(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الحادي_والخمسين"اهرجو يناير"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
قامت عيونها وشبحت ورا نجاة وابتسمت بعدين قالت؛طلع في من شايفكم مع بعض..!
نجاة لما سمعتها حست قلبها بيوقف..
التفتت طول وشافت وراها..
لقت المهدي واقف بعيد عنهم بمسافه بسيطه وهو حاط ايديه ورا ظهره..
ونظراته ليها نظرات....مرعبه...
التفتت القدام وعيونها لوطا وهي ترعش مع بعضها..
من الخوف انخطف لون وجهها..
وعائشه تشبحلها من فوق لتحت بنظرات احتقار..
هو قدم خطوتين بعدين وقف وقال..
المهدي بنبرة غضب هادئه:لولا صغارك..لولا انهم قاعدين صغار ومحتاجينك كنت لوحتك برا الحوش توا ومعاش نخليك تشوفيهم حتى في الحلم...
لكن توا بنخليك نطلعي وهما معاك..ومعاش نبي عيني تلمحك في الحوش هدا..لو يبوا يجوا الصغار حني نمشوا نجيبوهم وجهك انتي مانبيش نشوفه هني..
تحركي يللا..
هي طول مشت ودموعها في عيونها اللي معبيات نظرات حقد وهي تقول بوعيد من تحت سنونها:تو نوريك يامتصابي ياتافه تو تشوف...
ومشت طول لجناحها..
🍃المهدي:الله يرحمك ياطاهر ماريتش منها خير حتى انت..
تنهد وشبح لعائشه..لقاها تشوفله بنظره غريبه لكن قال..
المهدي:واضح شكلها كانت غادي يومها وصورت..
عائشه:شن قصة المكالمه اللي من تليفون نسرين؟
ماعرفش شن يقول ولاشن يبرر..نزل عيونه لوطا وعاقد حواجبه..بعدين وقعد يمرر في نظره قدامه من غير مايشوفلها..
عائشه:كلمتها لما مرضت اخر مرة صح؟
هز راسه بإيجاب وعيونه هاربات منها..
عائشه:مهدي..
حرك عيونه ليها..
عائشه:ياريت معاش تتكرر تانيه..اني مهما تحملت نقعد انسانه مش حيط يامهدي..
هو بضيق؛آسف..
تنهدت بشي من الغضب ونزلت عيونها..
هو قال:باهي في شني كنتي تبيني؟
قامت عيونها وشبحتله وهي تقول:كنت نبي نشوفك ونطمن ع حالك..
حس بالخجل وقلبه وجعه..قدملها وحط يده ورا راسه وطبع ع جبينها قبلة اعتذار...
ع جية خديجه لما شافتهم انحرجت وقالت:اسفه..
وجت بتمشي..
المهدي وخر عن مرته وقال:خديجه..
وقفت وشبحتله..
المهدي:اقربي..
قدمتله..
المهدي:هادي اللي اسمها نجاة فهميها ان المهدي لو حطها في راسه معاش تزرق عليها شمس.
خديجه :علاش شن دارت!؟
المهدي:تو تقولك بروحها كان قدرت..المهم وصليلها الكلام وخليها تفهمه زين..
خديجه هزت راسها وقالت؛حاضر..بعدين شبحت لعائشه وقالت..في نساوين يسألوا عليك..
عائشه:نركب ندوش بعدين ننزل..
خديجه:تمام..
ومشت طول للصاله..
☘المهدي:هي تعالي كان بتركبي..
عائشه؛لحظه بس...
حطت التليفون في الشنطه..
بعدين خدت ملايتها لبستها..
ومشت هي وياه بيطلعوا من الحوش لشقتهم..
☘اما خديجه بعد مامشت للصاله قالت للي يدوروا ع عائشه انها حتنزل بعد لحظات..
مشت طلعت طول لجناح نجاه..
وقفت في الباب وبدت دق عليه..
شويه وفتحت نجاه ضحكت تهكما وقالت؛كملت..
دفتها عن الباب وخشت..
ونجاه اللي كانت حاسه ان اعصابها حتفلت خلاص..
خبطت باب الجناح بقوة والتفتت لخديجه وقالت:شكلك ناسيه انك خاشه جناحي..
خديجه بسخريه:جناحك!؟ جناح شني ياأم جناح..انتي في الحوش هدا ماعندكش حق حتى في الكناسه حتى راجلك مات قبل بوه يعني حتى صغارك ماليهم شي...
غمضت عيونها بشده وقالت..اه قصدي راجلك الاول..فتحت عيونها وقالت..بعيد السو ع الجالي..
قدمتلها وقالت؛لهالدرجه انتي فاضيه وماعندك ماديري في حياتك غير تحطي نجاة في راسك ودوري وراها وتلحقيها وين ماهي..لهالدرجه سحناتك!؟..وقلبت عيونها بإستفزاز...
ضحكت خديجه بعدين قالت:والله مافي حد فهالحوش مسحون غير يانجوته..قعدت تفرك في سبابتها بالإبهام وهي تقول..ولا!؟
نجاه؛جديات انتي وحده مسكينه..
قدمتلها لين جيت واقفه قدامها بالزبط وهي تقول:مش اكثر منك يانجوته مش اكثر منك..اللي شاده خيط شبكة عنكبوت..متكيه ع ريح...حتلقي روحك في غمضه عين ملوحه في الشارع بحوايجك اللي عليك ولو بنتوقعلك سيناريو احسن من هكي..حتولي خدامه لمرت بوك وخوتك..بالذات بعد ماخليتي المهدي يعاديك..شن درتيله تكلمي!؟
نجاة رفعت حاجبها وقالت:هو مش اني اللي قاعد يدير في لقاءات سريه مع حبيبته بنت الجيران ويكلم فيها في التليفون..
خديجه اللي سمعاته صدمها بس مابتش توقف عنده بش ماتحسسش نجاه انها شدت عليهم حاجه وقالت..
_ع العموم معاداة المهدي معناها بداية النهايه يانجاه وانتي دبور وزن ع خراب عشه..من غير شي حيخرب لأن الجالي بدي يعرف ان اللي عاشه معاك نزوه طيش هبال..لحظه انحراف وحيتوب منها ويختار الصح يختار المراة اللي تستاهل تكون مرت الجالي وكنة لعيلة شنيبه..
نجاه بإبتسامه:هادي اللعبه اللي جبتيها للجالي بش تلهيه بيها عني وتخليه ينساني ماقدرت دير شي..قاعد لتوا يدور فيا ويجري في جرتي...راجلي ياديجا يحبني من قلبه ومايقدرش يخليني انتم اللي فرضوا عليه يتزوج غيري فرض..لولاكم ماكانتش اللعبه هديكا ع ذمته لاهي ولاغيرها..
خديجه قعدت تضحك بعدين قالت:تبردي على روحك ياناري..
نجاة بإبتسامه ثقه؛هديكا انتي مش اني ياديجا انتي اللي راجلك خانك بدال المرة الف وطلقك ولولا حاجاته لبوك ولخوتك ماكانش ردك..لولا فلوس بوك..ماكانش شبحلك حتى الشبح..
حطت يدها ع موضع الألم اللي هاج وهيج غضب خديجه..
وخلاها تنزل ع خدها بصفعه خلت وذنها ترن..
حطت نجاه يدها ع مكان الكف..
بعدين نزلتها وشبحت لخديجه وابتسمت ابتسامه مكر مستفزة لأبعد حد..قدمتلها وحطت عينها في عين خديجه
وقعدت تشبحلها بقوة..
خلت شي من الخوف يخش قلب خديجه منها..
بس ماخلتاش يبان عليها..
بنظرة كبر درقت هالخوف وقالت:المهدي معاش يبي يشبحك في الحوش تبي تجني ع روحك تعالي هني مرة تانيه..
ورمقتها بنظرة حاده بعدين لفت ومشت طلعت من الجناح
ورفعت وراها الباب بقوة وهي طالعه..
نجاة؛الليله تتقربع حياتك ياخديجه وتنكسري كسره ماتلقيش شن يجبرها...اما هداكا المتصابي حسابه بروحك..
مشت فتحت الباب وطلعت للصاله.
خشتلها..
عيونها جو ع طوبى وهي تهدرز مع وحده من اقارب العيله..
يبان جوها حلو...
وهي وين تشوفها مرتاحه..سعيده..تضحك..
تزيد قهر..تزيد حقد..
غيرت عيونها عنها ومشت لأختها..
وصلت فيها طبست عليها وقال:هيا نوضي بنروحوا..
صابرين بإستغراب:مش بتروحي بعد المغرب!
نجاه من تحت سنونها:نوضي قتلك..
ومشت من حداها..
واميمه قعدت معاها بعيونها لين طلعت..
بعدين غيرتهم لصابرين لقتها تشبحلها بشيء من الكره..
حولت عيونها عنها وجهتهم للنساوين اللي يهدرزوا حداها..
وطلعت صابرين وهي معصبه..
لحقت اختها للجناح وخشت وراها وهي تقول:خيرك شن صار!
نجاة وهي تلم في حاجاتها:الهديوقه عيشه طلعت تعرف.
صابرين وهي متفاجئه:لهني وصل بيها البرود..
فاتت من قدام اختها للزيانه بش تلم مكياجها:عيلة معفنه..
لمحت صابرين علامة صوابع ع خد اختها جتها وهي تقول؛نجاه من ضربك!؟..هو!؟
نجاه وهي شاده دموعها بالسيف:الواطيه هديكا..
صابرين:خديجه!
نجاة بحقد:المنحطه العايبه..لكن الليله تو يبانلها وهداكا المتصابي تو نعرف كيف نرد عليه..
وصابرين هزت راسها بغضب وهي تشوف لاختها..
☘ولبسوا الزوز وطلعوا وخدوا الصغار ومشوا بيروحوا من غير مايسلموا ع حد..
بس طبعا خديجه لازم تسلم عليهم..
"هيا بسرعه اطلعوا باش نحدفها"
حمزة بتساؤل طفولي:شن هي عمتي!؟
خديجه؛جرة ياعيون عمتك بس ورا امك وخالتك مش وراكم ياقلبي..
التفتتوا الزوز شبحولها بحده..
وهي واقفه حدا العارصه وشاده الجره وتشوفلهم بإبتسامه مستفزة..
صابرين مابتش تسكتلها ابتسمت بمكر وقالت:مدامك فاضيه لهالدرجه بري دوري ورا راجلك واعرفي وين خميسيته الليله..
ابتسمت نجاة بتهكم وخدت صغارها وطلعت..
اما صابرين قالت:خميسك فله يافله...
ولفت ومشت وهي تضحك بإستفزاز وطلعت من الحوش..
بعد ماخلت خديجه تخش في حالة صدمه..
مشت بالجره لين وصلت لجنان الكوجينه...
حطتها ع الطاوله وخشت داخل..
وطول لدارهم..
خشتلها وسكرت الباب وطلعت تليفونها من جيب سروالها واتصلت طول براجلها..
عطاها الرقم مشغول..
عاودت اكثر من مرة لين عطاها مقفل..
خديجه وهي تشوف للتليفون بصدمه:ماشي بيشوف حوازة..ماشي بيشوف طياح سعدي اني الهبله الغبيه اللي صدقته..
مشت قعمزت ع السرير وقعدت تعاود عليه وقاعد يعطي فيها مقفل..
لوحت التليفون جنبها ع السرير..
وحطت قبضه يدها في فمها وعضتها بقوة وقعدت تبكي بصمت..
🍃وهو في هالوقت..
كان نازل لمحل واحد يعرف..
خش عليه وهو يقول:السلام عليكم..
:وعليكم السلام محي شن الامور..
محي:منظمه..شن امورك انت..
:عال العال..
محي مدله التليفون وقال:بالله ياخال كان فيها كيف نشحن التليفون..
:جيبه جيب..
قدمله وعطاه التليفون..
خداه ومشي حطه في الشحن..
محي؛ماشي ندير دورة ومولي تمام..
:برا نظم امورك ودير دورتك وتعال امتى ماتبي..
محي بإبتسامه:بارك الله فيك..
:فيك بارك الله...
ومشي طلع من المحل...
☘☘☘☘
بعد العصر..
طلعت اريج ومشت لحوش خالتها غرفه...
اللي كانت مقعمزة مع خوها في المربوعه تهدرز هي وياه برواحهم لأن عبد الرؤوف مشي يصلي في الجامع..
رن تليفونها..
قاماته وشافت المتصل بعدين قالت بإبتسامه:اهي جت..شويه بس..
وناضت ومشت طلعت من المربوعه..
مط مختار شواربه بملل وهو ساكت..
شويه وخشت عليه غرفه ومعاها آلاء..
ابتسم لما شافها وناض..
غرفه:وهادي آلو..
مختار بإبتسامه:اهلا اهلا اهلا ببنت اختي الجميله..
ابتسمت آلاء بخجل وجاته بتصافحه بس هو ضمها وقال:حبيبتي..طبطب ع ظهرها وقال..الله يبارك..
وهي ضماته وكانت حاسه بشعور حلو
شافت خالها وضماته لأول مرة..
بعدها وهو شادها وباس جبينها بعدين قال:ماحسيتش بروحي كبرت حق الا توا..
غرفه بضحكه:نفس الاحساس..
مختار:هما وطوبي عمر واحد..
آلاء:لاخالتي طوبى من نداد هي واريج اختي..اريج اكبر منها بشهور بس الزوز جو في نفس العام..
ابتسم وقال:حلو..معناها صحاب..
الاء بإبتسامه:ايه..
غرفه:قعمزوا قعمزوا..
قعمز مختار وحداه آلاء وقاللها:خالتك سدرة تعرف انك جاية تشوفيني..
الاء:يخي اصرت نمشي لما ماما حاولت تمنعني..
التفت لغرفه وقال؛شن معناه هدا؟
غرفه بإبتسامه:معناها انها ماتبيش من يواصلك اجباري عنها تبيها برضاها..
الاء:هي قالت اني ماليش علاقه بحد كل حد حر في اللي يبي يديره..
ابتسمت غرفه تهكما..
ومختار وهو يشوف للآء:فوتي الدوة هادي وقولي امورك في القرايه ماشيه تمام؟
آلاء:ايه الحمد لله..
غرفه؛نسيت نقولك آلاء مخطوبه..
مختار بإبتسامه:اوو ماشاء الله..لولد مني؟
السؤال كان غريب بس حاولت تجاوب عليه لما قالت؛لولد دكتور اسمه اياد بن زايد كان يسكن هني..وولده مذيع مشهور في الراديو..
مختار:ماعرفوش قدرك اللي عطوك للي يجي..شبح لغرفه وقال..وحده بجمالها مفروض تكون نصيب واحد ليه اسم ومركز وولد معروف صيتها في طرابلس كلها..
آلاء بضحكه:مش لهالدرجه خالي!
مختار:خسارة اللي انتي نفسك مش عارفه قيمة نفسك..ع العموم دام اني مقتنعه ماعندي مانقول..
وناض وقف...
وقفت معاه غرفه وقالت:وين ؟
مختار:والله مانقدر نقعد اكثر من هكي خلاص..
غرفه؛عابيه بيك ع العشي..
مختار:لالا حبيبتي كفيتي ووفيتي اليوم..نهار تاني اني اللي نعزمكم لحوازتي في****** غير يدفى الجو شويه..
غرفه بإبتسامه:إن شاء الله..
مختار بإبتسامه:Happy new year مسبقا..
غرفه بضحكه:ايه حقه امتى تخش السنه الجديده..
آلاء:يوم الاحد الجاي روفي..
مختار بإبتسامه؛لايمل ياحلوات..هي السلام عليكم..
ومشي بيطلع..
ووراه غرفه وآلاء يسقدوا فيه لين طلع..
آلاء؛قداش يهبل واسلوبه شبابي محلاه..
غرفه بإبتسامه؛تعالي نوريلك شن جابلي...
ومشوا الزوز خشوا داخل..
وتوجهوا طول للباب الفاصل..
ركبوا للشقه..وخشولها
ومشوا لدار النوم..
غرفه؛اهيا..
وخدت علبة مجوهرات وفتحها..
كان فيهم حديده وخاتم ذهب ابيض مرصغات بالزمرد..
الاء بدهشه:حي ياربي!!!شني هدا!!؟
غرفه:بش خالك شني ومن يكون..
الاء:واضح من السيارة اللي شفتها مدرسه برا..
ابتسمت تهكما وقالت:حكالي قداش كان بوي هازي ويحبط فيه ديما وسدرة تأيد فيه ديما يقولوله مش حيصير منك زي ماكانوا يقولولي نفس تعاملهم معاي..كان الواحد مامشاش في طريقهم وع هواهم يكون فاشل وماينفعش..
آلاء:فكرتيني بأمي واريج نفس المعامله..
غرفه سكرت العلبه وحطتها ع الكامدينو وقالت:امك واريج تحت تأثير سدرة شن ماتبي سدرة هما يديروا...
🍃وفي هالأثناء..
لما طلع مختار من الحوش..
مرر نظره ع الشارع..وثبتهم ع المهدي اللي واقف قدام المطحن وهو يتكلم بالتليفون..
ابتسم ومشاله ..
وكل خطوه يمشيها كان يتحول الشارع في عيونه للشارع ايام زمان لما كانوا يلعبوا مع بعض كورة..
ويجتمعوا تحت مظلة مطحن حوش شنيبه ويهدرزوا..
وصل فيه ووقف قدامه..
المهدي لما شافه تفاجئ..وحاول ينهي المكالمه بسرعه..
ومن القهوة عيون عبد القيوم كانوا ع مختار يشرب في القهوة وهو يشبحلها ويتسائل عنه في نفسه..
سكر المهدي وقال:شن دير هني؟
مختار بإبتسامه:الحمد لله بخير ونعمه شن حالك انت؟
المهدي؛فوت الطروح وقولي شن جابك..
مختار:شارعنا...اهلي هني..جيت لأختي معزوم..
المهدي:من اختك؟
مختار؛غرفه..
المهدي رفع حواجبه تعجبا وقال:كيف صار!؟
مط شواربه للأسفل وقال:عادي اختي وعزمتني وين المعضله؟!
المهدي:شكله ياما صاير..
مختار وهو مبتسم رفع حواجبه ونزلهم...
وعيون عبد القيوم مازالوا عليه..
بس بعدين غيرهم لربيع اللي كان جاي ناحيتهم وهو يشبح لمختار ويتفحص فيه وكأنه مشبه عليه..
وين وصل فيهم قال وهو عاقد حواجبه:مختار!
شبحوله الزوز..
مختار مرر نظره من فوق لتحت ع ربيع ماعرفاش..
ربيع ضحك وقال؛والله مختار!
المهدي ابتسم ع جنب وهو يشوف لنظرات الاستغراب من ربيع في عيون مختار..
ربيع تلاشت ضحكته وهويقول:شن الشبحات هادي راك تقول ماعرفتيش!؟
مختار:عدم المؤاخذه ايه ماعرفتكش..
ربيع ضحك بصدمه وقال:حي عليه هدا حي!..
ضيق عيونه وقال؛لحظه لحظه لحظه..الصوت..الحركات!..
ربيع:هاه..هاه..الصوت والحركات لمني ترا!؟
شبح مختار للمهدي..
والمهدي وهو يشبحله هز راسه وقال بضحكه:هو..
مختار وهو متفاجئ شبح لربيع وقال:سنان!
ربيع بضحكه:سنان يابروسلي..
قعد يضحك من جده وجاه ضمه..
وربيع ضمه وهو يضحك بعدين قال:خلوني نفقد الامل من شوفتك ياراجل.!
بعد عنه وقال:مني هادم؟
ربيع رفع حواجبه وشبح للمهدي..
مختار:اها..لاهدا ديما فاقد الامل مافيش في قاموسه في كلمة ممكن..ولابالك يصير..ولامعجزة..
عنده بس..التشاؤوم..الاحباط اليأس السريع..
المهدي:لاحظته يدوي زي جماعة المثقفين؟
ربيع بضحكه:الله يرحم ايام زمان اللي كان مش عارفه ينطق كلمة فلسفه..
قعدوا يضحكوا الزوز..
هو مرر نظره عليهم بإبتسامه وقال:مافي شي يقعد ع حاله..زيك انت ياربيع لدرجة اني اول ماشفتك ماعرفتكش..وانت يامهدي اللي يشوفك يقول من جيل بوي وبوك..
خفتت ضحكاتهم بعدين اختفت وكل واحد فيهم قعد يفكر في حاجه..
مرر نظره عليهم وابتسم بتهكم..
ونضال يشبحله وهو ماشي ناحية عبد القيوم وصل فيه وقال:تعرفه هدا؟
عبد القيوم شبحله وقال:مفروض انت اللي تعرفه..
نضال:علاش!؟
عبد القيوم:من سلامهم عليه واسلوبهم في الكلام معاه واضح انه من السكان القدم في الشارع..
نضال:كان من القدم هلبه مانعرفاش..ربيع نفسه ماعرفتاش لما جي..
عبد القيوم:ملامحه مألوفات ياشايفه قبل ياشايف حد يشبهه..
وهو ونضال قعدوا مركزين ع مختار وملامحه...
☘فهالوقت..
في حوش لطفي الواعر اللي يكون مختار ولدهم..
كانوا مقعمزين في دار المعيشه..
حدا العاله اللي دايرتها مطيرة شاهيها قاعد يطيب ع الكانون...
وهي فردوس وصفيه واريج يهدرزوا...
ومعاهم سدرة مقعمزة..
تشبحلهم كيف يهدرزوا وهي حاسه بشعور غريب..
كأنها منفصله عنهم..
كأنهم هما في جهة وهي في جهة تانيه..
شعور غريب حساته مش مفهوم..
وكأنها ميته وحية في نفس الوقت..
معاهم ومش معاهم...
فجاة..
ناضت وقفت..
مطيره؛بالله سديرة ع طريقك جيبي عريقات النعناع نسيتهم
تلقيهم في صفيرة فوق الرخامه..
سدرة؛حاضر..
ومشت طلعت من حداهم..
لما طلعت قعد يتلاشى الشعور اللي كانت تحس بيه..
وكأنها رجعت للدنيا وع ارض الواقع..
وقفت في مكانها وقعدت تقول:ياربي شن هدا!؟
ع فوتت اريج من جنبها وهي شاده جهاز النت وتقول:التغطيه ماتنفعش بكل اليوم..
سدرة:فوق في دار الخزين كويسه..
اريج وين طالعه من الحوش قالت بصوت عالي:ايه راكبتلها..
تنهدت سدرة..بعدين خشت للكوجينه..
🍃يللي كانت ضم فيها نجاح في حوشهم وتقلب في دواليبها وهي تردد في تاج الذكر..
وفي الصاله مقعمزين امها وبوها واختها عواطف يهدرزوا.
نجمه:اتفقنا اني والجارات نمشوا غدوة اللمه اليوم للعيله بس..
عواطف:وحني مش من العيله!
نجمه؛هدا اللي قالاته خديجه..
عواطف ضيقت عيونها وقالت؛هالخديجه هادي!
الصيد بحده؛هيا هني روحك واسكتي..
عواطف:خيرك بوي اللطف!..ندووا بينات بعضنا راهو..!
🍃واللي خايفه الصيد من زعلها..
قاعده عايشه في حالة من التوتر والغضب ماعالم بيهم حد الا الله..
لانها قدام الناس قاعده تبين في العكس تماما..
من جهة تانيه..
طوبى:اميمه نجاة واختها روحوا؟
اميمه؛من بكري..
طوبى:من غير مايسلموا؟
اميمه؛حسيت في حاجه صايرة الزوز كانوا متوترات واعصابهم..
طوبى؛لاحظتي هما وخديجه مش في السليم بالذات صابرين..
اميمه هزت راسها وقالت:لاحظت..وحاسه ان خديجه مش راضيه ع جيان نجاه هني..
طوبى بضيق:بصراحه حتى اني مش راضيه ومش عاجبني..واخده راحتها هلبه..
اميمه:هلبه..مرة خشيت الكوجينه لقيتها تهدرز مع عمر وواخده راحتها مافيش حدود بكل..
طوبى وهي تشبحلها بنظرة ضيق متسائله:قصدك حتى مع عمر!.
اميمه قعدت تشبحلها وهي ساكته تبيها تكمل كلامها..
غيرت عيونها عنها وقالت؛لما مشينا للعياده بش يعاين ولدها حسيت من هدرزتهم هي الجالي ان العلاقه بينهم زي علاقة الصحاب..تعرف عنه حاجات اني مانعرفهاش..
نزلت اميمه عيونها لإيدين طوبى..كانت تتكلم وهي طربق في اصابعها..
طوبى:يعني علاقتهم كلهم بيها فري زي مايقولوا مافيهاش حدود..بس يعني علاش ملاحظه ان عمر متحفظ هلبه معاي والجالي معاك رسمي هلبه..
اميمه:ممكن لأننا جدد مش واخدين علينا زيها هي ليها سنين معاهم من 2009..
طوبى هزت راسها وقالت:صح..صح..
سكتوا الزوز وهما يفكروا في نفس الموضوع..
طوبى حطت ايديها ع رجليها وقالت:لاحظتي حركة السلسله اليوم..
اميمه وهي تشوف لطوبى بنظرات فيها شي من الضيق:ايه..
طوبى:ماقدرتش نفهمها..يعني ع خاطر جت في خاطرها تحط هداكا المبلغ بش تشريها..وهي في العرس شارية تاكم ذهب غالي..يعني لو تخدم من سنين نقول داسه مبلغ باهي..بس يعني ليها عام..ومع الغلاء اللي عايشين فيه كيف تلايم!؟قداش يعطوا فيها يعني..
اميمه بدون اراده منها لقت روحها تبرر لطوبى:نسيتي ان عمي مخصص للصغار مبلغ..والقضيه عليهم حتى هي..
يعني اللي تاخده تصرف بيه ع روحها..وع حسب ماشفت قبل انهم دارولها ذهب هلبه في عرسها هدا غير اللي جاها هدايا..يعني مرات باعت اوصرفت وزادت ع حقهم وخدت بيهم ذهب جديد..
اقتنعت طوبى بكلام اميمه وقالت؛صح راح عن بالي هدا كله..
اميمه"ياربي علاش نطمن فيها بالكذب!"
طوبى ابتسمت وقالت:مرة تانيه الواحد مفروض يقعمز مع روحه ويقعد يفكر كويس بش مايحط ذنب حد في رقبته..
مابتش اميمه تسألها عن قصدها تجاهلت شن قالت وغيرت الموضوع طول:لاحظتي عائشه..
شبحولها الزوز..
طوبى:ايه ضاعفه هلبه..
اميمه:هلبه هلبه..في عندها مشكله صحيه ..
طوبى:علاش ماتسأليهاش بالك تطلع فيها حاجه وتساعديها..
اميمه؛فكرت نسألها بس تحشمت..خصوصيات مانقدرش ندخل فيها الااذا هي تكلمت ..
طوبى وهي تشوفلها:مزبوط..مرات ماتحبش تدوي في حاجات زي هادي مع حد..
☘☘☘☘
"خل نشوفوا يوم نديروا فيه زردة حني وولاد الشارع نردوا ايام زمان"
المهدي:شوف البي مختار مرات جدوله معبي.
مختار بضحكه:زي ماقال اسطى القهوة الفترة الجايه كلها مشغول برا البلاد بعد نفضى نروح ونتلاقوا ونحددوا اليوم المناسب..
ربيع:Ok..بعدين ضحك وقال..بكل ياراجل متغير ع الآخر مولي راقي لين فايت فيه..
ضحك المهدي..
مختار:ايه تعالي هني قولي.. شن الغباء اللي عندك هداانت كيف تخلي السويد وتروح هني..!؟..
ابتسم ربيع وقالت:بلادك بلادك ياموخا هي بس اللي تحسك..
المهدي:صدقت..
مختار:اما بلاد هادي..قصدكم انتم تسموا فيها بلاد هادي اللي انتم عايشين فيها!؟..
هما الزوز ماردوش..
لما شافوا علي الواعر وولده لطفي كيف روحوا من الصلاة معاهم عبد الرؤوف اللي كان يبي يفتح معاهم موضوع مختار لكن ماعرفش كيف من كثر ماكان خايف من ردة الفعل..
☘لطفي:هي نمشوا نشوفوا الحاج محمد..
علي هز راسه وقال:هي..
وقفوا ع الطريق وهما يراجوا سيارة تفوت..
بعدين قصوا الطريق وعبد الرؤوف معاهم..
جو عيونه ع مختار وهو واقف ع المهدي وربيع وعاطي بالظهر..
غمض عيونه وضم فمه لداخل بشده..
لما قصوا الطريق..
لطفي شبح جهة المهدي جي بيسلم من بعيد..
بس وين شاف اللي عاطيه بالظهر..
وقف..
طوله..شكل راسه من الخلف..
طريقة وقفته..
حس انه يعرفهم ويعرف صاحبهم كويس..
علي:لطفي خيرك وقفت..شبح وين مايشبح مافهمش شن هو اللي شافه خلاه يوقف فجأة.
🍃مختار:البقعه اللي سماها ليبيا هادي لعنه ع كل من يعيش فيها..
ربيع وهو يشوف للطفي قال بشي من التوتر:الله غالب..
شبح مختار للمهدي وقال؛وانت يافيلسوف خيرك ساكت!؟
لاحظ انه يشبح لنفس الجهه اللي يشبحلها ربيع..
ركز ع نظرات عيونه...وفهمها..عرف هو لمن قاعد يشوف..
شاف لربيع لقاه يشوفله هو بنظرات برضو فهمها..
ونبضات القلب وكأنها ولت بطيئة...حس بقلبه غاص في احشائه...
بلع ريقه...
ولف راسه يمينه ومش قادر يلتفت للخلف..
🍃ومن فوق سطوح حوش لطفي..
طلعت اريج من دار الخزين..
دارت طله ع الشارع وهي لابسه برنوس التوته متاعها ع راسها..كانت تبي تشوف نضال..
بس عيونها جو ع مشهد صدمها...
جدها وخالها مختار...!
كان مشهد مخيف...ردة الفعل فيه هي اللي تخوف..
لقت روحها ماشيه للدروج نزلت تجري..
لين وصلت لوطا وخشت للحوش..
مشتلهم الدار..
خشت عليهم وهي داهشه تقول:جدي وخالي مختار تلاقوا!
فزت سدرة وطلعت بسرعه وفاتت من حداها..
وفردوس ومطيرة ناضوا لحقوها بسرعه..
🍃هي جبدت وشاح من الشماعه حطاته ع راسها وطلعت تجري للدروج..
نفس الشي داروه مطيره وفردوس ولحقوها..
واريج معاهم..
وقعدت صفيه بروحها وهي تدعي وتقول:يارب عديها ع خير ياسرنا من العار..
🍃وصلت سدرة اول وحده وقفت ع السياج تتفرج عليهم وقلبها يدق بقوة من الخوف...
وهما لحقوها وقعدوا يتفرجوا بخوف وترقب..
☘علي؛لطفي شن جاك!..
عبد الرؤوف وهو يشوفله بقلق:عمي..
وهو مايسمعش فيهم شن يقولوا..
كان مركز بكل حواسه مع الشخص اللي عاطيه بالظهر..
اللي واخيرا التفت وشبحله...
الحاج علي لما شافه انصدم بقوة..
اما لطفي..
مر قدام عيونه شريط ذكريات مؤلم الم قاتل..
الم تسبب فيه الشخص اللي واقف مقابله..
الم مايشبهاش الم في الدنيا هادي كلها..
موعرها.
موعرها ع الأب والأم يجيبوا ولد ويربوه ويكبروه وهما متأملين فيه خير..
متأملين فيه يكون هو الدوا..والسند..والمعين من بعد الله..
ويطلع دا...وهدة حيل وكسرة ظهر وخيبه كبيره...
سدرة وهي تشوف لبوها دموعها نزلوا..
فاهمه وعارفه هو بشن يحس توا..
والمهدي شافها وهي واقفه تشوفلهم وهو فاهم وعارف شن قاعده تحس..
عقد علي حواجب بغضب وقعد يشبح لولده..
ومختار يشوف لعيون بوه يبي يحاول يفهم نظراته مش قادر..
بس كان حاس بشي من الحنين تحرك بداخله اتجاه بوه برغم حقده عليه..
وكيف جت رجله بتتحرك خطوه القدام..
غير بوه عيونه وقال؛هيا بوي..
ومشي..
وعلي شبح لمختار من فوق لتحت بنظرات انكار..
بعدين مشي خش مع ولده..
🍃سدرة بألم:زي ماتوقعت..
تنهدت بوجع..ومشت نزلت من فوق..
وعيون المهدي تلحق فيها...
زي مالحقتها اريج قلقا عليها..
اما فردوس ومطيره قعدوا واقفات..
مسحت مطيره دموعها وقالت:شعره مصفيه الشيب ومتصلع.
فردوس رشفت وقالت:بس قاعد قنين زي زمان..تتفكري امي قداش كانت تخاف عليه..
مطيره؛كانت تحبه هو حب بروحه مافيش منه..لكن ياخسارة زرعت ورد وحصدت حنضل..
☘وهو تمالكه الغضب من موقف بوه اللي كان من موقف سدرة...وزاد حقده عليه مشي طول وصل في سيارته فتحها وركب
شغلها وتحرك وهويحرق في العجل وطلع من الشارع..
المهدي؛واعر الموقف
ربيع؛خيي بكل ياراجل
عبد الرؤوف:معليشي يقعد بوه مهما دار واكيد حيجي يوم ربك يحنن فيه القلوب ويردهم لبعض
ربيع:صدقت..ربي يهديهم لبعض..
عبدالرؤوف:آمين..
المهدي:كان عندك؟
عبدالرؤوف هز راسه وقال:اني اللي ردتيه..
وهدا كله كان ع عيون عبد القيوم اللي قال في نفسه..
"زعم شن يقرب لعيت الواعر..واحد من عيال الحاج علي..يشابه الحاج لطفي..ويشبه حد تاني مش قادر نتفكره..
شكلها قصته قصة حتى هو لاحول ولاقوة إلا بالله العلي العظيم..."
☘☘☘☘
الساعه 7:30بعد المغرب..
وصل الجالي طوبى لحوش اهله اللي بتبات عندهم الليله..
وفهمها انه حيروح للفيلا يبات فيها..
لكن الحقيقه..
🍃نجاه وهي تلبس في البوت متاعها:هيا ياصابرين..
جتها صابرين تجري بالساكو:هاك فيه كل شي..
خداته وباستها من خدودها وقالت:مش حنوصيك ع الصغار..
صابرين:في عيوني ياهبله..
نجاه:بعد نطلع سكري باب الحديد كويس وباب اللوح سكريه بالقفل..
رن تليفونها..
صابرين؛جي راجلك هي بسرعه بري..
نجاة:سلام..
ومشت طول طلعت..
وصابرين سكرت البيبان كويس..
☘طلعت من العمارة ومشت للسيارة..
حطت الشنطه في من الخلف بعدين ركبت جنبه..
الجالي بإبتسامه:نورت ياحلو..
هي ابتسمت وشافت للطريق..
وهو ابتسم ع جنب وتحرك طول...
☘☘☘☘
علت صوت الراديو وقالت:قريب يبدا..
طوبى وهي تشوف لتليفونها وتضحك:فرخه اريج شن دايرة في بروفايلك انتي..
الاء:غريبة اطوار..
اريج:اسكتي انتي..
طوبى بضحكه:معدنوسه الشتاء!؟
الاء:وصورة البروفايل ربطه معدنوس..
اريج:حسابي واني حره فيه ان شاء الله نسمي روحي عصبانة العيد شن دخلكم فيا..
ضحكت طوبى..
وآلاء وهي تشوف لتليفونها قالت:الله يرحم ايام Bugs Bunny وروجه التاجوري هالاسم المشبوه...
اريج:باهي خلاص اسكتي وخليك في برنامج خطيبك..
فجأة..
رن تليفونها بنغمة رساله..
فتحتها وقرتها..
(شن العار اللي دايرتيه ع صفحتك اسمك ولى ملفت اكثر من قبل شفتي قداش كلب ردوا ع تعليقك في صفحة شن حالك ياليبي!؟)
ردت عليه
(شفتني كلمتهم؟)
(اسمعي ياتغيري البروفايل يانسكرلك حسابك)
(تسكر عينك..ماهو غيرته لما قتلي غيريه !؟)
(ديريه حاجه مش ملفته..زي خطيبة نضال شنيبه..ملك مقدس لنضال شنيبه..قرة عيني نضال شنيبه..)
(نضال شنيبه هدا يبي مسواق ع ظهره)
بعتها رموز ضحك تعبيريه بعدين قال..
(باهي غيريه يافستق لحاجه عاديه)
(والله والله لما يقعد معندوسة الشتاء ماني مغيراته)
(مات في راسك حمار ياشمطاء..تمام يقعد لكن معاش تعلقي في الصفحات العامه)
(حاضر)
(الله ع كلمة حاضر كيف طلعت منك.. )
(باهي خلاص وانت استانست سلام)
وطلعت من الماسنجر وحطت التليفون جنبها وهي مبتسمه..
اما خالتها طوبى كان حاطه راسها ع المخده وهي منسجمه مع برنامج مهند...
⭐مهند..
[اسوأ انواع الوحوش هم من يعلمون كيف يتصرفون بشكل طبيعي مثلي ومثلك..حتى إن بعضهم قد يبدوا طبيعيا لدرجة تجعلنا نبدو بجوارهم اشرارا او منحرفين..وهنا تكمن الصعوبه]
شن رايكم في الاقتباس هدا مستمعينا؟
متأكد ان هلبه منكم بعد ماسمعوه مروا قدام عيونهم صور لوحوش زي هادوا كانوا في حياتهم..
هلبه ناض عليهم وجع طعنات من هالوحوش اصحاب الوجوه الاليفه اللي تلبس في ثوب الحمل الوديع..
اهم جمله في الاقتباس..
هنا تكمن الصعوبه..
الصعوبه في انك تكشف ناس زي هادي ع حقيقتها..
حقيقتهم تطلع بروحها بعد ماتتلقى منهم الضربه القاضيه بعد فوات الاوان..
🌸اريج:والله صح ياما عرفت زيهم الاشكال هادي ومااكتشفت حقيقتهم الا بعد ماكليت منهم كف مليح..
وطوبى تسمع فيها وهي تفكر في الكلام كله..
كلام مهند وكلام اريج ومش عارفه علاش قلبها قبضها..!
اما آلاء كانت خاشة ع صفحة البرنامج..
ع المنشور اللي منزله مهند يحكي عن موضوع الحلقه..
"يامزوق من برا"
🍃والمزوق من برا مقعمز يتعشى هو ومرته الاولى في وحده من المطاعم البعيده ع العين..
وباش يكون مطمن اكثر حجز في طاوله من الطاولات الخاصه باش مايشوفهم حد..
وكان هو وياها يهدرزوا ويضحكوا..
ولاكأن نجاة اليوم صار معاها اللي صار....
☘واختها صابرين..
بعد ماعشت الصغار ورقدتهم..
قعمزت بروحها تتفرج ع فيلم اجنبي..
البطل متاعه ملامحه ذكروها بملامح الشخص اللي شافاته اليوم..
قعدت تتفرج ع الفيلم وهي تتأمل في البطل وع وجهها ابتسامه قعدت متمسكه بملامحها مابتش تتحول...
#اهرجو_يناير
#طوبى
....يتبع في التكمله بإذن الله....
#تكملة_الجزء_الحادي_والخمسين
"اهرجو يناير"
#طوبى "اقحوان وفله وياسمينه"
#جمان_فريد
🍃
🍃وخلوا خديجه عايشه ع نار..
روحت من حوش اماليها بكري ع غير عادتها..
نزلت راما لحوش جدها..ومطمنه ان محمد قاعد حدا قهوة خاله نضال..
وبهكي فضالها الجو بش تحساب راجلها محي الدين .
☘مقعمزة ع الصالون وقدامها التلفزيون مفتوح..
حاطه رجل ع رجل وهي تهز فيها بعصبيه..
وتتصل بمحي وتعاود ويعطي فيها مقفل..
فجأة..
وصل لمسامعها صوت زي صوت العياط..
ماكانش واضح هلبه بسبب صوت المولد..
كانت بتتجاهل الصوت لولا انه ولى قريب..
قعدت تسمع..بعدين ناضت حطت تليفونها ع الطاوله..
ومشت تجري لدار النوم..خدت بالطو ووشاح لبستهم بسرعه فوق التوته..
ومشت تجري طلعت من شقتها..
وين نزلت لوطا كان صوت المولد اوضح واقوى ماتسمعش في غيره بحكم انه قريب ع دروج شقتها...
وصلت لوطا ومشت لفت ع الجنان..لين وصلت قدام الحوش شافت سلافها وعمها متجمعين...وحداهم ع دروج فم الحوش نجمه مقعمزة تبكي..
وعواطف ونجاح وراما واقفات وراها...
وحده بادي ع وجهها الخوف والتانيه تبكي بصمت..
وراما وجهها شاحب اللون وتبان مصدومه..
خديجه بخوف؛ان شاء الله خير ياعيله شن صار!؟
سلافها وعمها وهما يشبحولها ماعرفوش شن يقولوا..
ونجمه قعدت تبكي..
وحمواتها يشبحولها...
بس بنتها راما اللي جاوبتها لما جتها تجري وحضنتها وهي تقول بنبرة مرتعشه:بابا دار حادث ماما..
من قوة الصدمه خديجه بعد ماسمعت الخبر معاش حست بشي وطول طاحت مغمى عليها..
🍃ومحي يسعفوا فيه في مستشفى عام..
كان فاقد الوعي وينزف هلبه...
ولولا الواسطه اللي عند اهله في هديكا المستشفى ماكانوش اهتموا لحالته بجديه..
☘سمعوا باللي صارله نساباته..
مشوله المهدي وعمرونضال مع خوته وبوه للمستشفى
ومغليه مشوا هي وعائشه واميمه لحوش الصيد
خديجه ببكي:علاش ماخلونيش نمشي معاهم راجلي هو من حقي نمشي نشوفه..
مغليه بقلق والم؛تي غير وين بتمشي يابنتي بداعكي الرجاله!
قعدت خديجه تبكي بدون ماترد
نجمه ودموعها ينزلوا:ادعيله يابنتي ادعيله ماينفعه كان الدعاء توا
واميمه وعائشه ونجاح وعواطف وراما مقعمزات حداهم بصمت وكل وحده كانت عايشه حالة تختلف عن الاخرى..
اللي شفقه واللي قلق..
واللي خوف واللي حزن..
وراما تبكي..
شويه ناضت نجاح ومشت طول لدارهم..
خشت وسكرتها عليها وهي تبكي بصمت...
شافت للمصحف والمسبحه اللي حداه..
وتفكرت كلام سمعاته قبل وقعد محفوظ في الذاكرة..
《 اهم شي ماتقعديش تستني امتى اللي تبيه يصير وتتوقعي ان كل شي تبيه حيصير في رمشة عين..
مرات ربي يكون قاسملك خير من اللي تتمنيه..راحة البال..
اللي ياما منهم متزوجات وبصغارهم فاقدينها..يامنهم يلعبوا بالفلوس لعب ومش محصلينها..راحة البال حتى في وقت الشده تلقيها تكوني في عز الشده متاعك لكن بالك مرتاح ومطمنه وواثقه ان ربي مش حيخليك..》
خدت نفس بعدين مشت قعمزت ع سريرها..
خدت الخاتم من ع الكامدينو ولبساته..
بعدين خدت المصحف وفتحاته وين ماوقفت في الورد وبدت تقرا..
☘☘☘☘
"لازم يطلع من هني لمصحة ماعندهم شي ياراجل"
المهدي:مزبوط كلام ولدك عمي الصيد لازم يطلع لمصحه يدير فيها العمليه..
الصيد وهويكاد ينهار من الخوف:ديروا رايكم ديروا رايكم المهم لحقوا عليه قبل لتصيرله حاجه..
☘ونقلوا محي لمصحه معروفه بسيارة الإسعاف
واول ماوصل دخلوه العمليات بعد ماداروا معاه اللازم..
🍃ساعات عاشهم تحت العمليه وهو مش واعي...
عاشوهم زوجته واهله وصغاره وهما واعيين بخوف وترقب والم..
🍃نسرين كل شويه تتصل بأختها وتسال..
وحامد اللي يحاول يبيض صفحته مع المهدي حتى هو اتصل مرارا يسأل عنه..
☘وفي نفس المصحه..
كان في شخص موجود مع حد قريب عليه..
صدفه شافهم عرف الصيد وولاده...
وطول مشالهم يبي يعرف شن صاير معاهم...
لما وصل فيهم..
طلعت الممرضه من غرفة العمليات وهي تقول؛محتاجين دم لو سمحتوا ضروري..
كلهم قعدوا يشبحوا لبعضهم...
المهدي:شن زمرته هو؟
واحد من خوته:B...
"اني نعطيه"
كلهم شبحوله..
الممرضه بإستعجال؛بسرعه ياخوي تعالى..
ومشت وهو مشي معاها بسرعه..
وهما معاهم بعيونهم وقعدوا يتسائلوا.
"من يعرفه هدا؟"
الصيد:وجهه مار عليا شايفه لكن مش متفكر وين..
واحد من ولاده:حتى اني حسيت زي اللي مار عليا..
نضال:اني متفكره كويس..
كلهم شبحوله..
نضال:قريب الراجل اللي كان نسيبكم قبل..شايفه يوم الفاتحه...
الصيد:ايه والله صح هو...
:جاينا بتعني؟!
المهدي:شكله شافكم صدفه وعرفكم وجاي يسأل..
:شكله هكي...
☘وزادو محي الدم..وانتهت العمليه وكانت ناجحه وحالته حاليا مستقرة...
وهالخبر وصل لعيلته اللي تنفسوا الصعداء بعد سمعوه..
بس خديجه مازال ارتاحتش..ومش حترتاح لين تشوفه بعيونها..
☘☘☘☘
"بارك الله فيك ويرحم والديك"
:والدينا ووالديك ياعمي..ان شاء الله ينوض سالم...
الصيد:آمين..عندك حد هني؟...
؛ايه ولدي حاشاك طاح ع يده انكسرت..
الصيد ؛كم عمره؟.
:خاش خمسه سنين ..
الصيد؛وشن صاير فيه توا؟
:جبسوهاله ومشت الامور...خليته مع العويله بروحهم وجيت نشوف شن صاير معاكم..ضحك وقال..هي نستأذن توا وان شاء الله لاباس على ولدك..
الصيد بإبتسامه؛بارك الله فيك مرة تانبه ولاباس ع ولدك حتى انت..
ابتسم وهو يقول:لايوريك باس هي السلام عليكم..
الصيد؛وعليكم السلام..
☘☘☘☘☘
"قطعت قلبي راما تأثرت هلبه باللي صار"
عمر وهو متكي ع السرير:مالا شنو مش بوها؟..
اميمه وهي مقعمزة قدام المرايه سرحت بتفكيرها بعد سمعت جملة عمر..
هو لاحظها وقال:معاش سمعتوا شي عن بوك؟
حركت راسها بالنفي..
عمر:مرات ينتحر راهو..
التفتت وشبحتله.
عمر:ايه تصير بوك حبه للفلوس مرضي واللي خسره مش مبلغ بسيط..استغربت كيف ماجاتاش سكته قلبيه..
ضيقت اميمه عيونها وقالت:كأنك قاعد تنكت ولاتتسهوك صح..
عمر:كأنك انتي اللي واقفتيلي ع الكلمه بصارة جديات..من كل شي متحسسه..
شبحتله شويه بعدين لفت وجهها للزيانه خدت منها الكريم بش تحط منه ع ايديها..
عمر:باهي في الجديد نسكت بكل معاش ندوي..
اميمه قعدت تدهن في ايديها وهي متنرفزة منه ودموعها عبوا عيونها..
فجأة..
تليفونها رن..
عمر ركز معاها..
وقعد يتسائل في نفسه..
من اللي يتصل بيها في الوقت هدا؟
هي حطت الكريم ع الزيانه وخدت التليفون..
لما شافت المتصل لون وجهها انخطف..قامت عيونها للمرايه وشبحتله وقالت..رئيس المجموعه اللي
اني فيها دكتور قصي..
عمر ناض قعمز وهو يقول:شن عنده متصل توا؟
اميمه وهي تحاول تخفي ارتباكها:اكيد في حاجه مستعجله..
عمر وهو عاقد حواجبه:افتحي المايك..
هي طاوعاته لأن الموقف مش متحمل تحديات..
ردت وفتحت المايك..
اميمه:ايوه دكتور..
"اميمه اسف اللي اتصلت في وقت زي هدا بس غدوة ضروري تكوني موجوده ليك تلاته ايام اجازة خلاص"
اميمه بلعت ريقها وهزت راسها وهي تقول:حاضر دكتور..
"تمام"..
وسكر..
نزلت اميمه التليفون..
وعمر نزل من السرير وقال:هدا خيره يكلم فيك هكي!؟
اميمه:هو هكي اسلوبه..
عمر: اسلوبه في الحوش مش مع الناس اللي يخدموا معاه..يحسابك تخدمي عنده التافه هدا..فوتيه غدوة وماتمشيش.
اميمه بخوف قالت:طبعا لا مستحيل..
عمر:وعلاش ان شاء الله!
اميمه:ملزمه نمشي لما يطلبني بعدين اني ليا 3ايام مامشيتش مش في صالحي الغياب..
عمر بنرفزة:مش عارف علاش سيبتي التخصصات اللي تناسب المراة واخترتي الطب..
رفعت حواجبها وقالت:جديد الكلام هدا!؟
ولى للسرير وخشله ورقد وهوعاطيها بالظهر وماباش يرد بكلمه..
قعدت تشبحله بنظرات عصبيه وقلق..
بعدين ناضت مشت طفت الضي وطلعت من الدار...
☘☘☘☘☘
حطت قدامه سفره فيها تسالي وفواكه.
وقعمزت مقابلاته..
هو خدي حبة لوز ووكلها وهو يقول:تعرفي اللي نحسه معاك وين نجيك نتمناه يقعد معاي ديما..
نجاة وهي تاكل رفعت حاجبها وقالت:امم..بعلامة اللي سمعته اليوم يافالح!
عقد حواجبه وقال:شن سمعتي!؟
نجاة:لعبتك اليوم قالت فتحت معاك موضوع زواج ليا وانت قلتلها شوفيها بالك توافق
اختفت ابتسامته وبدت ع وجهه ملامح الصدمه:كيف!!؟
نجاة؛بلاش طروح جالي نعرفك اني راهو..
دف السفره قدامها وناض وقف وقعد يقول بخوف؛طوبى قالت هكي متأكده!..
نجاة؛مش مصدقني نتصلك بصابرين بش تتأكد منها..
زادوا توتره وخوفه وهو يقول بعصبيه:ياغبيه طوبى ولامرة فتحت معاي موضوع زي هدا بكل..
نجاة بإندهاش:شني!؟
هو قعد يعرق..ويفرك في جبهته بيده وقال؛بلعاني دارت هكي بلعاني..بلعاني..
نجاة قعدت مركزه ع حالته كيف ولت خافت معاش بت تتكلم ..
هو مشي طول خدي تليفونه من ع الزيانه..
اشر عليها بسبابته وقال:ردي بالك تتحركي من مكانك..
وخدي كبوطه من ع الشماعه ومش طلع من حداها ومن الشقه كلها..
وهي بغل خبطت يدها ع الكامدينو اللي جنبها...
☘هو بعد طلع برا..
اتصل بطوبى مرة لين فصل ماردتش..
عاود تاني ماردتش..
معاش قعد فيه عقل..
ولى خش مرة تانيه للشقه..
خدي مفاتيح سيارته من ع المدخل وطلع مرة تانيه..
وع طلعة نجاة من دار النوم هو سكر باب الشقه..
وهي تشبح للباب بنظرات غيظ مغرقتها الدموع..
☘☘☘☘
⭐وفي النهايه نقولوا معاش تحكم ع حد لين تعاشره...
ومش العشرة اللي في وقت الرخاء لما يكون جوكم مع بعض مليح واموركم لوز اللوز لا...تنعرف معادن الناس في الشده..
اللي تمسح الغشاوة ع عيونكم وتخليكم تشوفوا اللي حواليكم ع حقيقتهم..وتعرفوا المغشوش من الصافي..
تنهد ووقال..والى هني مستمعينا نكونوا وصلنا لنهاية حلقتنا الليله..نتلاقوا الاسبوع الجاي..في نفس اليوم وفي نفس التوقيت وموضوع جديد معايا اني مهند بن زايد..
تصبحوا ع خير⭐
طوبى وهي شاده في صونيه شيبس تاكل قالت:امم..يهبل يهبل البرنامج واسلوبه الله يبارك..
اريج؛موضوع اليوم عجبني هلبه...
آلاء وهي رافعه حاجبها قالت:لاحظتوا ان من لما خطبني معاش بدي يقول في شعر اخر الحلقه اللي يهدي فيه لحبيبته..
اريج:حبيبته وحازها ياحنه ماعنده علاش يدير في جو صامت كل حلقه بش يقولوا محلاه كيف يحب خطيبته ياناس ..
طوبى ضحكت...
آلاء:اني نبيه الجو الصامت هدا..
فجأة رن تليفونها شبحتله وقالت:جيت برجليك تو نوريك..
وناضت ومشت طلعت من حداهم..
طوبى بضحكه:ياناري عليه..
أريج:مداير حاجه في عمره مش كويسه اللي انبلي بيها..
طوبى:زعما نضال داير نفس الشي!؟
اريج بغرور مصطنع:مداير الخير كله وامه داعيتله في ليلة قدر..
ضحكت طوبى وهي تقول:العبد الواثق..بعدين ناضت وهي تقول..خل نمشي نجيب تليفوني من الصاله نسيته في الشحن..
اريج:تو بتلقي 50مكالمه فائته من جلاجل..
طوبى وهي طالعه:لاالجالي توا في سابع حلمه..
ومشت للصاله..
وصلت فيها وخشتلها..شافت لتليفونها لقت الشاشه متاعه تضوي..
وصلت فيه لقت الجالي يتصل بيها..
فكت التليفون من الشحن وردت عليه..
طوبى:السلام عليكم..
🍃هو من السيارة المدرسه قدام المطحن...
الجالي:بالله عليك وينك وين!؟..وين حاطه تليفونك!؟
"نسيته في الشحن ماكانش بحداي.. خوفتني جالي صايرة حاجه!؟"
غمض عيونه محاولة منه تهدئة نفسه بعدين قال:طوبى بيات بعيد عني معاش في تمام..
"جالي..خيرك شن جاك فجأة؟"
فتح عيونه وقال:ماقدرتش نقعد بروحي من غيرك..ماقدرتش نرقد وانتي مش جنبي تهدرزيلي وتغنيلي..وتقري قرآن حداي..حبيبي...البسي واطلعي بنروح بيك لحوش بوي..
ضحكت وهي مصدومه وقالت..
"مش من جدك جالي!"
الجالي:من جد جدي ياطوبى اني توا وصلت لحوش بوي تمام..خل نخش نشوف الجو بعدين نجيك نروح بيك تمام..
🍃حطت يدها ع جبينها وهي مغمضه عيونها وتضحك...
"طوبى نكلم فيك"
هزت راسها وفتحت عيونها وهي تقول:تمام تمام..
"حبيبة قلبي وروحي..عطيني ربع ساعه بس"
طوبى بضحكه:تمام تمام..
"يللا سلام عيوني"
طوبى:سلام..
وسكرت وهي تضحك بعدين خدت الشحن ومشت للدار..
🍃وهو بعد سكر بدي يكتب في رساله وبعتها لنجاه..
وصلتها..
وهي تبكي..
فتحتها وقرتها..
(وتي روحك جاييك بنروح بيك)
قعدت تتنفس بقوة من الغضب..
وقعدت تخبط في التليفون ع السرير وانهارت بالبكي وهي تقول:الله يلعنك ويلعنها..الله ياخدها الكلبه الحقيره وياخد خديجه الشيطانه..يارب خديجه هادي تبليها بمصيبه معاش تطلع منها ياربي..
وناضت وهي تبكي..
بدلت حوايجها ولمت حاجاتها..
وماوقفتش بكي ودعي ع الكل..الاالجالي لان قلبها ماطاوعهاش..
برغم كل شي يديره فيها مش هاين عليها..
بس هالمرة قررت تاخد موقف..
لما وصل للعمارة..نزلت طول..
ومشت ركبت بدون ماتقول كلمه..
وملامح وجهها كانت متجهمه واثر البكي باين عليها..
هو تجاهل هدا كله..تفكيره كان محصورة في طوبى ..
طوبى اللي بدت تشك..
ولو خش الشك في قلبها وبدت تبع فيه معناها حتعرف كل شي..
ولما تعرف اكيد حتخليه..
وهو لما يوصل بتفكيره لهالنتيجه يجن جنونه..
حط نجاة تحت العمارة وهو مش مهتم لشعورها ولاشن كانت تحس بعد اللي داره فيها..
بس اللي زيها يستحقوا..هي اللي رخصت نفسها وتنازلت هلبه بش وصلت روحها لهالحاله...
🍃وهو طول روح لحوش بوه..
ركب لجناحه يجري..خدي دوش ع السريع..
والحوايج طول حطهم في الغساله من غير مايشغلها
كل همه ان طوبى ولابأي شكل تشم ريحة عطر نجاة في حوايجه..
لازم ياخد احتياطه من هاللحظه..
لبس طاقية صوف ع راسه..
وحط برنوس البالطو فوقه..
وبسرعه مشي طلع من الحوش وتوجه لحوش لطفي الواعر وهو ماشي ع رجليه..
الدنيا ليل..والشارع فاضي مافيه حد..
سكون تام..حتى الضي جي..يعني مافيش ازعاج اصوات المولدات المتداخله اللي تخبط في الدماغ..
وصل في الحوش..ورن ع طوبى..
هي طول فتحت الباب وطلعت وهي تضحك بدون صوت بعدين قالت بهمس:مختش..
هو حاوطها بذراعه وقال بإبتسامه؛روح المختش..
طوبى وهي تفنص قالت بهمس:حول جالي في الشارع راهو!..
وزع نظره ع الشارع وقال:غير من فيه الشارع!؟ تعالي ياهبله تعالي .
ومشي بيها لحوشهم..
وكان شادها بقوة..
وهي حست ان فيه شي مش طبيعي بس قعدت تهرب من احساسها..
خشوا للحوش وركبوا لجناحهم..
ومافيش حد من اهل الحوش حس بيهم..
كلهم راقدين بتعب من بعد ماأجهدوا اعصابهم ع اللي صار في راجل خديجه..
☘☘☘☘
"زعمه منجوهي يدير هكي حتى هو"
آلاء بضحكه:مش حيخليك تباتي برا من الاصل..
اريج:لا والله غير يعبى شن بنقعد ديما خليقتي في خليقته نفد منه ويفد مني لاالا...
قعدت تضحك آلاء..
سكتوا الزوز وهما لاهيات بالفيس لعند ماقالت الاء وهي منقرقه:شفتي الخبر متاع الحوازة اللي في*****
اريج بقرف؛ايه شفته سحيقه ومسحق..
☘نفس الخبر قراته خديجه وهي سهرانه ع الفيس بعد ماجفاها النوم..
نفس الحوازة اللي تكلم عنها محي وقال يبي يشريها..
كانت مصدومه وهي تقرا في الخبر..
بعدين قعدت تفكر..
"محي مايديرش هكي مستحيل والله مايديرها... في حاجه غلط في إن"
وقعدت طول الليل تفكر وتحاول توصل لنتيجه ..
☘ولوطا..
حماتها كانت راقده..
ومن ملامح وجهها اللي كلها ضيق وهي راقده كان واضح انها تشوف في حلم..
☄شافت انها تجهز في روحها بش تحضر عرس..
بعد ماكملت مشت بطلع كندره تلبسها..
لما فتحت المدخل لقتهم كلهم قدم ومش حلوات..
ماعدا وحده عجبتها بس ماكانش في منها غير فردة وحده..
قعدت دور عليها وهي مضايقه وبتبكي وتقول..
"العرس بيفوت عليا"
لعند ماساح المكياج عن وجهها وشعرها ولى منكوش
☄فاقت ولقت روحها حاسه بنفس الشعور االلي في الحلم..
قعدت تفكر فيه للحظات..
بعدين مسحت بإيديها ع وجهها..وضمتهم ع بعض وحطتهم ع بطنها وهي تقول بصوت منخفض:قالتلي ماتوقفيش مهما يصير معاك
خدت نفس وغمضت عيونها بعدين قعدت تقول..
لاإله إلا الله وحده لاشريك له له الملك وله الحمد وهو على كل شي قدير..الحمد لله..وسبحان الله ولاإله إلا الله والله اكبر ولاحول ولاقوة إلا بالله...ياذا الجلال والاكرام اكرمني بالشفاء...ياذا الجلال والاكرام اكرمني بعطاء ليس له حد ولاند...
☘عن النَّبِيِّ صَلَّى اللهُ عَلَيْهِ وَسَلَّمَ، قالَ: «مَنْ تَعارَّ مِنَ اللَّيْلِ فقالَ: لا إِلَهَ إِلَّا اللَّهُ وَحْدَهُ لا شَرِيكَ لَهُ، لَهُ المُلْكُ وَلَهُ الحَمْدُ، وهو على كُلِّ شَيْءٍ قَدِيرٌ، الحَمْدُ لِلَّهِ، وَسُبْحانَ اللَّهِ، وَلا إِلَهَ إِلَّا اللَّهُ (5)، واللَّهُ أَكْبَرُ، وَلا حَوْلَ وَلا قُوَّةَ إِلَّا بِاللَّهِ. ثُمَّ قالَ: اللَّهُمَّ اغْفِرْ لِي أَوْ دَعا اسْتُجِيبَ (6)، فَإِنْ تَوَضَّأَ (7) قُبِلَتْ صَلاتُهُ»☘
☘☘☘☘
تاني يوم..
الجمعه...بعد الفجر..
كانت سدرة مستغله غفلة الجميع..
ومطلعه شيشة ميه الرقيه وقعدت تصب فيها تحت شجر الجنان..
وتقول بعدين انها شربت منها..
هي مش عارفه علاش قاعده دير هكي
حاسة روحها تتصرف من غير اراده منها..
بعد مادارت اللي داراته ولت خشت بالشيشه داخل وردتها لمكانها..
بعدين مشت لدار البنات..
فتحت الباب بهدوء شافت الاء واريج راقدات لكن طوبى مش معاهم استغربت..
رجعت سكرت الباب...ومشت دور عليها في الحوش مالقتهاش..
ولت مرة تانيه للدار اللي فيها البنات..
خشت عليهم..
وجت حداهم وقعدت تنوض في اريج..
سدرة:اريج..اريج..اريج...
فاقت اريج..قعدت حواجبها وقالت بنعس:امم..
سدرة؛طوبى وين؟
اريج وهي بترقد؛جاها جلاجل روح بيها..
ورقدت تاني..
تعجبت سدرة..بعدين ناضت ومشت طلعت من الدار..
شويه ابتسمت ومشت للكوجينه بش دير القهوة...
☘☘☘☘
الساعه 8:30صباحا.
طوبى:لوسمحت اطلع وماتركبش بكل لين نقولك.
ضحك وقال:اخرتي حنشوفها..
طوبى قعدت دف فيه وهي تقول:باهي غير برا..
مشي طلع وهو يضحك..
وهي سكرت وراه الباب..
بعدين مشت للدولاب خدت من جنبه القاعده..
حطتها في وسط الدار..
بعدين خدت اللوحه..ومشت حطتها ع القاعده...
حولت عنها الغطا وهي تشوفلها بإبتسامه حلوة وقالت:خلاص قريب..
تنهدت ومشت للراديو اللي كان محطوط ع طاولة المكتب فتحاته...
وبدت تشتغل الاغاني الصباحيه..
شبحت للفيرندا..
بعدين مشت خدت وشاحها لبساته..
وبعدها مشت فتحتها...
ابتهجت وين شافت الشرفه زاهيه بالالوان..
اخضر..وردي..ابيض واحمر....انتعشت روحها وحست بشعور حلو بالمرة .
فجاة رن تليفونها..
التفتت شافاته ع الزيانه بعدين مشتله..
خداته وردت طول..
طوبى:ايوه..
"امي تبيك تنزلي بش نفطروا مع بعض"
طوبى:تمام جايه..
وسكرت..
مررت نظرها ع الدار وهي مبتسمه بعدين لقت ومشت وطلعت من الدار..
☘وفي الشقه المقابله لدارهم..
كان صاحبها يدير في فطوره..
بعد وتاه مشي قعمز في داره ..
صور سفرة فطوره اللي كان ليها رونق خاص..
صونية زميته..وحداها شاهي اخضر..
وجبنه حوش ونص فرده خبزة فرن..
وطاسة حليب ماعز..
نزلها ع الفيس..
وهو كاتب فوقها..
"صباح الحياة الحلوة"
بعدين حط تليفونه ع تركينه وبدي ياكل..
فجاة قعد يسمع في اغنيه طالعه من راديو صوتها واصل لعنده..
طيري ياطيارة طيري ياورق وخيطان..
بدي ارجع بنت صغيره ع سطح الجيران..
وينساني الزمان ع سطح الجيران..
ابتسم ورجع ياكل...
☘☘☘☘
"معقوله يام يصير هدا كله ومافي حد يعطيني علم!"
مغليه:انت تاعب في الخدمه وقلت تبي تروح ترقد مابيناش نقلقوك خوتك كفوا ووفوا..
طوبى بقلق:باهي شن حالهم العيله؟
مغليه؛تريحوا بعد طمنوا عليه..الحمد ربي لطف فيه..هو في الحادث خشت في حاجه ضربت الحجاب الحاجز...دارتله زي الفتق داروله عليها عمليه اللي خلا حالته خطيره النزيف نزف هلبه..
طوبى بوجع:لاحول ولاقوة الابالله..
الجالي:ربك قدر ولطف..بعد الفطور نمشيله طول..
مغليه:ارفع معاك خديجه تشوفه..
الجالي:وين نرفعها يام اكيد قاعد فى قسم رجال شن بدير ماده وجهها غادي.
مغليه بحزن؛كانك شفت حالتها امس راهي قطعت قلبك..
طوبى:عادي جالي ارفعها تشوفه من بعيد وردها للسياره بعدين..
الجالي بهدوء:لالا مايجيش طوبى..
شبحت طوبى لعزوزتها بأسف..
ومغليه قالت:افطري بنتي افطري..
وولت تاكل طوبى وهي مضايقه من الخبر اللي سمعاته ع الصبح..
☘وفي شقة سلفتها الكبيره..
عائشه:الغدي في حوش العيله اليوم شن تبي ندير..
المهدي وهو يمشط في شعره؛بازين..لكن شوفي باقي العيله شن يبوا..
عائشه؛امك حتقولي المهدي شن يبي واللي تبيه انت يمشي ع الكل..
حط المشط وقال:خلاص بازين غرياني. ياغرياني انت..
ضحكت وهي ترتب في السرير..وهو مشي طلع من حداها..
هي فجأة..
حست بروحها تبي ترجع..
عائشه بضيق:مش وقته..
حاولت تقاوم بس ماقدرتش..
مشت طول للحمام .
خشن وسكرت عليها..
وبدت ترجع في المرحاض..
وهي ترجع..
شافت قطرات دم تنزل مع الترجيع..
وهي داهشه قالت:هادي تاني مرة نشوف فيها دم!..زعما رقبتي تجرحت من قوة الترجيع!؟
دق باب الحمام..
بعدين سمعت المهدي ينادي..
"عيشه"
عائشه وهي تحاول تخلي صوتها عادي:نعم..
فتح الباب وقعد يشوفلها وهو عاقد حواجبه بقلق:شربتي قهوة ولا؟
وقفت ع حيلها وقالت:شويه..جغمه..
المهدي:معاش تقعدلي في حوش..
ولف ومشي وهو معصب..
هي طول سحبت السيفون.
بعدين توضت وضوء الصلاة ومشت طلعت..
سمعاته يقول..
"مش مسامحك تشربي قهوة..وتعرفي كويس كان غضبت عليك لو تحجي الف حجه ماك رابحه"
ضحكت ومشت للكوجينه وهي تقول؛حديث مني هدا!؟
محمد:يام ماتجيش البصاره في المواضيع هادي جرثومه المعده لاقدر الله لاقدرالله..القدام دير سرطان يام مافيش لعب معاها
عائشه:باهي اني اسفه وخودوه مني وعد معاش نطلع عن النظام بكل
المهدي؛واني حذرتك ياعايشه نلقى في الحوش قهوة تشوفي حسابك..
ومشي طلع وفيده شكارة معبيه كياس قهوة..
عائشه:خسارة..
سدرة؛اشربي معانا حليب اني ويزن..
رفع يزن حاجه وهو يشوف لمحمد وقال:حتى محمد ياسوسو.
ابتسم محمد بسخريه..
وعائشه تشوفلهم وهي تضحك...
☘وفي شقة سلفتها اللي فوقها..
عمر:خلاص حبيبي ماتقعديش قالبه وجهك هكي..
اميمه تشرب في القهوة وماتبيش تكلمه..
عمر:عيون عمر..قلب عمر روح عمر..نبي نشوف النقيطات الزرق اللي في وجهك شويه بس..
لفت وجهها عنه وهي شاده ضحكتها..
عمر بإبتسامه:دكتورتي..دواي..براي..
ضحكت بدون صوت ع كلمة"براي"
عمر:داي..همي...بلاي..
التفتت شبحتله وهي تفنص فيه..
هو ضحك بصوت عالي وقعد يقول؛شفتهم شفتهم..
بهزوة قالت:ماهو عبيطه ع قولتك..
شد يدها بإيديه الزوز وقال:اياه عاد حبيبي خلاص فوتي معاش تشدي عليا كلامي..بتخليني نحسب حساب كل كلمة نقولها واني نبي نكون معاك ع طبيعتي..
هدت نفسها وقالت:خليك ع طبيعتك بس بحدود ياعمر من غير ماتجرحني وتجبرني نجرحك..
عمر:خلاص اسف حياتي لو جرحتك امس وضايقتك سامحيني..
ابتسمت وقالت؛خلاص سماح...
عمر:طرف سماح هادي؟.
ضرباته ع يده بيدها التانيه هو تحسسها وقعد يضحك..
🍃وبرا شقتهم..
تحت شويه...شقة التارقي...
خش للدار اللي فيها لوحاته..
عبد القيوم:ليا مدة ماهويتها..
مشي طول لسيرانتي وقامه ببطئ..
قصدا بش يسمعوه في الدار اللي مقابلاته..
فتحه كله..
بعدين سحب الباب..
بانت عليه شرفة الجيران...
منظرها كان حلو بالمرة...
قعد يمرر في نظره عليها وهو يسمع من الراديو..
نحنا والقمر جيران..
بيتو خلف نلالنا..
بيطلع من قبالنا ..
يسمع الألحان..
نحنا والقمر جيران..
عارف مواعيدنا.
وتارك بقرميدنا..
اجمل الالوان..
غيرعيونه عن الشرفه..
جو ع اللوحه..
لما شافها انذهل...
بس حس بشعور اسف مع ازدراء..
تأسف ع حال بنت الواعر اللي كل شي شاف منها من غير مايشوفها يأكد ان الجالي مايستاهلهاش..
الجالي اللي كان مزدريه لأبعد حد ومايشوفش فيه راجل من الأصل..
تنهد بضيق...بعدين لف ومشي طلع من الدار وسكر الباب..
وهي فتحت الباب وخشت وهي تقول:شويه بس..
ومشت بسرعه سكرت باب الفيرندا..
بعدين خدت بالطو الجالي ومشتله بيه ومداته من الباب..
خداه وقال بإبتسامه؛ماتبي شي.؟
طوبى بإبتسامه:سلامتك بس..
الجالي:سلام ياعسل..
طوبى وهي مبتسمه؛سلام..
سكرت الباب..
ومشت طول خدت كيسة ادواتها حطتها ع طاولة المكتب..
بعدين خدت كرسي حطاته قدام اللوحه..
وبدت تكمل في شغلها عليها..
☘☘☘☘☘
في حوش بوها...
اللي كان مقعمز في الممر ع كرسي يراجي في سفرة الفطور..
فجأة..
جاه اتصال..
طلع تليفونه من جيب كبوطه..
ولما شاف المتصل..
قلبه انقبض من الخوف ورد عليه طول...
#اهرجو_يناير
#طوبى
...يتبع...