مرت ثلاث شهور واني بحالة اكتئاب حادة بشكل يعني
مادري بروحي شسوي منا امي متسئل علية ومنا عمامي يلحون علمود الورث ومنا مصارلي هواية
من طرحت كلش تعبت احس روحي كبرت عشر
سنين من التعب والتفكير مرت ثلاث شهور وبديت
اتعود عل واقع الي اني عايشتة بديت اتأقلم وية
الوضع كمت اطلع من غرفتي ورجعت حياتي طبيعية
الحمدللة أحمد شافني وضعي اتحسن الحمدلله متتخيلون فرحتة وطبعاً اني من جنت تعبانة بس
أحمد ومريم جانوا يهتمون بيه خطية ريم وكع البيت
كلة براسها وأم أحمد متكدر تصعد الدرج مره جبيرة
بس مريم وأحمد اذا أحمد بالدوام مريم تجي تهتم
بية وجانت تجبرني عل اكل علمود الدوه المهم صرت
زينة الحمدللة والشكر ورها سمعت افراح مرت وائل
حامل ماكلكم الغصة الصارت بية هسة تكولون متحب
الخير لاحد ولا والله فرحتلهم بس كلت لو اني بعدني
حامل جان اني هسة بشهر السادس يعني قبل ماشوفة
ومتت قهر يعني صدك شعور الام فضيع حللت افراح
طلعت حامل شهر ونص الكل باركلهم ومريم هية
وائل ممصدكين خطية وائل يمشي ويكول راح اصير
اب شكلة يضحك ممصدك وره اسبوع من خبر وائل
وأفراح سمعنا خبر زهراء انخطبت وعزمونا بس اني
مالي واهس اروح بمكان هوسة وهية بيتهم محافظات
يعني تروحون وترجعون منتهين الكل راح بقينا اني
وأحمد بالبيت اهله لأحمد راح يبقون هناك لأن راح
يسون العرس عل سريع يعني مهر سيد ونيشان سوه
وحنة وزفة سوه مادري ليش مستعجلين عبالك يردون
يخلصون منها يجوز لأن مطلقة بس محد عرف ليش
هيج سوه سريع صار العرس وخلص ورجعوا اهلة
لأحمد واستقرت حياتنة وجنت ناسية فكرت الحمل
يعني طلعتها من بالي مخليتها مركزت بيها من صارت
افراح بشهر الرابع احس وضعي مو تمام ونفسي كامت
تلعب من وره العطر مال أحمد اذكرت اني بحملي الأول
نفسي هم لعبت من العطر مال أحمد مكلت لأحمد كلت
خلي اتأكد دكيت على مريم وكتلها مريم تعالي
وجيبيلي اختبار حمل بس أكثر من نوعية لأن مرات
يصير بيهن خطأ المهم اجتي مريم وجايبة أربعة
مريم.. ليش دسوين شدتحسين
فاطمة.. نفس اعراض الحمل الأول
مريم.. ياربي خير انشاءللة
اخذت الاختبار وطبيت للحمام سويتهن ابعتهن وظليت
منتظرة كامت تطلع شوية شوية كلهن طلعن خطين
ردت اعيط من الفرحة عيوني كامت ذب شلال والله
بذاك اليوم يعني شايفين من تعتقدون الأمر مستحيل
وطلعوا من بالكم وبعدين يصير وبكل سهولة يعني
هذا شعوري ممصدكة طلعت لمريم شوفتها مريم
طارت من الفرح بوكتها أحمد جان بالدوام بس
كلت لنفسي لاتصدكين الة تسوين تحليل دم
رجع أحمد من الدوام سبح ونام مكتلة كعدتة
العصر كتلة أحمد أريد اسوي تحليل حمل بالمختبر
أحمد فز من مكانة
أحمد.. شنو
فاطمة.. تحليل حمل شبيك
أحمد.. انتي حامل
فاطمة.. موا اكيد
أحمد حظني حيل وباسني
فاطمة.. لاتفرح هواية مو اكيد
أحمد.. عوفيني عايش هاي اللحظة
كومي لبسي داخذج بسرعة
اباوع على أحمد لبس بسرعة اني مبدلت لبست جبة
مرتبة ولفيت شال وطلعنة اني وياة ورحنة للمختبر
وسحبولي دم وكالوا انتظروا لو نص ساعة لو ساعة
أحمد ميحب ينتظر اخذني وداني لمطعم اكلنا هناك
أنوب حلينة ورجعنا واني صراحة جان عندي واهس
للأكل ابد مكلت لا وماريد اكل رجعنا للمختبر طبينا
دناخذ التحليل لكيناه طالع
الممرضة: مبروك حامل
اني اباوع على أحمد وأحمد يباوع علية اثنيناتة
ممصدكين عبالك صايرتلنة معجزة اخذنا التحليل
ورحنا للسيارة ودموعنا تصب هسة تكولون هذولة
مو صاحين بس والله شعور فقدان شي مو سهل
ابد جنة ممصدكين جنت بوكتها باقيلي اسبوع وادخل
شهرين رحنة كلنة لام أحمد والبيت كلة عرف وفرحوا
وأحمد ميقبل نام فوك اكو غرفة جوه متروكة عدلها
ورتبها واثثها وكمنا نام بيها كالي لحد مجيبين مصعدين
الدرج وجانوا مشددين علية يعرفوني ثولة وفليحة
من تشوف معاملتهم الية تموت
فليحة.. لعد اني من حامل حتى زوالي اجلف شبيكم
عبالك معلكين الطفل بعلج
ام أحمد.. فليحة انتي حملتي على كبر هية بعدها طفلة
متتحمل هيج سوالف لازم ناخذ بالنا عليها
فليحة.. يعني قصدج اني عجوز وهية صغيرة مو
ام أحمد.. مكلت عجوز لاتفهميني غلط
جانت دائما فليحة تسوي مشكلة بلا معنى لأن ماكو
ام مرتضى جانت ادور مشاكل من جوه الكاع وابو
أحمد كمنا كل شهر شهرين نشوفة مرة يجي ياخذ
غراض من غرفتة ورافض يرجع الة نعتذر من ام
مرتضى واحنة بصراحة مراتحين منها ومن مشاكلها
يعني عايشين بهدوء وسلام بدونها المهم جنة نسمع
زهراء تحبل وتطرح تحبل وتطرح ابد ميثبت الطفل
عدها يعني يمكن حبلت ٣ مرات وطرحت ومخلت
دكاترة اخر شي دزوها لبغداد على دكتورة اجتي
علينة اول شي تباوع على بطني وجر حسرات
بوكتها بطني جانت مبينة المهم راحت للدكتورة
العصر رجع ساعة ب٨ تبجي وحالتها حالة اني واكفة
اباوع عليها منهارة كلت هاي شبيها سئلوها شبيج
شكو شصاير كعدت تسولف اسم الله طلع عدها
مشكلة بالرحم ولازم تشيلية وانتو تعرفون اذا
شالتة بعد متكدر تحمل وهي جانت تبجي وتكول
هذا جزائي ربي ديظوكني الي سويتة واحنة كلنة
نباوع هاي شدتحجي وكعت بالكاع وكامت تبجي
وتعيط ويردون يكوموها اجتي يم رجلي تبجي
وتكول سامحيني واني جنت ممفتهمة وأحمد جان
طالع من الغرفة مستغرب شديصير هنا وحجت زهراء
وياليتها محجت
زهراء.. هذا كله الديصير بية كلة من السويتة بيج
اني اني دزيت البنية ادوس على فستانج على تدعبلين
وتطرحين
اني من سمعت هيج شااغت روحي لزمتها من شعرها
وكل يجرها من ايدي واني جنت اظربها واعيط
وابجي اكولها ليش جان اني هسة ابني بحظني
ليش سويتي هيج ماكلكم اشتغلتها خراميش على
عض على دفرات وهذا كلة اني بشهر الخامس بالكوه
جروها من ايدي وأحمد طردها من البيت واني كاعدة
ابجي منهارة وادعي على زهراء أحمد كعد يهديني
ويكلي معليج بزهراء هذا ربج الكاتبة الج حتى لو
مدايسين على فستانج همين جان صار بيج شي
أحمد بوكتها انطاني منوم لأن اتخبلت من كالتي
زهراء هية سوت هيج تخبلت حرفياً أنوب ورة
يومين افراح بشهر السابع واني بشهر الخامس
افراح جابتة سبيعي وخلوه بالخدج وخطية وائل
حالتة حالة لأن كالولة مو اكيد يعيش وأفراح كلش
تعبت يعني مرينا بظروف احنة يصحى واحد يوكع
واحد هيج المهم ورة شهر صار ابنهم احسن وطلعوا
من المستشفى وجان يخبل يشبة وائل سموه وليد
صرت بشهر السادس واني بعدني ممسوية سونر
اني رفضت اسوي بس أحمد لح اله يعرف اخذني
للدكتورة اجباري وسوتلي سونر
الدكتورة.. بيج ولد وصحتة ماشاءللة كلش زينة
أحمد راد يعيط من الفرحة أحمد جان رايد ولد حتى
يسمي على اسم اخوه المات وبلانا بمصايبة المهم
الله يرحمة بفضلة اتعرفت على أحمد ورة فتره
سمعنا زهراء من سوت العملية وزوجها درى طلكها
كبل يكللها لعد شكو اني ازوجت أريد جهال
هذا كلة الله ديطلعها بيها علي سوتة بية حسبي
الله ونعم الوكيل حياتها انكلبت من فرحة وعرس
الى عملية خطيرة وطلاك حتى تعرف الله ياخذ
حق المظلومين شافتني يتيمة وماكو احد يدافعلي
استغلت هذا الشي بس ربي اخذ حقي منها واني
ممشمتة بيها بس اكول تستاهل هذا الي ديصير
وياها على الي عيشتنياه وخلتني اشوف الموت بعني
خلي تظوك شعوري شوية على أقل صح اني خسرت
ابني بس مو مثلها هية طول حياتها مراح تكدر تصير
ام الحمدلله اني مسويت مثلها وحاربت الناس على
حياتهم وعيشتهم اني جنت راضية بلي انطانياه
رب العالمين المهم طبيت الشهر التاسع وقرب موعد
عملتي طبعاً أحمد حجزلي بمستشفى اهلي علمود
سلامتي وسلامت الطفل جنت كلش خايفة من
العملية المهم صارت عندي الطلوكة أحمد كبل شغل
سيارتة واخذنا الجنطة الي جنا محظريها الي بيها
ملابس للطفل طبعاً الملابس مال الطفل كلة أحمد
حظرها مقبل اني اطلع يخاف من الطريق لأن بية
طسات وهيج المهم شغل سيارتة ركض رحنة للمستشفى حطوني بالغرفة بس كالوا مو هسة
نجيبج انتظري وظليت الوب من الوجع لحد مجتي
الدكتورة وفحصتني كالت دخلوها دخلت واباوع على
وجه أحمد ملامح وجها مرتبكة وخايف واني جنت
خايفة اكثر منة الصراحة دخلت للعمليات وحطولي
البنج بعد محسيت بشي اله على ضربات على وجهي
فزيت جان الممرض يكول كعدت اباوع اني بغرفة
ويمي أحمد واكف ومبتسم
فاطمة.. أحمد ابني وين
أحمد.. هسة يجيبوه بس ينظفوه
جان تطب الممرضة وبيدها ابني مالككم هاي اللحظة
شكد حلوة اجتني الممرضة وكالتلي ترى جوعان
رضعية حطتة بحظني وايدي ترجف ممصدك ابني
بحظني صدك مو حلم ابجي واشهك اباوع على أحمد
يبجي فرحان والطفل جان نسخة من أحمد طلع
أحمد بره رضعت الطفل ونام تستغربون ليش اصيحلة
الطفل لأن أحمد بوكتها بعدة ممسمية راح أحمد تقريباً
ساعتين ورجع اني محسيت بالوكت جنت حاطتة
بحظني وامشي ايدي على وجها والزم ايده ابوسها
واشمشم بيه ممصدكة ربي رزقني بية رجع أحمد
والابتسامة شاكة حلكة
أحمد.. سميتة
فاطمة.. شسميتة
أحمد.. مو كتلج على اسم أخوية علي الله يرحمة
فاطمة.. الله يرحمة
أحمد.. كافي مشبعتي منة انطيناة
آخذة بحظنة مثل المتلهف يحظن ويبوس بية ويصحلة
علاوي
فاطمة.. لعد شوكت نطلع
أحمد.. كالوا باليل يلا
فاطمة.. تمام
أحمد انطاني علي وراح ديجيب اكل طول شوية
انفتحت الباب جان اشوف ام مرتضى هية وابو
أحمد طابين علية اني كلت راح يسون شي باني
حظنتة حيل اجتي بوستني ام مرتضى وتحمدتلي
بالسلامة هية وابو أحمد واني صافنة مصدومة
ام مرتضى.. سمعت بيكم سميتوه علي
فاطمة.. يي صحيح
من كتلها كامت تبجي اذكرت ابنها
ام مرتضى.. انطيناة خلي اشوفة
اترددت خفت لاتسويلة شي لان اعرفها كلشي يطلع
منها
ام مرتضى.. لاتخافين ترى اني مو ماعندي ضمير
حتى ائذي الطفل
اخذتها بحظنها تبوس بيه وتلعبة أحمد اجة ظل
صافن مصدوم ابوه وأم مرتضى موجودين باركولة
لأحمد أحمد بس يكللهم يي ويي ومشكور ميعرف شيحجي شوية وراحوا ام مرتضى حطتلة بملابسة
ليرة ذهب المهم راحوا وأحمد بعده مصدوم ام مرتضى
حجت ويانة وجايتة للمستشفى اكلنا وكملنة أنوب
طبت علينة امي هية وزوجها عاد اني كلت شنو
هذولة متفقين علية لو شنو امي كعدت تبجي تكلي
محد كلي انتي حامل وراح تجيبين جان اجيت وياج
معفتج وحدج اخذت علي بحظنها ظلت شايلتة وتبوس
بية وأحمد واكف ومصدوم شديصير اليوم 🤔🤔
هيجي جان وجهنا حرفياً المهم امي راحت وطلعنا
من المستشفى ورجعنا للبيت أحمد ميقبل احد يشل
علي يخاف علية العالم كامت يومية يجون لأن همة
عدهم كرايب هواية علاوي كبر وصار عمرة أشهر
وصار بعد احلا وأحمد يموت علية وامي وأم مرتضى
تصالحت وياهن ام مرتضى رجعت تعيش ويانة
وجانت تموت على علاوي لأن على اسم ابنها المرحوم
وامي جانت تزورني بين فترة وفترة والحمدلله هسة
اني وأحمد مستقرين بحياتنة ومفكرين نجيب اخت
لو اخ لعلاوي بس منتظرية شوية يكبر واكيد تريدون
تعرفون وين وديت فلوس الورث مال ابوية نصة
اتبرعت بية لدار مال ايتام فاتحيه جديد والنص الثاني
لمستشفى مال أورام الله يحفظكم ويحفظنة وهنا
اختم قصتي المئساوية الحمدللة الأمور تحسنت
وحياتي صارت مثل متمنيتها وشكراً للكاتبة الي كتبت
قصتي رغم ظروفها وحالتها ...
وهنا نختم قصة فصلية فاطمة والنقيب بكل فرح
ودعت الحزن من حياتها بعد منور علاوي حياتهم الله
يحفظة الهم وكلش استمتعت بكتابة هاي القصة
اكثر من مرة حاولت اوكفها بس مكدرت لأن انسى
حياتي ومشاكلي من اكتبها الكم واذا عدكم اي سؤال
اسئلوني واجاوبكم ومو تنسون التصويت☆☆
والمتابعة احبكم وبااي..♡♡