▪أصبحنا وأصبح الملك لله▪.
فاقت بكري قبل منهم وجدات ليهم الفطور كولهم ووجدات ليه هو فطورو الخفيف كيما طلب منها وبمساعدة لالة نجمة قدرات تعرف شنو بالضبط تصاوبليه على حسب داكشي لي كايبغيه.
هي كاتجمع فالدار وتوجد فالغدا وهو رجع من الرياضة ودخل ياخد دوش....حفظ سميتها وبدا كايعيط ليها بيها بين كل الثانية وختها حتى قهرها.....فاللول عيط ليها باش تجي تمد ليه الفوطة حيت نسا مادخلهاش معاه..... وعيط ليها باش تطلع ليه فطورو حيت مابغاش يفطر لتحت.... فطر وعيط ليها تاني جابت ليه كاس دالما ونزلات البلاطو...شوية عيط ليها من التحت باش تسد عليه البالكون حيت مسند مافيهش لي ينوض....شوية عيط ليها تسد عليه باب البيت...عارفاه كايديرها بلعاني وصابرة ومعافرة..... بعد شوية نزل كايساري عينيه على الدار وماعرفش علاش حس باللي النقاوة ولات عندها ريحة ...وقف وسطها داير يديه فجيابو وعللا صوتو معيط ليها.
" أريناااس".
فرمشة عين كانت حداه فيدها كاسو دالقهوة.
اريناس: هانا اسيدي.
شاف فيدها عرفها كاع مانساتها وسكت شوية فحالا كايفكر قبل مايهضر ...كايقلب ليها على خدمة ... تم متنقل لبرا خارج للجردو وهو كايقول.
" مابقيتش باغي قهوة...شوفي ليا بزربة واش جاني شي ايمايل".
نجمة لي كانت مقتاعدة فوطوي فالمرح حركات راسها بلا حول ولا قوة الا بالله ونطقات.
"خليها ليا انا ابنتي "...حطاتها ليها و تبعاتو بعويناتها حتى اقتاعد كرسيه وكروازا رجليه وغير جا يعللي فيها العين حدرات بشوفتها للأرض وجات كاتجري لحداه بخطواتها الصغيرة..وقفات قدامو حانية راسها وكاتفرك فصبعانها مع بعضهم مستنياه يبدا يآمرها تاني ..من الصباح ماخلاها ترتاح .
طللعها ونزلها مصغر عينيه كايشوف فيها مخشية فالبيجامة ديال ماماه الصوفية من تريكو وسروال عراض وواسعين عليها ولكن اخر جزء عطيتك ديري فيه من ورا ديك
" ولكن لونها الوردي جا عليها وواتا بشرتها البيضاء...طلبات حوايج نجمة حيت حوايج خواتاتو قصار ومزيرين وعصريين وهي مولفة تلبس العريض والطويل". ...الفولار غير لاوياه وزغيباتها الزعرين على جبهتها نازلين .....خاشية رجيلاتها الصغار فبانطوفة وردية حتى هي ديال نجمة ومكمشة قدامو حانية الراس والعين ...ولات عاجباه بطوعها وسمعها للهضرة وخفتها فالسخرة...ماكاتشكا ماكاتحرك لسانها لردان الكلام...كاتنطق غير ب" أه..واخا" ولي طلبها كايلقاها قدامو فرمشة عين .
حنحن ونطق بنفس النبرة الرخيمة الخشنة كاتحسيها من حلقو خارجة دافية وقاسية.
"شفتي واش جاني شي إيمايل ؟!"
سرطات الريق الناشف وقلبها تهز وتحط بين ضلوعها...رمشات لعدة مرات بشفران عيونها ورجليها بداو كايفيبريو بيها ماعارفاش باش تجاوبو وشنو تقوليه...هو كايتسناها تجاوبو وهي كاتسنا عقلها يجاوبها بعدا...شنواهو ليميل؟! فاش غايجي؟! وكيفاش كايجي؟!...!!
كيسر[بنبرة عالية): واقلة سولتكك...!
صوتو زعزعها وخلاها تنطق بغفلة منها.
أريناس: شناهو ليمييييل.
قرن حواجبو بين عيونو الكْرية باستغراب ورجع عنقو اللور متعجب من سؤالها.
كيسر: شنو سميتو؟!!.واش ماعارفاااش شناهو الإيمااايل؟؟؟! ماتقوليش ليا ماقريتيشش ...!
سربا عليها الأسئلة حتى داخ بيها راسها....حكماتها التلفة وبدات كاتحاول تجمع شمل لسانها وتجاوبو.
أريناس: م ...ماقريتش ...!
جر النفس الكثيرة وبغيض زفرهااا قالب راسو لجنبو...البنت باقا صغيرة وماقرات مالعبات من صغرها فالخدمة وتمارة غطسات وهادشي كايزيد ينيرڤيه .
كيسر:دابا الى قلتليك قراناتك كايقراو ويلعبو غاتقولي ليا ماشي مشكل انا باغا نخدم ياك... ماسميتوش ليميل...سميتو إيماااايل....يعني ميسااج....[حس بيها ماغاتفهموش].....بريّة بريّة .
أريناس بلا ماتوزن كلامها نطقات
" واش غايجي فداك البورطابل لي كايتحل ويتسد ياك؟!".
هنا سالات معاه وبلا مايشعر عض على اسفل شفاهو حابس الضحكة وغمازاتو على حنيكاتو بدات كاتبان...عيا يقاوم وفاللخر قهقه بلطافة معلي صوتو.
كيسر: هه ههههه...البيسي...سميتو البيسي هههه ...!
ماداتهاش فكلامو قد ما داتها فجمال ضحيكتو ...كي تمزكُو شنيفاتو المخلطين بين الدم وزروقية الكارو والغمازات على حنيكاتو غارقين......واش حيت ضحيكتو فعلا زوينة ولا حيت مولفة تشوفو مخنزر وعلى ملامحو مكشر داكشي علاش جاتها ضحيكتو مميزة .
#غبية_غفلت_معناها..!
غير شاف فيها حنات بشوفتها قدامها حشمانة منو...عارفا راسها ماقارياش وماعارفاش بزاف ديال الحوايج على المدينة من حقو يضحك على كلامها المعربن ومصطلحاتها القديمة.
كيسر: سيري غير جيبيه ليا هه...داك البورطابل لي كايتحل ويتسد.....وجيبيلي قهوتي ولِّيت باغيها.
ماقادراش تفهم واش كايلعب بيها ولا هو هاا صعب الإرضاء.؟!.. مرة باغي الحاجة مرة كاع ماباغيها..... متطلباتو كثيرة ومزاجو متقلب وفوق من هادلشي غير مخنزر ومعصب ماكايقولش غاتعيا بقوة التسخار ولا ليها حساب يتضرب ...كاتحس بيه كايديرها ليها بلعاني هدفو هو يشقيها ويعييها....علاش باش تنفر الخدمة وتتخلا عليها؟ ايوا ملي ماكانش باغيها علاش من اللول قبل عليها؟!.
حركات راسها بلا حول ولا قوة إلا بالله متنهدة وتحركات من قدام عينيه داخلة للدار وهو كايضحك وكايشوف فيها....ديك الجملة البريئة ديالها " البورطابل لي كايتحل ويتسد" مابغاتش تمشي ليه من بالو...كايحبس الضحكة حتى يعيا ويتكرشخ مع راسو مكركر عليها .
نزلات ليه البيسي والقهوة ووقفات قدامو من جديد مستنياه يعطيها الإذن باش تمشي.
فتح البيسي ورشف من قهوتو وعلَّا العين فيها ناطق بنفس نبرتو الصارمة المبحوحة .
كيسر:خليت شي قوامج فوق الناموسية...غسليهم وحدديهم ليا.
هزات ليه راسها بواخا وبقات كاتشوف فيه وزغيباتها الزعرين من جناب الزيف طايرين...لقاها ماتحركاتش عرفها باغا تهضر وترددات لذا حنحن من جديد ونطق.
كيسر:شنو؟!
اريناس(بلا ماتوزن كلامها): واش نتا ماكاتخدمش؟!.
طول الشوفة فيها موسع فمو شوية فحاليلا صدماتو وعلَّا حاجب منزل الثاني كايحاول يستوعب السؤال.
كيسر: خدام....كانخْدّْم الناس.
بنيتها هزات راسها بالإيجاب كي فهمات قصدو...عارفاه حشا ليها الهضرة ولكن ماعليها غير تبين اعجابها بالخدمة ديالو المتواضعة لايصدق مكركبها مع الباب
أريناس: اييه...تاهي حرفة.
سد البيسي وقلب عينيه بملال.
كيسر: واش نتوما فهاديك العروبية عندكم شي وجبة سميتها الكلاخ؟! راه بزاف على البطالة والأمية ....نتي راه غبية ..
لقاها كاتشوف فيه بعدم فهم وبلع ريقو قبل مايسولها وكايتمنا ماتصدموش تاني.
كيسر:عرفتي شناهي غبية بعدا؟!.
حركات ليه راسها بلا وهو يشد راسو غاتطلع ليه السخانة معاها
#سر...!
النهار كولو ماهناهاش...لحظات ثواني دقائق الساعات كولها شغلها فيها لدرجة الأرض ماشداتهاش...فال 5 دالعشية خرج فالسكات بلباس كولو كحل من راسو لرجليه....كاسكيط نواغ من لاماغك "اريسكو" لي هو نسبهم حيت الشركة ديالهم.... وتيشورت فنفس اللون ونفس الماركة...على عينيه نظارات شمسية سوداء ودجينز مع سبادري اير سان اخر ماقال بوم ....قلع بلوطو من نوع Jf W اخر ماكاين .
حتى مشا عاد زارتها الراحة ...شمرات على يديها وعطات الخاطر لطيابها....نصبات العشا بكري ...زينات الطاجين وغللاتو مخلية ريحتو تتسارى فالدار وتبين بنتو ومشات عند نجمة لي كانت مسرحة رجليها فوق السداري فالصالون غير شافتها طبطبات فوق فخضها بمعنى" اجي لهنا" وأريناس تبسمات بعفوية مقربة ليها...تكات براسها فوق فخاضها وخدات نجمة كاتحك ليها فشعرها وتتجمع معاها.
" عييتي ابنتي ياك؟! ماحيلتك لشغال الدار ولا لطلبات كيسر والتسخار ".
أريناس: جيت لهنا باش نخدم ماشي باش نتشكا ونتألم...وزايدون خاصني بزاف اخالتي نجمة...خاصني نزيد فالشقا نخفف يدي ونتعلم...لابغيت نضمن بلاصتي معاكم ومانخليكمش تفرطو فيا.
نجمة ضرباتها بالخف لراسها" ماتقوليش كيهكا...علاش غانسمحو فيك؟! نتي دابا راك وحدة من بناتي وربي شاهد عليا".
أريناس: فكرتيني اخالتي نجمة... ماقلتيش ليا...شحال عندك من بنية؟!.
نجمة تبسمات كاتفكر فيهم ونطقات.
" 2 مزوجات برا البلاد...وحدة دكتورة جراحة والثانية محامية...وكيسر هو الولد الوحيد لي عندي...وهو الصغير فيهم".
أريناس(ناضت فبلاصتها): تبارك الله...وحدة طبيبة ووحدة محامية...اهاه والسي كيسر؟ فاش خدام.
كانت متبسمة فوجهها وغير طرحات السؤال اللخر تغير لون وجهها...تلاشات تبسيمتها وبانت ليها بالكشايف كي بلعات ريقها.
نجمة:كيسر...خدمتو ...
ماكملاتش كلامها كي دخل قادر من الباب مقاطعها.
قادر:واش كيسر خرج ؟!.
هزات ليها راسها بالإيجاب وشافت فأريناس لي تاهي كاتشوف فيها مستنياها تكمل كلامها.
نجمة: غانوض نصلي العصر...!