي وحياتي اني هم مو فارغة لهالدرجة بس بينا الكلام متابعة حسابه اربعة وعشرين ساعه اشوف شيعلق وشيسوي لا هو لاغي صداقتي لو حاظرني ومرتاحة ولا اني ابطل لطلطة واكدر انجب واكعد
التهيت بدوامي اروح وارد ومرات اتبهذل لان ماكو خط والدوام تخربط يوم اكو وعشرة لا ...عمو مجيد اغلب الوقت هو اليوصلني بالرجعة وعمو معد عرضوا عليه هو واولاده يوصلوني بس اني ما عندي ميانة وياهم ولا اريد اروح وياهم ...
اجتني فكرة اشتري سيارة واني اصلا اعرف للسيارة خالو ابو دعاء كلنا علمنا اني وبناته هو لان ما عده ولد يعلم بناته واني تعلمت وياهن عالواهس من هاي شفت هواي بنات كامت تسوق سيارات تراصفت لامي نشتري اني وياها سيارة بالاول طردتني مره مرتين كولوا والله قنعتها وتواسيل كالت لازم جدج يوافق تسوقين اذا ما قبل محد يقبل ....وبوجهي لجدو حبيبي وادري بي اشر لنجمة بعيدة لو بيده يجيبها ...
توسلت بامي تروح ويايه ما قبلت رحت لبيبي حجايتين قنعتها ورحنا لجدو اني وياها وحوراء لبيته ....
فتنا من الباب جدو من وده يشيلنا مو بس يتلكانا اخته وحفيدته وعدكم الحساب ...كعدت يمه بوسته مره ثانية
-شلونك حبيبي
الجد:هلا ببنيت الغالي شلونج يا جدي اخبارج ما تمرين لا انت لا اخيتي باوع لبيبي وهي تعذرته برجليها بس الصدك هواي صاير يلج بسالفة تعالن يمي وامي رافضة وامها متفشلة من اخوها
كاعدين نزلوا البنات ونسوان عمامي كعدوا كلهم يمنا راشد موجود كعد يمنا وعينه طايرة على مكان واني ادري جيتها ويانا المن بس اغلس اشوف تاليها....
سولفت لجدو فكرتي اشتري سيارة تفيدنا اني وماما ولدوامي هو يسمع ساكت سمعني للاخير حاجاني بضحكه
-تريدين تسوقين يسورة
-جدو ما بيها شي والله واني اعرف خالو علمني ويه بناته
-يا رويحتي خالج ما عنده احد اني اوكفي خل احسب ولد مسطرين وولدهم ضعفهم تكولين انت عاصي دوامج علينا كلهم همه وسياراتهم الج لا خير بيهن احركهن اذا ما وصلوج
-لا جدو مو هيج عفيه الله يخليك كلهم خير وبركة والله محد منهم قصربس اني حابه
-اي كولي هيج واني عليه السيارة اللي انت حابتها
-لا جدو عزااا لا والله مو اني عندي ما اكلفك شي بس اجيت اخذ موافقتك
-اني اخذها خلص هاي اجتج
-ضحكتي شاكه حلكي وكفت بست ايده وراسه وهو مبسم كال الي بس عدي طلب كلش صغير
-تؤمرني بعد انت وين اكدر ارفض
-مصلحجية ههه تقنعين امج تجي يمي هنا
غابت ضحكتي بساع وجدتي سكتت وتنهدت جاوبته هي
-ابو معد فرحه مو راضية واني بنتي ما اكدر اخسرها مره لخ كافي الصار ما تريد والجبر مو حلو
الجد: لعد اجي ونكعد ويسولفون لا تجي هنا اذا تريد بيت يجرالها
-لا تجون ولا تتعب نفسك ويتعب نفسه هو ووصل اله الحجي بنتي يا ابو معد عمرها لو ما هاي اشرت الي بايدها ...حتى عمرها هين عليها ما تريده
علا صوته مستنكر
-شصاااااااار كل هاي غلطنا وصلحنا كل شي وهي معززة مكرمة واللي طلبته على مجرى لسانها تم ششصار بعد هيج تسوي
-والله اكثر يا ابو معد عيفوها لخاطر الله جان عليها حكم وهي نفذته وهسه كبرنا خلص عفو عنها حتى المسجون هم يحلوه بهلكد سنين حتى هذا التهمتوها بي مات وشبع موت
سكت جدي ضايج ومن دنطلع جدتي بوسته كومه تراضي بي انت اخويه لا تزعل لا تخلينا نبعد مره ثانية اللي يريده ابنك بعد ما يرهم بنتي ما ترغب لزواج ولا رجال الصوج منها مو منكم
ختمتها وياه وهو تقبل السوالف وطلعنا ...رجعنا بيتنا قبل اامغرب يا دوب حطينا العشا اندكت الباب جدتي بقت يمنا يمكن عرفت النتيجة ....عرفت يجون عليها
امي اباوع عليها مدت ايدها تاكل متجاهلة كل شي ولا تحركت كمت اني عالباب ...فتحتها عمي معد عيونه تطك شرار سألني بعصبية
-صيحي امج
-تفضل عمو فوت للاستقبال ...دخلته بالاستقبال ضل واكف وسبحته بايده خلف ضهره لو خرزاتها الهن صوت كان يستغيثن خطية اباوع لايده ترجف
رحت للهول وهممست بذنب مثل واحد مسوي مكسورة كله مني هو طلبت منهم وهاي النتيجة منتظرها الظاهر
-ماما عمو يصيحج
ذبت الخبزة من ايدها وجرت سراحية المي شربتها بسكون ووراحت يمه
كعدت اني وجدة متقابلات
-ارتاحيتي هسه
-جدة شمدريني هيج تنكلب
-لان عمج منتظر خطوة صار شهر مكابلنا يريدها
-هو ليش هسه بده يلح صار سنين عايفها
-مرته شلون يعني بيجن انت وياها خلاها الج ربتج وكبرتج وهو صابر .... مرته ويريد يض....كالت لفظه ما فهمتها سالتها بفضول عبالي شو شنو معناها
-جدة يعني شنو .....
-يعني .....
فتحت عيني بوسعها وهي ضحكت وغطت وجهها
-عزاا جدة شكد عيب هيج تحجين
-والله لعد شيريد منها مكابل عيونها الوساع لو طولها
-هسه تجي واكول الها جدة تصنف على طولج
-ولي ولي خايفة منج ومنها اني
-جدة هو بينا الحجي هي ليش ما تقبل تتزوجه
-خبلة انت هو زوجها
-لا جدة شلون اشرح يعني دفهمي عليه عيب اكول يض....
ضحكت وغمتني ونسينا امي يم عمو لما سمعناها تبجي رحت اركض اريد افوت للاستقبال اشوف شبيها انركعت الباب وانقفلت ....صخام بعين العدو راحت بيها فروحة بس اسمعه يقنعها تسكت مره بصياح ومره باقناع
شويه واختفى حسهم وجدة يمكن تفشلت اشو هاي راحت واني بقيت مكابلة الباب وكاعدة وين اولي قابل بعدين حسيت على نفسي كمت لغرفتي اريد انسى الموقف كله وافكاري تترجم غير شغلات
شلت موبايلي اتصل بدعاء اسولف الها اخر التطورات لكيته مراسلني داز الي منشور عن الصداقة نصه يكول
#الصداقة ليست مجرد كلمة مكررة ممله
بل هي أمانة وعهد
الصديق رفيق درب تأمنه وقت الشدة
ويحفظك وقت الغياب
يتألم لألمك ويسعد لسعادتك
الصديق بئر أسرارك ووزير أفكارك
إذا أعوج عودك أقامك.
هذا هو عهد الصداقة..
فهلا تكون صديق؟؟
كتبت اله
الصداقة هي الكنز الذي نبحث عنه طويلا
نخطط له
نعمل عليه
نرعاه
نسعى جاهدين للحفاظ عليه
حتى يأتينا وقت نقف فيه ونتسائل ما قيمة هذا الكنز لدى الاصدقاء؟؟؟
بلحظتها جاوبني
-عبالي صدك صديقتي
-واني هم عبالي
-المفروض عندج ثقة
-وانت المفروض تفسر مو تودع وتروح
-هااا هيج يعني زعلانة هسه انت
-اي طبعا
-زين يصير اتصل
-ليش
-اتعب هوايه اكتب
سكتت وكلت بنفسي هو انت اول مره اصلا هلكد تكتب بقى يكتب واني مطنشة وهاي اول مره هلكد يكتب جان يجاوب كلمة اثنين ويسكت لحد ما اتصل
جاوبته اول ما فتحت خط بقى ساكت
-هاا شو ساكت
-باوعي مسرة اني مو جاي حتى ابرر وبس لا اني احجي وياج لان انت الفترة الفاتت كنت صاحبة فضل عليه
-شلون يعني
-باوعي خل اسولف الج اللي ما حجيته لاحد لهسه ...اني وصلت مرحلة من اليأس والحزن اشبه بجثة ممدودة بيها نفس ...اتمنى الموت اسابيع وما حصلته وصل بيه الحال الاكل كوه يفوت بحلكي مر علگم ضرغام واهلي وياي لحد ما كمت اجيت للتواصل والتقت دروبنا اني وياج ولحد هسه ما افهم ليش وشلون ..احجي وياج احس الحياة لساها بيها تكملة ...ذكرتيني بابني هواي وباخواتي وبمسؤولياتي وخليتيني اوكف على رجليه ثقي بالله صرت اخاف منج واحسج احد دازج عليه تتجسسين ياما فكرت بربعي متفقين وياج
ضحكت وجاوبته
-مو لهاي الدرجة عاد
-اضحكي عليه شجابج بدربي الكله عثرات
-هاا عثرة اني
-لا مو هيج ازعلي مره اللخ ؟؟سويها وشوفي
-غير من وراك تكذب عليه
هم رجعت؟؟؟؟
-باوعي يبنية اني اشتغل ممرض ب.....تعاي تأكدي اسالي عني واي هم صح اشتغل بمعرض سيارات امسح جام واغسل كشنات ومرات ابات هنا ما خجلان من شي اني تعاي اسالي
-لا شعندي
-مو تكولين اجذب
-لا يلا حشاك ما تجذب
-عود متكلفة حضرتج ..باوعي مو لان جاي ابرر الج لو مهتم لاا المفروض انت تعتذرين مني على كلامج الاخير
-اني اعتذر
-اي طبعا غلطتي بحقي واني اكبر منج ولازم تصححين غلطج
-اسفه يلا هاي كافي
-لا مو بس هاي منا وغاد انت صديقتي وتتحمليني من اجي انكد عليكم حالج حال ضرغام وكرار وزهراء وعبير ومروة
كشولت وجهي وسالته منو هذني النوب ضحك وجاوبني وكأنه متعمد يذكرهن
-اخواتي وزوجة اخويه
-هااا شكم اخت انت عدك
بديت اساله عن امور شخصية وهو يجاوبني لحد ما اكتفيت وسديت الخط وياه متراضين هو هم كومه سالني عن اهلي وعيشتي ووين وشلون طبعا منطقتهم بداخل المدينة بقلبها واحنا طلعنا اطراف ومناطق تعتتبر ريفية يمكن انطته انطباع خاطئ عن حياتي
لحد هسه زياد ما شايفني بس اني قررت اشوفه ولا تسالون السبب كان سببي لحد هاللحظة مبهم حتى لنفسي وانكر على نفسي اهتمامها بي
.....
طلعت بعد وقت من غرفتي لكيت الاستقبال مفتوحة بس ماما ماكو دورت البيت كله هي ماكو رحت لغرفتهة واني عادي افوت شوكت ما اريد عليها...حاولت افتح الباب مقفولة كل ظني نامت وعمي راح رجعت لغرفتي نمت على امل تفاهمت ويه عمي انقهر عليها وحيدة وحياتها فارغة وخاصة بعد ما كبرت اني ...اتمنى لو تعيش حياتها وهي مو بعمر جبير يمنعها تتزوج وحتى تخلف همين ...
الصبح نزلت الدرج مستعجلة عالدوام وامي استغربتها مو عوايدها ما مكعدتني بنزلتي طلع عمي من غرفتها الصدمة جمدتني بمكاني ... استغربت وثبتت ناسية حتى اصبح عليه هو مر من يمي سابح ومتعطر بعطرها والله شميت عطرها بي من فات من يمي فد فشلة ابتسمت من سلم هو عليه
-هاا عمو صباحج الخير
-هلو عمو صباح النور
راح للباب فتح قفلها وطلع واني صافنة على ضهره لما طلع التفتت على صوت خرخشة ذهبها انداريت الها ترفع عينها وتنزلها مني خجلانة ...
اني هم بوستها وعاملت الموضوع طبيعي
-حبيبتي اني طالعة ليش كمتي ما اريد ريوك
-لا تريكي
-عمو مجيد هسه منتظرني والله حبيبتي حضنتها واني كلش سعيدة لاجلها شكو بيها اللي اني اعرفه عمو ابو راشد يدلل نسوانه حيل خل يدللها هسه الها
الايام البعدها بكد ما كانت ظاهريا سعادة كانت على غيري حساب سنين واعوام وخفايا بين اثنين صار عمرها اكثر من ١٥ سنة همه وحدهم اليعرفوها واني ما عرفتها الا شفت امي على هاوية ..........
.....
دعاء
فتت الصبح ويه ابويه للمكتب الجديد اسجل بي كمتدربة اكثر من موظفة لان ما محتاجين همه عددهم كافي اصلا ...تعرفت عالبنات هنه هوايه اثنين منهن خريجات قانون والبقية ما فهمت دورهن انبهرت بالمكان اكبر من ذاك والعمارة جديدة حيل واليداومون بيها اغلبهم شباب والمدير اولهم ....انطوني قضية بسيطة اشتغل عليها واطبع اوراق وارتبها
دخل ولد للغرفة صاح باسمي ورحت وراه من كان لمكان مشينا يعرفني لحد ما وصلت للمدير وتفاجأت من شفته اعرفه حق المعرفة من الاشخاص اللي جنت اضوج منهم بالكلية ...اول ما فتت وكف يصافحني واني غلست استحيت مد ايده ورجع سحبها مبتسم كعدني يمه الولد وطلع باوعت اله
-تدرين كيفت من قريت اسمج ...الوالد كال زميلتك بس ما توقعتج ابد انت
-اني هم تفاجأت بصراحة
-شوفي شلون صدفة حلوة نشتغل سويه
-بابا كال ما محتاجين
-لا منو كال اصلا اني محتاج محامية مثلج شاطرة
استحيت من نظراته وكفت اطلع وهو وكف وبثانية صار بصفي طخ بيه بضهر كفه ابتعدت وهو هم
طلعت وياه ووصاهم عليه توصية خاصة
بيومها تاملت خير كلت مو شرط الاعرفه عنه صحيح قابل بابا ما يعرفهم جابني لهنا رغم بعد المكان ...
خلصت الدوام دا اطلع لكيت مجيد واكف بباب العمارة ارتعدت من شفته وشجابه ....فتح الي بابها واني حايرة بامره هذا مخبل يسويلي فضايح ...صعدت متشنجة وهو اندار وصعد ركع الباب كل قوته فززني
-اني مو حجيت وياج شجابج على هالكوا.....
تشجعت اجاوبه
-رجاءا شنو هالالفاظ وبعدين اي ما اريد فضايح صعدت السيارة واذا تكررت اشتكي لابويه منك
-والله وتسوين فضل ست دعاء اشتكيني لوين ما تريدين حتى عيد وجابه العباس النا...باوعي من باجر ترجعين ويه زاهد
-ما اريد
عاط بصوت رج السيارة
-مو بكيفج نمشي !!ابوج ال...لا تخليني اتجاوز شلون قبلت غيرته يحطج هنا
-ابن صديق بابا المدير
-دنعل ابو صديق ابوج لابو خيرهم باوعي يولي اني حجيت والله ان شفتج هنا ما يصير خير
عليت صوتي وحاجيته بحزم
-انت شعليك بيه هااا شعليك ..اخاف عبالك انت ولي امري لو مسؤول عني واني ما ادري لو يجوز عبالك اني مسرة وتصيح عليه ...لااا اني محد محاجيني وكايل الي على عينج حاجب وهذا الاسلوب تحجي بي ويه نورهان اقصد خطيبته
-هين يولي هين داومي لعد واشوفج التالي
سكتت عنه ما جاوبته بس عبالك مدخنة مو رجال كاعد يمي احسه هو معطب مو بس جكايره من عصبيته ....وصلني للمنطقة واني رفضت يذبني بفرعنا ما اريد انزل من سيارته جوة نزلت من مسافة ومشيت وهو فاتني مألف
داومت بالمكتب واني احس بانتصار عليه ..طبعا اسمع من امي وغيرها عن مشاكله ويه خطيبته بس ما عاد يهمني ابد امره طفيت بذيج الايام ....والواقع يومية اتجسس عليه من يطلع ومن يرجع ....عضلاته وطوله وجسمه قايسته قياس كثر ما اراقب بي ...حبيب مراهقتي ويمكم حسابها
عنادي اله شكد حبيته وحسيت بروحي قوية صاحبة موقف ضده وحسيت بروحي قويت... بس الصار بعدها بفترة خلاني اندم اشد الندم على عنادي واعتراضي على تدخله لو ما شويه والله سترني كنت صرت ضحية من ضحايا لهذا ااحيوان اللي استدرجني ...