جا دكتور شاف رفاييل وفحصو لقى كلشي مزيان الحمد لله طمنهم عليه وعطاهم الإذن الا بغاو يمشيو غير هو خاصو يرتااح وميتحركش بزااف تمنى ليه الشفاء وطلب منو يصايب ورقة الخروج عاد يقدر يخرج ومشا ... خرج أوس يقاد الامور وهو في طريقو صونا تيليفونو جاوب بهدوء عكس داخلو عاد مشى خذا إذن الخروج وعاود رجع ... توجه عند رفاييل وقال ببرود : كيف بقيتي
رفاييل : شوية الحمد لله
أوس : علاش درتي هكا علاش تلقيتي رصاصة
رفاييل تبسم : أنا درت غير داكشي لي قال قلبي
أوس بحدة : اخر مرة دير هاد التصرف حياتك مرخيساش عندي
تصدمو كاملين من كلام أوس وفنفس الوقت فرحو حيت عرفو بشوية بشوية غيبدا يسامحو ويتقبل وجودو في حياتو اما هو گعما تسوق ليهم مشا لساك جبد منو حوايج رفاييل لي جابت ليه راضية ورجع عند باه نقل نظراتو لنساء وقال : واحد دقيقة على مانلبسو
خرج كلشي بقى غير هو وبااه عاونو حتى لبس وتكاه عليه مخرجو هدر براسو باش يتبعوه منطقش حيت عارف إلا دوى غيطرطق بقى فيه شمتة ديال داك لبسيكوباط ملي هرب ومضربوش حتى من ليلى مدواش معها وأكيد هادشي لاحظاتو هي وبقى فيها لحال مي مابغاتش تبين ... وصلو للوطو وحل لباب ودخل باه برفق دار ليه حزام سلامة عاد مشا هو لبلاصتو تسناهم حتى دخلو عاد ديمارا مغزف حاس بناار شاعلة فيه
رفاييل : هادي ماشي طريق داري
أوس : لا ماعندك ماتمشي دير فيها ... خاصك رعاية والا مشيتي مكاين لي يرد ليك لبال
سكت رفاييل وداخلو كيرقص بالفرحة وكيشكر هاد رصاصة لي رجعات ليه ولدو شاف في راضية من لمراية وتبسم ليها وحتى هي بادلاتو بالفرحة وعلاش ماتفرحش وهي أقصى أحلامها أنهم يتجمعوا ويكونوا عائلة .. بلاصا لوطو ملي وصل لباهية ونزل عاون باه حتى دخلو لبيت وتكاه ودار فوق منو لغطى
أوس : ارتاح مع راسك والا احتاجيتي شي حاجة عيط لواليدا غنمشي نقضي غير واحد الغراض ونرجع
رفاييل بتوجس : يااك لاباس أولدي فين غادي يكما..
أوس : لالا متخافش مغنمشيش لتما حيت أساسا الكلب هرباان وخرج برا المغرب (على كارلوس)
رفاييل : واخا أولدي ... شكرا بزااف
شاف فيه مطول وقال : هذا واجبي .... كإبن
رفاييل وسع عينيه مامتيقش بلي صافي اعتارف بيه كأب بطريقة غير مباشرة مي واخا هكاك هو كافياه وموفياه
بياض الثلج انتي وخجل وجهكي كشمس الدافئة 🌞
وابتسامتكي كاللؤلؤ المرجان ألم يستحي البرد منكي 🍃
أم غار فداعب وجنتيكي فلكي في قلبي دعوة أن يرعاكي الله وينجيكي ❤
خرج من عندو أوس لصالون وعاد رد لبال لليلى لي غير شافتو دورات وجهها نافخة ريشها عرفها مقلقة منو تبسم بزز منو وتوجه لعندها جرها من إيديها ودخلها لبيتو حاصرها مع الحيط
أوسمان : مال حبيبي هاز شنافتو
ليلى : شوف نتا ملي جيت لصبيطار مكلفتي راسك حتى تشوف فيا
قرب لشفتها بغا يبوسها وهي كتبعد وكتقول : أوس حيد راه مكنضحكش معااك
تبت ليها راسها بيديه وغطس معها في قبلة عميقة ترجم فيها أسفو وحبو ليها وهي كتدفع فيه من صدرو مي فالاخر استسلمات ليه وغرقاات معاه في بحر عشقو ... فصل القبلة وحط جبهتو على جبهتها : سنفورتي مزاال مخاصمة معايا
ليلى قلبات عينيها بغنج : أه
أوس عاود لتاقط شفاتها في قبلة مختالفة على لي قبلها كانت كلها حب وحنية خلاتها مغيبة وتولي كيف العجينة بين يديه .. بعد شوية وشير ليها براسو اما هي ناضت من غيبوبتها وقالت : هااا؟
أوس : كون يحسابلي بوستي كتأثر فيك بحال هكا كوراه يوميا بايسك
ليلى : شنووو ؟؟
أوس : بنتي ليا مزاال مغيبة خلي حتى نرجع ونكملو هدرتنا
خلاها ومشا وهي باقا واقفة في بلاصتها حطات ايدها على شنايفها بصدمة كتذكر الموقف وقالت بعتاب لنفسها : هادي غير بوسة ودرتي هاد الحالة كون... أستغفر الله تگول أول مرة غيبوسني
عند أوس اللي كان وصل حدا فيلا ديال گاستيو نزل من لوطو برجولية وعاقد حجبانو ومخنزر شافو لگارد دار ليه تحية وحل ليه لباب ... دخل وعينيه كيدورو في المكان جا عندو گارد علمو بمكان گاستيو ووجهو لعندو في الحديقة الخلفية لقاه بارك في طبلة وحاط لگارو في فمو وفي ايديه الجريدة كيقرا فيها بتمعن
تمشى بخطوات واثقة وجر كرسي وگلس حداه تلفت فيه گاستيو جامع حواجبو غير لمح أوس رخفهم وبدلها بابتسامة : جاهز باش تكون خليفتي وتكلف بجميع أعمالي
حرك ليه أوس راسو بالايجاب
گاستيو : مستعد تدخل العالم مافيهش رجعة
عاود حرك راسو بأه
گاستيو بابتسامة نصر : اذا هنا غنقولك مرحبا بيك في المافيا الايطالية أخليفتي
أوس قابلة بنظرة جمود مجاوبوش في حين گاستيو كمل كلامو : ممم من أخر اشتباك وقع بينا وبين لمافيا الكندية معندكش مشكيل في القتل لأن أكثر عدد تقتل كان على يديك وبدون سلاح ... (ميل شفايفو) حتى لهنا الامور مزياان ولكن وخا هكاك خاصك تعلم لسلاح وتعلم كيفاش تطلق النار في الهدف بلا ماتخطأ
أوس ببرود : امتى غنبدا تدريب
گاستيو تقاد في لبركة ودوا بجدية : أوس في قتال الشوارع خاصك تقرا تحركات خصمك لمدة ثواني باش تعرف نقطة ضعفو لي غتشدو منها وغتبقى تلعب عليها حتى يسهال عليك الفوز ... لكن الأمر مختلف في المافيا أول حاجة خاصك تعلمها هي الصبر والذكاء وتركيز وتحكم والاهم لي خاصك تحكم فيها هي ملامح وجهك ديما خاص يكتسي عليهم البرود والجمود تماما بحال نظراتك ليا حاليا سوى في ربح ولا الخسارة لأن هكا كيصعب على أي شخص يعرف نواياك ... ومن إحدى أهم قوانين المافيا هي عدم الخطأ الخطأ كيعني الموت وعدم الثقة فأي احد مهما كان ومكاينش صديق .. في هاد العالم كاين غير المصالح وگاع لي دايرين بيك أعدائك وأي خطأ صغير معاهم يقدر يخليك عدوهم المشترك وديك ساعة ... غينهيوك لذالك قبل ماتدير الخطوة قراها 100 ألف مرة عاد نفذها (رشف من كاس لويسكي لي قدامو ورجع ستأنف كلامو ) ممم دابا نمشيو لمهم .. درية ديالك
هز فيه أوس حاجبو وخنزر : أش جبدك بيها هي بعيدة على قذارتك والا حاولتي ولو مرة وحدة تذكرها بلسانك راسك غيطير
ضحك گاستيو بختورية منغم مع كاسو : هاهاها صراحة حسدتها هاد الحب كولو هازو جيهتها
أوس بحدة : ماسوقكش واحسن ليك تبعد منها
گاستيو : تؤ تؤ هاد الهدرة مخصكش تگولها ليا خاصك تگولها لي غيوليو عينيهم عليك والكبيرة وصغيرة في حياتك غيبحثوا عليها باش يلويو ايديك بيها عارف أول حاجة غينتبه ليها عدوك شنو هي ( حرك أوس راسو بلا ) هي كنزك مغيقتلكش باش ياخذو لا غياخذوا امام عينيك باش يعذبك اكثر عاد يقتلك ... وأنا عارف كنزك هو حبيبتك صغيرة
أوس : إذا وشنو الحل كيفاش غنحميها منهم
گاستيو : خاصك تزوج بيها
أوس : شنووو
گااستيو : وفي أقرب وقت
أوس : أساسا كنت غنتزوج بيها كنت كنتسناها غير تكبر شوية
گاستيو : مزياان الامور حتى لهنا مزيان ( لاح الجريدة فوق طبلة وناض ) يله دابا هذا هو الوقت فاش تعلم إطلاق النار
#يتبع
لمهم باش نكون معاكم واضحة التفاعل ميت وماعجبنيش في بلاصة ماتحمسوني كتقتلو فيا الحماس ومنكذبش عليكم ندمت لاش حطيت في لواتباد كون يحسابلي هكا كون حطيت غير في الفايسبوك والا الوضع بقى بحال هكا أقسم بالله حتى نحبسها وبالاخص حنا في مشارف النهاية مابقى ليها واالوا وتسالي اش غتخسرو الا عاونتو باش تطلع الرواية ... اما بخصوص الاحداث جاية غيوقع حدث غيقلب الرواية رأسا على عقب ... السلام عليكم