#طوبى "جنة طوبى"
#جمان_فريد
#الجزء_السابع_والخمسين"مخبأ منحة محنه2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
🍃 وكنتُ أدعوكَ يا الله في صِغري
رزقًا من الأُنسِ أو قطعًا من الحلوى
لمَّا كبرتُ عرفتُ الرِّزق يا ربِّي
بأنَّه الأمنُ والإيمانُ والسَّلوى🍃
🍃🍃🍃🍃🍃🍃🍃🍃
في الطريق..
كانت تتفرج ع صورة "الإيكو" لجنينها..
نظرات وملامح الفرح اللي ع وجهها تخلي اللي يشوفها يقول انها لقت كنز..
وفعلا هو كنز بالنسبه ليها..
هو اللي حيحققلها كل شي تتمناه وخططت هلبه بش توصله..
مافكرتش فيه هو..اللي كان قاعد جنبها..
وع وجهها ملامح التجهم...وعيونها مليانه حيره..
خلاص سره هدا مش حيطول وهو مدرق..
حيطلع عاجلا..اول ماتبان عليها علامات الحمل..
ومش معروف بالنسبه شكل العواقب وهدا اكثر شي مخوفه..
يقدر يجبرها تجهض..
بس في شي داخله يبي العيل..
هو اصلا مجرد سمعها قالت "حامل".
شعور الأبوة تحرك بقوة داخله..
باهي كيف يدير.!؟
بمن بيضحي؟!
اسئله صعبه..صعبه جدا..وممكن مالهاش جواب..
☘درس بالسيارة قدام العمارة..
هي شبحتله شويه..وهي تفكر..
اختارت انها تسكت توا وماتتناقشش معاه في شي..
هدوئه بعد ماتأكد انها حامل لدرجة انه نسسي كل شي صار قبله خلاها تفهم انه يبي العيل ومش حيخليها..وهي هدا اللي تبيه وبس..
تنهدت بعدين فتحت الباب ونزلت وسكراته وقعدت تشوفله..
وهو طول تحرك..
قعدت معاه بعيونها لين درقت السيارة..
بعدين لفت ومشت خشت للعماره وهي فرحانه..
☘☘☘☘☘
"بالله اوقفي ع المحل هدا فايزة"
فايزة وهي تسوق؛متاع الحلو هدا؟
نسرين وهي تهز في راسها؛ايه هو..
درست فايزة قدام المحل..
ونسرين قالت؛شويه وجايه..
فتحت باب السيارة ونزلت منها ومشت طول للمحل..
وفايزة معاها بعيونها وهي تشوفلها بأسف..
قعدت في المحل مايقارب السبعة دقايق..
بعدين طلعت وجت للسيارة وركبت..
نسرين وع وجهها ابتسامه عريضه؛هي امشي..
فايزة شبحتلها شويه بعدين شافت القدام وشغلت السيارة وتحركت...
☘☘☘☘☘
وفي حوش لطفي الواعر..
كلهم كانوا مهدودين من موقف الوداع..
كل حد شاد تركينه...
اللي راقد..واللي لاهي بالتليفون...
🍃وطوبى في دارهم...
كانت فاتحه دولاب سدرة وطلع منه في لبس ليها بتاخده..
طلع فيهم وهي تبكي بصمت وقلبها قاعد يتقطع من الحزن..
وهي تاخد في الدبش..
شافت شي استغرباته ولفت نظرها..
مذكرة غلافه جلد لونه من لون خشب الشجر..
وهي ترشف ودموعها مازال ينزلوا خدت المذكره..
وفتحتها...
وبدت تقرا...
(كل يوم نحس ان ساعتي قربت..نحس الموت محاوطني من كل جهة ويراجي امتى يخطفني من الدنيا..من حوشي وعيلتي..عيلتي..قداش خايفه عليهم..قداش خايفه ع بوي..ع خواتي..ع طوبى بالذات طوبى..مازال ماتقدرش تواجه الحياة بروحها..ماتقدرش تواجه صدماتها..قاعده صغيره هلبه..تعودت عليا نكون وراها ومعاها..زعمه من غيري شن يصير فيها!؟..لازم تتعود ع قلتي..لازم تتعلم تعيش بدون ماترجعلي في كل شي ديره..اني اللي مريحني اني عطيتها لراجل باهي..حتى لو كان عنده ماليه عيوب..لكن هو راجل كويس يعامل فيها احسن معامله...يارب يقعد ديما هكي وماتخيبش نظرتنا فيه...اني مخليه طوبى عند ربي..صح خايفه عليها هلبه بس لما نتفكر ان مخليتها لله نرتاح)
طوبى تقرا في الكلام...كان مؤلم مؤلم..الألم تحس فيه واصل لروحها ألم عميق لهالدرجه....
تبكي وتقرا..تقلب في الصفحات وتقرا..
كانت المكتوب في كل صفحه مخاوف سدرة كانت تعبر عن حالة الخوف اللي تحس بيها ديما من لما صابها السحر..
وطوبى وهي تقرا بدت تستغرب..
حالة الخوف اللي كانت عند اختها مش طبيعيه بكل..
واكثر شي وقفت عنده هو خوفها من الموت وسدرة قبل كان اخر همها الموت ولا مرة دارتله حساب..
لما وصلت لأخر صفحه كتبت فيها سدره..
قعدت تمسح في دموعها بقوة وهي تقرا...
(لو جي وانقري كلامي اللي كتبته في المذكره نبي طوبى بس تقرا الصفحه هادي.اعطوا المذكرة لطوبى تقرا الصفحه هادي بروحها..
طوبى..حبيبتي بنتي..كان جي نهار وغابت عيني وخليتك بكري..نبيك تقعدي زي ماأني ربيتك ماتخلي شي يغيرك..خليك قويه وواجهي اي صدمه تقابلك في حياتك واجيهها وانتي مؤمنه ان ربي يحبك اللي حطك في هالإختبار وابتلاك..طوبى حبيبتي نبيك تعرفي حاجه مهمه..
اني مش نادمه ع اللي درته ع خاطرك انتي بنت روحي وقلبي ضي عيوني ووصية امي..اللي درته ع خاطرك او احسن شي درته في حياتي ياعمري...يابنتي..)
ووقفت لهني..
وطوبى اللي كانت تبكي بحرقه وهي تقرا حست ان سدرة وقفت كتابة لأنها تبكي..
ضمت حروف كلماتها لحضنها وغمضت عيونها بألم وتبكي بقوة بكي مكتوم ماتبيشي يوصل لمسامعهم..
🍃وجدها فتح الباب الفاصل ومشي لحوش ولده..
وصل للباب اللي كان مفتوح خبط عليه بالعكوز وقال.
مطيرة..
شويه وطلعت مطيره من دار التقعميز وجاته وهي تقول..
بوي..!
خش وهو يقول:وين قاعدين..
مطيره:في دار التقعميز..
مشي للدار ومطيره معاه تقول؛شن حال لطفي..
علي:خليته راقد..
وصل في الدار وخش..
لقي فردوس مقعمزة وحداها آلاء وولدها معتز..
علي:وين طوبى؟
مطيره:في الدار التانيه..
هز راسه وخش داخل ووقف في نص الدار وهو يقول:اسمعوا جاي..
خشت مطيره وهي تقول بقلق:نعم بوي؟
ع جية أريج من الصاله خشت وقعدت تسمع في الجد علي شن يقول..
🍃اما طوبى..
بعد ماوقفت بكي وين سمعت صوت جدها...دست الحوايج ومذكرة سدرة في شنطة صغيره..
بعدين بدلت حوايجها ولبست توته لونها رمادي حتى هي لسدره..
وخدت في يدها وشاح ومشت طلعت من الدار..
"البكي والنكد حولوه"
سمعت كلمات جدها هادي وهي ماشيه للدار..
خشت عليهم وشافاته كيف يتكلم بصيغة الأمر والتحذير..
علي الواعر:شدوا حيلكم وقووا ارواحكم وصبروه..خلوه يتقوى بيكم الراجل مريض بوكم مريض يافردوس ومش ناقص..
طوبى بقلق:شن حاله توا..
شبحولها..
وهو شبحلها وقال؛نقول باهي..باهي..خليته راقد...
هزت راسها بضيق وهي ساكته..
علي:بنتي اللي صار لأختك هد بوك هد حاولوا طلعوا من الحالة اللي هو فيها معاش تبكوا ومعاش تدووا ع سدرة قدامه هلبه..
قلبها انعصر وقالت؛علاش جدي تبينا ننسوها؟
علي:ياودي مش هدا معنى كلامي..انتم وين تتكلموا عليها تزيد في حزن بوكم عليها تحسسوا فيه كأنها لاقدر الله ماتت..
طوبى بفزة:بعيد السو..
وهما يشوفلهم بضيق وحزن..
علي:نبيكم تخلوه يشد حيله ويتفائل خير فهمتي بنتي؟
تنفست بأسى وهزت راسها راسها بإيجاب..
علي وهو يتكلم بعكوزه؛هي تحركي انتي وياها ديرولنا الغدي وراهو في رجاله بعدين بيجوا..
مطيره:باهي بوي باهي..
مرر نظره عليهم وقال؛زي مافهتكم كان خليتوني نعاود كلامي تندموا..
هزوا روسهم بالموافقه وهما ساكتين..
وهو مشي بيطلع لما فات جنب طوبى ركز عليها شن لابسه بعدين غير نظره عنها وطلع من حداهم..
شبحتلهم وقالت:امتى يوصلوا زعمه؟
فردوس؛مازال الوقت..خالك قال او مانوصلوا نكلموكم..
مطيره صفقت بإيديها وقالت:هيا يابنات هيا ورانا غدي وضمان وناس بتجي العشيه..
ومشت طلعت ووراها فردوس وهي تقول:متاعيني بيجوا بعدين..
وطوبى تسمع فيهم وهي تشبح في الفراغ..
تراجي تسمع صوت سدره وهي تأمر وتنهي وتسأل شن بدير وتقعد تقترح..
معتز:بنطلع للولاد..
اريج:قبل الغدي تكون هني مش تتغدا عندهم..
معتز:باهي باهي..ومشي طلع من حداهم..
آلاء جت لطوبى وهي تقول:بيبو..
شبحتلها طوبى .
واريج كانت تشوف للتوته...
تنهدت طوبى وقالت:هي تعالوا ورانا هلبه نديروه...
ومشت طلعت..
هما الزوز شبحوا لبعض بقلق..
بعدين مشوا طلعوا وراها...
☘☘☘☘☘☘
خشت للحوش وهي حامله بالطوها ع يدها..
قابلتها مرت خوها وطالعه من الباب الفاصل بين الدور الأول والتاني..
غرفه؛روحتي؟!..
جتها نبيله وسلمت عليها بالخد وهي تقول؛توصل وتروح بالسلامه وفي احسن حال..
غرفه؛آمين..بعدوا عن بعض وهي تقول..شن صار في نسرين؟.
تنهدت نبيله وقالت؛اطلقت..
غرفه وهي متفاجئة:من أول جلسه؟
نبيله؛ربي خلصها منه بسرعه..الحمد لله..
غرفه:طيب فيها افتكت منه..
هزت نبيله راسها ومشت متوجهه لدارها..
غرفه؛نديرلك قهوة؟
نبيله وهي ماشيه لدارها؛ياريت..
تنهدت غرفه ومشت للكوجينه...
☘وفي حوش شنيبه..
طلعت نسرين من الدار..
ومشت لدار المعيشه خشت عليهم وهي تقول:شن درتولنا الغدي؟.
خديجه:وصينا ع غدي من برا..
نسرين ربعت رجليها وقالت؛خير وخير..
خديجه؛باهي قوليلي شن بيصير توا..
بللت شواربها بلسانها وقالت؛شي خلاص..نكمل العدة بعد نجيب وننطلق في هالحياة..
خديجه قعدت تشوفلها وهي ساكته.
نسرين؛وين امي؟
خديجه؛في دارها تو تجي..
هزت راسها بعدين خدت الريموت وقعدت تقلب في القنوات..
واختها تشوفلها بحزن..
🍃أما امها كانت في دارها تبكي عليها وعلى حظها..
☘☘☘☘☘
طلعت نبيله من الدار بعد مابدلت حوايجها..
وهي طالعه جتها رساله..
فتحتها..
(كيف حالك استاذه..طمنيني شن صار)
ابتسمت وبدت تكتب بعدين بعتت...
🍃وهو اللي كان ماشي جاي قدام المطعم متاعه..
وصلاته الرساله وقف في مكانه..
فتحها طول..
(اطلقت)
ارتسمت ع وجهه ابتسامه فرح واسعه..
بعدين نزل التليفون وعض ع شاربه وهو يضحك في ضحكه خفيفه...
☘☘☘☘
"لو انك واجهت ماليك من البدايه وفرضت عليهم ماصارش اللي صار"
الجالي بنرفزة؛تتكلم وكأنك ماتعرفش بوي..
حكيم؛نعرفه كويس..زيه زي أي اب ياخد موقف فترة وبعدين يولي كل شي زي ماكان..اما توا الوضع ولى اصعب ومعقد هلبه..
بإنفعال قال:اني جايك بش تفكرلي في حل مش بش تزيدها عليا..
حكيم؛حلك الوحيد انك تواجه ماليك وتقوللهم اني تزوجت لادرت حرام ولاعيب وبنربي صغار خوي..
الجالي قعد يشبحله بنظره خوف وقلق..
حكيم؛وطلق بنت الناس هديكا خليها تطلع بروحها قبل لديروا صغار والحكايه تزيد تتعقد اكثر ياجالي..اصلا في كل اللي قاعد يصير مافي حد انظلم غيرها هي..
ناض الجالي وخدي تليفونه..
حكيم؛تبع أنانيتك هادي وتو تشوف وين ترفعك..
مشي من حداه من غير مايرد..
وحكيم حرك راسه يمين ويسار اسفا وهو يقول؛تاعب..
☘☘☘☘
"ومازال تبي تربطي روحك بيه!؟"
نجاة وهي متكيه ع السرير:صابرين اطلعي نبي نرقد..
صابرين؛من جد انتي فرحانه!؟ياغبيه والله ماك كاسبه حاجه غدوة ياخدوهم كلهم منك..
عطتها بالظهر وتغطت..
وصابرين اللي كانت بتنفجر من الغيظ..
طفت الضي بعصبيه ومشت طلعت من الدار..
وقفت قدامها وحطت ايديها الزوز في نصها وهي تحرق ع اختها اللي بتوقف بينها وبين الراجل اللي تحبه..
🔺️قبل يومين..
وهي مقعمزة في السيارة مع مختار..
صابرين؛ماتبيش تحكيلي خيرك؟
تنهد بضيق وقال؛اختي تعبانه وخاشه غيبوبه..
صابرين بأسف؛ياروحي خيرها؟
مختار؛طايحه ع راسها..شبحلها شويه وقال..اكيد سمعتي بيها من اختك..
هي عقدت حواجبها بإستغراب شديد وقالت:من وين بتعرفها اختي؟
مختار :جيران شيابينها..
عقل وقف...
من هي هادي اللي يحكي!؟
مافيش في شارع القهوة وحده طاحت ع راسها وخشت غيبوبه غير سدرة الواعر...!
هي بصدمه؛قصدك انت ولد لطفي الواعر؟
هز راسها وهو يشوف لحالتها بتعجب..
صابرين ضحكت بصدمه وقالت:معليشي شويه هو لطفي الواعر عنده ولاد
الكلمه حرقاته واستفزاته وقال بعصبيه؛اني ولده الكبير..
بعدم استيعاب قالت؛الحق اني انصدمت الصراحه...
هو غير عيونه وشبح للروشن وكان يحاول يكبت غضبه..
دق ع المرش...
طول السواق ركب السيارة وهو قال:ردنا للعمارة..
صابرين؛مختار حبيبي..
رفع يده وهو يحرك فيها بسرعه للامام والخلف..
بمعنى "اسكتي"
وهي سكتت من خوفها..
🍃حطها حدا العمارة ومن يومها لاشافاته ولاسمعت صوته..
🔺️في الوقت الحاضر..
مشت لدارها وهي معصبه وخشتلها وسكرتها عليها بقوة..
☘☘☘☘
الساعه 3:00بعد الظهر..
مطت مطيره السفره لحسين اللي كان واقف فم باب كوجينه حوش عمه الخارجي وهو يسرق في النظر لطوبى..
مطيره؛هي ارفع وخلي عمك ياكل..
حسين:حاضر..قوليلي..شن جوهم بناته؟
مطيره؛الحال واحد..
حسين؛طوبى مش مزبوطه راهو وجهها اصفر..
مطيره:متنكده ع وخيتها ياروحي..
هز راسه وهو مضايق بعدين مشي بالسفره..
وهي مشت خشت داخل..
لقت طوبى طالعه من بالمفرش من الكوجينه وهي رفعت السفرة ولحقتها...
🍃وين جو خاشات للصاله..
سمعت طوبى فايزة تقول:في أخر لحظه سبحان الله..
فرشت طوبى المفرش وقالت:وصغارها شن صار فيهم؟
فايزة شبحتلها وقالت:متنازله عن حضانتهم يعني بيقعدوا مع بوهم..
حطت مطيره السفره وقالت؛ماكانش باين عليها انها في مشكله وبتطلق مرة وحده..
ابتسمت اميمه تهكما وقالت:العيله هادي يعرفوا يدسوا ويعرفوا امتى يطلعوا اخبارهم..
قعمزت طوبى وهي تشوف لأميمه..
واميمه ماركزتش شن قالت طول خدت كاشيك وقعدت تاكل..
فردوس؛يللا المهم افتكت منه وربي يعوضها خير..
طوبى بضيق؛باهي والعيل اللي حامل بيه توا؟!
فايزة بأسف؛ناويه تعطيهوله بعد ماتجيبه باربعين يوم..
مطيره:ووك عليها!..
طوبى بوجع وتساؤل:ويهون عليها!؟
اميمه؛لما تحس روحها مش قادرة تعطيه شي تخليه لبوه احسن..
شبحتلها طوبى وقالت؛قصدك الأم مرات تكره صغارها من كرهها لبوهم!؟ مررت نظرها عليهم وهي تقول..هادي ماتستاهلش تكون ام من اصله..
اميمه وهي تشوفلها؛اكيد مادام تخلت عن خوته شن تتوقعي بدير معاه!؟..
سكتوا وهما مستأئين ويفكروا في الكلام اللي صار بيناتهم..
تنهدت مطيره وقالت؛الفجي وخلاص..بعدين التفتت وعلت صوتها وهي تقول..هيا يابنات تعالوا تغدوا...
☘☘☘☘☘
والغدي مااجتمعوش حوش شنيبه..
الحاج محمد ماروحش..
والجالي ماروحش..
ونضال في المربوعه يتغدا بروحه...
وفي شقة خوه كانوا الصغار يتغدوا برواحهم وامهم مقعمزة معاهم تساير فيهم بس..
بدت الأعراض تقوا اكثر وتوا تحاول جاهده انها درقها عن صغارها وماتخليهمش يحسوا بيها..
🍃الأعراض..
اعراض مابعد الطلاق اللي تبان ع بعض النساء..
زي نسرين..
اللي كانت هي واختها وبنت اختها يتغدوا مع بعض..
وخديجه بقلق تراقب في تصرفاتها اللي تشوف فيها مش طبيعيه...
☘وامهم..
قاعده في دارها واقفه حدا الزيانه دير في اتصال...
مغليه بحده؛الو...
"خير شن تبي"
مغليه؛وشن اللي نبيه من وحده زيك ماعرفتش تربي ولدها وتخليه راجل زوجاته وخلت بنت ناس تحصل فيه وتسكت ع فضايحه وتتحمل لين دمرلها نفسيتها!؟.
"ع خاطر بنتك باهيه تي والله ماتسوى ولاتجي مراة"
بغضب قالت؛انتي اللي ماتسوي ولاتجي مراة ظفر بنتي برقبة مية من شكالك..لكن راجي عليا شويه كان مافضحت بيكم في كل تركينه وخليتكم سيرة ع كل لسان مايسمونيش مغليه..عيلة معفنه..تفي..
وسكرت عليها وهي تقول؛والله لما نقرقز بيكم ونخليكم هدرزة عشيه..
وحطت تليفونها ع الزيانه ومشت طلعت من الدار...
☘☘☘☘☘☘
بعد العصر..
تعبوا حياش عيت الواعر بالاحباب والجيران والمعارف..
رجاله ونساوين يواسوا فيهم ع مصابهم في بنتهم سدرة المنتهى..
🍃لطفي..
كان مع الموجودين ومش معاهم..
عقله وقلبه مش معاه..وبغيبة شيالة همومه شال الهموم كلها بروحه اللي كانت دايرة زي الجبل اللي قاعد ع قلبه..
☘ونفس الحال..
حال بناته وباقي العيله..
بالذات طوبى الهم والحزن كانوا باينين في وجهها هي أكثر منهم كلهم..
وفي من كان مركز عليها طول الوقت..
🍃في الكوجينه..
كانت توتي في الضيافه وهي مضايقه ع الآخر..
الناس اللي برا جاية تهدرز وتاكل وتشرب..
في اللي يضحك..وفي اللي يتكلم عن مواضبع سخيفه..
وفي من يدوي ع مناسبات فرح شن بيدير فيها ومايديرش..
لأول مرة طوبى تستاء من ضيوف يجوهم..
وهي في هالحاله..
"عطيك الصحه"
شبحت للباب وقالت؛سلمك..بدون أي تعبير ع وجهها..
قدمتلها وقالت؛ربي يشفي اختك ويردهالكم..
طوبى وهي عاقده حواجبها ودموعها في عيونها:يارب..تبي حاجه نجاح؟
ردت عليها تقول؛نبيك انتي نبي نهدرز عليك شويه مش مطوله..
قعدت طوبى تشبحلها وهي ساكته..
تنهدت نجاح وقالت:اني حاسه بيك وعارفه ان اللي صار فاجعه كبيره..لكن نبيك تتفكري مرة لما نصحتيني نصيحه وقولتيلي شدي في ربي ديما اذكريه واقري قرآن بش تجيك راحة البال وتكوني راضيه حتى في وقت الشده؟..اني درت بنصيحتك ومن بعدها ياطوبى تغيرت حياتي كلها..مريت بأيام صعبه عليا لكن كنت نرتاح من داخل وين نتفكر ان اللي وجع اللي نحس بيه ليا في اجر ويكفرلي في الذنوب..مانحكيلكش ياطوبى اني توا قداش حاسه روحي قويه..وحاسه ان مافي شي يقدر يغلبني ولايكدرني وربي معاي..حتى لو نزلوا عليا المصايب زي المطر بنزيد نشد في ربي اكثر ومتأكده ان كل شي قدره عليا فيه خير ليا..ساد الاجر اللي يكتبهولي لما نصبر..
طوبى تسمع فيها شن تقول..
وكأنها عمرها ماسمعت هالكلام في حياتها..
ماكأنهاش هي نفسها اللي يوم من الأيام نصحت نجاح وحاولت تهون عليها..!؟
الكلان اثر في طوبى هلبه..
بس ضايقها في نفس الوقت لأنها وهي فشدتها هادي ماحستش بولا حاجه من اللي قالتهم نجاح..
وهني قالت لنفسها..
اما ان الشده اللي هي فيها كانت اقوى من ايمانها بهلبه..
او ان في خلل معين فيها هي خلاها برغم التزامها بالذكر والعبادات والدعاء مش حاسه باللي قالت عليه نجاح..
ونجاح متابعه تقول؛بنتي..فوضي امرك لله وخليك ديما مع ربي بش يكون معاك بالذات توا....
تنهدت طوبى بعدين قالت؛بارك الله فيك نجاح..بارك الله فيك..
نجاح بإبتسامه؛فيك بارك الله..ربي يطمن قلبك ع وخيتك يارب..
طوبى بحزن؛آمين..
طبطبت ع كتفها بعدين قال:ربي يحفظك بنتي...
ولفت ومشت طلعت..
وطوبى خدت نفس بعدين غمضت عيونها وقالت..
"لاإله إلا الله"
وخدت سفرة الضيافه ومشت طلعت من الكوجينه..
☘☘☘☘☘
"الحمد لله ع سلامتكم شفت اختك"
هدا الحاج علي يكلم في حفيده يوسف بالتليفون..
وكل من في المربوعه يسمع وع راسهم لطفي..
علي؛باهي شن قالوا؟
"عمي محجوب قال دارولها كشف كامل..قالوا امورها تمام يعني جسمها واعضائها من داخل حالهم باهي ماعندهاش ولا مشكله غير الضربه اللي كلتها ع راسها تسببتلها في غيبوبه"
علي؛وماقالوش لأمتى بتقعد هكي!؟
"مش معروف ياجدي مش معروف"
تنهدت بضيق وقال؛معناها هو هني هو غادي مافيش فرق..
"لا الحق ياجدي في فرق كبير كل شي هني مطور هلبه والاهتمام الله يبارك هني خيرلها ياجدي"
علي هز راسه وقال:ان شاء الله خير ياولدي ان شاء الله..هي مانعطلش عليك سلم ع اللي عندك..
وسكر عليه..
والموجودين بدوا يسألوا؛ا لاباس ياحاج؟..شن قالك ياحاج!؟
علي شبح لولده وقال؛نفس الكلام اللي قالوه الدكاترة هني؟
لطفي بضيق؛امر الله..امر الله ماعندنا مانديروا..بنراجوا وخلاص هدا ماقدره ربي علينا ولااعتراض..الحمد لله..الحمد لله..
محمد شنيبه؛ايوه هو هدا ياحاج لطفي الحمد لله ع قضاء الله وربك قال ان الله مع الصابرين..
الشيخ جويده؛مزبوط كلام الحاج محمد..اصبر واحتسب وتمسك بحبل الله وبإذنه عز وجل يشفي بنتك وينوضها من الغيبوبه ويردهالك..
هز لطفي راسه وقال:الحمد لله ع كل حال الحمدلله..
وبوه وولده خوه وخوه ونسيبه عبد الرؤوف.يشبحوله بأسف ع حاله وقلق في نفس الوقت..
🍃ومن المربوعه..
للباب الخارجي اللي كان مردود شويه..
انفتح..وخش..ورده وراها..
كمل لداخل لين وصل في باب المربوعه..
وقف جنبه وقعدت يرمي في كندرته..وهو يفكر..وكانت واضح ع وجهه ملامح التجهم..
خدي نفس..
بعدين خش للمربوعه وقال..
السلام عليكم..
كلهم شبحوله وقعدوا يردوا عليه في السلام..
وهو مشي طول للطفي..
ولطفي ناضله..
لما وصل فيه سلموا ع بعض بالأحضان وهو يقول..
ان شاء الله لاباس عليها..ربي يردهالكي كيف قبل واحسن إن شاء الله..
لطفي؛آمين اللهم آمين..
بعد عنه وهو يطبطب ع كتافه..
بعدين جي للحاج علي طبس عليه وكب ع راسه ويواسي فيه..
وبعد ماسلم عليه..لف ع المربوعه سلم ع الموجودين باليد ومشي قعمز جنب ربيع..
وحسين يشوفله وهو مستغرب فيه بعض الشي..
ربيع؛تارقي وينك ياراجل وين اختفيت هكي مرة وحده نحسابوك رحلت..
عبد القيوم؛قبل بنديرها وبعدين تراجعت..
ابتسم وقال؛قلنالك شارع القهوة اللي ياخد عليه مايقدر يسيبه..
تنهد وهز راسه وهو ساكت..
ربيع:قولي شن جو الكفره وناسها؟
شبحله وقال:ماردتيش للكفره..
ربيع بتعجب:مالا وين كنتا الفترة اللي فاتت؟.
عبد القيوم؛في الخمس..
ربيع؛الخمس!؟..عندك حد فيها؟
حرك راسه بالنفي وقال؛لا..
ربيع حس ان في شي صار معاه من يوم الحادثه لليوم مخليه هكي وهو اللي كان مركز معاه من وقتها..
سكت وماباش يزيد يسأله..
بس هو سأل؛وين سافروا بيها؟
ربيع؛اوروبا لكن وين بالزبط ماعنديش معلومه..
شبحله وقال:المهدي شن صار فيه؟
رفع حواجبه بعدين نزلهم وهو يقول؛ماتسألش..
تنهد وهز راسه وهو ساكت..
☘☘☘☘☘
"اني حاولت نستخدم صلاحياتي بس وفي أمور مانقدرش نتصرف فيها من اختصاص المدير بالدرجه الأولى"
فردوس:انتي مع كنتي سدرة ديما ولا؟
:ايه..
فردوس؛خلاص معناها نحطوك مكانها..
طوبى:معليشي فردوس شويه..شبحت للأبله وقالت..تو نشوفوا الموضوع بيناتنا ونتصرفوا المهم انتي تقدري تمشي الوضع ع الاقل الاسبوع الجاي؟
الأبله هزت راسها وقالت؛ايه نقدر..
طوبى؛خلاص..حني ان شاء الله الاسبوع الجاي نديروا حل..
:كويس المهم عندي اني بلغتكم بش ماتصيرش مشاكل للمدرسه..
مطيره؛بارك الله فيك..
ناضت وهي تقول؛لاباس ع استاذه سدرة وربي يفرحكم ويفرحنا بنوضتها يارب..
كلهم قالوا؛آمين...
🍃وسقدت مطيره نائبة سدرة في المدرسه اللي كانت اخر من قعد من الموجودات..
بعد ماطلعت..
فردوس؛هي نائبه متاعها مفروض هي اللي تمشي خدمتها..
طوبى بهدوء:المدرسه ملك سدره وهي اللي كانت مشيتها ع نظام وماخلت حد يخالقه هدا علاش المدرسه متاعها من احسن المدارس الخاصه..
آلاء؛ايه باهي والنائبه متاعها ليها سنين معاها وعارفه النظام واكيد حتمشي بيه..
خشت عليهم مطيره وهي تسمع فيهم..
طوبى:شن يضمنلك؟
قعدوا يشبحولها وهما ساكتين..
طوبى؛تعبت اختي السنين هادي كلها مانسلموشي لأي حد مرات يمسحه في اقل من شهر ..
مطيره؛باهي شن الحل يابنتي من بياخد مكانها في المدرسه اني!؟
فردوس؛جاوبي ياطوبى..
مررت نظرها عليهم وهما يشبحولها ويراجوا منها في الإجابه..
🍃وبوها في هاللحظه خش للحوش..
كان يبي يغير حوايجه ويتوضا ويطلع للجامع..
خطم من حدا الصاله شافهم كيف مجتمعات ويتناقشوا..
وقف قدامها..
طوبى:اني..
كلهم تفاجئوا..
وأريج قالت؛بيبو انتي قاعده طالبه راهو..
طوبى:صح طالبه بش تخصصي نفس تخصص سدرة..
فردوس؛تبي خبرة مش تخصص ياطوبى..
طوبى:نتعلم يافردوس الابلات للي كانوا معاها حيفيدوني..
اريج:غير فهميني شويه..انتي توا شن بديري كيف بتشدي الادارة وفي نفس الوقت بتقري..
طوبى شدت ع قبضة يدها بعدين قعدت تفرك في باطن يدها بصوابعها محاولة منها تخفيف توترها:لو لقيت روحي مانقدرش نوقف قيدي..
خش بوها وقال؛حاجه زي هادي ماتقرريهاش من راسك لازك تردي الشيره قبل..
شبحوله..
وهي فردت يدها وقالت؛اكيد بنقول للجالي ومتأكده مش حيعارض..
حط ايديه في نصه وقال؛لو قال لا تحولي الموضوع من راسك بكل..
رجعت شده ع قبضه يدها وهزت راسها وهي تقول:باهي..
تنهد وقال؛تروحوا غدوة لحياشكم وكل وحده تشوف حياتها مانبيش وحده فيكم تبات بعد الليله خلاص..
فردوس وطوبى قعدوا يشبحوله وهما مضايقات..
شبحلهم بنظرات حازمه وقال:شني!؟ مفهوم كلام ولا نعاود!؟
شبحولهم البنات ومطيره..
الزوز بالغصب هزوا روسهم ووحده قالت؛حاضر..
والتانيه قالت:باهي..
نزل ايديه ومشي طلع من حداهم..
مطيره؛تبي حاجه وخيي..
"لا"..
رجعت شافتلهم وقالت؛هي نوضوا ضموا الدنيا واغسلوا الماعين اني بنوض ندير العشي..
فردوس:حاضر..
مطيره؛هيا نوضوا شن تراجو..!
ناضوا ومشوا البنات فردوس مشت للكوجينه..
واريج وآلاء قعدوا يضموا..
مطيره:امتى بتنوضي انتي!؟
شبحتلها طوبى بعدين ناضت وقفت وهي تقول؛حاضر..
ومشت طلعت من الصاله بتجيب المكنسه الكهربائيه..
اريج:ملاحظين كيف موليه؟
آلاء؛واضح هلبه..
مطيره بحزن؛سدرة امها مش اختها راهو هي توا حاسة روحها فقدت امها مرتين..
بدت ملامح الحزن ع وجوه أريج وآلاء..
تنهدت مطيره ومشت طلعت من الصاله..
ع خشة طوبى بالمكنسه الكهربائيه..
حطتها ومشت بتحط الخيط في الضي..
واريج وإلاء يشبحولها..
هي شغلت المكنسه وبدت تكنس..
وهما رجعوا يضموا..
الكل كان يخدم في الحوش بصمت وفي قلوبهم دوشة مشاعر مؤلمة...
ولطفي..
بعد ماجهز نفسه للصلاة مشي طلع من الحوش وهو حامل همومه معاه وناوي يرميها مع كل سجدة في الصلاة...
🍃وهو طالع..
عيون عبد الرؤوف وربيع اللي كانوا واقفين قدام المطعم معاه..
عبد الرؤوف بقلق:شاغلني هلبه.
ربيع؛ربي يفرج عليه..
عبد الرؤوف:ايه والله ربي يفرج عليه ويرفع عنه مصيبته مش بس في بنته...مصيبته الكبيره في ولده..
ربيع سكت ماباش يعلق صح مش عاجبه اللي يدير فيه مختار بس بقعد صاحبه..
وعبد الرؤوف حتى هو سكت وهو يفكر في مختار..
شويه..
شافوا عبد القيوم وهو طالع من الحوش ومتوجه للجامع..
قعدوا مركزين عليه.
ع جية حسين اللي كان يشبحله وقف عليهم وقال؛مش عارفين وين كان المدة اللي فاتت..
ربيع شبحله وقال؛قالي في الخمس..
عبد الرؤوف؛مش قال بيولي للكفره خلاص بعد ماصارش من موضوعه!؟
ربيع ابتسم وقال؛ماقدرش يفارق.
حسين هز راسه ومشي من حداهم..
عبد الرؤوف قال؛هي تمشي للجامع؟
ربيع؛اسبقني ولاحقك..
هز عبد الرؤوف راسه ومشي..
وربيع ولى للمطعم ...
🍃في الجامع..
لما وصل عبد القيوم..
....يتبع في التكمله.....
#تكملة_الجزء_السابع_والخمسين
#طوبى "جنة طوبى"
#جمان_فريد
خش للجامع..شاف المهدي داخل يصلي..
تنهد بضيق بعد مشي خدي مكانه وبدي يصلي في تحية المسجد..
وحداه بمسافه لطفي وجنبه بوه مقعمز ع كرسي والزوز كانوا يصلوا...
🍃🍃🍃🍃
في هالوقت..
كان اشرف ولد الصيد مروح من الخدمه بعد ماقضي في مكانها اكثر من عشرة أيام..
وهو مروح فات من قدام شارع لمح فيه ولد خوه..
هدا السرعه ووخر بالسيارة شويه ووقف بش يشوف ويتأكد..
فعلا طلع هو..
بس مش هادي المشكله..
المشكله او المصيبه..انه شافه يدخن مع الشباب اللي كان واقف معاهم واغلبهم اكبر منه..
بغضب شديد نادى؛محمد..!
هو وصحابه شبحوله..
كلهم انصدموا وشافوله هو اللي جمد في مكانه من الخوف..
لوح اللي في يده وجي بيهرب..
اشرف نادى عليه بصوت غاضب مخيف؛محمد..
وقف وهو يشوفله بخوف..اشرله بيده يجي وهو يحرك فيها بعصبيه..
ماكان يقدر شي غير انه ينصاع لأمره ماعنده وين يهرب منه سيوره حاصل عليه..
مشاله وهو يحاول يدير روحه عادي قدام صحابه..
وصل في السيارة وركب..
وعمه تحرك طول بالسيارة وهو يحرق في العجل...
🍃🍃🍃🍃
وفي حوش الصيد..
تحديدا دار نجاح وعواطف..
عواطف وهي تلم في شعرها:حسيتهم معاها مش قوي قعدت مقعمزة في مكانها ماتحركتش بكل ولاكأنه يعنيها اللي صاير..
نجاح وهي تلبيس في ملايه الصلاة:ايه لاحظت اشبح شن صاير بيناتهم..يللا خلينا منهم..بنصلي خلاص المغرب بيفوت..
عواطف؛اسمعي اني بنقلي البطاطا والبنذجال وانتي الطعميه مادخليش بيك..
نجاح بملل:ياودي باهي غير اطلعي بس..
مشت عواطف طلعت وهي تقول:ساد الغدي درته عليك..
نجاح رفعت ايديها وقالت؛الله أكبر..
سكرت عواطف الباب وقالت:من لما حطوها مديره معاش تبي دير شي..
وتوجهت للكوجينه..
بس وين وصلت في بابها..
عقدت حواجبها وهي تحاول تتأكد من اللي تسمع فيه..
كان صوت عراك..
عواطف:هدا أشرف!..
ومشت طول طلعت من الحوش لقاته شاد محمد ولد محي في الجنان ويهزب فيه..
اشرف بعصبيه:قسما عظما يامحمد كان مازال شفتك دايرها مرة تانيه نعدمك..ندفنك في مكانك..
محمد كان منزل راسه وهو معصب وخايف في نفس الوقت..
دفه بقوة وهو يقول بغضب شديد؛انتلف اركب لحوشكم وياويلك نلقاك طالع ياويلك..
مشي يجري محمد لدروج شقتهم..
واشرف وهو معصب مشي خش للحوش وعواطف خشت وراه وهي تقول:شن لقيته داير..
اشرف وهو يكتم في غضبه؛بالله عواطف فوتيني واصله عندي حدها ..
ومشي بإتجاه داره..
وهي ضيقت عيونها وقالت:اشبح شن لقاه مداير من عمله كله من رباية خديجه المعفنه..
ع جية نجمه من دارها اللي كانت تصلي فيها قالت بقلق:شن دوشه هادي!؟ حس اشرف سمعته!
عواطف؛ايه روح ومعاه ولد محي اشبح شن لقاه داير من عمله كان يهزب فيه..
نجمه؛عمايل هالولد ماتمش..
عواطف:من هديكا اللي طالقتهم وماتندريش عليهم..
مشت نجمه لدار اشرف بدون ماتعلق ع كلام عواطف..
اللي مشت للكوجينه وهي تقول؛يوم من الايام بيدير فالطه مافيها يترقع كان قعد هكي..
🍃وأمه..
في حوش ماليها مع اختها نسرين..
اللي شهقت بصدمه وقالت؛ياغبارتك كان يدير فيها حاجه!
خديجه؛لالا مادارلها شي..
نسرين؛وشن عرفك مش قلتي تكلمي فيه لقتيه مقفل!
خديجه:عندي عيون في العمارة قالوا اشبح وين رفعها وروح بيها زي الجن مافيها شي..اني نبي نعرف شن دارلها شن صار..
ياخوفي هالشيطانه عرفت كيف تلف عليه وتزلبحه..
نسرين؛توقعي..نجاه لفعه كبيره وخوك يحبها واضح عليه..
خديجه بإزدراء:حبه حب وغضب الرب..
ناضت وهي تقول..معاش نقدر نطول بنروح لما يروح ولايتصل طول قوليلي..
نسرين:باهي..
شبحتلها شويه وقالت؛كان تبي تهدرزي اتصلي في أي وقت..
تنهدت وابتسمت مجامله..
واختها مسحت ع شعرها بعدين مشت طلعت من حداها وهي تقول بصوت عالي..
"يام مروحه"
☘☘☘☘☘
بعد صلاة المغرب..
طلعوا رجالة شارع القهوة من الجامع..
اللي مروح بروحه...واللي معاه حد يهدرز هو وياه..
واللي فالسيارة..
المهدي برغم انه حديث عهد بمرض اختار يروح ع رجليه..
وترافق هو والتارقي..
المهدي؛الحمد لله ع كل حال..تنهد وقال..مادام ربي كاتبلي نعيش زياده معناها مازال ياما بنشوف..
عبد القيوم:مانيش قايلك تفائل..لكن نقولك خليها على ربك خير ولاشر..كله معاه يهون..
هز راسه وهو يقول؛ونعم بالله..
سكتوا الزوز وكل واحد كانت في داخله احاديث واحاديث طويله ماتخلصش بس ماكانش عندهم حيل يحكوا فيها..
🍃وصل عبد القيوم للحوش ومشي خشله طول..
والمهدي حتى هو مشي خش لحوشه..
وفات من جنبه محي اللي كان ماشي مع عبد الرؤوف وهما زوز يهدرزوا في مواضيع تخص وضع البلاد الاقتصادي..
وصل محي للحوش وقال؛خليها لربك وخلاص..
عبد الرؤوف؛هو هدا..هي تصبح ع خير..
محي:قدامك كل خير..
ومشي لحوشهم فتح الباب وخش..
اختار يخش يشوف امه قبل بعدين يركب لشقته..
🍃ووين خش لحوشهم..
سمع صوت خديجه تعارك..وعواطف تكلم فيها..
عواطف بإنفعال؛حبيبتي هدا عمه يضربه ويضرب عليه..
خديجه:يضربه لكن مش هكي مش كف....
نجمه:ايه الضرب ع الوجه غلط..
عواطف:ولدها يطلع العاقل عن طوره من فعايله السود..
خديجه؛نبي نعرف شن داير اني شن اللي لقاه دايره بش ضربه ع وجهه هكي لين دارله اثر ودم ع خده..
اشرف كان واقف قدام باب داره يسمع في النقاش حاول يمنع نفسه انه يخش فيه بس ماقدرش..
مشالهم طول هويقول؛شوفي مرت خوي احتراما لخوي ماكنتش نبي نقوله كلام زي هدا لكن انتي جبرتيني..ربايتك لصغارط غلط وبش مانكونش ظالم ربايتك انتي وخوي لصغاركم غلط بالذات محمد..الولد بادي يضيع راهو بادي يضيع مصاحب شله فاسده حشيش وبلي عفن نتحشم نحكي عنه..شاده يهرب من المدرسه عندك علم ولدك ليه شهر كامل مامشاش للمدرسه!
انصدموا كلهم واكثرهم محي الدين..
اشرف:واليوم شديته يدخن عيل يقرا تاني اعدادي يدخن..
خديجه بصدمه؛لامش لهالدرجه!..
اشرف؛شن بنتبلى ع ولد خوي!..
نجمه وهي تخبط ع وجهها؛ياحليلي الولد هدا لمن طالع لابوه ولاعمامه لاخواله كانوا هكي!..
اشرف:الدلع يام الدلع الربايه الغلط..
"وعلاش ماقلتش هدا كله من الاول"
كلهم شبحوا لمحي الدين وهو واقف فم وسط الحوش وهو متابع يقول؛مفروض خبرتني بهدا كله!..
اشرف:انت قلتلي تصرف معاه ماقلتش تعالى قولي شن داير..واني مابيتش ندخلك لأن وضعك ماكانش يسمح..اما اللي شفته دايره اليوم جيت بنقولك عليه طول مايندسش..
شبح محي لخديجه وكان باين في وجهه ملامح الغضب قاللها؛الحقيني..ومشي طلع..
وخديجه وهي خايفه مشت طول وراه..
نجمه بخوف:ياحليلي اني ياحليلي برا اشرف الحقهم مرات يدير في ولده حاجه بالله عليك..
تنفس بعصبيه ومشي دار اللي قالتله عليه امه..
عواطف وهي تمرر في نظرها ع نجاح وامها؛هاه ريتوا جيتوا لكلامي صدقتوا..هدا الولد بس..الله اعلم البنت شن يطلع من وراها..
نجاح بضيق؛لا راما متربيه اني معاها في المدرسه ونسمع في شكر الابلات ليها كلهم يحكوا بأخلاقها ..
نجمه ودموعها في عيونها؛ربي يحفظها بنتي..
🍃وفوق..
كان محي واصل لأقصى مراحل الغضب ولأول مرة يخوف منه خديجه لهالدرجه..
كانت تشوفله وهي ترعش كيف يضرب في محمد بالسبته..
ومحمد متكمش في.بعضه وهو يعيط ويقول..خلاص والله معاد نعاودها..والله يابوي..ااه..
ومحي يخبط وبس بدون مايقول كلمه..
☘واشرف واقف فم باب الشقه وهو يسمع فيهم وماباش يدخل عاجبه اللي يدير فيه خوه وشايف انه الصح..
وقف محي ضرب وقال وهو داهش؛غير تعبت بس..غير تعبت كانهدا قعدت نضرب فيك لغدوة....
غير عيونه عنه ووزعهم الدار..
مشي للطاوله خدي الآيباد والتليفون وقال:والله معاد رايههم..
ومشي طلع من الدار ..
خديجه كانت تشوفله بشفقه ودموعها تنزل..
"انتي اطلع برا وسكري الباب.."
خوفها من محي وقتها خلاها تطلع طول وتسكر الباب..
ومجرد ماطلعت..
بدي ولدها ينهال عليهم سب وشتم بألفاظ نابيه وصلت لسب الجلاله والعياذ بالله وطبعا بصوت مسموع ليه هو فقط..
🍃برا..
خديجه ودموعها ينزلوا:مش هكي يامحي غلط اللي درته..
لف عليها وقال بغضب:انك تسكري فمك وماتسمعنيش حسك..
بعدين مشي خش لدار النوم وسكر في وجهها الباب..
وهي كانت مضايقه ع الآخر ومعصبه في نفس الوقت..
وحداها بنتها راما حابسه روحها في دارها وهي خايفه..
🍃🍃🍃🍃
ومن شقة خديجه..
لشقة خوها المهدي..
اللي في الوقت نفسه وين جي خاش للشقه..
اللي كان مافيها حد غير عائشه..
محمد ويزن في النادي..
وسدرة عند جداها...
وسط هالسكون...
وهو ماشي للدار..
سمع صوت عائشه وهي ترجع كان جاي من الحمام..
خاف..ومشاله طول ..
وقف ع بابه ودق عليها وهو يقول؛عائشه..
لارد..
المهدي؛عائشه..ردي عليا كان تسمعي فيا..
"تسمع فيك..نسمع..مهدي جيبلي حوايج حوايجي لبزتهم.."
هو بقلق:حاضر..
ومشي للدار..
وهي كانت مقعمزة ع الحوض وهي متعبه هلبه..
🍃وهو في الدار..
فتح دولابها وقعد يطلعلها في حوايج وقعد يختار عشوائي كان متوتر وقلق هلبه..
لهدا لما جبد فستان بيطلعه طيح معاه حوايج تانيات وملف..
الملف لما طاح هو ركز فيه..
كان ملف طبي وبإسمها..
طبس وخداه..
قراه من القدام وشافه من الخلف..
بعدين فتحه يشوف شن فيه...
كان فيه صور تلاتية الابعاد للمعده ..
وهو يقرا ويحاول يترجم فهم انها لجدار المعده..
غير عيونه عنهم وقعد يفكر..
وماطولش في التفكير..
حط الملف ع السرير...ورجع خداها حوايجها ومشي للحمام..
دق الباب..
هي فتحاته وخدتهم منه..
وهو كان مركز ع وجهها وجسمها وكأنه اول مرة يشوفلها من لما طلع..
المراة كانت اشبه بجثه طالعه من قبر..
سكرت الباب بدون ماتشوفله..
وهو قعد يفكر بقلق..
لف ومشي للدار..
خشلها ومشي بياخد الملف مرة تانيه..
رن تليفون عائشه..
دور عليه بعيونه لقاه فوق كرسي الزيانه..
مشاله بيشوفه..
خداه وشاف المتصل..
الدكتورة..يتصل بك..
قعد يشوف للشاشه لين وقف الاتصال..
ولقي اكثر من مكالمه جاية من الدكتورة..
وبعدين بعتت رساله..
كانت واضحه من ستار الهاتف
(عائشه ارجوك ردي عليا وضعك خطير ياعائشه ارجوك ردي ولاتعالي للعياده غدوة ضروري)
هو كان يقرا ويعاود في الرساله وقلبه تعبا خوف..
"شن دير!؟"
التفت يمينه وشبحلها..
لقاها واقفه تشوفله ودموعها ي عيونها..
~~~~~~~~
مقعمزين ع السرير حدا بعض وهي تحكيله ودموعها ينزلوا:في الاسبوع نفسه....درت كل شي تحاليل منظار..الرنين..بعد عملية المنظار..رشقت وقالت..الدكتورة قالتلي تعالي يوم الاربعا مع راجلك لازم يكون معاك..وقبل هداكا اليوم صار اللي صار...
هو قال؛وقبلها علاش ماتكلمتيش..علاش قعدتي تعاني بروحك؟
شبحتله وقالت؛ماكنتش ناقص وقتها..
صدمه ردها..قعد يشبحلها وهو مش فاهم..
تتكلم جد ولاتتهكم عليه..
غير عيونها عنه وقالت..في وضعك هداكا ماهنتش عليا خفت كترت الضغط دير فيك حاجه..واني نبيك تقعد لصغارك..
لسانه ارتبط..معاش عرف بشن يرد عليها..
غير عيونه عنها وشبح في الفراغ وهو مصدوم..
وهي تابعت تقول؛يقعدلهم حد فينا..مايقعدوش بروحهم ويعيشوا اليتم في مرة وحده..بدت تبكي وهي تقول..اني مش قادره نتخيل لو صاارت فينا حاجه صغارنا شن يصير فيهم..صح ليهم الله وماينساهمش عارفه الشي هدا مش بيدي..اني ام..ام سيدنا موسى لما لوحت ولدها في الميه رغم ان ربي قاللها ماتخافيش عليه خافت عليه...
بلعت ريقها وقالت...واني خايفه عليهم هلبه يامهدي حتى مرضي مانبيهمش يعرفوا بيه..
شبحلها وقال؛تمام مش حيعرفوا توا..
قاطعاته وقالت:لاهما ولاغيرهم..
المهدي:لأمتى؟
هي قالت؛لين نتعالج ولا لين ربي ياخد امانته وقتها حتكون عليهم اهون من انهم يعرفوا بعذابي قبل لنموت..
مانبيهمش يشوفوا وجهي لما يزيد يذبل..وشعر راسي وهدوبي وحواجبي يطيحوا..نبيهم يتفكروني بشكلي هدا..اصلا شكلي هدا مش شكل بنادمه صحيحه..لكنه اهون بألف مرة من بعدين..
شد يدها بقوة وقال؛ماتسبقيش الاحداث..احسني الظن بربي انه حيشفيك ويردك لصغارك..
حرك راسها بالنفي وقالت بألم؛مش حاسه هكي..
هو ماتحملش حالتها انوجع عليها هلبه..
ضمها وهو يقول؛تعوذي بالله من الشيطان الرجيم هدا كله وسواس وخوف بس..مامنهم اللي تعالجوا ياعايشه وعاشوا حياتهم ..
شدت فيه وهي تبكي وقالت؛صغاري يامهدي بالله عليك كان بتجيب مراة بعدي بالله عليك خليهم لأمك ولعماتهم حنينين فيهم ماتخليهمش لمرت البو يامهدي..
هو دمعته غلباته وقال بنرفزة:خلاص اسكتي خلاص معاش نبي نسمعك اسكتي..
وهي انهارت بالبكي..
وهو يمسح ع شعرها وظهرها ويبوس ع راسها محاولة منها للتخفيف عنها..
وهي كانت في هاللحظه تبكي بخوف والم ...
وحب..
ايه حب...فهاللحظه كانت تتمنى لو تكون اخر لحظات حياتها وهي معاه..
وماهيش عارفه شن قاعد يدير فيه الشعور بالذنب والندم ع اللي داره فيها...
وفي صاحبتها من قبلها..
اللي قاعد في احدى مستشفيات عاصمة اوروبيه..
في سبات عميق...طويل...
تسبح في الفضاء الأسود الخالي من الحياة...
☘☘☘☘☘
الساعه 11:00ليلا..
في ليالي الشتي عيون الناس تغمض بكري مجرد مايتلحفوا بالبطانيه..
بس في حوش لطفي الواعر..
تحديدا دار المعيشه..
اللي كانوا فيها..
طوبى متغطيه و راقده..
وفي جهة تانيه فردوس راقده حتى هي..
وقعدوا مطيره واميمه واريج والاء فايقات..
يتفرجوا ع البوم صور العيله اللي كان مطروح الأرض..
آلاء؛قداش كانت تهبل حنينه قمة في الجمال..
مطيره؛اييه مرت عمك وردة كان ينضرب بيها المثل في كل شي زين وفلاحه واخلاق..طيبه ولسانها رطب عمرها ماوجعت مخلوق الله يرحمها ويسامحها..في بناتها كلهم اللي طلعتلها مزبوط طوبى..
شبحولها..
آلاء؛اني نحس ان بيبو تشبه خالتي سدرة اكثر في الطبع قصدي..
مطيره؛طوبى مش واعره زي سدره..لينه..
اريج؛لالا نحس فيها مازال اوعر في لقطات هكي شفتهم منها خلوني نشوف في طبعا وعارة خالتي سدره..
اميمه؛تربت ع ايديها اكيد بتجيب شويه من طباعها..
مطيره؛صح..
وقلبت صفحه من الالبوم..
شهقوا التلاته بدهشه..
إلاء:حي ياحي هدا شني!..
اريج؛ع بعض قفاطين قصار والشعر مطلوق!..شفتي امي شن كيف طالعه!..
مطيره بضحكه:زمان ماكانش فيه الحجاب زي توا..راهو الحجاب ماانتشرش الا في نص التسعينات واركب فوق..
اريج؛صدعتوا روسنا وانتم تقولوا علينا هالجيل الاحرف ع خاطر شعره تطلق من وشاح ولاسروال مشحوط شويه..
ضحكت اميمه..
مطيرة؛ياقر.دة حني كنا جاهلين في الدين..مش زي وقتكم هدا...
اميمه؛حلاوة هديكا الايام جت من قلوب الناس الصافيه ونواياهم الطيبه..
عكس وقتنا هدا اللي معاش عرفنا فيه الصالح من الطالح..
مطيره:صدقتي يابنتي..هالوقت يخوف يخوف هلبه...
🍃وسبحان الله كان نفسه الموضوع اللي يحكي عنه مهند في برنامج..
اللي كان عنوانه"بين امس واليوم"
🌟تعرفوا شن اللي يخوف فهالوقت..الناس..الناس هما اللي يخوفوا..الواحد توا ولى ليه اكثر من وجه ولون..يغير فيهم حسب المصالح والرغبات الشخصيه..
الناس توا بدت تتفنن في اظهار عكس حقيقهم لدرجه تخلي اللي يعرفهم مايشكش فيهم ولو شويه..
وللأسف النماذج هادم انظلموا بسببهم اصحاب النفوس السويه الباهيين لأنهم في نظر الغير ديما محل شك وان كل اللي يبان عليهم..زيف..كذب..ادعاء للمثاليه..للأسف..
اني نبي نعطيكم نصيحه اخيره بس..
خلوا عندكم ثقة في الله ثم في انفسكم بس..
تعاملوا مع الناس باللي تشوفوه منهم وخليكم ديما حذرين..
حسن النيه مطلوب لكن لازم من الحذر..
وتصبحوا ع خير...
☘☘☘☘☘
وبعد ماعم السكون شارع القهوة كله..
روح الجالي لحوش اهله..
بعد مادرس سيارته في القراج..نزل منها..
ومشي خش للحوش..
بكل هدوء ركب لجناحه..
وصل فيه وخشله..
حول جاكيته ولوحه ع الكرسي..
ومشي لسريره..انطرح فوقه ع بطنه..
واستسلم للنوم طول هربا من التفكيرفالمصايب اللي جابهم لروحه...
☘☘☘☘☘
فهالوقت..
كانت طوبى فايقه..
صلت القيام وختماته بالوتر..
وقعمزت ع الصلايه وبدت تردد همسا في ذكر..
"لاإله إلا انت سبحانك اني كنت من الظالمين"
☘دعاء يونس اللي في يوم من الايام استسلم بكري لليأس وانسحب وسيب المهمه وماصبرش ع ابتلائه بقومه...
وظن انه ربي مش حيحاسبه ع اللي داره لأنه عبد مخلص ومقرب..
وهلبه ناس في وقتنا هدا يفكروا زي سيدنا يونس وقتها..
انه مادامه مجتهد في الطاعه وقريب من ربي مش حيتعرض لشي من شدائد الدنيا ومصايبها...
ولما تنزل عليه المصيبه..
يقول اني ياربي نصلي وندير ونفعل علاش يصير معاي هكي!؟
مهم جدا يعرفوا الناس هادم ان الله يبتلي كل عباده..وبالذات الاقرب ليه..
لعدة اسباب..
اولهم بش يختبر ايمانهم ولو نجحوا في الاختبار الايمان يقوى..
وتانيهم وهو الأهم بش يزهد العبد في الدنيا ويعرف انها عمرها ماحتكون دار راحه ومصيرها للزوال...
وتالتهم بش يزيد يتقرب اكثر منه لين يوصل لمرحله يفرح بيها وين ينزل عليه ابتلاء ويعتبره درجه من الدرجات اللي حتوصله لأعلى مقامات الرضا والجنه اللي ثمنها غالي غالي هلبه...☘
🍃غالي هلبه..
ومحفوفه بالمكاره...
صعب علي عبد القيوم ان يقتل مشاعره ويوأد حبه ليها..
صعب هلبه..خصوصا بعد عرف انها ع ذمة واحد مايستاهلهاش..
واحد حيجيها منه أذى عظيم هي لتوا ماعندهاش أدنى فكرة عنه..
للأسف..مافيش في يده شي..مايقدرش يخلصها منه مايقدرش يحول بينها وبين الأيام الصعبه اللي قاعده تستنى فيها..
كل اللي يقدر يديره توا حاجه وحده بس..
انه يكون قريب عليها وع عيلتها ويحاول يدير معاهم كل اللي يقدر عليه..
ولو صار وجي يوم قعدت فيه بروحها هو حيكون في ظهرها..يسندها عمره كله..
بس هو توا قاعد عايش في صراع داخلي..
بين الثوابت والمبادئ..
وبين مشاعره..
هو توا يحب مراة متزوجه...
ممكن مايكونش مذنب لأنه حبها من قبل ماتولي ع ذمة راجل غيره..
بس توا هو يعرف..
يعني لازم يكبت مشاعره كبت..ومايخليهاش تجره للهلاك..
🍃في شقته..
تحديدا في الدار المقابله دار الجالي..
كان يصلي في القيام..ومابطلش دعاء في السجود..
"اللي اربط ع قلبي..واحفظ بصري"
يردد في هالدعاء في كل سجده..
لين فرغ من الصلاه...
ناض بالصلايه وشبح لباب الفيرندا..
السيرانتي كان مسكر بس الباب مفتوح..
مشاله..
وحط يده عليه..
جي بين عيونه اللي صار يومها..
وين عرف من تكون طوبى ومن يكون راجلها..
الغضب تملكه من الغيره..
جبد الباب وسكره بقوة..
ومشي طلع من الدار...وجبد بابها بقوة..
🍃وماكانش عارف ان خبطة باب الفيرندا..
فيقت الجالي مفجوع من نومه..
وجالي يومها ماخداش دواه وبزياده نفسيته كانت تاعبه..
لما فاق..
كانت الدار مظلمه...
فكراته بهداكا المكان ..
وقعد يتخيل في باب الدار ينفتح وخشوله منه نفس المجرمين اللي كانوا يضربوا فيه ضرب مبرح مهين واحيانا.شبه قا.تل...
وين قعدوا يتقربوا منه اللي كان خايف منهم..
صرخ بأعلى صوته...
🍃صرخه..
فيقت نضال من نومه ومفزوع..
وخلاته يطلع من داره وهو يجري لجناح خوه..
وفيقت امه وبوه واخته..
اللي طلعوا يجروا من الديار..
وركبوله..
وبوه يردد..
"يالطيف..يالطيف"..
وين وصلوا فوق ..
سمعوا صوت حاجه انكسرت..
مغليه بفجعه؛حي عليا!..
وقفوا في باب الدار..
لقوا نضال يحاول يشده وهو يقاوم فيه ويحذف عليه اللي يجي قدام..
نسرين قعدت ترعش..
ومغليه جت بتخشله..
دفها راجلها وقال؛نضال..
وخش داخل شده بقوة.
الجالي وهو مرعوب؛حولوا حولوا..حولوا..
شده نضال مع بوه..
محمد؛طلعه معاي برا الناس يسمعوا فيه..
طلعوه..وهو يعيط ويقاوم فيهم ويقول؛حولوا..حولوا خلوني..
ومحمد شنيبه سكر باب الجناح..
فلتوه وامه جاته وهي تقول:وليدي..ياروحي تعالى يما..
وهو مرعوب قعد يدف فيها ويقول؛حولي عني حولي..
وقعد يوخر منها لين وصل في الحيط..
قعمز لوطا وضم روحه وهو يرجف ويعيط ويقول..
"نبي طوبى..جيبولي طوبى..نبي طوبى"
مغليه ببكي؛كلموا طوبى جيبوها توا..توا...
نسرين وهي تبكي نزلت تجري لدارها وهي تسمع في صوت عياط خوها ورعشة نبرة صوته وقلبها قاعد يتقطع..
وصلت في دارها..
خدت تليفونها اللي كان ع الكامدينو...
وقعدت دور في رقمها وهي ترعش..لين لقاته..
واتصلت بيها..
🍃وطوبى كانت في دار هي وخواتها...
راقده ع سرير سدرة وتتفرج ع الألبوم..ودموعها ينزلوا..
فجأة..
رن تليفونها..
كان جنب مخدتها..
حطت في بالها ان الجالي متصل بيها..
خداته وشافت المتصل..
ناضت قعمزت..
حطت التليفون ع تركينه وفتحت الخط وردت..
ايوه نسرين..
"طوبى بالله تعالي توا توا"
طوبى بخوف:شن في؟
"الجالي يبيك بالله عليك تعالي"
فهمت طوبى..
وقالت؛جايه جايه..
وسكرت منها وناضت..
خدت بالطوها لبساته ع التوته..وخدت وشاح سدره ولبساته ولفاته عشوائيا..
وطلعت بسرعه من الدار بس بهدوء بدون ماحد يحس عليها..
🍃وفي نفس الوقت..
كان عبد القيوم واقف في الروشن اللي يفتح ع الشارع
يشبح للطريق ولحوش الواعر...
ويشوف قدامه في نفس المشهد..
وكأنه مازال مش مصدق..ولامستوعب..
فجأة..
هالمشهد اللي تصور فيه الذاكره ينمسح..
ويحي قدامه مشهد حاليا قاعده تصير احداثه...
شاف باب حوش لطفي الواعر انفتح..
وهي طلعت منه وسكرت الباب..
برغم قوة نبضات قلبه اللي صوتهم كان مسموع..
قعد مركز عليها كيف تمشس بسرعه وتبان متوجهه لحوش شنيبه..
درقت عنه بعد ماقصت الكياس..
وخر عن الروشن وهو يفكر بإستغراب وقلق..
شن اللي يطلعها في هالوقت من الليل لحوش شيابينها بالطريقه هادي!؟
🍃وهي لما وصلت في الباب..
لقت نضال يراجي فيها..
خشت وهو سكر الباب.
هي مشت تجري وخشت داخل وهو وراها..
وين خشت سمعت صوته وهو يبكي زي الاطفال ويقول..
"جيبولي طوبى"
قلبها وجعها عليه هلبه..
ركبت تجري..
وهي راكبه تجري...حست بألم اسفل بطنها بس تجاهلاته..
وقعدت تركب لين وصلت فوق..
ونضال وراها..
مغليه وهي تبكي؛زوديله يابنتي..زودي..
مشتله طوبى..
وصلت فيهم قعمزت قدامها ع ركابه وحطت يدها عليه..
هو انفجع قام راسه شبحلها قال بلهفه؛طوبى..طوبى..
وهي طول ضماته في حضنها وقعدت تقرا فيها..
وهو يبكي بكاء أطفال..
كان موقف مؤلم بكل معنى الكلمه..
ماتحملاش نضال اللي مشي خش داره..
وخلا امه واخته يبكوا وهما يشوفوا فيهم..
اما بوه..
فكان يمرر في نظره بين ولده وكنته...
وين تجي عينه ع طوبى كان يحس بخجل وخزي...
🍃وهدي الجالي في حضنها..
وهي قالتله؛هي نوض معاي..
مسحت وجهه من الدموع وهي تقول:هي نوض..جولي..
هو ابتسم بتعب وناض معاها..
وهي ابتسمت بألم وساعداته..
ومشت خشت معاها للجناح...
ساعدته بش يرقد..
بعدين قالتله:جايب معاك دواك..
الجالي بصوت مبحوح؛امم..في الشنطه..
طوبى؛باهي..
ومشت بطلع الدوا من الشنطه..
وفي الباب بوه امه واخته يشبحولها شن دير..
خدت من شريط الدوا حبه..
ومشت خدت شيشة ميه محطوطه ع الكامدينو..
طوبى:ساعد روحك..
هو اتكى..
وهي عطاته الدوا والميه..
خداهم..
وهي.تشوفله..بعد كمل خدت منه الشيشه وقالت؛طهورا..
هو قال؛تعالي ارقدي حداي..
جبد محمد شنيبه باب الجناح وقال؛خلاص انزلوا..
مشت نسرين وهي تمسح في دموعها..
وامها وراها ودموعها مابطلوش نزول..
وهو وراهم..
نزل من الدروج:عرفتوا تختاروا..
رشفت وقالت؛قتلك قبل طوبى طيبه هلبه وبنت اصول ماتسيباش...
محمد؛ربي يبارك فيها..
ووصلوا تحت..
توزعوا ع الديار خشولها..وسكروا البيبان وراهم...
#مخبأ_منحة_محنة
#طوبى