🍷🥂خــادمـة الـقاسـي🥂🍷
✦وكأن عيناك في الحسن آية تتلى على قوم كفروا فاهتدوا...!
#ميووول...!
نجمة: واخيرها فمكتابها اولدي وربي جابها حتى لعندي... شكون عرف؟!...تقدر تكون هاد البنية مكتابة ليا....و مكتاب ليها الخير معايا .... شوف غير حالتها تشفي الخواطر مسكينة...ماقارية مالابسة ماضاحكة كيفها كيف البنات لي فسنها وهي فزهور شبابها ..... انا كانشوف بلي نقذتها حيت ماجبتهاش باش نتكرفس عليهااا بالعكس درت خير فيها.......البنية تما كانت كاتضرب المسافات فالشموسات باش تجيب لمرات باها شي دريهيمات.....معايا غير غاتتسخر ليك شوية وحاجة معانا ماتخصهاا ونتا ولدي وعارفني فمثابة بناتي غانديرها
جا يجاوبها صدق عاقد حواجبو بين عينيه وشمشم بنيفو الريحة الشهية لي تسارات فركان الدار قالبة الجو بختوريتها....صغر عينيه وبلع ريقو كي سمع مصارنو زواو بالجوع .... نجمة سمعات صوت كرشوو وبدات كاتبرقق فعويناتها والإبتسامة ترسمات على شنيفاتها حيت عرفات أريناس قدات بيها ودارتها ودابا الى هضر راه غير بغا يدير ليها العصا فالرويضة.
تمات داخلة عندهم للصالون كاتنزل كمامها على يديها لي ولاو بالطياب حمرين.. وقبل ماتنطق تبسمات وعلات فيهم العين.
أريناس: العشا واجد...راني حطيتو لهيه.
نعتات ليهم بصبعها للطبلة الطويلة العريضة لي متوسطة المراح ديال الدار
شاف فمو لي ضاحكة من عينيها وفباه لي فرحان بيها ونطق بنبرة استفزازية خافثة.
كيسر: ساعتاين باش يوجد العشا ؟!
عندو الحق تعطلات فالطياب...هادشي علاش كاع ماهضرات اكتفات بالسكات....قادر وقف متبسم وخرج من الصالون ونجمة دارت ليها جيم بيدها زعما " عجبتيني" وهي كاتضحك بالحس وتبعات قادر بزربة.
نزل حجبانو المعقودة وطيح التخنزيرة ....وقف بتثاقل ودار يديه فجيابو متنقل بخطوات بطيئة قدامها ...تبعاتو بشوية حانية راسها وغير شاف الطبلة وسع عينيه وبرقق مقلتيه. (بؤبؤ عينيه)
بلل حلقو باش يبلع ريقو وبدا كايتسارى بشوفاتو بينها وبين الطبلة.
كيسر: شنو هادشي؟؟؟!
"كانت حانية راسها وكي سمعات كلامو رفعات فيه عينيها...تضببات رؤيتها والكلام بين شفايفها تلف ليها...بلعات الريق الناشف وتداركات الموقف بالخف ...
حنحنات بشوية وحاولات تثبت حروف كلماتها فحلقها قبل ماتتنطق بيها .
" كاتعرف الرباااز؟!"
#إحراج...!
أريناس: هادا الرباز وكاين لي كايسميه المرشوش على حسب المناطق كولا وآش كايقوليه...وهادا عصير بال..
قطع فيها كلامها كي حنحن بكهامة وهو مخرج عينيه و رجع شاف فديك القصرية الكبييرة شادة نص الطبلة .... كايبانليه تما غالمسمن مقطع طريفات صغار والوسط دجاجة بكمالها يمكن محمرة .
كيسر: لا ...زعما شنو هادشي؟!".
شافت فالماكلة فوق الطبلة ورجعات شافت فيه كاترمش بعدم فهم.
أريناس:العشا.......قلتيلي نوجد ليك العشا؟!.
رفع ليها راسو بالإيجاب وبحجبان مقوسين جاوبها.
كيسر: اايِّييه قلتليك وجدي ليا العشا ماشي ديري ليا زردة...!
نجمة ريوكْها سالو على الطياب قدام عينيها...ريحة الطياب الفنة قلعات مصارنها وحركات فيها جوع الطريق لي شداتها من والماس للصويرة وهي سايقة.....تفتفات بنضراتها من فوق الطباسل واحد بواحد وبشهية سرطات ريقها ...بلا ماتشوف فكيسر خاطباتو غير باش تسكتو .
" ولدي يهديك الله...هادا النهار اللول ليها فالدار ...ايوا شوية بشوية حتى تتعود البنية.".
رجعات شافت فأريناس لي حانية براسها قدامها وهي واقفة عليهم حدا الطبلة كاتفرك فصبعان يديها.
نجمة(بإعجااب شافت فيها ): غير من الريحة تفتحات ليا الشهية.... شنو زعما ماغاديش تعطيني الوصفة السحرية...؟!.
يالله جات تجاوبها أريناس نطق كيسر مقاطعها.
كيسر: خدامة بالضو؟! ...طيبات كاع ماعطا الله فالدار من خير...وقاتليك عشا...هادا راه تبذير...
#رضى...!
نجمة بابتسامة دارت ليها إشارة بعينيها باش تسايس وماتديش عليه وأريناس فهماتها وحنات براسها واخا كلامو حرجها.....دارت عليهم بطاس دالما وعطاتهم يغسلو يديهم إلا هو مارضاش يمد ليها يديه.
ربعهم مع بعضهم وتسند بضهرو على الكرسي بنفاخة كايطلع وينزل فيهم وهوما غاطسين فالگصعة عورييين ماعارفين فين اللقمة فيها لي تنفع ولا تضرر...!
ماجلساتش واخا نجمة طلبات منها تجلس معاهم فالطبلة باش تتعشا....ردة فعلو الباردة فشلاتها ....
ثبتات فمكانها كاتفرك فصبعانها وحانية راسها...من سكوتو وهدوئو استنتجات استنتاجو وفهمات بلي مارضاش بيها حتى بعد المجهووود الكبير لي دارتو ولا يمكن لي حاولات تديرو....بقا فيها الحال حيت مامدش يدو لماكلتها واكتفى بالتمياق الإستفزازي ....حنات بشوفتها قدامها والدمعة وقفات على جفونها.
بهدوء رفع الشوفة فيها بتباطئ وهزها من راسها لرجليها بتثاقل...كاتبان خايفة ويائسة ...كاتماصي صبيعاتها الحمرين بالطياب مع بعضهم والحروق تكتسيهم.....كاتتنهد بالصوت حابسة الشهقة فحلقها وكيلا غصة قوية متملكة قلبها....عض على اسفل شفاهو ونطق.
"عللي راسك".
سمعات كلامو وتقدمات بجوج خطوات لقدامو...علّات فيه عويناتها ونتابه للدمعة كي قفزات من بين شفيراتها الزعرييين نازلة على خدودها المزنكِيين المطيبزييين....رفدات يدياتها الصغار مسحات دمعاتها وبلعات ريقها كاتحاول تكتم الهم لي فخاطرها.
زفر بغيض وحط الشوفة فشوفاتها مكمل كلامو.
كيسر:فهاد الدار ماكاتخرجش الخبار وماكاتخرجيش بلا الشوار......لي سولك شكون نتي ومنين نتي كاتفقدي الذاكرة و تنكري أصلك وفصلك وماتخلي حد يعرفك..... أنا ماعنديش مشكل معاك....مشكلتي فعمرك لي ماكايناسبش ضروفك...ماغانقوليكش حاس بيك ولا فاهمك حيت ماغايحس بيك غير لي محطوط فبلاصتك....ولكن غانعذرك ونقبلكك والى غلطتي...تيقيني....ماغاديش نرحمك.
ماعزيزش عليا نهضر بزاف...كيما قلت حتى واحد...ماخصو يعرف...شنو كاديري فهاد الدار...وشنو كايدور فيها........يعني الى حصلتي حاولي تسلتي.....الى طولتي معانا....غاتكبري وتفهمي هضرتي....بالنسبة للخدمة....مع الوقت غاتحفضيها وتتعودي عليها ...قد ماكانت صعيبة حاولي تقدي بيها...باش نتعايشو مرتاحين فهاد الميترو لي جامعنا....كوغاج.
اخر كلمة مافهماتهاش ولكن خلعاتها...جاتها فحاليلا كايرحب بيها فمستنقع من الجحيم.
من كلامو الباقي حساتو كاينبهها بخطورة كل خطوة غالطة ممكن ديرها....وأهم هاد الخطوات الخطيرة....هي تخرج الهضرة ولا اسرار الدار....وفهمات بلي كايهددها باش تزم فمها ...الى فهمات و دارت لي قال عليه ليها.... ماغاتلقا حتى مشكلة معاه