#طوبى "أقحوان وفلة وياسمينه"
#جمان_فريد
#الجزء_الرابع_والخمسين"30يناير 2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
خشت عليها الكوجينه وهي لابسه شنطتها وقالت..
سدرة:هي خلاص طوبى بنروح..
طوبى:غير كان تقعدي تتغدي ياسدرة نسرين وعيشه جايات..
سدرة؛لا حبيبتي العزومه هادي لحوش شيابينك..
مصمصت طوبى ايديها من الصابون وهي تقول:راجي شويه..
ومشت فتحت الكوشه وطلعت منها طاجين بايروكس مسلفر وقالت..خودي..
خداته سدره وقالت..ان شاء الله تنستري معاهم..
طوبى:ان شاء الله..
ومشوا طلعوا الزوز وسدرة تقول:وسعي بالك وماتعطي لحد فرصه انه يستفزك تمام..ماتخلي حد يشد عليك حاجه ولايركبك عيب..
طوبى:حاضر..
خدت طوبى وشاح من ع الشماعه وطلعت معاها برا تسقد فيها..
وين طلعوا..
انفتح الباب السحاب...
خشت سيارة الجالي..ووراها سيارة المهدي..
سدرة شهقت وقالت:جو عليك احراج..
طوبى:حي عليا اني اللي قاعده مابدلتش ريحتي قلبي وطبايخ..
درسوا سيارتهم ونزلوا..
نزل الجالي من سيارته..
ومن سيارة المهدي..
نزلوا بوه وأمه ونسرين وعائشه وسدرة..
طوبى؛امري لله..
ومشت ترحب بيهم..
وسدرة قعدت واقفه حدا سيارتها..
المهدي وهو يسكر في السيارة كان يشبحلها وهي عيونها ع عيلته كيف يسلموا ع اختها...
شافتها كيف كبت ع راس عمها ويده..
وكيف سلمت ع عزوزتها زين..
وع حماتها وسلفتها سلام حار..وباست سدرة المهدي من خدودها..
بعدين سلمت ع المهدي بكلام..
وين شافوا نسرين وعائشه سدرة مشولها وهي قدمتلهم..
وعيون المهدي مافارقوهاش..
نبضات قلبه كانت متسارعه..ومخليه النفس عنده يضيق..
كان يقاوم مش مبين شي بس اللي يركز ع حركة صدره يلاحظ...
طوبى:تفضلوا..تفضلوا..
محمد وهويشوف لمنظر الجنان:الله يبارك الله يبارك..
الجالي:هي تفضلوا هيا يام..
مغليه وهي تسلم ع سدرة؛مروحه؟
سدرة:ايه..
بعدت وقالت؛كيف جينا حني انتي بتروحي؟
سدرة:العزومه ليكم انتم حني جينا قبل وتغدينا..
نسرين:شن تقولي انتي خشي بلاجو زايد..
سدرة؛لا والله مافيها كيف..عندي ماندير..
مغليه:ع راحتك..
الجالي:نهار تاني نعزموا الكل شن رايك طوبى؟
طوبى:ايه لما يبدا الجو كويس ونديروا شوايات في الجنان..
نسرين :اهو خلاص قريب يخش الربيع وتوا ارواحكم..
الجالي وطوبى قالوا بضحكه:ان شاء الله..
سدرة:هي مالا اني نستأذن..بالسلامه..
محمد:سلمي ع بوك وجدك..
سدرة؛يوصل..السلام عليكم..
وركبت سيارتها..
والمهدي مازالوا عيونه متناسي عائشه اللي واقفه تشوفله..
دخل الجالي ماليه داخل..
والمهدي خش بالسيف عليه..
وقعدت طوبى لين طلعت سيارة اختها للفيلا بعدين مشت خشت...
طوبى بإبتسامه:الحوش حوشكم..خودوا راحتكم..شويه وجايه..
ومشت بسرعه..
والجالي لحقها وهو يقول:شن درتي..
طوبى:تو تشوفه ع الغدي..
الجالي:لئموشه..
ضحكت طوبى..
وعيون نسرين عليهم لين ركبوا فوق..
ابتسمت وقالت:الله يبارك الحوش رايح زي الطاسه..
مغليه؛عجبتني ريحة البخور..
عائشه:مبخره العود..
نسرين:مرة شميت زيه في شقتك..
في الجهة التانيه من الصالون..
محمد:من كان يكلم فيك بكري؟
المهدي:عمر قال بيروح بعد ساعتين يبي حد يجيه للمطار تو نقول لنضال..
محمد:اول مايروح بنقوله يطلق ومايطولهاش وهي قصيره..
المهدي عقد حواجبه وقال؛كان نعرف شن غير رايك..
محمد؛مش مهم توا..المهم ان يطلق من غير شوشرة ومشاكل سادنا مصيبة اختك..
سكت المهدي وهو مضايق ع الآخر..
☘☘☘☘☘
طالعه من الدار وهي رافعة حوض بلاستيك معبي ميه..
ومشت طلعت بيه للجنان.
وصباته تحت وحده من الشجر..
وين ولت بتخش لقت خوها طالع..
نجاح؛مش متغدي هني؟
اشرف:شن نسيتي فاتحة وليد يخدم معاي اليوم..
نجاح:ايه نسيت بكل..الفال ليك ان شاء الله..
ابتسم ومشي بيطلع من غير مايرد..
وهي ضحكت وخشت داخل...
🌸طلع برا الحوش ومشي وقف ع سيارته وهو يشوف لروشن شقة فايزة..
🌼اللي كانت فيها صفاء تلم في خواتها ع الغدي..
صفاء:هيا بسرعه بيشاميل هادي مش مستنيه حد..
حطتها والتفتت للروشن لقاته مفتوح مشت بتسكره..
وين وقفت فيه..
شافت اشرف واقف ع السيارة ويشبح جيتهم..
لما شافها لبس نظاراته وركب السيارة..
هي طول سكرت الروشن وقعدت تشبحله من المرش اللي مايبينش فيها..
لين تحرك بسيارته..
"صفاء"
انفجعت والتفتت..
مروة:شن عندك في الروشن؟
رفعت حاجبها وقالت:نعمين!؟ ترا ريحي جمالك واسكتي..
تاله؛شن قالتلك هي!؟
صفاء:انتي التانيه اسكتي وماتتكلميش وهيا تغدوا..
وجتهم قعمزت حداهم وبدت تاكل..
ومروة تشبحلها بشك..
☘☘☘☘☘
في الصالون..
طوبى:وين نضال ومحمد يزن؟
مغليه:نضال عنده بضاعه بيجيبها للقهوة ماكينات ماماكينات قال ورفع معاه محمد..
عائشه:يزن غدوة عنده امتحان وانتي تعرفيه مع القرايه يفوت كل شي..
سدرة:الا اني مانفوتش طلعة ع خاطر القرايه..
عائشه:انتي شن يفوتك انتي..
ضحكوا..
بعدين ناضت طوبى وهي تقول؛ربي يحفظها..
عائشه:سلمك..
ومشت من حداهم طوبى..
ناضوا نسرين وعائشه لحقوها..
مغليه؛هي نوضوا نقعمزوا حدا جدك..
ناضت سدرة وقالت:لا بنمشي نساعدهم..
ابتسمت مغليه وقالت؛بري ياحنه..
ومشت سدره تجري للكوجينه..
ومغليه مشت قعمزت حدا شيبانيها وولادها..
☘في الكوجينه..
عائشه وهي تشوف في الاكل:ماخليتي شي مادرتيشي الله يبارك..حيي شن هدا ماتقوليش ليا؟
طوبى بإبتسامه؛داراته سدره ..عصبانك بروحك والحاجات مقليه حطتهم في الكوشه مع دهنة زيت زيتون.
ابتسمت ودموعها لمعوا في عيونها وهي تقول؛نجيها ياربي..
نسرين:اهم شي العصبان متاعنا انتي درتيه..
طوبى:ايه كله بروحي سدرة حشت معاي شويه..ودارت نوعين موالح..وطيبت الكسكسي..
نسرين:كسكسي سدرة مافيش خوه تسهفت..
عائشه:هيا بسرعه خل نوتوا هداكا هو..
نسرين:هو كله واتي نحطوا في الماعين بس..
وقعدوا يوتوا الغدي..
ونسرين وعي توتي في فبالها سؤال تبي تسأله لطوبى بس متردده وفي الاخر قررت تسأله..
نسرين:طوبى..
طوبى وهي تستف في الصواني:نعم؟
نسرين؛علاش ماعزمتيش نجاه؟
عائشه شبحت لطوبى..
وطوبى حطت الصونيه اللي في يدها وقالت لنسرين؛العزومه للعيله نسرين..لشيبانيا وعزوزتي وسلافي وحمواتي وسلفتي هي من تكون؟..
تفاجئت عائشه في رد طوبى ع الآخر زي ماتفاجئت نسرين اللي قالت:ماتشبحيش فيها تمشي وتجي علينا يعني قاعده وحده من العيله..
طوبى:في حوش العيله اني مش حقي نعترض ع جيانها لكن مانعزمهاش لحوشي..
نسرين وزعت نظرها يمينها بعدين هزت راسها وولت توتي في الغدي..
وطوبى اللي كانت جاهده تحاول تحافظ ع ثباتها الانفعالي ولت اللي كانت دير فيه..
اما عائشه قعدت تفكر في رد طوبى المفاجئ هلبه وتسائلت هل طوبى شاكه في حاجه ولاشايفه حاجه!؟
☘☘☘☘
"خلتيني نراجي يوم الخميس بالساعه والدقيقه بش نشوفك"
صابرين بإبتسامه:علاش؟
مختار حط الشوكه والموس وقال بإبتسامه؛عارفه علاش..
صابرين؛لا مش عارفه..
قعد يشبحلها بنظرات اثرت فيها..واركبتها.
وهي تشوفله بإعجاب شديد مع شي من الربكه بان في عيونها..
مختار بنبرة تلعب بالمشاعر:عيونك..وآه من عيونك..
وصابرين قلبها يدق بقوة وتبلع في ريقها..
مختار:كان نلقى نخليهم مايشوفوش غيري..
صابرين وهي تحت تأثيره قالت؛هذا اللي صاير..
ضيق عيونه وقال:كيف؟
صابرين:انت عارف..
ضحك وقال؛عسل..والله عسل..جميلة ودمك عسل..واني ضااايع..
نزلت عيونها وهي مبتسمه بإرتباك..
بمقدمه حذائها قعدت بتوتر تمسح في الارضيه اللي عليها الكرسي اللي مقعمزه عليه.
ماحستش الا برجله ضربت رجليها وقفتها..
قامت عيونها وشافتله..
هو ابتسم وقال؛ايوه..خليهم مقابلات عيوني ماتنزليهمش بكل..
ضحكت وقالت:الغدي صقع..
ضحك وقال؛تغدي تغدي..
وخدي الموس والشوكه وكمل ماكله وهو يسرقلها في النظر..
وهي هاربه بعيونها عنه ماتبيش تضعف قدامه اكثر...
☘☘☘☘☘
وع الغدي..
النساوين بروحهم والرجاله بروحهم...
عند النساوين..
مغليه:سلم يدياتك العصبان زي العسل لكن الكسكسي مش انتي دايرتيه صح؟
نسرين؛كسكسي سدرة يام..
سمعها المهدي وزاد تأكد ان الكسكسي سدرة اللي داراته مش اختها..
حط الكاشيك..وقعد ياكل من الحاجات التانيه..
🍃اما عائشه بعد ماكلت شويه حست بطنها تعبت وبدت كبدها تزهق..وقعدت تدعي ربي يشد فيها ومايصيرش فيها اكثر من هكي..
اما طوبى..
فجاة..
وبدون مقدمات..
لما فاحت عليها ريحة البصله وهما يتغدوا حست بكبدها زهقت..
مافهمتش شن صارلها..
بكري كانت عاديه توا شن جاها!؟..
شبحت لمغليه زي المفجوعه لما سمعتها قالت..
هالحوش السياح النياح يبي عويله يلعبوا فيه ياطويبه..
شبحتلها عائشه..
نسرين؛شني مازال مش ناويين بيبو؟
ابتسمت مجامله وقالت:ان شاء الله بعد نكمل السمستر هذا هكي متفقين..
مغليه؛متشوقه تشوف عويلة الجالي ماتعطلوش هلبه بنتي..
طوبى وهي مبتسمه مجامله:ان شاء الله..
وبلعت ريقها من كبدها اللي مازال زاهقه..
سدرة المهدي؛ماما نبي بيتزا..
خدت عائشه طرف ومداته لبنتها بعدين قالت:طوبى وين الحمام..
طوبى وهي تأشرلها بيدها:من غادي ع اليمين..
ناضت عائشه وهي تقول؛صحيتي.
ومشت طول..
ومغليه معاها بعيونها وهي تفكر في حالها وتذكر في كلام خديجه عنها انها حامل وداسه..
☘☘☘☘☘
"كويس الامور كلها تمام..توكلنا ع الله"
:خلاص بتشري.
إياد؛ايه...خل نبدوا في الاجراءات من توا..
ضحك وقال؛مستعجل دكتور!
اياد بضحكه:استاحشت الشارع وناسه...
تنهد وقال:والله حتى اني ماهاين عليا فراقه لكن الظروف تحكم..
اياد:فيها خيره..
:ان شاء الله...
🍃وطلعوا اياد هو وصاحب الحوش منه..
ع طلعة عبد الرؤوف شافهم..
ابتسم ومشالهم طول:دكتور..
التفت وشافه ابتسم وقال؛عبروف..
وصل فيه وسلموا ع بعض بعدين سلم ع الراجل وقال..
خلاص تفاهمتوا؟
:خلاص بعت..
عبد الرؤوف؛بنتونسوا بالدكتور..
اياد؛مش غير ونس جيره..
عقد عبد الرؤوف حواجبه وهو مبتسم بإستغراب..
اياد ضحك وقال:نتلاقوا ونهدرزوا ان شاء الله..السلام عليكم..
عبد الرؤوف وع وجهه نفس الابتسامه قال:وعليكم السلام..
:السلام عليكم..
عبد الرؤوف:وعليكم السلام..
ومشوا ركبوا الزوز سياراتهم وتحركوا ورا بعض..
وهو مشي ركب سيارته حتى هو وتحرك...
🍃فات من قدام حوش عيلة مرته..
اللي كانت فيه اختها واقفه تهدرز ع عمتها وهما يقطفوا في الزيتون..
سدرة؛نزلت للكل واللي دفعوا من البدايه رديت باقي فلوسهم..
مطيره:وشن بتربحي انتي هكي؟
سدرة؛مش عارفه شن نقولك ياعمتي..بس يعني وضع الناس يوجع..
مطيره؛والله كان الكل بيديروا زيك مافي حد ربح..الوضع صعب ع الكل اللي ماعنداش مايلزماش..
سدرة؛خيره قلبك مولي هكي عمتي!؟
مطيره:قاعد ابيض زي الحليب لكن مالاش علاقه باللي نحكوا عليه..اللي مايقدرش يحط صغاره في مدرسة خاصه يحطهم في عامه ويريح روحه..
سدرة قعدت ساكته وهي تقطف في الزيتون..
مطيره؛ايه حقه سمعتي بنجاح بنت الصيد؟
سدرة؛خيرها؟
مطيره؛حطوها مديره للمدرسه اللي هني..
سدرة وهي متفاجئه؛الله يبارك..الحق تستاهل نجاح..
مطيره؛عمتك نجمه تفشك علينا بنتي ولت مديرة المدرسه..
سدرة بضحكه:تلقيها تسحن في مغليه..
مطيره ضحكت؛وهديكا بان في وجهها العنقروفه ماتبي حد خير منها..
سدرة:صح هي كويسه وحنينه لكن عندها هالعيب..
مطيرة تنهدت وقالت:قاهرني حال اميمه..هداكا خدي وجهه وهما مادارو شي لابعتوا حد لاجو تكلموا..
سدرة:شكلهم يبوهم يحلوها برواحهم..ولايراجو لين تهدا اميمه بالك تتراجع عن الطلاق..
مطيره:ضاربها هدا ضاربها..لاجو تعذروا عنه لاكلمونا حتى بالتليفون..والله ياسدرة والله لولا طوبى اللي جت في نص وريتهم حجمهم..
سدرة بضيق:والله حتى اني ماطايب عليا..لكن زي ماقلتي طوبى جت في النص...
🍃🍃🍃
واميمه فهالوقت طالعه بتروح من المستشفى..
لما وصلت في الباب..
لحقت عليها حسناء وهي تنادي..
وقفت وهي تقول:خيرك؟
حسناء:بكري خوي جي خدي السياره مرته صارلتها حالة وفاة بيرفعها لبلادهم...نبيك تروحي بيا..
اميمه:واني سيارتي بايته في الورشه من امس جابني حسين خوي..
حسناء بضيق؛علاش ماقلتيش سيارتك في الورشه..
اميمه بضحكه؛علاش لازم نقول..
حسناء تأففت وقالت:معناها بنروح في تاكسي ويستر الله..
اميمه؛تروحي معانا مانبيش نقاش..
حسناء وهي متوتره:لالا شن نروح معاكم ونخلي خوك يدير مشوارين نهاري!
اميمه شدتها من يدها وجبدتها وهي تقول:تعالي من غير جو..
ومشوا هما الزوز مع بعض لموقف السيارات..
وين وصلوا فيه..
اميمه؛هونا سيارته..
حسناء بإحراج:ووه عليك موقف بننحط فيه..
اميمه بضحكه:اسكتي اسكتي..
مشت لخوها وطبست ع الروشن متاعه وقالت:بنروحوا بحسناء..
حسين؛تمام قوليلها تركب سيارتها فيسع..
ابتسمت اميمه بآندهاش لما لاحظت خوها متفكر ان حسناء عندها سيارة وقالت؛سيارتها مش عندها بتركب معاها..
شبحلها..لقاها شاده شنطتها بإيديها الزوز وتشبح للجهة التانيه وباين عليها متحشمه....
قال:تمام.
اميمه مشت لحسناء وقالت:هيا..ومشت بتركب..
وحسناء مشت وراها وهي محرجه..
ركبت اميمه جنب خوها..
وحسناء من الخلف..
لما ركبت قالت:السلام عليكم..
رد:وعليكم السلام..وتحرك طول..
بعد ماطلعوا من المستشفى شغل المسجل..
واشتغلت اغنيه للطيفه..
لامش عاطفيه نهائي..
هالاغنيه كلماتها تقول..
كيف ماجبلنا شامخ احنا شامخين...
كانت وحده من الاغاني المفضله عند حسين.
حسناء وهي تسمع فيها كانت تسرقله في النظر..
تشبح لملامح ع وجهه ع جتب اللي عاكسه عليها اشعة الشمس..
تجهمه اللي كان واضح..بس مخليه اكثر وسامه مش مشين شكله..
اعجابها بيه قاعد يزيد في كل مرة تشوفه فيها..
ماصدقتش وذانها لما سمعاته يكلم فيها..
"وين بالزبط"
حسناء بنبرة مرتبكه:شارع الجمهوريه..
حسين؛وبعدين..
اميمه حست ان حسناء مرتبكه قالت:اني ننعتك..
وقعدت توصفله..
وحسناء تشبحله وهو يكلم في اخته ويسأل فيها..
قعد تتأمل فيه وفي تفاصيله..
كلامه..اسلوبه..حركات يده..طريقة سواقته..
وملامحه الجاده..
حسين؛تمام زبطتها..
وقعد يسوق وهو ساكت..
واميمه فتحت مع حسناء سيرة..
وكأنها تبيها تهدرز...
حسناء كانت مرتبكه في البدايه بس بعدين قعدت تهدرز عادي..
وهو مرة مرة يسمعلها..
لطافة اسلوبها..وطريقه كلامها..فكروا بأسلوب طوبى..
قعد مركز معاهم..
لين وصل بيها لمكان سكنها..
حسناء:بارك الله فيك..
حسين:فيك بارك الله..
هي ابتسمت وقالت؛سلام اميمه..
اميمه؛سلام..
نزلت حسناء ومشت لحوشهم وهو معاها بعيونه..
واخته مركزة عليه..
بعد ماخشت للحوش..
هو تحرك طول...
حسين:غدوة عندك؟
اميمه؛لا غدوة راحه..
هز راسه وهو ساكت...
☘واميمه وهي مروحه مع خوها..
في من كان جايب سيرتها لكن مش بالخير..
🍃عواطف:اها شوفي درتلهم كلهم سكرين اقري..
خدت خديجه التليفون وقعدت تقرا مناشير اميمه اللي صورتهم عواطف..
عواطف وهي تشوف لخديجه؛صايرة حاجه صح؟
تنهدت خديجه وقالت؛ايه..
خدت عواطف التليفون وقالت؛واصله للطلاق صح؟
خديجه؛مش طلعي الدوة ياعواطف..
عواطف بفضول؛مش مطلعة شي نبي نفهم بس..
خديجه؛ايه..
عواطف؛واضح ع الخدمه
سكتت خديجه..
عواطف؛واضح وهالمنشور خير دليل
حطت ع سكرين لمنشور اميمه اللي منزله فيه صورتها ووراته لخديجه..
خديجه لما شافاته قالت؛بالله هادي تصرفات بنت ناس متربيه تتحدا في راجلها عيني عينك!..
عواطف نزلت التليفون وقالت؛اميمه رافعه خشيمها شويه..
خديجه؛وياريته ع حاجه تسوى ساد فضايح امها وبوها..خليني ساكته..
عواطف بصدمه؛راك تقولي طلعت خانبه هي وامها فلوس بوها حق!؟٠
خديجه؛ماتستبعدي شي..
عواطف؛حي غبارة حي..!
خديجه؛الله يسامحه عمر هو اللي خلطنا عليهم.
عواطف؛اني مصدومه الحق مش باين عليها بكل..
خديجه؛اللي مايبانش عليهم هما اللي يطلع منهم كل شي..
عواطف؛وبنت عمها؟
خديجه؛لاطوبى الحق غير عنها فرق السمي ع الوطا هديكا مربيتها سدرة...وبنت الحاج لطفي..
عواطف؛باهي كان صار من الطلاق مايصير شي لطوبى والجالي..
خديجه؛مانيش عارفه الحق..بس مانتوقعش الحاج لطفي يرضى خراب حوش بنته بلا سبب..وبعدين الجالي مايفرطوش فيه ياعواطف..
عواطف:ايه الحق الجالي الله يبارك عليه..ربي يعقد عسلهم..ويهدي سر اميمه وعمر...
خديجه؛لالالا وحده زي هادي معاش نبوها خلاص..
وعواطف تشبحلها بطرف عينها ومن داخلها كان عاجبها اللي صاير..
لسبب واحد ومعروف..
🍃واختها كانت شاده المصحف وتقرا في سورة البقرة في
نفس الموعد اللي تعودت تقراها فيه..
التكملة تنزل بعدين شوية ان شاء الله.
التكملة
ماروحوش لين ضموا الدنيا كلها"
الجالي:خلاص باقي اليوم هياجه خميس راهو..
ضحكت وقالت؛باهي..خل نركب نبدل ..
ومشت بسرعه ركبت تجري..
وهو مشي بيقعمز في الصالون شاف..
اللوحه الآيه القرآنيه اللي خطها عبد القيوم..
بدت ع وجهه ملامح الغضب...
فجأة رن تليفونه..
قامه شاف المتصل تنهد ومشي طلع للجنان..
🍃الجالي؛ايوه..
"روحوا ماليك"
الجالي:ايه توا..
"باهي حط لعبتك في حوش ماليها وتعالى"
الجالي:صعب..
"وعلاش شن عندك"
الجالي:بنطلع اني وياها..
"ياسلام"
الجالي:تو انتي مش تبي تسافري خلاص ماتوليش طماعه ..
"باهي امتى عطيني موعد"
الجالي؛اخر الاسبوع الجاي..
"جديات جالي"
الجالي:والله العظيم أخر الاسبوع الجاي..
عيطت من الفرحه..
قعد يضحك..
ع طلعة طوبى من الحوش..
شافاته يتكلم بالتليفون وهو يضحك..
لما سمع صوت الباب بدون مايشوفلها قال؛خلاص احمد نتلاقوا السبت..
"لعبتك جت تمام تمام..نحبك ونموت فيك"
الجالي:اوكي..السلام عليكم..
وسكر..بعدين دار روحه شبح صدفه للباب ابتسم وقال:واتيه..
طوبى وهي مبتسمه؛ايه..
فتح ذراعه وقال:تعالي..
هي مشتله وين وصلت فيه حاوطها بذراعه لما شمت ريحة عطره..
حست بالغثيان..بس شدت روحها..
لين مشوا لسيارته وركبوا ..
فتحت الروشن كله..
الجالي شغل السيارة وقال:حبيبي صقع عليك..
طوبى رفعاته شويه وهي تقول:زي اللي سخنت..
تحشمت تقوله ع الريحه..
هو قال:افتحي البالطو شويه..
طوبى؛باهي..
وهو تحرك طول وقال:عطيك الصحه ياقلبي امي ماعرفتش كيف تحكي عليك وع تطيبك وفلاحتك ونظام ونظافه الفيلا..
ابتسمت طوبى وقالت؛ربي يحفظها..
الجالي؛ومايحرمني منك..
وطلعوا من حوشهم..
🌸وهدا اليوم عاشوا لحظات حلوة وسجلوا ذكريات جميله لاتنسى..
🍃ومن جهة تانيه عبد القيوم كان عايش ع أعصابه..
يراجي في تليفون من والد ام عيون الحايره زي ماهو كان يظن..وعدا عليه اليوم وهو يراجي وماجي شي...
☘☘☘☘☘
"علاش!؟"
محمد؛ماتصلحش بيك ياولدي ماتمشيش معاك ولامعانا..
عمر؛بوي شن االلي غير كلامك سمعت حاجه،؟
محمد؛لاسمعت ولاشوفت..اني قعمزت مع روحي وفكرت في اللي صار لقيت احسن شي ليكم انتم الزوز الطلاق ومن اولها خير..احسن ماديروا صغار يحصلوا بيناتكم..
عمر قعد ساكت وهو مش راضي عن كلام بوه..
محمد؛ولدي كان ماطلقتهاش منك ليك بترفع عليك قضيه وكان رفعت عليك القضيه الناس لما بتسمع شن بيقولوا عليك بالذات ان ليك شهرين بس متزوج..!
عمر ماتقبلش اللي سمعه ولاأقتنع بيه..
ناض وهو يقول؛الموضوع هدا يخصني ونبي نتصرف فيه بروحي بوي معليشي..
ومشي طلع من حداه..
محمد:بطلقها تبي ولاماتبيش..
☘☘☘☘☘
"ردوا بالكم تكلموه ولاتكلموهم هما اللي يجونا ويكلمونا مش حني"
لطفي:كيف يابوي هكي بس..المراة بتقعد هكي لعند امتى؟
حسين؛يطلقها اختي ماتقعدش معلقه..
علي؛كان فات شهر وماتكلم حد نرفعوا عليهم قضيه..
يوسف؛سريب المحاكم طويل ياجدي..
علي؛كان طحنا في محامي باهي ماطولش اني نعرف..سألت كويس..
حسين:التقرير الطبي يسهلها..بس لازم طيح في محاميه باهيه مش محامي المحاميات هما اللي يقدوا قضايا زي هادي..
لطفي وهو يشبحله قال بتفكير:اخت نسيبي عبد الرؤوف محاميه كويسه..
علي:ايه صح نسيتها بكل..كان هدا نقول لأميمه تكلمها وتزيد تفهم منها..نادي عليها ياحسين..
حسين بصوت عالي:أميمه..اميمه..
"جايه شويه بس"
تنهد الحاج علي بحسرة..
وهما يشبحوله..
🍃واميمه وين جت للمربوعه لقت امها واقفه تتصنت ودموعها ينزلوا..
عرفتها خيرها مابتش تكلمها خشت طول عليهم..
اميمه:كيف حالك عمي اليوم؟
لطفي:الحمد لله يابنتي..قعمزي..
مشت اميمه قعمزت مقابلتهم كلهم..
لطفي:بنتي خلاص قرارك نهائي تبي الطلاق..
اميمه:ايه عمي..
لطفي؛باهي لو سكر راسه وماباش يطلقك؟!
اميمه:نرفع دعوى طلاق..
يوسف:عارفه ان المحاكم سريبها طويل..
اميمه:التقرير الطبي لو سلمت القاضي يحكملي بالطلاق لوطحت في محاميه كويسه..
حسين؛في بالك شي..
اميمه:صراحه هدرزت اني ونبيله حماة غرفه وقالتلي لو رفعتي قضيه ماتاخدش وقت طويل يعني اقل شي سته شهور..
لطفي:زي ماقالت سدرة اميمه ماينخافش عليها..
ابتسمت اميمه..
وهني خشت صفيه اللي ماقدرتش تتحمل تقعد ساكته وهي تشوف في حوش بنتها يخرب قدامها..
صفيه وهي تمسح في دموعها:معليشي عمي...لطفي نبي نسألك سؤال؟
كلهم كانوا يشبحولها وهما متفاجئين..
ولطفي قال وهو عاقد حواجبه؛اسألي..
صفيه؛لو بنتك مكان اميمه شجعتها تطلق هكي بسرعه!؟
يوسف؛شن تقولي يام!..
صفيه بعصبيه؛اسكت انت...
لطفي:تو نجاوبها يايوسف..يامرت خوي..بنتك اول ماخشت سألتها كان مازال تبي الطلاق..يعني كله يرجعلها هي اني مادخلتش في قرارها ولو كانت بنتي في مكانها حنشوف هي شن تبي ونوقف معاها شن ماكان قرارها وهذا اللي درته مع اميمه اللي نعتبرفيها بنتي مش بنت خوي..
صفيه؛باهي علاش ماتكلموهاش بالعقل علاش ماتقولوش ان السنة الاولى في الزواج تكون صعبه..علاش ماتصلحوش وتشجعوا فيها ع الخراب..
اميمه غمضت عيونها بملل وقعدت ساكته..
فتحت عيونها بسرعه لما تكلم جدها بعصبيه وقال..
نشجعوا فيها ع الخراب! هادي كلمه تقوليها!؟ اللي يسمعك يقول اميمه برانيه مش بنتنا..! هادي بنتي اني اميمه لابنتك ولابنت المضلول اللي ملوح داخل..
دمعوا عيون اميمه..وخوتها يشبحولها..
وعلي متابع يقول:وبنتي مانرضلهاش بالذل..
صفيه بجرأة؛كنت راضيه لمطيره!
انصدم لطفي في ردها وحسين قال؛يام!..
علي؛زي عمر زي الشامس!!؟ الشامس عمره ماوجع مطيره بكلمه دار روحه عقيم بش تقعد معاه حطها فوق راسه وين جي بيتزوج خدي اذني وهو مش ملزوم..لو عمر هدا كان في ربع الشامس رحمة الله عليه راني خديتها من يدها ورديتها غصب عنها..
لطفي؛مطيره لما اصرت ع الطلاق خدت ماتبي ياصفيه..
صفيه بإصرار:مطيره قعدت مع راجلها فوق 20سنه والناس عيبت عليها لما اطلقت..شن بيقولوا علي بنتي اللي ماسكرتش تلاته شهور!؟ فكرتوا فيها هادي!؟
اميمه؛اخر همي كلام الناس..الناس ماعاشتش اللي عشته..
صفيه؛وشن هو اللي عشتيه ياحسرة..انضربتي!..تي اني انضربت وانحرمت وانهنت وانذليت وشفت الويل وانفضحت قدام الناس ومازلت قاعده ع ذمته..
علي وجعه كلامها وشبح للطفي..ولطفي شافله وهو مضايق..
وولادها واحد منهم قعد يشبحلها بحزن وهو يوسف..
و التاني وقف عند كلمة" انفضحت قدام الناس" اللي مافهمش قصدها بيها..واللي هو حسين..
اما اميمه ناضت وقفت وهي تقول:مش مجبورة نعيش زيك يام مش مجبورة نكمل معاه وندير صغار يشوفوا في بوهم ليل نهار يهزا ع امهم وينزل من قيمتها ويمشي بكلام امه وخواته...مش حنكرر اللي عشته في صغاري يام..نقعد مطلقه والناس تدوي عليا ولانشوف اللي عشته في صغاري..
نزلوا دموعها وهي تقول..غلطتي اني ماسمعتش لجدي من البدايه وتوا مش حنسمع الا ليه هو ولصوت عقلي وبس..
ومشت طلعت من حداهم..
صفيه وهي تبكي مررت نظرها عليهم الا شيبانيها وقالت بخجل؛سامحني عمي..
ولفت ومشت طلعت حتى هي.. وخلتهم كلهم وملامح الألم باينه في وجوههم..
وعلي تنهد وقال:حسبي الله ونعم الوكيل...
☘☘☘☘☘
الساعه 12:30ليلا..
المطر كانت تصب هديكا الليله..
وطوبى تسمع في صوتها وهي ترش في زهر الياسمين على السرير..
ع خشة راجلها اللي جي من المكتب وهو يقول:باهي اللي صبت توا..
طوبى بضحكه:بالعكس تمنيتها صبت بكري وحني طالعين درنا تحتها جو..
جاها شدها وباس راسها بعدين قال:راك في ليبيا..
وقعمز ع السرير..
طوبى وهي ماشيه للزيانه قالت بضحكه:حتى في تركيا مادرناها..تذكر..
قعد يضحك وهو يقول:صح صح..
قعدت تدهن في ايديها بالكريمه..
سمعت صوت المطر اقوى من قبل..
شبحت للروشن وقالت؛قوت الله يبارك..
الجالي:غرقنا..
ضحكت وخدت الكريمه ومشتله..
وقعمزت قدامه ودارت عادتها متاع كل ليله..
خدت يده وقعدت تدهنله فيها وهي تقول:تعرف اليوم سدرة فكرتني بحاجه..
الجالي:شن هي..
طوبى وهي تشبح ليده:مش وعدتهم هي وجوري نعطيهم قطاطيس بينكا بعد تجيب..
لاحظ لمعة الدموع في عيونها وقال؛ايه..
خدت الكريمه وخدت يدها التانيه وحطت من الكريمه عليها وهي تقول:ومعروف اللي صار لبينكا..قالتلي سدرة بوها حي بيشريلها وهي قالتله لانخاف تموت زي بينكا..
الجالي قعد يسمعها وهو ساكت..
تنهدت وشبحتله وقالت: وجعتنبي..مانبيهاش تتعقد من الحاجه هادي..قررت نعطيها هي وجوري زوز من صغار بينكا الاولين اللي قاعدين عند سدرة..
الجالي:وانتي..
حركت راسها بالنفي وقالت:مانبيش..وشدت دموعها بقوة..
شد ايديها وهو يشوفلها..
هي ابتسمت ودارت حركه بأنفها وقالت:ماتحطش في بالك..
رفع يدها وقبلها...
وهي تشوفله بإبتسامه بعدين قالت:بنقولك ع حاجه..
الجالي:قولي ياعمري..
طوبى:نسرين بكري قالتلي علاش ماعزمتيش نجاه..
عقدحواجبه وقال:وانتي شن قلتليها..
طوبى:قلتلها اني عزمت العيله شيبانيا وعزوزي وسلافي وحمواتي..بس هي مالهاش صفه بش
نعزمها..
الجالي:قاعده من العيله نجاة..
طوبى:بصفتها شني!؟
قعد ساكت وماعرفش يرد..
طوبى:خوك توفى الله يرحمها معاش في شي يربطها بالعيله صغارها بس هما اللي مرتبطين بالعيله..
قعد يشبح لطوبى ويفكر في كلامها من غير مايعلق..
طوبى:ع العموم اني مانقدر نحكم في حد وليا حق ندخل باللي قاعد يصير لحوش العيله..لكن حكمي ع حوشي اني نقرر من يخشله ومن لم يخشلاش طبعا بعد اذنك..
مرر نظره ع الدار بعدين قال؛تمام..شبحلها وقال..بس في حاجه مهمه خلي علاقتك بنجاة كويسه لأنها تعز ع بوي هلبه ومايرضى فيها شي مانبيش نقولك خليها صاحبتك لكن في نفس الوقت ماتعاديهاش..
طوبى:ماعندي علاش نعاديها علاقتي بيها من قبل سطحيه وحتقعد هكي..
شبحلها شويه وقال؛ديما نقولك انتي تفاجئي فيا..مرات تكوني لطيفه وبريئة زي الصغار..ومرات تولي قويه لين تخوفي..
ضحكت وقالت؛اني نخوف؟
الجالي:قوتك اللي تطلع مرة مرة تخوف..
ابتسمت وقالت؛مش عارفه شن نقولك ماحد قالي الكلام هدا قبل بس يعني اللي نعرف نقوله ان كل حد فينا عنده اكثر من حالة ومن شخصيه وكل شخصيه حسب موقف معين يناسبها..
الجالي:قاريه علم نفس؟
طوبى :مش غير في الكليه..
قعد يشبحلها وهو يفكر بشي من القلق..
☘المراة لما تكون قويه ديما تخوف الراجل..طبعا القوة هني من بالعصبيه والعياط وقلة الاحترام..
القوة في اتخاذ القرارات..في المواقف..القوة في الاستغناء وهدا اكثر شي الرجاله اللي زي الجالي يخافوا منه..
لما تكون الانثى اللي قدامهم عندها قوة استغناء يبدوا يحاولوا بآستماته المحافظه عليها...وطبعا مش أي وحده..
المقصود هني المراة اللي وجودها في حياتهم جدا مهم☘
الجالي بنظرة حب و بنبرة هاديه:نحبك..
وهي ردت عليه بإبتسامه فيها شي من المجامله...
☘☘☘☘☘
وصابرين..
كانت مقعمزة في دارها وهي تتأمل في صور مختار وتتفكر في كلامه ونظراته..
كانت هايمه فيه..طايره في العالم متاعه..وقلبها كان ينبض بشوق لشوفته...
فكرت تتصل بيه..بس خافت من شني مش عارفه..
وفجأة..
هو اللي اتصل..
قلبها قريب طلع من مكانه..
وفتحت الخط وردت..
صابرين:آلو..
"مش قادرة تحوليني من تفكيرك"
تنهدت وقالت:نحبك..كيف وامتى مش عارفه..بس حاسه روحي نحبك..
"يابختي"
قعدت تضحك..
☘ومن مشاعر ظاهرها زي باطنها مزيف..
لمشاعر اهلكت صحابها لما عرفوش يتحكموا فيها ويوجهوها صح..
المهدي اللي ليه 17 سنه عايش في ندم..
ع لحظه ماتجيش ثانيتين ع بعضهم..
لحظه طاوع فيها كبريائه..والنتيجه عذاب ليه سنين قائم وماباش ينتهي..
وهو راقد وعاطي عائشه بظهره النوم جفاه..
يتفكر في تفاصيل يوم تمناه ماكان..
اليوم اللي سيباته فيه سدره وهو استغنى عنها..
🍃سيباته واستغنى عنها..
هل حيكرر عمر نفس السيناريو..!؟
واميمه اللي واخده قرارها ومصره عليه هل قلبها مطاوع عقلها فيه!؟
☘☘☘
وقلب آلاء كان يتصارع مع قناعاتها وعقلها..
كان يبي يقبل المشاعر الحلوة اللي جايه من مهند..
مشاعر صادقه..صافيه..وحلوة..
القلب محتاجها..محتاج لقلب تاني يحبه حق ويخاف عليه..
تسمع في مهند وهو يقول في شعر ختام الحلقه اللي كان...
🌸أَلاَ حَبّذَا..حَبّذَا..حَبّذَا
حبِيبٌ تَحَمَّلْتُ مِنهُ الأَذَى
وَيَا حَبّذَا مَن سَقَانِي الجَوَى
ونَبضاً مِنَ الحُزنِ مِنْهُ اغْتَذَى
حبِيبٌ..قَرِيبٌ لِنَبضِي أنَا
فَلَستُ لِذَاكَ ولَستُ لِذَا
🌟وتصبحوا ع خير...
حولت السماعات..وطول خشت ع رقمه وراجت شويه بعدين اتصلت..
حولت السماعات وحط التليفون ع وذنها وهي تراجي يرد..
بعد مانادى اربع مرات رد..
"ياآلو"
آلاء؛علاش طولت في الرد؟
"كنت نرد ع المعجبات"
آلاء:والآنسه لافينيا منهم؟
"ع راسهم"
آلاء:كثرت ع ماوصوها اتصالات وتقعد بالربع ساعه تقطف وفوقها رسايل..حي عليك تطلع تكلم فيها برا البرنامج؟
"شن يقولوله هدا"
آلاء؛اممم..يقولوله مانحب حد يقرب حد يخصني..
قعد يضحك..
آلاء؛ندوي جد مهند..
خشت عليها مكالمه..
حولت التليفون وشافتها بعدين راداته وقالت وهي متفاجئة وملهوفه:مهند خالتي تتصل توا اشبح شن بتقول..
"سدرة"
آلاء بنفاذ صبر:تي إييه..
"ردي بسرعه"
هي طول ردت ع خالتها سدره..
آلاء:هلا خويله..
"مع مني انتظار يافرخه؟!"
آلاء؛مع مهند والله العظيم..
"تمام..شن حالك وشن حال امك وخوتك وخيركم ماجيتوا اليوم"
آلاء:الحمد لله كلنا كويسين..عزو مريض شويه..
"خيره!؟"
آلاء؛برده عاديه..
"خلاص غدوة ان شاء جايينكم"
آلاء؛مرحبتين..
"سلمك..قتلك"
آلاء:قولي..
"اسمعي بخصوص الموضوع هداكا اللي كلمتي عليه طوبى"
آلاء بترقب؛إيه!..
تنهدت وقالت..
"قوليلهم يجوا وان شاء الله خير"
آلاء بفرحه؛حق خالتي!
نزلت اريج تليفونها وحولت الغطا وشافت لآلاء..
"ايه مالا نبصر عليك!؟"
آلاء بضحكه:ربي يكمل ع خير يارب..
"إن شاء الله..شن مايوصلك جديد كلميني"
آلاء بإبتسامه:حاضر خويله..
"تصبحي ع خير"
آلاء:وانتي من اهله..
وسكرت وهي فرحانه..
اريج:شن في!؟
شبجتلها وقالت؛خويله سدرة واقفت ع عمي..
اريج بفرحه:ياربي واخيرا الحمد لله..
وردت التليفون وهي تقول:نضوله..
"هاه شن صاير طيحتي قلبي"
اريج بضحكه؛خالتي سدرة بتتزوج خطبها الدكتور إياد ووافقت..
"لاهو قلبي توا طاح"
اريج؛نعم مافهمتش؟
"لاشي ماتحطيش في بالك ربي يكمل ع خير"
اريج:آمين..
🍃مهند؛تبصري صح!
"والله العظيم يامهند تليفوني يسجل في المكالمات تلقائي تبيني نسمعهالك"
مهند بضحكه فرح:تعرفي توا بندير جهدي بش نوصل للحوش بكري ونبشر عمك..
"رد بالك ماتجريش لاحق توصل للحوش"
ابتسم برفعة حاجب وهو يقول؛شن يقولوله هدا؟
"يقولوله مشاعر انسانيه"
مهند؛كلا انتي وحده عديمه مشاعر لاتعرفي شن هي المشاعر ولاالإنسانيه..
وقال معاها..
"برا معاش تكلمني"
هي بإنزعاج قالت وهو معاها..
"مهند مبردك"
زادت انزعجت وعيطت ..
وهو ميت بالضحك..
☘☘☘☘☘
وعدت هالليله وجي اليوم اللي بعده..
الجمعه..26يناير سنة2018
يوم الموشحات الدينيه في أغلب إذاعات الراديو..
كان المهدي في الكوجينه يشرب في القهوة وهو سرحان..
ويسمع في موشح..
"ليه ياغزالي هجرتني"
وحداه عائشه توتي في الفطور..
و تسمع في كلمات الموشح وقلبها موجوع ودمعتها محبوسه..
وحاسه بخوف..عليه..
التفتت قالتله؛تبي عجة ولاشكشوكه..
ماجاهاش رد منه..
ماكانش معاها اصلا..
قعدت تشبحله بألم..نزلوا دموعها مسحتهم طول ع لما سمعت اصوات صغارها..
محمد؛الفطور واتي يام..
عطتهم بالظهر وهي تقول؛توا بنبدا فيه كولوا بسيسه لين يوتا..
يزن:وين التمر..
عائشه:قدامك مغطي..
محمد اشرله عليك وقال؛اهوا..
قعمز يزن وعرى التمر وخدي منه..
سدرة:بابا ترا كاشيك..
ماردش عليها..
شبحوله ولاده ..
محمد؛بوي..ربت ع كتفه وقال..بوي..
استاقظ وشبحله..
محمد وهو مستغرب حالته:سدرة تكلم فيك..
شبحلها المهدي بألم ووضحت لمعة الدموع في عيونه وهو يقول:نعم يابنت بوك..
سدرة؛كاشيك بابا..
خدي كاشيك من قدامه ومدهولها..
خداته وهي تقول؛شكرا بابا..
المهدي:العفو..
محمد؛تاكل بوي؟
حرك راسه بالرفض بعدين قال؛كولوا انتم..
وخدي فنجانه وقعد يشرب..
ومحمد بعد ماكان يشبحله شبح لأمه بضيق..
بعدين غير عيونه للصونيه وخدي تمر وبدي ياكل..
☘☘☘☘
"دسه الدلع هدا لشهر العسل"
اياد :صقع عليك عندي هلبه نوزعه ع الدنيا ويفضل..
ضحك مهند وقال؛تعرف تسهف الواحد يتزوج..
اياد؛لااصبر..تريث قليلا..دعني اتزوج أولا..
مهند بضحكه:تزوج وبالذريه الصالحه..بعدين فنص عيونه وقال...حي مافكرتش فيها!
وصوت ضحك إياد كان مسموع لبرا الحوش..
☘☘☘☘
"ماتسرعتيش ولا؟"
سدرة:معاش فيها تسرع ولاتبطئ ياعمتي..ع قولتك لازم نشوف حياتي..بالك بعد نطلع من هالجو وهالحياة نولي احسن..
مطيره بإبتسامه؛يارب يابنتي يارب..تعرفي لما فتحت الموضوع مع بوك فرح ع الآخر..
ابتسمت وقالت؛عارفاته بيفرح..
مطيرة بإبتسامه؛يارب يشوف عويلتك ويفرح بيها..
سدرة وهي مبتسمه قالت:آمين..
☘☘☘☘
وقت صلاة الجمعه...
الرجاله كلهم توجهوا للجامع ماعدا واحد كان يبي يستغل الوضع هدا لشي يبي يديره..
🍃وفي شقة محي الدين الصيد..
كانت خديجه عازمه اختها وامها يتغدوا عندها..
مغليه وهي تقرا في القرآن في الصاله..
وحداها راما لاهيه بتليفونها..
كانوا خديجه ونسرين في الكوجينه يهدرزوا..
خديجه؛ماقالت الا الحق وهدا مش كلامها هي بروحها..
نسرين؛انتي مافهمتيش طوبى الشك بدي يلعب بعقلها من لما سألتني ع عطر الجالي زبط انها شماته ع هديكا وباهي اللي فهمت طول وكلمت خوك ونبهته..
خديجه هزت راسها وهي عاقده حواجبها وقالت:غير نخلصوا من مصيبة عمر بعدين نلهى بيها..شفتي السكرينات اللي بعتهم امس..
نسرين؛تستفز فيه بش يطلقها..
خديجه؛هالحقيره تلقيحها علينا حتى حني لكن باهي اللي عطيتها هديكا الطريحه ومسحت ع كبدي..
نسرين:مسحتي ع كبدك!؟
شبحتلها وقالت؛احسن اللي صار هكي اني درت خير من غير مانعرف خير مايقعد رابطنا بيها رابط هالجربة..
نسرين بضيق؛واجعني بوي منقهر علينا اني وياه هلبه..
خديجه؛ربي يعوضكم خير ان شاء الله..ويفرح بيكم ويتهنى عليكم..
نسرين بحزن:إن شاء الله...
☘☘☘☘☘
طلعت من دارها بعد ماصلت وقرت سورة الكهف..
سمعت باب الحوش يدق قالت بإستغراب:مسرع كملوا؟
ومشت خدت وشاح محطوط كرسي حدا المدخل لبساته وطلعت..
وقفت في الباب وقالت؛منو..
لارد..
استغربت اكثر..بعدين جت بتخش دق مرة تانيه..
شبحتله شويه..بعدين فتحت الباب بالشويه..
اندف بقوة وخش وسكر الباب..
هي انصدمت وخرت خطوتين وقالت؛انت كيف تخش هكي!..
عمر؛خشي بدلي وتعالي..
اميمه؛ترا اطلع برا اطلع..
عمر وهو يتمالك في أعصابه:اميمه قتلك خشي بدلي اطلعي مش رافعك للشقه حاجز في فندق نقعدوا فيه يومين بعدين نسافروا..
اميمه بتعجب:شن تقول!؟ بوعيك انت!؟
عمر:اميمه بتطلعي بإرادتك ولانطلعك غصب عنك..
اميمه؛شن تحساب روحك انت!..امشي اقلب وجهك اطلع برا..
قدملها بسرعه وشد يدها بيجبدها وهو يقول:لازم نتفاهموا لازم تسمعيني
اميمه وهي تجبد في يدها؛وربي ياعمر كان ماطلقتني نعيط ونلم عليك الشارع..
طلقها وقال بتهكم:طبعا خديتوا ع الفضايح..
اميمه بإزدراء:اطلع قتلك اطلع ماتخلنيش نكرهك اكثر من هكي اطلع..
هز راسه وقال؛تمام..تمام يااميمه..
وفتح الباب وطلع وسكره وراه..
هي شدت يدها وقعدت تشبحلها بألم ودموعها ينزلوا..
"عطشان..نبي..ميه"
التفتت شبحتله..
وهو كان يشوفلها بنظرات مثيره للشفقه..
ابتسمت بألم وقالت؛عطشان؟..وتبي ميه..!؟
بعد اللي درته فيا واللي قاعده نعاني منه لهاللحظه طامع اني حنعاملك كويس!؟ ماتستاهلش نجيبلك طاسة ميه..
ومشت بسرعه فاتت من جنبه وهي تمسح في دموعها..
هو لف بالكرسي وقعد يتبع فيها وهو يقول:نبي ميه..
وهي مشت خشت دارها وسكرت عليها الباب بقوة..
قعد واقف بكرسيه في نص الصاله وهو يقول:عطشان نبي ميه..عطشان..وبدي يدمع..دمعه تنزل ورا التانيه..وهو يقول زي الطفل..نبي ميه..
انفتح باب دارها بقوة..
ومشت وهي تمسح في دموعها بإتجاه الكوجينه..
لحظات..
وولت وفي يدها طاست ميه وهي تبكي بصمت وتمسح في دموعها وهما مصرين ينزلوا..
وقفت قدامه ومدتلها بدون ماتتكلم..
هو ماكانش يقدر يشدها كويس..
قعد يشبحلها بعجز وهو يقول؛مانقدرش..
هي شدت بكاها بقوة..وجت جنبه حطت يدها ورا راسه وقربتله الطاسه وقعدت تشرب فيه وهي تبكي بصمت..
ع طلعة صفيه من الدار بعد ماكانت تصلي فيها وتقرا قرآن..
خشت الصاله وشافتهم..
فاجئها الموقف..وقعدت تشبح لحالة بنتها وهي تشرب في بوها ودموعها سيل ينزل...
شافاته هو لقاته يبان زي العيل...
شرباته بنته من يدها..وهو عمره مادراهالها حتى في طفولتها..
تفكرت كلام اميمه امس..قلبها زاد وجعها..
نزلت من عينها دمعه..مسحتها ومشت للكوجينه..
اما هي بعد ماشرباته..
حطت الطاسه ع طاوله حداها ومشت لدارها..
خشتلها وسكرتها عليها..
وهو قعد يشوف لدارها للحظات..بعدين مشي بكرسيه لداره..
☘☘☘☘☘
وعمر مشي للفندق قعد فيه..
وهو يفكر بغضب شديد من اميمه..
المراة تبان مستغنيه بكل..وكأنها ماصدقت..
اللي صار مايخليهاش تتمسك في طلب الطلاق لهالدرجه..
الحب اللي في قلبها ليه مايخليهاش تغفرله وتعطيه فرصة يصلح اللي داره..من اول مطب تتخلى عنه وتختار الفراق!!؟
《 ماتصلحش بيك ياولدي ماتمشيش معاك ولامعانا..》
لما تفكر كلام بوه هدا تأكد انه ماانقالش من فراغ..
وقرر بروحه يعرف شن اللي خلا بوه يقول هكي..
☘☘☘☘☘
"الكل ملاحظين "
قصي وهو يكتب في ورقة خروج لحالة:لهالدرجه!؟
:هدا اللي يحكوا في المستشفى دكتور..
ضحم وقال:صحة ليك...
وقع الورقه وشبحلها وهو يقول:تستاهلي هديه..
الممرضه:هديتي انك تكوني راضي..
طلع من الدرج فلوس وحدفهم جو قدامها ع الطاوله..
هي خدتهم وقال:ربي ينولك اللي في بالك..
مدلها الورقه وقال:حطيها في ملف الحاله..
خدتها وقالت؛حاضر..
ومشت طلعت من حداه..
وهو تنهد بإبتسامه..وسرح بتفكيره في احلامه بأميمه..
🍀🍀🍀🍀🍀
يوم السبت..
27يناير سنة2018..
الساعه 11:00صباحا..
كانت واقفه بعد عن الشط بمسافه وهي تتفرج ع البحر..
وتسمع في صوته وتشم في ريحته..
كان خاطرها فيه هلبه بالذات في ريحته كانت حتموت وتشمها..
جاته طول بدون تردد...
وفي نفس الوقت استغلت الفرصه واتصلت بحد عزيز عليها اتفقت تتلاقى هي وياها في المكان هدا بش يتكلموا براحتهم...
"طوبى"
شبحتلها وابتسمت وهي تقول:ميمو حبيبتي..
وحضنوا بعد بقوة وطوبى تقول:استاحشتك هلبه..
اميمه بإبتسامه؛اني اكثر..
بعدوا عن بعض واميمه قالت:شن حالك وشن دايرة؟
طوبى:الحمد لله اهو عايشين..وانتي؟
اميمه:ع قولتك عايشين الحمد لله..
طوبى:ضعفتي..
اميمه قعدت ساكته وهي تشوف للبحر ودموعها في عيونها..
طوبى:مازال تبي تطلقي..
اميمه:واكثر من قبل..
طوبى:متأكده!؟
شبحتلها وقالت:طوبى من جدك تبيني نقعد معاه بعد اللي صار؟!
طوبى:اهدي شويه واسمعني عجبك كلامه خودي بيه ماعجبكش لوحيه ورا ظهرك كأنك ماسمعتيشي.
تنهدت وهي تشوف للبحر بعدين شبحتلها وقالت؛نسمع فيك..
طوبى:انتم سبب مشاكلكم من العيله..من خديجه وعمتي نشوف ونسمع ياأميمه وعارفه كل شي..وياما منكم مروا بنفس حالتكم وكانوا حيطلقوا لكن لما شاروا عليهم يعيشوا بعاد ومعاش يدخلوا حد بيناتهم حياتهم تغيرت للأحسن ودارو صغار وعايشين احلا عيشه..هادي قصة اخت بنيه تقرا معاي..
اميمه؛الظروف تختلف ياطوبى بتقيسيش اللي مر بغيري عليا كل قصة وظروفها..
طوبى:لكن زي في الحب..هما لأنهم يحبوا بعض ماقدروش يفرطوا في بعض وعطوا بعض فرصه تانيه..اخت صاحبتي توا تقول الحمد لله اللي ماشديتش في الطلاق مش عارفه كيف كنت حنعيش من غيره..
اميمه؛نقدر نعيش من غيره ياطوبى..بيبو حبيبتي الحياة مش راجل بس لازم الوحده تتعلم تكتفي بذاتها وتستغنى عن وجود غيرها..
طوبى:قصدك الوحده حلوة..ان مايكونش عندك نص تاني يحبك ويخاف عليك ووقت اللي تضعفي يقويك والعكس..
لو البنادم يقدر يعيش بروحه يااميمه راهو ربي خلا سيدنا آدم يعيش في الجنه بروحه..
غيرت عيونها عنها وشافت للبحر وهي ساكته..
طوبى:اني مش جايه نتفلسف عليك انتي في النهايه اكبر مني وتعرفي اكثر مني..بس اني خايفه عليك بعدين تندمي وتقولي ياريتني..راهو الحكايه مش في عمر بس حني عايشين بين ناس ياأميمه تجاهلناهم ولالا هما موجودين وحيدووا ودتهم ماضرناش حني بروحنا..
شبحتلها بعدين ابتسمت وقالت:شوفي طوبى حبيبتي..كلامك حلو ومنطقي..بس مش ديما صح..في حاجات في الحياة تعيشيها انتي بروحك مايعيشها معاك حد ولايتمنى يعيش معاك حد لاقريب ولابعيد..لو انتي قبلت وضع سيء ع خاطر غير ماينضروش ويوصل فيهم كلام الناس..انتي بس اللي حتخسري صحتك وراحتك النفسيه واحلى سنين عمرك..وبعدين بعد مايفوت الأوان تقولي ياريتني يا طوبى..ياريتني هادي اوعر من ياريتني اللي انتي قلتي عليها..
طوبى قعدت تشبحلها وهي مضايقه ومش مقتنعه هلبه بكلامها..
اميمه بإبتسامة؛ان شاء الله مايجيك يوم تقولي فيه ياريتني هادي ياطوبى..
عقدت حواجبها وقالت؛علاش؟!
اميمه:ندعيلك عادي مش قاصده شي محدد..ونبي نعطيك نصيحه من اختك الكبيره..لو جاك يوم وحسيتي ان في حد بيتعدا ع كرامتك..ماتفكري في حد الا نفسك وكرامتك احميهم..صدقيني البنادم اللي يقعد من غير كرامة يعيش عمره كله زي الميت..
طوبى وهي تشوفلها كانت تفكر في كلامها وحست انها تبي توصللها رساله منه..وشعور الخوف عبا قلبها وبسببه وقفت تفكير في كلامها وقالت..ربي يجعله الخيره في اللي اخترتيه..
اميمه؛آمين..ويحفظك ويحميك بيبو..
ابتسمت طوبى وجتها ضمتها..
واميمه حضنتها وهي تمسح ع ظهرها وشاده دموعها بالسيف..
بعدين بعدوا عن بعض..
ضحكت اميمه وهي تقول بإستغراب:شن جابك للبحر في الصقع..
طوبى:جيت خاطري فيه نضت الصبح نشم في ريحته ماقدرتش نقاوم كلمت الجالي وقعدت نزن بش خلاني نمشي بروحي..
ابتسمت اميمه وشبحت للبحر وهي تقول؛تصدقي البحر في الشتي احلى..
شبحت طوبى للبحر وابتسمت وهي تتأمل فيه..
☘☘☘☘☘☘
"متخصصة باطنة جهاز هضمي هادي ياعيشه"
عائشه؛خلاص ابعتيلي رقم العياده اللي تخدم فيها..
"تمام سكري ترا"
سكرت عائشه من مرت خوها وهي تراجي في الرساله..
وصلتها..
نسخت الرقم واتصلت بيه طول..
نادى مرتين بعدين انفتح الخط..
عائشه بشي من التوتر:السلام عليكم..
"وعليكم السلام تفضلي"
عائشه؛عياده الحكيم ولا..
"ايه اختي تفضلي"
عائشه؛بنسأل عن الدكتورة نوال الحشاني امتى تكون موجوده..
"اليوم الساعه 3..وغدوه الساعه 11 الصبح"
عائشه فكرت شويه بعدين قالت؛بنحجز لغدوة إن شاء الله..
"تمام عطيني اسمك"
عائشه:عائشه جويده الهادي...
☘☘☘☘☘
"الحالة اللي بعدها وبعدين ناخدوا راحه"
اريج وهي ترتب في الادوات:كويس خل نقرالي صفيحه من الشيت.
ضحكت الدكتورة..
دق الباب..
قالت الدكتورة؛تفضل..
انفتح الباب وخش عليهم واحد وهو يقول:السلام عليكم..
الدكتورة قالت:وعليكم السلام..
التفتت اريج وهي تقول:وعليكم السلام..
بس وين شافاته انصدمت...
هو ابتسم وقال؛جاي نبي نكشف..
الدكتورة؛تفضل قعمز..
:شكرا..
ومشي قعمز مقابل الدكتورة..
واريج تشوفله وهي مصدومه ومتوترة في نفس الوقت..
سألاته الدكتورة كم سؤال وهو جاوب عليها..
بعدين قالت:خل نشوفوا وضعهم عن قرب..تفضل استاذي..
هو ناض ومشي قعمز في مكان الكشف..
لبست الدكتورة الكمامات وقربت منه وهي تقول:اريج..
اريج مدتلها وحده من الأدوات وهي تشوفله بتوتر..
والدكتور نزلت الاضاءة ع فمه..
وقالت:افتح فمك..
فتحه وهو يشوف لأريج بطرف عينه..
وهي مازالت تشوفله بتوتر..
غير عيونه عنها وشبح للدكتورة لما قالت؛اسنانك واللثه متاعك مثاليات مافيهمش ولا مشكله الله يبارك..
حولت الضي ووخرت وهي تقول:مش مستحق لشي..
خدت اريج الاداة اللي استخدمتها الدكتورة ورمتها في القمامه وعيونها عليه..
هو ناض قعمز وقال:بصراحة اني مهتم هلبه وبصراحة اكثر مش جاي نكشف..شبح لأريج وقال..جاي نشوف بنت اختي مرتاحه في خدمتها هني ولالا..
التفتت الدكتورة وشبحت لأريج..
واريج تشوف لمختار بنظرة باين فيها التوتر وهي تتسائل عن السبب الحقيقي اللي خلاه يجيها اليوم لمكان خدمتها..
☘☘☘☘☘
وبعيد عنهم في فندق من فنادق العاصمه..
طلع عمر منه وهو ناوي يمشي لمكان خدمة مرته..
وين جاته سيارته وركبها..
وصلاته رساله ع التليفون..
طلعه من جيب البالطو وفتحها..
ضيق عيونه وهو يقرا فيها..
(وين هايم ياكابتن ومسيب المدام لهدا وهداكا)
رقي الدم لراسه..
ووصل لأقصى مراحل الغضب...
لوح التليفون جنبه وطول تحرك بسيارته وهو يحرق في العجل..
🍃واميمه في هالوقت..
واقفه ع قصي ومعاهم دكتور تاني يتناقشوا بخصوص حالة دارلها قصي عمليه امس..
قصي؛حيقابلوك الحالات اللي زي هادي القدام هلبه..
اميمه:المشكله مرات الواحد تحت الضغط النفسي من الخدمه يفش غله في المريض المستفز..
قصي:لا انتي مانتوقعش ان الضغط النفسي يأثر عليك..
:جديات دكتورة بالك وتسايري هلبه..لوكنتي مع الحاله اللي امس راك سايرتيها وخدتيها ع قد عقلها..
اميمه بضحكه:لامش لهالدرجة اني كان تلفوا عصابي معاش تعرفني..
:معناها ياريتك كنتي معاها امس..اللي زاد طينها دكتور اختها تقوللها ايه ايه حطي صبعك في فمك بش ترجعيه كله..
ودار حركة انفعاليه بإيديه
ضحكوا عليها اميمه وقصي..
🍃ع وصلة عمر اللي دلوه ع مكانها..
وين شافها كيف واقفه تهدرز وتضحك ولاع بالها وواخده راحتك وكأنها مش ع ذمة راجل..
استحقرها...وكرهها...وفهم معنى كلام بوه..
فهم انه ياجاها للمستشفى يابعت من يراقبها وشافها في نفس الموقف..
التصرف المتوقع من عمر في هالحاله..
يثور بغضب ويهجم عليه ويقعد يخبط ويعيط..
او انه يجيها هي يجبدها من حداهم ويقعد يهزب فيها ويطلعها من المستشفى..
بس عمر مادارش هكي..
عمر لف ومشي وكان ينحرق بغضبه بروحه..
وكلام هلبه يتردد ع مسامعه وفي عقله..
《 ماتصلحش بيك ياولدي ماتمشيش معاك ولامعانا..》
《 مغليه:بش نقولك ياحاج المراة هي مش مزبوطه وشكلها مبيته النيه تطلق من قبل ماتصير مشكله هدا علاش دست..
عمر شبحلها وهو مصدوم..
محمد:لامش معقوله مش للدرجه هادي يامغليه..!
مغليه:انت ماتعرف شي ياحاج ياما صار بينها وبين عمر ع خاطر حكاية الخدمه لما لقت روحها بتتقيد قالت نطلق خير بش تاخد راحتها تطلع امتى ماتبي وتروح امتى ماتبي..》
《 انت تشوف فيا مريضه بعقده النقص..واني نشوف فيك مش مناسب ليا لا انت ولاعيلتك..》
طلع من المستشفى وركب السيارة..
سكر الباب بقوة وهو يتنفس بصعوبه من الغضب ودموعه في عيونه بعدين هز راسه وشغل السيارة وتحرك طول...
☘☘☘☘☘
"ايوه ماما بنطلع توا ناخد الحاجات الناقصه"
فايزة:تمام حبيبتي لما تروحي كلميني..
"تمام..سلام"
سكرت فايزة وحطت تليفونها في جيبها وقالت؛توا حبيبتي بتجي المصورة تاخدلك كم صورة..
المودل؛تمام..بس بنقولك حاجه مدام فايزة علاش ماتسافريش للبنان وطلعي شغلك برا؟
فايزة بإبتسامه؛جتني عروض من غادي بس للأسف مانقدرش نسافر بروحي لازم يكون معاي راجل واني زوجي متوفي وماعندي حد ينفع يسافر معاي..
:خسارة الحق والله حرام تقعدي هني انتي..
فايزة بإبتسامه؛لو عندي نصيب في حاجه نوصلها ان شاء الله..
:إن شاء الله..
☘☘☘☘
سكرت البالطو وهي تقول:مروة حاطه فاصوليا ع النار مرة مرة شوفيها..
مروة من الدار..
"باااهي"
مشت صفاء للباب لبست في رجليها..
وفتحت الباب وطلعت وسكراته وراها..
نزلت لوطا وطلعت برا الحوش..وسكرت الباب..
لما طلعت..
شافت اشرف واقف مع واحد من ولاد الشارع يهدرز هو وياه..
ارتبكت وتوترت..
حطت ايديها الزوز في جيوب البالطو متاعها ومشت بإتجاه السوبر ماركت اللي في اخر الشارع من الجهة التانيه..
اشرف وهو يهدرز بالصدفه عيونه جو عليها قال اللي قدامه؛باهي بعدين نتلاقوا في القهوة ونتفاهموا...تم؟
:خلاص تم..اوينا..
ومشي ع حاله..
واشرف لحق صفاء..
كان وراها بمسافه..يراقب فيها كيف تمشي..
زي ماتعود عليها تمشي بإحترام ومادورش بعيونها هني وهني..
وين قربت توصل للسوبر ماركت قعدت تتخطا في برك الميه الصغير..
ابتسم ع جنب وهو يشوفلها..
لين وصلت في الباب وخشت..
🌸السوبر ماركت اللي يخدموا فيه كلهم بنات..
وصاحبه راجل مرة وحده يجي يراقب في حركة البيع..
صفاء:سلام رزان..
:ياهلا بصفو...جايه تبضعي..
صفاء بإبتسامه؛ايه..شن جوك؟
:والله ماشيه ياصفو حال تعب..
صفاء:ربي يعاونكم..
: يارب..انتي شن جو قرايتك..
صفاء:الحمد لله تمام..
:موقفه يارب..
صفاء؛اجمعين..ومشت خدت سله بش تلم فيها البضاعه..
واشرف خش وراها..
قعد يدور بعيونه عليها لين شافها..
واللي شاده الكاصه مركزة عليه..
🌸وصفاء تمشي وتشوف في البضاعه..الحاجه اللي بتجي تاخدها لازم تقرا عليها من وين جايه والصلاحيه متاعها..
واللي تكون بالمواصفات اللي هي تبيها تاخدها..
وقف ع صف العسل..
كانت محتارة شن تاخد المعروض قدامها اشهر انواع العسل..
فجأه..
شافت حد خدي نوع معين وقاللها:هدا احسن شي..
هي لما شافاته..
قريب داخت..
ارتكبت هلبه ..ووجهها احمر كله..وقلبه ينبض بسرعه..
خلاته ومشت..
هو ابتسم ولحقها وقال؛اني مش متاع هدرزة ودوة فاضيه اسألي عليا وتو يقولولك من هو اشرف الصيد..
وحطلها الفازو في سلتها..
شافاته وهي قريب اطيح من طولها..
وهو فات من جنبها ومشي طلع من السوبر ماركت..
وقفت في مكانها وغمضت عيونها وخدت نفس بعدين طلعاته..
فتحت عيونها وكملت تشري..
لين خدت البضاعه اللي تبيها..
بعدين مشت بتخلص..
؛اشرف الصيد لاحقك صح؟
صفاء بتوتر:ياوخيتي فجعني..
ضحكت وقالت:شكله حاط عليك العين..
تحشمت صفاء..
؛هو صح كبير عليك شويه لكن شاب محترم ماشاء الله عليه صاحب خوي..
صفاء هزت راسها بدون ماتعلق عليه وقالت:قداش؟
ابتسمت وقالت؛120دينار..
طلعت صفاء الفلوس وعطهولها..
وخدت الكياس ومشت طلعت من السوبر ماركت..
لقاته واقف بعيد شويه يتكلم بالتليفون..
لما شافها رجعت توترت وارتبكت تاني..
قعدت تمشي بسرعه..
وهو نهي المكالمه وقعد يمشي وراها بمسافه..
لين وصلت للحوش وخشت.
هو تنهد بإبتسامه خفيفه ومشي طول لحوشهم..
🍃ع خشة سيارة عمر للشارع..
كان جاي يجري..
درس قدام حوشهم وهو يحرق في العجل..
بعدين نزل وخش للحوش طول.
☘مغليه داخل كانت مقعمزة في دار المعيشه وحداها سدرة..
سدرة:ايه ترجع مرات وبابا يقعد يعارك فيها ويقول معاش تشربي قهوة ومعاش تاكلي حار..
مغليه في نفسها"لاهادي مش حامل مريضة في معدتها زي قبل"
"يام"
انفجعت مغليه وقالت:اللطف!
سدرة:عمو عمر!..
"وينك"
مغليه:هني في الدار..
شويه وخش عليها..
شاف سدرة هدا من نفسه شويه وقال:معليشي حبيبتي نبي حناك بروحها..
سدرة؛باهي..وناضت ومشت طلعت من حداهم..
هو سكر الباب وقدم لأمه وهو يقول؛بنطلقها..
امه قعدت تشبحله وهي ساكته..
عمر:كلام نهائي..
هزت راسها وقالت:-احسن مادير..
هز راسه وهو يتنفس بعصبيه بعدين لف ومشي طلع من الدار...
ارتسمت ع وجه مغليه ابتسامه بعدين قالت:سدرة جيبيلي تليفوني من الشحن..
~~~~~~~
"احسن حاجه جت منه هو..بس يما هو توا مايقدرش يطلقها بيراجي شويه وانتي تعرفي علاش..خايفه يغير رايه"
مغليه؛اني ليا نفكر فيها..زمان يقولوا اللي بيطلق قبل ليطلق لازم يخطب بش يكون فال خير عليه..
"اما انتي يام صحة لهالدماغ الجبار الله يبارك..بس يام من قال هو يرضى"
مغليه؛اني نعرف كيف نخليه يرضى...
"المهم المرة هادي بنتختاروا صح"
مغليه؛لااخترت خلاص..بنت خالك محرز..
"دنيا...ظفرها بعشرة من اميمه غير بختها بالهون.."
مغليه؛ماتقوليش هكي..قولي ربي رايدلها الأحسن.
"ان شاء الله ربي يعوضهم ببعض"
مغليه؛آمين..
☘☘☘☘☘☘
طفت ع غداها وهي تتكلم بالتليفون قالت..
طوبى بفرحه:دقيقه خل نزغرط..
"زغرطي"
وقعدت طوبى تزغرد..
ع خشة الجالي للحوش سمع زغاريدها ضحك بإستغراب..
🍃طوبى؛هالنهار تمنيته..طلبت العالي ولقيته..
هالنهار عليه ندور..هالنهار ربيعه نور..
يامبروك ع وخيتنا اللي دارت فرح ولمتنا..
بضحكه قاطعتها تقول..
"غير يولد ويسموه"
طوبى بضحكه:لاخلاص ولد وسموه..
واه يامحلا القسميه..طرابلسي مع ترهونيه..
خش عليها الجالي وقعد واقف في الباب يشوفلها ويسمع فيها...
"فرحانه هلبه فرخة طوبى"
ردة عليها بنبرة فرح وهي تقول:وخيتي الكبيره وروحي بتتزوج ماتنبيش نفرح..
"يارتيله انتي اللي شقلبتي دماغي"
طوبى:واحلى تشقليبه..وحطت يدها في نصها والتفتت شافت الجالي واقف..ابتسمت وبعتتله بوسه طايره..
هو تفاجئ بحركتها كانت جريئة..ضحك وردهالها..
"خلاص رتيله اهو خبرتك بري شوفي حالك"
طوبى بضحكه؛باهي..ربي يكمل ع خير ياعمري سلام..
"سلام ياعيوني.."
سكرت سدرة..
وطوبى نزلت تليفونها ومشت تجري للجالي وهي تقول؛حضن حضن حضن..
قدملها وهو يضحك..
ضماته وهو حط يده اليسار عليها لأنه باليمين كان شاد الشنطه وقال:خير شن اللي مفرحك لهالدرجه؟
بعدت عنه وهي شاداته وقالت وهي تشوفله:سدرة انخطبت..
الجالي حاول يحافظ ع ابتسامته ع قد مايقدر وقال:بالله!.
طوبى؛والله للدكتور اياد..
الجالي:اها..كويس الدكتور اياد..ربي يكمل ع خير؟
طوبى:امين يارب..وضماته تاني وقالت..بنطير من الفرحه..
الجالي؛واني بنموت من الجوع..
بعدت وهي تقول:بعيد السو عليك يامدعبل..برا اركب بدل وانزل تلقى الغدي واتي..
الجالي؛شن درتي؟
طوبى؛كسكسي حبيبك..
الجالي بإبتسامه ساحره:انت حبيبي ياقنين..
قعدت تضحك..
وهو مشي طلع من الكوجينه وهو مبتسم..
☘فرحة طوبى بسدرة لاتوصف..اكثر من فرحة سدره بيها هي لماتزوجت..
فرحة طوبى كانت بزياده عن أي اخت تفرح بأختها..
لأن اخوتهم وضعها خاص..
ماهيش زي اي اخوه عاديه..
علاقة تضحيه وإيثار..
وحده ضحت بأحلى سنين شبابها بس تربي التانيه..
والتانيه خدت قرار ماكاننش مقتنعه بيه من داخلها بس عشان اختها تشوف حياتها وتعوض مافاتها..
امنية طوبى الوحيدو في الحياة انها تشوف اختها عايشه حياة طبيعيه زيها زي كل البنات..واخيرا تحققت هالأمنيه..
🌼فرحة طوبى..
انعكست ع سدرة..
خلتها حتى هي تفرح..وتتفائل..وتحس انها خدت احسن قرار في حياتها لليوم..
مش ع خاطر ع حد..ع خاطر نفسها وبس..
🌼تربط في حزام البالطو وهي تشوف في شجرة الياسمين بإبتسامه حلوة..
بعدين حولت عيونها عنها وشافت للفل..زادت توسعت ابتسامتها بعدين ضحكت..
"طالعه؟!"
التفتت لعمتها وقالت؛ايه قداش ليا ع المطحن ماشيه بنشوفه..
مطيره:بوك بكري قال الزباين خاشين طالعين من ورا الدعايه اللي دارها مهند..
سدرة بضحكه؛قعدت تجي في كل وقت مش غير برنامجه..
مطيرة:ربي يحفظه هالوليد مايدير كان الحاجه اللي تفرح..
سدرة ابتسمت وهي ساكته..
تنهدت مطيره وقالت؛شكلي بنشد المطحن بعد تتزوجي معاش عندي شي نديره بعد فردوس وصفيه بطلوا خدمه..
سدرة؛قتلك قبل خدمي معاك بنات من شارعنا هلبه يدوروا في الخدمه بالريق اليابس..
مطيره:تو نفكر ونشوف شن دير..
هزت سدرة راسها وقالت:خل نمشي توا ماتبي شي..
مطيره؛سلامتك ياحنه بنمشي لحوش جدك..
سدرة؛تمام..
🍃في نفس الوقت..
في القهوة..
كانوا ربيع وعبد القيوم مقعمزين ع وحده من الطاولات ويهدرزوا.
ربيع؛بالك صارتلهم ظروف ماتعرفش..
تنهد عبد القيوم وقال بضيق وشي من العصبيه؛مبررات مش مقتنع بيهن ماتقولهنش..كل شي واضح ياربيع...
ربيع وهو يشوفله بضيق يبي يحاول يخفف عنه قال:هما الخاسرين..
عبد القيوم:لاوالله انا اللي خاسر..
ربيع؛ماتزيدهاش ع روحك عاد...
بدت ع وجهه ملامح الاستياء الممزوجه بالعصبيه بدون مايتكلم.
وربيع يشبحله وواجعه حاله يبي يواسيه ومش عارف كيف..
سبب الرفض معروف برغم انه سبب تافه ويعبر عن سطحيو عقول بعض الناس...الا انه مؤذي جدا..
عبد القيوم؛نصيب..وزع نظره ع الشارع وقال..نصيب..شبح لربيع وقال..تعرف..ضاقت عليا طرابلس الواسعه..مش طايق نقعد فيها..
ربيع وهو مضايق:ماتقولش بتولي للكفره..
عبد القيوم:ماليش غيرها..
فجأة..
انفتح باب حوش لطفي..
شبحله وربيع حتى هو شافله..
لقوا سدرة طالعه منه وماشيه للمطحن..
تنهد ربيع بضيق..
وعبد القيوم شبح جهة مطحن عيت شنيبه..
🍃اللي كان مقعمز فيه المهدي..
لما شافها طالعه..
ناض وقف..ومشي طلع ووقف قدام المطحن وعيونه عليها..
ربيع وهو يشوفله؛كل واحد بهمه..
تنهد عبد القيوم وقال: يفرج الله..
🍃وعيون المهدي ع سدرة..
اللي كأنه يفصله عندها محيط...
مش طريق طول المسافه متاعها ماتتعداش كم خطوه ينعدوا ع اصابع اليدين والرجلين..
🌸وهي خشت للمطحن وقالت بإبتسامه..
السلام عليكم..
كلهم ردوا؛وعليكم السلام..
سدرة؛يعطيكم الصحه..
:سلمك..بارك الله فيك..
وخشت تشوف حركة البيع والحسابات..
زي أيام زمان...
وعيون مهدي اللي تلمع بالدموع عليها...
🍃وفي حوش بوه..
تحديدا دار عمر ونضال..
مغليه:المراة مسكينه طاحت في عيلة معفنه يبوها تخدمهم ليل نهار واللي كان واخدها ماعنداش كلمه مع ماليه حاكمات فيه الاناثي...صبرت وقالت بالك يتغير مع الوقت وهو زاد بلي ع بلاه سيباته وطلبت الطلاق واطلقت..
عمر يسمع فيها وبين عيونه اميمه وهي تضحك مع الدكاترة..
ويرن في وذانه كلامها لما قالت..
《 واني نشوف فيك مش مناسب ليا لا انت ولاعيلتك..》
شبح لأمه وقال؛غدوة بروا تكلموا فيها..
ابتسمت مغليه وقالت؛هالنهار المبارك اللي فيه بنت اختي بنت خوي بتولي كنتي..
عمر:غدوة يام..
مغليه؛حاضر يما حاضر..خل نمشي نقول لخواتك..
عمر؛ماتمشيش من غير خديجه..
مغليه بفرحه؛اكيد وليدي اكيد مالا شنو وخيتك الكبيره هادي..
وناضت ومشت طلعت بسرعه..
وهو اللي كان الغضب عامي عيونه..
شبح للروشن وهز راسه وهو يقول؛تو تشوفي شن ندير فيك تو نوريك انتي شن يناسبك واني شن يناسبني يابنت عبد المطلب..
☘☘☘☘☘
"ماشاء الله من امس لليوم بعتوا كميه كبيره"
؛بعد الدعايه ياأبله معاش لحقنا اهو زي ماتشوفي..
ابتسمت سدرة وهي تشوف في اكياس القهوة بأنواع مختلفه...
"السلام عليكم"
🍃قشعريرة...
نبرة الصوت اللي القى بيها السلام خلاها تحس بقشعريرة..
وقلبها بدي يرجف...والدموع عبوا عيونها..
نبرة الصوت هي اللي دارت هدا كله..
نبرة صوت..اول مرة تسمعها طالعه منه..
تماسكت بكل قوتها ودارت روحها عاديه..
وكل من في المطحن يسرقولهم في النظر..
واللي برا المطحن كذلك..
جماعة المطحن متاعه هو وع راسهم محمود اللي يخدم في المطحن من اول مافتح وكان شاهد ع قصتهم..
نضال من قهوته..
عبد القيوم وربيع..
وولاد الشارع اللي شهدوا ع قصتهم
زي اشرف...
واللي سمعوا بيها سمع...زي اللي من عمر محمد ولد المهدي..
ومحمد نفسه..
كلهم كانوا يشبحوله وهو واقف في باب المطحن..
🍃هي شبحتله وقالت؛وعليكم السلام..
مرر نظره ع المطحن وحركة البيع وقال؛الله يبارك نفعتكم الدعايه..شبحلها وقال..تنصحينا نديروا دعاية حتى حني؟
سدرة؛الله يبارك القهوة متاعكم ماتبيش دعايات اشهر من نار ع علم..
المهدي: قهوتكم انتم اطعم..
سدرة؛يقولوا فيها...اللي يشرب منها مايقدرش يخليها..
قعد يشبح لعيونها بنظرات..
كانت توجع في قلبها لأنها فاهمه هما شن يحكوا..
بس قعدت محتفظه بملامح وجهها البارده..
هو قال؛بنشري منكم..زيي زي هالناس اللي غرتهم الدعايه..
سدرة ابتسمت وقالت؛شن تبي بالزبط؟
المهدي؛من كل نوع..
هزت راسها وقالت؛حطوله كيس من كل نوع..
؛حاضر..
وقعد واحد من اللي يخدموا في الطحن ياخد في كيس من كل نوع وسدره وتشوفله..
وهو يشوف لسدرة..وروحه حاسها بتطلع..
سدرة:تمام..جيب جاي..
عطاها الكيسه متاع المطحن اللي كانت معبيه اكياس قهوة وجاته بيها وقالت:100دينار...
خداها منها..
وطلع تزدانه من جيبه ..
وخدي منه الفلوس اللي فيه 100ومدهولها..
هي مدت يدها بش تاخدهم..
حط فيهم فلوسهم وهو شادهم وقال بصوت مسموع ليهم هما بس؛ربي يكملك ع خير..
شبحتله..
ابتسم بألم وقالت؛تستاهلي تعيشي احسن عيشه..ربي يهنيك..
وطلق الفلوس في يدها وحط تزدانه في جيبه وقال بصوت عالي شويه:ربي يعاون..السلام عليكم..
ولف ومشي طلع...كان يمشي وهو مش حاس بخطوات رجليه..
والشعور المؤلم اللي حس بيه لايوصف..
وعيون الكل عليه..
واللي مركز عليه اكثر شي..عبد القيوم..
لين مشي للحوش ومعاش بان عليهم..
ربيع شبح لعبد القيوم ورفع حواجبه بعدين نزلهم..
وعبد القيوم بعد ماكان يشوفله غير عيونه عنه وقعد يشبح للفراغ..وهو حاس بألم يشبه للي يحس بيه المهدي..
🍃اما نضال ركز بنظره ع محمد..
لقاه يلم في طاوله زباين كيف طلعوا..
وملامح وجهه باين فيهم الضيق..
تنهد..بعدين مشي خش داخل..
🍃وهي..
بعد مامشي جتها هديكا الحاله..
قالت:السلام عليكم..ومشت طلعت من المطحن والعيون عليها..
لين خشت وصلت في حوشهم وفتحت الباب وخشت...
سكرت وراها الباب.
ومشت للكوجينه وهي شادة الفلوس..
شاده عليهم بقبضة يدها بقوة..
لعند ماوصلت في الطاوله والكراسي..
قعمزت ع كرسي فيهم..
وشدت راسها وهي تاخد في انفاسها بسرعه..
حست بشي قعد يرقى من رجليها لين قرب يوصل لراسها بعدين هبط شويه شويه..
ورجعت زي ماكانت..
شافت ليدها..والفلوس فيهم...
فتحتها شويه وهي تشوفلهم وتتفكر في كلامه..
《 تستاهلي تعيشي احسن عيشه..ربي يهنيك..》
غمضت عيونها بشده والدموع نزلوا منهم..
وفجأه..طلعت عبرة بكي بشهقه تشق القلب..
نزلت راسها ع يدها وانهارت بالبكي...
تبكي بالعبره..بكي وكأنها كانت داساته لسنين وهدا وين طلع...
🍃🍃🍃🍃🍃🍃
الساعه 12:30ليلا..
في المطحن بروحه..
جنبه رسايلها مفتوحات..
وقدامه مذكر كان يكتب فيها..
(لاادري كيف صمد هذا القلب المتعب بعد ذلك..كيف له ان يستمر في النبض!؟..ماذا الذي جعله يستمر في مجاهدة هذا العذاب..
لااظن بأن فراق سلطانته بات عليه هينا..ولكني اظن بأن هناك ماجعله يقاوم ويستمر...ماهو لاأدري)
🍃🍃🍃🍃
(لما كنت نقول ان هالبني آدم يجري في دمي ماكنتش نبالغ..
برغم هكي مش حنتراجع عن القرار اللي خديته لأنه صح..
الحب مش كل شي..في هلبه حاجات اهم منه وهادي اللي نبيها..
ممكن ماننساشي اول حب ومافيش تاني بعده في حياتي لتوا..لكنه حيحخف مع الوقت ويقعد مجرد ذكرى..
لحظات بحلوها ومرها عبرت في حياتي ومرت..)
🍃🍃🍃🍃🍃
(اعتقد..لااعتقد..بل اجزم..بأني كما عشت احبها...سأموت وانا احبها...فإن كنت اسبح في مجرى دمها كما تقول..
هي الروح التي احيا بيها..ولاحياة لي الا معها...
خدي نفس...ومسح دمعه نزلت من عينه بقوة..
وبدي يكتب في أبيات شعر...
ﺃَﻻَ حبّذا ..
حَبيبٌ تَحمَّلتُ ﻣِﻨﻪُ ﺍﻷَﺫَﻯ ..
ﺑَﻜَﺎﻩُ ﻓُﺆَﺍﺩِﻱْ ﻭَﻟَﻴْﻞُ ﺍﻟﻬَﻮَﻯ..بَكتهُ ﺍﻷَﻣَﺎﻧِﻲ ﻭﺷﻮﻕٌ ﻫَﺬَﻯ
ﻭَﺿَﺎﻋَﺖْ ﺩُﺭُﻭﺑِﻲْ ﻭَﺿَﻴّﻌْﺘُﻪْ..ﻭخطو ﺍﻟﻔُﺆﺍﺩِ ﺧُﻄﺎﻩُ ﺍﺣْﺘَﺬَﻯ
تَظَاهَرْتُ ﺃَﻧّﻲْ ﺗَﻨَﺎﺳَﻴْﺘُﻪُ..ﻭَﺃّﻥَ ﺍﻟﺤَﻨِﻴﻦَ ﻟﻪُ اُستُنْفِذا
ﻓَﻐﻨّﻰ ﻓُﺆَﺍﺩِﻱْ ﻭَﻧَﺎﺩَﻯ ﺍﻟﻬَﻮَﻯ :
ﺃَﻻَ ﺣَﺒّﺬَﺍ .. ﺣَﺒّﺬَﺍ .. ﺣَﺒّﺬَﺍ
حبيبٌ تحمّلتُ منه الأذى ..
#يناير_30
#طوبى
…يتبع…